Tauhi Kia Sehova ʼAki Te Loto Fiafia
“Ko te ʼu malaʼia fuli ʼaia ʼe haʼu anai kia te koe . . . ʼi tau mole kaugana ʼaē kia Sehova, tou ʼAtua, ʼo fakafiafia pea mo loto fiafia ʼo ʼuhiga mo te mahu ʼo te ʼu meʼa fuli.”—Teutalonome 28:45-47.
1. Koteā te fakamoʼoni ʼe tou maʼu ʼo ʼuhiga mo nātou ʼaē ʼe nātou kaugana kia Sehova ʼe nātou fiafia, ʼi te ʼu faʼahi fuli ʼe nātou kaugana kia te ia?
KO TE ʼu kaugana ʼa Sehova ʼe nātou fiafia, tatau aipe mokā ʼe nātou fai tona finegalo ʼi te lagi peʼe ʼi te kele. Neʼe kalaga fakafiafia te ʼu “fetuʼu ʼo te uhu” ʼi te fakatupu ʼo te kele, pea ʼe mahino ia ko te kau miliate ʼaselo ʼi te lagi neʼe nātou ‘fakahoko tana folafola’ ʼaki te fiafia. (Sopo 38:4-7; Pesalemo 103:20) Ko te ʼAlo ʼulu tokotahi ʼo Sehova, neʼe ko te “meʼa gāue faiva” fiafia ʼi selo pea neʼe ina leleiʼia ʼaupito te fai ʼo te finegalo ʼo te ʼAtua ʼi tana nofo ʼi te kele ʼaki te higoa ʼaē ko Sesu Kilisito. Pea tahi ʼaē, “ ʼuhi ko te fiafia ʼaē neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea mo heka ʼi te toʼomataʼu ʼo te hekaʼaga hau ʼo te ʼAtua.”—Tāʼaga Lea 8:30, 31; Hepeleo 10:5-10; 12:2.
2. Koteā ʼaē neʼe fakaʼiloga ʼaki ai pe ko te kau Iselaelite neʼe nātou maʼu te ʼu tapuakina pe ko ni ʼu malaʼia?
2 Neʼe ʼiloʼi e te kau Iselaelite te fiafia ʼi te temi ʼaē neʼe nātou fakafiafia ai te loto ʼo te ʼAtua. Kae koteā te meʼa neʼe hoko ʼi te temi ʼaē neʼe nātou talagataʼa ai kia te ia? Neʼe fakatokagaʼi age kia nātou, ʼo fēnei: “[Ko te ʼu malaʼia] ʼe tonu anai ke nofo ia te koe pea mo tou hākoga ohage ko he fakaʼiloga pea mo he fakamelomelo ʼo aʼu ki he ʼu temi ʼe mole honatou gataʼaga, koteʼuhi neʼe mole ke kaugana kia Sehova, tou ʼAtua, ʼaki te fakafiafia pea mo te loto fiafia ki te mahu ʼo te ʼu meʼa fuli. Pea ʼe mahino papau ia ʼe ke kaugana anai ʼi te pakupaku, pea mo te fia ʼinu, pea ʼi te telefua, pea ʼi te masiva ia meʼa fuli, ko tou ʼu fili ʼaē ʼe fekauʼi atu anai kia te koe e Sehova; pea, ʼe mahino papau ia, ʼe ina tuku anai te ʼakau toho ukamea ki tou kia, ʼo aʼu ki tana molehi ʼo koe.” (Teutalonome 28:45-48) Neʼe fakahā ʼaki e te ʼu tapuakina pea mo te ʼu malaʼia pe ko ai ia nātou ʼaē neʼe ko te kau kaugana ʼa Sehova. Ko te ʼu taʼi malaʼia ʼaia neʼe ko he fakamoʼoni ʼe mole tonu ke meʼa noaʼi te ʼu pelesepeto pea mo te ʼu fakatuʼutuʼu ʼa te ʼAtua, peʼe ke manukiʼi he tahi ia nātou. ʼUhi neʼe mole fia fakalogo te kau Iselaelite ki te ʼu fakatokaga ʼa Sehova ʼo ʼuhiga mo te fakaʼauha pea mo te ʼaunofo, neʼe liliu ia Selusalemi “ko te malaʼia ki te ʼatu ʼu puleʼaga fuli ʼo te kele.” (Selemia 26:6) Koia tou fakalogo ki te ʼAtua pea mo fakafiafia ʼi tona ʼofa. Ko te fiafia ʼe ko he tapuakina ʼaia ʼi te ʼu tapuakina lahi ʼa te ʼAtua neʼe maʼu ʼaki te aga faka lotu.
