Tou Faʼa Kātaki ʼi Te Gāue ʼo Te Taʼukai!
“Ko nātou ʼaē ʼe nātou to ʼaki te ʼu loʼimata ʼe nātou utu anai ʼaki he kalaga fakafiafia.”—Pesalemo 126:5.
1. He koʼe ʼe tonu ke tou “faikole ki te Aliki o te taukai, ke ina fekaui mai he kau gaue ki tana taukai” ia ʼaho nei?
ʼI TE ʼosi foli tuʼa tolu e Sesu Kilisito ia Kalilea ʼaki tana fai faka mafola, neʼe ina ʼui fēnei age leva ki tana kau tisipulo: “E lahi te taukai, kae e lavaki te kau gaue.” (Mateo 9:37) Neʼe toe feiā mo te ʼaluʼaga ʼi Sutea. (Luka 10:2) Mai tona ʼaluʼaga ʼaē neʼe hoko moʼoni te faʼahi ʼaia kua hili nei kiai teitei taʼu e 2 000, ʼe kua feafeaʼi ia ʼaho nei? ʼIo ʼi te taʼu ʼaenī kua ʼosi neʼe ko te toko 6 000 000 tupu kau Fakamoʼoni ʼa Sehova neʼe nātou faʼa kātaki ʼi te gāue ʼo te taʼukai fakatātā ʼi te lotolotoiga ʼo te hahaʼi ʼe toko 6 000 000 000 ʼi te malamanei, pea ko te tokolahi ia nātou ʼaia ʼe nātou “fakaofaofa pea mo ogosia o hage he u ovi e mole honatou tauhiovi.” Koia ko te tokoni ʼaē ʼa Sesu ke “faikole ki te Aliki o te taukai, ke ina fekaui mai he kau gaue ki tana taukai,” ʼe kei ʼaoga ʼi te temi nei ohage pe ko te ʼu sēkulō ki muʼa atu.—Mateo 9:36, 38.
2. He koʼe ʼe tokagaʼi tatou e te hahaʼi?
2 Ko Sehova ʼAtua, te Pule ʼo te taʼukai, neʼe tali ki te kole ʼaē ke fekauʼi mai he kau gāue e tokolahi. Pea ʼe ko he meʼa fakafiafia hakita kau ki te taʼukai ʼaia ʼe takitaki e te ʼAtua! Logola totatou tokosiʼi mo kapau ʼe tou fakatatau ki te hahaʼi ʼo te mālama ʼaenī, kae ʼe tokagaʼi tatou e te tuʼu ʼaenī ʼuhi ko tatatou kau mālohi ki te faka mafola ʼo te Puleʼaga pea mo fai ʼo ni ʼu tisipulo. ʼE lahi te ʼu fenua, ʼe nātou palalau tuʼumaʼu ai kia tatou ʼi te ʼu tala logo. ʼI te televisio mokā fakahā ai he tahi ʼe fisifisi ʼi he matapā, ʼe lagi ʼui atu aipe ʼe ko te kau Fakamoʼoni ʼa Sehova. Ei, ʼi te 21 sēkulō kua ʼiloʼi lelei tatatou taʼukai faka Kilisitiano.
3. (a) ʼE tou ʼiloʼi feafeaʼi neʼe tokagaʼi te faka mafola ʼo te Puleʼaga ʼi te ʼuluaki sēkulō? (b) He koʼe ʼe tou lava ʼui ʼe lagolago te kau ʼaselo ki totatou minisitelio?
