ʼUluaki Hau

6 Neʼe kamata laga leva e Salomone te fale ʼo Sehova* ʼi te 480 taʼu hili te mavae ʼa te kau Iselaele* mai te fenua ʼo Esipito,+ ʼi te fa taʼu ʼo te kua fakanofo ʼo Salomone ko te hau ʼo Iselaele, ʼi te mahina ʼo Siva*+ (ʼe ko te lua mahina).+ 2 Ko te fale ʼae neʼe laga e te Hau ko Salomone maʼa Sehova neʼe fasiga nima* 60 tona loa, mo fasiga nima 20 tona laulahi, pea mo fasiga nima 30 tona maʼoluga.+ 3 Ko te fakamalumaluʼaga+ ʼae neʼe tuʼu ʼi te muʼa fale lotu* neʼe fasiga nima 20 tona loa,* ʼo tatau mo te laulahi ʼo te fale. Mai te muʼa fakamalumaluʼaga ki te huʼaga ʼo te fale lotu, neʼe fasiga nima hogofulu.

4 Ko te agaaga ʼo te ʼu matapa fakamalama ʼae neʼe ina fai maʼa te fale neʼe fakaalu ia ʼo faveliveli.+ 5 Pea neʼe ina laga he tahi fale ke pipiki ki te ʼu kaupa ʼo te fale, ʼi ʼona tafaʼaki, ʼae ʼo te Potu Taputapu* pea mo te Potu Taputapu ʼAupito.*+ Neʼe ina fai leva ʼi ai he ʼu koga fale.+ 6 Ko lalo, neʼe fasiga nima nima tona laulahi, ko te laufata ʼuluaki, neʼe fasiga nima ono tona laulahi, pea ko te laufata lua, neʼe fasiga nima fitu tona laulahi. Ko te matolu ʼo te ʼu kaupa ʼo te ʼu laufata ʼaia neʼe fakaalu ia ʼo veliveli, ke mole fakaulu he meʼa ki te ʼu kaupa ʼo te fale.+

7 Neʼe laga te fale ʼaki he ʼu foʼi maka neʼe keli pea neʼe kua ʼosi teuteuʼi ia.+ Koia, lolotoga te laga ʼo te fale, neʼe mole logo ai ki te ta ʼo he hamale, peʼe ko he toki peʼe ko he meʼa gaue ukamea. 8 Neʼe tuʼu te huʼaga ʼo te koga fale ʼi lalo ʼi te potu saute* ʼo te fale,+ pea neʼe ʼi ai te mata tuʼuga ki te laufata ʼuluaki pea mo te laufata lua. 9 Neʼe hoko atu pe tana laga te fale pea mo ina fakaʼosi.+ Pea neʼe ina hili leva te ʼu lalago sete ʼo te fale mo he ʼu lauʼi papa sete.+ 10 Neʼe ina laga te ʼu koga fale ʼi te ʼu tafaʼaki ʼo te fale,+ neʼe fasiga nima nima te maʼoluga ʼo te ʼu koga fale takitahi, pea neʼe hili ʼona foʼi lalago sete ke aʼu ki te fale.

11 Lolotoga te temi ʼaia, neʼe ui e Sehova kia Salomone: 12 “ ʼO ʼuhiga mo te fale ʼaeni ʼe ke laga, kapau ʼe ke haʼele ʼi ʼaku lao pea mo fakahoko ʼaku fakamau pea mo mulimuli ki ʼaku fakatotonu fuli, ʼo ke maʼuliʼi,+ ʼe au toe fakahoko anai mo au te fakapapau ʼae neʼe au fai kia Tavite, tau tamai,+ 13 pea ʼe au nofo anai ʼi te lotolotoiga ʼo te kau Iselaele,+ pea ʼe mole au liʼaki anai ia Iselaele, taku hahaʼi.”+

14 Neʼe hoko atu pe e Salomone te laga ʼo te fale ʼo kaku ki tona fakaʼosi. 15 Neʼe ina ʼaofi te ʼu kaupa ʼae ʼi loto ʼaki ni lauʼi papa sete, mai lalo ki te palafo ʼo te fale. Pea neʼe ina fola ʼi lalo ni lauʼi papa senelie.+ 16 Pea ʼi te faʼahi taupotu ʼo te loto fale, neʼe ina fai ai he koga fale neʼe fasiga nima 20 pea neʼe ina ʼaofi ʼaki te papa sete mai lalo ki te palafo.+ Neʼe tuʼu ai* ia te Potu Taputapu ʼAupito.+ 17 Pea ko te fale lotu,*+ te faʼahi ʼae neʼe tuʼu ʼi muʼa, neʼe fasiga nima 40. 18 Neʼe togi ʼi te ʼu lauʼi papa sete ʼae neʼe ʼi te loto fale he ʼu fuaʼi ʼakau takafuafua+ pea mo he ʼu fisiʼi teu kua mātala.+ Neʼe ʼaofi katoa ia loto ʼaki te sete, pea neʼe mole pe la ha he foʼi maka.

