Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• E feafeaʼi he liliu ʼo te “fealagia fakakaukau” ko he hāofakiʼaga? (Tāʼaga Lea 1:4)

ʼE ina fakatokagaʼi mai te ʼu tuʼutāmaki ʼaē ʼe feala ke felāveʼi mo tatou ʼi te faʼahi fakalaumālie pea ina uga tatou ke tou fai he fakatuʼutuʼu lelei, ohage la ko te fakamamaʼo mai te ʼu fakahala ki he ʼu felāveʼi fakasino ʼi te gāue. ʼE tokoni mai kia tatou ke tou mahino ko totatou ʼu tēhina Kilisitiano ʼe nātou heʼe haohaoa, pea ʼe tokoni mai ke ʼaua naʼa tou hoko ʼoho mokā tou mamahi ʼi he aga ʼa he tahi. ʼE ina toe faka fealagia mai pe foki ke tou fakamamaʼo mai te ʼu faiga fakavale ki te ʼu koloā ʼaē ʼe feala ke ina fakahiga tatou ʼi te faʼahi fakalaumālie.​—15/8, pasina 21 ki te 24.

• E feafeaʼi hakita lava liliu ko he kāiga lelei?

Ko aga e lua ʼe feala ai ke kita liliu ai ko he kāiga lelei, ke kita poto ʼi te foaki pea mo kita poto ʼi te fakamālo ki he meʼa neʼe foaki mai. ʼE ʼaoga tāfito he kāiga lelei mokā hoko mai he tuʼutāmaki. ʼE faigaʼi e te kau Fakamoʼoni ʼa Sehova ke nātou aga faka kāiga ʼo nātou fakatokaga ki te hahaʼi ʼo ʼuhiga mo te meʼa ka ʼamanaki hoko, ia te fakagata ʼo te agakovi e te ʼAtua.​—1/9, pasina 4 ki te 7.

• ʼI te fakamatala ʼa te Tohi-Tapu, ko ai koa te kau sagato moʼoni, pea ʼe nātou tokoni feafeaʼi anai ki te malamanei?

Ko te ʼu ʼuluaki Kilisitiano fuli neʼe ko te kau sagato moʼoni, peʼe ko he kau maʼoniʼoni, neʼe fakaliliu feiā ia nātou e te ʼAtua, kae neʼe mole ko he gāue ʼa te tagata peʼe ko he ʼu kautahi. (Loma 1:7) ʼI tonatou ʼosi fakatuʼuake ki te maʼuli ʼi te lagi, ʼe kau fakatahi anai ia te kau maʼoniʼoni mo Kilisito ki te tapuakina ʼo te kau agatonu ʼi te kele. (Efeso 1:​18-​21)​—15/9, pasina 4 ki te 7.

• Koteā te ʼaoga ʼo te ʼu faigaoʼi ʼi te fenua Keleka ʼo te temi muʼa ki te kau Kilisitiano?

ʼE fakaʼaogaʼi e te ʼu tohi ʼa te ʼu ʼapositolo ko Petelo mo Paulo te ʼu faʼifaʼitaki ʼe faka ʼuhiga ki te ʼu faigaoʼi ʼo te temi muʼa. (1 Kolonito 9:​26; 1 Timoteo 4:7; 2 Timoteo 2:5; 1 Petelo 5:​10) Ki he tagata faigaoʼi ʼo te temi muʼa, neʼe maʼuhiga ke ʼi ai hona tagata ako faigaoʼi ʼe lelei, ke poto ʼi te lolomi ʼo ia totonu, pea ke ina ʼaveʼave fakalelei tana ʼu faiga. ʼE toe feiā pe mo te ʼu faiga fakalaumālie ʼa te kau Kilisitiano ʼi te temi nei.​—1/10, pasina 28 ki te 31.

• ʼO ʼuhiga mo te akoʼi ʼo te fānau ʼi he tahi fenua, koteā koa te ʼu faigataʼaʼia pea mo tona ʼu fakapale?

