Te Faikole

1 Koteā Tona Tupuʼaga?

TE FAIKOLE. ʼE tahitahiga te ʼu manatu ʼi te Tohi-tapu ʼe fia tokagaʼi e te hahaʼi pea mo natou fia mahino kiai. Kotou vakaʼi age muʼa te ʼu fehuʼi ʼe fitu ʼaē ʼe fai māhani e te hahaʼi ʼo ʼuhiga mo te faikole; pea tou vakaʼi fakatahi leva te ʼu tali ʼaē ʼe foaki mai ʼi te Tohi-Tapu. Neʼe tā te ʼu ʼalatike ʼaenī ke tokoni atu ki takotou faikole, ke feala ai leva hakotou faikole peʼe ke liliu takotou ʼu faikole ʼo lelei age.

ʼI TE mālamanei, ʼi te ʼu agaʼi fenua fuli pea mo te ʼu lotu fuli, ko te hahaʼi ʼe natou faikole. ʼE natou faikole takitokotahi; ʼe natou faikole ʼi te kaugamālie. ʼE natou faikole ʼi te ʼu ʼēkelesia, ʼi te ʼu sinakoka, ʼi te ʼu fale faikole ʼa te kau Mahometa, ʼi te ʼu koga meʼa taputapu. ʼE lagi natou fakaʼaogaʼi he ʼu meʼa fāliki, ke natou tulolo ʼo faikole ai, peʼe ko he ʼu lōsalio, peʼe ko he ʼu meʼa takafuafua moʼo lau ʼo he ʼu kole, peʼe ko he ʼu fakatātā, peʼe ko he ʼu tohi faikole, peʼe ko he ʼu faikole neʼe natou tohi ʼi he ʼu kiʼi papa pea mo natou tautau.

Ko te faikole ʼe ina fakakeheʼi ia te tagata mai te tahi age ʼu meʼa maʼuli fuli ʼaē ʼi te kele. ʼE moʼoni, ʼe lahi te ʼu faʼahi ʼaē ʼe tou tatau ai mo te manu. Ohagē ko te manu, ʼe tonu ke tou kakai, ke tou mānava, pea mo ʼiʼinu. Ohagē ko te manu, ʼe tou tutupu ake, tou māʼuʼuli pea mo tou mamate. (Tagata Tānaki 3:19) Kae ʼe gata pē ki te tagata ʼe faikole. Koteā tona tupuʼaga?

Lagi ko tona tali fakanounou kiai ʼe ko te ʼaoga kiā tātou ke tou faikole, heʼe ʼi te agamāhani, ko te hahaʼi ʼe natou fakaʼaogaʼi te faikole ke feala ai hanatou felōgoi mo te potu fakalaumālie, he faʼahi kiā nātou ʼe māʼoniʼoni peʼe taputapu, pea mo heʼegata. ʼE fakahā mai ʼi te Tohi-Tapu neʼe faʼu tātou ʼaki te fakaʼamu ʼaē ki te ʼu meʼa ʼaia. (Tagata Tānaki 3:11) ʼI te tahi temi neʼe ʼui fēnei e Sesu Kilisito: “Fiafia ia nātou ʼaē ʼe natou ʼiloʼi tonatou masiva fakalaumālie.”—Mateo 5:3.

ʼE feala ke tou tokagaʼi ia te “masiva fakalaumālie” ʼaia ʼa te hahaʼi ʼaki te lahi ʼo te ʼu fale faikole pea mo te ʼu monimo, mo te lahi ʼo te ʼu hola ʼaē ʼe natou fakaʼaogaʼi ki te faikole. ʼE moʼoni, ko ʼihi hahaʼi ʼe natou falala pē kiā nātou totonu peʼe ki ʼihi moʼo fakafīmālieʼi tonatou maʼuli fakalaumālie. Kae ʼi takotou manatu, ʼe feala koa lā ki te tagata ke tokoni fakalelei mai kae lahi tona ʼu tuʼakoi? ʼE tou vaivai gafua, mo nounou totatou maʼuli, pea ʼe mole tou mālama kiā meʼa fuli. ʼE ko he tahi pē ʼe poto age, ʼe mālohi age, ʼe faʼa kātaki age iā tātou, ʼe feala ke ina foaki mai ia te ʼu meʼa ʼaē ʼe ʼaoga kiā tātou. Pea koteā lā te ʼu meʼa ʼaē ʼe ʼaoga kiā tātou ʼi te faʼahi fakalaumālie, ʼaē ʼe ina uga ai tātou ke tou faikole?

Kotou tokagaʼi age muʼa te faʼahi ʼaenī: ʼE lagi neʼe kua kotou fakaʼamu ke takitaki koutou, ke kotou maʼu te poto, peʼe ke kotou maʼu te ʼu tali ki ʼakotou fehuʼi ʼaē ʼe mole tali kiai e te poto fakatagata. ʼE lagi neʼe kua kotou logoʼi te ʼaoga ʼaē ke fakafīmālieʼi koutou he neʼe mate he tahi neʼe kotou ʼoʼofa ai, peʼe kotou logoʼi te ʼaoga ʼaē ke tokoni atu ʼo ʼuhiga mo he tonu ʼe kotou fai, peʼe ko te ʼaoga ʼaē ke fakamolemole atu mokā ʼe vevele tokotou leʼo ʼo loto.

Ohagē ko tona fakahā ʼi te Tohi-Tapu, ko te ʼu tupuʼaga fuli lā ʼaia ʼe tonu ai ke tou faikole. Ko te Tohi-Tapu ʼe ko te tohi pē ʼaia ʼe tahi ʼe tou falala kiai ʼo ʼuhiga mo te faʼahi ʼaia, pea ʼe lahi ai tatatou maʼu ia te ʼu faikole ʼa te ʼu tagata pea mo te ʼu fafine agatonu e tokolahi. Neʼe natou faikole ke fakafīmālieʼi nātou, ke takitaki nātou, ke fakamolemole age kiā nātou, pea ke natou maʼu he ʼu tali ki tanatou ʼu fehuʼi faigataʼa.—Pesalemo 23:3; 71:21; Taniela 9:4, 5, 19; Hapakuke 1:3.

Ko te ʼu faʼahiga faikole ʼaia, logolā tonatou kehekehe, kae ʼe ʼi ai te faʼahi ʼe natou tatau ai. Neʼe maʼu e te hahaʼi faikole agatonu ʼaia ia te faʼahi ʼe maʼuhiga ke fua lelei ai tanatou ʼu faikole, pea ko te faʼahi ʼaia mole kei tokagaʼi peʼe meʼa noaʼi ʼi te mālamanei. Ko te hahaʼi agatonu ʼaia neʼe natou ʼiloʼi peʼe ko ai ʼaē neʼe tonu ke natou faikole ki ai.

