Koutou Nono Ia Sehova
“Ia te koe, Ê Sehova, neʼe ʼau nono ai.”—Pesalemo 31:1.
1. E feafeaʼi te talanoa ʼa te Pesalemo 31 ʼo ʼuhiga mo te falala ʼaē ki te fealagia ʼa Sehova ke liliu ko te nonoʼaga?
KO TE leʼo lelei ʼe hiva, logope la ko te tagata kua gaʼegaʼe tona ʼatamai pea mo tona sino, kae ʼe falala pe ia kia Sehova. ʼE fakahā e te ʼu palalau fakatuketuke ʼo te hiva taputapu ʼaia, ko te tui ʼe mālo. ʼI te ʼu nima ʼofa ʼo te Māfimāfi, ko te tagata ʼaia ʼe nono mai ia nātou ʼaē ʼe nātou kapu ia ia. ʼE ʼui fēnei e te pesalemo, “Ia te koe, Ê Sehova, neʼe ʼau nono ai. ʼOfa pe ke ʼaua naʼa ʼau ufiufi ʼi he lakaga. ʼAki tau faitotonu fakahāo ʼaki ai ʼau.”—Pesalemo 31:1.
2. (a) Koteā te ʼu pou ʼaē e lua ʼe feala ai ke tou falala ko Sehova ko totatou tule mālohi? (b) Ko Sehova ko te ʼAtua feafeaʼi?
2 Neʼe ʼi ai te holaʼaga ʼo te tagata fai pesalemo—ko te nonoʼaga lelei pe ʼaia e tahi! Logope la ko ʼihi ʼu meʼa ʼe fakatupu mahalohalo, kae ko te meʼa ʼaenī ʼe moʼoni: ko Sehova ko tona tule mālohi. ʼE fakatafito tana falala ki te ʼu pou mālohi e lua. ʼUluaki ko te tui, ʼaē ko Sehova ʼe mole ina fakalainoaʼi anai he tahi pea lua ko te faitotonu ʼa Sehova, ko tona faka ʼuhiga ʼe mole ina līaki anai ʼi he temi loaloaga Tana kaugana. Ko Sehova ʼe mole ko he ʼAtua ʼe ina fakalainoaʼi tana ʼu kaugana agatonu; ʼe mole ina motuhi tana fakapapau. Kailoa ia, ko ia ko te ʼAtua ʼo te moʼoni pea ʼe ina fakapale ia nātou ʼaē ʼe falala moʼoni kia te ia. ʼI te fakaʼosi, ko te tui ʼe fakapale anai ia! Ko te hāofaki ʼe hoko anai ia!—Pesalemo 31:5, 6.
3. ʼE fakavikiviki feafeaʼi te tagata fai pesalemo ia Sehova?
3 ʼI tana faʼufaʼu tana musika ki he faʼahiga musika ʼe kamata mai te loloto ʼaupito ʼo te lotomamahi pea mo te ʼu malaʼia ʼo kaku ki tana malaga ʼo aʼu ai ki te falala, neʼe mau ai e te tagata fai pesalemo te mālohi ʼe ʼi loto ia ia. ʼE ina fakavikiviki kia Sehova ʼo ʼuhiga mo Tona ʼofa agatonu. ʼE hiva ia, ʼo fēnei: “Tapuakiʼi ia Sehova, he neʼe ina fakaliliu ʼo taulekaleka te loto ʼofa kia ʼau ʼi he kolo loto hoha.”—Pesalemo 31:21.
Ko Te Foʼi Hiva Mālohi ʼa Te Kau Faka Mafola ʼo Te Puleʼaga
4, 5. (a) Koteā te foʼi hiva mālohi ʼaē ʼe lolotoga fakavikiviki nei kia Sehova, pea neʼe feafeaʼi tanatou fai ʼo te faʼahi ʼaia ʼi te taʼu ʼaenī kua ʼosi? (Vakaʼi ʼi te ʼu pasina 12 ki te 15.) (b) Koteā ʼe ʼiloga mai ia nātou ʼaē neʼe kau ki te ʼaho Fakamanatu kei toe te tahi age ʼu hahaʼi lotolelei ke nātou fakatahi ki te foʼi hiva ʼo te kau faka mafola ʼo te Puleʼaga? (Vakaʼi ʼi te ʼu pasina ʼaē ʼo te taʼu gāue.) (c) Ko ai te kūtuga ʼaē ʼi tokotou kokelekasio ʼe toe tau mo nātou ke nātou fakatahi ki te foʼi hiva?