E Feafeaʼi Te Kaugana ʼAki “Te Loto Fiafia”
3. Koteā te mafu fakatātā?
3 Ko te kau Iselaelite neʼe tonu ke nātou kaugana kia Sehova “ ʼaki te fiafia pea mo te loto fiafia.” Pea ʼe tonu ke toe feiā pe ia ʼaho nei ki te ʼu kaugana ʼa te ʼAtua. Ko te fakafiafia ʼe “ko te fiafia; fonu ʼi te loto fiafia.” ʼE talanoa te Tohi-Tapu ki te mafu kae ko te mafu ʼaia ʼe mole manatu ia peʼe fakakaukau. (Ekesote 28:30) Ko tana gāue tāfito ʼe ina pamu te toto moʼo fakatuputupu te ʼu selule ʼo te sino. Kae ʼe lahi te ʼu faʼahi ʼe fakaʼaogaʼi ai te kupu ʼaē ko te mafu, ʼe talanoa te Tohi-Tapu ki te mafu fakatātā, ʼe mole gata ʼaki pe te ʼui ʼaē ko te tafitoʼaga ʼo te ʼofa, ʼo te ʼu meʼa ʼaē ʼe nātou uga tatou, pea mo te ʼu meʼa ʼaē ʼi totatou ʼatamai. Neʼe ʼui ʼe ina faka ʼuhiga “te koga tāfito ʼo te ʼu potu fuli ʼo te maʼuli, pea ʼe ina fakatātā te meʼa ʼaē ʼi te loto ʼo te tagata ʼaē ʼe ʼiloga ʼi te ʼu faʼahi kehekehe fuli ʼo tana ʼu gāue, ʼo te ʼu meʼa ʼaē ʼe holi kiai, ʼo te ʼu meʼa ʼaē ʼi tona loto, tana ʼu manatu, te ʼu meʼa ʼaē ʼe fakaʼamu kiai, tana ʼu fakatuʼutuʼu, tana ʼu fakakaukau, te ʼu meʼa ʼaē ʼe misi kiai, tona poto, tona mālama, tona faiva, te ʼu meʼa ʼe tui kiai pea mo te ʼu meʼa ʼaē ʼe fakakaukau kiai, te ʼu meʼa ʼe ina tāʼofi ʼi tona ʼatamai pea mo te meʼa ʼaē ʼe ina ʼiloʼi.” (Journal of the Society of Biblical Literature and Exegesis, 1882, pasina 67) Ko totatou mafu fakatātā ʼe faka ʼuhiga ki te ʼu meʼa ʼaē ʼi ʼotatou ʼu loto, ʼo kau ai la te fiafia.—Soane 16:22.
4. Koteā ʼe feala ke tokoni kia tatou ke tou tauhi kia Sehova ʼaki he loto fiafia?
4 Koteā ʼaē ʼe feala ke tokoni kia tatou ke tou kaugana kia Sehova ʼaki he loto fiafia? Ko he manatu ʼe lelei pea mo fakafetaʼi ki totatou ʼu tapuakina pea mo te ʼu pilivilesio ʼaē neʼe foaki e te ʼAtua ʼe ko he meʼa ʼaoga. Ohage la, ʼe feala ke tou manatuʼi ʼaki he loto fiafia te ʼu pilivilesio ʼaē ʼe tou fai ʼi te “tauhi taputapu” ki te ʼAtua moʼoni. (Luka 1:74) ʼE ʼi ai te pilivilesio ʼaē ʼe pipiki ki te fua ʼo te huafa ʼo Sehova ʼi totatou ʼuhiga ʼaē ko tatou ko te kau Fakamoʼoni. (Isaia 43:10-12) Ki te faʼahi ʼaia, ʼe feala ke tou hilifaki atu kiai, ko te fiafia ʼi te ʼiloʼi ʼaē ko tatatou muliʼi te Folafola ʼa te ʼAtua, ʼe leleiʼia tatou e te ʼAtua. Pea ʼe ko he meʼa fakafiafia ia te fakatapa ʼo te mālama fakalaumālie pea mo tokoni he tokolahi ke ʼōmai ki tuʼa mai te fakapōʼuli!—Mateo 5:14-16; vakaʼi ia 1 Petelo 2:9.
