ʼE Lagolago Te Kautahi ʼa Sehova Ki Takotou Minisitelio

“Neʼe ʼau sio ki te tahi ʼaselo ʼe lele ʼi te lotomalie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohage ko he evaselio kia nātou ʼaē ʼe nonofo ʼi te kele.”​—Fakahā 14:6.

1. Neʼe ʼahiʼahiʼi feafeaʼi te kau Fakamoʼoni ʼa Sehova, pea he koʼe koa neʼe nātou hāo ʼi te ʼu ʼahiʼahi ʼaia?

HE KOʼE ʼe maʼuhiga ke tou mahino ki te gāue ʼaē ʼe fai e te kautahi ʼa Sehova ʼaē ʼi selo, moʼo lagolago ki te minisitelio faka Kilisitiano? Neʼe feala koa ki te kau Fakamoʼoni ʼa Sehova ke nātou faka mafola te logo lelei ʼo te Puleʼaga ʼo te ʼAtua ʼi te malamanei ʼaē ʼe fakafeagai kia nātou, mo kapau la neʼe mole lagolago kia nātou te ʼu kautau fakaʼaselo ʼa Sehova? ʼE fai e te kau Fakamoʼoni te faka mafola ʼaia lolotoga te sēkulō ʼaenī ʼaē ʼe mālohi ai te tauhi ʼa te hahaʼi ki tonatou fenua, mo te ʼu puleʼaga faka politike ʼaē ʼe aga fefeka, mo te ʼu tau faka malamanei pea mo te tahi ʼu faʼahiga tuʼutāmaki. Neʼe feala koa ke hāo te kau Fakamoʼoni ʼa Sehova ʼi te ʼu fihifihia faka malamanei ʼaē neʼe tau mo nātou ʼuhi ko te fakapalatahi pea mo te ʼu manatu hala ʼo ʼuhiga mo nātou, mo kapau la neʼe mole tokoni age ia Sehova kia nātou?​—Pesalemo 34:7.

Neʼe Tou Hāo ʼi Te Fakafeagai ʼa Te Malamanei Katoa

2. Koteā ʼaē ʼe tatau ai te kau Kilisitiano moʼoni ʼo te ʼuluaki sēkulō pea mo te kau Kilisitiano ʼo te temi nei?

² ʼI te 20 sēkulō ʼaenī, ko te ʼu fili faka lotu pea mo faka politike, neʼe nātou lagaʼi te ʼu fihifihia kehekehe, ohage la neʼe nātou fakaʼaogaʼi te lao moʼo fakagata peʼe fakatupu kovi ki te gāue ʼa Sehova. Ko te ʼu tēhina mo tuagaʼane Kilisitiano neʼe fakatagaʼi nātou, mo fai kia nātou te ʼu tukugakovi hala, mo te ʼu fasituʼu pea mo te ʼu loi​—ko te tokolahi neʼe fakapogi​—pea neʼe ko te kau takitaki lotu ʼo Papiloni Lahi ʼaē neʼe nātou tautau fakaneke te ʼu meʼa ʼaia. ʼE feala pe ke tou ʼui, ohage ko te meʼa ʼaē neʼe ʼui ʼo ʼuhiga mo te kau ʼuluaki Kilisitiano, “ ʼe moʼoni ʼo ʼuhiga mo te magaʼi lotu ʼaia, ʼe mātou ʼiloʼi ʼi te ʼu potu fuli pe ʼe palalau fakafeagai kiai te hahaʼi.” Ohage pe ko te kau takitaki lotu Sutea ʼo te temi ʼo Kilisito neʼe nātou fakafeagai mālohi kia te ia moʼo fakagata tona minisitelio, ʼe toe feiā pe mo te kau takitaki lotu pea mo te kau ʼaposita ʼo te temi ʼaenī, ʼo kau ki ai mo tonatou ʼu kaumeʼa fai politike, ʼe nātou faiga ke nātou molehi te gāue lahi ʼaē ʼe fai e te hahaʼi ʼa Sehova, ʼaē ko te akoʼi ʼo te hahaʼi.​—Gāue 28:22; Mateo 26:59, 65-67.

