Koutou Tekeʼi Te Manatu Hala!
ʼI TE temi ʼaē neʼe nofo ai ia te pateliaka ko Sopo mo te ʼu faigataʼaʼia, neʼe ʼolo age tona ʼu kaumeʼa e toko tolu ko Elifasi, mo Pilitate, pea mo Sofale. Neʼe nātou ʼōmai ʼo tali mamahi mo ia pea mo fakaloto fīmālieʼi ia ia. (Sopo 2:11) Neʼe ko Elifasi ʼaē neʼe maʼuhiga age ia nātou pea mo lagi matuʼa age ia nātou toko tolu ʼaia. Neʼe ko ia ʼaē neʼe ʼuluaki palalau pea mo lahi tana palalau. Koteā te faʼahiga manatu neʼe maʼu e Elifasi ʼi tana ʼu akonaki e tolu?
Neʼe fakamatala e Elifasi te meʼa faikehe neʼe hoko kiā ia: “Neʼe fakalaka te laumālie ʼi ʼoku muʼa pea neʼe tuʼu tala te ʼu fulu ʼo toku kakano. Pea neʼe tuʼu, kae neʼe mole au ʼiloʼi tona agaaga; neʼe sio ʼoku mata ki te agaaga ʼa he tahi; neʼe hoko te fakalogologo pea neʼe au logo ki te leʼo.” (Sopo 4:15, 16) Neʼe ko te faʼahiga laumālie fea ʼaē neʼe ina fakalotoʼi te manatu ʼa Elifasi? ʼE ʼiloga ia ʼi te ʼu fai valoki ʼaē neʼe fai e Elifasi, ko te laumālie ʼaia neʼe mole ko he ʼāselo agatonu ʼa te ʼAtua. (Sopo 4:17, 18) Neʼe ko te laumālie agakovi ia. Kanapaula neʼe mole ko he laumālie agakovi, he koʼe koa neʼe fakatonutonuʼi e Sehova ia Elifasi mo tona ʼu kaumeʼa e toko lua ʼo ʼuhiga mo te ʼu loi ʼaē neʼe nātou lau? (Sopo 42:7) Ei, ko Elifasi neʼe fakalotoʼi e te temonio. Neʼe ʼiloga ʼi tana ʼu palalau te ʼu manatu faka temonio.
Koteā te ʼu manatu ʼaē neʼe ʼiloga ʼi te ʼu palalau ʼa Elifasi? He koʼe ʼe maʼuhiga ke tou tōkakaga ki te manatu hala? Pea koteā te ʼu puleʼaki ʼe tou lava fai moʼo tekeʼi te manatu hala?
“ ʼE Mole Falala Ki ʼAna Kaugana”
ʼI te ʼu akonaki e tolu ʼa Elifasi, neʼe ina fakahā ai ʼe faigataʼa fau te ʼu meʼa ʼaē ʼe fakamaʼua e te ʼAtua ki tana ʼu kaugana, koia ʼaē ʼe mole feala ia ke nātou fai he meʼa ʼe fiafia ai te ʼAtua kiā nātou. Neʼe ʼui fēnei e Elifasi kiā Sopo: “Sio! ʼE mole falala ki ʼana kaugana, pea ʼe ina tuku te hala ki tana kau ʼāselo.” (Sopo 4:18, nota ʼi te lalo pasina) Ki muli age neʼe ʼui fēnei e Elifasi ʼo ʼuhiga mo te ʼAtua: “Sio! ʼE mole falala ki ʼana kau maʼoniʼoni, pea ʼe mole pe la maʼa te lagi ki ʼona mata.” (Sopo 15:15) Pea neʼe ina fehuʼi fēnei: “ ʼE fiafia koa te Māfimāfi ʼuhi heʼe ke agatonu?” (Sopo 22:3) Neʼe lagolago ia Pilitate ki te manatu ʼa Elifasi, koteʼuhi neʼe ina tala fēnei: “Koʼeni! Māʼia mo te māhina, ʼe mole gigila, pea ʼe mole pe la maʼa te fetuʼu [kiā] mata [ʼo te ʼAtua].”—Sopo 25:5.