5. Koteā te matapuna ʼo te fiafia faka lotu?
5 Kae, ko te kaugana ʼaē kia Sehova mo te loto katoa ʼe mole pipiki pe ia ki he manatu ʼe ʼaoga. ʼE fua lelei kia tatou he manatu ʼe ʼaoga. Kae ko te fiafia faka lotu ʼe mole ko he meʼa ʼe tou fakatupu ʼaki pe te aga. ʼE ko he tahi ʼaia fua ʼo te laumālie ʼa Sehova. (Kalate 5:22, 23) Kapau ʼe mole tou maʼu te taʼi fiafia ʼaia, ʼe tonu ke tou fai ni ʼu fetogi moʼo tekeʼi he manatu peʼe ko he faʼahiga aga ʼe mole fakatafito ki te Tohi-Tapu ʼo feala ai ke fakamamahiʼi te laumālie ʼo te ʼAtua. (Efesi 4:30) Kae ʼi tatatou kua foaki totatou maʼuli kia Sehova, ʼaua naʼa tou tuʼania ʼi tatatou mole fiafia ʼi ʼihi temi, ʼo tou manatu ʼe mole ia tatou te ʼofa ʼo te ʼAtua. ʼE tou agahala pea ʼe tou tau mo te lotomamahi, ʼo toe feiā mo te lotovaivai ʼi ʼihi temi, kae ko Sehova ʼe mahino ki te meʼa ʼaē ʼi totatou loto. (Pesalemo 103:10-14) Koia tou kole tona laumālie maʼoniʼoni, ʼo tou manatuʼi ko te fiafia ʼe foaki e te ʼAtua. Ko totatou Tāmai ʼe ʼi selo ʼe ina tali anai te ʼu taʼi faikole ʼaia pea ʼe ina faka fealagia anai ke tou kaugana kia te ia ʼaki he loto fiafia.—Luka 11:13.
ʼI Te Temi ʼAē ʼe Puli Ai Te Fiafia
6. Kapau ʼe puli te fiafia ʼi tatatou kaugana ki te ʼAtua, koteā anai te meʼa ʼe tonu ke tou fai?
6 Kapau ʼe puli te fiafia ʼi tatatou tauhi, ʼe feala ke siʼisiʼi tatatou ʼu faiga ʼaē ki te kaugana kia Sehova peʼe ko te fakahā he aga heʼe agatonu kia te ia. Koia, ʼe ko he aga fakapotopoto pea mo lelei hatatou toe vakaʼi te ʼu meʼa ʼaē ʼe nātou uga tatou pea ke tou fai ni ʼu fetogi. Ke maʼu te fiafia ʼaē ʼe foaki e te ʼAtua, ʼe tonu ke tou kaugana kia Sehova ʼo mole gata ʼaki pe te ʼofa, kae ʼaki totatou loto katoa, totatou nefesi katoa, pea mo totatou ʼatamai katoa. (Mateo 22:37) ʼE mole tonu ke tou kaugana ʼaki te manatu ʼaē ke tou fakatatau ki niʼihi, he neʼe tohi fēnei e Paulo: “Kapau ʼe tou maʼuʼuli ʼaki te laumālie, tou haga haʼele fakalelei foki mo tatou ʼaki te laumālie. ʼAua naʼa tou liliu ʼo manatu pe kia kita totonu, ʼo fakatupu ʼaki ai ni ʼu loto fakataupiepie ia tatou, ʼo tou femānumānuʼaki pe ia tatou.” (Kalate 5:25, 26) ʼE mole tou maʼu anai te fiafia moʼoni mo kapau ʼe tou fia hā ki niʼihi peʼe tou loto ke vikiʼi tatou.
7. ʼE lava feafeaʼi hatatou toe fakatupu ʼo totatou loto fiafia?
