Tuʼi Fakamau

1 ʼI te ʼosi mate ʼa Sosue,+ neʼe fehuʼi e te kau Iselaele* kia Sehova:+ “Ko ai ia matou ʼae ka ʼuluaki olo ʼo tauʼi te kau Kanaane?” 2 Neʼe tali age e Sehova: “ ʼE ʼuluaki olo anai te telepi ʼo Suta.+ Koʼeni ʼe* au tuku age te fenua kia natou.” 3 Pea neʼe ui e te kau tagata ʼo Suta ki ʼonatou tehina, te kau tagata ʼo Simeone: “Kotou ʼomai mo matou ʼo tauʼi te kau Kanaane ʼi te fenua ʼae kua foaki mai kia matou.+ Hili ʼaia, ʼe matou olo anai mo koutou ki te fenua ʼae kua foaki atu kia koutou.” Neʼe olo ai te kau tagata ʼo Simeone mo natou.

4 ʼI te temi ʼae neʼe olo ai te kau tagata ʼo Suta ki te tau, neʼe tuku leva e Sehova te kau Kanaane mo te kau Pelesite ki ʼonatou nima,+ pea neʼe natou malo ai ʼi te toko 10 000 tagata, ʼi Peseki. 5 Neʼe natou maʼu ia Atoni-peseki ʼi Peseki. Neʼe natou tauʼi ia ia pea neʼe natou malo ʼi te kau Kanaane+ mo te kau Pelesite.+ 6 Kae neʼe hola ia Atoni-peseki. Neʼe natou tuli ia ia ʼo maʼu pea neʼe natou tuʼusi ai ʼona kauʼi tuhi matuʼa mo ʼona kauʼi vaʼe matuʼa. 7 Pea neʼe ui e Atoni-peseki: “Neʼe ko hau ʼe toko 70 ʼae neʼe tuʼusi ʼonatou kauʼi tuhi matuʼa mo kauʼi vaʼe matuʼa pea ʼe natou tae te meʼa kai ʼi toku lalo laupapa. Neʼe toe fai pe e te ʼAtua kia au te meʼa ʼae neʼe au fai ki ʼihi.” Hili ʼaia, neʼe ʼave ia ia ki Selusalemi+ pea neʼe mate ai.

8 Pea tahi ʼae meʼa, neʼe tauʼi e te kau tagata ʼo Suta ia Selusalemi+ pea neʼe natou maʼu te kolo. Neʼe natou matehi te hahaʼi ʼaki te heleta pea mo tutu te kolo. 9 Hili ʼaia, neʼe olo te kau tagata ʼo Suta ʼo tauʼi te kau Kanaane ʼae neʼe nonofo ʼi te potu moʼugaʼia, mo te Nekepe pea mo te Sefela.+ 10 Neʼe olo ai te kau tagata ʼo Suta ʼo tauʼi te kau Kanaane ʼae neʼe nonofo ʼi Hepelone, pea neʼe natou malo ia Sesai, mo Asimani pea mo Talamai. (ʼI muʼa atu, neʼe higoa te kolo ko Hepelone ko Kiliate-alepa.)+

11 Neʼe natou mavae mai ai ʼo olo ʼo tauʼi te hahaʼi ʼo Tepile.+ (ʼI muʼa atu, neʼe higoa te kolo ko Tepile ko Kiliate-sefeli.)+ 12 Pea neʼe ui e Kalepo:+ “ ʼE au foaki anai ia Akesa, toku ʼofafine, ke ʼohoana mo te tagata ʼae ka ina tauʼi pea mo maʼu te kolo ko Kiliate-sefeli.”+ 13 Neʼe maʼu e Oteniele,+ te foha ʼo Kenasi,+ te kiʼi tehina veliveli ʼo Kalepo, ia te kolo. Pea neʼe foaki age leva e Kalepo ia Akesa, tona ʼofafine ke ʼohoana mo ia. 14 ʼI tana alu kio Oteniele, neʼe ina uga tona ʼohoana ke ina kole ki tana tamai* he gaueʼaga. Pea neʼe hifo leva ʼi tana asino.* Neʼe fehuʼi age e Kalepo ki ai: “Kotea ʼae ʼe ke loto ki ai?” 15 Pea neʼe ina tali age: “Fakalelei siʼou loto, ke ke toe tapuakiʼi au, he neʼe ke foaki mai pe he moʼi kele ʼi te potu saute.* Pea ke ke toe foaki mai foki mo Kuloti-maime.”* Koia neʼe foaki age ai e Kalepo ia Kuloti ʼi ʼOluga pea mo Kuloti ʼi Lalo.

16 Pea neʼe mavae fakatahi te hahaʼi ʼo Suta mo te hologa ʼo te tagata Kenite,+ ia te tamai ʼo te ʼohoana ʼo Moisese+ mai te kolo ʼo te ʼu fuʼu palema.*+ Neʼe natou olo ki te toafa ʼo Suta, ʼi te potu saute ʼo Alate,+ pea neʼe natou nonofo ai ʼi te lotolotoiga ʼo te hahaʼi.+ 17 Neʼe olo te kau tagata ʼo Suta mo ʼonatou tehina, te kau tagata ʼo Simeone ʼo tauʼi te kau Kanaane ʼae neʼe nonofo ʼi Sefati. Pea neʼe natou maumauʼi te kolo.+ Koia neʼe fakahigoaʼi ai te kolo ʼaia ko Holema.*+ 18 Hili ʼaia, neʼe maʼu e Suta ia Kasa+ pea mo te ʼu kolo liliki ʼae ʼi ʼona tafaʼaki, mo Asekaloni+ pea mo te ʼu kolo liliki ʼae ʼi ʼona tafaʼaki, pea mo Ekelone+ pea mo te ʼu kolo liliki ʼae ʼi ʼona tafaʼaki. 19 Neʼe nofo ia Sehova mo te kau tagata ʼo Suta pea neʼe natou maʼu te potu moʼugaʼia. Kae neʼe mole feala ke natou kapu te hahaʼi ʼae neʼe nonofo ʼi te potu fenua laulelei, he neʼe natou maʼu ʼanatou saliote ʼe fakapipiki ai he ʼu hele ʼi te ʼu foʼi teka.*+ 20 Neʼe foaki ia te kolo ko Hepelone kia Kalepo, ohage pe ko tona fakapapau age e Moisese,+ pea neʼe ina kapu mai ai te ʼu foha ʼe toko tolu ʼo Anake.+