4 Ia ʼaho nei, ko te ʼu palalau ʼaia ʼo te pesalemo kei maʼu pe tona ʼaoga. Ko te ʼu hiva fakavikiviki ʼaē kia Sehova ʼe mole feala ke tāʼofi ʼe he tagata agakovi, peʼe ko he tuʼutāmaki fakamataku, peʼe ko he fihifihia faka ekonomike; ʼio, ko te loto ʼofa ʼo Sehova kua liliu ia ʼo taulekaleka ki tana hahaʼi. ʼI te malamanei ʼi te taʼu gāue kua hili, ko te foʼi kau hiva mālohi, ko te toko 4 709 889 ʼi te ʼu fenua e 231, neʼe nātou hiva te logo ʼaē ʼo ʼuhiga mo te Puleʼaga ʼo te ʼAtua. Ko te puleʼaga ʼo Sehova ʼaē ʼi selo ʼaki ia Kilisito Sesu, ʼe ko he nonoʼaga ia ʼe mole fakatupu lotomamahi anai kia nātou. Ko te taʼu kua ʼosi, ko te kau faka mafola ʼo te Puleʼaga mai te ʼu kokelekasio e 73 070 neʼe nātou fai hola e 1 057 341 972 ʼi te gāue faka mafola. Ko te toko 296 004 neʼe nātou papitema ko hanatou fakamoʼoni ʼaia kua nātou foaki tonatou maʼuli ki te ʼAtua. Pea ʼe ko he meʼa fakaofoofo taulekaleka neʼe maʼu e te hahaʼi fuli ʼo te Akonaki Fakaʼatua ʼo te Fakatahi Faka Malamanei neʼe hoko ʼi te māhina ʼo ʼAukusito kua hili ʼi Kiev pea mo Ukraine. Neʼe nātou mamata ki te meʼa maʼuhiga ʼi te hisitolia ʼo te kau Fakamoʼoni ʼa Sehova, ʼaē ko te toe hahaʼi ʼaupito neʼe papitemaʼi ʼi te kau Kilisitiano moʼoni, kei hoki hoko age nei te toe papitema hahaʼi feiā! Ohage ko tona fakakikite ia Isaia 54:2, 3, ko te hahaʼi ʼa te ʼAtua ʼe nātou tuputupu ʼaupito ʼosi.
5 Kae, ʼe kei toe age pe la ʼihi ʼu hahaʼi lotolelei ʼo te Puleʼaga ʼo te ʼAtua ke nātou kau ki te foʼi hiva. ʼI te taʼu kua hili, ko te hahaʼi ʼaē ʼo te ʼaho Fakamanatu ʼo te mate ʼo Sesu neʼe ko te toko 11 865 765. ʼAki he loto fakaʼamu, tokolahi ia nātou ʼaia ʼe nātou akoako anai ke kau mo nātou ki te hiva ʼo te katiko ʼo te Puleʼaga ʼi te ʼu ʼapi ʼo te taʼu gāue ʼaenī. ʼE ko he fakatuʼutuʼu ʼe fakatupu ʼita ʼaupito kia ia ʼaē e fakafeagai ki te moʼoni, ʼaē ko Satana te Tevolo!—Fakahā 12:12, 17.
6, 7. Fakamatala pe neʼe feafeaʼi ki te tagata neʼe fia fai ki te moʼoni tana tekeʼi te kau temonio ʼaki te tokoni ʼa Sehova.
6 ʼE faiga anai Satana ke ina fakahēhē niʼihi ke ʼaua naʼa kau mo nātou ʼaia ki te foʼi hiva mālohi ʼaia. Ohage la, ko te kau faka mafola ʼi Tailani ʼe nātou felāveʼi mo te hahaʼi tokolahi ʼe gaohi koviʼi e te kau temonio. Kae tokolahi te hahaʼi fakamalotoloto neʼe hāofaki nātou ʼaki te tokoni ʼaē ʼa Sehova. Hili ki tana ʼaʼahi ʼo te tōketā ʼe gaohi meʼa fakatemonio ʼuhi he neʼe fia mahino pe ki te faʼahi ʼaia, ia taʼu e hogofulu ko te tagata ʼaia neʼe puleʼi tona maʼuli e te kau temonio. Neʼe fia hāo ia mai te ʼu mālohi ʼaia ʼaki te tokoni ʼaē ʼa te kau takitaki lotu, kae neʼe mole ina maʼu pe la he fīmālie moʼoni. Ko te minisi katoa ʼe kau ʼi te kau Fakamoʼoni ʼa Sehova neʼe ako te Tohi-Tapu pea mo ia pea neʼe ina akoʼi age ki te tagata ko te Tohi-Tapu pe ʼaē ka ina hāofakiʼi ia ia mai te pule ʼa te temonio—ke ina maʼu te mālama totonu ʼo te moʼoni, ke ina tuku tana falala kia Sehova ʼAtua, pea mo ina kole mamahi age ke faikole.—1 Kolonito 2:5; Efesi 4:6, 7; 1 Timoteo 2:3, 4.
