Kotou Fakaovi Ki Te ʼAtua

ʼE Tuku Mai e Te ʼAtua Ke Tou Filifili

Teutalonome 30:11-20

“NEʼE au tautau mataku naʼa mole au agatonu kiā Sehova.” Neʼe ko te ʼui ʼaia ʼa te fafine Kilisitiano heʼe ʼi tana manatu ko te ʼu meʼa kovi ʼaē neʼe hoko kiā ia ʼi tana kei veliveli ʼe mole feala ai anai ke ina fai he meʼa ʼe lelei. ʼE tonu koa te taʼi manatu ʼaia? ʼE moʼoni koa ko te ʼu meʼa ʼaē neʼe tou fai kae kei tou liliki ʼe iku ki hatatou fai ʼo he ʼu aga ʼe kovi ki ʼamuli? Kailoa ia. Neʼe foaki mai e Sehova ʼAtua ia te meʼa ʼofa ʼaē ko te loto faʼitaliha, koia ʼaē ʼe tou lava filifili tonu totatou faʼahiga maʼuli. ʼE loto e Sehova ke tou filifili te ʼu meʼa ʼaē ʼe totonu, pea ʼe ʼui mai ʼi tana Folafola ia te Tohi-Tapu peʼe feafeaʼi hatatou lava fai ia te faʼahi ʼaia. Tou vakaʼi age muʼa ia te ʼu palalau ʼa Moisese, ʼaē ʼe tou maʼu iā Teutalonome kāpite 30.

ʼE faigataʼa koa hatatou ʼiloʼi peʼe koteā ʼaē ʼe fakamaʼua mai e te ʼAtua kiā tātou?a Neʼe ʼui fēnei e Moisese: “Ko te fakatotonu ʼaenī ʼe au fakatotonu atu ʼi te ʼaho nei ʼe mole faigataʼa fau ia kiā te koe, pea ʼe mole mamaʼo ia.” (Vaega 11) ʼE mole kole mai e Sehova ke tou fai he meʼa ʼe mole tou lavaʼi. ʼE mole mamafa te ʼu meʼa ʼaē ʼe ina fakamaʼua mai pea ʼe tou lavaʼi, pea ʼe tou mahino kiai. ʼE mole ʼaoga ia ke tou hake ki “te lagi” peʼe tou fagona “ki te tahi faʼahi ʼo te tai” ke tou ako ai peʼe koteā ʼaē ʼe loto e te ʼAtua ke tou fai. (Vaega 12, 13) ʼE ʼui fakalelei mai ʼi te Tohi-Tapu peʼe tonu ke feafeaʼi totatou maʼuli.—Mikea 6:8.

Kae ʼe mole fakakinauʼi tātou e Sehova ke tou fakalogo age kiā te ia. Neʼe ʼui fēnei e Moisese: “ ’ʼI te ʼaho ʼaenī, ʼe au tuku atu ʼi ʼokotou muʼa te maʼuli pea mo te meʼa ʼaē ʼe lelei, te mate pea mo te meʼa ʼaē ʼe kovi.” (Vaega 15) ʼE fakalogo pē kiā tātou, peʼe tou filifili te maʼuli peʼe ko te mate, peʼe ko te meʼa ʼaē ʼe lelei peʼe ko te meʼa ʼaē ʼe kovi. ʼE feala hatatou filifili ke tou tauhi pea mo tou fakalogo ki te ʼAtua, ʼo iku ai ki he ʼu tapuakina; peʼe tou filifili ke tou talagataʼa, ʼo iku ai ki hona ʼu fua kovi. ʼI te ʼu faʼahi ʼaia e lua, ʼe ʼa tātou pē tona filifili.—Vaega 16-18; Kalate 6:7, 8.

ʼE malave koa kiā Sehova ia te faʼahiga maʼuli ʼaē ʼe tou filifili? ʼEī. ʼAki te takitaki ʼa te ʼAtua, neʼe ʼui fēnei e Moisese: “Kotou fili te maʼuli.” (Vaega 19) Kae feafeaʼi hatatou lava filifili ke tou maʼuli? Neʼe fakamahino e Moisese: “ ʼO ke ʼofa kiā Sehova, tou ʼAtua, ʼo ke fakalogo ki tona leʼo pea mo ke pipiki maʼu kiā te ia.” (Vaega 20) Kapau ʼe tou ʼofa kiā Sehova, pea ʼe tou fia fakalogo anai mo talagafua ai kiā te ia pea mo pipiki agatonu kiā te ia, logopē he faʼahiga meʼa ʼe feala ke hoko. ʼI tatatou muliʼi te faʼahiga maʼuli ʼaia, ʼe tou filifili ai te maʼuli—ko te faʼahiga maʼuli ʼaia ʼe lelei ʼaupitō ʼi te temi nei ʼaki te ʼamanaki ʼaē ki he maʼuli heʼegata ʼi te mālama foʼou ʼa te ʼAtua ʼi te temi kā haʼu.—2 Petelo 3:11-13; 1 Soane 5:3.

ʼE tou mai ia te ako lelei mai te ʼu palalau ʼaenī ʼa Moisese. Logopē he faʼahiga ʼaluʼaga neʼe tau mo koutou ʼi te mālama agakovi ʼaenī, kae ʼe mole fua kovi anai tokotou maʼuli ʼuhi ko te faʼahi ʼaia. ʼE fakamaʼuhigaʼi koutou e Sehova ʼo ina foaki atu ia te meʼa ʼofa ʼaē ko te loto faʼitaliha. ʼEī, ʼe feala hakotou fili ke kotou ʼofa kiā Sehova, mo fakalogo kiā te ia pea mo nofo agatonu kiā te ia. Kapau ʼe kotou fai ia te taʼi tonu ʼaia, pea ʼe tapuakina anai e Sehova takotou ʼu faiga.

Ko fafine ʼaē neʼe tou talanoa ki ai ʼi te kamataʼaga ʼo te ʼalatike, neʼe ina maʼu ia te fakalotofīmālie, ʼi tana ʼiloʼi ʼaē ia te moʼoni ʼaenī: ʼE fakalogo pē kiā tātou te filifili ʼaē ke tou ʼofa pea mo tou tauhi kiā Sehova. ʼE ina ʼui fēnei: “ ʼE au ʼofa iā Sehova. ʼI ʼihi temi, ʼe galo kiā au ko te meʼa ʼaē ʼe maʼuhiga ʼaupitō, ʼe ko toku ʼofa ʼaē kiā Sehova. Koia ʼe au lava nofo agatonu ai.” ʼAki te tokoni ʼa Sehova, ʼe kotou lava nofo agatonu kiā te ia.

[Nota]