Te Faikole

2 Kiā Ai?

ʼE FAGONO koa te ʼAtua ki te ʼu faikole fuli? ʼI te mālamanei, maʼa te hahaʼi tokolahi ʼe fagono te ʼAtua ki te ʼu faikole fuli. ʼE leleiʼia te manatu ʼaia e te hahaʼi tokolahi ʼaē ʼe natou lagolago ki te fefioʼaki ʼa te ʼu lotu pea mo natou loto ke tali ia te ʼu lotu fuli, logolā tonatou kehekehe. Kae ʼe feala koa ke natou faihala?

ʼI tona fakahagatonu, ʼe akoʼi mai ʼi te Tohi-Tapu ʼe lahi te ʼu faikole ʼe mole fai kiā ia ʼaē ʼe tonu ke fai ki ai. ʼI te temi ʼaē neʼe tohi ai te Tohi-Tapu, neʼe ko te agamāhani ʼa te hahaʼi tanatou faikole ki te ʼu fakatātā. Kae neʼe fakatokagaʼi liuliuga e te ʼAtua ia te aga ʼaia. Ohagē lā, ʼe ʼui fēnei iā Pesalemo 115:4-6 ʼo ʼuhiga mo te ʼu taulāʼatua: “ ʼE ʼi ai ʼonatou taliga kae ʼe mole natou logo.” ʼE faigafua pē tatatou mahino ki te puani ʼaia. He koʼē ʼe kotou faikole ki he ʼatua ʼe mole fagono atu anai kiā koutou?

ʼE lahi tatatou mahino ki te puani ʼaia ʼaki te fakamatala Fakatohi-tapu ʼaenī. Ko te polofetā moʼoni ʼaē ko Elia, neʼe ina uga te ʼu polofetā ʼo Paale ke natou faikole ki tonatou ʼatua, pea ʼosi ʼaia ʼe faikole anai ia Elia ki tona ʼAtua. Neʼe ʼui e Elia ko te ʼAtua moʼoni ʼe tali mai anai pea ko te ʼatua loi ʼe mole tali mai anai ia. ʼI tonatou uga ʼaia e Elia, neʼe faikole loaloaga ai te ʼu polofetā ʼa Paale pea mo fakamālotoloto, ʼo natou kalaga leʼo lahi, kae neʼe mole ʼi ai hona fua! ʼE ʼui fēnei ʼi te fakamatala: “Neʼe mole he tahi neʼe tali mai, pea neʼe mole tokaga mai kiā nātou.” (1 Hau 18:29) Kae koteā ʼaē neʼe hoko ʼi te temi ʼaē neʼe faikole ai Elia?

ʼI te ʼosi faikole ʼa Elia, ko tona ʼAtua neʼe ina tali mai aipē, ʼo fakatō ifo te afi mai te lagi ʼo ulo ai te mōlaga ʼaē neʼe teuteuʼi e Elia. Koteā ʼaē neʼe kehekehe ai te faikole ʼa Elia pea mo te faikole ʼa te ʼu polofetā ʼa Paale? ʼE ʼi ai te manatu maʼuhiga ʼi te faikole ʼa Elia, ʼe talanoa kiai iā 1 Hau 18:36, 37. ʼE ko he faikole neʼe nounou ia, heʼe ko kupuʼi palalau pē e teitei 30 ʼi te lea Fakahepeleo. Kae ʼi te faikole nounou ʼaia, neʼe fakaʼaogaʼi e Elia tuʼa tolu te huafa ʼo te ʼAtua, ʼaē ko Sehova.

Ko Paale, ʼe ko te higoa ʼe fakaʼuhiga ki te kupu “pule,” neʼe ko te ʼatua ia ʼa te kau Kanaane, pea neʼe mole māu te ʼu ʼatua Paale neʼe natou tauhi kiai. Kae ko Sehova ʼe ko te huafa pē ʼaia e tahi, ʼaē ʼe fakaʼaogaʼi kiā te ia ʼāteaina pē ʼi te ʼatulaulau kātoa. Ko te ʼAtua ʼaia neʼe ina ʼui fēnei ki tana hahaʼi: “Ko au ia Sehova. Ko toku huafa ʼaia; pea ʼe mole au foaki anai toku kolōlia ki he tahi age.”—Isaia 42:8.

Neʼe faikole koa ia Elia pea mo te ʼu polofetā ʼa Paale ki he ʼAtua pē e tahi? Ko te tauhi kiā Paale neʼe ina fakamālaloʼi ia te hahaʼi ʼaki he ʼu toʼotoʼoga heʼeʼaoga pea mo sākilifisioʼi ni ʼu hahaʼi. Kae ko te tauhi ia kiā Sehova, neʼe ina fakamaʼuhigaʼi tana hahaʼi ko Iselaele, ʼo ina fakaʼāteaina mai nātou mai te ʼu aga ʼaia ʼaē neʼe natou fakamālaloʼi te hahaʼi. Kotou fakakaukauʼi age muʼa: kapau neʼe kotou fai he tohi ki hokotou kaumeʼa ʼe fakaʼapaʼapaʼi lahi, pea neʼe tohi lelei aipē tona higoa, ʼe kotou fakaʼamu anai koa ʼe foaki takotou tohi ki he tahi kehe, ʼaē ko tona maʼuli ʼe mole lelei pea ʼe mole ʼalutahi mo te aga ʼaē ʼo tokotou kaumeʼa? Kailoa ia!

Kapau ko Sehova ʼaē ʼe kotou faikole ki ai, pea ʼe kotou faikole ki te Tupuʼaga, te Tamai ʼo te mālamanei.a Neʼe ʼui fēnei e te polofetā ko Isaia ʼi tana faikole: “Ko koe, Ê Sehova, ko tamatou Tamai.” (Isaia 63:16) ʼE ko ia pē ʼaia ʼaē neʼe talanoa ki ai Sesu Kilisito ʼi tana ʼui fēnei ki tana ʼu tisipulo: “ ʼE au hake ki taku Tamai pea ko takotou Tamai, pea ki toku ʼAtua pea ko tokotou ʼAtua.” (Soane 20:17) Ko Sehova ʼe ko te Tamai ʼa Sesu. ʼE ko ia te ʼAtua ʼaē neʼe faikole ki ai Sesu pea mo ina akoʼi tana ʼu tisipulo ke natou faikole kiā te ia.—Mateo 6:9.

