Ko Ai Neʼe Ina Fakatupu Ia Meʼa Maʼuli Fuli?

Ko te ʼAtua ʼe ko “te matapuna o te mauli.” (Pesalemo 36:10) ʼE ke fakatui koa ki ai? ʼE ui e ʼihi neʼe ha feia pe te maʼuli ia. Kae kapau ko te ʼAtua ia te matapuna ʼo te maʼuli, pea ʼe ʼi ai he ʼuhiga moʼoni ʼo totatou maʼuli.a ʼI te kapite ʼaeni, ʼe ke vakaʼi anai te manatu ʼa te Tohi-Tapu ʼo ʼuhiga mo te haʼuʼaga ʼo te maʼuli pea he koʼe ʼe lelei ke tou tui ki ai.

1. Ko ai neʼe ina fakatupu te ʼatulaulau?

ʼE ui ʼi te Tohi-Tapu: “ʼI te kamataʼaga, neʼe fakatupu e te ʼAtua te lagi mo te kele.” (Senesi 1:1) Pea ʼe fakamoʼoni ʼihi tagata popoto ki te manatu ʼaia. Neʼe fakatupu feafeaʼi e te ʼAtua te ʼatulaulau? Neʼe ina fakaʼaogaʼi ia tona “malohi,” ʼae ko tona laumalie maʼoniʼoni moʼo fakatupu te ʼu meʼa maʼuli fuli ʼi te ʼatulaulau. Ohage la ko te ʼu pupuʼaga fetuʼu, mo te ʼu fetuʼu pea mo te ʼu kele.—Senesi 1:2.

2. He koʼe neʼe fakatupu e te ʼAtua te kele?

‘Neʼe mole fakatupu e Sehova te kele ke tuʼu feia pe kae ke nofoʼi.’ (Esaia 45:18) ʼEi, neʼe ina fakatupu totatou kele ke maʼuli fiafia ai te tagata ʼo talu ai. (Lau ia Esaia 40:28; 42:5.) ʼE ha ʼi te ʼu sivi fakasienesia te kehe tokotahi ʼo te kele. Kotea tona tupuʼaga? He ʼe ko te kele pe ʼaia ʼe tahi ʼe feala ke maʼuli ai te tagata.

3. Kotea ʼae ʼe kehekehe ai te tagata mo te ʼu manu?

Hili te fakatupu e Sehova te kele, neʼe ina fakatupu ia meʼa maʼuli fuli. Neʼe ina ʼuluaki fakatupu te ʼu vao ʼakau pea mo te ʼu manu. Hili ia, ‘neʼe fakatupu e te ʼAtua te tagata ki tona pāki.’ (Lau ia Senesi 1:27.) He koʼe ʼe kehe tokotahi pe te tagata ia? He neʼe fakatupu tatou ki te pāki ʼo te ʼAtua. Ko tona fakaʼuhiga ʼe feala ke tou faʼifaʼitakiʼi ʼona kalitate, ohage ko te ʼofa mo te faitotonu. Neʼe ina toe fakatupu tatou mo te fealagia ʼae ke tou ako ni lea, mo leleiʼia te faipāki pea mo te musika. ʼE mole tou hage ko te ʼu manu he ʼe feala hatatou tauhi ki te totatou Tupuʼaga.

TA FAKALOLOTO

Ta vakaʼi ni fakamoʼoni neʼe mole ha feia pe te maʼuli pea ʼe moʼoni te Tohi-Tapu moka talanoa ki te fakatupu. ʼE ta toe vakaʼi anai te ʼu kalitate ʼa te tagata mo te ʼu ako ʼo ʼuhiga mo te ʼAtua.

4. Neʼe mole ha feia pe te maʼuli

Ka faʼu e te tagata he meʼa ʼo ina faʼifaʼitakiʼi te fakatupu ʼa te ʼAtua, pea ko ia ʼae ʼe vikiʼi. Kae ko ai koa ʼae ʼe tuha ke vikiʼi? Vakaʼi te ʼATA VITEO, pea fai te fehuʼi ʼaeni:

ʼATA VITEO: Tui Ki Te ʼAtua (2:43)

• Kotea neʼe faʼu e te tagata neʼe ina faʼifaʼitakiʼi ai te fakatupu ʼa te ʼAtua?

ʼE mahino ia, neʼe faʼu te api e he tahi. Kae ko ai ae neʼe ina faʼu ia meʼa fuli ʼo te natula? Lau ia Hepeleo 3:4, pea fai te ʼu fehuʼi ʼaeni:

• Kotea ʼae ʼe ke leleiʼia ʼi te natula?

• ʼE ke fakatui koa neʼe fakatupu e he tahi te ʼatulaulau pea mo meʼa fuli ʼi ai? Kotea tona tupuʼaga?

Kua ke iloʼi koa?

