Tuʼi Fakamau
12 Neʼe fakatahiʼi leva te ʼu tagata ʼo Efalaimi pea neʼe natou fakalaka ʼi te vai tafe ʼo olo ki Tesafoni.* Pea neʼe natou ui age kia Sefeteo: “He koʼe neʼe mole ke pauʼi mai ʼi tau alu* ʼae ʼo tauʼi te kau Amone?+ ʼE matou tutu anai tou ʼapi pea mo koe.” 2 Kae neʼe tali age e Sefeteo kia natou: “Neʼe au tau mo taku hahaʼi pea mo he toe feagai lahi mai te kau Amone. Pea neʼe au kole tokoni atu, kae neʼe mole kotou ʼomai ʼo haofaki au. 3 ʼI taku sio ʼae ʼe mole kotou ʼomai anai ʼo tokoni mai, neʼe au toʼo ai te tonu ʼae ke au alu ʼo tauʼi te kau Amone.+ Neʼe au alu ai ʼo tauʼi natou tatau aipe pe neʼe feala ke tuʼutamakiʼia ai toku maʼuli.* Pea neʼe tuku leva e Sehova ia natou ki ʼoku nima. Koia he koʼe ʼe kotou ʼomai leva ʼi te ʼaho nei ʼo tauʼi au?”
4 Neʼe fakatahiʼi ai e Sefeteo te ʼu tagata fuli ʼo Kileate pea neʼe natou tauʼi te kau Efalaimi. Pea neʼe malo te ʼu tagata ʼo Kileate+ ʼi te kau Efalaimi, ʼae neʼe natou ui: “Ko koutou ʼu tagata ʼo Kileate, ʼe kotou nonofo ʼi te ʼu fenua ʼo Efalaimi pea mo Manase, kae neʼe kotou feholaki mai Efalaimi.” 5 Neʼe lava maʼu e te ʼu tagata ʼo Kileate te ʼu faʼahi ʼae ʼe feala ke fakalaka ai te hahaʼi ʼi te Solotane.+ Neʼe natou fakatuʼu ʼi ai he ʼu tagata ke mole feholaki te kau Efalaimi. Pea ka ui e he tagata Efalaimi: “Tuku ke au fakalaka,” neʼe fehuʼi age e te ʼu tagata ʼo Kileate: “Ko koe ko he Efalaimi?” Pea ka ina tali age: “Kailoa!” 6 neʼe natou ui age ki ai: “Fakalelei siʼou loto, ke ke ui Hipoleti.” Kae neʼe ina ui “Sipoleti” he neʼe mole feala ke ina puʼaki fakalelei ia te kupu ʼaia. Neʼe natou puke ai ia ia ʼo matehi ʼo ovi ki te ʼu faʼahi ʼae ʼe feala ke fakalaka ai te hahaʼi ʼi te Solotane. Koia neʼe mamate ai te ʼu tagata Efalaimi ʼe toko 42 000 ʼi te temi ʼaia.
7 Neʼe fakamauʼi e Sefeteo ia Iselaele lolotoga taʼu ʼe ono. Neʼe mate leva ia Sefeteo, te tagata Kileate, pea neʼe ʼavaifo ʼi tona kolo ʼi Kileate.
8 Hili te temi ʼo Sefeteo, neʼe fakamauʼi e Ipisani, te tagata mai Petelehemi ia Iselaele.+ 9 Neʼe ko ʼona foha ʼe 30 pea mo ʼona ʼofafine ʼe 30. Neʼe ina foaki ʼona ʼofafine ke ʼohoana mo he ʼu tagata neʼe mole kau ki tona famili. Pea neʼe ina ʼaumai he ʼu fafine ʼe 30 ke ʼohoana mo ʼona foha. Neʼe ina fakamauʼi ia Iselaele lolotoga taʼu ʼe fitu. 10 Neʼe mate leva ia Ipisani pea neʼe ʼavaifo ʼi Petelehemi.
11 Hili te temi ʼo Ipisani, neʼe fakamauʼi e Eloni, te tagata Sepulone, ia Iselaele lolotoga taʼu ʼe hogofulu. 12 Neʼe mate leva ia Eloni, te tagata Sepulone pea neʼe ʼavaifo ʼi Asaloni ʼi te fenua ʼo te telepi ʼo Sepulone.
13 Hili te temi ʼo Eloni, neʼe fakamauʼi e Apitoni, te foha ʼo Ilele, te tagata Pilatoni ia Iselaele. 14 Neʼe ko ʼona foha ʼe 40 pea mo ʼona mokopuna tagata ʼe 30, pea neʼe natou tahi heka ki tana asino. Neʼe ina fakamauʼi ia Iselaele lolotoga taʼu ʼe valu. 15 Neʼe mate leva ia Apitoni, te foha ʼo Ilele, te tagata Pilatoni. Pea neʼe ʼavaifo ʼi Pilatoni, ʼi te fenua ʼo te telepi ʼo Efalaimi, ʼi te moʼuga ʼo te kau Amaleke.+