ʼE Koutou Loto Fakafetaʼi Koa Ki Te Kautahi ʼa Sehova?
“Koʼeni te meʼa ʼaē neʼe ʼui e Sehova: ‘Ko te lagi ʼe ko toku hekaʼaga faka hau, pea ko te kele ʼe ko toku hiliʼaga vaʼe.’ ”—Isaia 66:1.
1, 2. (a) Koteā koa te ʼu meʼa ʼaē ʼe fakamoʼoni ai ko Sehova ʼe ʼi ai tana kautahi?(b) ʼE nofo ia Sehova ʼifea?
ʼE KOUTOU tui koa ko Sehova ʼe ʼi ai hana kautahi? Kapau koia, pea he koʼe koa ʼe koutou tui kiai? ʼE lagi koutou tali fēnei anai: ‘ ʼE ʼi ai tomatou Fale ʼo te Puleʼaga. ʼE fakatuʼutuʼu lelei tomatou kokelekasio ʼaki te kolesi ʼo te kau tagata ʼāfea. ʼE ʼi ai te tagata taupau faka silikosikilipisio neʼe hinoʼi moʼo ʼaʼahi tuʼumaʼu ʼo mātou. ʼE mātou kau ki te ʼu fakatahi ʼe fakatuʼutuʼu lelei. ʼE ʼi ai te filiale ʼo te Sosiete Watch Tower ʼi tomatou fenua. ʼE mahino papau ia, ko te ʼu meʼa fuli ʼaia ʼe hā ʼaki mai, ko Sehova ʼe ʼi ai tana kautahi ʼe ina fakaʼaogaʼi ʼi te temi nei.’
2 Ko te ʼu agaaga ʼaia ʼe fakamoʼoni ai ʼe ʼi ai te kautahi. Kae kapau ko te ʼu meʼa ʼaē ʼe tou sio kiai pea mo tou ʼiloʼi ʼe gata ʼaki pe te ʼu meʼa ʼaē ʼi te kele, pea ʼe mole tou mahino katoa pe koteā te kautahi ʼa Sehova. Neʼe ʼui e Sehova kia Isaia ko te kele ʼe ko Tona hiliʼaga vaʼe, kae ko te lagi ʼe ko Tona hekaʼaga faka hau. (Isaia 66:1) Koteā te “lagi” ʼaē neʼe talanoa kiai ia Sehova? ʼE ko te ʼaele koa ʼaē ʼe ina takafoli te kele? Peʼe ko he mālama ʼe mamaʼo atu ʼi te kele? Peʼe faka ʼuhiga koa ki te tahi faʼahiga maʼuli? ʼE ʼui mai e Isaia ʼo ʼuhiga mo te nofoʼaga ʼa Sehova ʼe ko he “nofoʼaga māʼoluga ʼo te maʼoniʼoni pea mo te matalelei,” pea ko te tagata fai pesalemo ʼe ina fakamatala ko te lagi ʼaia ʼe “ko te koga meʼa ʼaē neʼe ina fakatuʼu ke nofo ai.” Koia, ko te “lagi” ʼaē ʼe talanoa kiai ia Isaia ʼe faka ʼuhiga ki te mālama fakalaumālie pea mo fakapulipuli ʼaē ʼe maʼu ai e Sehova te tuʼulaga ʼaē ʼe māʼoluga tokotahi.—Isaia 63:15; Pesalemo 33:13, 14.
3. ʼE lava feafeaʼi hatatou tauʼi totatou ʼu lotolotolua?
