Te ʼu Fua Lelei ʼo Tatatou Ako Te ʼu Lea Fakapolofeta

1. Kotea tau manatu ʼo ʼuhiga mo te ako ʼo te ʼu lea fakapolofeta ʼi te Tohi-Tapu?

ʼE UI e te tehina tupulaga ko Ben: “ ʼE lahi ʼosi taku fia ako te ʼu lea fakapolofeta ʼi te Tohi-Tapu.” ʼE ke feia koa mo koe? Peʼe ke manatu ʼe faigataʼa te mahino ki ai. Peʼe lagi fakapiko kia koe. Kae ʼe feala ke fetogi tau manatu mo kapau ʼe ke mahino pe koe neʼe loto e Sehova ke tohi he ʼu lea fakapolofeta ʼi te Tohi-Tapu.

2. Kotea ʼae ka tou vakaʼi anai ʼi te alatike ʼaeni?

² ʼI te alatike ʼaeni ʼe tou vakaʼi anai ni tupuʼaga ke tou ako ai te ʼu lea fakapolofeta pea ʼe tonu ke feafeaʼi tatatou fai te ako ʼaia. ʼE tou palalau anai kia lea fakapolofeta ʼe lua ʼi te tohi ʼa Taniela pea mo te ʼu fua lelei ʼe tou maʼu moka tou mahino ki ai.

TE ʼU TUPUʼAGA KE TOU AKO AI TE ʼU LEA FAKAPOLOFETA

3. Kotea ʼae ʼe tonu ke tou fai ke tou mahino ki te ʼu lea fakapolofeta ʼi te Tohi-Tapu?

³ Ke tou mahino ki te ʼu lea fakapolofeta, ʼe tonu ke tou kole tokoni. ʼE hage pe ko hau faifolau mo ʼou kaumeʼa, pea ʼe ke fia mamata ki he koga meʼa heʼeki ke iloʼi. Ko he tahi ʼi ʼou kaumeʼa ʼe ina iloʼi lelei te koga meʼa ʼaia. ʼE ina iloʼi lelei te potu ʼae kua kotou ʼi ai pea ʼe taki kifea te ʼu ala fuli. ʼE mahino ia, ʼe ke fiafia anai moka ke alu mo tou kaumeʼa ʼaia ki te koga meʼa ʼe ke fia mamata ai. ʼO toe feia pe, ʼe iloʼi lelei e Sehova te temi ʼae ʼe tou lolotoga maʼuʼuli ai nei pea ʼe feafeaʼi anai tatatou ka haʼu. Koia, ke tou mahino ki te ʼu lea fakapolofeta ʼi te Tohi-Tapu, ʼe tonu ke tou agavaivai ʼo kole tana tokoni.—Tan. 2:28; 2 Pet. 1:19, 20.

4. He koʼe neʼe loto e Sehova ke tohi he ʼu lea fakapolofeta ʼi tana Folafola? (Selemia 29:11) (Vakaʼi mo te pāki.)

⁴ Ohage pe ko te ʼu matuʼā agalelei fuli, ʼe loto e Sehova ke maʼu e ʼana fanau he ka haʼu fiafia. (Lau ia Selemia 29:11.) Kae ko te faʼahi leva ʼae ʼe kehe ai ia Sehova pea mo he ʼu matuʼā, he ʼe ina lava fakaha mai te ʼu meʼa fuli ka hoko ʼi te ka haʼu pea ʼe moʼoni tuʼumaʼu pe ia. Neʼe ina loto ke tohi he ʼu lea fakapolofeta ʼi tana Folafola, ke tou iloʼi ai te ʼu aluʼaga maʼuhiga ʼae ka hoko mai. (Esa. 46:10) Koia, ko te ʼu lea fakapolofeta ʼe ko he meʼa ʼofa ia mai tatatou Tamai ʼae ʼi selo. Kae ʼe feafeaʼi hau tui papau ʼe hoko moʼoni anai te ʼu meʼa ʼae neʼe fakakikite ʼi te Tohi-Tapu?