3. Koteā te meʼa ʼaē ʼe tou ako ʼi te agatonu ʼa Henryka Żur?

³ Koutou fakatokagaʼi te meʼa ʼaē neʼe hoko ʼi Poloni ʼi te ʼaho 1 ʼo Malesio 1946. Ko Henryka Żur, te taʼahine Fakamoʼoni neʼe taʼu 15 pea neʼe nofo ōvi ki Chełm, neʼe ʼalu mo te tēhina Fakamoʼoni, moʼo fai he ʼu ʼaʼahi ʼi te kiʼi kolo. Neʼe puke nāua e te kūtuga solia Katolika ʼaē neʼe higoa ko te Narodowe Siły Zbrojne (Te ʼu Foʼi Solia ʼo Te Puleʼaga). Neʼe nātou tā mālohi te tēhina kae neʼe mole mate ai. Neʼe mole tatau te meʼa ʼaē neʼe hoko kia Henryka. Neʼe gaohi koviʼi ia ia lolotoga ni ʼu hola he neʼe faiga e te kau solia ke nātou fakakinauʼi ia ia ke pule. Ko te tahi ia nātou neʼe ina ʼui age ki ai: “ ʼE feala tau tui ki te meʼa ʼaē ʼe ke loto kiai, kae ʼe tonu ke ke pule. Kapau ʼe mole ke pule pea ʼe fanahi anai koe!” Neʼe ina līaki koa tana agatonu? Kailoa. Ko te ʼu tagata fula ʼaia neʼe nātou toho ia ia ki te vao matuʼa pea nātou fanahi ia ia. Kae neʼe mālo te tuagaʼane ia nātou! Neʼe mole nātou lava fai he meʼa ke ina līaki ai tana agatonu.a​—Loma 8:​35-39.

4. Neʼe faiga feafeaʼi e te ʼu lotu pea mo te hahaʼi fai politike ke nātou fakagata te faka mafola ʼo te Puleʼaga?

⁴ Lolotoga te ʼu taʼu e teau tupu neʼe gaohi koviʼi ai te ʼu kaugana ʼa te ʼAtua ʼo totatou temi pea neʼe vaʼiganoaʼi nātou. Koteʼuhi ko te kau Fakamoʼoni ʼa Sehova ʼe mole nātou kau, pea ʼe mole nātou fia kau, ki te ʼu lotu tāfito ʼo te mālama ʼa Satana, koia ʼe valokiʼi nātou e te hahaʼi fakapalatahi pea mo fakafeagai kia nātou te hahaʼi ʼaē ʼe tauhi fakavale ki tonatou lotu. Neʼe toe fakafeagai kia nātou te ʼu kūtuga faka politike. Ko te tokolahi ʼo te kau Fakamoʼoni ʼa Sehova neʼe nātou mamate faka maletile ʼuhi ko tanatou tui. Māʼiape la mo te ʼu fenua ʼaē ʼe lau ʼe ko te ʼu fenua faka temokalatike, ʼe nātou faiga ke nātou tāʼofi te faka mafola ʼo te logo lelei. ʼI te taʼu 1917 ʼi Kanata pea mo Amelika, ko te kau takitaki lotu neʼe nātou fakatuʼutuʼu ke tukugakoviʼi te kau Ako ʼo te Tohi-Tapu, te higoa ʼo te kau Fakamoʼoni ʼi te temi ʼaia, ʼo nātou ʼui neʼe agatuʼu te kau Fakamoʼoni ki te puleʼaga. Neʼe pilisoniʼi te kau fakafofoga ʼo te Sosiete Watch Tower kae ki muli age neʼe faka lākatonuʼi nātou mai te ʼu tukugakovi hala ʼaē neʼe fai kia nātou.​—Fakahā 11:​7-9; 12:17.