3 Koia kapau ʼe tou fia mahino pea mo loto fakafetaʼi ki te kautahi ʼa Sehova, pea ʼe tonu ke tou mamata ki te lagi. Kae ʼo ʼuhiga mo te faʼahi ʼaia ʼe ʼi ai te meʼa ʼe mole mahino kiai ʼihi. Mai tona ʼuhiga ʼaē ko te kautahi ʼa Sehova ʼe fakapulipuli, e feafeaʼi hatatou ʼiloʼi ʼe moʼoni? ʼE feala ke lotolotolua ʼihi ʼo nātou feʼekeʼaki, ‘ ʼE feala feafeaʼi hatatou ʼiloʼi papau ʼe moʼoni te faʼahi ʼaia?’ ʼE lava feafeaʼi ki te tui ke ina tauʼi te ʼu lotolotolua? Ko meʼa e lua ʼaē ʼe feala ke tou fai, ʼe tonu ke mālohi tatatou ako takitokotahi ia te Folafola ʼa Sehova pea ke tou ʼolo tuʼumaʼu ki te ʼu fono pea mo tou lagolago kiai. Kapau ʼe tou fai te ʼu faʼahi ʼaia, pea ʼe hoki feala ai leva ke puli totatou ʼu lotolotolua. Neʼe ʼi ai te tahi ʼu kaugana ʼa te ʼAtua neʼe toe lotolotolua foki mo nātou. Tou vakaʼi te faʼifaʼitaki ʼo te tagata kaugana ʼa Eliseo ʼi te temi ʼaē neʼe ʼohofiʼi ai ia Iselaele e te hau ʼo Silia.—Vakaʼi ia Soane 20:24-29; Sake 1:5-8.
Neʼe Sio Ki Te ʼu Kautau ʼo Selo
4, 5. (a) Koteā te fihifihia ʼaē neʼe tau mo te tagata kaugana ʼa Eliseo? (b) Neʼe tali feafeaʼi e Sehova ki te faikole ʼa Eliseo?
4 ʼI te pōʼuli, neʼe fekauʼi e te hau ʼo Silia te foʼi solia lahi ke nātou ʼolo ki Totane ʼo puke ia Eliseo. ʼI te kei hegihegi neʼe ʼala ake ai te tagata kaugana ʼa Eliseo ʼo kake ki te fuga ʼato ʼo te ʼapi he neʼe lagi fia ʼai hana kiʼi fakamokomoko, pea neʼe sio ki te meʼa neʼe punamaʼuli ai! Neʼe takatakai te kolo e te foʼi solia Silia ʼaki te ʼu hōsi pea mo te ʼu saliote tau, pea neʼe nātou talitali moʼo puke te polofeta ʼa te ʼAtua. Neʼe kalaga fēnei te kaugana kia Eliseo: “ ʼAliki! Koteā ʼaē ka tā fai?” ʼE mahino ia, neʼe tali e Eliseo ʼaki he lotomālohi pea mo he loto fīmālie: “ ʼAua naʼa ke mataku, heʼe tokolahi age ia nātou ʼaē ʼe kau mo tāua ia nātou ʼaē ʼe kau mo nātou.” Neʼe lagi feʼekeʼaki te kaugana, ‘Kae ʼe ʼifea koa ia nātou? ʼE mole ʼau sio kia nātou!’ Lagi ʼi ʼihi temi ʼe toe feiā mo tatou, ʼe mole tou sio ʼaki te ʼu mata ʼo te fakasiosio tonu, ko tona faka ʼuhiga ʼe mole tou mahino ʼe ʼi ai te kau ʼaselo mo tatou.—2 Hau 6:8-16; Efesi 1:18.
5 Neʼe faikole ia Eliseo ke ava te ʼu mata ʼo tana kaugana. Koteā ʼaē neʼe hoko ki muli age? “Neʼe avahi atu aipe e Sehova te ʼu mata ʼo te kaugana, ʼo feala ai ke sio; pea koʼeni! ko te koga meʼa moʼugaʼia neʼe lahi ai te ʼu hōsi pea mo te ʼu saliote tau afi neʼe nātou takatakai ia Eliseo.” (2 Hau 6:17) Ei, neʼe sio ki te ʼu kautau fakaʼaselo neʼe nātou fakatalitali ke nātou hāofaki te kaugana ʼa te ʼAtua. Neʼe feala ai leva ke mahino kia ia pe koʼe neʼe loto falala ia Eliseo.
6. ʼE feala feafeaʼi ke tou maʼu te fakasiosio tonu ʼo ʼuhiga mo te kautahi ʼa Sehova ʼaē ʼi selo?