7 ʼE tou fiafia mo kapau ʼe tou maʼuli ʼo mulimuli pe ki te fakapapau ʼaē neʼe tou fai kia Sehova. ʼI te temi ʼaē neʼe tou foaki ai totatou maʼuli ki te ʼAtua, neʼe tou muliʼi fakalelei te maʼuli faka Kilisitiano. Neʼe tou ako te Tohi-Tapu pea neʼe tou kau tuʼumaʼu ki te ʼu fono. (Hepeleo 10:24, 25) Neʼe tou fiafia ʼi tatatou kau ki te minisitelio. Kae, koteā ʼe hoko mo kapau kua siʼisiʼi tatatou fiafia? Ko te ako ʼo te Tohi-Tapu, ko te kau ki te ʼu fono, ko te kau ki te minisitelio—ʼio, ʼe maʼuhiga te ʼu meʼa fuli ʼaia ʼi te ʼu faʼahi fuli faka Kilisitiano—ʼe tonu ke nātou foaki ki totatou ʼu maʼuli he ʼaluʼaga tokalelei ʼi te faʼahi fakalaumālie pea mo toe fakatupu te ʼofa pea mo te loto fiafia ʼaē neʼe ia tatou ʼi te kamataʼaga. (Fakahā 2:4) Koia ʼe mole tou hage anai ko ʼihi ʼaē ʼe mole ia nātou te fiafia pea ʼe tonu ke foaki kia nātou he tokoni ʼi te faʼahi fakalaumālie. Ko te kau tagata ʼāfea ʼe nātou fiafia ʼi tanatou foaki ʼo te tokoni, kae ʼe tonu pe foki ke tou fakahoko takitokotahi te fakapapau ʼaē neʼe tou fai ki te ʼAtua. ʼE mole feala ki he tahi age ke ina fai te meʼa ʼaia maʼa tatou. Koia tou fai tatatou fakatonutonu ke tou muliʼi te meʼa māhani faka Kilisitiano moʼo fakahoko ʼo te meʼa neʼe tou foaki kia Sehova pea ke tou maʼu te fiafia moʼoni.
8. He koʼe koa ko he leʼo ʼo loto ʼe lelei ʼe maʼuhiga mo kapau ʼe tou fia loto fiafia?
8 Ke tou maʼu te fiafia ʼaē ʼe ko te fua ʼo te laumālie ʼo te ʼAtua, ʼe ʼaoga ke ʼi ai ia tatou he leʼo ʼo loto ʼe lelei. ʼI te fufū fualoa e te Hau ko Tavite tana agahala, neʼe lotomamahi. ʼIo, neʼe kua hage pe kia ia ʼe mole kei maʼuli, pea ʼe mahalope neʼe mahaki. ʼE ko he toe fakafimālie neʼe ina maʼu ʼi te temi ʼaē neʼe fakahemala pea mo vevete ai tana agahala! (Pesalemo 32:1-5) ʼE mole feala ke tou fiafia mo kapau ʼe tou lolotoga fufū he ʼu agahala mamafa. Ko te faʼahi ʼaia ʼe feala pe ke ina fakatupu hotatou maʼuli ʼe fihifihia. ʼE mahino ia, ʼe mole ko te faʼahiga maʼuli ʼaia ke tou maʼu ai te fiafia. Kae ko te kofesio pea mo te fakahemala ʼe nā foaki te fakafimālie pea mo toe foaki te loto fiafia.—Tāʼaga Lea 28:13.
ʼO Fakatalitali ʼAki Te Fiafia
9, 10. (a) Koteā te fakapapau neʼe foaki age kia Apalahamo, kae neʼe feafeaʼi te ʼahiʼahiʼi ʼo tana tui pea mo tana fiafia? (b) ʼE lava feafeaʼi ke tou maʼu he ako mai te ʼu faʼifaʼitaki ʼa Apalahamo, ʼa Isaake, pea mo Sakopo?
9 ʼE moʼoni neʼe tou maʼu te fiafia ʼi te temi ʼaē neʼe tou kamata akoʼi te ʼu fakatuʼutuʼu fakaʼatua kae ʼe toe faigataʼa pe foki te taupau ʼo te loto fiafia ʼi ni ʼu taʼu e fualoa. ʼE feala ke fakatātā te meʼa ʼaia ki te meʼa ʼaē neʼe hoko ki te tagata agatonu ko Apalahamo. Hili ʼaē ki tana fia sakilifisioʼi tona foha ko Isaake ʼuhi neʼe ko te fakatotonu ʼa te ʼAtua, neʼe fēnei te ʼui ʼa te ʼaselo kia te ia: “ ‘ ʼAki pe ia ʼau totonu,’ ko te ʼui ʼaia ʼa Sehova, ‘koteʼuhi neʼe ke fai te meʼa ʼaia pea neʼe mole ke fakafisi mai tou foha, tou foha ʼulu tokotahi, ʼe ʼau tapuakiʼi moʼoni anai ia koe pea ʼe ʼau faka tokolahi moʼoni anai tou hāko ke hage ko te ʼu fetuʼu ʼo te lagi pea ke hage ko te ʼu fisiʼi ʼone ʼaē ʼe ʼi te matatai, pea ʼe maʼu anai e tou hāko te matapā ʼo tona ʼu fili. ʼAki tou hāko ʼe tapuakina moʼoni ai anai te ʼatu ʼu puleʼaga fuli ʼo te kele, koteʼuhi neʼe ke fakalogo ki toku leʼo.’ ” (Senesi 22:15-18) ʼE mole he lotolotolua kiai, neʼe fiafia ʼosi Apalahamo ʼi te fakapapau ʼaia.
