Tuʼi Fakamau

9 Ki muli age, neʼe alu ia Apimeleke,+ te foha ʼo Selupaale ki te ʼu tokolua ʼo tana faʼe ʼi Sekemi. Pea neʼe ina ui age kia natou ʼo feia mo te famili katoa ʼo tana kui:* 2 “Fakalelei siʼokotou loto, kotou fehuʼi age ki te kau pule fuli ʼo* Sekemi: ‘Kotea ʼae ʼe kotou leleiʼia age, ke puleʼi koutou e te ʼu foha fuli ʼo Selupaale+ ʼae ʼe toko 70 peʼe ke puleʼi koutou e he tagata pe ʼe tahi? Kotou manatuʼi ʼe tou kaiga totonu.’ ”*

3 Neʼe fakahoko e te ʼu tokolua ʼo tana faʼe ʼana palalau ki te ʼu pule fuli ʼo Sekemi. Pea neʼe natou fai leva te tonu ʼae ke natou muliʼi ia Apimeleke, he neʼe natou ui: “ ʼE ko totatou tehina.” 4 Pea neʼe natou foaki age ki ai foʼi piesi siliva ʼe 70 neʼe toʼo mai te fale lotu* ʼo Paale-pelite.+ Neʼe fakaʼaogaʼi e Apimeleke te ʼu piesi ʼaia moʼo totogi ʼaki he ʼu tagata neʼe tataka noa mo agapauʼu ke natou muliʼi ia ia. 5 Pea neʼe alu ki te ʼapi ʼo tana tamai ʼi Ofala+ ʼo matehi ai ʼona tehina,+ te ʼu foha ʼe toko 70 ʼo Selupaale ʼi he fuʼu maka pe ʼe tahi. Neʼe ko Sotame pe ʼae neʼe hao, te foha muli ʼo Selupaale, he neʼe nono.

6 Hili ʼaia, neʼe fakatahitahi te kau pule fuli ʼo Sekemi pea mo Pete-milo katoa ke natou fakanofo hau ia Apimeleke.+ Neʼe fai te faʼahi ʼaia ʼo ovi ki te fuʼu ʼakau lahi pea mo te pou ʼae neʼe tuʼu ʼi Sekemi.

7 Neʼe fakaha age te faʼahi ʼaia kia Sotame. Neʼe hake atu aipe ki te tumutumu ʼo te Moʼuga ʼo Kalisimi ʼo tuʼu ai.+ Pea neʼe ina ui leʼo lahi age kia natou: “Kau pule ʼo Sekemi, kotou fakalogo mai pea ʼe fakalogo atu anai ia te ʼAtua:

8 “ ʼI te tahi ʼaho, neʼe olo he ʼu fuʼu ʼakau ʼo fakanofo* honatou hau. Pea neʼe natou ui ki te fuʼu oliveto: ‘Ke ke pule kia matou.’+ 9 Kae neʼe tali age e te fuʼu oliveto kia natou: ‘ ʼE mole leva au liʼaki taku fai taku lolo ʼae ʼe fakaʼaogaʼi moʼo fakakololiaʼi te ʼAtua pea mo te tagata, kae au alu ʼo puleʼi* he tahi ʼu fuʼu ʼakau!’ 10 Pea neʼe ui e te ʼu fuʼu ʼakau ki te fuʼu fiku: ‘Haʼu ʼo pule kia matou.’ 11 Kae neʼe tali age e te fuʼu fiku kia natou: ‘ ʼE mole leva au liʼaki ʼoku fua ʼae ʼe malie mo kano lelei, kae au alu ʼo puleʼi he tahi ʼu fuʼu ʼakau!’ 12 Pea neʼe ui e te ʼu fuʼu ʼakau ki te fuʼu vite: ‘Haʼu ʼo pule kia matou.’ 13 Kae neʼe tali age e te fuʼu vite kia natou: ‘ ʼE mole leva au liʼaki taku vino foʼou ʼae ʼe ina fakafiafiaʼi te ʼAtua pea mo te tagata, kae au alu ʼo puleʼi he tahi ʼu fuʼu ʼakau!’ 14 Pea neʼe ui leva e te ʼu fuʼu ʼakau fuli ʼae ki te kiʼi fuʼu ʼakau talatala: ‘Haʼu ʼo pule kia matou.’+ 15 Pea neʼe tali age e te kiʼi fuʼu ʼakau talatala ki te ʼu fuʼu ʼakau: ‘Kapau ʼe kotou fia fakanofo moʼoni au ko hokotou hau, kotou ʼomai ʼo fakamalumalu ia au. Kae kapau ʼe mole kotou loto ki ai, ʼe alu atu anai he afi mai ia au ʼo tutu te ʼu fuʼu sete ʼo Lipane.’