6 ʼI ʼihi temi ʼe faigataʼa koa hatatou mahino ki te ʼu meʼa fakalaumālie ohage ko te tagata kaugana ʼa Eliseo? ʼE gata ʼaki pe koa tatatou sio ki te ʼu meʼa ʼaē ʼe hā, ohage ko te ʼu ʼaluʼaga ʼaē ʼe feala ke fakatupu tuʼutāmaki kia tatou peʼe ki te gāue faka Kilisitiano ʼi ʼihi fenua? Kapau koia ʼaia, pea ʼe matatonu koa ke tou ʼamanaki ke fakahā mai kia tatou te ʼu meʼa fakapulipuli? Kailoa, heʼe tou maʼu te meʼa ʼaē neʼe mole maʼu e te kaugana ʼa Eliseo—ko te Tohi-Tapu, te tohi katoa ʼaē ʼe fakamatala ai te ʼu meʼa neʼe hā ki ʼihi, pea ʼe feala ʼaki te tohi ʼaia ke tou mahino lelei pe koteā te kautahi ʼaē ʼi selo. Ko te Folafola ʼaia ʼe haʼu mai te ʼAtua, pea ʼe ina toe fakahā foki te ʼu pelesepeto ʼaē ʼe ʼaoga moʼo fakatonutonuʼi tatatou ʼu manatu pea mo totatou faʼahiga maʼuli. Kae ʼe tonu ke tou faiga ke tou maʼu te fakasiosio tonu pea mo taupau he loto fakafetaʼi ʼo ʼuhiga mo te kautahi ʼa Sehova. ʼE feala ke tou fai te ʼu meʼa ʼaia mo kapau ʼe tou ako takitokotahi, mo tou faikole pea mo tou metitasio.—Loma 12:12; Filipe 4:6; 2 Timoteo 3:15-17.
Tou Ako Ke Lahi Ai Tatatou Mahino
7. (a) Koteā te fihifihia ʼo ʼihi ʼo ʼuhiga mo te ako takitokotahi? (b) He koʼe koa ʼe lelei ke tou fai he ako takitokotahi?
7 Lagi ko te ako takitokotahi ʼe mole ko he meʼa fakafiafia ki te tokolahi, koteʼuhi neʼe mole nātou leleiʼia te faʼahi ʼaia ʼi te faleako, pe neʼe mole nātou maʼu te fealagia ʼaē ke nātou ako. Kae kapau ʼe tou fia fakafetaʼi pea mo mahino ki te kautahi ʼa Sehova ʼaki te ʼu mata fakalaumālie ʼo te fakasiosio tonu, pea ʼe tonu ke tou taupau totatou holi ki te ako. ʼE koutou leleiʼia anai koa he meʼa kai mo kapau neʼe mole teuteuʼi lelei? Ko te ʼu hahaʼi kuka fuli ʼe nātou ʼui, ʼe lahi te ʼu meʼa ʼaē ʼe tonu ke teuteuʼi moʼo fai he meʼa kai lelei, kae ko te meʼa kai ʼaia ʼe lagi kita kai ia minuta pe e 30. ʼE kehekehe mo te ako takitokotahi, heʼe ʼaoga anai kia tatou ʼi totatou maʼuli katoa. ʼAki te temi ʼe feala ke tou leleiʼia te ako ʼi tatatou sio ʼaē ʼe tou tuputupu ki muʼa. Neʼe tonu te tokoni ʼa te ʼapositolo ko Paulo ʼi tana ʼui ʼaē ke tou tokakaga tuʼumaʼu kia tatou pea mo tatatou faiakonaki, pea ke tou haga faiga ke tou popoto ʼi te lautohi ʼi muʼa ʼo te hahaʼi. ʼE mahino ia, ʼe maʼua ke tou kātaki ʼi tatatou ʼu faiga, pea ʼe heʼegata anai tona ʼu fua.—1 Timoteo 4:13-16.
8. Koteā te aga ʼaē ʼe fakaloto mālohiʼi e te ʼu Tāʼaga Lea ke tou fai?
8 Neʼe ʼui fēnei e te tagata poto ʼo te temi muʼa: “Ê toku foha [peʼe ko toku ʼofafine], kapau ʼe ke tali taku ʼu folafola pea mo taupau fakalelei ia te koe taku ʼu fakatotonu, ke feala hau tokagaʼi te poto ʼaki tou taliga, ke feala hau fakafalele tou loto ki te fakasiosio tonu, kapau leva ʼe ke pāui ki te ʼatamai pea kapau ʼe ke kalaga ʼaki tou leʼo ki te fakasiosio tonu, kapau ʼe ke haga kumi te meʼa ʼaia ohage ko te siliva pea [kapau] ʼe ke kumi tuʼumaʼu ohage ko he ʼu koloā maʼuhiga neʼe fufū, pea ʼe ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua.”—Tāʼaga Lea 2:1-5.