ʼE akoʼi mai koa ʼi te Tohi-Tapu ke tou faikole kiā Sesu, kiā Malia, ki te kau sagato, peʼe ki te kau ʼāselo? Kailoa ia, ke tou faikole pē kiā Sehova. Tou vakaʼi age muʼa te ʼu manatu e lua ʼaē ʼe tonu ai ke tou faikole kiā Sehova. ʼUluaki, ko te faikole ʼe ko he faʼahiga tauhi, pea ʼe ʼui ʼi te Tohi-Tapu ko te tauhi ʼe tonu ke fai ʼāteaina pē kiā Sehova. (Ekesote 20:5) Lua, ʼe fakahā ʼi te Tohi-Tapu ʼe ko Sehova ʼaē “ ʼe fagono ki te faikole.” (Pesalemo 65:2) Tatau aipē pe neʼe tuku e Sehova he ʼu pilivilēsio ki ʼihi, kae ko te faikole ʼe ʼāteaina pē kiā te ia. ʼE ko ia te ʼAtua ʼe ina fakapapau mai ʼe fagono ʼāteaina pē ki ʼatatou faikole.

Koia kapau ʼe kotou loto ke fagono atu te ʼAtua ki ʼakotou faikole, kotou manatuʼi te tokoni Fakatohi-tapu ʼaenī: “Ko te tagata fuapē ʼaē ʼe fetapa ki te huafa ʼo Sehova ʼe hao anai ia.” (Gāue 2:21) Kae ko te ʼu faikole ʼaē ʼe fai kiā Sehova, ʼe fagono fuli koa kiai, peʼe ʼi ai he tahi age meʼa ʼe ʼaoga ke tou ʼiloʼi mo kapau ʼe tou loto ke fagono mai Sehova ki ʼatatou faikole?

[Nota]

[Paki ʼo te pasina 5]

ʼI te uga ʼaē e Elia ia te ʼu polofetā ʼa Paale ke natou faikole ki tanatou ʼatua, neʼe fakamoʼoni ai ʼe mole fagono te ʼAtua ki te ʼu faikole fuli

Te Faikole

3 ʼE Tonu Ke Feafeaʼi?

ʼO ʼUHIGA mo te faikole, ʼe lahi te ʼu talatisio fakalotu ʼe natou fakamaʼuhigaʼi fau ia te faʼahiga fai ʼaē ʼo te faikole, tona ʼu kupu ʼaē ʼe tonu ke lau, pea mo tona ʼu toʼotoʼoga. ʼI te Tohi-Tapu, ʼe tokoni mai ke mole tou fakamaʼuhigaʼi fau te ʼu faʼahi ʼaia, kae ke tou tokagaʼi tāfito te tahi age ʼu faʼahi ʼe maʼuhiga ʼo te fehuʼi ʼaenī “Peʼe tonu koa ke feafeaʼi tatatou faikole?”

ʼI te Tohi-Tapu, ʼe talanoa ai ki te ʼu kaugana agatonu ʼa te ʼAtua neʼe faikole ʼi te ʼu potu kehekehe pea neʼe kehekehe tanatou ʼu faʼahiga faikole. Neʼe natou faikole fakalogologo peʼe leʼo lahi ʼo tahi mulimuli pē ki tona ʼaluʼaga. Neʼe natou faikole ʼo haga ʼonatou mata ki te lagi peʼe natou tulolo. Neʼe mole natou fakaʼaogaʼi he ʼu pāki, peʼe ko he ʼu lōsalio, peʼe ko he ʼu tohi faikole moʼo tokoni ki ʼanatou faikole, kae neʼe natou faikole mo tonatou loto kātoa ʼaki pē tanatou ʼu palalau māhani. He koʼē neʼe fagono te ʼAtua ki tanatou ʼu faikole?

Ohagē pē ko te faʼahi kua tou vakaʼi ʼi te ʼalatike kua ʼosi, neʼe natou faikole ki te ʼAtua pē e tahi, ia Sehova. ʼE ʼi ai te tahi faʼahi maʼuhiga. ʼE tou lau fēnei iā 1 Soane 5:14: “Koʼenī te meʼa ʼaē ʼe tou tui papau kiai ʼo ʼuhiga mo ia: tatau aipē peʼe koteā he meʼa ʼe tou kole ʼo mulimuli ki tona finegalo, kae ʼe fagono ia kiā tātou.” ʼE tonu ki ʼatatou faikole ke ʼalutahi mo te finegalo ʼo te ʼAtua. Koteā tona fakaʼuhiga?

Ke ʼalutahi tatatou ʼu faikole mo te finegalo ʼo te ʼAtua, ʼe tonu ke tou ʼiloʼi pe koteā tona finegalo. Koia ko te ako ʼo te Tohi-Tapu ʼe ko he faʼahi maʼuhiga ʼo te faikole. Ko tona fakaʼuhiga koa, ʼe tonu ke tou liliu ko he hahaʼi sivi Tohi-Tapu pea hoki fagono mai anai te ʼAtua ki ʼatatou faikole? Kailoa ia, kae ʼe loto e te ʼAtua ke tou ako ke tou ʼiloʼi ia tona finegalo, ʼo tou kumi ke tou mahino kiai pea mo fai tona finegalo. (Mateo 7:21-23) ʼE tonu ke ʼalutahi tatatou faikole mo te ʼu meʼa ʼaē ʼe tou ako.

ʼI tatatou ako ʼaē ke tou ʼiloʼi ia Sehova pea mo tona finegalo, ʼe tuputupu ai tatatou tui—ko he tahi ʼaia faʼahi ʼe maʼuhiga ki te faikole. Neʼe ʼui fēnei e Sesu: “Ko te meʼa fuli pē kā kotou kole anai ʼi te faikole ʼaki te tui, ʼe kotou maʼu anai.” (Mateo 21:22) Ko te tui ʼe mole fakaʼuhiga ia ʼe tou hoko tui ki he meʼa, kae ʼe fakaʼuhiga ia ʼe tou tui ki he faʼahi logolā ʼe fakapulipuli, kae ʼe lahi ʼaupitō tona ʼu fakamoʼoni. (Hepeleo 11:1) ʼE lahi te ʼu fakamoʼoni ʼe tou maʼu ʼi te Tohi-Tapu ko Sehova, ʼaē ʼe fakapulipuli, ʼe maʼuli moʼoni ia, ʼe feala hatatou falala ki ai, pea ʼe lotolelei ia ke ina tali ki te ʼu faikole ʼa nātou ʼaē ʼe tui kiā te ia. Tahi ʼaē, ʼe feala ke tou kole tuʼumaʼu kiā te ia ke lahi age tatatou tui, pea ko Sehova ʼe ina leleiʼia ke ina foaki mai te ʼu meʼa ʼaē ʼe ʼaoga kiā tātou.—Luka 17:5; Sake 1:17.