3 Neʼe toe tokagaʼi ʼi te ʼuluaki sēkulō te faka mafola ʼo te Puleʼaga pea neʼe fakatagaʼi te kau faka mafola ʼo te logo lelei. Koia neʼe tohi fēnei ai e te ʼapositolo ko Paulo: “I taku manatu kua tuku ki muli e te Atua ia matou apositolo, o hage ko he hahai kua tautea ki te mate, he kua matou liliu [te kau ʼapositolo] ko he mataga ki te kau aselo mo te malama-nei pea mo te hahai.” (1 Kolonito 4:9) ʼE toe feiā mo tatou, ko te malamanei ʼe ina tokagaʼi totatou loto faʼa kātaki ʼi totatou ʼuhiga kau faka mafola ʼo te Puleʼaga logola te ʼu fakataga pea ʼe ko he faʼahi ʼe maʼuhiga ki te kau ʼaselo. ʼE ʼui fēnei ia Apokalipesi 14:6: “Nee au [te ʼapositolo ko Soane] mamata ki he tahi aselo nee lele i te lotomalie o te lagi. Nee ina too he [“logo lelei,” MN ] heegata ke fagonogono kia natou e nofo i te kelekele, ki te u puleaga, mo te u hako, mo te u lea pea mo te hahai fuape.” Ei, ʼe lagolago te kau ʼaselo ki totatou minisitelio—tatatou gāue taʼukai!—Hepeleo 1:13, 14.
‘ ʼE Fehiʼaʼinaʼi Anai’
4, 5. (a) Koteā te fakatokaga neʼe foaki e Sesu ki tana kau tisipulo? (b) He koʼe ‘ ʼe fehiʼaʼinaʼi’ te ʼu kaugana ʼa te ʼAtua ʼi te temi nei?
4 ʼI te fekauʼi ʼaē ʼo te kau ʼapositolo ʼa Sesu ke nātou fakahoko te gāue ʼo te taʼukai, neʼe nātou muliʼi tana fakatotonu ʼaē ke nātou “popoto o hage ko te gata pea [mo]. . . agalelei o hage ko te lupe.” Neʼe toe ʼui fēnei e Sesu: “Pea koutou tokaga ki te hahai; he natou tuku anai koutou ki te sanetolio pea e natou huipiʼi anai koutou i onatou sinakoka. E natou ave anai koutou kia mua o te u kovana mo te u hau uhi ko au, koteuhi ko he fakamooni ia kia natou pea mo te u puleaga pagani. . . . Pea e fehia anai te tagata fuape ia koutou uhipe ko toku huafa, kae ko ae e kataki anai ki te gataʼaga e mauli anai.”—Mateo 10:16-22.
5 Ia ʼaho nei ‘ ʼe fehiʼaʼinaʼi’ tatou koteʼuhi “e mauli te malama-nei katoa i te Kovi,” ia Satana te Tevolo ʼaē ko te fili lahi ʼo te ʼAtua pea mo Tana hahaʼi. (1 Soane 5:19) ʼE sioʼi e totatou ʼu fili tatatou tuputupu fakalaumālie kae ʼe mole nātou fakamoʼoni ko Sehova ʼaē ʼe ina fakahoko te faʼahi ʼaia. ʼE nātou sisio ki totatou maʼuli fīmālie pea mo tatatou malimali mokā tou kau fakafiafia ki te taʼukai. ʼE nātou punamaʼuli ki tatatou logo tahi! ʼIo ʼe lagi nātou fakamoʼoni kiai kae ʼaki he loto ʼutaki kovi mokā nātou folau ki he tahi fenua ʼo nātou sio ai ko te gāue ʼaē ʼe fai e te kau Fakamoʼoni ʼa Sehova ʼe tatau pe mo te gāue ʼaē neʼe nātou sio kiai ʼi tonatou fenua. ʼIo, ʼe tou ʼiloʼi ʼi tona lakaga tonu, ʼe mahino anai totatou ʼu fili kia Sehova, totatou tokoniʼaga pea mo te matapuna ʼo totatou logo tahi.—Esekiele 38:10-12, 23.
6. Koteā ʼaē ʼe tou ʼiloʼi papau mokā tou kau ki te taʼukai, kae koteā te ʼu fehuʼi ʼe malaga ai?
6 Neʼe foaki e te Pule ʼo te taʼukai ki tona ʼAlo ko Sesu Kilisito ia “te pule katoa i Selo mo te kelekele.” (Mateo 28:18) Koia ʼaē ʼe fakaʼaogaʼi ai e Sehova ia Sesu moʼo takitaki te taʼukai pea ʼe ina fai ʼaki te kau ʼaselo ʼi selo pea mo te kau fakanofo ʼo te “kaugana agatonu mo fakapotopoto” ʼi te kele. (Mateo 24:45-47; Fakahā 14:6, 7) Kae ʼe feafeaʼi hatatou tekeʼi te fakafeagai pea mo taupau tatatou fiafia mokā tou kātaki ʼo kau ki te taʼukai?