9. (a) ʼE tatau koa te maʼuhiga ʼo te aulo pea mo “te ʼatamai mālama totonu ʼo te ʼAtua”? (b) Koteā te ʼu meʼa ʼaē ʼe ʼaoga kia tatou moʼo maʼu te ʼatamai mālama totonu?
9 ʼE mahino koa kia koutou pe ko ai ʼaē ʼe tonu ke ina fai te ʼu meʼa ʼaia? ʼE fai liuliuga te kupuʼi palalau ʼaenī ‘kapau ʼe ke.’ Pea koutou tokagaʼi te kupuʼi palalau, ‘kapau ʼe ke kumi tuʼumaʼu ohage ko he ʼu koloā neʼe fufū.’ Koutou fakakaukauʼi age muʼa te ʼu hahaʼi ʼaē neʼe nātou kumi te aulo pea mo te siliva lolotoga ni ʼu sēkulō ʼi Afelika ʼo te Potu Toga, mo Mekesike pea mo Polivia, pea mo te tahi ʼu fenua. Neʼe nātou gāue kinakina ʼaki te ʼu piosi pea mo te ʼu huo takele moʼo keli te maka ʼaē ʼe nātou toʼo mai ai te aulo. Pea ko te faʼahi ʼaia neʼe ina uga te hahaʼi ʼo Californie ʼi Amelika, ke nātou keli he ʼu ala ʼi te lalo kele, ʼe kilometa 591, pea neʼe kilometa vaelua te loloto ʼo te ʼu ala ʼaia. Kae ʼe feala koa ke koutou kai te aulo peʼe koutou ʼinu? ʼE ʼaoga anai koa kia koutou ʼi te toafa, mo kapau ʼe koutou pakupaku peʼe koutou fia ʼinu? Kailoa, ko tona maʼuhiga ʼe fakalogo pe ki te tuʼu faka ekonomika, pea ʼe fetogi tuʼumaʼu ʼo mulimuli ki tona fakatau ʼi te malamanei. Pea neʼe mate ʼihi hahaʼi ʼi tanatou kumi te aulo pea mo te siliva ʼaia. ʼE tonu koa ke tou faiga mālohi ke tou maʼu te aulo fakalaumālie, “te ʼatamai mālama ʼo ʼuhiga mo te ʼAtua”? Koutou fakakaukauʼi age muʼa, ʼe ko te ʼatamai mālama ʼo ʼuhiga mo te ʼAliki Hau ʼo te ʼatulaulau, mo tana kautahi pea mo tana ʼu fakatuʼutuʼu! ʼI tona ʼuhiga fakatā, ʼe feala ke tou fakaʼaogaʼi te ʼu piosi pea mo te ʼu huo takele fakatā ke tou keli te ʼatamai mālama ʼaia. ʼE ko te ʼu tohi faka Tohi-Tapu ʼaē ʼe tokoni mai kia tatou ke tou keli te Folafola ʼa Sehova pea ke tou mahino ki tona faka ʼuhiga.—Sopo 28:12-19.