Tou vakaʼi age muʼa te tahi age faʼahi maʼuhiga, ke tou ʼiloʼi ai peʼe tonu ke feafeaʼi tatatou faʼahiga faikole. Neʼe ʼui fēnei e Sesu: “ ʼE mole he tahi ʼe haʼu ki te Tamai ʼi tuʼa atu iā te au.” (Soane 14:6) Koia ʼe hoki feala pē ke tou fakaovi ki te Tamai ko Sehova, ʼaki pē ia Sesu. Neʼe ʼui ai e Sesu ki tana ʼu tisipulo ke natou faikole kiā Sehova ʼaki tona huafa. (Soane 14:13; 15:16) ʼE mole fakaʼuhiga leva ʼe tonu ke tou faikole kiā Sesu. Kae, ʼi tatatou faikole ʼaē ʼaki te huafa ʼo Sesu, ʼe tou manatuʼi ʼe ko Sesu pē ʼaē ʼe ina fakafealagia ke tou fakaovi ki tatatou Tamai haohaoa pea mo māʼoniʼoni.

ʼI te tahi temi, neʼe ʼui fēnei age e te ʼu tisipulo ʼaē neʼe nonofo tuʼumaʼu mo Sesu: “ ʼAliki, ako mai kiā mātou te faikole.” (Luka 11:1) ʼE hā mai, neʼe mole natou kole he ʼu meʼa ohagē ko te ʼu meʼa ʼaē neʼe kua tou vakaʼi. Neʼe natou fia ʼiloʼi tāfito te ʼu faʼahi ʼaē ʼe tonu ke natou talanoa kiai ʼi tanatou faikole—ʼe hagē pē neʼe natou ʼui: ‘Koteā ʼaē ʼe tonu ke matou faikole kiai?’

[Fakamatala ʼo te pasina 6]

ʼE fagono te ʼAtua ki te ʼu faikole ʼaē ʼe ʼalutahi mo tona finegalo, ʼaē ʼe fai ʼaki te tui, pea mo ʼaē ʼe fai ʼaki te huafa ʼo Sesu

Te Faikole

4 ʼO ʼUhiga Mo Teā?

NEʼE ʼui ʼe ko te faikole neʼe lau liuliuga age ʼi te ʼu faikole fuli ʼa te kau Kilisitiano. Peʼe moʼoni peʼe kailoa te manatu ʼaia, kae ko te faikole faʼifaʼitaki ʼa Sesu—ʼaē neʼe higoaʼi ʼi ʼihi temi ko te Faikole ʼa te ʼAliki peʼe ko Te Tamai ʼe ʼi Selō—ʼe ko te faikole ʼaia ʼe mahino hala kiai te tokolahi. Ko te ʼu lauʼi miliona hahaʼi ʼe natou lau fakaʼatamai te faikole ʼaia ʼi te ʼaho fuli, lagi ʼi te ʼaho kātoa pē. Kae neʼe mole loto e Sesu ke fakaʼaogaʼi fēia ia te faikole ʼaia. ʼE tou ʼiloʼi feafeaʼi te faʼahi ʼaia?

ʼI muʼa pē ʼo tana talanoa ki te faikole ʼaia, neʼe ʼui fēnei e Sesu: “Kā kotou faikole, ʼaua naʼa kotou lau ʼo liuliuga ʼakotou ʼu palalau.” (Mateo 6:7) Neʼe mulimuli koa Sesu ki tana ʼu palalau ʼaia, mo kapau neʼe ina fakatuʼu he ʼu faʼahiga palalau ke maʼu fakaʼatamai pea ke lau liuliuga? Kailoa ia! Kae neʼe akoʼi mai e Sesu kiā tātou, pe koteā ʼaē ʼe tonu ke tou faikole kiai, pea neʼe ina fakahā lelei mai te ʼu faʼahi maʼuhiga ʼaē ke tou manatuʼi mokā tou faikole. Tou vakaʼi age muʼa te ʼu palalau ʼaē neʼe ina fai. ʼE tuʼu te faikole ʼaia iā Mateo 6:9-13.

“Ko tamatou Tamai ʼe ʼi selō, ke tapuhā tou huafa.”

Neʼe fakamanatuʼi ai e Sesu ki tana ʼu tisipulo ʼe tonu ki te ʼu faikole fuli ke fai ki tana Tamai, ko Sehova. Kae ʼe kotou ʼiloʼi koa pe koʼē ʼe maʼuhiga ʼaupitō te huafa ʼo te ʼAtua pea he koʼē ʼe ʼaoga ke fakatapuhā, peʼe ke liliu ʼo māʼoniʼoni?

Talu mai te kamataʼaga ʼo te hisitolia ʼo te tagata, neʼe moamoagaʼi te huafa taputapu ʼo te ʼAtua ʼaki he ʼu fasituʼu. Ko Satana te fili ʼo te ʼAtua, neʼe ina lau ko Sehova ʼe ko he Pule ʼe gutuloi pea manatu pē kiā ia totonu, pea ʼe mole tonu ke pule ia ki Tana ʼu meʼa ʼaē neʼe ina fakatupu. (Senesi 3:1-6) Tokolahi neʼe natou lagolago kiā Satana, ʼo natou akoʼi ko te ʼAtua ʼe aga fefeka, ʼe agakovi, pea ʼe ina liufaki te kovi ʼaki te kovi peʼe natou fakafisi ʼe ko Ia te Tupuʼaga ʼo meʼa fuli. Ko ʼihi pē foki, neʼe natou fakafeagai ki tona huafa, ʼo natou toʼo te huafa ʼo Sehova mai te ʼu fakaliliu ʼo te Tohi-Tapu pea mo tapuʼi tona fakaʼaogaʼi.

ʼE fakahā ʼi te Tohi-Tapu ko te ʼAtua ʼe ina fakatokatoka anai ia te ʼu aga heʼe faitotonu fuli ʼaia. (Esekiele 39:7) ʼI tana fai te faʼahi ʼaia, ʼe ina fakafīmālieʼi anai te ʼu meʼa fuli ʼaē ʼe ʼaoga kiā koutou pea mo fakatokatoka tokotou ʼu fihifihia fuli. ʼO feafeaʼi? ʼE tou maʼu tona tali ʼi te hoko atu e Sesu ʼo tana faikole.