7 Hili te po ki tana felogoi ʼaia, neʼe moemisi te tagata ʼe sio ki tana tāmai ʼaē kua mate, ʼe ina fakaneke ia ia ke liliu ki te ʼu meʼa fakatemonio. Neʼe kamata maʼuli mamahi tona famili. Neʼe mole fakalogologo ia ki tona fakamatakuʼi ʼaia, neʼe hoko atu pe tana ako ʼo te Tohi-Tapu pea mo tatuʼu ki te ʼu fono. ʼI tana tahi ako, neʼe fakamahino lelei age e te pionie, ko te ʼu meʼa ʼaē ʼe tautau fakaʼaogaʼi ʼi te ʼu toʼotoʼoga fakatemonio ʼe feala ko ni ʼu faka fealagia ʼaia ki te kau temonio ke nātou fakakinakinaʼi te hahaʼi ʼaē ʼe fia ʼāteaina mai tanatou pule. Neʼe manatuʼi e te tagata ʼe ina taupau te moʼi lolo ʼe ina fakaʼaogaʼi ohage ko hona meʼa taupau. Neʼe mahino kia ia ʼe tonu ke ina līaki te moʼi lolo ʼaia. ʼI te temi nei kua ʼāteaina ʼosi ia mai te faʼahi ʼaia, pea kua lituʼa ʼosi ia ki te ʼu meʼa ʼaia. Talu tana lituʼa ki te faʼahi ʼaia, neʼe mole toe gaohi ia ia e te ʼu laumālie kovi. (Vakaʼi ia Efesi 6:13; Sake 4:7, 8.) Ko ia pea mo tona ʼohoana ʼe nā tuputupu ʼi tanā ako pea ʼe nā kau tuʼumaʼu ki te ʼu fono moʼo ako ʼo te Tohi-Tapu.
8, 9. Koteā ʼihi age ʼu fakafeagai neʼe tekeʼi e te kau faka mafola ʼo te Puleʼaga?
8 Ko ʼihi fakafeagai ʼe feala ke nātou fakagaohaʼa ki te tala ʼo te logo lelei. ʼUhi ko te ʼaluʼaga faigataʼa faka ekonomike ʼi Kana, neʼe fakamavae ai leva te kau gāue. Ko te ʼu meʼa moʼo taupau maʼuli kua totogi kovi ia, koia māʼiape la mo te ʼu kiʼi meʼa tāfito ʼo te maʼuli kua faigataʼa tona maʼu. Neʼe tauʼi feafeaʼi e te hahaʼi ʼa Sehova te fihifihia ʼaia? Neʼe nātou falala kia Sehova kae neʼe mole nātou mulimuli ki tonatou poto fakatagata. Ohage la, neʼe tuku e te tagata te sila ʼi te pilō tali fagona ʼo te filiale. Neʼe tuku ʼi te sila ko te 200 tola (Amelika), ʼe fakatatau ki te totogi ʼe maʼu ia māhina e tolu. Ko te meʼa ʼofa mai te tahi ʼe mole ina fakahā tona higoa, kae ʼi te sila neʼe tohi fēnei: “ ʼE mole kei ʼau gāue ʼi taku gāue ʼāfea, kae neʼe foaki mai e Sehova taku tahi gāue. ʼE ʼau fakamālo kia te ia pea mo tona ʼAlo ko Sesu Kilisito. Moʼo lagolago ki te faka mafola ʼo te logo lelei ʼo te Puleʼaga ʼi muʼa ʼo te temi fakaʼosi, ʼe ʼau momono atu pe ʼi te sila ʼaenī taku kiʼi meʼa ʼofa noa pe.”—Vakaʼi ia 2 Kolonito 9:11.