Tou Keli Ke Tou Maʼu Te Fakasiosio Tonu
10. Koteā te meʼa ʼaē neʼe hā kia Taniela?
10 Tou keli ʼi te faʼahi fakalaumālie ke tou kamata maʼu te ʼatamai mālama ʼo ʼuhiga mo te kautahi ʼaē ʼi selo ʼa Sehova. Tou fakatokagaʼi te meʼa ʼaē neʼe hā kia Taniela ʼo ʼuhiga mo te Matuʼa ʼo te ʼu ʼAho ʼi tona hekaʼaga faka hau: “Neʼe ʼau haga mamata ʼo aʼu ki te temi ʼaē neʼe fakatuʼu ai te ʼu hekaʼaga faka hau pea neʼe heka ai te Matuʼa ʼo te ʼu ʼAho. Ko tona teu neʼe hihina ohage ko te nive, pea ko tona fuluʼi ulu neʼe hage ko he fuluʼi akeno maʼa. Ko tona hekaʼaga faka hau neʼe ko te ʼu uloʼi afi; pea ko tona ʼu teka neʼe ko te afi kakaha. Mai tona hekaʼaga faka hau neʼe tafe pea mo haʼu ki tuʼa te vaitafe afi. Ko te toko afe pea mo lauʼi afe neʼe nātou tauhi kia te ia pea neʼe ko te toko hogofulu afe tuʼa hogofulu afe neʼe nātou tutuʼu ʼi muʼa ʼo tona hekaʼaga faka hau. Neʼe fakatuʼu te Telepinale pea neʼe avahi te ʼu tohi.” (Taniela 7:9, 10) Neʼe ko ai koa te toko lauʼi afe ʼaē neʼe nātou tauhi kia Sehova? ʼI te Tohi-Tapu Les Saintes Écritures — Traduction du monde nouveau, ko te ʼu kiʼi nota ʼaē ʼi te loto pasina, ʼaē ʼe feala ke tou fakatātā ki he ʼu “piosi” pea mo he ʼu “huo takele” ʼe fakamahino mai ai te pikipikiga ʼo te koga tohi ʼaia pea mo te ʼu vaega ʼo Pesalemo 68:17 pea mo Hepeleo 1:14. Ei, ko te hahaʼi tauhi neʼe ko te ʼu ʼaselo ʼaē ʼi selo!
11. Ko te meʼa ʼaē neʼe hā kia Taniela, ʼe lava tokoni feafeaʼi mai ke tou mahino ki te ʼu palalau ʼa Eliseo?
11 ʼE mole fakahā mai e te fakamatala ʼa Taniela pe neʼe sio ki te ʼu ʼaselo agatonu fuli ʼaē ʼe puleʼi e te ʼAtua. Lagi ʼe ʼi ai te toko lauʼi miliona ʼaselo. Kae ʼi te temi nei kua feala ke tou mahino pe koʼe neʼe ʼui e Eliseo: “ ʼE tokolahi age ia nātou ʼaē ʼe kau mo tāua ia nātou ʼaē ʼe kau mo nātou.” Neʼe tokolahi age te ʼu kautau fakaʼaselo ʼa Sehova ʼi te foʼi solia ʼo te hau Silia logope la neʼe lagolago kiai te ʼu ʼaselo heʼe agatonu, te kau temonio!—Pesalemo 34:7; 91:11.
12. ʼE feala feafeaʼi ke lahi age takotou ʼiloʼi ia te kau ʼaselo?
12 Lagi ʼe koutou fia ʼiloʼi he tahi ʼu meʼa ʼo ʼuhiga mo te ʼu ʼaselo ʼaia, ohage la pe koteā tonatou tuʼulaga ʼi te fakatuʼutuʼu ʼa Sehova. Ko te faka ʼuhiga ʼo te kupu faka Keleka ʼaē ʼe fakaliliu ʼaki te kupu ʼaselo, ʼe ina fakahā mai ʼe ko he kau ʼave logo. Kae ʼe mole gata ʼaki pe tanatou gāue ʼaia. Kapau ʼe koutou fia ʼiloʼi pe koteā te ʼu gāue ʼaia, pea ʼe tonu ke koutou fai he ʼu kumi. Koutou lau te alatike “Ange” (ʼAselo) ʼi te tohi Auxiliaire pour une meilleure intelligence de la Bible, peʼe feala ke koutou vakaʼi he ʼu alatike ʼo te ʼu Tule Leʼo ʼāfea, ʼaē ʼe talanoa ai ʼo ʼuhiga mo te ʼu ʼaselo. ʼE koutou punamaʼuli anai heʼe lahi te ʼu meʼa ʼaē ʼe feala ke koutou ako ʼo ʼuhiga mo te ʼu kaugana fakalaumālie ʼaia ʼa te ʼAtua, pea ʼe koutou mahino anai ki tanatou tokoni. (Fakahā 14:6, 7) Kae ʼi te kautahi ʼaē ʼi selo ʼa te ʼAtua, ko ʼihi ʼaselo kua ʼosi fakatuʼutuʼu te gāue ʼaē ʼe tonu ke nātou fai.
Te Meʼa ʼAē Neʼe Sio Kiai Ia Isaia
13, 14. Koteā te meʼa ʼaē neʼe sio kiai ia Isaia, pea neʼe lave feafeaʼi kia ia?
