ʼE mole he tahi age tohi fakalotu ʼe tatau mo te Tohi-Tapu. ʼE mole he tahi age tohi neʼe ina ʼekenaki te tui ʼa te tokolahi ʼi he temi loaloaga. Kaʼe, neʼe mole he tahi age tohi neʼe lahi tona vakaʼi pea mo tona valoki.

Ohage la, ko ʼihi hahaʼi faifekumi ʼe natou lotolotolua ʼo ʼuhiga mo te ʼu Tohi-Tapu ʼae ʼe tou maʼu ʼi te temi nei. Kia natou neʼe mole hiki mai te ʼu ʼuluaki tohi. ʼE ui fenei e he tagata faiako ʼo te ʼu sivi fakalotu: “ ʼE mole matou iloʼi papau pe neʼe toe faʼufaʼu lelei te ʼu ʼuluaki tohi ʼi hona aluʼaga ʼe totonu. ʼE matou maʼu pe he ʼu tohi neʼe hiki ʼe lahi ai he ʼu hala pea ko te ʼu tohi ʼaia neʼe hiki ʼi ni lauʼi taʼu ʼe teau ki muli mai ʼi te ʼu ʼuluaki tohi. Pea ʼe kehekehe ia mo te ʼu ʼuluaki tohi.”

Ko ʼihi ʼe natou fai he ʼu fehuʼi ʼo ʼuhiga mo te moʼoni ʼo te Tohi-Tapu ʼuhi ko tanatou lotu. Ohage la, ko Faizal neʼe akoʼi age ki ai e tona famili ʼae ʼe mole kau ki he lotu Fakakilisitiano, ko te Tohi-Tapu ʼe ko he tohi taputapu kaʼe neʼe fetogi ia. ʼE ina ui fenei: “Ki muli age, neʼe au lotolotolua moka palalau mai te hahaʼi ʼo ʼuhiga mo te Tohi-Tapu. Koteʼuhi neʼe mole ko te Tohi-Tapu totonu ʼaia. Neʼe fetogi ia.”

ʼE maʼuhiga koa ke tou iloʼi pe neʼe fetogi te Tohi-Tapu? Tou vakaʼi te ʼu fehuʼi ʼaeni: Kapau ʼe mole kotou iloʼi pe neʼe tuʼu te ʼu fakapapau ʼaia ʼi te ʼu ʼuluaki tohi, ʼe feala koa ke kotou falala ki te ʼu fakapapau fakalotofimalie ʼo te Tohi-Tapu ʼo ʼuhiga mo te ka haʼu? (Loma 15:4) Kapau ko te ʼu Tohi-Tapu ʼo te temi nei neʼe ko he ʼu tohi loi neʼe tohi e te tagata, ʼe kotou fakaʼaogaʼi koa te ʼu pelesepeto Fakatohi-tapu ke kotou toʼo he ʼu tonu maʼuhiga ʼo ʼuhiga mo ʼakotou gaue, mo tokotou famili peʼe ko takotou tauhi?

Logo la kua puli te ʼu ʼuluaki tohi ʼo te Tohi-Tapu, kaʼe ʼe feala ke tou vakaʼi te ʼu tohi ʼae neʼe hiki, ʼo kau ki ai te ʼu lauʼi afe koga tohi ʼo te Tohi-Tapu. Neʼe puipui feafeaʼi te ʼu tohi ʼaia logo la te ʼu aluʼaga neʼe feala ke maumau ai, mo te fakafeagai pea mo te ʼu faiga ʼae ke fetogi te ʼu manatu? Ko te puipui ʼo te ʼu tohi ʼaia, ʼe feafeaʼi hana fakamalohiʼi takotou falala ki te moʼoni ʼo te Tohi-Tapu ʼo te temi nei? Tou vakaʼi te ʼu tali ki te ʼu fehuʼi ʼaia ʼi te hisitolia ʼo te puipui ʼo te Tohi-Tapu ʼae ʼe hoa mai.

TE ALUʼAGA FAKATUPU TUʼUTAMAKI: Ko te papilusi mo te ʼu kiliʼi manu neʼe ko te ʼu ʼuluaki meʼa gaue ʼaia neʼe fakaʼaogaʼi e te kau tagata faitohi ʼo te Tohi-Tapu pea mo te ʼu tagata ʼae neʼe natou hiki te Tohi-Tapu.a (2 Timoteo 4:13) Neʼe fakatupu tuʼutamaki feafeaʼi te ʼu meʼa gaue ʼaia ki te puipui ʼo te Tohi-Tapu?