9 Ko te kau ʼaē ki te ʼu fono, ʼe ko he tokoni moʼo ako ia nātou ʼaē ʼe fia kau ki te foʼi hiva mālohi ʼaē kia Sehova. (Vakaʼi ia Pesalemo 22:22.) Koia, ʼi te potu toga ʼo Honduras, ʼe ʼi ai te kokelekasio ʼe higoa ko El Jordán. Koteā ʼaē ʼe makehe ai te kiʼi kūtuga ʼaia? Ko tanatou lagolago fakalelei ʼaē ki te ʼu fono. Ko te kau faka mafola e toko 19 pea ko te toko 12 ia nātou ʼaia ʼi te vāhaʼa fuli ʼe tonu ke nātou fakalaka ʼi te toe liuʼa ke nātou ʼolo ki te ʼu fono. ʼI te temi magemage ʼe mole ko he fihifihia ia, koteʼuhi ʼe feala pe tanatou fakalaka ʼi te liuʼa ʼaki tanatou haʼele ʼi te ʼu mata maka. Kae, ʼi te ʼu temi ʼua, ʼe faigataʼa ʼosi ia. Ko te meʼa ʼaē neʼe hage ko he kiʼi vai noa kua liliu ia ko te toe vaitafe ʼe ina toʼo ia meʼa fuli ʼe tafe ai. Moʼo tauʼi te fihifihia ʼaia, ko te ʼu tēhina pea mo te ʼu tuagaʼane neʼe tonu ke nātou poto ʼi te kāuga. ʼI muʼa ʼo tanatou fakalaka ʼi te liuʼa, neʼe nātou tuku ʼonatou ʼu mutuʼi meʼa fono ʼi te tina (kesi ukamea) pea nātou kofukofuʼi ʼaki te pepa palasitike. Ko ia ʼaē ʼe kāuga lelei ia nātou ʼaia neʼe ina fakaʼaogaʼi te tina ohage ko he meʼa moʼo tokoni ki tana kāuga pea ina taki te kūtuga ke fakalaka ʼi te liuʼa. ʼI tanatou kua tau ki te faʼahi ʼaē, neʼe nātou fakamatuʼu, pea nātou aʼu fiafia ki te Fale ʼo te Puleʼaga pea mo maʼa!—Pesalemo 40:9.
Ko Te Tule Mālohi ʼe Feala Ke Tou Nofo Ai
10. He koʼe koa ʼe feala ke tou maliu kia Sehova ʼi te ʼu temi faigataʼa?
10 Kapau ʼe lahi takotou felāveʼi mo te fakahala ʼaē ʼa te kau temonio peʼe koutou lotomamahi tupu mai niʼihi ʼu meʼa, ko Sehova ʼe feala ko hokotou tule mālohi. Koutou fetapā kia te ia ʼi te faikole. ʼE fagono lelei ia, tatau aipe mo te ʼu goʼegoʼe ʼaē ʼo tana hahaʼi. Neʼe fakamoʼoni te tagata fai pesalemo ki te manatu ʼaia pea neʼe ina tohi, ʼo fēnei: “Falele mai tou taliga kia te ʼau. Hāofaki fakavilivili ʼau. Liliu kia te ʼau ko he tule mālohi. Ko he ʼapi mālohi moʼo hāofaki ʼau. Heʼe ko koe ko toku maka pea mo toku tule mālohi; pea ʼe ke ʼaveʼave anai ʼau pea mo taki anai ʼau ʼuhi ko tou huafa.”—Pesalemo 31:2-4.
11. Fakamatala he koʼe ko te tule mālohi ʼo Sehova ʼe mole ko he nonoʼaga faka temi pe ia.
11 Ko Sehova ʼe mole ko he nonoʼaga faka temi kae ko te tule mālohi ʼe feala ke tou nofo fīmālie ai. Neʼe mole fakahemala tana hahaʼi ʼi tana taki. Ko te mālohi fakaʼatua neʼe ina fakaliliu ʼo noa te atu ʼu gāue faka kākā fuli ʼaē ʼa Satana pea mo tona hāko. (Efesi 6:10, 11) Kapau ʼe tou falala kia Sehova, ʼe ina hāofaki anai tatou mai te hele ʼa Satana. (2 Petelo 2:9) ʼI te ʼu taʼu e fā ʼaē kua hili, ko te gāue fagonogono ʼa te kau Fakamoʼoni ʼa Sehova neʼe fakagafua ʼi te ʼu fenua e 35. Pea tahi foki, ʼi te ʼu fenua ʼaē ʼo te malamanei ko te ʼu ʼaluʼaga faka sosiale, faka ekonomike, peʼe faka politike ʼe nātou fakatupu he meʼa ke faigataʼa te faka mafola ʼaē ʼo te logo lelei, ko te kau ōvi ʼe nātou ʼolo ki te ʼu koga meʼa ʼaē ʼe feala ai ke nātou fagonogono ʼāteaina ai. Ko Saponia neʼe ko te tahi ʼaenā koga meʼa neʼe nātou ʼolo kiai.