13 ʼI te temi nei tou vakavakaʼi muʼa te meʼa ʼaē neʼe hā kia Isaia. ʼE koutou ōfo anai ʼi takotou lau te vaega 1 ki te 7 ʼo te kapite 6. ʼE ʼui e Isaia neʼe “sio kia Sehova ʼe heka ʼi te hekaʼaga faka hau,” pea ko te ʼu “selafimi neʼe tutuʼu ʼi ʼoluga ia ia.” Neʼe nātou kalagaʼi te kolōlia ʼa Sehova pea mo nātou vikiʼi tona maʼoniʼoni. ʼE tonu ke malave kia koutou mokā koutou lau te fakamatala ʼaia. Koteā ʼaē neʼe fai e Isaia? “Neʼe ʼau ʼui fēnei: ‘Malaʼia kia te ʼau! Heʼe kua ʼau fakalogologo [ʼi te Seole], heʼe ko ʼau ko he tagata ʼe heʼemaʼa tona ʼu laugutu, pea ʼe ʼau nofo ʼi te hahaʼi ʼe heʼemaʼa tonatou ʼu laugutu; he ko ʼoku mata neʼe sio ki te Hau totonu ko Sehova ʼo te ʼatu kautau!’ ” Neʼe ōfo ia Isaia ʼi te meʼa ʼaē neʼe sio kiai! ʼE koutou feiā koa mo koutou?
14 Koia neʼe feala feafeaʼi kia Isaia ke ina matāʼofi tana mamata ki te kolōlia ʼaia? ʼE ina fakamatala mai neʼe haʼu te selafimi ʼo tokoni ki ai pea mo ina ʼui fēnei: “Kua mavae tau hala pea ʼe fai te fakalelei ki tau agahala.” (Isaia 6:7) Neʼe feala kia Isaia ke falala ki te manavaʼofa ʼo te ʼAtua pea ke ina tokagaʼi te ʼu folafola ʼa Sehova. ʼE mole koutou fia ʼiloʼi koa la pe ko ai te ʼu laumālie ʼaia ʼaē ʼe maʼuhiga tonatou tuʼulaga? Koteā ʼaē ʼe tonu ke koutou fai? Koutou fai he ʼu kumi. Ko te tohi ʼaē ka ʼaoga anai kia koutou ʼe ko te Index des publications de la Société Watch Tower, pea ʼe koutou ʼiloʼi ai anai pe ko te ʼu tohi fea ʼaē ʼe koutou maʼu ai te tahi ʼu fakamahino.
Koteā ʼAē Neʼe Sio Kiai Ia Esekiele?
15. Koteā ʼaē ʼe hā mai ʼe feala ke tou falala ki te meʼa ʼaē neʼe hā kia Esekiele?
15 Tou fakatokagaʼi te tahi kūtuga fakaʼaselo. Lolotoga tana ʼaunofo ʼi Papiloni, neʼe maʼu e Esekiele te pilivilesio ʼaē ke sio ki te ʼu meʼa fakalaumālie ʼaē neʼe fakahā e te laumālie ʼo te ʼAtua. Koutou toʼo takotou Tohi-Tapu ʼi te ʼuluaki kapite ʼo Esekiele, ʼi te vaega 1 ki te 3. ʼE kamata feafeaʼi te fakamatala ʼaia? ʼE ʼui ai koa ‘ ʼI te temi ʼāfea, ʼi he fenua mamaʼo . . .’ ohage ko tona kamata ʼi te ʼu fagana? Kailoa, heʼe mole ko he fagana ʼo ʼuhiga mo te temi ʼāfea. ʼE ʼui fēnei e te ʼuluaki vaega: “Koia ʼi te tolugofulu taʼu, ʼi te fā māhina, ʼi te ʼaho nima ʼo te māhina ʼaia, ʼi taku nofo ʼi te lotolotoiga ʼo te hahaʼi ʼaē neʼe ʼave popūla ʼi te vaʼe vaitafe ʼo Kepale, ʼi te temi pe ʼaia neʼe ava ai te lagi pea neʼe kamata hā mai kia te ʼau te ʼu meʼa mai te ʼAtua.” Koteā ʼaē ʼe koutou fakatokagaʼi ʼo ʼuhiga mo te vaega ʼaia? ʼE ina fakahā mai te ʼaho totonu pea mo te potu totonu ʼaē neʼe hoko ai te meʼa ʼaia. ʼAki te fakamatala ʼaia ʼe mahino mai ai kia tatou neʼe ko te nima taʼu ʼo te ʼave popūla ʼo te Hau ko Seoiakini, ko te taʼu 613 ʼi muʼa ʼo totatou temi.