10 Neʼe feala pe ke ʼamanaki ia Apalahamo ko Isaake ko te “hāko” ʼaē neʼe fakapapau ki ai te ʼu tapuakina ki he temi ka haʼu. Kae ʼi te fakaʼalu ʼo te temi neʼe mole hoko he meʼa fakaofoofo ʼaki ia Isaake, neʼe feala ko te meʼa ʼaia ke ina ʼahiʼahiʼi te tui pea mo te fiafia ʼa Apalahamo pea mo tona famili. Ko te fakamoʼoni ʼo te fakapapau ʼa te ʼAtua ʼaē neʼe fai kia Isaake pea ki muli age ki tona foha ko Sakopo, neʼe fakaloto mālohi kia nātou, ko te haʼu ʼo te Hāko neʼe ʼamanaki ia ke hoko ki he temi ki ʼamuli, pea neʼe ko he meʼa neʼe tokoni kia nātou ke nātou taupau maʼu tanatou tui pea mo tanatou fiafia. Kae, ko Apalahamo, ko Isaake, pea mo Sakopo neʼe nātou mamate ka mole heʼeki nātou sio ki te fakahoko ʼo te ʼu fakapapau ʼa te ʼAtua ʼo ʼuhiga mo nātou, kae neʼe mole puli ia nātou te fiafia ʼi tonatou ʼuhiga ʼaē ko nātou ko te ʼu kaugana ʼa Sehova. (Hepeleo 11:13) ʼE toe feala pe ke tou kaugana kia Sehova ʼaki te tui pea mo te fiafia, ʼo tou fakatalitali ki te fakahoko ʼo tana ʼu fakapapau.
Fiafia Logope La Te Fakataga
11. He koʼe ʼe feala ke tou fiafia logope la te ʼu fakataga?
11 ʼI totatou ʼuhiga kaugana ʼa Sehova, ʼe feala ke tou kaugana kia Sehova ʼaki te loto fiafia, logope la ʼe tou mamahi ʼi te fakataga. Neʼe ʼui e Sesu manuʼia ia nātou ʼaē neʼe fakataga ʼuhi ko ia, pea neʼe ʼui fēnei e te ʼapositolo ko Petelo: “Koutou haga fakafiafia mokā hoko kia koutou te ʼu mamahi ʼa Kilisito, ke koutou fakafiafia pea mo koutou toe fonu ʼi te fiafia lolotoga te fakahā ʼo tona kolōlia, tatau aipe mo te laumālie ʼo te ʼAtua, ʼe nofo mo koutou.” (1 Petelo 4:13, 14; Mateo 5:11, 12) Kapau ʼe koutou lolotoga ʼutaki te fakataga pea mo mamahi ʼuhi ko te faitotonu, ʼe ia koutou te laumālie ʼo Sehova pea mo tona ʼofa, pea ʼe mahino papau ia ko te meʼa ʼaia ʼe ina fakatupu te fiafia.
12. (a) He koʼe ʼe feala ke tou felāveʼi mo te ʼu ʼahiʼahiʼi ʼaē ʼo te tui ʼaki te loto fiafia? (b) Koteā te ako maʼuhiga ʼe feala ke tou maʼu mai te meʼa neʼe hoko ki te Levite?