ʼE tonu ke tou tōkakaga naʼa tou maʼu te faʼahiga manatu ʼaia. Ko te faʼahiga manatu ʼaia ʼe ina taki tatou ke tou manatu ʼe mamafa fau te ʼu meʼa ʼaē ʼe fakamaʼua mai e te ʼAtua kiā tatou. Ko te taʼi manatu ʼaia ʼe ina holoʼi tatatou ʼu felogoi mo Sehova. Pea tahi ʼaē meʼa, kapau ʼe tou maʼu te faʼahiga fakakaukau ʼaia, ʼe tou tali feafeaʼi anai mokā ʼe fakatonutonuʼi tatou? Lagi mole tou tali anai totatou fakatonutonuʼi, kae ʼe lagi liliu anai totatou loto ʼo ‘hanu kiā Sehova totonu,’ pea mo tou ʼiʼita kiā te ia. (Tāʼaga Lea 19:3) Ko te taʼi aga ʼaia ʼe fakatupu tuʼutāmaki anai ki tatatou ʼu felogoi mo te ʼAtua!
“ ʼE Feala Koa Ki He Tagata Mālohi Ke ʼAoga Ki Te ʼAtua?”
Ko te tahi manatu ʼe ʼalutahi mo te manatu ʼaē ʼe mamafa fau te meʼa ʼaē ʼe fakamaʼua mai e te ʼAtua kiā tatou, ʼe ko te manatu ʼaē ʼe ina ʼui maʼa te ʼAtua ʼe mole ʼi ai he ʼaoga ʼo te tagata. ʼI te tolu akonaki ʼa Elifasi, ʼe maʼu ai te fehuʼi ʼaenī: “ ʼE feala koa ki he tagata mālohi ke ʼaoga ki te ʼAtua, ke ʼaoga te tagata sio poto kiā te ia?” (Sopo 22:2) Maʼa Elifasi, ʼe mole ʼi ai he ʼaoga ʼo te tagata ki te ʼAtua. Neʼe manatu feiā mo Pilitate ʼaē neʼe ina ʼui fēnei: “ ʼE feafeaʼi ki he tagata agahala hana matatonu iā muʼa ʼo te ʼAtua, peʼe feafeaʼi hana maʼa, ia ia ʼaē neʼe fānauʼi e he fafine?” (Sopo 25:4) ʼI te manatu ʼaia, ʼe lava feafeaʼi kiā Sopo, ʼaē ko te tagata agahala, hana lau ʼe faitotonu iā mata ʼo te ʼAtua?
ʼI te temi nei, ko ʼihi hahaʼi ʼe nātou maʼu te manatu ʼe mole lelei ʼo ʼuhiga mo nātou totonu. ʼE nātou maʼu te ʼu taʼi manatu ʼaia, ʼuhi ko te ʼu ʼaluʼaga ohage ko te faʼahiga ako ʼaē neʼe fai age kiā nātou ʼi tonatou famili, mo te ʼu tuʼania ʼo te maʼuli, peʼe ko te fehiʼaʼinaʼi ʼo nātou ʼuhi ko tonatou lanu. Kae ʼe toe fiafia foki ia Satana pea mo tana kau temonio ʼi tanatou fakamamahiʼi he tahi. Kapau ʼe nātou lava fakalotoʼi he tahi ke hage kiā ia ʼe mole ina fai he meʼa ʼe lelei ki te ʼAtua Māfimāfi, ʼe faigafua kiā ia hana lotovaivai. ʼAki te temi, ʼe feala pe ki te tagata ʼaia ke hēʼia, peʼe ke mavae, mai te ʼAtua maʼuli.—Hepeleo 2:1; 3:12.
Ko te liliu ʼo matuʼa pea mo mahamahaki ʼe fakatupu ai te ʼu tuʼakoi. ʼE lagi hage tatatou kau ki te gāue fai faka mafola ʼe siʼisiʼi mo kapau ʼe tou fakatatau mo te ʼu gāue neʼe tou fai ʼi te temi ʼaē neʼe kei tou tūpulaga ai, mo haohaoa mai te mahaki pea mo mālolohi. Kae ʼe maʼuhiga ke tou ʼiloʼi ʼe loto e Satana mo tana kau temonio ke hage kiā tatou ʼe mole feʼauga te meʼa ʼaē ʼe tou fai maʼa te ʼAtua! ʼE tonu ke tou tekeʼi te taʼi manatu ʼaia.
E Feafeaʼi Hatatou Tekeʼi Te Manatu Hala
Logola te ʼu mamahi ʼaē neʼe tau mo Sopo ʼuhi ko Satana te Tevolo, kae neʼe ʼui fēnei e Sopo: “ ʼO aʼu ki toku mate, ʼe mole au tuku anai taku agatonu!” (Sopo 27:5) ʼI tona ʼofa ki te ʼAtua, neʼe fakatotonu e Sopo ke ina taupau tana agatonu logola he faʼahiga meʼa ʼe hoko kiā ia, pea neʼe mole ina tali ke fetogi te faʼahi ʼaia. ʼE ʼi ai te puleʼaki moʼo tekeʼi te manatu hala. ʼE tonu ke tou mahino lelei ki te ʼofa ʼo te ʼAtua, pea mo tou fakatuputupu tatatou fakafetaʼi fakamalotoloto ki te ʼofa ʼaia. Tahi ʼaē meʼa, ʼe tonu ke tou fakaloloto totatou ʼofa kiā te ia. ʼE feala te faʼahi ʼaia ʼaki te ako tuʼumaʼu ʼo te Folafola ʼa te ʼAtua pea mo te metitāsioʼi ʼi te faikole ia te ʼu meʼa ʼaē ʼe tou ako.