7. Koteā te manatu ʼaē ʼe tonu ke tou taupau maʼu mokā hoko he fakafeagai pea mo he fakataga?
7 Ka tou felāveʼi mo te fakafeagai peʼe ko te fakataga, tou kumi te tokoni ʼa te ʼAtua ke feala hatatou taupau te manatu ʼaē neʼe maʼu e Paulo. Neʼe ina tohi fēnei: “E matou foaki te tapuaki kae lea koviʼi matou; ka fakatagai matou, e matou kataki; ka fasituu mai kia matou, e matou fakavaivai.” (1 Kolonito 4:12, 13) ʼI ʼihi temi ʼe fetogi te aga ʼo totatou ʼu fili ʼuhi pe ko te taʼi manatu ʼaia pea mo tatatou fai fakapotopoto ʼo totatou minisitelio ki te hahaʼi.
8. Koteā te fakapapau ʼe tou maʼu ʼi te ʼu palalau ʼa Sesu ia Mateo 10:28?
8 ʼE mole tou lotovaivai ʼi tatatou kau ki te taʼukai logola totatou fakamatakuʼi ki te mate. ʼE tou lototoʼa ʼo faka mafola fakahāhā ia te logo ʼo te Puleʼaga. Pea ʼe tou lotomālohi ʼi te fakapapau ʼaenī neʼe fai e Sesu: “ ʼAua naʼa koutou manavasiʼi kia nātou ʼaē ʼe nātou tāmateʼi te sino ka mole feala ke nātou tāmateʼi te nefesi; ka ke koutou manavasiʼi kia ia ʼaē ʼe feala tana fakaʼauha te nefesi pea mo te sino ʼi te Seʼeni.” (Mateo 10:28, MN ) ʼE tou ʼiloʼi ko tatatou Tāmai ʼe ʼi selo ʼaē ʼe ina Foaki te maʼuli. ʼE ina fakapale ia te hahaʼi ʼaē ʼe agatonu kia te ia pea mo faʼa kātaki tuʼumaʼu ʼi te gāue ʼo te taʼukai.
Ko Te Logo ʼo ʼUhiga Mo Te Maʼuli
9. Neʼe tali feafeaʼi e ʼihi te ʼu folafola ʼa Esekiele, pea koteā ʼaē ʼe tatau ai mo te ʼu meʼa ʼaē ʼe hoko ʼi te temi nei?
9 ʼI te temi ʼaē neʼe fakahā mālohi ai e te polofeta ko Esekiele te ʼu logo ʼa Sehova ki “te ʼu puleʼaga agatuʼu”—ia te ʼu puleʼaga ʼo Iselaele pea mo Suta—ko ʼihi neʼe nātou logo leleiʼia te ʼu meʼa ʼaē neʼe talanoa kiai. (Esekiele 2:3) Neʼe ʼui fēnei e Sehova: “Koʼeni kua ke hage maʼa nātou ko he hiva faka laukau, ohage ko he tahi ʼe leʼo mālie pea mo poto lelei ʼi he tā ʼo he meʼa fai mahōlō.” (Esekiele 33:32) Logola neʼe nātou leleiʼia te ʼu palalau ʼa Esekiele, kae neʼe mole nātou fakaʼaogaʼi tana ʼu palalau. Koteā ʼaē ʼe lolotoga hoko ʼi te temi nei? ʼI te temi ʼaē neʼe lototoʼa ai te toe ʼo te kau fakanofo pea mo tonatou ʼu kaugā fagona ʼo tala te ʼu logo ʼa Sehova, ko ʼihi neʼe nātou leleiʼia te logo ki te ʼu tapuakina ʼo te Puleʼaga, kae mole nātou tali fakafiafia ʼo liliu ko ni ʼu tisipulo, pea mo kau ki te taʼukai.