Ko te papilusi ʼe mahae gafua pea ʼe maumau vave ʼo mole kei iloga lelei ai te ʼu mataʼi tohi. ʼE ui fenei e te ʼu tagata Popoto ʼo Esipito ko Richard Parkinson pea mo Stephen Quirke: “Ko he pasina ʼe tahi ʼe feala ke maumau vave pea ke maeve. Ka tanaki he ʼu takaiga tohi, ʼe feala ke limulimua pea kai ʼe kuma mo te ʼu kiʼi manu.” Hili te maʼu ʼo te ʼu takaiga tohi ʼaia, ko ʼihi papilusi neʼe ta laʼa peʼe tuku ki he koga meʼa palapala ʼo tupu ai tona maumau vave.

Ko te kiliʼi manu ʼe tologa age ia ʼi te papilusi. Kaʼe, ʼe maumau vave te ʼu meʼa gaue ʼaia ʼe lua mo kapau ʼe mole tou tokakaga lelei ki ai peʼe tou ta laʼa peʼe tou tuku ki he koga meʼa ʼe palapala.b Ko te ʼu kiʼi manu ʼe natou toe kai te ʼu kiliʼi manu. Kaʼe, ʼe ui fenei ʼi te tohi Rédaction quotidienne dans le monde gréco-romain-dʼOrient ʼo ʼuhiga mo te ʼu tohi ʼafeā: “ ʼE tahitahiga te taupau ʼo te ʼu tohi ʼafeā.” Koia, kapau neʼe kua maumau te Tohi-Tapu, neʼe toe puli ai mo te logo ʼae ʼe tuʼu ʼi loto.

NEʼE PUIPUI FEAFEAʼI TE TOHI-TAPU? Neʼe fakatotonu ʼi te lao Fakasutea ki te ʼu hau fuli ke natou ‘hiki te Lao ʼaia ki he tohi maʼa ia totonu,’ ia te ʼu ʼuluaki tohi ʼe nima ʼo te Tohi-Tapu. (Tetelonome 17:18) Pea tahi, neʼe lahi te ʼu koga tohi ʼo te Tohi-Tapu neʼe fai e te ʼu tagata faiva ʼae neʼe natou hiki te Tohi-Tapu ʼi te temi ʼo te kau apositolo. Pea neʼe feala ke maʼu te Tohi-Tapu ʼi te ʼu sinakoka, ʼi Iselaele katoa ʼo kaku ki Masetonia. (Luka 4:16, 17; Gaue 17:11) Neʼe puipui feafeaʼi te ʼu koga Tohi-Tapu ʼafeā ʼaia ʼo kaku mai ki te temi nei?

ʼE ui fenei e te tagata faiako ʼo te Tauhi Foʼou ko Philip W. Comfort: “Neʼe iloʼi e te kau Sutea kapau ʼe natou ʼai te ʼu takaiga tohi ʼo te Tohi-Tapu ʼi te ʼu foʼi ipu kele, ʼe feala ke tologa.” Pea neʼe hoko atu pe e te kau Kilisitiano ia te faʼahiga fai ʼaia. Koia, ko ʼihi koga tohi ʼo te Tohi-Tapu neʼe maʼu ʼi te ʼu ipu kele, ʼi te ʼu puha, ʼi te ʼu ʼana pea tafitō ʼi te ʼu fenua ʼae ʼe kele magemage.

TONA FUA: Ko te ʼu koga Tohi-Tapu ʼe lauʼi afe kua ʼafeā neʼe puipui talu mai teitei taʼu ʼe 2 000 ʼo kaku mai ki te temi nei. Koia, ʼe mole he tahi age tohi ʼe hage ko te ʼu koga Tohi-Tapu ʼae neʼe kua fualoa ʼaupito.