5. Koteā te ʼu palalau ʼaē neʼe fakaʼaogaʼi moʼo fakaloto mālohiʼi te ʼu kaugana ʼa Sehova?

⁵ Neʼe fakaʼaogaʼi e Satana te ʼu meʼa fuli ʼaē ʼe ina maʼu, moʼo fakagata te fai faka mafola ʼo te ʼu tēhina ʼa Kilisito pea mo tanatou ʼu kaugā gāue. Kae, ʼe hā mai ʼi te ʼu meʼa ʼaē neʼe hoko ki totatou ʼu tēhina, logope la te ʼu tuʼutāmaki, mo te ʼu fakafeagai, mo te ʼu agamālohi, mo te ʼu lotoʼā fakamamahi, pea mo te mate, neʼe mole nonofo fakalogologo te kau Fakamoʼoni ʼa Sehova. Pea neʼe hoko moʼoni te faʼahi ʼaia ʼi te hisitolia katoa. Neʼe fakaʼaogaʼi liuliuga te fakaloto mālohi ʼaē neʼe fai e Eliseo: “ ʼAua naʼa ke mataku, heʼe tokolahi age ia nātou ʼaē ʼe kau mo tāua ia nātou ʼaē ʼe kau mo nātou.” Ko te tahi tupuʼaga ʼo tanatou lotomālohi ʼe ko te kaugamālie age ʼo te kau ʼaselo agatonu ʼi te ʼu kautau ʼa te Tevolo!​—2 Hau 6:​16; Gāue 5:27-32, 41, 42.

ʼE Tapuakiʼi e Sehova Te Fai Faka Mafola Faiva

6, 7. (a) Koteā te ʼu faiga ʼaē neʼe fai ʼi te kamata moʼo faka mafola te logo lelei? (b) Koteā te fetogi ʼaoga ʼaē neʼe kamata hoko ʼi te taʼu 1943?

⁶ Lolotoga te 20 sēkulō, neʼe fakaʼaogaʼi e te kau Fakamoʼoni ʼa Sehova te ʼu masini foʼou moʼo fakalahi pea mo fakavave te gāue lahi ʼo te faka mafola ʼi muʼa ʼo te hoko mai ʼo te fakaʼosi. ʼI te taʼu 1914, ko te Pasitea ko Russell, te ʼuluaki pelesita ʼo te Sosiete Watch Tower Bible and Tract Society, neʼe ina kamata fakaʼaogaʼi te ʼata pea mo te ʼu paki, pea neʼe fakahaʼele tahi te ʼu meʼa ʼaia mo te ʼu pa fakatagi neʼe puke ai te ʼu akonaki faka Tohi-Tapu. Ko te ʼata ʼaia neʼe fakahigoa “Le Photo-Drame de la création,” pea neʼe hola valu tona loaloaga. ʼE lahi te ʼu fenua neʼe punamaʼuli ʼaupito ai te hahaʼi ʼaē neʼe sio ki te ʼata ʼaia ʼi te temi ʼaia. Ki muli age, ʼi te ʼu taʼu 1930 pea mo te ʼu taʼu 1940, neʼe ʼiloa te kau Fakamoʼoni ʼa Sehova he neʼe nātou fai faka mafola ʼi te ʼu ʼapi ʼaki te ʼu fakatagi pea mo te ʼu pa fakatagi ʼaē neʼe puke ai te ʼu akonaki faka Tohi-Tapu ʼa J. F. Rutherford, te lua pelesita ʼo te Sosiete.

⁷ ʼI te taʼu 1943 neʼe haʼele ki muʼa te gāue ʼi te takitaki ʼo Nathan H. Knorr, te tolu pelesita ʼo te Sosiete, he neʼe ina fakatuʼu te ako ki te kau fai faka mafola ʼi te ʼu kokelekasio fuli. Neʼe akoʼi te kau Fakamoʼoni ki te fai faka mafola ʼi te ʼu ʼapi pea mo te akoʼi ʼo te hahaʼi ka mole nātou fakaʼaogaʼi te ʼu fakatagi. Talu mai te temi ʼaia, neʼe fakatuʼutuʼu te tahi ʼu ako ki te kau misionea, mo te kau pionie, mo te kau tagata ʼāfea ʼo te ʼu kokelekasio, pea mo te kau tagata taupau ʼaē ʼe nātou tokakaga ki te ʼu filiale ʼo te Sosiete Watch Tower. Neʼe koteā koa tona ʼu fua?