19 Pea neʼe ina teuteuʼi leva ia te Potu Taputapu ʼAupito*+ ʼae neʼe ʼi te loto fale, ke tuku ki ai te aleka ʼo te fuakava ʼa Sehova.+ 20 Ko te koga fale ʼaia neʼe fasiga nima 20 tona loa, mo fasiga nima 20 tona laulahi pea mo fasiga nima 20 tona maʼoluga.+ Neʼe ina ʼaofi te koga fale ʼaia ʼaki te aulo maʼa pea neʼe ina ʼaofi te ʼaletale+ ʼaki te ʼakau ʼae ko te sete. 21 Neʼe ʼaofi e Salomone te fale ʼi loto ʼaki te aulo maʼa,+ pea neʼe ina tautau he ʼu seini aulo ʼi muʼa ʼo te Potu Taputapu ʼAupito,*+ ʼae neʼe ʼaofi ʼaki te aulo. 22 Neʼe ina ʼaofi te fale katoa ʼaki te aulo ʼo kaku ki tana fakaʼosi te fale. Pea neʼe ina toe ʼaofi katoa ʼaki te aulo ia te ʼaletale+ ʼae neʼe tuʼu ovi ki te Potu Taputapu ʼAupito.*

23 ʼI te loto Potu Taputapu ʼAupito* neʼe ina fai ai he ʼu kelupimi ʼe lua+ ʼaki te ʼakau ʼae ko te sapa.* Ko te kelupimi ʼe tahi neʼe fasiga nima hogofulu tona maʼoluga.+ 24 Ko te pakakau ʼe tahi ʼo he kelupimi neʼe fasiga nima nima pea ko te tahi age pakakau neʼe fasiga nima nima. Mai te muliʼi pakakau ʼo he kelupimi ki te tahi muliʼi pakakau, neʼe fasiga nima hogofulu. 25 Neʼe toe tatau mo te lua kelupimi, neʼe fasiga nima hogofulu. Neʼe tatau te lahi mo te agaaga ʼo te ʼu kelupimi ʼaia ʼe lua. 26 Ko te maʼoluga ʼo he kelupimi ʼe tahi neʼe fasiga nima hogofulu, neʼe toe feia pe mo te lua kelupimi. 27 Neʼe ina tuku leva ki te loto Potu Taputapu ʼAupito ia te ʼu kelupimi ʼaia.+ Neʼe folahi te ʼu pakakau ʼo te ʼu kelupimi, ʼo lave ai te pakakau ʼo te tahi kelupimi ki te kaupa pea lave te pakakau ʼo te lua kelupimi ki te tahi age kaupa. Pea ko te tahi age ʼu pakakau ʼo te ʼu kelupimi ʼaia neʼe folahi ki te lotomalie ʼo te fale, ʼo feʼiʼaki ai te ʼu pakakau. 28 Pea neʼe ina ʼaofi te ʼu kelupimi ʼaki te aulo.

29 Pea ʼi te ʼu kaupa fuli ʼo te fale, ʼi te koga fale ʼae ʼi muʼa pea mo muli,* neʼe ina togi ai ni kelupimi,+ mo ni fuʼu palema+ pea mo ni fisiʼi teu kua mātala.+ 30 Neʼe ina ʼaofi ia lalo ʼaki te aulo, ʼi te koga fale ʼae ʼi muʼa pea mo muli. 31 Pea neʼe ina fai he ʼu matapa ʼaki te ʼakau ʼae ko te sapa ʼi te huʼaga ʼo te Potu Taputapu ʼAupito,* mo he ʼu pou ʼi te ʼu tafaʼaki, pea mo he ʼu kaumatapa, neʼe ko te koga nima.* 32 Neʼe ina fai te ʼu matapa ʼe lua ʼaki te ʼakau ʼae ko te sapa, pea neʼe ina togi ʼi ai ni kelupimi, mo ni fuʼu palema pea mo ni fisiʼi teu kua mātala, pea neʼe ina ʼaofi leva ʼaki te aulo. Neʼe ina tuki ʼaki te hamale te aulo ʼae ʼi te ʼu kelupimi mo te ʼu fuʼu palema. 33 Neʼe ina toe fai feia pe ki te huʼaga ʼo te fale lotu,* ʼo ina fai ni kaumatapa ʼaki te ʼakau ʼae ko te sapa, neʼe ko te koga fa.* 34 Pea neʼe ina fai he ʼu matapa ʼe lua ʼaki te ʼakau ʼae ko te senelie. Ko te ʼu matapa takitahi neʼe ʼi ai ʼona kaumatapa ʼe lua pea mo he ʼu faʼahiga saniele ke gaugaue ai te ʼu matapa.+ 35 Neʼe ina togi ʼi te ʼu matapa ni kelupimi, mo ni fuʼu palema pea mo ni fisiʼi teu kua mātala, pea neʼe ina ʼaofi ʼaki te aulo.

36 Neʼe ina laga leva te kaupa ʼo te malaʼe ʼae ʼi loto+ ʼaki he ʼu maka neʼe kua taʼataʼaga pea neʼe ko ʼatu ʼe tolu, pea mo he ʼatu ʼe tahi ko he ʼu ʼakau sete.+

37 Neʼe kua fakatuʼu te ʼu fakatafito ʼo te fale ʼo Sehova ʼi te 4 taʼu, ʼi te mahina ʼo Siva.*+ 38 Pea ʼi te 11 taʼu, ʼi te mahina ʼo Pulu* (ʼe ko te valu mahina), neʼe fakaʼosi leva te laga ʼo te ʼu meʼa fuli ʼo te fale ʼo mulimuli pe ki tona pāki totonu.+ Koia neʼe ina laga lolotoga taʼu ʼe fitu.