Ohage la, ʼe ʼui fēnei iā Soane 3:16: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi.” ʼE lahi ʼaupito te ʼofa ʼo Sehova ki te malamanei, pea ʼi te ʼu temi kehekehe ʼe ʼiloga ai tona ʼofa ʼaia ʼi tana ʼu felogoi mo te hahaʼi. ʼE tonu ke fakatuputupu ʼi tatatou metitāsio ki te ʼu faʼifaʼitaki ʼo te temi muʼa tatatou fakafetaʼi kiā Sehova pea mo fakaloloto totatou ʼofa kiā te ia, pea mo tokoni mai ai kiā tatou ke tou tekeʼi te manatu hala peʼe ko te manatu kovi.
Koutou fakatokagaʼi te felogoi ʼa Sehova pea mo Apalahamo ʼi te temi ʼaē neʼe kua ōvi ai ke fakaʼauha ia Sotoma mo Komola. Neʼe kolekole tuʼa valu e Apalahamo kiā Sehova ʼo ʼuhiga mo Tana fai fakamāu. Neʼe mole ʼi ai he temi neʼe ʼita ai ia Sehova. Kae ko tana ʼu tali neʼe fakafimālie kiā Apalahamo. (Senesi 18:22-33) Ki muli age ʼi te temi ʼaē neʼe hāofaki ai e te ʼAtua ia Lote mo tona famili mai Sotoma, neʼe kole e Lote ke mole ʼalu ki te ʼu moʼuga, kae ke hola ki he kolo ʼe ōvi age. Neʼe tali maʼa Sehova: “Koʼeni ʼe au toe fai atu he aga fakaʼapaʼapa ʼo ʼuhiga mo te faʼahi ʼaia, heʼe mole au fakaʼauha anai te kolo ʼaē neʼe ke palalau kiai.” (Senesi 19:18-22) ʼE ʼasi koa ʼi te ʼu fakamatala ʼaenī ko Sehova ʼe ko he tahi ʼe ina takitaki fakafefeka, mo heʼeʼofa, pea ʼe mamafa fau te ʼu meʼa ʼaē ʼe ina fakamaʼua mai? Kailoa ia. ʼE fakahā mai ai tona ʼuhiga totonu—ko he Pule ʼe ʼofa, mo manavaʼofa, pea mo lotomahino.
Moʼo fakahā te hala ʼo te manatu ʼaē ʼe ina ʼui ko te ʼAtua ʼe ina sivisivi te ʼu hala pea ʼe mole tou lava fai he meʼa ʼe lelei kiā te ia, tou vakaʼi te ʼu faʼifaʼitaki ʼo Alone, mo Tavite pea mo Manase ʼo te Iselaele ʼāfea. Neʼe agahala mamafa tuʼa tolu ia Alone. Neʼe ina faʼu te ʼuhiʼi pipi aulo, neʼe lagolago ki tona tokolua ko Miliame ʼi te fatufatuʼi ʼo Moisese, pea neʼe mole ina tāpuhā pea mo faka maʼuhigaʼi te ʼAtua ʼi Melipā. Kae neʼe sio ia Sehova ki tona ʼu kalitātē, pea neʼe ina faka fealagia ke hoko atu tana tauhi ʼi tona tuʼulaga pelepitelo lahi ʼo aʼu ki tona mate.—Ekesote 32:3, 4; Faka au 12:1, 2; 20:9-13.
Lolotoga tona temi hau, neʼe fai e Tavite tana ʼu agahala. Neʼe tono, pea neʼe ina fakatuʼutuʼu te fakapogi ʼo te tagata neʼe mole ina fai he meʼa ʼe kovi, pea neʼe ina lau te kaugamālie ʼo te hahaʼi, kae neʼe mole ko he meʼa neʼe fakagafua ʼi te lao. Kae neʼe tokagaʼi e Sehova ia te fakahemala ʼa Tavite pea neʼe ina fakahoko fakalelei ia te fuakava ʼaē neʼe ina fai mo Tavite ʼo ʼuhiga mo te Puleʼaga, ʼo ina faka fealagia age ke nofo hau ʼo aʼu ki tona mate.—2 Samuele 12:9; 1 Fakamatala 21:1-7.