5. Kotea te ako ʼe feala ke maʼu e he tupulaga mai te faʼifaʼitaki ʼa Max?

⁵ ʼI te fale ako, ʼe to lotoā ʼatatou tupulaga ʼi ni hahaʼi ʼe mole lahi tanatou fakaʼapaʼapa ki te Tohi-Tapu, peʼe mole natou fakaʼapaʼapa pe la ki ai. Ko te ʼu palalau mo te aga ʼa te hahaʼi ʼaia ʼe feala ke fakatupu lotolotolua ki ʼatatou kau tupulaga. Koʼeni te aluʼaga neʼe hoko ki te tehina ko Max. ʼE ina ui fenei: “ ʼI taku kei ako, neʼe au kamata lotolotolua. Neʼe au feʼekeʼaki ai pe ʼe akoʼi mai koa e ʼaku matuʼā te lotu moʼoni pea ʼe haʼu moʼoni koa te Tohi-Tapu mai te ʼAtua.” Kotea ʼae neʼe fai e ʼana matuʼā? ʼE tali fenei e Max: “Neʼe mole nā iita logo la ʼe au iloʼi neʼe nā tuʼania.” Neʼe fakaʼaogaʼi e ʼana matuʼā te Tohi-Tapu moʼo tali ki ʼana fehuʼi. Pea neʼe ʼi ai te tahi meʼa neʼe fai e Max. ʼE ina ui fenei: “Neʼe au ako te ʼu lea fakapolofeta ʼae ʼi te Tohi-Tapu pea mo au palalau ki te ʼu manatu ʼae neʼe au ako mo ʼihi tupulaga ʼo taku kokelekasio.” Neʼe kotea tona fua kia Max? ʼE ina ui: “Neʼe au tui papau ai ʼe haʼu te Tohi-Tapu mai te ʼAtua.”

6. Kapau ʼe ke lotolotolua, kotea ʼae ʼe tonu ke ke fai, pea kotea tona tupuʼaga?

⁶ Kapau ohage ko Max, ʼe ke kamata lotolotolua ʼo ʼuhiga mo te Tohi-Tapu, ʼaua naʼa ke ufiufi ai. Kae ʼe tonu ke ke foimo fai he puleʼaki. Ko te lotolotolua ʼe hage ko te ukaukamea. Kapau ʼe mole foimo toʼo te ukaukamea, ʼe feala ʼaki te temi ke ina maumauʼi he meʼa maʼuhiga. Koia, faiga ʼo pulihi te ʼu manatu lotolotolua he ʼe feala ke maumauʼi ai tau tui. ʼE lelei ke ke fai te fehuʼi ʼaeni: “ ʼE au tui koa ki te meʼa ʼae ʼe ui mai ʼi te Tohi-Tapu ka hoko ʼi te ka haʼu?” Kapau ʼe ke lotolotolua, ako te ʼu lea fakapolofeta ʼae kua ʼosi hoko. Tou vakaʼi pe ʼe tonu ke feafeaʼi tau fai tau ako ʼaia.

ʼE TONU KE FEAFEAʼI TAU AKO TE ʼU LEA FAKAPOLOFETA?

7. Kotea te faʼifaʼitaki lelei neʼe tuku mai e Taniela? (Taniela 12:10) (Vakaʼi mo te pāki.)

⁷ Ke tou iloʼi pe ʼe tonu ke feafeaʼi tatatou ako te ʼu lea fakapolofeta, tou vakaʼi te faʼifaʼitaki ʼa Taniela. ʼUluaki, neʼe ʼi ai te tupuʼaga lelei ʼo te ako e Taniela te ʼu lea fakapolofeta. Neʼe ina fia iloʼi te moʼoni. Lua, neʼe agavaivai. Neʼe mahino kia ia ʼe foaki anai e Sehova te fakasiosio poto kia natou ʼe natou kumi ke natou iloʼi ia ia pea mo fakalogo ki ʼana fakatotonu. (Tan. 2:27, 28, lau ia Taniela 12:10.) Neʼe fakaha e Taniela tana agavaivai he neʼe ina kole tuʼumaʼu te tokoni ʼa Sehova. (Tan. 2:18) Tolu, neʼe ako fakalelei ia Taniela, ʼo ina fai ni fekumi ʼi te ʼu koga Tohi-Tapu ʼae neʼe kua maʼu ʼi tona temi. (Sel. 25:11, 12; Tan. 9:2) ʼE feafeaʼi hau faʼifaʼitakiʼi ia Taniela?