16 “Koia kotou fakakaukauʼi age muʼa ia te faʼahi ʼaeni: Neʼe lelei koa te meʼa ʼae neʼe kotou fai ʼi takotou fakanofo hau ia Apimeleke?+ Neʼe kotou fai fakamalotoloto koa te faʼahi ʼaia? Neʼe kotou agalelei koa kia Selupaale pea mo tona famili? Neʼe kotou fakaha age koa ki ai te fakaʼapaʼapa ʼae ʼe tuha mo ia? 17 Neʼe tau taku tamai maʼa koutou+ pea neʼe feala pe ke mate ʼi tana haofaki koutou mai te ʼu nima ʼo te kau Matiane.+ 18 Kae ʼi te ʼaho nei, kua kotou fakafeagai ki te famili ʼo taku tamai, pea neʼe kotou matehi ʼona foha ʼae ʼe 70 ʼi he fuʼu maka pe ʼe tahi.+ Hili ʼaia, neʼe kotou fakanofo ia Apimeleke ke hau ki te ʼu pule ʼo Sekemi, koteʼuhi ko tokotou tehina ʼaia. Pea ko Apimeleke ko te foha ʼo taku tamai ʼae neʼe ina maʼu mo tana fafine kaugana.+ 19 Koia, kapau ʼe lelei kia koutou te meʼa ʼae kua kotou fai kia Selupaale mo tona famili ʼi te ʼaho nei, pea kapau ʼe kotou fai fakamalotoloto ia te faʼahi ʼaia, kotou fakafiafia ʼo ʼuhiga mo Apimeleke pea ke toe fiafia foki ia ia ʼo ʼuhiga mo koutou. 20 Kae kapau ʼe mole koia ʼaia, ke haʼu he afi mai ia Apimeleke ʼo tutu te kau pule ʼo Sekemi pea mo Pete-milo,+ pea ke haʼu he afi mai te kau pule ʼo Sekemi pea mo Pete-milo ʼo tutu ia Apimeleke.”+

21 Neʼe hola leva ia Sotame+ ʼo alu ki Peele. Pea neʼe nofo ai he neʼe mataku ʼi tona tehina ko Apimeleke.

22 Neʼe pule leva ia Apimeleke ki Iselaele* lolotoga taʼu ʼe tolu. 23 Pea neʼe tuku leva e te ʼAtua ke fefehiʼaʼaki ia Apimeleke mo te kau pule ʼo Sekemi, pea neʼe kakaʼi e te kau pule ʼo Sekemi ia Apimeleke. 24 Neʼe tonu foki ke fai he lagavaka ki te tamateʼi ʼo te ʼu foha ʼe 70 ʼo Selupaale pea ke tauteaʼi ia natou ʼae neʼe natou fai he ligi toto. Neʼe tonu ke fai te faʼahi ʼaia kia Apimeleke, he neʼe ina matehi ʼona tehina,+ ʼo feia mo te kau pule ʼo Sekemi he neʼe natou tokoni ki ai ki tonatou tamateʼi. 25 Koia, neʼe fakatuʼu ai e te kau pule ʼo Sekemi he ʼu tagata ʼi te tumutumu ʼo te ʼu moʼuga ke natou fenonoʼi ai ʼo ʼohofi ia ia. Neʼe kaihaʼa e te ʼu tagata ʼaia te ʼu koloa ʼo natou fuli ʼae neʼe fakalaka ʼi te ala ʼaia. Pea neʼe fakaha leva te faʼahi ʼaia kia Apimeleke.