10, 11. ʼI te vaelua ʼo te 20 sēkulō, koteā ʼaē neʼe fai moʼo fakahā te logo ʼo te maʼuli, pea koteā tona fua?
10 ʼI te tahi faʼahi, tokolahi neʼe nātou tali lelei te gāue ʼo te taʼukai pea mo nātou kau ki te tala ʼo te ʼu logo ʼo te ʼAtua. Ohage la, ʼi te ʼu fakatahi faka Kilisitiano mai te taʼu 1922 ki te 1928, neʼe tala fakalelei ai te ʼu fakamāu ki te tuʼu ʼo te ʼu faʼahiga meʼa agakovi ʼa Satana. Ko te ʼu logo ʼaia ʼaē neʼe fakahā ʼi te ʼu fakatahi neʼe toe tala ʼi te ʼu lātio. Ki muli age, neʼe tufa e te hahaʼi ʼa te ʼAtua ki te toko lauʼi miliona te ʼu nusipepa ʼe fakahā ai te ʼu fakamāu ʼaia.
11 ʼI te fakaʼosi ʼo te ʼu taʼu 1930, neʼe fai te tahi faʼahiga fagonogono—ko te ʼu faka mafola mo te ʼu pano. ʼI te kamata, neʼe tau e te hahaʼi ʼa Sehova te ʼu pano ʼe fakahā ai te ʼu akonaki ki te kaugamālie. Ki muli age, neʼe nātou tau te ʼu pano ʼaki te ʼu kupu tāfito ʼaenī “La religion est un piège et une escroquerie” pea mo “Servez Dieu et Christ, le Roi.” Neʼe tokagaʼi nātou e te hahaʼi mokā nātou haʼele ʼi te ala. Neʼe ʼui e te tēhina neʼe kau tuʼumaʼu ki te gāue ʼaia ʼi te ʼu ala logoaʼa ʼo Londres ʼi Pilitania: ‘Ko he faʼahi neʼe tupu ʼaki ai te tokagaʼi ʼo te kau Fakamoʼoni ʼa Sehova pea mo nātou lototoʼa ai.’
12. ʼAki te ʼu fakamāu ʼa te ʼAtua, koteā ʼaē neʼe tou fakatokagaʼi ʼi totatou minisitelio, pea ʼi te temi nei ko ai ʼaē kua fakatahi moʼo faka mafola ʼo te logo lelei?
12 Mokā tou tala te ʼu fakamāu ʼa te ʼAtua, ʼe tou toe fakatokagaʼi mo te ʼu lelei ʼo te Puleʼaga. Ko tatatou fagonogono lototoʼa ʼi te malamanei katoa, ʼe tokoni mai ki tatatou kumi ia te hahaʼi ʼaē ʼe tāu mo nātou te logo. (Mateo 10:11) ʼI te ʼu taʼu 1920 pea mo te ʼu taʼu 1930 neʼe kua teitei tali fuli pe ʼe te kau fakanofo te pāui ʼaē ʼo ʼuhiga mo te taʼukai. Koia, ʼi te fakatahi ʼi te 1935, neʼe ʼi ai te ʼu logo taulekaleka ki te ka haʼu manuʼia ʼi te palatiso ʼi te kele maʼa te “hahai kaugamalie” ʼo te “tahi ʼu ōvi.” (Apokalipesi 7:9; Soane 10:16, MN ) Neʼe nātou tokagaʼi te ʼu fakamāu ʼa te ʼAtua pea neʼe nātou fakatahi mo te kau fakanofo ki te faka mafola ʼo te logo lelei ʼe hāofaki ai te hahaʼi.
13, 14. (a) ʼE fakaloto mālohiʼi feafeaʼi tatou e te ʼu palalau ʼo te Pesalemo 126:5, 6? (b) Kapau ʼe tou haga to pea mo fakapala, koteā anai ka hoko?