8. ʼI te taʼu 1943, neʼe fakahā feafeaʼi e te kau Fakamoʼoni tanatou tui mālohi?

⁸ ʼI te taʼu 1943, ʼi te lolotoga ʼo te Lua Tau Faka Malamanei, ko te toko 129 000 kau Fakamoʼoni neʼe nātou gāue ʼi te ʼu fenua e 54. Kae neʼe mālohi tanatou tui pea neʼe nātou lotomālohi ke nātou fakahoko ia Mateo 24:14 ʼi muʼa ʼo te hoko mai ʼo te fakaʼosi. Neʼe nātou tui papau ko Sehova ʼe ina fakatuʼutuʼu anai te kalagaʼi ʼo te fakatokaga maʼuhiga ki te hahaʼi, ʼi muʼa ʼo te hoko mai ʼo te ʼu meʼa ʼaē ka iku ki te fakaʼosi ʼo te tuʼu ʼo te ʼu faʼahiga meʼa aga fakahehema ʼaenī. (Mateo 24:21; Fakahā 16:16; 19:11-16, 19-21; 20:​1-3) Neʼe fakapale koa tanatou ʼu faiga?

9. Koteā koa te ʼu meʼa ʼaē ʼe hā ai kua tuputupu te gāue fai faka mafola?

⁹ ʼI te temi nei, ʼi te ʼu fenua e 13, ʼe fakalaka te kau Fakamoʼoni ʼi te toko 100 000. ʼI te ʼu fenua ʼaia, ʼe lahi te ʼu fenua ʼe puleʼi e te Lotu Katolika. Kae koutou fakatokagaʼi muʼa te ʼu tānaki gāue ʼaenī. ʼI Pelesile ʼe ʼi ai te toko 450 000 kau fai faka mafola ʼo te logo lelei, pea ko te toko 1 200 000 neʼe nātou kau ki te Fakamanatu ʼo te Mate ʼo Kilisito ʼi te taʼu 1997. Ko te tahi faʼifaʼitaki, ʼe ko Mekesike ʼaē ʼe gāue ai te toko 500 000 kau Fakamoʼoni pea ko te toko 1 600 000 neʼe nātou kau ki te Fakamanatu. Ko te tahi ʼu fenua Katolika ʼe ko Italia (ko te teitei toko 225 000 kau Fakamoʼoni), mo Falani (ko te teitei toko 125 000), mo Sepania (ko te toko 105 000 tupu), pea mo Argentine (ko te toko 115 000 tupu). ʼI Amelika ʼaē ʼe maʼuhiga tāfito ai te ʼu lotu Polotesita, mo Katolika, pea mo Sutea, ʼe ʼi ai te kau Fakamoʼoni e toko 975 000 pea ko te toko 2 000 000 neʼe nātou kau ki te Fakamanatu. ʼE mahino papau ia, ko te toe hahaʼi tokolahi ʼe nātou mavae mai Papiloni Lahi, te kautahi faka malamanei ʼo te lotu hala, pea mo tana ʼu akonaki fakatemonio pea ʼe nātou tafoki ki te ʼu fakapapau moʼoni pea mo mahino gafua ʼa te ʼAtua, ʼo ʼuhiga mo te “lagi foʼou pea mo te kele foʼou.”​—2 Petelo 3:​13; Isaia 2:​3, 4; 65:17; Fakahā 18:​4, 5; 21:​1-4.