“Ke hoko mai tou puleʼaga.”

Iā ʼaho nei, ʼe lahi te ʼu manatu kehekehe ʼa te kau takitaki lotu ʼo ʼuhiga mo te Puleʼaga ʼo te ʼAtua. Kae ohagē ko tona kua mahino ki te hahaʼi ʼaē neʼe fagono kiā Sesu, neʼe kua fakakikite talu mai fualoa e te kau polofetā ʼa te ʼAtua ko te Mēsia, ʼaē ko te Tagata Haofaki ʼaē neʼe fili e te ʼAtua, ʼe ina taki anai he Puleʼaga kā ina fetogi anai te mālamanei. (Isaia 9:6, 7; Taniela 2:44) ʼE ina fakatapuhā anai te huafa ʼo te ʼAtua ʼaki hana fakahā fakalelei ia te ʼu fasituʼu ʼa Satana, pea mo fakaʼauha leva ia Satana pea mo tana ʼu gāue fuli. Ko te Puleʼaga ʼo te ʼAtua ʼe ina fakagata anai te tau, te mahaki, mo te hoge—ʼo fēia mo te mate. (Pesalemo 46:9; 72:12-16; Isaia 25:8; 33:24) Kā kotou faikole ke hoko mai te Puleʼaga ʼo te ʼAtua, pea ʼe kotou kole ke hoko moʼoni ia te ʼu fakapapau fuli ʼaia.

“Ke fai tou finegalo ʼi te kele, ohagē ko selō.”

ʼE hā mai ʼi te ʼu palalau ʼa Sesu ko te finegalo ʼo te ʼAtua ʼe hoko moʼoni anai ʼi te kele ohagē ko selō, te potu ʼaē ʼe nofo ai te ʼAtua. Neʼe mole feala ke tāʼofi ia te fakahoko ʼo te finegalo ʼo te ʼAtua ʼi selō; he neʼe hoko ai te tau ʼa te ʼAlo ʼo te ʼAtua pea mo Satana mo tana ʼu ʼāselo, ʼo ina lī ifo nātou ki te kele. (Fakahā 12:9-12) Ohagē pē ko te ʼu faʼahi e lua ʼo te faikole ʼaē neʼe kua tou vakaʼi, ko te tolu faʼahi ʼaenī ʼo te faikole, ʼe tokoni mai ke tou haga tokagaʼi te ʼu meʼa ʼaē ʼe maʼuhiga tāfito age, ʼaē ko te fai ʼo te finegalo ʼo te ʼAtua kae mole ko totatou finegalo. ʼE ko tona finegalo ke maʼu tuʼumaʼu e te ʼu meʼa fuli ʼaē neʼe ina fakatupu ia te ʼu meʼa ʼaē ʼe lelei ʼaupitō age. Koia, mo te tagata haohaoa pē lā ʼaē ko Sesu neʼe ina ʼui fēnei ki tana Tamai: “Ke mole ko toku finegalo ʼaē ʼe tonu ke fai, kae ʼo koe ia.”—Luka 22:42.

“Ke ke foaki mai ʼi te ʼaho nei tamatou pane.”

Pea neʼe fakahā e Sesu ʼe feala ke tou toe kole te ʼu meʼa ʼaē ʼe ʼaoga kiā tātou takitokotahi. ʼE mole kovi tatatou kole ki te ʼAtua ke ina foaki mai te ʼu meʼa ʼaē ʼe ʼaoga kiā tātou. Kā tou fai te faʼahi ʼaia, ʼe tou manatuʼi ai ko Sehova ʼe ko ia ʼaē ʼe ina “foaki ki te hahaʼi fuli te maʼuli pea mo te mānava, pea mo te ʼu meʼa fuli.” (Gāue 17:25) ʼE fakahā ʼi te Tohi-Tapu ʼe ko ia ʼe ko he tamai ʼofa ʼe fiafia ʼi tana foaki ki tana fānau ia te ʼu meʼa ʼaē ʼe ʼaoga kiā nātou. Kae ohagē pē ko he tamai ʼofa, ʼe mole ina foaki mai anai te ʼu meʼa ʼaē ʼe mole ʼaoga kiā tātou.

“Ke ke fakamolemole ʼomatou maʼua.”

ʼE kotou tuʼu maʼua moʼoni koa ki te ʼAtua? ʼE ʼaoga koa kiā koutou ia tana fakamolemole? Tokolahi iā ʼaho nei mole kei natou mahino pe koteā te agahala pea mo te kovi ʼaē ʼo te agahala. Kae ʼe akoʼi mai ʼi te Tohi-Tapu ʼe tou maʼuli mamahi ʼuhi ko te agahala, heʼe tupu mai ai te mate ʼo te tagata. Mai tona ʼaluʼaga ʼaē ʼe tou tutupu fuli ake ʼi te agahala, koia lā ʼaē ʼe tou agahala ai ʼi te temi fuli pē, pea hoki feala pē hatatou maʼu he kā haʼu ʼe heʼegata mokā ʼe fakamolemole mai te ʼAtua ia tatatou ʼu agahala. (Loma 3:23; 5:12; 6:23) ʼE ko he meʼa fakalotofīmālie kiā tātou ia tatatou ʼiloʼi ʼaē ʼe ʼui fēnei ʼi te Tohi-Tapu: “Ko koe, Ê Sehova, ʼe ke agalelei pea mo fakamolemole gafua.”—Pesalemo 86:5.

“ ʼAua naʼa ke tuku mātou ki te fakahala.”

ʼE kotou mahino koa ki te ʼaoga ʼaē kiā koutou te puipui ʼa te ʼAtua? Tokolahi ʼe mole natou tui ʼe maʼuli moʼoni ia Satana, ia ia ʼaē ʼe ina ‘fakahalaʼi’ ia tātou. Kae ko Sesu neʼe ina akoʼi mai ʼe maʼuli moʼoni ia Satana, ʼo ina fakahigoaʼi ia ia ko “te pule ʼo te mālamanei.” (Soane 12:31; 16:11) Neʼe fakahalaʼi e Satana te mālama ʼaenī, ʼaē ʼe ina puleʼi, pea ʼe toe loto foki ia ke ina fakahalaʼi koutou, ke ʼaua naʼa kotou felōgoi mo takotou Tamai, ko Sehova. (1 Petelo 5:8) Kae ko Sehova ʼe mālohi age ia iā Satana pea ʼe fiafia ia ʼi te puipui ʼo nātou ʼaē ʼe ʼoʼofa kiā te Ia.