13 ʼE fakaloto mālohi ʼaupito ki te kau gāue ʼo te taʼukai ʼa te ʼAtua, kae tāfito ia nātou ʼaē ʼe mamahi ʼi te fakataga, ia te ʼu palalau ʼaē ia Pesalemo 126:5, 6: “Ko nātou ʼaē ʼe nātou to ʼaki te ʼu loʼimata ʼe nātou utu anai ʼaki he kalaga fakafiafia. Ko ia ʼaē ʼe ʼalu ki tuʼa, māʼia peʼe tagi, ʼo ina ʼamo te taga ʼe fonu ko te pulapula, ʼe liliu moʼoni mai anai ʼaki he kalaga fakafiafia, ʼo ina ʼamo tana taga fulumeto.” Ko te ʼu palalau ʼa te tagata fai pesalemo ʼo ʼuhiga mo te to pea mo te utu, ʼe fakatā ki te tokaga pea mo te tapuakina ʼa Sehova ki te toe ʼo te kau Iselaele ʼaē neʼe nātou toe liliu mai tanatou ʼaunofo ʼi te Papiloni ʼāfea. Neʼe nātou fiafia lahi ʼi tonatou faka ʼāteaina ʼaia, kae lagi neʼe nātou fetāgihi ʼi tanatou tūtū te ʼu pulapula ki te kele neʼe tuku magemage ia taʼu e 70 ʼo tanatou ʼaunofo. Kae ko nātou ʼaē neʼe nātou haga tūtū tanatou ʼu pulapula pea mo fai tanatou ʼu gāue laga fale, neʼe nātou maʼu te ʼu fua pea mo te fiafia ʼi tanatou gāue.
14 ʼE lagi ʼe tou tagi mokā tou tau mo he ʼu fihifihia peʼe ka fakamamahiʼi tatou peʼe ko totatou ʼu kaugā fagona ʼuhi ko te faitotonu. (1 Petelo 3:14) ʼI tatatou taʼukai, ʼe lagi feala ke tou tau mo he temi faigataʼa koteʼuhi ʼe tou sio ʼe hage ʼe mole he fua ʼo tatatou ʼu faiga ʼi te minisitelio. Kae kapau ʼe tou haga to pea mo fakapala, ʼe fakatuputupu anai e te ʼAtua te ʼu pulapula ʼaia, ʼo lagi laka age ʼi te ʼu meʼa ʼaē neʼe tou fakaʼamu kiai. (1 Kolonito 3:6) ʼE fakatā lelei te faʼahi ʼaia ʼi te ʼu fua ʼo tatatou tufa te ʼu Tohi-Tapu pea mo te ʼu tohi faka Tohi-Tapu.
15. Koutou tuku mai he faʼifaʼitaki ʼo te ʼaoga ʼo te ʼu tohi faka Kilisitiano ʼi te taʼukai.
15 Tou vakaʼi te faʼifaʼitaki ʼo te tagata ʼe higoa ko Jim. ʼI te mate ʼo tana faʼe, neʼe ina maʼu ʼi tana ʼu meʼa ia te tohi ko tona kupu tāfito La vie : comment est-elle apparue ? Évolution ou création ?a Neʼe ina lau fakalelei. ʼI tana fai palalau mo te fafine Fakamoʼoni ʼi te ala, neʼe ina tali ke ʼaʼahi ia ia, pea neʼe fai ai mo tana ako. Neʼe vave ia te tuputupu ʼa Jim ʼi te faʼahi fakalaumālie, pea neʼe ina foaki tona maʼuli maʼa Sehova ʼo papitema. Neʼe palalau ki te ʼu meʼa ʼaē neʼe ina ako ki ʼihi ʼo tona famili. ʼAki tana fai ʼaia, neʼe liliu tona tokolua pea mo tona taʼokete ko te ʼu Fakamoʼoni ʼa Sehova, pea ki muli age neʼe ina maʼu te pilivilesio ʼaē ke gāue ʼi te Petele ʼi Londres.
Fakatagaʼi Kae Fiafia
16. (a) He koʼe neʼe fua lelei te taʼukai? (b) Koteā te fakatokaga neʼe fai e Sesu ʼo ʼuhiga mo te logo lelei, pea ʼe tonu ke tou feafeaʼi mokā tou felogoi mo te hahaʼi?