12. Koteā te meʼa ʼaē neʼe fai e te pionie Saponia ke liliu ia Sehova ko tona tule mālohi?
12 ʼI Saponia neʼe fakahū te toe hahaʼi matāpule mai te ʼu fenua mai tai ke nātou gāue faka temi, pea neʼe lahi te ʼu kokelekasio neʼe fakatuʼu ʼe lea kehekehe. Ko te meʼa neʼe hoko ki te tēhina ʼi te kokelekasio lea faka Saponia, ʼe ina fakahā fakalelei te fua ʼaē ʼo te gāueʼaga faka matāpule ʼaia. Neʼe fia gāue ia ʼi te ʼu faʼahi ʼaē ʼe ʼaoga tāfito kiai te logo. Kae, neʼe ina lolotoga taki te ʼu ako Tohi-Tapu e hogofulu ʼi te koga meʼa ʼaē ʼe nofo ai. Neʼe ʼui age fakahuahua e tona tahi kaumeʼa: “Kapau ʼe ke ʼalu ki te koga meʼa ʼaē ʼe ʼaoga tāfito kiai te logo, ʼe ke taki anai te ʼu ako Tohi-Tapu e 20!” Neʼe tali tana kole pea neʼe ʼalu ki Hiroshima. Kae hili kiai māhina e fā, neʼe ko tana ako Tohi-Tapu pe e tahi. ʼI te tahi ʼaho neʼe ʼalu ʼo ʼaʼahi ki te tagata mai Pelesile neʼe lea pe ki te faka Potukalia. ʼUhi he neʼe mole feala ke felogoi te tēhina mo te tagata ʼaia, neʼe ina toʼo te tohi ʼi te lea faka Potukalia. ʼI tana ʼosi akoako te ʼu kiʼi palalau ki te lea ʼaia, neʼe toe liliu ia ʼo ʼaʼahi te tagata. ʼI te faka felāveʼi ʼaē ʼa te tēhina ki te tagata ʼaki te lea faka Potukalia, neʼe punamaʼuli te tagata, pea neʼe malimali, ʼo ina fakahū te tēhina ki tona loto fale. Neʼe kamata ai te ako ʼo te Tohi-Tapu. Mole tuai kiai ko te tēhina neʼe ina taki te ʼu ako Tohi-Tapu e 22, ko ʼihi ako Tohi-Tapu e 14 ʼi te lea faka Potukalia, 6 ʼi te lea faka Sepania, pea 2 ʼi te lea faka Saponia!
Tou Faka Mafola ʼAki Te Loto Falala
13. He koʼe koa ʼe mole feala ki he tahi ke ina fakalainoaʼi ia tatou ʼi tatatou kaugana ʼaē kia Sehova?
13 ʼAki te loto falala, ko te hahaʼi ʼa Sehova ʼe nātou hiva te katiko ʼo te Puleʼaga ʼaki te tui katoa ko Sehova ko tonatou nonoʼaga. (Pesalemo 31:14) ʼE mole tonu anai ke nātou ufiufi—ʼe mole fakalainoaʼi anai nātou e Sehova, koteʼuhi ʼe ina fakahoko anai tana folafola. (Pesalemo 31:17) Ko te Tevolo pea mo tana kau temonio ʼe nātou ufiufi anai. ʼUhi he ko te hahaʼi ʼa Sehova neʼe fekauʼi ke nātou faka mafola te logo ʼe mole fakatupu ufiufi, ʼe mole nātou faka mafola ʼuhi heʼe uga nātou e niʼihi. ʼE mole ko he faʼahiga fai ʼaia ʼa Sehova, peʼe ko tona ʼAlo, moʼo uga te hahaʼi ke atolasio kia te Ia. ʼI te lahi ʼo te tui pea mo te loto fakafetaʼi ʼa te hahaʼi ki te agalelei pea mo te loto ʼofa ʼo Sehova, ʼe fakatupu ai leva ʼi ʼonatou loto hanatou fia ʼolo ʼo faka mafola. (Luka 6:45) Koia, pe ko temi ʼe fia ʼe tou fakaʼaoga moʼo fagonogono ʼi te māhina fuli, tāfito la mo kapau ko te temi ʼaia ʼe faka ʼuhiga kia tatou ko tatou meʼa e lelei ʼaē ʼe tou fakaʼaoga ki te faʼahi ʼaia, ʼe lelei ia. Neʼe mole tali lelei koa la e Sesu pea mo tana Tāmai te kiʼi meʼa ʼofa ʼaē ʼa te fafine vitua?—Luka 21:1-4.