8. He koʼe ʼe mole fia tui ʼihi ʼe moʼoni te ʼu lea fakapolofeta, kae kotea ʼae ʼe tonu ke tou fai?

⁸ Vakaʼi te tupuʼaga ʼo tau fia ako te ʼu lea fakapolofeta. ʼE ke ako koa he ʼe ke fia iloʼi ia te moʼoni? Kapau ʼe ko ia, pea ʼe tokoni atu anai ia Sehova.(Soa. 4:23, 24; 14:16, 17) Kotea la he tahi age tupuʼaga ʼo te fia ako e he tahi te ʼu lea fakapolofeta? ʼE lagi fakaʼamu ʼihi ke natou maʼu ai he ʼu fakamoʼoni ʼe mole haʼu te Tohi-Tapu mai te ʼAtua. ʼE feala ai anai ke natou filifili ʼe natou totonu te meʼa ʼae ʼe lelei mo ʼae ʼe kovi pea mo mulimuli ki ai ʼi tonatou maʼuli. Kae ka tou ako, ʼe tonu ke tou fai ʼaki he tupuʼaga lelei. ʼE gata ai pe koa? Kailoa. Ke feala hatatou mahino ki te ʼu lea fakapolofeta, ʼe ʼi ai te kalitate maʼuhiga ʼe tonu ke tou maʼu.

9. Ko te kalitate fea ʼae ʼe tonu ke tou maʼu ke tou mahino ai ki te ʼu lea fakapolofeta?

⁹ Ke ke agavaivai. ʼE fakapapau e Sehova ʼe tokoni ki te kau agavaivai. (Sakp. 4:6) Koia, kapau ʼe tou fia mahino ki te ʼu lea fakapolofeta ʼi te Tohi-Tapu, ʼe tonu ke tou kole ke tokoni mai. Pea ʼe tonu ke tou mahino ʼe feala ke toe tokoni mai te tagata faifekau agatonu mo poto, ʼae ʼe fakaʼaogaʼi e Sehova moʼo foaki mai te meʼa kai fakalaumalie ʼi tona temi totonu. (Luka 12:42) ʼUhi ʼae ko Sehova ʼe ko he ʼAtua ʼo te fakatokatoka, ʼe tou tui ai ʼe ko te kiʼi kutuga pe ʼaia ʼe tahi ʼae ʼe ina fakaʼaogaʼi moʼo tokoni mai ke tou mahino ki te ʼu moʼoni ʼae ʼe tuʼu ʼi tana Folafola.—1 Ko. 14:33; Efe. 4:4-6.

10. Kotea ʼae ʼe ke ako mai te faʼifaʼitaki ʼa Esther?

¹⁰ Ke ke ako fakalelei. ʼE feala ke ke kamata mo he lea fakapolofeta ʼe ke leleiʼia pea mo fai he ʼu fekumi. Ko te faʼahi ʼaia neʼe fai e te tuagaʼane ko Esther. Neʼe ina fia iloʼi lelei age te ʼu lea fakapolofeta ʼae neʼe fakakikite ai te ha ʼo te Mesia. ʼE ina ui fenei: “ ʼI toku taʼu 15, neʼe au fai taku ʼu fekumi ʼe fakamoʼoni mai neʼe tohi te ʼu lea fakapolofeta ʼaia ʼi muʼa ʼo te temi ʼo Sesu.” Ko te ʼu meʼa ʼae neʼe lau e Esther ʼo ʼuhiga mo te ʼu Takaiga Tohi ʼo Te Tai Mate, neʼe tokoni kia ia ke tui ki ai. ʼE hoko atu fenei e Esther: “Ko ʼihi takaiga tohi neʼe tohi ʼi muʼa ʼo te temi ʼo Sesu. Koia, ko te ʼu lea fakapolofeta ʼae ʼe tuʼu ai ʼe haʼu moʼoni ia mai te ʼAtua.” ʼE ina toe ui fenei: “Neʼe tonu ke au lau liuliuga te ʼu manatu ʼaia ke au mahino lelei.” Kae ʼe fiafia ʼi tana ʼu faiga ʼaia. ʼI tana ʼosi ako fakalelei ʼihi lea fakapolofeta, ʼe ina ui: “Neʼe au mahino ai leva ki te moʼoni ʼo te Tohi-Tapu.”

