Tuʼi Fakamau
18 ʼI te temi ʼaia, neʼe mole he hau ʼi Iselaele.+ Pea neʼe heʼeki foaki age ki te kau Tane honatou kele ʼi te ʼu telepi ʼo Iselaele ko honatou tofiʼa.+ Koia neʼe kumi ai e te telepi ʼo te kau Tane+ he koga meʼa* ke natou nonofo ai.
2 Neʼe fekauʼi e te kau Tane he ʼu tagata ʼe toko nima ke olo ʼo vakaʼi fakafufu te fenua. Neʼe ko te ʼu tagata ʼaia mai tonatou telepi. Neʼe ko he ʼu tagata neʼe tuha mo te falala pea neʼe nonofo ʼi Solea pea mo Esetaoli.+ Neʼe ui age e te kau Tane kia natou: “Kotou olo ʼo vakaʼi te fenua.” Neʼe olo leva te ʼu tagata ʼaia ʼe toko nima ki te potu moʼugaʼia ʼo Efalaimi, pea neʼe natou tau leva ki te ʼapi ʼo Mikea.+ Neʼe natou nonofo ai ʼi te poʼuli. 3 ʼI tanatou fakaovi ki te ʼapi ʼo Mikea, neʼe natou iloʼi te leʼo ʼo* te tama Levi. Neʼe natou olo ai ki ai, ʼo fehuʼi age: “Ko ai neʼe ina ʼaumai koe ki heni? Kotea ʼae ʼe ke fai ʼi te koga meʼa ʼaeni? He koʼe ʼe ke nofo ʼi heni?” 4 Neʼe ina fakamahino age kia natou te ʼu meʼa ʼae neʼe fai e Mikea maʼa ia, pea neʼe ina ui: “ ʼE ina totogi au ke au gaue ohage ko hana pelepitelo.”+ 5 Pea neʼe ui age leva e te ʼu tagata: “Fakalelei siʼou loto, ke ke fakafehuʼi te ʼAtua ke matou iloʼi ai pe ʼe to lelei anai tomatou fagona.” 6 Neʼe tali age e te pelepitelo kia natou: “Kotou olo ʼi te fimalie. ʼE nofo ia Sehova mo koutou ʼi takotou faifagona.”
7 Neʼe hoko atu te faifagona ʼa te ʼu tagata ʼaia ʼe toko nima pea neʼe natou tau leva ki Laisi.+ Neʼe natou sisio ai ki te maʼuli faʼitaliha ʼa te hahaʼi ʼo te kolo ʼaia ohage pe ko te kau Sitoni. Neʼe maʼuli fimalie te hahaʼi pea neʼe mole natou maʼuli tuʼania.+ Pea neʼe mole he pule agakovi neʼe ina ʼohofi te fenua moʼo fakamamahiʼi natou. Neʼe natou nonofo mamaʼo mai te kau Sitoni pea neʼe mole natou felogoi mo he tahi age hahaʼi.
8 Neʼe toe liliu leva te ʼu tagata ʼe toko nima ki Solea pea mo Esetaoli.+ Pea neʼe fehuʼi age e ʼonatou tehina: “Kotea ʼae neʼe kotou sisio ki ai?” 9 Neʼe natou tali: “Tou olo ʼo tauʼi natou koteʼuhi neʼe matou sisio ʼe lelei ʼaupito te potu fenua ʼaia. He koʼe ʼe kotou lotolotolua feia? Kotou foimo olo pea ke kotou maʼu te potu fenua ʼaia. 10 Ka kotou tau atu ki ai, ʼe kotou sisio anai ki he hahaʼi ʼe mole maʼuli tuʼania+ pea ʼe lahi ʼaupito te potu fenua. Kua foaki atu e te ʼAtua ia te fenua kia koutou. ʼE ko he koga meʼa ʼe mole puli ai he meʼa ʼi te ʼu meʼa fuli ʼae ʼe maʼu ʼi te kele.”+
11 Neʼe mavae leva mai Solea mo Esetaoli+ he ʼu tagata ʼe toko 600 ʼo te telepi ʼo te kau Tane mo ʼanatou mahafu tau. 12 Neʼe natou olo ʼo fakatuʼu tonatou nofoʼaga ʼi Kiliate-sealimi,+ ʼi te fenua ʼo te telepi ʼo Suta. Koia ʼae ʼe fakahigoa ai te koga meʼa ʼaia ko Masane-tane*+ ʼo kaku mai ki te ʼaho nei. ʼE tuʼu ʼi te potu uesite ʼo Kiliate-sealimi. 13 Neʼe natou olo leva ki te potu moʼugaʼia ʼo Efalaimi, pea neʼe natou tau atu ki te ʼapi ʼo Mikea.+
