ʼUluaki Hau

3 Neʼe fai leva e Salomone he fuakava mo Falaone, te hau ʼo Esipito ʼo ʼohoana mo* tona ʼofafine.+ Pea neʼe ina ʼaumai ia ia ki te Kolo ʼo Tavite+ ʼo kaku ki tana ʼosi laga tona fale,+ mo te fale ʼo Sehova,+ pea mo te kaupa ʼae ʼe ina ʼa takai ia Selusalemi.+ 2 Kae neʼe kei faisakilifisio pe te hahaʼi ʼi te ʼu faʼahi maʼoluga,+ koteʼuhi ʼi te temi ʼaia, neʼe heʼeki laga he fale ke fakakololiaʼi ai te huafa ʼo Sehova.+ 3 Neʼe haga ʼofa aipe ia Salomone kia Sehova ʼo fakalogo ki te ʼu lao ʼa Tavite, tana tamai, kae neʼe ina fai pe he ʼu sakilifisio pea mo tuku ke kohu te ʼu sakilifisio ʼaia ʼi te ʼu faʼahi maʼoluga.+

4 Neʼe alu leva te hau ki Kipeone ʼo momoli ai ni sakilifisio, koteʼuhi neʼe ko te faʼahi maʼoluga ʼaia neʼe maʼuhiga ʼaupito.+ Neʼe momoli e Salomone te ʼu holokoseta* ʼe 1 000 ʼi te ʼaletale ʼaia.+ 5 ʼI Kipeone, neʼe ha ia Sehova kia Salomone ʼi he moemisi ʼi te poʼuli, pea neʼe ui age e te ʼAtua: “Kole mai te meʼa ʼae ʼe ke loto ke au foaki atu.”+ 6 Neʼe ui e Salomone: “Neʼe lahi tau fakaha tou ʼofa agatonu ki tau tagata faifekau ko Tavite, taku tamai, he neʼe haʼele agatonu ʼi ʼou muʼa, pea neʼe faitotonu mo aga fakahagatonu. Neʼe hoko atu pe tau fakaha te ʼofa agatonu ʼaia kia ia ʼo kaku mai ki te ʼaho nei, ʼaki tau foaki age kia ia hona foha ke heka ʼi tona hekaʼaga fakahau.+ 7 Pea ʼi te temi leva ʼaeni, Sehova siʼoku ʼAtua, neʼe ke fakanofo ia au ke au hau moʼo fetogi ia Tavite, taku tamai logo la ʼe kei au tamasiʼi* pea ʼe mole au iloʼi he meʼa.+ 8 ʼE au kau ki tau hahaʼi ʼae neʼe ke filifili,+ pea ʼe ko he hahaʼi kaugamalie ʼe mole malau. 9 Koia, ke ke foaki mai he lototalagafua ke au fakamauʼi tau hahaʼi,+ ke au iloʼi te meʼa ʼae ʼe lelei mo te meʼa ʼae ʼe kovi.+ He ʼe ko ai ʼae ʼe feala ke ina fakamauʼi tau hahaʼi, te toe hahaʼi kaugamalie* ʼaeni?”

10 Neʼe leleiʼia e Sehova te kole ʼaia neʼe fai e Salomone.+ 11 Neʼe ui leva e te ʼAtua ki ai: “Mai tona aluʼaga ʼae neʼe ke kole mai te faʼahi ʼaia, pea neʼe mole ke kole mai ke ke maʼuli fualoa,* peʼe ko he ʼu koloa peʼe ko te mate* ʼo ʼou fili, kae neʼe ke kole mai te fakasiosio poto ke ke fakamauʼi te ʼu fihifihia,+ 12 ʼe au fakahoko anai tau kole.+ ʼE au foaki atu anai kia koe te poto pea mo te fakasiosio poto.+ ʼI muʼa atu, neʼe heʼeki he tahi neʼe hage ko koe, pea ʼe mole toe ʼi ai anai he tahi ʼe hage ko koe.+ 13 Pea ʼe au toe foaki atu anai mo te ʼu meʼa ʼae neʼe mole ke kole mai,+ ia te ʼu koloa pea mo te kololia,+ pea ʼe mole he tahi age hau ʼe hage anai ko koe ʼi tou maʼuli katoa.*+ 14 Pea kapau ʼe ke fakalogo ki ʼaku lekula pea mo ʼaku fakatotonu, ohage ko Tavite tau tamai,+ ʼe au toe fakatologa anai mo tou maʼuli.”*+

15 ʼI te ʼala ake ʼa Salomone, neʼe mahino leva kia ia neʼe ko he moemisi. Pea neʼe alu ki Selusalemi ʼo tuʼu ia muʼa ʼo te aleka ʼo te fuakava ʼa Sehova pea neʼe ina momoli he ʼu holokoseta pea mo he ʼu molaga ʼo te tokalelei,+ pea neʼe ina fai he kaitahi maʼa ʼana hahaʼi faifekau fuli.