14. Koteā te talanoa ʼe feala ke koutou fai ʼo ʼuhiga mo te gāue pionie? (Vakaʼi ʼi te pasina ʼo te taʼu gāue.)
14 ʼI te tuputupu ʼo te hahaʼi ʼaē ʼo te kau faka mafola, ʼaki hanatou liliu ko ni ʼu pionie ʼe nātou tauhi mo tonatou loto katoa—ko tona hahaʼi ʼi te taʼu kua hili neʼe ko te toko 890 231! ʼE laka age tona hahaʼi ʼi te toko 1 000 000 ʼi te taʼu ʼaē ki muʼa atu. Ko te fakamatala ʼaē ki lalo age ʼe ina fakahā pe neʼe feafeaʼi ki te tuagaʼane ʼi Niselia tana liliu ko te pionie. ʼE ina ʼui fēnei: “ ʼI te fakaōviōvi ʼaē ke ʼosi taku ako neʼe ʼau tokoni kia nātou ʼaē neʼe fai meʼa kai ki te kau pionie ʼaē ʼo te ako ʼa te kau pionie ʼa te kau Fakamoʼoni ʼa Sehova. Neʼe ʼau felāveʼi mo te ʼu tuagaʼane e lua kua matutuʼa age ʼi taku kui fafine, neʼe kau ʼi te ako ʼaia. ʼI taku ʼiloʼi ʼaē e nā kau ki te ako, neʼe ʼau fakakaukauʼi tokotahi pe, ‘Kapau ko nāua ʼaenī ʼe feala ke nā pionie, e feafeaʼi koa la kia ʼau?’ ʼI te ʼosi ʼo taku ako, neʼe ʼau pionie katoa.”
15. E feafeaʼi ki te fagonogono faigamālie hana faka fealagia ke liliu ia Sehova ko te holaʼaga ʼo niʼihi?
15 ʼE mole feala ke tou pionie fuli, kae ʼe feala ke tou fagonogono. Ko te tuagaʼane ʼi Pelesike e taʼu 82 neʼe ʼalu ʼo toʼo meʼa kai. Neʼe ina fakatokagaʼi ko te ʼohoana ʼo te tagata ʼo te fale pipi neʼe hoha ki te ʼu meʼa faka politike ʼaē ʼe hoko. Pea neʼe haga te tuagaʼane ʼo foaki age te kiʼi pepa lotu Quelles sont les croyances des Témoins de Jéhovah? (Koteā te ʼu akonaki ʼa te kau Fakamoʼoni ʼa Sehova?) ʼi te temi ʼaē neʼe ina totogi ai. ʼI te toe liliu ʼaē ʼa te tuagaʼane ki te fale pipi pe ʼaia, ko te ʼohoana ʼo te tagata neʼe fehuʼi fakalelei age, pe koteā te manatu ʼa te Tohi-Tapu ki te ʼamanaki ʼaē ke hoko he tolu tau faka malamanei. Neʼe haʼu te tuagaʼane mo te tohi La paix et la securité véritables: comment est-ce possible? (Ko te tokalelei pea mo te fīmālie moʼoni—ʼe maʼu feafeaʼi koa?) Hili kiai te ʼu ʼaho, neʼe toe liliu te tuagaʼane ki te fale pipi, kua lahi age ʼosi te ʼu fehuʼi ʼa te fafine. Neʼe ʼofa te tuagaʼane ki te fafine ʼaia; neʼe ina fakahā age ki ai ke ina ako te Tohi-Tapu, pea neʼe tali e te fafine. ʼI te temi nei ko te ʼohoana ʼo te tagata kua fia papitema. Pea e feafeaʼi ki tona ʼohoana? Neʼe ina lau te kiʼi pepa lotu pea e lolotoga nei ia ʼi te ako ʼo te Tohi-Tapu.
‘Ko Te Koloā ʼo Te Agalelei’
16. Neʼe feafeaʼi te fakatuʼu e Sehova te koloā ʼo te agalelei ki tana hahaʼi?
16 ʼI te lolotoga ʼo te ʼu ʼaho fakamuli faigataʼa ʼaenī, neʼe mole haga koa la ia Sehova ʼo “fakaliliu ʼo taulekaleka te loto ʼofa” kia nātou ʼaē ʼe hola mai kia te ia? Ohage pe ko he tāmai ʼofa pea mo puipui, neʼe fakatuʼu e Sehova te koloā loto ʼofa maʼa tana fānau kelekele. Neʼe ina foaki fakalahi te manuʼia kia nātou ʼaia ʼi muʼa ʼo te ʼu hahaʼi fuli ʼaē ʼe sio, ohage ko te ʼui ʼa te tagata fai pesalemo: “ ʼE lahi ʼaupito, tou finegaloʼofa, ʼaē neʼe ke fakakoloa ʼaki ia nātou ʼaē ʼe nātou manavasiʼi kia te koe, ʼo ke liufaki kia nātou ʼaē ʼe hola mai kia te koe, ia muʼa ʼo te ʼu foha ʼo te ʼu tagata!”—Pesalemo 31:19, 21.
17-19. ʼI Kana, koteā te fua lelei neʼe hoko ʼuhi he neʼe tohi e te tagata kua matuʼa tona ʼu taʼu ʼohoana?
