Tuʼi Fakamau

20 Pea neʼe ʼomai leva te ʼu tagata ʼo Iselaele mai te ʼu potu fuli ʼo te fenua, mai Tane+ ʼi te potu noleto ʼo kaku ki Pele-sepa ʼi te potu saute, ʼo feia mo te potu fenua ʼo Kileate.+ Neʼe fakatahitahi te hahaʼi katoa ʼi Misipa ia muʼa ʼo Sehova.+ 2 Neʼe fakatahi te hahaʼi ʼa te ʼAtua mo te kau pule ʼo te hahaʼi, ia te ʼu pule ʼo te ʼu telepi fuli ʼo Iselaele. Neʼe kau ai te ʼu tagata solia haʼele lalo ʼe toko 400 000 neʼe toʼo heleta.+

3 Neʼe maʼu logo leva te kau Pesamino neʼe olo te ʼu tagata ʼo Iselaele ki Misipa.

Pea neʼe ui e te ʼu tagata ʼo Iselaele: “Kotou fakamahino mai pe neʼe lava hoko feafeaʼi te meʼa fakalialia ʼaia.”+ 4 Pea neʼe tali e te tagata Levi,+ ia te ʼohoana ʼo te fafine ʼae neʼe fakapogi: “Neʼe au tau ki Kipease+ ʼo Pesamino mo toku ʼohoana ke ma nonofo ai ʼi te poʼuli. 5 Kae neʼe ʼomai te hahaʼi ʼo* Kipease ʼo ʼa takai te ʼapi ʼi te poʼuli. Neʼe natou fia matehi au, kae neʼe ko toku ʼohoana ʼae neʼe natou fakaʼalikiʼi pea neʼe mate ai.+ 6 Pea neʼe au toʼo leva te sino ʼo toku ʼohoana ʼo taʼataʼaga pea neʼe au vahe leva ki te fenua katoa* ʼo Iselaele.+ Neʼe au fakahoko te faʼahi ʼaia he neʼe fai e te ʼu tagata ʼaia he aga fakalialia mo fakaufiufi ʼi Iselaele. 7 Koia, ʼu tagata fuli ʼo Iselaele, kotou fakaha mai ʼi te temi nei takotou manatu pea ke kotou fai he tonu.”+

8 Neʼe tutuʼu fakatahi ake leva te ʼu tagata fuli ʼo Iselaele ʼo ui: “ ʼE mole alu anai he tahi ki tona fale la peʼe toe liliu anai ki tona ʼapi. 9 Koʼeni te meʼa ʼae ka tou fai: Tou fai he toho ke tou iloʼi ai pe ko ai ʼae ka alu ʼo tauteaʼi te kolo ko Kipease.+ 10 ʼE tou filifili anai he ʼu tagata ʼe toko 10 ʼi he ʼu tagata ʼe toko 100, mai te ʼu telepi fuli ʼo Iselaele, mo he toko 100 ʼi he toko 1 000 pea mo he toko 1 000 ʼi he toko 10 000. ʼE tou fekauʼi anai natou ke olo ʼo tanaki he meʼa kai maʼa te foʼi kautau. ʼE feala ai anai ki te kau solia ke olo ʼo tauteaʼi ia Kipease ʼo Pesamino ʼuhi ko te aga fakaufiufi ʼae neʼe fai e ʼana hahaʼi ʼi Iselaele.” 11 Koia neʼe fakatahitahiʼi ai te ʼu tagata fuli ʼo Iselaele ke natou tauʼi fakatahi te kolo.

12 Pea neʼe fekauʼi e te ʼu telepi ʼo Iselaele he ʼu tagata ke olo ʼo ui ki te ʼu tagata fuli ʼo te telepi ʼo Pesamino: “Kotea te meʼa fakalialia ʼae neʼe hoko ia koutou? 13 Kotou tuku mai te ʼu tagata agakovi ʼo Kipease+ ke matou matehi. Pea ʼe matou pulihi ai anai ʼi Iselaele ia ia ʼae ʼe agakovi.”+ Kae neʼe mole fia fakalogo te kau Pesamino ki ʼonatou tehina Iselaele.