Tou Faka ʼAlutahi Tatatou Faka Mafola Mo Te ʼu Meʼa ʼAē ʼe ʼAoga Ki Te Hahaʼi

10. Koteā te ʼaluʼaga ʼaē kua fetogi ʼi ʼihi fenua?

¹⁰ Ko te tokolahi ʼo te hahaʼi ʼaē neʼe nātou maliu mai kia Sehova ʼaki ia Kilisito Sesu, neʼe ko he ʼu hahaʼi neʼe maʼu nātou ʼi te fai faka mafola ʼi te ʼu ʼapi. (Soane 3:​16; Gāue 20:20) Kae neʼe toe fakaʼaogaʼi te tahi ʼu faʼahiga fai. Kua fetogi te ʼu ʼaluʼaga ʼo te temi ʼaenī, pea ko te tokolahi ʼo te hahaʼi fafine kua nātou gāue, heʼe kua kovi te ʼu ʼaluʼaga faka ekonomika. Ko te meʼa ʼaē ʼe tau hoko lolotoga te vāhaʼa, ʼe mole tou maʼu te hahaʼi iō nātou. Koia neʼe faka ʼalutahi e te kau Fakamoʼoni ʼa Sehova tanatou faka mafola mo te ʼu ʼaluʼaga ʼaia. Ohage ko Sesu pea mo tana ʼu tisipulo ʼo te ʼuluaki sēkulō, ʼe nātou ʼolo ki te ʼu potu ʼaē ʼe maʼu ai te hahaʼi mokā ʼe ʼaoga kiai.​—Mateo 5:​1, 2; 9:35; Maleko 6:34; 10:1; Gāue 2:​14; 17:16, 17.

11. Ia ʼaho nei, kofea ʼaē ʼe fai faka mafola ai te kau Fakamoʼoni ʼa Sehova, pea koteā tona ʼu fua?

¹¹ Ko te kau Fakamoʼoni ʼa Sehova ʼe nātou gāue fakaʼeteʼete, ʼo nātou fai faka mafola ki te hahaʼi ʼi te ʼu taulaga motokā lalahi, mo te ʼu fale koloā, mo te ʼu fale gāue, mo te ʼu pilō, mo te ʼu matani gāue, mo te ʼu faleako, mo te ʼu fale pilisoni, mo te ʼu ʼutuʼaga penisini, mo te ʼu otele pea mo te ʼu fale kai, pea ʼi te ala. ʼI tona fakahagatonu ʼe nātou fai faka mafola ʼi te potu fuli ʼaē ʼe maʼu ai te hahaʼi. Kapau ʼe maʼu atu te hahaʼi ʼi tonatou ʼapi, pea ʼe haga ʼaʼahi nātou e te kau Fakamoʼoni ʼa Sehova. Ko te faʼahiga fai ʼaia ʼe ʼalutahi mo te maʼuli ʼo te hahaʼi, pea neʼe tuputupu ai te lahi ʼo te ʼu tohi faka Tohi-Tapu ʼaē neʼe tufa. ʼE maʼu ai te hahaʼi ʼaē ʼe hage ko te ʼu ōvi pea ʼe kamata ai te ʼu ako Tohi-Tapu foʼou. Ko te toko nima miliona tupu ʼo te kau fai faka mafola ʼe nātou fakahoko ʼi te temi nei te polokalama faiako ʼaē ʼe lahi tokotahi ʼi te hisitolia ʼo te tagata! ʼE koutou kau koa ki te pilivilesio ʼaia?​—2 Kolonito 2:​14-17; 3:​5, 6.

Koteā ʼAē ʼe Ina Uga Te Kau Fakamoʼoni ʼa Sehova Ke Nātou Fai Faka Mafola?

12. (a) ʼE akoʼi feafeaʼi e Sehova tana hahaʼi? (b) Koteā te ʼu fua ʼo te ako ʼaia?

¹² Koteā te pipikiga ʼo te ʼu gāue ʼaia pea mo te kautahi ʼo te ʼAtua ʼaē ʼi selo? Neʼe fakakikite fēnei e Isaia: “Ko tou ʼu foha fuli, ʼe nātou liliu anai ko he ʼu hahaʼi ʼe akoʼi e Sehova, pea ʼe mahu anai te tokalelei ʼo tou ʼu foha.” (Isaia 54:13) Ko te foʼi famili fakatautehina faka malamanei ʼaia ʼaē ʼe logo tahi, ʼe akoʼi e Sehova ʼaki tana kautahi ʼaē ʼi te kele​—ʼi te ʼu Fale ʼo te Puleʼaga pea mo te ʼu fakatahi. ʼE tupu ʼaki ai tanatou logo tahi pea mo tanatou tokalelei. Ko te ako ʼa Sehova neʼe ina fakatupu he hahaʼi makehe, he neʼe akoʼi nātou ke nātou feʼofani pea mo ʼofa ki tonatou ʼu kāiga ohage ko nātou, kae ke ʼaua naʼa nātou fehiʼa ki tonatou ʼu kāiga, tatau aipe pe koteā te fenua ʼaē ʼe nātou nonofo ai ʼi te malamanei maveuveu ʼaenī.​—Mateo 22:36-40.