16 He koʼe ʼe fua lelei feiā te taʼukai? Koteʼuhi neʼe muliʼi e te kau fakanofo pea mo tonatou ʼu kaugā fagona ia te fakatotonu ʼaenī ʼa Sesu: “Ko te mea e au tala atu kia koutou i te fakapouli, koutou fakaha i te malama; pea ko te mea e koutou logo e fanafana ki outou taliga, koutou kalagai i te u fuga ato.” (Mateo 10:27) Kae ʼe feala pe ke hoko mai kia tatou he ʼu ʼahiʼahi he neʼe fēnei te fakatokaga ʼa Sesu: “E tukuʼage pe anai e te tehina tona tehina ki te mate, mo te tamai tana fanau, pea e malaga anai te u fanau o fakafehagai ki anatou matua pea e natou tamatei anai natou.” Neʼe toe ʼui fēnei e Sesu: “Aua naa koutou manatu, nee au haele mai o aumai te tokalelei ki te kelekele, nee mole au haele mai o aumai te tokalelei kae ko te heleta.” (Mateo 10:21, 34) Neʼe mole fia veteki e Sesu te ʼu famili. Kae ʼuhi ko te logo lelei ʼe feala ke hoko te faʼahi ʼaia. ʼE toe moʼoni te faʼahi ʼaia ki te ʼu kaugana ʼa te ʼAtua ia ʼaho nei. Mokā tou ʼaʼahi he ʼu famili, ʼe mole tou fakaʼamu ke nātou mavete. ʼE tou fakaʼamu ke tali e te hahaʼi fuli te logo lelei. Koia ʼaē, ʼe tou faiga ai ke tou felogoi mo te hahaʼi fuli ʼo he famili ʼaki he agalelei pea mo faka kaumeʼa ke fia logo ai ia nātou ʼaē ʼe “lotolelei ki te maʼuli heʼegata” ki tatatou logo.—Gaue 13:48, MN.
17. Neʼe feafeaʼi te makehe ʼo te hahaʼi ʼaē neʼe nātou lagolago ki te pule faʼitaliha ʼa te ʼAtua, pea koteā te faʼifaʼitaki neʼe hoko ʼo ʼuhiga mo te faʼahi ʼaia?
17 Ko te logo ʼo te Puleʼaga neʼe ina fakakeheʼi ia nātou ʼaē ʼe nātou lagolago ki te pule faʼitaliha ʼa te ʼAtua. Ohage la, tou tokagaʼi pe neʼe feafeaʼi te makehe ʼo totatou ʼu kaugā fagona ʼi te tui, ʼuhi ko tanatou ‘foaki te ʼu meʼa ʼa Sesale kia Sesale kae ko te ʼu meʼa ʼa te ʼAtua ki te ʼAtua’ ʼi te temi ʼaē ʼo te National-Socialisme ʼi Siamani. (Luka 20:25) Kae ʼo mole hage ko te kau takitaki lotu pea mo nātou ʼaē neʼe lau ko he kau Kilisitiano ʼo te ʼu ʼēkelesia ʼo te Keletiate, neʼe nofo agatonu te ʼu kaugana ʼa Sehova, ʼo mole nātou fia maumauʼi te ʼu pelesepeto ʼo te Tohi-Tapu. (Isaia 2:4; Mateo 4:10; Soane 17:16) ʼI te tohi The Nazi State and the New Religions (Te Puleʼaga nasi pea mo te ʼu lotu foʼou), neʼe fakatokaga fēnei e te fafine fai hisitolia ko Christine King: “Neʼe gata pe ki te kau Fakamoʼoni ʼaē neʼe nātou lava fakafeagai ki te puleʼaga [Nasi], heʼe māʼiape la tana matematehi ʼaē ʼo te toko lauʼi afe, kae neʼe hoko pe tanatou gāue, pea ʼi te māhina ʼo Maio 1945, neʼe kei tuʼu pe te kautahi ʼa te kau Fakamoʼoni ʼa Sehova, kae neʼe kua puli ʼosi te National-Socialisme.”
