Tuʼi Fakamau
14 Neʼe hifo leva ia Samisoni ki Timenea. Pea neʼe ina tokagaʼi ʼi ai he taʼahine Filisitini. 2 Neʼe alu ai ʼo ui ki tana tamai mo tana faʼe: “Neʼe au tokagaʼi he taʼahine Filisitini ʼi Timenea, pea ʼe au loto ke kolua olo ʼo kole ke ʼohoana mo au.” 3 Kae neʼe ui age e tana tamai mo tana faʼe: “ ʼE mole feala koa la ke ke maʼu he taʼahine ʼi ʼou kaiga peʼe ʼi tatatou hahaʼi?+ ʼE tonu koa ke ke kumi hou ʼohoana ʼi te kau Filisitini heʼe silikosisio ʼaia?”* Kae neʼe tali e Samisoni ki tana tamai: “Fakalelei siʼou loto, alu koe ʼo kole ke ʼohoana mo au he ʼe ko ia ʼae ʼe au loto ki ai.” 4 Neʼe mole iloʼi e tana tamai mo tana faʼe neʼe takitaki e Sehova te aluʼaga ʼaia, he neʼe Ina* kumi he faigamalie ke ina tauʼi te kau Filisitini. ʼI te temi ʼaia, neʼe puleʼi e te kau Filisitini ia Iselaele.+
5 Neʼe hifo leva ia Samisoni mo ʼana matuʼā ki Timenea. ʼI tana tau atu ki te ʼu gaueʼaga vite ʼo Timenea, fokifa pe neʼe ʼoho age ki ai he laione neʼe gugulu. 6 Pea neʼe hifo leva te laumalie ʼo Sehova kia Samisoni, ʼo ina maʼu ai he malohi.+ Neʼe ina haeʼi lua te laione ʼaki pe ʼona nima, ohage pe ko te haeʼi lua ʼo he tao kei mui. Kae neʼe mole ina fakamatala age ki ʼana matuʼā te meʼa ʼaia neʼe ina fai. 7 Neʼe hifo leva ki Timenea pea neʼe faipalalau mo te taʼahine Filisitini. Neʼe kei loto pe e Samisoni ke ʼohoana mo te taʼahine ʼaia.+
8 Ki muli age, neʼe toe liliu ki Timenea ke ina ʼave te taʼahine kio ia.+ Kae neʼe afe muʼa ʼo vakaʼi te laione ʼae kua mate. Pea neʼe ʼi ai he faga lago meli pea mo he meli ʼi te sino ʼo te laione. 9 Neʼe ina toʼo leva ʼi ʼona nima te meli ʼo kai haʼele ʼi te ala. Pea ʼi tana alu leva ki ʼana matuʼā, neʼe ina foaki age hanā moʼi meli ke nā kai. Kae neʼe mole ina fakamatala age neʼe ina toʼo te meli ʼaia mai he laione kua mate.
10 Pea neʼe alu leva tana tamai ki te ʼapi ʼo te taʼahine. Neʼe fai ai e Samisoni he kaitahi, he neʼe ko te fai mahani ʼaia ʼa te kau tama tupulaga. 11 ʼI te sisio ʼa te hahaʼi kia Samisoni, neʼe natou ʼaumai he kau tama tupulaga ʼe toko 30 ke olo fakatahi mo ia. 12 Pea neʼe ui age e Samisoni kia natou: “ ʼE au tala atu anai he matetea. Kapau ʼe kotou maʼu tona tali pea mo fakamahino mai ʼi te ʼu ʼaho ʼe fitu ʼae ʼe fai ai te kaitahi, ʼe au foaki atu anai he ʼu teu lino* ʼe 30 pea mo he tahi age ʼu teu ʼe 30. 13 Kae kapau ʼe mole kotou maʼu tona tali, ʼe ko koutou leva ʼae ka kotou foaki mai he ʼu teu lino ʼe 30 pea mo he tahi age ʼu teu ʼe 30.” Neʼe natou tali age: “ ʼIo, tala mai tau matetea, ʼe matou fia logo ki ai.” 14 Koia neʼe ina ui age:
“Neʼe haʼu he meʼa kai mai ia ia ʼae ʼe kai,
Pea neʼe haʼu he meʼa malie mai ia ia ʼae ʼe malohi.”+
Neʼe natou kumi te fakaʼuhiga ʼo te matetea ʼaia ia ʼaho ʼe tolu kae neʼe mole natou maʼu. 15 ʼI te fa ʼaho, neʼe natou ui ki te ʼohoana ʼo Samisoni: “Fakaoloolo tou ʼohoana+ ke ina fakaha mai te fakaʼuhiga ʼo te matetea, naʼa matou tutu ia koe pea mo te famili ʼo tau tamai. Neʼe kotou fakaafe mai koa matou ke kotou maʼu ai ʼomatou koloa?” 16 Pea neʼe haʼu te ʼohoana ʼo Samisoni ʼo tagi ki ai, mo ina ui: “ ʼE hage ia ʼe ke fehiʼa ia au, ʼe mole ke ʼofa ia au.+ Neʼe ke tala he matetea ki te ʼu tagata ʼo taku hahaʼi kae neʼe mole ke fakaha mai tona fakaʼuhiga.” Neʼe ina tali age: “Sio mai, neʼe mole au fakamahino pe la ki taku tamai mo taku faʼe. Pea he koʼe ʼe au fakamahino atu anai kia koe?” 17 Kae neʼe hoko atu pe tana tagi ki ai lolotoga te ʼu ʼaho ʼae neʼe kei toe ʼo te kaitahi. Pea ʼi te fitu ʼaho, neʼe fakamahino age leva e Samisoni, he neʼe fakakinauʼi ia ia e tona ʼohoana. Neʼe alu ai leva tona ʼohoana ʼo fakaha te fakaʼuhiga ʼo te matetea ki te ʼu tagata ʼo tana hahaʼi.+ 18 Pea neʼe ʼomai leva te ʼu tagata ʼo te kolo ʼi te fitu ʼaho, ʼi muʼa ʼo te to ʼo te laʼa.* Neʼe natou ui kia Samisoni:
“Kotea ʼae ʼe malie age ʼi te meli,
Pea kotea ʼae ʼe malohi age ʼi he laione?”+
Pea neʼe ina tali age kia natou:
“Ka na neʼe mole kotou fuli la ia te kele ʼaki taku pipi fafine kei mui,*+
Ka na ʼaua la neʼe mole kotou iloʼi te fakaʼuhiga ʼo taku matetea.”
19 Pea neʼe hifo te laumalie ʼo Sehova kia ia, ʼo ina maʼu ai he malohi.+ Neʼe alu leva ki Asekaloni+ ʼo matehi ai he ʼu tagata ʼe toko 30, pea neʼe ina toʼo ʼonatou teu. Neʼe ina foaki age te ʼu teu ʼaia ki te ʼu tagata ʼae neʼe natou fakamahino age tana matetea.+ Pea neʼe toe liliu leva ki te ʼapi ʼo tana tamai mo hona ita lahi.
20 Neʼe foaki leva te ʼohoana ʼo Samisoni+ ki he tahi ʼi te ʼu tama tupulaga ʼae neʼe olo fakatahi mo ia.+