13. ʼE lava feafeaʼi hatatou ʼiloʼi papau ʼe takitaki tatou e te kau ʼaselo ʼi te fai faka mafola?

¹³ Ko te ʼofa ʼe ina uga te kau Fakamoʼoni ʼa Sehova ke nātou haga fai faka mafola logope la te mole tokagaʼi e te hahaʼi te logo lelei peʼe ko tonatou fakatagaʼi. (1 Kolonito 13:​1-8) ʼE nātou ʼiloʼi ko tanatou gāue ʼaē ʼe feala ke ina hāofaki te hahaʼi, ʼe takitaki mai lagi, ohage ko tona tuʼu ia Fakahā 14:6. Koteā koa te logo ʼaē ʼe kalagaʼi ʼaki te takitaki ʼo te kau ʼaselo? “Koutou manavasiʼi ki te ʼAtua pea mo koutou faka kolōlia kia te ia, heʼe kua hoko mai te hola ʼo tana fakamāu, pea ke koutou atolasio kia te Ia ʼaē neʼe ina faʼu te lagi mo te kele mo te tai pea mo te ʼu matapuna vai.” ʼE vikiʼi te huafa ʼa Sehova ʼaki te faka mafola ʼo te logo lelei ʼo te Puleʼaga. ʼE fakaafe te hahaʼi ke nātou faka kolōlia ki te Tupuʼaga, ia te ʼAtua, ka mole ki te ʼu meʼa ʼaē neʼe fakatupu peʼe ki te evolisio. Pea he koʼe koa ʼe maʼuhiga ʼaupito ke fai te gāue ʼaia ʼi te temi nei? Koteʼuhi kua hoko mai te temi ʼo te fakamāu​—te fakamāu ʼo Papiloni Lahi pea mo te tahi ʼu agaaga fakahāhā ʼo te tuʼu ʼo te ʼu faʼahiga meʼa ʼaenī ʼo Satana.​—Fakahā 14:7; 18:​8-10.

14. Ko ai ʼaē ʼe kau ki te gāue lahi ʼaia?

¹⁴ ʼE maʼua ki te kau Kilisitiano fuli ʼaē kua foaki tonatou maʼuli ki te ʼAtua, ke nātou fakahoko te gāue fai faka mafola. Ko te kau tagata ʼāfea ʼe nātou tuku he faʼifaʼitaki lelei ki te kokelekasio ʼo nātou kau ki te fai faka mafola. Ko te kau pionie ʼaē neʼe akoʼi ki te gāue ʼaia ʼe nātou maʼumaʼua ʼaupito ai. Ko te kau fai faka mafola ʼo te Puleʼaga, tatau aipe peʼe lahi peʼe veliveli tanatou ʼu hola, kae ʼe nātou faka mafola te logo lelei ʼi te ʼu potu fuli ʼo te kele.​—Mateo 28:19, 20; Hepeleo 13:​7, 17.

15. Koteā ʼaē ʼe hā ʼaki ai ʼe malave ki te hahaʼi te fai faka mafola ʼa te kau Fakamoʼoni ʼa Sehova?

¹⁵ ʼE malave koa te ʼu faiga fuli ʼaia ki te mālama ʼaenī? Ko te meʼa ʼaē ʼe fakamoʼoni kiai ʼe ko te lahi ʼo te ʼu meʼa ʼaē ʼe hā ʼi te televisio pea mo te ʼu sulunale ʼo ʼuhiga mo te kau Fakamoʼoni ʼa Sehova. ʼE faka maʼuhigaʼi ai totatou lotomālohi ke tou aʼu ki te hahaʼi fuli pea mo tatatou haga fai ʼo te gāue. Ei, ʼe ōfo te hahaʼi ʼi totatou lotomālohi pea mo tatatou faʼa kātaki, logope la ko te tokolahi ʼe nātou fakafisi ki te logo pea mo te kau ʼave logo!

