Tuʼi Fakamau
10 Hili te temi ʼo Apimeleke, neʼe kamata haofaki leva e Tola ia Iselaele.+ Ko Tola neʼe ko te foha ʼo Pua, te foha ʼo Toto pea neʼe ko te tagata mai te telepi ʼo Isakale. Neʼe maʼuli ʼi Samili, ʼi te potu moʼugaʼia ʼo Efalaimi. 2 Neʼe ina fakamauʼi ia Iselaele lolotoga taʼu ʼe 23. Neʼe mate leva pea neʼe ʼavaifo ʼi Samili.
3 Hili te temi ʼo Tola, neʼe ko Saile, te tagata Kileate ʼae neʼe ina fakamauʼi ia Iselaele lolotoga taʼu ʼe 22. 4 Neʼe maʼu e Saile ʼona foha ʼe toko 30. Neʼe natou tahi maʼu tana asino mo tona kolo. ʼE kei higoa pe te ʼu kolo ʼaia ʼe 30 ko Havote-saile+ ʼo kaku mai ki te ʼaho nei. Pea ʼe tuʼu te ʼu kolo ʼaia ʼi te fenua ʼo Kileate. 5 Neʼe mate leva ia Saile pea neʼe ʼavaifo ʼi Kamoni.
6 Neʼe toe fai leva e te kau Iselaele te meʼa ʼae ʼe kovi kia mata ʼo Sehova.+ Neʼe natou tauhi ki te ʼu Paale,+ mo te ʼu fakatata ʼo Asetolete, mo te ʼu ʼatua ʼo Alame,* mo te ʼu ʼatua ʼo Sitoni, mo te ʼu ʼatua ʼo Moape,+ mo te ʼu ʼatua ʼo te kau Amone,+ pea mo te ʼu ʼatua ʼo te kau Filisitini.+ Neʼe natou liʼaki ia Sehova pea neʼe mole natou toe tauhi kia te ia. 7 Neʼe to leva te hauhau ʼo Sehova ki Iselaele, pea neʼe ina tuku* ai natou ki te ʼu nima ʼo te kau Filisitini pea mo te kau Amone.+ 8 ʼI te taʼu ʼaia, neʼe gaohi koviʼi pea mo fakamamahiʼi lahi e te hahaʼi ʼaia te kau Iselaele. Pea neʼe natou gaohi koviʼi te kau Iselaele lolotoga taʼu ʼe 18. Neʼe ko te kau Iselaele fuli ʼaia neʼe nonofo ʼi te fenua ʼo te kau Amole, ʼi Kileate, ʼi te potu esite ʼo te Solotane. 9 Neʼe toe fakalaka foki ia te kau Amone ʼi te Solotane ke natou olo ʼo tauʼi te ʼu telepi ʼo Suta, mo Pesamino, pea mo Efalaimi. Neʼe lotomamahi ʼaupito ai ia Iselaele. 10 Neʼe fetagihi leva te kau Iselaele kia Sehova ke tokoni age,+ ʼo natou ui: “Neʼe matou agahala kia te koe, he neʼe matou liʼaki ia koe ʼae ko tomatou ʼAtua, kae matou tauhi ki te ʼu Paale.”+
11 Kae neʼe tali e Sehova ki te kau Iselaele: “Neʼe mole au haofaki koa la ia koutou mai te kau Esipito,+ mo te kau Amole,+ mo te kau Amone, mo te kau Filisitini,+ 12 mo te kau Sitoni, mo Amaleke pea mo Matiane ʼi tanatou fakamamahiʼi koutou? Neʼe kotou tagi mai ke au tokoni atu, pea neʼe au haofaki koutou mai ʼonatou nima. 13 Kae neʼe kotou liʼaki au pea neʼe kotou tauhi ki he tahi age ʼu ʼatua.+ Koia ʼe mole au toe haofaki anai koutou.+ 14 Kotou pauʼi te ʼu ʼatua ʼae neʼe kotou filifili. Pea kotou kole age ke natou tokoni atu+ pea ke natou haofaki koutou ʼi te temi ʼaeni ʼe kotou lotomamahi ai!”+ 15 Kae neʼe ui e te kau Iselaele kia Sehova: “Neʼe matou agahala. Ke ke fai kia matou te meʼa ʼae ʼe ke loto ki ai. Kae fakalelei siʼou loto, ke ke haofaki matou ʼi te ʼaho nei.” 16 Pea neʼe natou pulihi ʼi te fenua te ʼu ʼatua matapule kae natou tauhi pe kia Sehova.+ Koia neʼe mole kei ina lava katakiʼi ai tana sio ki te mamahi ʼa te kau Iselaele.+
17 Ki muli age, neʼe fakatahitahiʼi e te kau Amone+ ʼanatou solia, pea neʼe natou fakatuʼu tonatou nofoʼaga ʼi te potu fenua ʼo Kileate. Pea neʼe fakatahitahi leva te kau Iselaele ʼo natou fakatuʼu tonatou nofoʼaga ʼi Misipa. 18 Neʼe feuiʼaki e te hahaʼi pea mo te kau pule ʼo Kileate: “Ko ai ʼae ka ina taki anai tatou ʼi tatatou olo ʼo tauʼi te kau Amone?+ Ke liliu ia ia ʼaia ko te pule ʼo te hahaʼi fuli ʼo Kileate!”