11. He koʼe ʼe fua lelei kia tatou mo kapau ʼe tou vakaʼi ʼe tatou totonu pe ʼe moʼoni te Tohi-Tapu?

¹¹ Ka tou mahino pe neʼe hoko feafeaʼi ʼihi lea fakapolofeta, ʼe tou falala katoa ai kia Sehova pea mo te ʼu fakatotonu ʼae ʼe ina foaki mai. Pea ʼe tou fiafia ʼuhi ko te ʼu meʼa ʼae ʼe fakaha mai ʼi te ʼu lea fakapolofeta ʼo ʼuhiga mo te ka haʼu, tatau aipe pe ʼe tou tau nei mo ni faigataʼaʼia. Tou vakaʼi fakanounou he ʼu lea fakapolofeta ʼe lua neʼe tohi e Taniela pea ʼe lolotoga hoko nei. Ka tou mahino lelei ki ai, ʼe tou fai anai he ʼu tonu ʼe lelei.

KE KE ILOʼI TE FAKAʼUHIGA ʼO TE ʼU VAʼE ʼAE ʼE FIO ʼAKI TE UKAMEA MO TE KELE

12. Kotea ʼae ʼe fakata e te ʼu vaʼe ʼae ʼe fio “ ʼaki te ukamea pea mo te kele”? (Taniela 2:41-43)

¹² Lau ia Taniela 2:41-43. Neʼe fai e te Hau ko Nepukanesa he moemisi pea fakamahino age e Taniela tona fakaʼuhiga. Neʼe sio ai ki he fakatata pea ko ʼona vaʼe neʼe faʼu “ ʼaki te ukamea pea mo te kele.” Ka tou fakatatau te lea fakapolofeta ʼaia mo te tahi ʼu lea fakapolofeta ʼi te tohi ʼa Taniela mo ʼae ʼa Fakaha, ʼe tou mahino ai ʼe fakata te ʼu vaʼe ia te malohi fakamalamanei ʼae ʼo Amelika mo Pilitania ʼi totatou temi. Neʼe fakaha e Taniela ʼo ʼuhiga mo te malohi fakamalamanei ʼaia, “ ʼe malohi anai te tahi faʼahi ʼo te puleʼaga ʼaia kae ʼe vaivai anai tona tahi faʼahi.” He koʼe ʼe vaivai anai tona tahi faʼahi? Koteʼuhi ko te hahaʼi, ʼae ʼe fakata ki te kele, ʼe natou taʼofi ke ina fakahoko tana pule malohi ʼae ʼe hage ko he ukamea.b

13. Kotea he ʼu moʼoni maʼuhiga ʼe tou ako mai tatatou mahino ki te lea fakapolofeta ʼaia?

¹³ ʼE tou ako he ʼu moʼoni maʼuhiga mai te fakamatala ʼa Taniela ʼo ʼuhiga mo te fakatata, pea tafito mai te ʼu vaʼe ʼo te fakatata ʼaia. ʼUluaki, neʼe fakaha tuʼa lahi e te Malohi Fakamalamanei ʼo Pilitania mo Amelika ia tona malohi. Ohage la, ko Amelika mo Pilitania neʼe nā kau ʼi te ʼu puleʼaga ʼae neʼe malo ʼi te ʼUluaki mo te Lua Tau Fakamalamanei. Kae ko te malohi fakamalamanei ʼaia ʼe vaivai, pea ʼe hoko atu pe anai tona vaivai ʼuhi ko te fefihiʼaki ʼa te hahaʼi pea mo tanatou fakafeagai ki te ʼu pule taki. Lua, ʼe kei pule pe anai te Malohi Fakamalamanei ʼaia ʼi te temi ʼae ka maumauʼi ai e te Puleʼaga ʼo te ʼAtua ia te ʼu puleʼaga fakatagata fuli. Maʼia pe fakafeagai te tahi ʼu puleʼaga ki te Malohi Fakamalamanei ʼaia kae ʼe mole he tahi puleʼaga ʼe hoa anai ki ai. ʼE tou iloʼi te faʼahi ʼaia he ʼe ko “te foʼi maka” ʼae ʼe ina fakata te Puleʼaga ʼo te ʼAtua, ʼe ina laliki anai te ʼu vaʼe ʼo te fakatata, ʼae ʼe ina fakata te Malohi Fakamalamanei ʼo Pilitania mo Amelika.—Tan. 2:34, 35, 44, 45.

14. He koʼe ko tatatou mahino ki te lea fakapolofeta huʼu mo te fakatata ʼae neʼe faʼu ʼona vaʼe ʼaki te ukamea mo te kele, ʼe tokoni mai ke tou fai he ʼu tonu ʼe lelei?