Tou Faiva Moʼo Fakahoko Katoa Te Gāue

16. Koteā te aga ʼaē ʼe tonu ke tou fai ʼi te kiʼi temi nounou ʼaē ʼe kei toe?

¹⁶ ʼE mole tou ʼiloʼi peʼe kei lahi te temi ʼaē ʼe kei toe ki te tuʼu ʼo te ʼu faʼahiga meʼa ʼaenī, pea ʼe mole hona ʼaoga ke tou ʼiloʼi te faʼahi ʼaia, mo kapau ʼe lelei te ʼu meʼa ʼaē ʼe ina uga tatou ke tou tauhi kia Sehova. (Mateo 24:36; 1 Kolonito 13:​1-3) Kae ʼe tou ʼiloʼi papau ʼe tonu “muʼa ke ʼuluaki” faka mafola te logo lelei, ke hā ai te ʼofa ʼo Sehova, tona mālohi pea mo tana faitotonu. (Maleko 13:10) Koia tatau aipe pe ko taʼu e fia ʼaē kua tou fakatalitali ai ke hoko mai la te fakaʼosi ʼo te mālama agakovi ʼaenī, mo heʼe faitotonu pea mo agamālohi, kae ʼe tonu ke tou fakahoko te fakapapau ʼaē neʼe tou fai ʼi tatatou foaki totatou maʼuli ki te ʼAtua, ʼo mulimuli pe ki totatou ʼu fealagia. Tatau aipe peʼe tou matutuʼa peʼe tou mahahaki, kae ʼe feala ke tou tauhi kia Sehova ʼaki te lotomālohi ʼaē neʼe tou maʼu ʼi tatatou kei tūpulaga peʼe ʼi te temi ʼaē neʼe mole tou mahahaki ai. Lagi ʼe mole kei feala ke lahi te temi ʼaē ʼe tou fai faka mafola ai ohage ko tatatou fai ki muʼa atu, kae ʼe kei feala ke tou taupau te lelei ʼo tatatou ʼu sakilifisio fakavikiviki ʼaē ʼe tou momoli kia Sehova.​—Hepeleo 13:15.

17. Koutou fakamatala te faʼifaʼitaki fakaloto mālohi ʼaē ʼe feala ke tokoni kia tatou.

¹⁷ Koia peʼe tou tūpulaga peʼe tou matutuʼa, tou gāue ʼaki he lotomālohi pea mo tou fakahā te logo lelei ʼo ʼuhiga mo te mālama foʼou ki te hahaʼi fuli ʼaē ʼe tou felāveʼi mo nātou. Tou faʼifaʼitakiʼi te kiʼi taʼahine Ositalalia umiuminoa ʼe taʼu fitu neʼe ʼalu mo tana faʼe ki te fale koloā. Neʼe ina logoʼi ʼi te Fale ʼo te Puleʼaga, ʼe tonu kia tatou fuli ke tou fai faka mafola, koia neʼe ina ʼai ʼi tana kato te ʼu kaupepa faka Tohi-Tapu e lua. Lolotoga te temi ʼaē neʼe totogi ai e tana faʼe tana ʼu fakatau, neʼe puli atu te kiʼi taʼahine ʼaia. Neʼe kumi ia ia e tana faʼe pea sio ai neʼe ina lolotoga tuku te kaupepa ki te fafine! Neʼe ʼalu atu tana faʼe ki te fafine ʼaia ʼo faifakalelei age mo kapau neʼe fakakinakina age tana kiʼi taʼahine kia ia. Kae neʼe tali fakafiafia e te fafine te kaupepa. ʼI te ʼāteaina ʼa te faʼe pea mo tana kiʼi taʼahine, neʼe ina fehuʼi age ki ai pe koteā ʼaē neʼe ina uga ia ia ke mole mataku ʼi te palalau ki he fafine neʼe mole ina ʼiloʼi. Neʼe tali fēnei e te taʼahine: “Neʼe ʼau ʼui fēnei ʼi toku loto: ‘Teuteu ke ke ʼalu!’ Pea neʼe ʼau ʼalu ai.”