14 Pea neʼe ui e te ʼu tagata ʼe toko nima, ʼae neʼe olo ʼo vakaʼi fakafufu te fenua ʼo Laisi+ ki ʼonatou tehina: “ ʼE kotou iloʼi koa ʼe maʼu ʼi te ʼu ʼapi ʼaeni he efote, mo he fakatata neʼe togi, mo he fakatata ukamea,* mo he tahi ʼu taula ʼatua?*+ Kua kotou iloʼi pe te meʼa ʼae ʼe tonu ke kotou fai.” 15 Pea neʼe tuʼu ai tonatou fagona. Neʼe olo leva te ʼu tagata ʼe toko nima ki te ʼapi ʼo te tama Levi,+ ʼae neʼe tuʼu ovi ki te ʼapi ʼo Mikea. Pea neʼe natou fakalavelave age pe ʼe malolo pe. 16 Kae ʼi te temi ʼaia, neʼe tutuʼu te ʼu tagata ʼe toko 600 ʼo te telepi ʼo Tane+ ʼi te huʼaga mo ʼanatou mahafu tau. 17 Neʼe feulufi ki te ʼapi te ʼu tagata ʼe toko nima ʼae neʼe olo ʼo vakaʼi fakafufu te fenua.+ Neʼe natou toʼo ai te fakatata ʼae neʼe togi, mo te efote,+ mo te fakatata ukamea,+ mo te tahi ʼu taula ʼatua.+ (Neʼe tuʼu te pelepitelo+ ʼi te huʼaga mo te ʼu tagata ʼe toko 600, ʼae neʼe natou tahi toʼo tana mahafu tau.) 18 Neʼe natou feulufi ai ki te ʼapi ʼo Mikea. Pea neʼe natou toʼo te fakatata ʼae neʼe togi, mo te efote, mo te fakatata ukamea, mo te tahi ʼu taula ʼatua. Neʼe fehuʼi age e te pelepitelo kia natou: “Kotea ʼae ʼe kotou fai?” 19 Neʼe natou tali age ki ai: “Fakalogologo! ʼAua naʼa ke gu kae ke ke haʼu mo matou. ʼE ke liliu anai ko hamatou tamai* mo hamatou pelepitelo. Kotea ʼae ʼe lelei age, ko tau liliu ko te pelepitelo ʼo he famili ʼo he tagata pe ʼe tahi,+ peʼe ko tau liliu ko te pelepitelo ʼa he telepi pea mo he ʼu famili ʼe kaugamalie ʼo Iselaele?”+ 20 Neʼe leleiʼia e te pelepitelo te faʼahi ʼaia. Neʼe ina toʼo ai te efote, mo te fakatata ukamea,+ mo te tahi ʼu taula ʼatua, pea neʼe alu leva mo te ʼu tagata ʼaia.
21 Neʼe hoko atu tonatou fagona, neʼe olo ʼi ʼonatou muʼa te ʼu fanau, mo te faga manu pea mo ʼanatou meʼa maʼuhiga. 22 Neʼe kua natou mamaʼo leva mai te ʼapi ʼo Mikea. Kae neʼe fakatahitahi leva te ʼu tagata ʼo te ʼu vahaʼa fale ʼo Mikea ke natou tuli te kau Tane. Pea neʼe natou maʼu ia natou. 23 Neʼe natou kalaga ki te kau Tane. Pea neʼe maliu mai leva te kau Tane ʼo fehuʼi kia Mikea: “Kotea ʼe kotou loto ki ai? He koʼe kua kotou ʼomai fuli?” 24 Neʼe tali age e Mikea kia natou: “Neʼe kotou ʼave te ʼu ʼatua ʼae neʼe au fakatotonu ke faʼu, ʼo feia mo te pelepitelo. ʼE mole kei ʼi ai haku meʼa. Pea ʼe kotou fehuʼi mai pe kotea ʼae ʼe matou loto ki ai?” 25 Pea neʼe ui e te kau Tane ki ai: “Tuku tau palalau fena mai naʼa ʼoho atu he ʼu tagata itaita ʼo matematehi koutou mo ʼokotou famili.” 26 Pea neʼe hoko atu e te kau Tane tonatou fagona. Kae neʼe toe liliu ia Mikea kio ia, he neʼe sio neʼe natou malolohi age ia ia.
27 Neʼe ʼave leva e te kau Tane te ʼu meʼa ʼae neʼe fakatotonu e Mikea ke faʼu, ʼo feia mo tana pelepitelo. Pea hili ʼaia, neʼe natou olo leva ki Laisi.+ Neʼe nofo ʼi te kolo ʼaia he hahaʼi neʼe maʼuli fimalie pea neʼe mole maʼuli tuʼania.+ Neʼe natou matehi ai te hahaʼi ʼaki te heleta pea mo tutu te kolo. 28 Neʼe mole haʼu he tahi ʼo tokoni kia natou he neʼe natou nonofo mamaʼo mai Sitoni, pea neʼe mole natou felogoi mo he tahi age hahaʼi. Neʼe tuʼu te kolo ʼaia ʼi te potu fenua laulelei ʼae ʼi Pete-leopi.*+ Neʼe toe laga e te kau Tane te kolo pea neʼe natou nonofo ai. 29 Tahi ʼae meʼa, neʼe natou fakahigoa te kolo ko Tane.+ Neʼe ko te higoa ʼaia ʼo tanatou tamai, te foha ʼo Iselaele.+ Kae neʼe ʼuluaki higoa te kolo ko Laisi.+ 30 Hili ʼaia, neʼe fakatuʼu e te kau Tane maʼa natou te fakatata ʼae neʼe togi.+ Neʼe liliu ia Sonatane+ ʼae neʼe hifo mai ia Kelesomi,+ te foha ʼo Moisese, ko te pelepitelo ʼo te telepi ʼo te kau Tane. Pea neʼe toe liliu tona hologa ko honatou ʼu pelepitelo. Neʼe ko tanatou gaue ʼaia ʼo kaku ki te ʼave popula ʼo te hahaʼi ʼo te fenua. 31 Neʼe natou fakatuʼu ai te fakatata ʼae neʼe togi, ʼae neʼe fakatotonu e Mikea ke faʼu. Neʼe tuʼu ai ʼi te temi katoa ʼae neʼe tuʼu ai te fale* ʼo te ʼAtua moʼoni ʼi Silo.+