Ko te Hau ʼo Suta ko Manase neʼe ina laga te ʼu ʼaletale maʼa Paale, mo ina tutu tona ʼu foha ʼi te ʼafi, mo uga te hahaʼi ke nātou fai te ʼu meʼa faifakalauʼakau, pea mo ina laga te ʼu ʼaletale ʼo te lotu hala ʼi te ʼu malaʼe ʼo te fale lotu. Kae ʼi tana fakahemala fakamalotoloto, neʼe fakamolemole age ia Sehova kiā ia, mo ina fakaʼāteaina ia ia mai tona ʼaunofo pea mo ina toe fakanofo ki tona tuʼulaga hau. (2 Fakamatala 33:1-13) Ko te ʼu aga koa ʼaenī ʼo he ʼAtua ʼe mole ina feʼaugaʼia te ʼu gāue lelei ʼaē ʼe fai e he tahi? Kailoa ia!
ʼE Lākahala Ia Ia ʼAē ʼe Ina Fai Te ʼu Tukugakovi Loi
ʼE tou ʼiloʼi ʼe ko Satana totonu ʼaē ʼe ina maʼu te ʼu aga ʼaē neʼe ina tukugakoviʼi ʼaki ia Sehova. Ko Satana ʼaē ʼe aga fefeka pea mo mamafa fau te ʼu meʼa ʼaē ʼe ina fakamaʼua mai kiā tatou. Pea ʼe ʼiloga lelei te faʼahi ʼaia ʼi te sākilifisioʼi ʼo te tamaliki ʼi te tauhi hala ʼo te ʼu temi muʼa. Neʼe tutu e te kau Iselaele ʼaposita tonatou ʼu foha pea mo tonatou ʼu ʼofafine—kae neʼe mole ko he meʼa neʼe loto kiai ia Sehova.—Selemia 7:31.
Ko Satana, kae mole ko Sehova ʼaē ʼe ina sivisivi te ʼu hala fuli. ʼE fakahā iā Apokalipesi 12:10 (MN ) ko Satana “ia ia ʼaē ʼe ina fakakoviʼi totatou ʼu tēhina, ʼe ina fakakoviʼi ia nātou ʼi te ʼaho mo te po iā muʼa ʼo totatou ʼAtua.” Kae ʼe hivaʼi fēnei e te tagata fai pesalemo ʼo ʼuhiga mo Sehova: “Kapau neʼe ke sivi te ʼu hala, Ê Sah, Ê Sehova, ko ai koa ʼaē ʼe feala anai ke tuʼu? Heʼe maʼu iā te koe te fakamolemole moʼoni.”—Pesalemo 130:3, 4.
Te Temi ʼAē Ka Pulihi Ai Te Manatu Hala
ʼE mahino ia neʼe logoʼi e te kau ʼāselo ia he toe fīmālie ʼi te temi ʼaē neʼe lī ifo ai ia Satana te Tevolo mo tana kau temonio mai te lagi! (Apokalipesi 12:7-9) Hili ʼaia, neʼe mole kei lava he gāue ʼa te ʼu laumālie kovi ki te kau ʼāselo ʼa Sehova ʼi te lagi.—Taniela 10:13.
Kua ʼamanaki hoko mai te temi ʼaē ka fakafiafia ai ia nātou ʼaē ʼe nonofo ʼi te kele. Kua vave pe anai te hifo mai ʼa te ʼāselo mai te lagi mo te kalavī ʼo te vanu pea mo he seini lahi moʼo haʼihaʼi ia Satana pea mo tana kau temonio, ʼo lī ia nātou ki te vanu ʼaē ʼe mole nātou lava fai ai he meʼa. (Apokalipesi 20:1-3) ʼE tou maʼu anai he fīmālie lahi!
ʼO fakatalitali ki te temi ʼaia, ʼe tonu ke tou tōkakaga ki te manatu hala. ʼI te temi fuli pe ʼe tou sio ai ʼe tou maʼu he ʼu manatu hala peʼe ko he ʼu manatu kovi, ʼe tonu ke tou tekeʼi ʼo tou tuku tatatou ʼu fakakaukau ki te ʼofa ʼo Sehova. Pea ‘ko te tokalelei ʼo te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai totatou ʼu loto pea mo totatou ʼu ʼatamai.’—Filipe 4:6, 7.
[Paki ʼo te pasina 26]
Neʼe tekeʼi e Sopo ia te manatu hala
[Paki ʼo te pasina 28]
Neʼe tokagaʼi e Lote ko Sehova ʼe ko te Pule lotomahino