ʼI tatatou vakaʼi fakanounou ia te ʼu manatu tāfito ʼo te faikole faʼifaʼitaki ʼa Sesu, ʼe mole fakahā fuli mai te ʼu faʼahi ʼaē ʼe tonu ke tou faikole kiai. Tou manatuʼi, ʼe ʼui fēnei mai ʼo ʼuhiga mo te ʼAtua iā 1 Soane 5:14: “Tatau aipē peʼe koteā he meʼa ʼe tou kole ʼo mulimuli ki tona finegalo, kae ʼe fagono ia kiā tātou.” Koia ʼaua naʼa kotou tuʼaniaʼi ʼi te fakahā ʼi takotou faikole ʼaē ki te ʼAtua, ia te ʼu faʼahi ʼaē ʼe hagē kiā koutou ʼe mole faʼa maʼuhiga fau.—1 Petelo 5:7.

Kofea pea ʼi te temi fea ʼaē ʼe tonu ke tou faikole ai? ʼE maʼuhiga koa te ʼu faʼahi ʼaia?

Te Faikole

5 Kofea Pea ʼi Te Temi Fea?

ʼE LAGI neʼe kua kotou fakatokagaʼi ʼe teitei pē ki te ʼu lotu fuli, ʼe natou fakamaʼuhigaʼi he ʼu fale faikole pea mo hinoʼi he ʼu hola ʼo te ʼaho ke fai ai te ʼu faikole. ʼE hinoʼi mai koa ʼi te Tohi-Tapu he ʼu koga meʼa pea mo he ʼu temi ke tou faikole ai?

ʼE fakahā mai ʼi te Tohi-Tapu ʼe lahi te ʼu temi ke tou faikole ai. Ohagē lā, ʼi muʼa ʼo te kai ʼa Sesu mo tana ʼu tisipulo, neʼe fai tana kole fakafetaʼi ki te ʼAtua. (Luka 22:17) Pea ʼi te temi ʼaē neʼe fakatahitahi ai tana ʼu tisipulo ke natou fai tanatou tauhi, neʼe natou faikole fakatahi. Neʼe natou hoko atu aipē ia te agamāhani neʼe kua fualoa tona fai ʼi te ʼu sinakoka ʼa te kau Sutea, pea ʼi te fale lotu ʼi Selusalemi. Neʼe fakatuʼutuʼu e te ʼAtua ke liliu ia te fale lotu ko he “fale faikole ki te ʼu puleʼaga fuli.”—Maleko 11:17.

Kā fakatahitahi te ʼu kaugana ʼa te ʼAtua pea mo natou faikole fakatahi, ʼe fua lelei ia tanatou ʼu faikole. ʼE tali e te ʼAtua tanatou kole, mo kapau ʼe natou manatu tahi pea mo ʼalutahi tanatou faikole pea mo te ʼu pelesepeto Fakatohi-tapu. ʼE toe feala pē foki ki te faikole ke ina uga ia Sehova ke ina fai he meʼa neʼe mole ʼamanaki kiai. (Hepeleo 13:18, 19) ʼE faikole tuʼumaʼu ia te kau Fakamoʼoni ʼa Sehova ʼi tanatou ʼu fono. ʼE fakaafe atu koutou ke kotou ʼomai ki te Fale ʼo Te Puleʼaga ʼaē ʼe tuʼu ovi kiō koutou, pea mo kotou logo ai ki te ʼu taʼi faʼahiga faikole ʼaia.

Kae ʼe mole hinoʼi mai ʼi te Tohi-Tapu he temi peʼe ko he koga meʼa ke tou faikole ai. ʼE tou lau ʼi te Tohi-Tapu, ko te ʼu kaugana ʼa te ʼAtua neʼe natou faikole ʼi te ʼu temi kehekehe pea ʼi te ʼu koga meʼa kehekehe. Neʼe ʼui fēnei e Sesu: “Kā ke faikole, hū ki tou koga fale ʼo koe, pea ʼi tau ʼosi tāpunuʼi te matapā, faikole ki tau Tamai ʼaē ʼe ʼi te lilo; pea ko tau Tamai ʼaē ʼe sio ʼi te lilo, ʼe ina toe liufaki atu anai kiā te koe.”—Mateo 6:6.

ʼE mole ko he fakaafe fakafiafia koa lā ʼaia? ʼEī, ʼe feala hakotou fakaovi ki te Tuʼi Pule ʼo te ʼatulaulau ʼi he temi pē, mokā kotou tokotahi, pea kotou tui papau ʼe ina tokagaʼi anai takotou faikole. Koia ʼe mole tou punamaʼuli ai ki te kumi tuʼumaʼu ʼaē e Sesu ke nofo tokotahi moʼo faikole! ʼI te tahi temi, neʼe faikole ʼi te pō kātoa ki te ʼAtua, ke ina maʼu he takitaki ʼo ʼuhiga mo te tonu maʼuhiga ke ina fai.—Luka 6:12, 13.

ʼI te Tohi-Tapu, ʼe talanoa ai ki ʼihi tagata pea mo ʼihi fafine neʼe natou faikole ʼi te temi ʼaē neʼe maʼua ai ke natou fai he ʼu tonu maʼuhiga, peʼe ʼi te temi ʼaē neʼe natou tau ai mo he ʼu fihifihia mamafa. ʼI ʼihi temi, neʼe natou faikole leʼo lahi pea ʼi ʼihi temi neʼe natou faikole fakalogologo; neʼe natou faikole ʼi te kaugamālie pea mokā nātou tokotahi. Ko te faʼahi ʼaē ʼe maʼuhiga, neʼe natou faikole. ʼE toe fakaafe fēnei e te ʼAtua tana ʼu kaugana: “Ke kotou faikole tuʼumaʼu.” (1 Tesalonika 5:17) ʼE loto lelei ia ke fakalogo tuʼumaʼu pē kiā nātou ʼaē ʼe natou fai tona finegalo. ʼE mole ko he fakaafe ʼofa koa lā ʼaia?

ʼE mahino ia, ʼi te mālama agakovi ʼaenī, tokolahi ʼe natou feʼekeʼaki ʼo ʼuhiga mo te ʼaoga ʼo te faikole. ʼE lagi kotou feʼekeʼaki fēnei: ‘ ʼE tokoni moʼoni mai koa te faikole kiā au?’

