Neʼe Tupu Sesu ʼIfea Pea ʼi Te Temi Fea?

Ko Sesale Aukusito, te hau ʼo te Puleʼaga Loma, neʼe ina fakatotonu ki te hahaʼi fuli ke natou olo ʼo tohi ʼonatou higoa. Koia neʼe tonu ai ke olo ia Malia mo Sosefo ki Petelehemi,a te kolo ʼae neʼe tupu ai Sosefo, ʼi te potu saute.

Neʼe kua kaugā malie ia Petelehemi, ʼuhi ko te ʼomai ʼa te hahaʼi ʼo tohi ʼonatou higoa. Koia neʼe mole nā maʼu ai he koga meʼa ke fanau ai ia Malia, gata pe ki te fale manu, ʼae ʼe nonofo ai te ʼu asino pea mo te tahi ʼu manu. Pea neʼe tupu ai ia Sesu. Neʼe kofukofuʼi e Malia ia Sesu ʼaki ni kie pea neʼe ina tuku ia ia ki te kaiʼaga manu.

ʼE mahino ia neʼe takitaki e te ʼAtua ke fai e Sesale Aukusito te fakatotonu ʼaia. Kotea tona tupuʼaga? Ke feala ai ke tupu ia Sesu ʼi Petelehemi, te kolo ʼo tana kui, ia te Hau ko Tavite. Pea neʼe kua fakakikite talu mai fualoa ʼi te Tohi-Tapu ʼe tupu anai ʼi te kolo ʼaia te Hau ʼae neʼe fakapapauʼi mai.—Mikea 5:1.

Neʼe ko he po maʼuhiga ʼaia! Neʼe nonofo te kau tauhi ovi ʼi ʼanatou gaueʼaga, pea neʼe ha he malama ʼo ʼa takatakai natou. Neʼe ko te kololia ʼaia ʼo Sehova! Neʼe ui fenei e te ʼaselo ʼa te ʼAtua ki te kau tauhi ovi: “ ʼAua naʼa kotou matataku! He ʼe au tala atu kia koutou te logo lelei ʼo ʼuhiga mo te fiafia lahi ʼae ka maʼu anai e te hahaʼi fuli. He neʼe tupu ʼi te ʼaho nei maʼa koutou ʼi te kolo ʼo Tavite he fakamaʼuli, ʼe ko te ʼAliki ko Kilisito. Pea koʼeni te fakailoga maʼa koutou: ʼE kotou maʼu anai he kiʼi toe meamea ʼe kofukofuʼi ʼaki ni kie pea ʼe takoto ʼi he kaiʼaga manu.” Fokifa pe neʼe ha te ʼu ʼaselo ʼe kaugā malie, pea neʼe natou ui fenei: “Kololia ki te ʼAtua ʼi te ʼu potu tauʼaluga, pea tokalelei ʼi te kele ki te hahaʼi lotolelei.”—Luka 2:10-14.

ʼI te mavae ʼa te kau ʼaselo, neʼe feuiʼaki fenei e te kau tauhi ovi: “Tou olo ki Petelehemi ʼo vakaʼi ia te meʼa ʼae neʼe hoko, ʼae neʼe fakaha mai kia tatou e Sehova.” (Luka 2:15) Neʼe natou olo fakavilivili atu aipe pea neʼe natou maʼu atu ia te kiʼi toe meamea ko Sesu ʼi te koga meʼa pe ʼae neʼe fakaha age e te ʼaselo. Neʼe fakamatala e te kau tauhi ovi te ʼu meʼa ʼae neʼe ui age e te ʼaselo, pea ko natou fuli ʼae neʼe logo ki te fakamatala neʼe natou punamaʼuli. Neʼe taupau e Malia te ʼu fakamatala fuli ʼaia ʼi tona loto, ʼo ina fakakaukauʼi pe kotea tona fakaʼuhiga.

Tokolahi ia ʼaho nei ʼe natou tui neʼe tupu Sesu ʼi te ʼaho 25 ʼo Tesepeli. Kaʼe ʼi Petelehemi, ʼi te mahina ʼo Tesepeli, ʼe ʼua pea momoko. Pea ʼi ʼihi temi, ʼe nive. Koia, ʼi te mahina ʼaia, ʼe mole feala ke nonofo te kau tauhi ovi mo ʼanatou faga manu ʼi te ʼu gaueʼaga ʼi te poʼuli. Pea ʼi te temi ʼaia, neʼe mole fakalogo lelei te hahaʼi ki te hau ʼo Loma. Koia, ʼe mata faigataʼa hana fakatotonu age ke natou faifagona lolotoga ni ʼaho ʼi te temi ʼae ʼe kovi ai te momoko, ʼo tohi ia natou. ʼE mahino ia, neʼe tupu Sesu ʼi te temi mafana, lagi ʼi te mahina ʼo Oketopeli.