16 ʼI te temi ʼaia, neʼe olo age ki te hau te ʼu fafine paomutu ʼe lua ʼo tutuʼu ʼi ʼona muʼa. 17 Neʼe ui e te ʼuluaki fafine: “Siʼoku ʼaliki, fakalelei siʼou loto, kae ko au mo te fafine ʼaeni ʼe ma nonofo ʼi te ʼapi ʼe tahi. Pea neʼe au fanau kae neʼe nofo pe ʼi te loto fale. 18 Hili ʼaho ʼe tolu ki taku ʼosi fanau, neʼe toe fanau foki mo te fafine ʼaeni. Kae neʼe mole he tahi age ʼi te loto fale, neʼe ko maua pe. 19 ʼI te poʼuli, neʼe mate te tamasiʼi ʼa te fafine ʼaeni, he neʼe ina tataʼo. 20 Pea neʼe tuʼu ake ʼi te poʼuli, ʼo ina toʼo taku tamasiʼi ʼae neʼe ʼi ʼoku tafa kae au lolotoga moe pea neʼe ina fakatakoto ki tona fatafata, kae neʼe ina fakatakoto tana tamasiʼi ʼae neʼe kua mate ki toku fatafata. 21 ʼI taku ʼala ake ʼi te uhu ke au fafaga taku tamasiʼi, neʼe au sio kua mate ia. Neʼe au vakavakaʼi fakalelei ia ia pea neʼe au tokagaʼi neʼe mole ko taku tamasiʼi ʼae neʼe au fanauʼi.” 22 Kae neʼe ui e te tahi fafine: “Kailoa ia, ko taku ia tamasiʼi ʼae ʼe kei maʼuli, pea ʼe ko tau ia tamasiʼi ʼae kua mate!” Kae neʼe ui age e te ʼuluaki fafine: “Kailoa ia, ʼe ko tau ia tamasiʼi ʼae kua mate, pea ko taku ia tamasiʼi ʼae ʼe kei maʼuli.” Neʼe fena leva tanā fihi ia muʼa ʼo te hau.

23 Neʼe ui leva e te hau: “ ʼE ui e ia ʼaeni: ‘Ko taku ia tamasiʼi ʼae ʼe kei maʼuli, pea ʼe ko tau ia tamasiʼi ʼae kua mate!’ kae ʼe ui e ia ʼae: ‘Kailoa ia, ʼe ko tau ia tamasiʼi ʼae kua mate, pea ko taku ia tamasiʼi ʼae kei maʼuli!’ ” 24 Neʼe hoko atu e te hau: “Kotou ʼaumai he heleta.” Neʼe natou ʼaumai ai he heleta ki te hau. 25 Neʼe ui leva e te hau: “Kotou tuʼusi lua te tamasiʼi ʼae kei maʼuli, pea kotou foaki he tahi koga ki te tahi fafine, pea mo te tahi koga ki te tahi age fafine.” 26 ʼI te moʼi temi pe ʼaia, ko te fafine ʼae ʼaʼana te tamasiʼi neʼe kei maʼuli, neʼe tagi mamahi ki te hau ʼuhi ko tona ʼofa mamahi ʼae ʼi tana tamasiʼi. Neʼe ina ui: “Siʼoku ʼaliki, fakalelei siʼou loto, kae ke ke foaki age kia ia te tamasiʼi ʼae kei maʼuli! ʼAua naʼa ke matehi!” Kae neʼe ui e te tahi age fafine: “ ʼE mole ta maʼu toko lua anai te tamasiʼi! Ke natou tuʼusi lua ia ia!” 27 Pea neʼe ui e te hau: “Kotou foaki te tamasiʼi ʼae kei maʼuli ki te ʼuluaki fafine! ʼAua naʼa kotou matehi, he ʼe ko ia tana faʼe.”

28 Neʼe logo leva ia Iselaele katoa ki te fakamau ʼae neʼe fai e te hau, pea neʼe natou manavasiʼi* ki te hau,+ he neʼe natou sisio ki te poto ʼae neʼe ina maʼu mai te ʼAtua moʼo fakahoko te faitotonu.+