14 Pea neʼe mavae leva te kau Pesamino mai ʼonatou kolo, ʼo fakatahitahi ke natou olo ʼo tauʼi te ʼu tagata ʼo Iselaele ʼi Kipease. 15 ʼI te ʼaho ʼaia, neʼe pauʼi e te kau Pesamino he ʼu tagata toʼo heleta ʼe toko 26 000 ʼi ʼonatou kolo. Kae neʼe mole lau ai te kau solia faiva ʼe toko 700 mai Kipease. 16 Neʼe kau ʼi te kautau ʼaia he kau solia faiva ʼe toko 700 neʼe hema. Neʼe natou faiva ʼi te fakaʼaogaʼi ʼo te ʼu makamaka. Ka natou tukiʼi he tahi ʼi ʼonatou fili ʼaki ni foʼi maka, neʼe tau lelei ʼosi mole hala he tahi ia natou.

17 Neʼe pauʼi e te ʼu tagata ʼo Iselaele he ʼu tagata ʼe toko 400 000 neʼe toʼo heleta+ pea neʼe ko he kau solia faiva fuli. Kae neʼe mole kau ai te telepi ʼo Pesamino. 18 Neʼe olo leva te kau Iselaele ki Petele ʼo fakafehuʼi ia te ʼAtua.+ Pea neʼe natou fehuʼi: “Ko ai ia matou ʼae ka ʼuluaki alu anai ʼo tauʼi te kau Pesamino?” Neʼe tali e Sehova: “ ʼE ʼuluaki alu anai te telepi ʼo Suta.”

19 Neʼe ʼaʼala uhu leva te kau Iselaele pea neʼe olo ʼo fakatuʼu tonatou nofoʼaga ʼo ovi ki Kipease.

20 Neʼe teuteu leva te kau tagata ʼo Iselaele ke natou olo ʼo tauʼi te kau Pesamino. Neʼe natou fakaʼatu ki te tau ʼo ovi ki Kipease. 21 Pea neʼe ʼomai leva te kau Pesamino mai Kipease, pea neʼe natou matehi ʼi te ʼaho ʼaia te toko 22 000 tagata ʼo Iselaele. 22 Kae neʼe lototoʼa pe te kau tagata ʼo Iselaele. Neʼe natou toe fakaʼatu ki te tau ʼi te koga meʼa pe ʼae neʼe natou tau ai ʼi te ʼuluaki ʼaho. 23 Pea neʼe olo te kau Iselaele ki Petele ʼo fetagihi ia muʼa ʼo Sehova ʼo kaku ki te afiafi. Pea neʼe natou fehuʼi kia Sehova: “ ʼE tonu koa ke matou toe olo ʼo tauʼi ʼomatou tehina, ia te hahaʼi ʼo Pesamino?”+ Pea neʼe tali age e Sehova: “ ʼEi, kotou olo ʼo tauʼi ia natou.”