21 Kae neʼe mole kapu e te kau Pesamino ia te kau Sepusi ʼae neʼe nonofo ʼi Selusalemi. Koia ʼe kei nonofo pe te kau Sepusi mo te kau Pesamino ʼi Selusalemi ʼo kaku mai ki te ʼaho nei.+

22 Lolotoga te temi ʼaia, neʼe alu te hologa ʼo Sosefo+ ʼo tauʼi ia Petele, pea neʼe nofo ia Sehova mo natou.+ 23 Neʼe natou fekauʼi he ʼu tagata ke olo ʼo vakaʼi fakafufu ia Petele. (ʼI muʼa atu, neʼe higoa te kolo ʼaia ko Lusi.)+ 24 ʼI te tahi ʼaho, neʼe sisio te ʼu tagata ʼae neʼe olo ʼo vakaʼi fakafufu te kolo ki he tagata neʼe haʼu mai te kolo. Neʼe natou ui age ki ai: “Fakalelei siʼou loto, kae ke ke fakaha mai pe ʼe feafeaʼi hamatou hu ki te kolo, pea ʼe matou agalelei anai kia koe.”* 25 Neʼe fakaha age ai e te tagata pe ʼe feafeaʼi hanatou hu ki te kolo. Pea neʼe natou matehi te hahaʼi ʼo te kolo ʼaki te heleta, kae neʼe natou tuku ke alu te tagata mo tona famili katoa.+ 26 Neʼe alu ai te tagata ki te fenua ʼo te kau Heti ʼo laga he kolo, pea neʼe ina fakahigoaʼi ko Lusi. ʼE ko tona higoa pe ʼaia ʼo kaku mai ki te ʼaho nei.

27 Neʼe mole maʼu e Manase ia Pete-seani mo te ʼu kolo liliki ʼae ʼi ʼona tafaʼaki, mo Taanake+ mo te ʼu kolo liliki ʼae ʼi ʼona tafaʼaki, mo te hahaʼi ʼo Tole mo te ʼu kolo liliki ʼae ʼi ʼona tafaʼaki, mo te hahaʼi ʼo Sipeleami mo te ʼu kolo liliki ʼae ʼi ʼona tafaʼaki, pea mo te hahaʼi ʼo Mekito mo te ʼu kolo liliki ʼae ʼi ʼona tafaʼaki.+ Neʼe mole fia mavae te kau Kanaane ʼi te ʼu kolo ʼaia. 28 ʼI te temi ʼae neʼe liliu ai te kau Iselaele ʼo malolohi, neʼe natou fakamaʼua ki te kau Kanaane ke natou gaue ohage ko he ʼu kaugana.+ Kae neʼe mole natou kapu ia natou fuli.+

29 Neʼe mole toe kapu foki e te kau Efalaimi ia te kau Kanaane ʼae neʼe nonofo ʼi Kesele. Neʼe hoko atu pe te nonofo ʼa te kau Kanaane mo natou ʼi Kesele.+

30 Neʼe mole kapu e te telepi ʼo Sepulone te hahaʼi ʼo Kitisoni pea mo te hahaʼi ʼo Naaloli.+ Neʼe hoko atu pe te nonofo ʼa te kau Kanaane mo natou, pea neʼe fakamaʼua age ke natou gaue ohage ko he ʼu kaugana.+

31 Neʼe mole kapu e te telepi ʼo Asele te hahaʼi ʼo Ako, mo te hahaʼi ʼo Sitoni,+ ʼo feia mo te hahaʼi ʼo Aselale, mo Akesipe,+ mo Elipa, mo Afike+ pea mo Leopi.+ 32 Neʼe nonofo ai te kau Asele mo te kau Kanaane ʼo te ʼu kolo ʼaia, koteʼuhi neʼe mole natou kapu ia natou.

33 Neʼe mole kapu e te telepi ʼo Nefetali te hahaʼi ʼo Pete-semesi pea mo te hahaʼi ʼo Pete-anati.+ Neʼe nonofo ai te kau Nefetali mo te kau Kanaane ʼo te ʼu kolo ʼaia.+ Neʼe natou fakamaʼua ki te hahaʼi ʼo Pete-semesi pea mo Pete-anati ke natou gaue ohage ko he ʼu kaugana.

34 Neʼe mole tali e te kau Amole ke hifo te kau Tane ki te potu fenua laulelei, koia neʼe natou fakamaʼua ai ke natou nonofo ʼi te potu moʼugaʼia.+ 35 Neʼe mole fia mavae ai te kau Amole mai te Moʼuga ʼo Helesi, mo Asaloni+ pea mo Saalipimi.+ Kae neʼe liliu leva te hologa ʼo Sosefo ʼo malohi, pea neʼe natou fakamaʼua ai kia natou ke natou fai he ʼu gaue kinakina. 36 Neʼe kamata te fenua ʼo te kau Amole mai te mahake ʼo Akilakimi,+ pea mai Selea ʼo kaku ki te potu moʼugaʼia.