Tuʼi Fakamau

3 Neʼe tuku e Sehova he ʼu puleʼaga ke nonofo ʼi te fenua, ke ʼahiʼahiʼi ai te kau Iselaele fuli ʼae neʼe mole kau ki te ʼu tau ʼae neʼe hoko ʼi Kanaane.+ 2 (Neʼe ina fai te faʼahi ʼaia ke iloʼi ai e te kau Iselaele ʼo te ʼu taʼiake ki muli mai pe kotea ia te tau, he neʼe mole natou kau ki te ʼu tau ʼaia ki muʼa atu.) 3 Koʼeni te ʼu puleʼaga ʼaia: ko te ʼu ʼaliki ʼe toko nima ʼo te kau Filisitini,+ mo te kau Kanaane fuli, ʼo feia mo te kau Sitoni+ pea mo te kau Hevi+ ʼae neʼe nonofo ʼi te Moʼuga ʼo Lipane,+ ʼi te vaha ʼo te Moʼuga ʼo Paale-helemoni pea mo Lepo-hamate.*+ 4 Neʼe fakaʼaogaʼi te ʼu puleʼaga ʼaia ke ʼahiʼahiʼi ai te kau Iselaele, ke iloʼi ai pe ʼe natou fakalogo anai ki te ʼu fakatotonu ʼa Sehova, ʼae neʼe ina foaki ki ʼanatou kui ʼaki ia Moisese.+ 5 Koia, neʼe maʼuʼuli fakatahi ai te kau Iselaele mo te kau Kanaane,+ mo te kau Heti, mo te kau Amole, mo te kau Pelesite, mo te kau Hevi pea mo te kau Sepusi. 6 Neʼe ʼohoana te kau Iselaele mo te ʼu ʼofafine ʼo te ʼu puleʼaga ʼaia. Pea neʼe natou foaki ʼonatou ʼofafine ke ʼohoana mo te ʼu foha ʼo te ʼu puleʼaga ʼaia, ʼo natou kamata tauhi ai ki ʼonatou ʼatua.+

7 Neʼe fai ai e te kau Iselaele te meʼa ʼae ʼe kovi kia mata ʼo Sehova. Neʼe natou galoʼi ia Sehova tonatou ʼAtua, kae natou tauhi ki te ʼu Paale+ pea mo te ʼu pou ʼakau taputapu.*+ 8 Neʼe to leva te hauhau ʼo Sehova ki Iselaele, pea neʼe ina tuku* natou ki te ʼu nima ʼo te hau ʼo Mesopotamia* ko Kusani-lisataimi. Neʼe popula te kau Iselaele kia Kusani-lisataimi lolotoga taʼu ʼe valu. 9 Pea neʼe tagi leva te kau Iselaele kia Sehova ke tokoni age.+ Pea neʼe filifili e Sehova ia Oteniele ke ina haofaki natou.+ Ko Oteniele,+ neʼe ko te foha ʼo Kenasi, te kiʼi tehina veliveli ʼo Kalepo. 10 Neʼe hifo leva te laumalie ʼo Sehova kia ia,+ pea neʼe liliu ko te tuʼi fakamau ʼo Iselaele. ʼI te alu ʼa Oteniele ki te tau, neʼe tuku e Sehova te hau ʼo Mesopotamia* ko Kusani-lisataimi ki ʼona nima. Pea neʼe malo ia Oteniele ia Kusani-lisataimi. 11 Hili ʼaia, neʼe maʼuli te fenua ʼi te tokalelei lolotoga taʼu ʼe 40. Pea neʼe mate leva ia Oteniele, te foha ʼo Kenasi.

12 Pea neʼe toe fai leva e te kau Iselaele te meʼa ʼae ʼe kovi kia mata ʼo Sehova.+ Pea neʼe tuku ai e Sehova ke malo te hau ʼo Moape ko Ekeloni+ ʼi te kau Iselaele, he neʼe natou fai te meʼa ʼae ʼe kovi kia mata ʼo Sehova. 13 Tahi ʼae meʼa, neʼe uga e Ekeloni ia te kau Amone+ mo te kau Amaleke+ ke natou tauʼi te kau Iselaele. Neʼe tauʼi ai natou e te ʼu puleʼaga ʼaia pea neʼe natou maʼu te kolo ʼo te ʼu fuʼu palema.*+ 14 Neʼe popula te kau Iselaele ki te hau ʼo Moape ko Ekeloni lolotoga taʼu ʼe 18.+ 15 Pea neʼe tagi leva te kau Iselaele kia Sehova ke tokoni age,+ pea neʼe filifili e Sehova ia Euti ke ina haofaki natou.+ Ko Euti,+ neʼe ko te foha ʼo Kela, pea ko te tagata Pesamino+ neʼe hema.+ Ki muli age, neʼe hinoʼi e te kau Iselaele ia Euti ke alu ʼo ʼave te tukuhau ki te hau ʼo Moape ko Ekeloni. 16 Neʼe faʼu e Euti hana heleta matalua, pea neʼe fasiga nima tahi* tona loa. Neʼe ina haʼi tana heleta ki tona kauaga mataʼu, ʼi tona lalo teu. 17 Pea neʼe ina ʼave leva te tukuhau ki te hau ʼo Moape ko Ekeloni. Pea ko Ekeloni neʼe ko he tagata neʼe sino lahi ʼaupito.