24 Koia ʼi te lua ʼaho, neʼe fakaovi ai te kau Iselaele ki te kau Pesamino. 25 Kae neʼe mavae te kau Pesamino mai Kipease ʼo tauʼi ia natou, ʼi te lua ʼaho ʼaia. Pea neʼe natou matehi ai te toko 18 000 Iselaele+ neʼe toʼo heleta fuli. 26 Pea neʼe olo fuli leva te ʼu tagata ʼo Iselaele ki Petele. Neʼe natou fetagihi pea mo nonofo ai ia muʼa ʼo Sehova.+ ʼI te ʼaho ʼaia, neʼe natou sesunio*+ ʼo kaku ki te afiafi. Pea neʼe natou momoli ni holokoseta+ mo ni sakilifisio ʼo te tokalelei*+ ia muʼa ʼo Sehova. 27 Hili ʼaia, neʼe fakafehuʼi e te kau tagata ʼo Iselaele ia Sehova,+ koteʼuhi ʼi te temi ʼaia, neʼe tuku te aleka ʼo te fuakava ʼa te ʼAtua moʼoni ʼi Petele. 28 ʼI te temi ʼaia, neʼe ko Fineasi+ ʼae neʼe gaue* ia muʼa ʼo te aleka. Neʼe ko te foha ʼaia ʼo Eleasale, te foha ʼo Alone. Neʼe fehuʼi e te kau tagata ʼo Iselaele: “ ʼE tonu koa ke matou toe liliu ʼo tauʼi ʼomatou tehina, ia te ʼu tagata ʼo Pesamino peʼe tuku ai?”+ Neʼe tali e Sehova: “Kotou olo ʼo tauʼi ia natou, koteʼuhi ʼe au tuku atu anai ia natou ki ʼokotou nima apogipogi.” 29 Pea neʼe fakatuʼutuʼu leva e Iselaele ke olo he ʼu tagata ki te ʼu tafaʼaki fuli ʼo Kipease ʼo fenonoʼi ai.+

30 ʼI te tolu ʼaho, neʼe olo te kau Iselaele ʼo tauʼi te kau Pesamino. Pea neʼe natou fakaʼatu ki te tau ʼo ovi ki Kipease, ohage pe ko tanatou fai ʼi muʼa atu.+ 31 Neʼe mavae leva te kau Pesamino mai tonatou kolo ke natou tauʼi te foʼi kautau kae neʼe taki natou ke natou mamaʼo mai tonatou kolo.+ Neʼe natou kamata tauʼi te kau Iselaele ohage ko tanatou fai ʼi muʼa atu. Pea neʼe natou matehi ʼihi kau solia ʼi te ʼu ala lalahi, ʼi te ala ʼae neʼe alu ki Petele pea mo te ala ʼae ki Kipease. Neʼe natou matehi ai te ʼu tagata ʼo Iselaele ʼe teitei toko 30.+ 32 Koia neʼe ui e te kau Pesamino: “ ʼE tou malo anai ia natou ohage ko te ʼu faiʼaga ʼi muʼa atu.”+ Kae neʼe ui e te kau Iselaele: “Tou feholaki ke tou taki ai natou ki te ʼu ala lalahi ke natou mamaʼo ai mai tonatou kolo.” 33 Pea neʼe mavae leva te ʼu tagata fuli ʼo Iselaele mai te ʼu faʼahi ʼae neʼe nonofo ai ʼo fakaʼatu ki te tau ʼi Paale-tamale. Kae neʼe feʼohofi mai te kau Iselaele ʼae neʼe fenonoʼi ʼi te ʼu tafaʼaki ʼo Kipease ki ʼonatou fili. 34 Koia neʼe ʼomai ai he kau solia faiva ʼe toko 10 000 mai te faʼahi ʼae ʼe haga ki Kipease pea neʼe kovi ʼosi te tau. Kae neʼe mole iloʼi e te kau Pesamino te malaʼia ʼae ka hoko kia natou.

35 Neʼe tuku leva e Sehova ke malo te kau Iselaele ʼi te kau Pesamino.+ ʼI te ʼaho ʼaia, neʼe matehi e te kau Iselaele te toko 25 100 tagata ʼo Pesamino neʼe toʼo heleta fuli.+

36 Neʼe manatu te kau Pesamino ʼe natou malo anai ʼi te ʼu tagata ʼo Iselaele he neʼe natou feholaki ʼi ʼonatou muʼa.+ Kae neʼe natou feholaki he neʼe natou falala ki te kau solia ʼae neʼe fenonoʼi ʼi te ʼu tafaʼaki ʼo Kipease.+ 37 Neʼe tutuʼu fakavilivili ake leva te kau solia ʼae neʼe fenonoʼi ʼo ʼohofi ia Kipease. Pea neʼe natou feulufi leva ki te kolo ʼo matehi te hahaʼi fuli ʼaki te heleta.