12 ʼE feala ke ia tatou te loto fiafia mokā ʼe tou felāveʼi mo te ʼu ʼahiʼahiʼi ʼaē ʼo te tui, koteʼuhi ko te ʼAtua ʼe ko totatou Nonoʼaga. ʼE ʼiloga lelei te faʼahi ʼaia ʼi te Pesalemo 42 pea mo 43. ʼO mole faʼa ʼiloʼi te tupuʼaga ʼo te faʼahi ʼaia, neʼe ko te tagata Levite neʼe tuʼutāmakiʼia. ʼI tana mole atolasio ʼi te sagatualio ʼo te ʼAtua, neʼe hage ia ko he tia ʼe fia ʼinu, peʼe ko he tia fafine, ʼe faka hahanu ki he moʼi vai ʼi he koga meʼa ʼe moamoa pea ʼe mole fua ai he meʼa. Neʼe “fia ʼinu” ia kia Sehova pea mo te pilivilesio ʼaē ke atolasio ki te ʼAtua ʼi Tona sagatualio. (Pesalemo 42:1, 2) Ko te ʼaunofo ʼaia ʼa te Levite ʼe tonu ke ina uga tatou ke tou fakahā he loto fakafetaʼi ʼo ʼuhiga mo tatatou kaugā gāue ʼaē mo te hahaʼi ʼa Sehova. Kapau ko te taʼi ʼaluʼaga ʼaia ohage ko he pilisoniʼi ʼuhi ko te fakataga ʼe mole ina faka fealagia ʼi he tahi temi ke tou kaugā gāue mo nātou, tou manatuʼi te ʼu temi fiafia ʼaē neʼe tou maʼu mo nātou ʼi te tauhi taputapu pea ke tou kole te kalitate ʼaē ko te lotoʼutaki, ke tou “fakatalitali ki te ʼAtua” ke ina toe fakatuʼu age tatou ke hoko atu tatatou gāue pea mo tana kau atolasio.—Pesalemo 42:4, 5, 11; 43:3-5.
“Koutou Tauhi Kia Sehova ʼAki Te Fiafia”
13. ʼE fakahā feafeaʼi e te Pesalemo 100:1, 2 ko te fiafia ʼe tonu ko he fakaʼiloga ʼaia ʼo tatatou tauhi ki te ʼAtua?
13 Ko te fiafia ʼe tonu ko he faʼahi maʼuhiga ʼo tatatou tauhi ʼaē ki te ʼAtua. Ko te meʼa ʼaia neʼe ʼiloga ʼi te hiva fakafetaʼi neʼe fai e te tagata fai pesalemo: “Koutou fai te ʼu kalaga ʼo te mālo kia Sehova, hahaʼi fuli ʼo te kele. Koutou tauhi kia Sehova ʼaki te fiafia. Koutou hū ki ai ʼaki he kalaga fakafiafia.” (Pesalemo 100:1, 2) Ko Sehova ʼe “ko te ʼAtua fiafia” pea ʼe loto ke maʼu e tana ʼu kaugana te fiafia, ke nātou fakahoko te ʼu maʼua ʼaē ʼo tanatou fakapapau ʼaē ki te ʼAtua. (1 Timoteo 1:11) Ko te hahaʼi ʼo te ʼatu ʼu puleʼaga fuli ʼe tonu anai ke nātou fakafiafia ia Sehova, pea ko tatatou ʼu fakavikiviki ʼe tonu anai ke mālohi, ohage ko te ‘kalaga fakafiafia’ ʼo te ʼu kautau ʼaē ʼe mālo. ʼUhi ko te tauhi ki te ʼAtua ʼe ko te meʼa ʼe fakatupu fakamokomoko, ʼe tonu anai ke ʼoloʼi atu kiai te fiafia. Koia, ko te tagata fai pesalemo neʼe ina uga te hahaʼi ke ʼōmai ki te ʼi henī ʼa te ʼAtua “ ʼaki he kalaga fakafiafia.”
14, 15. E feafeaʼi te fakapipiki ʼo te Pesalemo 100:3-5 ki te hahaʼi loto fiafia ʼa Sehova ia ʼaho nei?
14 Neʼe toe ʼui fēnei e te tagata fai pesalemo: “Ke koutou ʼiloʼi ko Sehova ko te ʼAtua. Ko ia ʼaē neʼe ina fakatupu tatou, ka mole ko tatou totonu pe. Ko tatou ko tana hahaʼi pea ko te ʼu ōvi ʼo tana gāueʼaga.” (Pesalemo 100:3) ʼUhi ko Sehova ʼe ko totatou Tupuʼaga, ko tatou ko te ʼu meʼa ʼa ʼana ohage ko te tagata tauhi ōvi ki ni ʼana ʼu ōvi. Koia ʼe tokaga lelei te ʼAtua kia tatou mokā ʼe tou fai he ʼu fakavikiviki fakafetaʼi kia te ia. (Pesalemo 23) ʼO ʼuhiga mo Sehova, neʼe toe hiva fēnei e te tagata fai pesalemo: “Koutou hū ki tona ʼu matapā ʼaki ni ʼu fakafetaʼi, ki tana ʼu malaʼe ʼaki ni ʼu fakavikiviki. Koutou fakafetaʼi kia te ia, koutou tapuakiʼi tona huafa. Heʼe ko Sehova ʼe agalelei; ko tona finegaloʼofa ʼe tuʼu ki he ʼu temi ʼe mole honatou gataʼaga.”—Pesalemo 100:4, 5.