18 ʼI tana ʼosi foaki te tukuhau, neʼe toe liliu ia Euti mo te hahaʼi ʼae neʼe natou ʼave te tukuhau ʼaia. 19 Kae ʼi tana kaku atu ki te ʼu fakatata neʼe togi,* ʼae ʼe tuʼu ovi ki Kilekale,+ neʼe toe liliu ia ki te hau, ʼo ui age: “Siʼoku hau, neʼe au haʼu mo he logo ke au fakaha ʼateaina pe kia koe!” Pea neʼe ui e te hau: “Kotou fakalologo!” Pea neʼe mavae leva ʼana hahaʼi gaue fuli. 20 Neʼe fakaovi age ia Euti ki te hau, ʼae neʼe heka tokotahi ʼi tona koga fale fakamokomoko, ʼi te fuga fale. Pea neʼe ui age e Euti: “Neʼe au haʼu mo he logo mai te ʼAtua kia koe.” Neʼe tuʼu ake ai te hau mai tona hekaʼaga fakahau.* 21 Pea neʼe tohoʼi e Euti tana heleta ʼaki tona nima hema, ʼo hukiʼi ʼaki te fatu ʼo te hau. Neʼe ko tana heleta ʼae neʼe ina haʼi ki tona kauaga mataʼu. 22 Neʼe ulu te heleta katoa ki loto ʼo feia mo te fakavaka. Neʼe ʼaofi e te gako ia te heleta he neʼe mole tohoʼi e Euti te heleta mai te fatu ʼo te hau. Pea neʼe haʼu ki tuʼa ʼona faifekau. 23 Neʼe pupunu leva mo lokaʼi e Euti te ʼu matapa ʼo te koga fale ʼae ʼi te fuga fale. Hili ia pea neʼe mavae leva ʼo fakalaka ʼi te fakamalumaluʼaga.* 24 ʼI tana ʼosi mavae, neʼe toe ʼomai te hahaʼi gaue ʼa te hau pea neʼe natou tokagaʼi kua lokaʼi te ʼu matapa ʼo te koga fale. Pea neʼe natou ui: “ ʼE lagi ʼi te tuʼa meʼa,* ʼae ʼe mokomoko.” 25 Neʼe fualoa tanatou talitali, pea ʼi tanatou sisio ʼae neʼe heʼeki avahi e te hau te ʼu matapa ʼo te koga fale, neʼe natou tuʼania ai leva. Neʼe natou toʼo te kalavi ʼo avahi te ʼu matapa. Pea neʼe natou maʼu atu tonatou ʼaliki kua tuku ʼi lalo, kua mate ia!

26 Neʼe hola ia Euti ʼi te temi ʼae neʼe natou talitali ai. Neʼe fakalaka ovi ʼi te ʼu fakatata neʼe togi,*+ pea neʼe tau haohaoa leva ki Seila. 27 ʼI tana tau atu ki ai, neʼe ina pupuhi te fakatagi pupuhi+ ʼi te potu moʼugaʼia ʼo Efalaimi.+ Neʼe hifo te kau Iselaele mai te potu moʼugaʼia, pea neʼe taki natou e Euti. 28 Pea neʼe ina ui age kia natou: “Kotou mulimuli mai, he ʼe kua tuku atu e Sehova ʼokotou fili, ia te kau Moape ki ʼokotou nima.” Neʼe natou mulimuli ai ia ia. Pea neʼe natou puleʼi te ʼu faʼahi ʼo te Solotane ʼae ʼe feala ke fakalaka ai te hahaʼi, ke ʼaua naʼa feholaki te kau Moape ʼi ai. Neʼe mole natou tuku he tahi ke fakalaka ʼi te vai tafe. 29 Neʼe natou matehi ai tagata Moape ʼe 10 000,+ neʼe ko te ʼu tagata malolohi mo lototoʼa fuli. Neʼe mole feala ke hola he tahi.+ 30 ʼI te ʼaho ʼaia, neʼe kamata puleʼi ai e te kau Iselaele ia te kau Moape. Pea neʼe maʼuli te fenua ʼi te tokalelei lolotoga taʼu ʼe 80.+

31 Ko te tuʼi fakamau ʼae neʼe hoa kia Euti, neʼe ko Samika,+ te foha ʼo Anate pea neʼe ina matehi kau Filisitini ʼe 600+ ʼaki he ʼakau masila.*+ Pea neʼe ina toe haofaki foki ia Iselaele.