16. Koteā ʼaē neʼe sio kiai ia Esekiele?
16 Ko te nima ʼo Sehova neʼe tokoni kia Esekiele, pea neʼe kamata sio ki te meʼa fakaofoofo, ko Sehova ʼe heka ʼi te hekaʼaga faka hau ʼi te saliote lahi ʼi selo, pea neʼe ʼi ai tona ʼu foʼi teka lalahi neʼe fonu ai mo te ʼu mata ʼi tonatou ʼu tapaʼi teka. ʼE tou fakatokagaʼi ʼe ʼi ai te ʼu meʼa maʼuli e fā ʼe nātou tahi tuʼu ʼi te ʼu foʼi teka e fā. “Koʼeni tonatou agaaga: neʼe nātou tatau mo te tagata kelekele. Pea neʼe nātou tahi maʼu tonatou ʼu fofoga e fā, pea mo tahi maʼu tonatou ʼu pakakau e fā . . . Pea ʼo ʼuhiga mo tonatou ʼu fofoga, ko nātou toko fā neʼe ʼi ai tonatou fofogaʼi tagata, mo te fofogaʼi laione ʼi te faʼahi mataʼu, pea ko nātou toko fā neʼe ʼi ai tonatou fofogaʼi vitulo ʼi te faʼahi hema; pea ko nātou toko fā neʼe ʼi ai tonatou fofogaʼi akuila.”—Esekiele 1:5, 6, 10.
17. Koteā ʼaē ʼe fakatātā e te ʼu fofoga e fā ʼo te ʼu kelupimi?
17 Neʼe koteā koa te ʼu meʼa maʼuli ʼaia e toko fā? ʼE ʼui totonu mai e Esekiele neʼe ko te ʼu kelupimi. (Esekiele 10:1-3, 14) He koʼe koa neʼe ʼi ai tonatou ʼu fofoga e fā? Neʼe nātou fakatātā te ʼu kalitate makehe e fā ʼo te ʼAliki Hau ko Sehova. Ko te fofoga ʼo te akuila neʼe ina fakatātā te fakasiosio poto. (Sopo 39:27-29) Koteā ʼaē neʼe fakatātā e te fofoga ʼo te vitulo? ʼAki te mālohi ʼaupito ʼo tona kia pea mo tona ʼu fugaʼuma, ko he vitulo ʼe feala ke ina keuʼi he hōsi pea mo ia ʼaē ʼe heka ai. ʼE mahino papau ia, ko te vitulo ʼe ko te fakatātā lelei ʼo te māfimāfi ʼo Sehova ʼaē ʼe mole hona tuʼakoi. Ko te laione ʼe ina fakatātā te faitotonu lototoʼa. Pea ko te fofoga ʼo te tagata ʼe ina fakatātā te ʼofa ʼo te ʼAtua, mai tona ʼuhiga ʼaē ko ia tokotahi ʼi te ʼu meʼa ʼaē neʼe fakatupu e te ʼAtua ʼi te kele, ʼe feala ke ina fakahā fakalelei te kalitate ʼaia.—Mateo 22:37, 39; 1 Soane 4:8.
18. ʼE tokoni feafeaʼi mai te ʼapositolo ko Soane ke tou mahino lelei pe koteā te kautahi ʼaē ʼi selo?