38 Pea neʼe kua ʼosi fakatuʼutuʼu e te kau tagata ʼo Iselaele ke fai e te kau solia ʼae neʼe fenonoʼi ʼi te ʼu tafaʼaki ʼo te kolo ia he fakailoga. Neʼe tonu ke alu ake he kohu mai te kolo.

39 ʼI te feholaki ʼa te kau Iselaele, neʼe kamata tauʼi natou e te kau Pesamino. Neʼe natou matehi ai te ʼu tagata Iselaele ʼe teitei toko 30.+ Pea neʼe natou ui: “ ʼE mahino ia, ʼe tou toe malo anai ia natou ohage ko tatatou fetauʼaki ʼi muʼa atu.”+ 40 Kae neʼe alu ake leva he kohu mai te kolo pea neʼe ko te fakailoga ʼaia. Neʼe maliu mai leva te kau tagata ʼo Pesamino ʼo sisio ki te kohu ʼae kua alu ake ki te lagi pea mo te vela katoa ʼo tonatou kolo. 41 Neʼe mafuli mai leva te kau tagata ʼo Iselaele ʼo tauʼi te kau tagata ʼo Pesamino. Neʼe matataku ai te kau tagata ʼo Pesamino he neʼe natou mahino ai kua hoko kia natou te malaʼia. 42 Neʼe natou feholaki ai ia muʼa ʼo te kau tagata ʼo Iselaele ʼo olo ki te toafa. Kae neʼe haga tuli aipe natou e te kau tagata ʼo Iselaele. Pea neʼe toe ʼomai he ʼu tagata mai te ʼu kolo ʼo kau ki te tauʼi ʼo te kau tagata ʼo Pesamino. 43 Neʼe natou ʼa takai ai te kau Pesamino pea mo hoko atu pe tanatou tuli ia natou. Neʼe natou matehi leva ia natou ʼi te faʼahi ʼae ʼe haga ki Kipease, ʼi te potu esite. 44 Neʼe tamateʼi ai te ʼu tagata ʼe toko 18 000 ʼo Pesamino pea neʼe ko he ʼu tagata tau malolohi fuli.+

45 Neʼe maliu leva te kau tagata ʼo Pesamino ʼo feholaki ki te toafa, ki te fuʼu maka ʼo Limoni.+ Pea neʼe matehi e te kau Iselaele te toko 5 000 tagata ʼi te ʼu ala lalahi pea neʼe hoko atu pe tanatou tuli ia natou ʼo kaku ki Kiteomi. Neʼe natou toe matehi ai he ʼu tagata ʼe toko 2 000. 46 Neʼe fakatahiʼi ai ko tagata toʼo heleta ʼe toko 25 000 ʼo Pesamino ʼae neʼe mamate ʼi te ʼaho ʼaia.+ Neʼe ko he ʼu tagata tau malolohi fuli. 47 Kae neʼe fenonoʼi te toko 600 ʼi te toafa, ʼi te fuʼu maka ʼo Limoni. ʼEi, neʼe natou nonofo ʼi te fuʼu maka ʼo Limoni lolotoga mahina ʼe fa.

48 Pea neʼe toe liliu mai leva te kau tagata ʼo Iselaele ʼo tauʼi te kau Pesamino. Neʼe natou matehi ʼaki te heleta te hahaʼi fuli ʼae neʼe kei toe ʼi te ʼu kolo, ʼo feia mo tanatou faga manu fuli. Neʼe natou toe tutu foki mo te ʼu kolo fuli ʼae neʼe natou maʼu ʼi tanatou olo ʼi te ala.