Faʼifaʼitakiʼi Ia Sesu, . . .
KE KE MANAVAʼOFA
ʼI tona ʼuhiga tagata haohaoa, neʼe mole felaveʼi ia Sesu mo te ʼu mamahi pea mo te ʼu tuʼania ʼae neʼe tau hoko ki te hahaʼi. Kaʼe neʼe ina fakaha ia he toe ʼofa lahi kia natou. Neʼe lotolelei ke tokoni ki te hahaʼi, pea neʼe ina fai he ʼu meʼa ʼo fakalaka age ʼi te ʼu meʼa ʼae neʼe ʼaoga kia natou. ʼEi, neʼe uga ia ia e te manavaʼofa ke tokoni ki ʼihi. Ke ke fakakaukauʼi te ʼu faʼifaʼitaki ʼae ʼe maʼu ʼi te ʼu Kapite 32, 37, 57, 99.
KE FAIGAFUA TE FAIPALALAU ʼA TE HAHAʼI MO KOE
Ko te hahaʼi tupulaga mo matutuʼa, neʼe natou logoʼi neʼe faigafua hanatou faipalalau mo Sesu koteʼuhi neʼe mole ina fakaha ʼe maʼumaʼua peʼe fiameʼalahi. Neʼe logoʼi e te hahaʼi te fimalie ʼi te nofo ʼa Sesu mo natou koteʼuhi neʼe natou tokagaʼi ʼe tokaga ia ia kia natou takitokotahi. Vakaʼi te faʼahi ʼaia ʼi te ʼu Kapite 25, 27, 95.
KE KE FAIKOLE TUʼUMAʼU
Neʼe tau faikole fakamalotoloto ia Sesu ki tana Tamai, moka neʼe tokotahi pea moka neʼe fakatahi mo he kau atolasio moʼoni. Neʼe mole faikole pe ia Sesu ʼi te ʼu temi kakai kaʼe neʼe lahi ia te ʼu faigamalie neʼe faikole ai. Neʼe faikole moʼo fakamalo pea mo vikiʼi ia tana Tamai pea mo kole tana takitaki ia muʼa ʼo hana fai he ʼu tonu ʼe maʼuhiga. Vakaʼi te ʼu faʼifaʼitaki ʼae ʼe maʼu ʼi te ʼu Kapite 24, 34, 91, 122, 123.
KE KE FAKAMUʼAMUʼA TE ʼU MEʼA ʼAE ʼE ʼAOGA KI TE HAHAʼI
ʼI ʼihi temi neʼe feala kia Sesu ke malolo kaʼe neʼe mole ina kumi ʼi te ʼu lakaga ʼaia te ʼu meʼa ʼae neʼe ʼaoga kia ia. Neʼe mole manatu ia kia ia totonu. Pea neʼe ina foaki mai ai he faʼifaʼitaki ke tou mulimuli lelei ki ai. Vakaʼi pe ʼe ha feafeaʼi te aga ʼaia ʼa Sesu ʼi te ʼu Kapite 19, 41, 52.
KE KE FAKAMOLEMOLE KI TE HAHAʼI
Neʼe mole akoʼi pe e Sesu ia te maʼua ʼae ke fakamolemole. Kaʼe neʼe ina fakaha te faʼahi ʼaia ʼaki tana fakamolemole ki ʼana tisipulo pea mo ʼihi atu. Ke ke metitasio ki te ʼu faʼifaʼitaki ʼae ʼe maʼu ʼi te ʼu Kapite 26, 40, 64, 85, 131.
KE KE FAʼAFAI
Neʼe tala fakatomuʼa ko te tokolahi ʼi te kau Sutea ʼe mole natou tali anai ia te Mesia pea ʼe matehi anai ia ia e ʼona fili. Koia, neʼe feala pe kia Sesu hana fakafifimalie ʼi te ʼu meʼa ʼae neʼe tonu ke ina fai maʼa te hahaʼi. Kaʼe neʼe lagolago ia ki te tauhi moʼoni ʼaki he faʼafai. Neʼe foaki ai e Sesu ia he faʼifaʼitaki lelei ʼo ʼuhiga mo te faʼafai, ki ʼana tisipulo fuli ʼae ʼe felaveʼi mo he hahaʼi ʼe fakafeagai peʼe mole fia fakalogo kia natou. Vakaʼi te ʼu Kapite 16, 72, 103.
KE KE AGAVAIVAI
ʼE lahi te ʼu faʼahi neʼe maʼoluga ai ia Sesu ʼi te hahaʼi heʼe haohaoa, ohage la ko te ʼatamai malama pea mo te poto. ʼE mahino ia, ʼuhi ko tona ʼuhiga haohaoa, neʼe maʼu e Sesu ia he ʼu fealagia ʼi te faʼahi fakasino pea mo he ʼu fealagia fakakaukau ʼo laka age ʼi ʼae neʼe maʼu e te hahaʼi. Logo la te faʼahi ʼaia kaʼe neʼe ina tauhi natou ʼaki he agavaivai. ʼE ke maʼu anai he ʼu ako ʼo ʼuhiga mo te faʼahi ʼaia ʼi te ʼu Kapite 10, 62, 66, 94, 116.
KE KE KATAKI FUALOA
Neʼe fakaha tuʼumaʼu e Sesu ia te kataki fualoa ki ʼana apositolo pea mo ʼihi atu, ʼi te ʼu temi ʼae neʼe mole natou muliʼi ai tana faʼifaʼitaki peʼe mole natou maʼuliʼi te ʼu meʼa ʼae neʼe ina ui age. ʼAki he faʼa kataki neʼe ina fakamanatuʼi liuliuga age ia te ʼu manatu ʼae neʼe ʼaoga kia natou ke feala ai hanatou fakaovi age kia Sehova. Ke ke fakakaukauʼi ia te ʼu faʼifaʼitaki ʼo te kataki fualoa ʼa Sesu ʼi te ʼu Kapite 74, 98, 118, 135.