18 ʼE ʼi ai te tahi ʼu meʼa neʼe hā, pea ʼe feala ke tokoni mai kia tatou ke lahi age tatatou mahino ʼo ʼuhiga mo te kautahi. ʼE kau kiai te ʼu meʼa ʼaē neʼe hā kia Soane, ʼaē ʼe tou maʼu ʼi te tohi faka Tohi-Tapu ʼo Fakahā. Ohage ko Esekiele, ʼe sio kia Sehova ʼe heka ʼi te hekaʼaga faka hau faka kolōlia, pea ʼe tutuʼu ōvi kia te ia te ʼu kelupimi. Koteā te meʼa ʼaē ʼe lolotoga fai e te ʼu kelupimi? ʼE nātou toe kalagaʼi te palalau ʼaē neʼe fai e te ʼu selafimi ʼo Isaia kapite 6: “Maʼoniʼoni, maʼoniʼoni, maʼoniʼoni ia Sehova ʼAtua, te Māfimāfi, ʼaē neʼe ʼi ai, pea ʼe ʼi ai nei pea ʼe haʼu.” (Fakahā 4:6-8) ʼE toe sio ia Soane ki te akeno ʼe tuʼu ōvi ki te hekaʼaga faka hau. Ko ai ʼaē ʼe ina fakatātā? Ko te Akeno ʼo te ʼAtua, ia Sesu Kilisito.—Fakahā 5:13, 14.
19. ʼAki te ako ʼo te alatike ʼaenī, koteā ʼaē kua mahino kia koutou ʼo ʼuhiga mo te kautahi ʼa Sehova?
19 Koia ʼaki te ʼu meʼa ʼaia neʼe hā, koteā te meʼa ʼaē kua mahino kia tatou? Ko te kautahi ʼaē ʼi selo ʼe fakatafito kia Sehova ʼAtua ʼi tona hekaʼaga faka hau, pea ʼe ōvi kiai te Akeno, ko Sesu Kilisito, ʼaē ko te Folafola, peʼe ko te Logos. Pea neʼe tou toe sio foki ki te ʼu kautau fakaʼaselo, ʼo kau ai mo te kau selafimi pea mo te kau kelupimi. Ko nātou ʼe nātou kau ki te kautahi ʼaē ʼe logo tahi moʼo fai te finegalo ʼa Sehova. Pea ko te meʼa ʼaē ʼe finegalo kiai te ʼAtua, ʼe ko te faka mafola ʼo te logo lelei ʼi te malamanei katoa ʼi te temi fakaʼosi ʼaenī.—Maleko 13:10; Soane 1:1-3; Fakahā 14:6, 7.
20. Koteā te fehuʼi ʼaē ka tali kiai te lua alatike?
20 Moʼo fakaʼosi, ʼe ʼi ai te kau Fakamoʼoni ʼa Sehova ʼi te kele ʼaē ʼe nātou maʼopoʼopo ʼi tanatou ʼu Fale ʼo te Puleʼaga moʼo ako ai peʼe lava feafeaʼi hanatou fai te finegalo ʼo te ʼAliki Hau. Kua tou ʼiloʼi papau ʼe tokolahi age ia nātou ʼaē ʼe kau mo tatou ia nātou ʼaē ʼe kau mo Satana pea mo te ʼu fili ʼo te moʼoni. Kae ʼe toe feala ke tou fai te fehuʼi ʼaenī, Koteā koa te pikipikiga ʼo te kautahi ʼaē ʼi selo pea mo te faka mafola ʼo te logo lelei ʼo ʼuhiga mo te Puleʼaga? Ko te alatike ʼaē ka hoa mai ʼe ina tali anai ki te fehuʼi ʼaia pea mo te tahi ʼu faʼahi.
Te ʼu Fehuʼi Moʼo Fakamanatu
◻ Ke feala hatatou loto fakafetaʼi ki te kautahi ʼa Sehova, koteā ʼaē ʼe tonu ke tou mahino kiai?
◻ Koteā te meʼa ʼaē neʼe hoko ki te kaugana ʼa Eliseo, pea neʼe fakaloto mālohiʼi feafeaʼi ia ia e te polofeta?
◻ ʼE tonu ke tou faka ʼuhigaʼi feafeaʼi te ako takitokotahi?
◻ Koteā te ʼu meʼa ʼaē neʼe fakahā mai e Taniela, mo Isaia, pea mo Esekiele ʼo ʼuhiga mo te kautahi ʼaē ʼi selo?
[Paki ʼo te pasina 13]
ʼE lahi age te ʼu lelei ʼaē ʼe kita maʼu ʼaki te ako takitokotahi ʼi te ʼu lelei ʼaē ʼe kita maʼu ʼi he meʼa kai neʼe teuteuʼi lelei
[Paki ʼo te pasina 15]
Neʼe tali e Sehova ki te faikole ʼa Eliseo ʼo ina fakahā kia ia te ʼu kautau fakaʼaselo