TE ALUʼAGA FAKATUPU TUʼUTAMAKI: Tokolahi te kau takitaki politike mo te kau takitaki lotu neʼe natou fai he ʼu fakatuʼutuʼu ʼe fakafeagai ki te logo ʼo te Tohi-Tapu. ʼI te agamahani, ʼi tonatou ʼuhiga pule neʼe natou tapuʼi ki te hahaʼi ke mole natou maʼu, mo ta pea mo fakaliliu ia te Tohi-Tapu. Tou vakaʼi ia te ʼu faʼifaʼitaki ʼaeni ʼe lua:

• ʼI Te Vaʼe 167 I.M.T.S.: Ko te Hau Séleucide ko Antiochus IV Épiphane, neʼe faiga ke ina fakamaʼua ki te kau Sutea ke natou kau ki te lotu Fakakeleka. Pea neʼe ina fakatotonu ke maumauʼi te u tohi fuli ʼae neʼe hiki ʼo te Koga Tohi-Tapu Fakahepeleo. Neʼe ui e te tagata faihisitolia ko Heinrich Graetz ko te ʼu tagata faifekau ʼa te Hau ʼaia neʼe natou “hae mo tutu te ʼu tohi ʼo te Lao ʼi he koga meʼa pe ʼe natou maʼu ai. Pea neʼe natou matehi ia natou fuli ʼae neʼe maʼu atu ʼe natou lolotoga lau te Tohi-Tapu.”

• Lolotoga Te ʼu Taʼu 500 Ki Te ʼu Taʼu 1 500 H.T.S.: Ko ʼihi kau takitaki Katolika neʼe natou iita ʼi te fakamafola e te hahaʼi ia te ʼu meʼa ʼae ʼe akoʼi ʼi te Tohi-Tapu kaʼe mole ko te ʼu akonaki ʼa te lotu Katolika. Neʼe natou ui ko te hahaʼi ʼaia ʼe ko he hahaʼi fakafeagai koteʼuhi neʼe natou maʼu te ʼu koga tohi ʼo te Tohi-Tapu kaʼe mole ko te tohi Pesalemo Fakalatina. ʼI he fono ʼo te ʼekelesia, neʼe toʼo ai te tonu ʼae ke fakatotonu ki ʼanatou tagata “fakapotopoto pea mo agatonu, ke natou kumi tuʼumaʼu . . . ʼi te ʼu ʼapi fuli pea mo te ʼu koga fale ʼae ʼi te lalo kele ia natou ʼae ʼe natou fufu he ʼu koga tohi ʼo te Tohi-Tapu. . . . Ko te ʼapi ʼae maʼu atu ai he tahi ʼe fakafeagai ʼe tonu ke maumauʼi.”

Kapau neʼe lava maumauʼi e te ʼu fili ʼo te Tohi-Tapu te ʼu tohi ʼaia, neʼe toe puli ai mo te logo ʼae ʼe tuʼu ʼi loto.

NEʼE PUIPUI FEAFEAʼI TE TOHI-TAPU? Neʼe tokaga tafitō ia te Hau ko Antiochus IV ki tana tauʼi te kau Iselaele kaʼe neʼe fakatahitahi te kau Sutea ʼi te tahi ʼu fenua. ʼI tona fakahagatonu, neʼe fakafuafua e te ʼu tagata sivi Tohi-Tapu ko te teitei 60 ki te teau kau Sutea neʼe natou maʼuʼuli ʼi tuʼa atu ʼo Iselaele talu mai te temi ʼo te kau apositolo. Neʼe taupau e te kau Sutea te Tohi-Tapu ʼae neʼe natou hiki ʼi ʼanatou sinakoka. Ko te Tohi-Tapu pe ʼaia neʼe fakaʼaogaʼi e te taʼiake ki muli mai ʼae ʼe kau ai te kau Kilisitiano.—Gaue 15:21.

Lolotoga Te ʼu Taʼu 500 Ki Te ʼu Taʼu 1 500 H.T.S., ko natou ʼae neʼe ʼoʼofa ki te Tohi-Tapu neʼe natou tauʼi te fakataga pea mo hoko atu tanatou fakaliliu mo hiki te Tohi-Tapu. Ko te ʼu koga tohi ʼo te Tohi-Tapu neʼe feala ke maʼu ia lea ʼe teitei 33 ʼi te lotomalie ʼo te taʼu 1 400, ʼi muʼa ʼo te ha ʼo te masini ta tohi. Kaʼe, neʼe vave te fakaliliu mo te ta ʼo te Tohi-Tapu ʼi hona aluʼaga fakaofoofo.

TONA FUA: Logo la te ʼu aluʼaga fakatupu tuʼutamaki neʼe fai e te ʼu hau malolohi pea mo te kau takitaki lotu ʼae ʼe mole agatonu, kaʼe ko te Tohi-Tapu ʼe ko he tohi ʼe lahi tona tufa ʼi te malamanei katoa pea ʼe lahi tona fakaliliu ʼi te hisitolia ʼo te tagata. ʼAki te tohi ʼaia, neʼe fakatafito ki ai e ʼihi fenua ʼanatou lao pea mo fetogi ai ni lea mo te maʼuli ʼa te toko lauʼi miliona hahaʼi.