18. Neʼe feafeaʼi te aga ʼa te hahaʼi ʼa Sehova logola te fakataga?
18 ʼE moʼoni, neʼe maʼuhiga te aga ʼaē neʼe fakahā e te hahaʼi ʼa Sehova ʼi tanatou felāveʼi mo te fakataga. Neʼe feala ke malave ki te ʼu pule ia tatatou tui, pea neʼe nātou toe punamaʼuli ʼi tanatou sio ʼaē ʼe mole ia tatou te ʼita peʼe ko he lotokovi. Ohage la, ko te kau Fakamoʼoni ʼaē neʼe hāo mai te Holokoseta, mokā nātou fakamatala te ʼu meʼa ʼaē neʼe hoko kia nātou ʼe nātou fiafia pea mo fīmālie. ʼE nātou ʼiloʼi ko Sehova ʼaē neʼe ina foaki age kia nātou ia “te mālohi ʼaē ʼe laka age ʼi te mālohi māhani.” (2 Kolonito 4:7, MN ) Ko te kau fakanofo ʼaē kei maʼuʼuli mo tatou ʼi te kele ʼe nātou falala “kua tohi ʼo [nātou] ʼu higoa ʼi te lagi.” (Luka 10:20, MN ) ʼAki tonatou loto faʼa kātaki ʼe mole nātou lotomamahi ai, pea ʼe toe falala mo te kau gāue agatonu ʼo te taʼukai ʼaē ʼe nātou ʼamanaki maʼuʼuli ʼi te kele.—Loma 5:4, 5.
Tou Faʼa Kātaki ʼi Te Gāue ʼo Te Taʼukai
19. Koteā te ʼu faʼahiga fai lelei neʼe fakaʼaogaʼi ʼi te minisitelio faka Kilisitiano?
19 ʼE mole tou ʼiloʼi peʼe ko temi ʼe fia ʼe fakagafua ai anai e Sehova ke tou fai te taʼukai. ʼO talitali ki te temi ʼaia, ʼe tonu ke tou manatuʼi, ʼe mulimuli te kau gāue ʼo te taʼukai ki tanatou ʼu faʼahiga fai ʼo te gāue. ʼO toe feiā pe, ʼe feala ke tou ʼiloʼi papau ko te ʼu faʼahiga fai faka mafola ʼaē kua ʼahiʼahiʼi ʼe fua lelei anai mokā tou fakaʼaogaʼi lelei. Neʼe ʼui fēnei e Paulo ki tona ʼu kaugā fagona Kilisitiano: “E au kole atu kia koutou: koutou liliu ko oku faifaitaki.” (1 Kolonito 4:16) ʼI te temi ʼaē neʼe felāveʼi ai Paulo mo te ʼu tagata ʼāfea ʼo Efeso ʼi Mile, neʼe ina fakamanatuʼi age kia nātou tana mole tātāʼofi ʼo ia ʼi tana akoʼi nātou “ ʼi muʼa ʼo te hahaʼi pea mo te ʼu ʼapi.” (Gaue 20:20, 21, MN ) Ko te kaugā fagona ʼo Paulo ko Timoteo, neʼe ina ako te ʼu faʼahiga fai ʼa te ʼapositolo pea koia la ʼaē neʼe feala ai ke ina akoʼi age ki te kau Kolonito. (1 Kolonito 4:17) Neʼe tapuakiʼi e te ʼAtua te ʼu faʼahiga fai akonaki ʼa Paulo, pea ʼe feiā pe anai tana tapuakiʼi tatatou faʼa kātaki ʼi te faka mafola ʼo te logo ʼi muʼa ʼo te hahaʼi pea mo te ʼu ʼapi, ʼi te ʼu ʼaʼahi, ʼi te ʼu ako Tohi-Tapu, pea mo te ʼu faʼahi fuli ʼaē ʼe tou lava maʼu ai te hahaʼi.—Gaue 17:17.