[Fakamatala ʼo te pasina 9]

ʼE feala ke tou faikole ʼi te temi fuli pē pea ʼi te ʼu koga meʼa fuli pē

Te Faikole

6 ʼE Tokoni Feafeaʼi Kiā Tātou?

ʼE LAVA tokoni mai koa te faikole? ʼEī, heʼe fakahā mai ʼi te Tohi-Tapu ko te ʼu faikole ʼa te ʼu kaugana agatonu ʼa te ʼAtua neʼe fua lelei kiā nātou. (Luka 22:40; Sake 5:13) ʼI tona fakahagatonu, ʼe feala ki te faikole ke ina fakafīmālieʼi tātou ʼi te faʼahi fakalaumālie, ʼi te faʼahi ʼo te loto, pea mo te faʼahi fakasino. ʼO feafeaʼi?

Ohagē lā, ʼe foaki age ki hakotou tamasiʼi hana meʼa ʼofa. ʼE kotou akoʼi age anai koa ki ai ʼe gata pē tana fakafetaʼi ʼi tona loto, peʼe ke ina fakahā ʼi tana ʼu palalau tona loto fakafetaʼi? Kā tou fakahā ʼi tatatou ʼu palalau te ʼu meʼa ʼaē ʼe tou logoʼi ʼi totatou loto, ʼe liliu ai ʼo maʼuhiga pea mo mālohi. ʼE toe moʼoni fēia koa mokā ʼe tou palalau ki te ʼAtua? ʼEī! Tou vakaʼi age muʼa he ʼu faʼifaʼitaki.

Te ʼu faikole fakafetaʼi. Kā tou fakafetaʼi ki tatatou Tamai ki te ʼu meʼa lelei ʼaē neʼe tou maʼu, pea ʼe tou fakamaʼuhigaʼi ai ia tatatou ʼu tapuakina. Koia, ʼe tou logoʼi ai he fakafetaʼi ʼe lahi age, mo he fiafia ʼe lahi age, pea mo maʼu he ʼu manatu ʼe lelei age.—Filipe 4:6.

Te faʼifaʼitaki: Neʼe fakahā e Sesu ia tana loto fakafetaʼi ki te fakalogo mai ʼaē ʼa tana Tamai ki tana ʼu faikole pea mo tana tali mai kiai.—Soane 11:41.

Te ʼu faikole ke fakamolemole mai. Kā tou kole ke fakamolemole mai te ʼAtua, pea ʼe tou fakamālohiʼi ai totatou leʼo ʼo loto, mo fakahā lelei ai totatou loto fakahemala, pea mo lahi age tatatou mahino ki te kovi ʼaē ʼo te agahala. ʼE tou toe maʼu ai foki mo he loto fakafīmālie ki te vevele ʼaē ʼo totatou loto.

Te faʼifaʼitaki: Neʼe faikole ia Tavite moʼo fakahā ia tana loto fakahemala pea mo tana lotomamahi.—Pesalemo 51.

Te ʼu faikole ke tou maʼu he takitaki pea mo te poto. ʼI tatatou kole ʼaē kiā Sehova ke ina takitaki tātou peʼe ke ina foaki mai te poto ke tou lava fai ai he ʼu tonu ʼe lelei, ʼe feala ai ke tokoni mai ke tou agavaivai. ʼE toe fakamanatuʼi mai e te taʼi faʼahiga faikole ʼaia, totatou ʼu tuʼakoi pea mo tokoni mai ke tou falala ki tatatou Tamai ʼe ʼi selō.—Tāʼaga Lea 3:5, 6.

Te faʼifaʼitaki: Neʼe kole e Salomone ʼaki he agavaivai, ke ina maʼu he takitaki pea mo he poto moʼo puleʼi ʼo Iselaele.—1 Hau 3:5-12.

Te ʼu faikole mokā tou lotomamahi. Kapau ʼe tou tagi ki te ʼAtua ʼi te temi ʼaē ʼe hanu ai totatou loto, pea ʼe tou maʼu ai anai he fakafīmālie pea ʼe tou falala ai kiā Sehova kae mole kiā tātou totonu.—Pesalemo 62:8.

Te faʼifaʼitaki: Neʼe faikole ia te Hau ko Asa ʼi tana ʼamanaki tau ʼaē mo tona fili mālohi.—2 Fakamatala 14:11.

Te ʼu faikole maʼa nātou ʼaē ʼe faigataʼaʼia. ʼE tokoni mai te ʼu faʼahiga faikole ʼaia ke mole tou manatu pē kiā kita totonu, pea ʼe fakatuputupu ai ia totatou loto manavaʼofa pea mo totatou lotomahino.

Te faʼifaʼitaki: Neʼe hūfaki e Sesu tana ʼu tisipulo.—Soane 17:9-17.

Te ʼu faikole fakavikiviki. Kā tou fakavikiviki kiā Sehova ʼo ʼuhiga mo tana ʼu gāue fakaofoofo pea mo tona ʼu kalitātē, pea ʼe lahi age anai tatatou fakaʼapaʼapa pea mo tatatou loto fakafetaʼi ʼaē kiā te ia. ʼE toe tokoni mai te ʼu taʼi faikole ʼaia ke tou fakaovi ki totatou ʼAtua pea mo Tamai.

Te faʼifaʼitaki: Neʼe fakavikiviki fakamālotoloto ia Tavite ki te ʼAtua ʼo ʼuhiga mo te ʼu meʼa ʼaē neʼe ina fakatupu.—Pesalemo 8.

Ko te tahi tapuakina ʼe tou maʼu mai te faikole, ʼe ko te “tokalelei ʼo te ʼAtua, ʼaē ʼe māʼoluga ake ʼi te ʼu manatu fuapē.” (Filipe 4:7) ʼE ko te maʼu ʼo te faʼahi ʼaia ʼi te mālama maveuveu ʼaenī, ʼe ko he tapuakina ia ʼe tahitahiga. ʼE toe ʼi ai pē foki mo tona ʼu fua lelei ʼi te faʼahi fakasino. (Tāʼaga Lea 14:30) Kae ʼe feala koa ke tou maʼu te tokalelei ʼa te ʼAtua ʼaki pē tatatou ʼu faiga? Peʼe ʼi ai koa he tahi meʼa ʼe maʼuhiga age?

[Fakamatala ʼo te pasina 10]

ʼE lahi te ʼu lelei ʼe tou maʼu ʼi tatatou faikole—ʼi te faʼahi fakasino, ʼi te loto, pea tāfito, ʼi te faʼahi fakalaumālie

Te Faikole

7 ʼE Fagono Mai Anai Koa Te ʼAtua Pea Mo Tali Mai?