26 ʼI te tahi ʼaho, neʼe alu ia Kaali, te foha ʼo Epeti, mo ʼona tehina ki Sekemi.+ Pea neʼe falala leva te kau pule ʼo Sekemi ki ai. 27 Neʼe olo te ʼu tagata ʼo Sekemi ki tuʼa atu ʼo te kolo ʼo toli te ʼu vite ʼo ʼanatou gaueʼaga vite pea mo malamalaki moʼo fai ʼaki hanatou vino. Pea neʼe natou fakafiafia leva. Hili ʼaia, neʼe natou hu ki te fale lotu ʼo tonatou ʼatua,+ ʼo kakai mo iinu ai. Neʼe natou laukovi ai kia Apimeleke. 28 Pea neʼe ui e Kaali, te foha ʼo Epeti: “Ko ai ia Apimeleke pea ko ai ia Sekemi* ke matou gaue maʼa naua? ʼE mole ko Apimeleke koa la te foha ʼo Selupaale,+ pea ko Sepule tana tagata fakafofoga? Kotou hoko atu takotou gaue ki te ʼu tagata ʼa Amole, te tamai ʼa Sekemi! Kae he koʼe ʼe matou gaue anai matou kia Apimeleke? 29 Ka na neʼe fakalogo mai la te hahaʼi ʼaeni kia au, ʼe au fakahifo anai ia Apimeleke!” Pea neʼe ina ui age kia Apimeleke: “Ke ke fakatahiʼi ʼau tagata solia ke lahi pea ke haʼu ke ta tau.”

30 Neʼe logo leva ia Sepule, te pule ʼo te kolo, ki te ʼu palalau ʼae neʼe fai e Kaali, te foha ʼo Epeti, pea neʼe kovi ʼosi ai tona ita. 31 Neʼe ina fekauʼi fakafufu ai he ʼu tagata ʼave logo ke olo ʼo ui age kia Apimeleke: “ ʼE nofo nei ia Kaali, te foha ʼo Epeti mo ʼona tehina ʼi Sekemi, pea ʼe natou uga te hahaʼi ʼo te kolo ke natou fakafeagai kia koe. 32 Koia ke ke haʼu mo ʼau tagata ʼi te poʼuli, pea kotou fenonoʼi ʼi tuʼa atu ʼo te kolo. 33 ʼI te ʼaho ake, ʼe ke alu uhuuhu anai ʼo ʼohofi te kolo, moka hopo ake te laʼa. Ka alu atu mo ʼana tagata ʼo tauʼi ia koe, fai ia meʼa fuli ʼe ke lavaʼi ke ke malo ia ia.”*

34 Neʼe olo ai leva ia Apimeleke mo ʼana tagata ʼae neʼe fakatahi mo ia, ʼi te poʼuli. Neʼe natou vae fa pea neʼe natou fenonoʼi ʼo ovi ki Sekemi. 35 ʼI te temi ʼae neʼe haʼu ai ia Kaali, te foha ʼo Epeti ʼo tuʼu ʼi te huʼaga ʼo te matapa ʼo te kolo, neʼe mavae ia Apimeleke mo ʼana tagata mai te ʼu faʼahi ʼae neʼe natou fenonoʼi ai. 36 ʼI te sio ʼa Kaali ki te ʼu tagata ʼaia, neʼe ina ui kia Sepule: “Sio, ʼe ʼi ai ni hahaʼi ʼe hihifo mai te tumutumu ʼo te ʼu moʼuga.” Kae neʼe tali age e Sepule ki ai: “Ko te ʼata ʼaena ʼo te ʼu moʼuga ʼae ʼe ke ui ko ni tagata.”

37 Ki muli age, neʼe toe ui e Kaali: “Sio, ʼe hihifo mai ni hahaʼi, ʼe ʼomai mai te loto fenua, pea ʼe haʼu he tahi kutuga ʼi te ala ʼo te fuʼu ʼakau lahi ʼo te kau Meonime.” 38 Neʼe tali age e Sepule ki ai: “ ʼE mole kei ke fiameʼameʼa leva koe! Kae neʼe ke ui: ‘Ko ai ia Apimeleke ke matou gaue kia ia?’+ ʼE mole koa la ko te hahaʼi ʼaena neʼe ke fehiʼa ki ai? Koia ʼi te lakaga nei, alu ʼo tauʼi ia natou!”

39 Neʼe alu ai ia Kaali ʼo taki te kau pule ʼo Sekemi, ʼo natou olo ai ʼo tauʼi ia Apimeleke. 40 Neʼe hola ai ia Kaali. Pea neʼe tuli ia ia e Apimeleke. Neʼe kaugamalie te ʼu tagata ʼae neʼe matematehi ʼi te ala ʼo kaku ki te huʼaga ʼo te matapa ʼo te kolo.