18. Koteā te aga ʼaē ʼe lelei ke tou fai?

¹⁸ ʼE ʼaoga kia tatou fuli ke tou maʼu te faʼahiga manatu ʼaē neʼe maʼu e te kiʼi taʼahine Ositalalia ʼaia, tāfito la ʼi tatatou palalau ki te logo lelei mo te hahaʼi ʼaē ʼe mole tou ʼiloʼi peʼe ki te hahaʼi maʼu tuʼulaga. ʼE lagi tou tuʼania naʼa fakafisi te hahaʼi kia tatou. Kae ʼaua naʼa galo kia tatou te meʼa ʼaenī neʼe ʼui e Sesu: “ ʼAua naʼa koutou tuʼania ʼo ʼuhiga mo te palalau ʼaē ʼe tonu ke koutou fai peʼe feafeaʼi hona fai moʼo hāofaki ʼo koutou, pe koteā anai te palalau ʼaē ka koutou fai; heʼe akoʼi atu anai e te laumālie maʼoniʼoni ʼi te hola pe ʼaia, te palalau ʼaē ʼe tonu ke koutou fai.”​—Luka 12:11, 12.

19. Koteā takotou manatu ʼo ʼuhiga mo takotou minisitelio?

¹⁹ Koia koutou falala ʼe tokoni atu anai te laumālie ʼa te ʼAtua kia koutou, mokā koutou palalau agalelei anai ki te hahaʼi ʼo ʼuhiga mo te logo lelei. Ko te lauʼi miliona hahaʼi ʼe nātou falala ki te ʼu tagata pea mo te ʼu fafine ʼe mole tāu mo feʼauga ke tou falala kia nātou, pea ʼe nātou maʼuʼuli ʼi te ʼaho ʼaenī kae ʼe feala pe ke nātou mamate ʼapogipogi. ʼE tou falala kia Sehova pea mo tana kautahi ʼaē ʼe ʼi selo​—ʼaē ko Kilisito Sesu, mo te kau ʼaselo maʼoniʼoni, pea mo te kau Kilisitiano fakanofo ʼaē kua fakatuʼuake​—heʼe nātou maʼuʼuli ʼo talu ai! Koia tou manatuʼi: “ ʼE tokolahi age ia nātou ʼaē ʼe kau mo [tatou] ia nātou ʼaē ʼe kau mo nātou”!​—2 Hau 6:​16.

[Nota ʼi te lalo pasina]

Koteā Koa Takotou Tali?

◻ Koteā te meʼa ʼaē neʼe fai e te kautahi ʼa te ʼAtua ʼaē ʼi selo moʼo hāofaki te hahaʼi ʼa Sehova?

◻ Koteā te ʼu faʼahi faka lotu pea mo faka politike ʼaē neʼe nātou tauʼi te kau Fakamoʼoni ʼa Sehova ʼi te 20 sēkulō ʼaenī?

◻ Neʼe faka ʼalutahi feafeaʼi e te kau Fakamoʼoni ʼa Sehova tonatou minisitelio mo te ʼu meʼa ʼaē ʼe ʼaoga ʼi te temi ʼaenī?

◻ Koteā ʼaē ʼe ina uga koutou ke koutou ʼolo ʼo fai faka mafola?

[Paki ʼo te pasina 17]

Ko Henryka Żur

[Paki ʼo te pasina 18]

Saponia

Malitinike

Amelika

Kenia

Amelika

Ko te kau Fakamoʼoni ʼa Sehova ʼe nātou fai faka mafola ʼi te temi fuli pea mo te potu fuli ʼaē ʼe feala ke maʼu ai te hahaʼi

[Paki ʼo te pasina 20]

ʼI te kamata ʼo te sēkulō ʼaenī, neʼe fakaʼaogaʼi te ʼu fakatagi moʼo faka mafola te logo ʼo te Puleʼaga