ʼUluaki Hau

14 ʼI te temi ʼaia, neʼe mahaki ia Apisa, te foha ʼo Selopoamo. 2 Koia, neʼe ui e Selopoamo ki tona ʼohoana: “Fakalelei siʼou loto, kae ke ke tuʼu ake ʼo tui he tahi age ʼu teu ke mole iloʼi ai ko koe ko toku ʼohoana, pea ke alu ki Silo. ʼE nofo ʼi ai te polofeta ko Akisa. ʼE ko ia ʼae neʼe ina fakaha mai ʼe au liliu anai ko te hau ʼo te hahaʼi ʼaeni.+ 3 Toʼo mo koe he ʼu foʼi pane ʼe hogofulu, mo he ʼu foʼi keke, pea mo he hina meli, pea ke alu ki ai. ʼE ina fakaha atu anai te meʼa ʼae ka hoko ki tatā tamasiʼi.”

4 Neʼe fai e tona ʼohoana te meʼa ʼae neʼe ina ui age. Neʼe tuʼu ake ʼo alu ki Silo,+ ki te ʼapi ʼo Akisa. Neʼe mole kei lava sio ia Akisa ki he meʼa he neʼe kua matuʼa.

5 Kae neʼe kua ʼosi ui age e Sehova kia Akisa: “ ʼE haʼu anai te ʼohoana ʼo Selopoamo ʼo fakafehuʼi koe ʼo ʼuhiga mo tana tamasiʼi, he ʼe mahaki. ʼE au fakaha atu anai te meʼa ʼae ka ke ui age ki ai.* Ka tau mai, ʼe faiga anai ke hage ko he tahi kehe.”

6 ʼI te logo pe ʼa Akisa ki te logoaʼa ʼo tana haʼele ʼi tana kaku mai ki te matapa, neʼe ina ui age: “Ulu mai, ʼohoana ʼo Selopoamo. He koʼe neʼe ke faiga ke ke hage ko he tahi kehe? Neʼe hinoʼi au ke au fakaha atu he logo ʼe kovi. 7 Alu pea ke ui age kia Selopoamo: ‘Koʼeni te folafola ʼa Sehova, te ʼAtua ʼo Iselaele: “Neʼe au filifili koe mai tau hahaʼi ke ke pule ki Iselaele, taku hahaʼi.+ 8 Pea neʼe au toʼo fakamalohi te puleʼaga mai te famili ʼo Tavite ʼo foaki atu kia koe.+ Kae neʼe mole ke hage ko taku tagata faifekau ko Tavite, ʼae neʼe ina fakahoko ʼaku fakatotonu pea neʼe mulimuli ia au ʼaki tona loto katoa, ʼo ina fai pe te meʼa ʼae ʼe lelei ki ʼoku mata.+ 9 Kae neʼe kovi age te meʼa ʼae neʼe ke fai ia natou fuli ʼae neʼe muʼa atu ia koe, pea neʼe ke fai maʼa koe he tahi age ʼatua mo ni fakatata ukamea,* ke tupu ai hoku ita,+ pea neʼe ke lituʼa kia te au.+ 10 Ko te tupuʼaga la ʼaia ʼo taku fakahoko he ʼu malaʼia ki tou famili, Selopoamo, pea ʼe au pulihi katoa anai te hahaʼi tagata fuli* ʼi tou famili, Selopoamo maʼia mo ia ʼae ʼe mole hona ʼuhiga ʼi Iselaele. ʼE au tafiʼi anai tou famili, Selopoamo+ ohage ko te tafiʼi ʼo he faifekau manu ke puli ʼosi! 11 Ko he tahi pe ʼo tou famili, Selopoamo ʼe mate ʼi te kolo, ʼe kai anai e te ʼu kuli. Pea ko he tahi pe ʼe mate ʼi te tuʼa kolo, ʼe kai anai e te ʼu manulele, he neʼe ko te folafola ʼaia ʼa Sehova.” ’

12 “ ʼI te temi leva ʼaeni, ke ke tuʼu ake mo ke toe liliu ki tou ʼapi. ʼI te temi ʼae ka ke ulu ai ki te kolo, ʼe mate anai tau tamasiʼi. 13 ʼE fetagihi anai ia Iselaele katoa kia ia pea mo natou ʼavaifo ia ia, he ʼe ko ia tokotahi pe ʼi te famili ʼo Selopoamo ʼae ka tuku anai ki he fale maka, he ʼe ko ia tokotahi pe ʼi te famili ʼo Selopoamo ʼae neʼe maʼu ai e Sehova, te ʼAtua ʼo Iselaele, he meʼa ʼe lelei ʼi tona loto. 14 ʼE filifili anai e Sehova maʼa ia he hau ke pule ki Iselaele, ʼae ka ina pulihi katoa anai te famili ʼo Selopoamo+ ʼo kamata atu ʼi te ʼaho nei. 15 ʼE fakaʼauha anai e Sehova ia Iselaele pea ʼe liliu anai ia Iselaele ohage ko he kaho ʼe fegaugaueʼaki ʼi te vai. ʼE ina taʼaki anai ia Iselaele ʼi te fenua lelei ʼaeni ʼae neʼe ina foaki ki ʼanatou kui.+ Pea ʼe ina fakamavetevete anai natou ki te tahi faʼahi ʼo te Vai Tafe,*+ he neʼe natou fai ʼanatou pou ʼakau taputapu,*+ ʼo ita ai ia Sehova. 16 Pea ʼe ina liʼaki anai ia Iselaele ʼuhi ko te ʼu agahala ʼae neʼe fai e Selopoamo, pea mo te ʼu agahala ʼae neʼe ina uga ke fai e Iselaele.”+