TE ʼU ALUʼAGA FAKATUPU TUʼUTAMAKI: Neʼe mole feala ke pulihi te Tohi-Tapu ʼuhi ko te ʼu aluga fakatupu tuʼutamaki ohage ko te ʼu aluga ʼae neʼe feala ke maumau ai pea mo te fakafeagai. Kaʼe, neʼe faiga ʼihi tagata ʼae neʼe natou hiki te Tohi-Tapu pea mo ʼihi tagata faifakaliliu ke natou fetogi te logo ʼae ʼe tuʼu ʼi te Tohi-Tapu. ʼI te temi ʼaia neʼe natou faiga ke alu tahi te Tohi-Tapu mo ʼanatou akonaki. Kaʼe neʼe mole natou faiga ke alu tahi ʼanatou akonaki mo te Tohi-Tapu. Tou vakaʼi te ʼu faʼifaʼitaki ʼaeni:

• Te koga meʼa ʼae ʼe fai ai te tauhi: ʼI te taʼu 300 ki te taʼu 100 I.M.T.S., ko te ʼu tagata faitohi ʼo te Pentateuque Samaritain neʼe natou tohi te ʼu kupuʼi palalau ʼaeni ʼi te ʼosi pe te vaega ʼo Ekesote 20:17: “ ʼI Aargaareezem. ʼE fakatuʼu ai anai he ʼaletale.” Neʼe fakaʼamu te kau Samalitana ke lagolago te Tohi-Tapu ki tanatou laga he fale lotu ʼi “Aargaareezem” peʼe ko te “Mouga ko Kalisimi.”

• Akonaki ʼo te tahitolutapu: Heʼeki ʼosi ki ai taʼu ʼe 300 ki te ʼosi katoa ʼo te Tohi-Tapu, ko te tagata faitohi ʼe lagolago ki te akonaki ʼo te Tahitolutapu, neʼe ina hilifaki te ʼu kupuʼi palalau ʼaeni ki te vaega ʼo 1 Soane 5:7: “ ʼI te lagi, te Tamai, te Folafola pea mo te Laumalie Maʼoniʼoni: Pea ʼe fakatahiʼi age ko te meʼa pe ʼe tahi.” Ko te talamanatu ʼaia neʼe mole tuʼu ʼi te ʼuluaki tohi. ʼE fakatokagaʼi fenei e te tagata sivi Tohi-Tapu ko Bruce Metzger: “Talu mai te taʼu 500, neʼe maʼu tuʼumaʼu ia te ʼu kupuʼi palalau ʼaia ʼi te ʼu koga Tohi-Tapu Fakalatina ʼAfeā pea mo te Vulgate [Fakalatina].”

• Te huafa ʼo te ʼAtua: Neʼe ʼi ai te talatisio ʼa te kau Sutea neʼe ui ai ko te huafa ʼo te ʼAtua ʼe taputapu pea ʼe mole tonu ke fakaʼaogaʼi. Koia tokolahi te kau faifakaliliu ʼo te Tohi-Tapu neʼe natou fakatotonu ke pulihi te huafa ʼo te ʼAtua ʼi te Tohi-Tapu. Neʼe natou fetogi te huafa ʼaia ʼaki he ʼu higoa fakatuʼulaga ohage la ko “ ʼAtua,” peʼe ko “Aliki.” Ko te ʼu kupu ʼaia neʼe mole fakaʼuhiga pe ʼi te Tohi-Tapu ki te Tupuʼaga kaʼe neʼe toe fakaʼuhiga ki te tagata pea mo te ʼu taula ʼatua, maʼia mo te Tevolo.—Soane 10:34, 35; 1 Kolinito 8:5, 6; 2 Kolinito 4:4.a