¹⁴ ʼE ke tui koa ʼe moʼoni te lea fakapolofeta ʼa Taniela ʼo ʼuhiga mo te fakatata, ʼae neʼe faʼu ʼona vaʼe ʼaki te ukamea mo te kele? Kapau ʼe ke tui ki ai, pea ʼe malave anai ki te ʼu tonu ʼae ʼe ke fai ʼi tou maʼuli. ʼI tau iloʼi ʼae kua vave pulihi te malama ʼaeni, ʼe mole ke kumi anai ke lahi tau paʼaga peʼe ko ʼou koloa fakamalama. (Luka 12:16-21; 1 Soa. 2:15-17) Ko tau mahino ki te lea fakapolofeta ʼaia ʼe toe tokoni atu anai ke ke mahino ki te maʼuhiga ʼo te gaue faifakamafola pea mo faiako. (Mat. 6:33; 28:18-20) ʼI tau ʼosi ako te lea fakapolofeta ʼaia, ʼe lelei ke ke fai te fehuʼi ʼaeni: “ ʼE ha koa ʼi te ʼu tonu ʼae ʼe au fai ʼe au tui papau kua vave pulihi e te Puleʼaga ʼo te ʼAtua ia te ʼu puleʼaga fakatagata fuli?”

KE KE ILOʼI PE KO AI TE HAU ʼO TE POTU NOLETO MO ʼAE ʼO TE POTU SAUTE

15. Ko ai “te hau ʼo te potu noleto” mo “te hau ʼo te potu saute” ia ʼaho nei? (Taniela 11:40)

¹⁵ Lau ia Taniela 11:40. Ia Taniela 11, ʼe palalau ai ʼo ʼuhiga mo hau ʼe lua, peʼe ko malohi fakapolitike ʼe lua ʼe nā fefihiʼaki te pule ʼo te malamanei. Moka tou fakatatau te lea fakapolofeta ʼaia mo ʼihi atu ʼi te Tohi-Tapu, ʼe tou mahino ai ko “te hau ʼo te potu noleto” ʼe ko Lusia mo te ʼu fenua ʼae ʼe kau mo ia, pea ko “te hau ʼo te potu saute” ʼe ko te Malohi Fakamalamanei ʼo Pilitania mo Amelika.c

16. Kotea te ʼu faigataʼaʼia ʼe tau mo te ʼu kaugana ʼa Sehova ʼae ʼe maʼuʼuli ʼi te ʼu fenua ʼae ʼe puleʼi e “te hau ʼo te potu noleto”?

¹⁶ Ko te ʼu kaugana ʼa Sehova ʼae ʼe maʼuʼuli ʼi te ʼu fenua ʼae ʼe puleʼi e “te hau ʼo te potu noleto” ʼe fakatagaʼi natou e te hau ʼaia. Ko ʼihi ia natou ʼe ta, peʼe pilisoniʼi ʼuhi ko tanatou tui. Kae ʼe mole natou matataku ʼi te aga ʼaia ʼa “te hau ʼo te potu noleto.” ʼE malohi age tanatou tui. Kotea tona tupuʼaga? Heʼe natou iloʼi ko te fakatagaʼi ʼaia ʼa te hahaʼi ʼo te ʼAtua ʼe fakahoko ai te lea fakapolofeta ʼae ʼe tuʼu ʼi te tohi ʼa Taniela.d (Tan. 11:41) Ko tatatou mahino ki te faʼahi ʼaia, ʼe toe tokoni mai kia tatou ke malohi tatatou ʼamanaki pea ke tou nonofo agatonu.

17. Kotea te ʼu faigataʼaʼia ʼe tau mo te ʼu kaugana ʼa Sehova ʼae ʼe maʼuʼuli ʼi te ʼu fenua ʼae ʼe puleʼi e “te hau ʼo te potu saute”?