17 Neʼe tuʼu ake ai te ʼohoana ʼo Selopoamo ʼo toe liliu ki Tilitesa. ʼI tana tau atu ki te muʼa matapa ʼo tona ʼapi, neʼe mate tana tamasiʼi. 18 Neʼe natou ʼavaifo ai ia ia, pea neʼe fetagihi ia Iselaele katoa ki ai, ohage pe ko tona fakaha age e Sehova ki te polofeta ko Akisa, tana tagata faifekau.

19 Pea ko te toe ʼo te hisitolia ʼo Selopoamo, ʼana tau+ pea mo tana pule, ʼe tuʼu ʼi te tohi ʼo te hisitolia ʼo te ʼu hau ʼo Iselaele. 20 Ko te temi* ʼae neʼe pule ai ia Selopoamo neʼe ko taʼu ʼe 22, pea neʼe mate leva.*+ Pea neʼe hau tona foha ko Natape ʼo fetogi ia ia.+

21 Lolotoga te temi ʼaia, neʼe liliu ia Lopoame, te foha ʼo Salomone ko te hau ʼo Suta. Neʼe hau ia Lopoame ʼi tona taʼu 41, pea neʼe pule lolotoga taʼu ʼe 17 ʼi Selusalemi, te kolo ʼae neʼe filifili e Sehova+ ʼi te ʼu telepi fuli ʼo Iselaele ke fakamaʼuhigaʼi ai tona huafa.+ Neʼe higoa te faʼe ʼa Lopoame ko Naama, ko he fafine Amone.+ 22 Pea neʼe fai pe e te hahaʼi ʼo Suta te meʼa ʼae ʼe kovi kia mata ʼo Sehova,+ pea neʼe lahi age tona ita ʼuhi ko te ʼu agahala ʼae neʼe natou fai, ʼi tona ita ki te ʼu meʼa ʼae neʼe fai e ʼanatou kui.+ 23 Ko natou ʼaia neʼe natou toe laga foki maʼa natou he ʼu faʼahi maʼoluga, mo he ʼu pou maka taputapu, mo he ʼu pou ʼakau taputapu*+ ʼi te ʼu kiʼi moʼuga fuli+ pea ʼi te ʼu lalo fuʼu ʼakau fuli ʼae ʼe maʼuli lelei.+ 24 ʼI te fenua, neʼe toe ʼi ai foki mo ni hahaʼi paomutu ʼo te fale lotu.*+ Neʼe fai e te hahaʼi ʼo Suta te ʼu aga fakalialia fuli ʼa te ʼu puleʼaga ʼae neʼe kapu e Sehova ia muʼa ʼo te kau Iselaele.

25 ʼI te nima taʼu ʼo te pule ʼa te Hau ko Lopoame, neʼe haʼu ia te Hau ʼo Esipito ko Sisake+ ʼo tauʼi ia Selusalemi.+ 26 Neʼe ina toʼo te ʼu koloa ʼo te fale ʼo Sehova pea mo te ʼu koloa ʼo te fale hau.+ Neʼe ina toʼo ia meʼa fuli, ʼo kau ki ai te ʼu meʼa tali tau aulo fuli ʼae neʼe faʼu e Salomone.+ 27 Koia, neʼe faʼu ai e te Hau ko Lopoame he ʼu meʼa tali tau kapa moʼonatou fetogi, pea neʼe ina tuku leva ki te ʼu pule ʼo te kau leʼo,* ʼae neʼe natou leʼo te huʼaga ʼo te fale hau. 28 ʼI te temi fuli pe ʼae neʼe haʼu ai te hau ki te fale ʼo Sehova, neʼe ʼaumai e te kau leʼo te ʼu meʼa tali tau ʼaia, pea neʼe natou toe ʼave leva ki te koga fale ʼo te kau leʼo.

29 Pea ko te toe ʼo te hisitolia ʼo Lopoame, te ʼu meʼa fuli ʼae neʼe ina fai, ʼe mole tuʼu koa la ʼi te tohi ʼo te hisitolia ʼo te ʼu hau ʼo Suta?+ 30 Neʼe fetauʼaki tuʼumaʼu pe ia Lopoame mo Selopoamo.+ 31 Neʼe mate leva ia Lopoame* pea neʼe ʼavaifo ʼi te Kolo ʼo Tavite, ohage ko ʼana kui.+ Neʼe higoa tana faʼe ko Naama, ko he fafine Amone.+ Pea neʼe hau tona foha ko Apisame*+ ʼo fetogi ia ia.