15 Ia ʼaho nei, ko te hahaʼi ʼe loto fiafia mai te ʼatu ʼu puleʼaga kehekehe neʼe nātou hū ki te ʼu malaʼe ʼo te sagatualio ʼo Sehova, ke nātou fai ni ʼu fakafetaʼi pea mo ni ʼu fakavikiviki. ʼE tou tapuaki te huafa ʼo Sehova ʼaki te loto fiafia ʼi tatatou talanoa lelei tuʼumaʼu kia Sehova, pea ko tona ʼu kalitate lahi ʼe nātou uga tatou ke tou fakavikiviki kia te ia. ʼE agalelei ʼaupito, pea ko tona finegaloʼofa peʼe ko tona manavaʼofa ʼaē ki tana kau kaugana ʼe feala tuʼumaʼu pe ke nātou falala kiai, he hoholo aipe ki ni ʼu temi mole honatou gataʼaga. Ko te “taʼiake ki te tahi taʼiake,” ʼe haga fakahā aipe e Sehova tona ʼofa ʼaē kia nātou ʼe nātou fai tona finegalo. (Loma 8:38, 39) Koia ʼaē, ʼe mahino papau ia, ʼe ʼi ai te tupuʼaga tāfito ke tou “tauhi kia Sehova ʼaki te loto fiafia.”
Koutou Fiafia ʼi Te ʼAmanaki ʼAē ʼe Ia Koutou
16. Koteā te ʼu falalaʼaga pea mo te ʼu ʼamanaki ʼe feala ke fakafiafia ai te kau Kilisitiano?
16 Neʼe fēnei te faitohi ʼa Paulo: “Koutou fiafia ʼi te falala.” (Loma 12:12) Ko te kau tisipulo fakanofo ʼa Sesu Kilisito ʼe nātou fakafiafia ʼi te falala faka kolōlia ʼo ʼuhiga mo te maʼuli tuputupua ʼaē ʼi selo neʼe faka fealagia e te ʼAtua kia nātou ʼaki tona ʼAlo. (Loma 8:16, 17; Filipe 3:20, 21) Ko te kau Kilisitiano ʼaē ʼe nātou maʼu te ʼamanaki ke nātou maʼuʼuli heʼegata ʼi te Palatiso ʼi te kele, ʼe toe ia nātou pe foki te tafitoʼaga ʼo he loto fiafia. (Luka 23:43) ʼE ʼi ai te tupuʼaga ke fakafiafia te kau kaugana agatonu fuli ʼa Sehova ʼi te ʼamanaki ʼo te Puleʼaga, peʼe nātou kau ki te puleʼaga ʼo selo peʼe ko te maʼuli ʼi te kele. ʼE ko he tapuakina fakafiafia!—Mateo 6:9, 10; Loma 8:18-21.
17, 18. (a) Koteā ʼaē neʼe fakakikite ia Isaia 25:6-8? (b) Neʼe tonu ke fakahoko feafeaʼi ia ʼaho nei te lea faka polofeta ʼa Isaia, pea e feafeaʼi ʼapē hona fakahoko ki ʼamuli?
17 Neʼe toe fakakikite foki e Isaia te temi ka haʼu fakafiafia kia nātou ʼaē ʼe fakalogo. Neʼe ina tohi, ʼo fēnei: “Pea ʼe mahino papau ia ʼe fai anai e Sehova ʼo te ʼatu kautau, ʼi te moʼuga ʼaia, he kātoaga meʼa kai kua lelei tona loloʼi, he kātoaga ʼo he ʼu vino kua tuku ke toka tona veveli pea kua fakamaʼa he ʼu meʼa kai kua lelei tona loloʼi ʼaki ni ʼu hui ʼe gako, he ʼu vino kua tuku ke toka tona veveli, pea kua fakamaʼa. Pea ʼe mahino papau ia, ʼi te moʼuga ʼaia, ʼe ina fakaʼauhi te takafi ʼaē ʼe mafola ki te hahaʼi fuli, ʼo ina ʼaofiʼi nātou, pea ko te kie ʼaē neʼe lālāga ki te ʼatu ʼu puleʼaga fuli. ʼE ina fakaʼauha lelei anai te mate ke talu ai, pea ko totatou Tuʼi ʼAliki ko Sehova ʼe ina haga anai ʼo holoholoʼi te ʼu loʼimata ʼi te ʼu fofoga fuli pe. Pea ko te ufiufi ʼo tana hahaʼi, ʼe ina toʼo anai ʼi te kele katoa, heʼe ko Sehova totonu neʼe ina ʼui.”—Isaia 25:6-8.