17 Koia ʼaē, ko te hahaʼi ʼo te malamanei ʼe nātou sio mata ki te agatonu ʼa te kau atolasio ʼa Sehova, pea ʼe nātou ʼofolele. Ohage la, ko te tagata e taʼu 96 ʼi Kana neʼe ʼalu ki te pilō ʼaē ʼe tohi ai te ʼu ʼohoana pea neʼe ina kole ke tohi tona ʼu taʼu ʼohoana e 70. Ko te tagata tohi ʼohoana neʼe punamaʼuli pea mo ina fehuʼi age ki ai: “Kua koutou fakakaukauʼi lelei koa te meʼa ʼaē ʼe koutou loto kiai? Kua koutou matuʼa.”
18 Neʼe fakamahinohino age e te tagata, ʼo fēnei: “ ʼE ʼau fia liliu ko he Fakamoʼoni ʼa Sehova pea ʼe ʼau fia kau ki te gāue maʼuhiga e tahi, ʼi muʼa ʼo te temi fakaʼosi ʼo te mālama ʼaenī—ko te gāue faka mafola ʼo te logo lelei ʼo te Puleʼaga ʼo te ʼAtua. Ko te gāue ʼaia ʼe ina taki ki te maʼuli heʼegata. Ko te kau Fakamoʼoni ʼa Sehova ʼe nātou fakalogo ki te lao ʼo te puleʼaga, ohage la ko te lao ʼaē ke tohi te ʼohoana. Koia fakalelei age kae koutou tohi toku ʼu taʼu ʼohoana.” Neʼe ʼofolele te tagata ofisie. Neʼe ina tohi te ʼu taʼu ʼohoana ʼa te tagata, pea ko te matuʼa ʼaia neʼe mavae fiafia mai te pilō heʼe ʼi te temi nei kua fakamoʼoni te puleʼaga ki tona ʼohoana.—Vakaʼi ia Loma 12:2.
19 Hili ʼaia kiai, ko te tagata tohi ʼohoana neʼe ina fakakaukauʼi te ʼu meʼa ʼaē neʼe logo ki ai. “Ko te kau Fakamoʼoni ʼa Sehova . . . gāue maʼuhiga e tahi . . . te temi fakaʼosi ʼo te mālama ʼaenī . . . te Puleʼaga ʼo te ʼAtua . . . maʼuli heʼegata.” ʼI tana hoha ʼo ʼuhiga mo te meʼa ʼaē neʼe mata maʼuhiga ki te maʼuli ʼo te tagata kua taʼu 96, neʼe ina kumi te kau Fakamoʼoni ke fakamahinohino age kia ia te faʼahi ʼaia. Neʼe ina tali te ako ʼo te Tohi-Tapu pea neʼe vave te ʼu fetogi ʼaē neʼe ina fai. ʼI te temi nei, ko te tagata tohi ʼohoana ʼaia kua papitema. Koia, mokā ʼe tou fakalogo kia Sehova tatau aipe mo te ʼu faʼahi ʼaē ʼe hage ki niʼihi ko he ʼu kiʼi meʼa noa, ʼe feala ke fua lelei ʼaupito kia tatou pea mo nātou ʼaē ʼe nātou sio mata ki tatatou aga.—Vakaʼi ia 1 Petelo 2:12.
20. ʼI Myanmar, koteā te faka mafola lelei neʼe hoko ʼuhi ko te agatonu ʼa te tuagaʼane kei finemui?
20 Ko te hahaʼi matutuʼa ʼaē neʼe nātou tuku ke haga te moʼoni ʼo fetogi tonatou maʼuli ke nātou liliu ko ni ʼu hahaʼi agatonu, ʼe ko he ʼu faʼifaʼitaki lelei ʼaia ki te kau tūpulaga ʼo te mālama heʼe agatonu ʼaenī. ʼE feiā te maʼuli ʼo te tuagaʼane finemui ʼi Myanmar. Neʼe maʼuli ia ʼi te famili ʼe masiva pea agavaivai, e tamaliki hogofulu. ʼE nātou maʼuli pe ki te alokasio ʼa tanatou tāmai, pea ko te pionie katoa ia. ʼI te tahi ʼaho ʼi te faleako, neʼe maʼu e te tuagaʼane te foʼi mama gigila, pea neʼe ina foimo ʼave kia ia ʼaē ʼe faiako. Ki muli age ʼi te temi ʼaē neʼe kalagaʼi ai te kalasi, neʼe fakahā e ia ʼaē ʼe faiako ki te kalasi pe neʼe feafeaʼi te maʼu ʼo te foʼi mama pea neʼe ina fakatoʼo ki te taʼahine ʼaʼana te foʼi mama. ʼOsi ʼaia pea ina ʼui age ki te tuagaʼane finemui ke tuʼu ʼi muʼa ʼo te kalasi ʼo fakamatala pe koteā te tupuʼaga ʼaē ʼo tana fai ʼo te meʼa ʼaia, heʼe ina ʼiloʼi ka na ko niʼihi ʼaē tamaliki neʼe nātou taupau nātou te foʼi mama. Neʼe fakamahinohino age e te tuagaʼane ko ia ko te Fakamoʼoni ʼa Sehova pea ko tona ʼAtua ʼe fehiʼa ki te kaihaʼa peʼe ko he faʼahiga aga kākā pe. Neʼe fagono te kalasi fuli ki tana fakamatala, pea neʼe ko he temi faigamālie ʼaia ki totatou tuagaʼane finemui ke faka mafola ki te kau faiako pea mo te tamaliki ʼo te faleako.