ʼI te jw.org, ʼe ke maʼu ai ni manatu mo ni ʼata ʼo ʼuhiga mo te faʼahi ʼaia ʼi te ʼu alatike “Évolution ou conception?” mo te “Points de vue sur l’origine de la vie.”

“Ko te ʼu api fuli neʼe faʼu e he tahi, kae ko ia ʼae neʼe ina faʼu ia meʼa fuli e ko te ʼAtua”

5. ʼE moʼoni te ʼu manatu Fakatohi-tapu ʼo ʼuhiga mo te fakatupu

ʼATA VITEO: Neʼe Fakatupu Koa Te ʼAtulaulau?—Kogaʼi ʼAta (3:51)

• ʼE ui koa ʼi te Tohi-Tapu neʼe fakatupu te kele mo meʼa maʼuli fuli ia ʼaho pe ʼe ono, ko tona fakauhiga ia hola pe ʼe 24?

• ʼI tau manatu la, ʼe moʼoni koa te ʼu manatu ʼe ui ʼi te Tohi-Tapu ʼo ʼuhiga mo te fakatupu? Kotea tona tupuʼaga?

Lau ia Senesi 1:1, pea fai te fehuʼi ʼaeni:

• ʼE ui e te kau popoto neʼe fakatupu e he tahi te ʼatulaulau. ʼE alu tahi koa tanatou manatu mo te vaega ʼaeni neʼe hoki ke lau mai?

ʼE feuiʼaki e ihi pe neʼe fakaʼaogaʼi e te ʼAtua te evolisio moʼo fakatupu ia meʼa maʼuli fuli. Lau ia Senesi 1:21, 25, 27, pea fai te ʼu fehuʼi ʼaeni:

• ʼE ui koa ʼi te Tohi-Tapu neʼe fakatupu e te ʼAtua he kiʼi eveeve, mo tuku ke liliu ko he ika, mo he manu lahi pea liliu leva ko he tagata? Peʼe ui ai koa neʼe ina fakatupu ia meʼa maʼuli fuli “o mulimuli ki onatou faahiga?”

6. ʼE kehe tokotahi pe te tagata ia

Neʼe fakatupu tatou e Sehova mo ni fealagia ʼe mole maʼu e te u manu. Lau ia Senesi 1:26, pea fai te fehuʼi ʼaeni:

• ʼE tou maʼu te fealagia ʼae ke tou ʼofa mo manavaʼofa. Koia, kapau neʼe fakatupu tatou ki te pāki ʼo te ʼAtua, pea kotea ʼe ha ai ʼo ʼuhiga mo ia?

MANATU TAFITO

Neʼe fakatupu e Sehova te ʼatulaulau pea mo meʼa maʼuli fuli.

Fehuʼi Fakamanatu

• Kotea ʼae ʼe ui ʼi te Tohi-Tapu ʼo ʼuhiga mo te ʼatulaulau?

• Neʼe tuku koa e te ʼAtua he kiʼi eveeve ke tuputupu moʼo faʼu ʼaki te ʼu meʼa maʼuli fuli? Pe neʼe fakatupu e te ʼAtua ia meʼa fuli?

• He koʼe ʼe fakaofoofo te fakatupu ʼo te tagata?

TE TAHI ʼU MANATU

Vakaʼi ni faʼifaʼitaki ʼe fakamoʼoni ai neʼe fakatupu e he tahi te natula.

“Qu’enseigne la nature ?” (Réveillez-vous ! septembre 2006)

Vakaʼi pe neʼe fakamahino feafeaʼi e he tamai ia te fakatupu ki tona kiʼi foha.

‘Neʼe Fakatupu e Sehova Ia Meʼa Fuli’ (2:37)

ʼE alu tahi koa te manatu ʼa te evolisio pea mo ʼae ʼa te Tohi-Tapu?

“Neʼe Fakaʼaogaʼi Koa e Te ʼAtua Te Evolisio?” (Alatike ʼi te jw.org)

Vakaʼi ʼi te ʼu sivi ʼa te kau popoto pe neʼe fakatupu ia meʼa maʼuli fuli pe neʼe natou ha feia pe.

Cinq questions à se poser sur l’origine de la vie (kaupepa lahi)

1. He koʼe ʼe tonu ke maʼuhiga kia koe te maʼuli?

He ʼe ko te maʼuli ʼe ko te meʼa ʼofa mai ia Sehova, tatatou Tamai fonu ʼi te ʼofa. ʼE ko ia “te matapuna ʼo te maʼuli,” ʼei neʼe ina fakatupu ia meʼa maʼuli fuli. (Pesalemo 36:9) “ʼE ko ia ʼae ʼe ina foaki ki te hahaʼi fuli te maʼuli, mo te manava pea mo te ʼu meʼa fuli pe.” (Gaue 17:25, 28) ʼE foaki mai e Sehova te ʼu meʼa ʼae ʼe ʼaoga ke ke maʼuli ai. Kae ʼe mole gata ai, ʼe ina loto ke ke maʼuli fiafia.—Lau ia Gaue 14:17.