¹⁷ ʼI te temi muʼa, neʼe toe fakatagaʼi e “te hau ʼo te potu saute” ia te ʼu kaugana ʼa Sehova. Ohage la, lolotoga te ʼUluaki mo te Lua Tau Fakamalamanei, tokolahi ʼi ʼotatou tehina neʼe pilisoniʼi natou he neʼe mole natou fia kau ki te tau. Pea ko ʼihi tamaliki ʼa te kau Fakamoʼoni neʼe fakamavae ʼi te ʼu fale ako he neʼe mole natou fia tauhi ki te fuka. Kae ʼi te ʼu taʼu pe ʼaeni, kua kehe age te faʼahiga ʼahiʼahiʼi ʼo te nofo agatonu ʼa te ʼu kaugana ʼa Sehova ʼi te ʼu fenua ʼae ʼe pule ai te hau ʼaia. Ohage la, ka hoko te temi vote, ʼe feala ki he tehina peʼe ko he tuagaʼane ke fia lagolago ki he faʼahi fakapolitike peʼe ki he tagata peʼe ko he fafine faipolitike. Logo la ʼe mole alu anai ʼo vote, kae ʼe feala pe ke fakaʼamu ʼi tona loto ke malo te tagata ʼae peʼe ko he faʼahi politike. Koia la ʼae ʼe maʼuhiga ke mole tou kau ki te politike, pea ke tou tokakaga ke mole alu ai tatatou manatu mo totatou loto.—Soa. 15:18, 19; 18:36.

18. ʼE malave feafeaʼi kia tatou te fefehiʼaʼaki ʼa “te hau ʼo te potu noleto” mo “te hau ʼo te potu saute”? (Vakaʼi mo te pāki.)

¹⁸ Ko natou ʼe mole tui ki te ʼu lea fakapolofeta ʼi te Tohi-Tapu, ʼe feala ke natou tuʼania ʼi tanatou sisio ki te fetauʼaki ʼo “te hau ʼo te potu saute” mo “te hau ʼo te potu noleto.” (Tan. 11:40) ʼE maʼu e te ʼu hau ʼaia ʼe lua he ʼu foʼi pulu hila ʼe feala ke pulihi katoa ai te maʼuli ʼi te kele. Kae ʼe tou iloʼi ʼe mole tuku anai e Sehova ke hoko te faʼahi ʼaia. (Esa. 45:18) Koia ʼe mole tou tuʼania ʼi te fefehiʼaʼaki ʼa “te hau ʼo te potu noleto” mo “te hau ʼo te potu saute.” Kae ʼe toe malohi ai tatatou tui heʼe fakamoʼoni ai kua ovi mai te fakaʼosi ʼo te tuʼu agakovi ʼaeni.

HAGA TOKAGAʼI TE ʼU LEA FAKAPOLOFETA

19. Kotea ʼae ʼe tonu ke tou manatuʼi moka mole tou iloʼi pe hoko feafeaʼi anai he lea fakapolofeta?

¹⁹ ʼE ʼi ai ʼihi lea fakapolofeta ʼe mole tou iloʼi pe hoko feafeaʼi anai. Neʼe ʼi ai pe la ʼihi faʼahi neʼe tohi e te polofeta ko Taniela kae neʼe mole mahino ki ai. (Tan. 12:8, 9) Kae ʼe mole fakaʼuhiga leva ʼe mole hoko anai he lea fakapolofeta he ʼe mole tou mahino pe hoko feafeaʼi anai. ʼE tou tui papau, ʼe fakaha mai anai e Sehova te meʼa ʼae ʼe tonu ke tou iloʼi ʼi tona temi totonu, ohage pe ko tana fai ʼi te temi muʼa.—Amo. 3:7.

20. Ko te ʼu lea fakapolofeta fea ʼae ka vave hoko, pea kotea ʼae ʼe tonu ke tou haga fai?

²⁰ Ka ʼosi tala anai te logo “tokalelei pea mo fimalie” ʼe ʼohofi pea mo maumauʼi anai te ʼu lotu hala e te ʼu malohi fakapolitike ʼo te malama ʼaeni. (1 Tes. 5:3; Fkha. 17:16, 17) Hili ʼaia, ʼe natou tauʼi anai te ʼu kaugana ʼa Sehova. (Esk. 38:18, 19) Pea ʼe kamata ai anai te tau fakamuli ʼae ko Alamaketone. (Fkha. 16:14, 16) ʼE feala ke tou tui papau kua vave hoko mai pe te ʼu aluʼaga ʼaia. ʼI tatatou talitali ki ai, tou haga fakaha tatatou lotofakafetaʼi ki tatatou Tamai ʼofa ʼae ʼi selo. ʼE tou fakaha tatatou lotofakafetaʼi moka tou ako te ʼu lea fakapolofeta pea mo fakalotomalohiʼi ʼihi ke natou fai feia.