41 Pea neʼe haga nofo aipe ia Apimeleke ʼi Aluma. Kae neʼe kapu e Sepule+ ia Kaali mo ʼona tehina ʼi Sekemi. 42 ʼI te ʼaho ake, neʼe olo te hahaʼi ki tuʼa atu ʼo te kolo, pea neʼe fakaha age kia Apimeleke. 43 Neʼe alu ia Apimeleke mo ʼana tagata ʼo ina vae tolu natou, pea neʼe natou fenonoʼi ʼi tuʼa atu ʼo te kolo. ʼI tana sio ki te ʼomai ʼa te hahaʼi mai te kolo, neʼe ina ʼohofi pea mo matehi ia natou. 44 Neʼe feleleʼi ia Apimeleke mo te ʼu tagata ʼae neʼe fakatahi mo ia ʼo tutuʼu ʼi te huʼaga ʼo te matapa ʼo te kolo. Kae neʼe ʼohofi e te ʼu kutuga ʼe lua ia natou fuli ʼae neʼe nonofo ʼi tuʼa atu ʼo te kolo, pea neʼe natou matehi natou. 45 Neʼe tauʼi e Apimeleke te kolo ʼi te ʼaho katoa ʼaia, pea neʼe ina maʼu leva. Neʼe ina matehi te hahaʼi pea mo maumauʼi te kolo.+ Pea neʼe ina laku leva ki ai te masima.

46 ʼI te logo ʼa te kau pule fuli ʼo te tule ʼo Sekemi ki te faʼahi ʼaia, neʼe natou olo atu aipe ʼo fenonoʼi ʼi he koga fale ʼo* te fale lotu* ʼo Ele-pelite.+ 47 Neʼe fakaha leva kia Apimeleke kua fakatahitahi te kau pule fuli ʼo te tule ʼo Sekemi. 48 Neʼe hake atu aipe ia Apimeleke mo te ʼu tagata fuli ʼae neʼe fakatahi mo ia ki te Moʼuga ʼo Tesalemone. Neʼe toʼo leva e Apimeleke he toki ʼo taʼaga ʼaki he vaʼa ʼakau, pea neʼe ina hili ki tona fuga ʼuma. Pea neʼe ina ui ki te ʼu tagata ʼae neʼe fakatahi mo ia: “Ko te meʼa ʼaeni neʼe au fai, kotou toe fai mo koutou. Kotou foimo fai te faʼahi ʼaia!” 49 Koia neʼe taʼaga ai e te ʼu tagata fuli he ʼu vaʼa ʼakau pea neʼe natou muliʼi leva ia Apimeleke. Neʼe natou fakatuʼu ʼanatou vaʼa ʼakau ki te koga fale pea neʼe natou tutu ai. Koia neʼe toe mamate ai foki mo te hahaʼi fuli ʼo te tule ʼo Sekemi, ko tagata mo fafine ʼe teitei toko 1 000.

50 Pea neʼe alu leva ia Apimeleke ki Tepesi. Neʼe ina ʼohofi te kolo ʼo ina maʼu. 51 Neʼe tuʼu ʼi te loto kolo ʼaia he tule, pea neʼe olo te hahaʼi tagata mo fafine, ʼo feia mo te kau pule fuli ʼo te kolo ʼo fenonoʼi ai. Neʼe natou fakamaʼumaʼu te tule kae natou nonofo ʼi loto. Hili ʼaia, neʼe natou fekakeʼi ki te ʼato ʼo te tule. 52 Neʼe lava kaku ki ai ia Apimeleke ʼo tauʼi. Neʼe fakaovi ki te huʼaga ʼo te tule ke ina tutu. 53 Neʼe fakato ifo leva e he fafine he foʼi maka momosi fulumeto ki te foʼi ʼulu ʼo Apimeleke, ʼo foa ai tona ʼulu.+ 54 Neʼe ina foimo pauʼi atu aipe tana tagata toʼo mahafu ʼo ina ui age ki ai: “Tohoʼi ake tau heleta pea ke ke matehi au, ke mole ui ai e he tahi ʼo ʼuhiga mo au: ‘Neʼe matehi ia ia e he fafine.’ ” Neʼe hukiʼi ai ia ia e tana tagata toʼo mahafu ʼo mate ai.

55 Neʼe sisio leva te ʼu tagata ʼo Iselaele kua mate ia Apimeleke, pea neʼe natou toe liliu fuli ai kio natou. 56 Koia, neʼe liufaki ai e te ʼAtua kia Apimeleke te meʼa kovi ʼae neʼe ina fai ki tana tamai, ʼi tana matehi ʼona tehina ʼe toko 70.+ 57 Neʼe toe liufaki foki e te ʼAtua ki te ʼu tagata ʼo Sekemi tanatou agakovi fuli. Koia neʼe hoko ai kia natou te malaʼia ʼae neʼe tala e Sotame,+ te foha ʼo Selupaale.+