21. Mokā falala te kau tūpulaga kia Sehova, ʼe malave feafeaʼi tanatou aga kia te ia?
21 Ko te tagata faiako ʼi Pelesike neʼe talanoa lelei ki te kalasi ʼo ʼuhiga mo te kau Fakamoʼoni ʼa Sehova. Neʼe ina fakatokagaʼi te aga ʼa te tahi ʼi tana kau ako, ko te tahi pe tuagaʼane, ʼo ʼui maʼana: “Kua fetogi nei taku manatu ʼo ʼuhiga mo te kau Fakamoʼoni ʼa Sehova. Ko te meʼa neʼe hoko neʼe ina fakatupu ke ʼau manatu ko nātou ko te hahaʼi ʼe mole nātou tali pe la he meʼa. Neʼe nātou fakahā ko nātou ko te hahaʼi ʼe nātou tali lelei ia meʼa fuli, logope la tanatou mole tuku ki lalo ʼo tanatou ʼu fakatuʼutuʼu faka Tohi-Tapu.” ʼI te taʼu fuli neʼe foaki e te kau faiako te fakapale ki tanatou ʼu tamaliki popoto. Ko ʼihi, ko te fakapale ki te ako ʼo te ʼu aga. Ia taʼu hoholo e tolu, ko te ʼu fakapale ʼaē ki te ʼu tuʼulaga māʼoluga e tolu neʼe foaki e te faiako ʼaia ki te ʼu tamaliki Fakamoʼoni ʼa Sehova. Ko te meʼa ʼaia neʼe tau mo nātou ʼaē neʼe falala agatonu kia Sehova.—Pesalemo 31:23.
22. Koteā te fakaʼosi fakafiafia ʼaē ʼe maʼu ʼi te Pesalemo 31, pea ʼe tokoni feafeaʼi kia tatou ʼi tatatou lolotoga fakaōvi ki te ʼu ʼaho fakaʼosi ʼo te tuʼu ʼaenī?
22 ʼE tatagi te Pesalemo 31 ʼaki te talanoa mālo fakaʼosi ʼaenī: “Koutou lototoʼa, pea ke mālohi tokotou loto, ia koutou fuli ʼaē ʼe fakatalitali kia Sehova.” (Pesalemo 31:24) Pea tahi ʼaē, ʼi tatatou fakaōvi ki te ʼu ʼaho fakaʼosi ʼo te tuʼu agakovi ʼa Satana, ʼe tou ʼāʼāsili mamaʼo ʼi te tuʼu ʼaia, kae ʼe fakaōvi mai anai ia Sehova kia tatou pea mo ina tuku mai tona mālohi kia tatou. ʼE agatonu ia Sehova pea ʼe ina fakahoko ia meʼa fuli. Ko ia ko totatou holaʼaga; ko ia ko totatou tule.—Tāʼaga Lea 18:10.
Kei Koutou Manatuʼi Koa?
◻ He koʼe koa ʼe feala ke tou ʼui fakalelei ko Sehova ko totatou nonoʼaga?
◻ Koteā ʼaē ʼe ʼiloga ai ko te foʼi hiva mālohi ʼe ina lolotoga hiva te ʼu fakavikiviki ʼo te Puleʼaga ʼaki te lototoʼa?
◻ He koʼe koa ʼe feala ke tou falala ko te kupega ʼa Satana ʼe mole ina puke anai te hahaʼi ʼa Sehova?
◻ Koteā te koloā neʼe fakatuʼu e Sehova kia nātou ʼaē ʼe feholaki kia te ia?
[Tānaki ʼo te taʼu gāue, pasina 12-15]
1993 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA
(Vakaʼi te nusipepa.)
[Paki ʼo te pasina 16, 17]
Ko nātou ʼaē ʼe hola kia Sehova ʼe nātou faʼufaʼu te foʼi hiva mālohi ʼo te kau faka mafola ʼo te Puleʼaga—4 709 889 mālohi!
1. Senekale
2. Pelesile
3. Sili
4. Polivia