ʼE KO he fehuʼi ʼe faiga ʼaupitō te hahaʼi ke natou mahino kiai pea mo ʼiloʼi tona tali. ʼE fakahā mai ʼi te Tohi-Tapu ko Sehova ʼe fagono ki te ʼu faikole iā ʼaho nei. Peʼe fagono peʼe kailoa te ʼAtua ki tatatou ʼu faikole, ʼe fakalogo te faʼahi ʼaia kiā tātou totonu pē.

Neʼe tala fakahagatonu e Sesu ko te kau takitaki lotu ʼo tona temi neʼe mālualoi tanatou ʼu faikole, he neʼe natou fia hā ʼi muʼa ʼo te kaugamālie ʼe natou agatonu. Neʼe ina ʼui ko te faʼahiga tagata ʼaia ʼe natou “maʼu kātoa [anai] tonatou fakapale,” ko tona fakaʼuhiga ʼe natou maʼu pē anai te meʼa ʼaē ʼe natou loto kiai, ke tokagaʼi nātou e te hahaʼi, kae mole natou maʼu te meʼa ʼaē ʼe ʼaoga kiā nātou, ke fagono mai te ʼAtua ki tanatou ʼu faikole. (Mateo 6:5) ʼO toe fēia iā ʼaho nei, tokolahi ʼe natou faikole ʼo mulimuli pē ki te ʼu meʼa ʼaē ʼe natou loto kiai, kae mole natou mulimuli ki te meʼa ʼaē ʼe loto kiai te ʼAtua. ʼI tanatou mole tokagaʼi ia te ʼu pelesepeto Fakatohi-tapu ʼaē neʼe kua tou talanoa kiai, ʼe mole fagono mai te ʼAtua ki tanatou ʼu faikole.

Kae ʼe feafeaʼi kiā koutou? ʼE fagono mai anai koa te ʼAtua pea mo tali mai ki takotou ʼu faikole? ʼE mole fakalogo te tali ʼo te fehuʼi ʼaia ki tokotou lanu, tokotou fenua, peʼe ko tokotou tuʼulaga ʼi te mālama ʼaenī. ʼE fakapapau fēnei mai ʼi te Tohi-Tapu: “Ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.” (Gāue 10:34, 35) ʼE kotou tatau koa mo te faʼahiga tagata ʼaē ʼe talanoa kiai ʼi te vaega ʼaenī? Kapau ʼe kotou manavasiʼi ki te ʼAtua, pea ʼe kotou fakaʼapaʼapa anai kiā te ia, ʼo mole kotou fai he meʼa ke lotomamahi ai. Kapau ʼe kotou maʼuliʼi te faitotonu, pea ʼe kotou kumi ke kotou fai te meʼa ʼaē ʼe totonu ki te ʼAtua, ʼo mole kotou fai te meʼa ʼaē ʼe kotou loto kiai peʼe loto kiai tokotou ʼu tatau. ʼE kotou loto moʼoni koa ke fagono mai te ʼAtua ki takotou ʼu faikole? ʼE fakahā ʼi te Tohi-Tapu peʼe feafeaʼi hakotou faikole ke fagono mai te ʼAtua kiā koutou.a

ʼE moʼoni, tokolahi ʼe natou loto ke fai e te ʼAtua he milakulo moʼo tali ki tanatou ʼu faikole. Kae māʼiapē lā mo te temi muʼa, neʼe tahitahiga te tali fēia e te ʼAtua ki te ʼu faikole. ʼI ʼihi temi, neʼe vaha ʼi ni ʼu sēkulō te fakamatala ʼo he milakulo neʼe hoko mo he tahi age milakulo. Tahi ʼaē, ʼe fakahā mai ʼi te Tohi-Tapu neʼe gata pē te ʼu milakulo mo te kau ʼapositolo. (1 Kolonito 13:8-10) ʼE fakaʼuhiga ai koa ko te ʼAtua ʼe mole ina tali mai te ʼu faikole iā ʼaho nei? Kailoa ia! Tou vakaʼi age muʼa he ʼu faikole ʼe tali mai e te ʼAtua.

ʼE foaki mai e te ʼAtua te poto. Ko Sehova te Matapuna ʼo te poto kātoa. ʼE lahi tana foaki te poto, ʼo ina foaki noa kiā nātou ʼaē ʼe natou kumi tana takitaki pea mo faiga ke natou maʼuliʼi te poto.—Sake 1:5.

ʼE foaki mai e te ʼAtua tona laumālie māʼoniʼoni pea mo tona ʼu lelei fuli. Ko te laumālie māʼoniʼoni ʼe ko te mālohi gāue ʼo te ʼAtua. ʼE mole he tahi age mālohi ʼe tatau mo ia. ʼE lava tokoni mai ke tou kātakiʼi te ʼu ʼahiʼahi, ke tou maʼu te tokalelei mokā tou loto hoha, pea ke tou fakatuputupu he tahi ʼu kalitātē ʼe matalelei mo leleiʼia ai tātou. (Kalate 5:22, 23) Neʼe fakapapau e Sesu ki tana ʼu tisipulo ko te ʼAtua ʼe ina foaki ke lahi te meʼa ʼofa ʼaia.—Luka 11:13.

ʼE foaki e te ʼAtua ia te ʼatamai mālama kiā nātou ʼaē ʼe natou kumi fakamālotoloto ia ia. (Gāue 17:26, 27) ʼI te mālamanei kātoa, ʼe i ai te hahaʼi ʼe natou kumi fakamālotoloto te moʼoni. ʼE natou fia ʼiloʼi te ʼAtua—ko ai tona huafa, koteā tana fakatuʼutuʼu ʼo ʼuhiga mo te kele mo te tagata pea ʼe feafeaʼi hanatou fakaovi kiā te ia. (Sake 4:8) ʼE felāveʼi tuʼumaʼu te kau Fakamoʼoni a Sehova mo te hahaʼi fēia, pea ʼe natou fiafia ʼi te fakahā age kiā nātou te ʼu tali ʼi te Tohi-Tapu ki te ʼu fehuʼi ʼaia.

ʼE ko te tupuʼaga koa lā ʼaia ʼo takotou maʼu te nusipepa ʼaenī? ʼE kotou kumi koa te ʼAtua? ʼE lagi ko tana faʼahiga tali atu ʼaia ki takotou faikole.

[Nota]