18 ʼIo ko te lafeti fakalaumālie ʼaē ʼe tou kau kiai ia ʼaho nei ʼi totatou ʼuhiga kau atolasio ʼa Sehova ʼe ko he kātoaga fakafiafia. ʼIo, ko tatatou fiafia ʼe tauopeope mokā ʼe tou kaugana fakamalotoloto ki te ʼAtua, ʼi te kātoaga ʼo te ʼu meʼa lelei ʼaē ʼe tou ʼiloʼi fakatomuʼa ka ina foaki mai ʼi te mālama foʼou. (2 Petelo 3:13) ʼAki te sakilifisio ʼo Sesu, ʼe toʼo anai e Sehova “te kie” ʼaē ʼe ina ʼaofi ai te malamanei ʼuhi ko te agahala ʼa Atama. ʼE ko he meʼa fakafiafia mokā tou mamata anai ko te agahala pea mo te mate ʼe toʼo anai! ʼE ko he meʼa matamatalelei hatatou tali ia nātou ʼe fakatuʼuake neʼe tou ʼofa ai, ʼo mole toe ʼi ai leva te ʼu loʼimata, pea mo maʼuli ʼi te palatiso, pea ko te hahaʼi ʼa Sehova ʼe mole nātou toe lāuga anai kae ʼe nātou foaki anai te tali ki te ʼAtua ʼo ʼuhiga mo te fili lahi, ia Satana te Tevolo!—Tāʼaga Lea 27:11.
19. ʼE tonu anai ke feafeaʼi tatatou aga ʼo ʼuhiga mo te ʼu fakatuʼutuʼu ʼa Sehova ʼaē neʼe ina foaki kia tatou ʼaē ko tana kau Fakamoʼoni?
19 ʼE mole fonu koa ia koutou te fiafia pea mo te loto fakafetaʼi ʼi te ʼiloʼi ʼaē pe koteā ka fai anai e Sehova ʼo ʼuhiga mo tana ʼu kaugana? ʼIo, ko te ʼu taʼi ʼamanaki lahi ʼaia ʼe nātou lagolago tatatou fiafia! Pea tahi ʼaē, ko te tapuakiʼi ʼo tatatou ʼu falala, ʼe nātou fakahaga tatou ki totatou ʼAtua fiafia, ʼofa, manavaʼofa ohage pe ko te ʼu manatu ʼaenī: “Koʼeni, ʼe ʼi henī totatou ʼAtua. Neʼe tou falala kia te ia, pea ʼe ina hāofaki anai tatou. ʼE ʼi henī Sehova. Ke tou loto fiafia pea ke tou fakafiafia ʼi tana hāofaki.” (Isaia 25:9) ʼAki te ʼamanaki taulekaleka ʼaē ʼe tou maʼu, tou haga sio ki muʼa, pea ke tou faiga fakamalotoloto ʼo tauhi kia Sehova ʼaki totatou loto katoa.
ʼE Feafeaʼi Anai Hakotou Tali?
◻ ʼE lava feafeaʼi ke tou tauhi kia Sehova ʼaki he “loto fiafia”?
◻ Koteā te meʼa ʼe feala ke tou fai mo kapau ʼe puli ia tatou te fiafia ʼi tatatou kaugana ki te ʼAtua?
◻ He koʼe ʼe feala pe ke loto fiafia te hahaʼi ʼa Sehova logope la te ʼu fakataga?
◻ Koteā te ʼu tupuʼaga ʼaē ʼe tou fakafiafia ai ʼi totatou falala?
[Paki ʼo te pasina 17]
ʼAki te kau ki te ʼu faʼahiga ʼaluʼaga fuli ʼo te maʼuli faka Kilisitiano ʼe fakatuputupu anai totatou fiafia