NEʼE PUIPUI FEAFEAʼI TE TOHI-TAPU? ʼUluaki, logo la ko ʼihi tagata ʼae neʼe natou hiki te Tohi-Tapu neʼe mole tokakaga fakalelei peʼe neʼe natou faiga ke fetogi he ʼu manatu, kaʼe ko ʼihi neʼe ko te ʼu tagata hiki Tohi-Tapu faiva. Pea neʼe natou tokaga lelei ki te ʼu manatu ʼae neʼe natou tohi. Neʼe hiki e te kau Massorètes ia te Koga Tohi-Tapu Fakahepeleo ʼi te taʼu 500 ki te taʼu 900. Pea neʼe natou ta te ʼu tohi ʼaia, ʼae ʼe fakahigoaʼi ko te tohi Massorétique. Neʼe natou fakaau te ʼu kupu ʼae neʼe natou hiki pea mo te ʼu mataʼi tohi ke natou vakaʼi ai pe neʼe mole natou fai he ʼu hala. Ka natou lotolotolua ʼo ʼuhiga mo he ʼu hala neʼe fai ʼi te ʼu ʼuluaki tohi ʼae neʼe natou fakaʼaogaʼi, neʼe tohi te ʼu manatu ʼaia ʼi te ʼu tafaʼaki. Neʼe fakafisi te kau Massorètes ʼi te toʼo he ʼu manatu ʼi te Tohi-Tapu. Neʼe ui fenei e te tagata Faiako ko Moshe Goshen-Gottstein ʼo ʼuhiga mo te ʼu tohi Fakahepeleo ʼo te Tohi-Tapu: “Ko te toʼo ʼo he ʼu manatu ʼi te Tohi-Tapu, neʼe hage kia natou ko he hala mamafa.”

Lua, ko te ʼu koga tohi ʼo te Tohi-Tapu ʼe tou maʼu ia ʼaho nei ʼe tokoni ki te kau tagata sivi Tohi-Tapu ke natou iloʼi te ʼu hala. Ohage la, neʼe akoʼi e te kau takitaki lotu talu mai ni lauʼi taʼu ʼe teau ko ʼanatou tohi Fakalatina neʼe maʼu ai te moʼoni ʼo ʼuhiga mo te Tohi-Tapu. Koia ʼae ia 1 Soane 5:7, neʼe natou ʼai ai te manatu loi ʼae neʼe tou talanoa ki ai ʼi te kamata ʼo te alatike ʼaeni. Neʼe toe maʼu te hala ʼaia ʼi te Tohi-Tapu Fakapilitania King James Version (Bible du roi Jacques). Kaʼe, ʼi tanatou maʼu ʼihi koga tohi ʼo te Tohi-Tapu, kotea ʼae neʼe ha ai? Neʼe tohi fenei e Bruce Metzger: “Neʼe mole maʼu te manatu ʼae ʼe tuʼu ʼi te vaega [ʼo 1 Soane 5:7] ʼi te ʼu koga Tohi-Tapu ʼafeā fuli (Syriaque, Copte, Arménien, Éthiopique, Arabe, Slavonne), gata pe ki te Tohi-Tapu Fakalatina.” Ki muli age, ko te Tohi-Tapu King James Version (Bible du roi Jacques) pea mo ʼihi atu Tohi-Tapu ʼae neʼe toe vakaʼi, neʼe toʼo te manatu hala ʼaia.

Neʼe fakaha moʼoni koa ʼi te ʼu koga Tohi-Tapu ʼafeā neʼe taupau te logo ʼae ʼe tuʼu ʼi te Tohi-Tapu? ʼI te maʼu ʼo te ʼu Takaiga Tohi ʼo Te Tai Mate ʼi te taʼu 1947, neʼe feala ki te ʼu tagata sivi Tohi-Tapu ke natou fakatatau te tohi Fakahepeleo ʼa te kau Massorètes mo te ʼu manatu ʼae ʼi te ʼu takaiga tohi ʼo te Tohi-Tapu, ʼae neʼe tohi ia taʼu ʼe afe ki muʼa atu. Neʼe ui e he tagata neʼe kau ki te ta ʼo te ʼu Takaiga Tohi ʼo Te Tai Mate, ko he takaiga tohi ʼe tahi ʼe “maʼu ai he fakamoʼoni ʼo ʼuhiga mo te hiki fakalelei ʼo te ʼu koga Tohi-Tapu ia taʼu ʼe afe tupu e te kau tagata hiki Tohi-Tapu Sutea.”

Neʼe teitei pe ko te ʼu papilusi ʼo te ʼu tohi fuli ʼo te Koga Tohi-Tapu Fakakeleka Fakakilisitiano ʼae neʼe maʼu ʼi te Fale Tanakiʼaga Tohi ʼo Chester Beatty, ʼi Dublin, ʼi Irlande. Pea ʼe kau ki ai te ʼu koga Tohi-Tapu ʼae neʼe tohi talu mai te taʼu 200 H.T.S., hili pe ki ai taʼu ʼe 100 ki te ʼosi katoa ʼo te Tohi-Tapu. ʼE ui fenei ʼi te tikisionalio Fakatohi-tapu (The Anchor Bible Dictionary): “Logo la neʼe lahi te ʼu manatu ʼi te Papilusi, kaʼe ʼe toe fakaha ai te alu tahi ʼo te fakaliliu ʼo te hisitolia ʼi te Tohi-Tapu.”

