Neʼe Fakatuʼuake Ia Lasalo

ʼI te ʼosi felaveʼi ʼa Sesu mo Maleta pea mo Malia ʼo ovi ki Petania, neʼe natou olo ai leva ki te fale maka fakamanatu ʼo Lasalo. Neʼe ko te ʼana pea neʼe pupunu ʼaki te foʼi maka. Neʼe fakatotonu fenei e Sesu: “Kotou toʼo kehe te foʼi maka.” Neʼe fakaha e Maleta tana tuʼania, he neʼe mole mahino ki te meʼa ʼae neʼe fia fai e Sesu. Neʼe ina ui fenei: “ ʼAliki, kua lagi mamanu, koteʼuhi kua hili ʼaho ʼe fa.” Kaʼe neʼe ui fenei e Sesu ki ai: “Neʼe mole au ui atu koa la, kapau ʼe ke tui, pea ʼe ke sio anai ki te kololia ʼo te ʼAtua?”—Soane 11:39, 40.

Neʼe natou toʼo kehe ai te foʼi maka. Neʼe hiki ake e Sesu ʼona mata ki te lagi mo faikole fenei: “Tamai, ʼe au fakafetaʼi atu he neʼe ke fagono mai ki taku faikole. ʼE moʼoni, ʼe au iloʼi ʼe ke fagono tuʼumaʼu mai kia te au. Kaʼe neʼe au palalau ʼuhi ko te hahaʼi tokolahi ʼae ʼe tutuʼu ʼi heni, ke feala hanatou tui neʼe ke fekauʼi mai au.” Ko te faikole ʼaia ʼa Sesu ia muʼa ʼo te hahaʼi, neʼe ina fakaha ai kia natou ko te meʼa ʼae ka ina ʼamanaki fai ʼe ina fai ʼaki te malohi ʼo te ʼAtua. Neʼe kalaga fenei leva ia Sesu: “Lasalo, haʼu ki tuʼa!” Pea neʼe hu mai ia Lasalo ki tuʼa, neʼe haʼihaʼi ʼona vaʼe mo ʼona nima ʼaki he ʼu moʼi kie, pea neʼe pulouʼi tona fofoga ʼaki te kie. Neʼe ui fenei e Sesu kia natou: “Kotou vevete ia ia pea kotou tuku age ke alu.”—Soane 11:41-44.

Tokolahi te kau Sutea ʼae neʼe ʼomai ʼo fakalotofimalieʼi ia Malia mo Maleta, neʼe natou sisio ki te milakulo ʼaia pea neʼe natou tui ai kia Sesu. Kaʼe neʼe olo ʼihi ki te kau Faliseo ʼo fakaha te meʼa ʼae neʼe fai e Sesu. Neʼe fakatahiʼi e te kau Faliseo mo te kau pelepitelo pule ia natou ʼae neʼe kau ki te Sanetualio, te fakamauʼaga lahi ʼo te kau Sutea. Neʼe kau ia natou ʼaia te pelepitelo lahi ko Kaifa. Neʼe meo fenei ʼihi: “Kotea ʼae ka tou fai? Koteʼuhi ʼe lahi te ʼu milakulo ʼe fakahoko e te tagata ʼaeni. Kapau ʼe tou tuku ia ia ke hoko atu feia, ʼe natou tui fuli anai kia te ia, pea ʼe ʼomai anai te kau Loma ʼo puleʼi totatou fale lotu pea mo totatou puleʼaga.” (Soane 11:47, 48) Logo la neʼe logo te ʼu tagata ʼaia ki te ʼu fakamatala ʼa te ʼu hahaʼi ʼae neʼe natou sisio mata ki te ʼatu milakulo ʼae neʼe fai e Sesu, kaʼe neʼe mole natou fiafia ʼo ʼuhiga mo te ʼu meʼa ʼae neʼe fai e te ʼAtua ʼaki ia Sesu. Neʼe natou tuʼania tafito pe tonatou tuʼulaga pea mo tanatou pule ki te hahaʼi.

Ko te fakatuʼuake ʼo Lasalo mai te kau mate, neʼe ko he toe meʼa fakalainoa ki te kau Satuseo he neʼe mole natou tui ki te fakatuʼuake. Neʼe palalau leva ia Kaifa, ʼae neʼe ko he Satuseo, ʼo ina ui fenei: “ ʼE mole kotou iloʼi he meʼa, pea ʼe mole kotou mahino ʼe lelei age kia koutou ke mate he tagata ʼe tahi maʼa te hahaʼi ʼi te pulihi ʼo te puleʼaga katoa.”—Soane 11:49, 50; Gaue 5:17; 23:8.

Neʼe ko Kaifa te pelepitelo lahi, koia ʼae neʼe uga e te ʼAtua ke ina fai te ʼu palalau ʼaia, kaʼe neʼe mole haʼu ia “mai ia ia totonu.” Neʼe loto e Kaifa ke matehi ia Sesu he neʼe mataku naʼa mole kei mulimuli te hahaʼi ki te kau takitaki lotu Sutea. Kaʼe neʼe fakaha ʼi te lea fakapolofeta ʼa Kaifa, ʼaki te mate ʼo Sesu, ʼe foaki ai anai he totogi mole gata pe maʼa te kau Sutea, kaʼe maʼa “te ʼu fanau [fuli] ʼa te ʼAtua ʼae kua mavetevete.”—Soane 11:51, 52.

Neʼe iku te ʼu faiga ʼae ʼa Kaifa ke fai e te Sanetualio he ʼu fakatuʼutuʼu ke matehi ia Sesu. Neʼe fakaha age koa kia Sesu te ʼu fakatuʼutuʼu ʼaia e Nikotemo, ʼae neʼe kau ʼi te Sanetualio pea neʼe agalelei kia Sesu? ʼE mole tou iloʼi papau, kaʼe neʼe mole nofo ia Sesu ʼi te ʼu tafaʼaki ʼo Selusalemi, ke mole matehi ia ia ʼi muʼa ʼo te temi ʼae neʼe fakatuʼutuʼu ki ai e te ʼAtua.