Tuʼi Fakamau
17 Neʼe ʼi ai he tagata neʼe higoa ko Mikea pea neʼe nofo ʼi te potu moʼugaʼia ʼo Efalaimi.+ 2 ʼI te tahi ʼaho, neʼe ina ui ki tana faʼe: “ ʼE kei ke manatuʼi la ʼau piesi siliva ʼe 1 100 ʼae neʼe kaihaʼa? Neʼe ke fakamalaʼia ia ia ʼae neʼe ina kaihaʼa pea neʼe au logo ki ai. Koʼeni ʼe au nofo mo te paʼaga ʼaia. Neʼe ko au ʼae neʼe au kaihaʼa.” Pea neʼe ui e tana faʼe: “Ke tapuakiʼi e Sehova taku tama.” 3 Neʼe ina liufaki ai ki tana faʼe te ʼu piesi siliva ʼe 1 100. Kae neʼe ui age e tana faʼe ki ai: “ ʼE tonu ke au foaki* taku paʼaga kia Sehova. ʼE au loto ke ke fakaʼaogaʼi te paʼaga ʼaeni moʼo faʼu ʼaki he fakatata neʼe togi pea mo he fakatata ukamea*+ maʼa koe. Koʼeni ʼe au toe ʼavatu pe te paʼaga ʼaia.”
4 Neʼe ina liufaki leva te paʼaga ki tana faʼe. Pea neʼe toʼo e tana faʼe te ʼu piesi siliva ʼe 200 ʼo foaki age ki te tagata tufuga siliva. Neʼe ina faʼu ʼaki he fakatata neʼe togi pea mo he fakatata ukamea,* pea neʼe ʼave leva ʼo fakatuʼu ʼi te ʼapi ʼo Mikea. 5 Neʼe maʼu e Mikea he fale neʼe fai ai te tauhi.* Neʼe ina fai ai he efote*+ pea mo he ʼu fakatata,*+ pea neʼe ina fakanofo* he tahi ʼi ʼona foha ko he pelepitelo.+ 6 ʼI te temi ʼaia, neʼe mole he hau ʼi Iselaele.+ Neʼe tahi fai pe e te hahaʼi te meʼa ʼae neʼe natou manatu ʼe lelei.*+
7 Pea neʼe ʼi ai he tama tupulaga mai Petelehemi+ ʼi Suta, neʼe kau ʼi te famili ʼo Suta.* Neʼe ko he tagata Levi+ neʼe nofo ʼi ai lolotoga he temi. 8 Neʼe mavae te tagata ʼaia mai Petelehemi ʼi Suta ʼo alu ʼo kumi he tahi koga meʼa ke nofo ai. ʼI tana alu ʼaia, neʼe tau leva ki te ʼapi ʼo Mikea,+ ʼi te potu moʼugaʼia ʼo Efalaimi. 9 Pea neʼe fehuʼi age e Mikea ki ai: “ ʼE ke haʼu maifea?” Neʼe tali e te tagata: “Ko au ko he tagata Levi mai Petelehemi ʼi Suta, pea ʼe au kumi he koga meʼa ke au nofo ai.” 10 Neʼe ui age leva e Mikea: “Ke ke nofo ʼi heni, pea ke ke liliu ko haku tamai* pea mo haku pelepitelo. ʼE au foaki atu anai he ʼu piesi siliva ʼe hogofulu ʼi te taʼu fuli pea mo he teu, pea ʼe au fafaga anai koe.” Neʼe ulu ai te tagata Levi ki fale. 11 Neʼe tali ai e te tagata Levi ke nofo io Mikea pea neʼe hage te tama tupulaga ʼaia ko hona foha. 12 Tahi ʼae meʼa, neʼe fakanofo e Mikea ia* te tagata Levi ko he pelepitelo+ pea neʼe nofo leva te tama tupulaga ʼaia io Mikea. 13 Pea neʼe ui e Mikea: “ ʼE au tui papau ʼi te temi nei, ʼe agalelei anai ia Sehova kia au he ʼe kua liliu te tagata Levi ko haku pelepitelo.”