TONA FUA: Neʼe mole kakāʼi te Tohi-Tapu. Kaʼe ʼaki te alu ʼo te temi mo te ʼu koga tohi ʼo te Tohi-Tapu ʼae neʼe hiki, neʼe lelei age ai tona fakaliliu. Neʼe ui fenei e Sir Frederic Kenyon ʼo ʼuhiga mo te ʼu Koga Tohi-Tapu Fakakeleka Fakakilisitiano: “Ko te tohi ʼaia ʼe mole hona fakatatau mo ʼihi atu tohi ʼafeā. Koteʼuhi ʼe lahi ʼona fakamoʼoni kua fualoa ʼaupito. Pea ʼe mole feala anai ki he tagata sivi Tohi-Tapu ke ina ui ko te Tohi-Tapu ʼae kua tou maʼu ʼo kaku mai ki te ʼaho nei, ʼe mole totonu.” Pea ʼo ʼuhiga mo te ’u Koga Tohi-Tapu Fakahepeleo, ko te tagata sivi Tohi-Tapu ko William Henry Green neʼe ina ui fenei: “ ʼE feala ke tou fakamoʼoni ʼe mole he tahi age tohi neʼe totonu feia tona hiki.”

Neʼe puipui te Tohi-Tapu. Ki muli age, ʼe feala ke kotou maʼu pea mo lau he Tohi-Tapu neʼe hiki ia ʼaho nei. Pea ka kotou filifili he fakaliliu ʼe lelei ʼo te Tohi-Tapu, ʼe mahino papau ia ʼe kotou lau he Tohi-Tapu neʼe hiki leleiʼi mai te ʼu ʼuluaki Tohi-Tapu.a Kaʼe, he koʼe neʼe lava puipui te Tohi-Tapu logo la te ʼu aluʼaga neʼe feala ke maumau ai, mo te fakafeagai, mo te ʼu faiga ʼae ke fetogi te logo ʼae ʼe tuʼu ʼi te Tohi-Tapu? Pea he koʼe ʼe fakaofoofo tona puipui? Kotea ʼae ʼe makehe ai te tohi ʼaia?

Tokolahi te kau ako ʼo te Tohi-Tapu neʼe natou manatu tahi mo te apositolo ko Paulo ʼae neʼe ina tohi fenei: “E hau te Tohi tapu katoa mai te tuku manava a te Atua.” (2 Timoteo 3:16) Neʼe natou tui neʼe puipui te Tohi-Tapu koteʼuhi ʼe ko te Folafola pe ʼaia ʼe tahi ʼa te ʼAtua pea neʼe taupau e te ʼAtua ʼo kaku mai ki te ʼaho nei. Ko Faizal ʼae neʼe tou talanoa ki ai ʼi te ʼuluaki alatike, neʼe ina fakatotonu ke ina vakaʼi te ʼu manatu fuli ʼaia ʼaki tana ako ʼe ia totonu ia te Tohi-Tapu. Neʼe punamaʼuli ʼi te ʼu faʼahi ʼae neʼe ina maʼu. Neʼe mahino atu aipe ko te ʼu akonaki ʼa te kau takitaki lotu ʼe mole fakatafito ki te Tohi-Tapu. Pea tahi, neʼe malave kia ia te fakatuʼutuʼu ʼa te ʼAtua ʼo ʼuhiga mo te kele ʼae ʼe fakaha ʼi Tana Folafola.

ʼE ina ui fenei: “Kua au iloʼi papau ʼi te temi nei ko te Tohi-Tapu ʼe ko he meʼa ʼofa mai te ʼAtua. Pea tahi, kapau ʼe feala ke fakatupu e te ʼAtua te ʼatulaulau, ʼe mole ina maʼu anai koa te malohi ke ina foaki mai he tohi pea mo taupau maʼa tatou? ʼE hage pe ʼe tou ui ʼe tuʼakoi te malohi ʼo te ʼAtua pea mo tona mafimafi. Pea ko ai ia au ke au ui ʼe tuʼakoi te malohi ʼo te ʼAtua?”—Esaia 40:8.