ʼUluaki Koloniko

14 Neʼe fekauʼi e Hilame,+ te Hau ʼo Tile he kau tagata ʼave logo ke olo kia Tavite, mo he kau tufuga maka,* mo he kau tufuga ʼakau, ke natou laga hona ʼapi.* Pea neʼe ʼave mo he ʼu ʼakau ko te sete.+ 2 Neʼe iloʼi ai e Tavite neʼe fakatuʼu e Sehova ke malohi tona tuʼulaga fakahau ʼi Iselaele,+ he neʼe maʼoluga ʼaupito tana pule fakahau ʼuhi ko Iselaele, Tana hahaʼi.+

3 Neʼe lahi te ʼu ʼohoana ʼo Tavite+ ʼi Selusalemi, pea neʼe toe lahi foki mo ʼona foha mo ʼona ʼofafine.+ 4 Koʼeni te ʼu higoa ʼo ʼana fanau ʼae neʼe tutupu ʼi Selusalemi:+ ko Samua, mo Sopeape, mo Natane,+ mo Salomone,+ 5 mo Sipale, mo Elisua, mo Elepeleto, 6 mo Noka, mo Nefeke, mo Safia, 7 mo Elisama, mo Peeliata pea mo Elifeleti.

8 ʼI te logo ʼa te kau Filisitini kua fakanofo hau ia Tavite ki Iselaele katoa,+ neʼe natou ʼomai fuli ai ʼo tauʼi.+ ʼI te iloʼi e Tavite te faʼahi ʼaia, neʼe alu ai ʼo tauʼi natou. 9 Neʼe ʼomai te kau Filisitini ʼo kamata ʼohofi ia te hahaʼi ʼae ʼi te Potu Fenua Laulelei ʼo Lefaimi.+ 10 Neʼe fehuʼi e Tavite ki te ʼAtua: “ ʼE tonu koa ke au alu ʼo tauʼi te kau Filisitini? ʼE ke tuku mai anai koa ia natou ki ʼoku nima?” Neʼe tali e Sehova: “Alu, pea ʼe au tuku moʼoni anai natou ki ʼou nima.”+ 11 Neʼe alu ai ia Tavite ki Paale-pelatesimi,+ ʼo matehi ai ia natou. Neʼe ui leva e Tavite: “Ohage ko he kaupa neʼe maumauʼi e te ʼu vai, neʼe feia te ʼohofi e te ʼAtua moʼoni ʼoku fili ʼo ina fakaʼaogaʼi au.” Koia, neʼe fakahigoaʼi te koga meʼa ʼaia ko Paale-pelatesimi. 12 Neʼe liʼaki e te kau Filisitini ʼonatou ʼatua ʼi ai, pea neʼe fakatotonu leva e Tavite ke tutu.+

13 Ki muli age, neʼe toe ʼomai te kau Filisitini ʼo ʼohofi te hahaʼi ʼae ʼi te potu fenua laulelei.+ 14 Neʼe toe fakafehuʼi e Tavite ia te ʼAtua, kae neʼe tali age e te ʼAtua moʼoni: “ ʼAua naʼa ke alu fakahagatonu kia natou. Kae alu ʼo tauʼi mai natou mai muli ʼo haga ki te vao matuʼa ʼo te ʼu fuʼu paka.+ 15 Ka ke logo ki he logoaʼa ohage ko te haʼele ʼa he kau solia ʼi te tumutumu ʼo te ʼu fuʼu paka, pea ke alu ʼo tauʼi natou, he ʼe alu anai te ʼAtua moʼoni ʼi ʼou muʼa ʼo matehi te kautau ʼo te kau Filisitini.”+ 16 Neʼe mulimuli ia Tavite ki ai, ohage pe ko tona fakatotonu age e te ʼAtua moʼoni.+ Pea neʼe matehi leva e Tavite mo ʼana tagata te foʼi kautau ʼa te kau Filisitini mai Kipeone ki Kesele.+ 17 Pea neʼe iloa ia Tavite ʼi te ʼu fenua fuli pe, pea neʼe tupu ai te matataku ʼa te ʼu puleʼaga fuli kia Tavite ʼuhi ko Sehova.+