20. Neʼe fakahā feafeaʼi e Sesu ʼe hoko anai he taʼukai lahi fakalaumālie, pea ʼi te ʼu taʼu ʼaenī neʼe hoko moʼoni feafeaʼi te faʼahi ʼaia?
20 ʼI tana ʼosi fagonogono ki te fafine Samalitana ʼi Sisale ʼi te 30 ʼo totatou temi, neʼe palalau Sesu ki te taʼukai fakalaumālie. Neʼe ina ʼui fēnei ki tana kau tisipulo: “Hiki ake ʼokotou mata pea ke koutou sisio ki te ʼu gāueʼaga, kua hihina ia ki te tānaki ʼo te taʼukai. Pea kua maʼu e te tagata tānaki taʼukai tona totogi pea ʼe ina tānaki ni ʼu fua ki te maʼuli heʼegata, ke fakafiafia fakatahi ai te tagata tūtū pulapula pea mo te tagata tānaki taʼukai.” (Soane 4:34-36, MN ) ʼE mahalo pe neʼe kua sio ia Sesu ki te fua ʼo tana felāveʼi mo te fafine Samalitana, he neʼe tokolahi te hahaʼi neʼe nātou tui kia te ia ʼuhi pe ko te fakamatala ʼa te fafine. (Soane 4:39) ʼI te ʼu taʼu ʼaenī, neʼe lahi te ʼu fenua neʼe toʼo ai te ʼu tapu ʼo ʼuhiga mo te kau Fakamoʼoni ʼa Sehova peʼe neʼe fakagafua tanatou gāue e te puleʼaga, ʼo avahi ai te ʼu telituale foʼou ki te taʼukai. Neʼe hoko ai te taʼukai lahi fakalaumālie ʼe lolotoga tuputupu nei. Ei, ʼi te malamanei, ʼe tou maʼu te ʼu tapuakina mokā ʼe tou haga kau fakafiafia ki te taʼukai fakalaumālie.
21. He koʼe ʼe ʼaoga ke tou faʼa kātaki ʼi totatou ʼuhiga kau gāue loto fiafia ʼo te taʼukai?
21 Ka kua momoho te ʼu fua pea ʼe tonu ke fakatoʼotoʼo te kau gāue ʼo tuʼusi mo tae. ʼE mole tonu ke nātou toe fakatalitali. ʼI te temi nei, ʼe tonu ke tou gāue fakalelei pea mo fakatoʼotoʼo heʼe tou maʼuʼuli ʼi “te temi fakaʼosi.” (Taniela 12:4) Ei, ʼe tou tau mo te ʼu ʼahiʼahi, kae kua lahi ʼaupito age te taʼukai ʼo te kau atolasio ʼa Sehova. Koia la ʼaē ʼe ko he ʼaho fakafiafia. (Isaia 9:3) Pea ʼi totatou ʼuhiga kau gāue loto fiafia, tou faʼa kātaki ʼo kau ki te taʼukai!
[Kiʼi nota]
a Neʼe tā pea mo tufa e te kau Fakamoʼoni ʼa Sehova.
ʼE Koutou Tali Feafeaʼi Anai?
• Neʼe tali feafeaʼi e te Pule ʼo te taʼukai ki te kole ʼaē ke fekauʼi mai he kau gāue e tokolahi?
• Logola totatou ‘fehiʼaʼinaʼi,’ koteā te manatu ʼaē ʼe tonu ke tou taupau maʼu?
• He koʼe ʼe tou fiafia tatau aipe peʼe fakatagaʼi tatou?
• He koʼe ʼe tonu ke tou faʼa kātaki ʼo fakatoʼotoʼo ki te taʼukai?
[Paki ʼo te pasina 16, 17]
ʼE tokoni te kau ʼaselo kia nātou ʼaē ʼe nātou kau ki te taʼukai fakalaumālie
[Paki ʼo te pasina 18]
Neʼe logo te tokolahi ki te logo ʼo te Puleʼaga ʼaki te faka mafola mo te ʼu pano
[Paki ʼo te pasina 18]
ʼE tou to pea mo fakapala kae ko te ʼAtua ʼaē ʼe ina fakatuputupu