Tokolahi te tamaliki ʼe vave age tanatou ʼiloʼi he lea foʼou ʼi tanatou ʼu mātuʼa, ʼaē ʼe lagi faigataʼa hanatou mahino ki te fakakaukau pea mo te aga ʼo tanatou fānau. Pea ʼe lagi mole mahino gafua ia te fānau ki te ʼu akonaki faka Tohi-Tapu ʼi te lea ʼo tanatou ʼu mātuʼa. Kae ʼe feala ke fakamālohiʼi te ʼu noʼo ʼo te famili mokā ʼe akoʼi e te ʼu mātuʼa tanatou lea ki tanatou fānau, ʼaē ʼe feala ai kia nātou ʼaia ke nātou ʼiloʼi ai he ʼu lea e lua pea mo nātou māhani leva mo te ʼu agaaga kehekehe e lua.​—15/10, pasina 22 ki te 26.

• He koʼe koa ʼe maʼuhiga te akoʼi ʼo te faifakalelei?

Ko he faifakalelei fakamalotoloto ʼe ina tautau fakatokatoka he felogoi neʼe kua kovi. ʼE tuku mai e te Tohi-Tapu te ʼu faʼifaʼitaki ʼo te ʼu fua lelei ʼo te faifakalelei. (1 Samuele 25:​2-​35; Gaue 23:​1-5) Ko te meʼa ʼe tautau hoko, mokā tokakovi he toko lua, ʼe nā tauʼaki hala toko lua. Koia ʼe tonu ai ke nā fefakatokatokaʼaki pea mo fefaifakaleleiʼaki.​—1/11, pasina 4 ki te 7.

• He koʼe koa ʼe kovi te gaoʼi paʼaga, tatau aipe peʼe veliveli te falā ʼaē ʼe fakaʼaogaʼi ki te gaoʼi?

Ko te gaoʼi paʼaga ʼe ina fakaneke te tahi manatu pe kia kita, mo te manatu fakataupiepie, pea mo te mānumānu, pea ʼe ko he ʼu aga ʼe tapuʼi e te Tohi-Tapu. (1 Kolonito 6:​9, 10) Tokolahi te kau gaoʼi paʼaga ʼaē ʼe nātou manako ʼaupito ki te gaoʼi ʼaia, neʼe nātou kamata te faʼahi ʼaia kae neʼe kei nātou liliki, ʼo nātou gaoʼi ki he falā veliveli.​—1/11, pasina 31.

• Kapau ʼe lahi te ʼu tohi ʼo te Tohi-Tapu neʼe tohi ki te faka Keleka, he koʼe koa ʼe tonu ke toe fakaliliu te Tohi-Tapu ki te faka Keleka, pea neʼe koteā tona ʼu ikuʼaga?

ʼE kehe te faka Keleka ʼo te temi nei pea mo te faka Keleka ʼaē neʼe fakaʼaogaʼi ki te fakaliliu ʼo te ʼu Tohi Faka Hepeleo ʼaē ko te Septante, pea mo te faka Keleka ʼi te Tauhi Foʼou. Lolotoga te ʼu sēkulō neʼe lahi ʼaupito te ʼu faiga moʼo fakaliliu he koga peʼe ko te Tohi-Tapu katoa ki te faka Keleka ʼaē ʼe lea kiai te hahaʼi. ʼI te temi nei, ʼe maʼu te ʼu fakaliliu kehekehe ʼo te Tohi-Tapu e 30 ʼi te lea Faka Keleka, peʼe katoa peʼe fakakoga, ʼe feala hona lau e he tagata pe, pea ʼi te ʼu fakaliliu Tohi-Tapu ʼaē ʼe lelei ʼaupito, ʼe kau ai Les Saintes Écritures — Traduction du monde nouveau, ʼaē neʼe tā ʼi te 1997.​—15/11, pasina 26 ki te 29.

• He koʼe koa ʼe mole fakamaʼua te totogi ʼo te time ki te kau Kilisitiano?

ʼI te Lao ʼaē neʼe foaki ki Iselaele, ko te totogi ʼo te time neʼe ko he puleʼaki moʼo taupau ʼo te maʼuli ʼo te telepi ʼo Levi pea mo nātou ʼaē neʼe māsisiva. (Levitike 27:30; Teutalonome 14:28, 29) Neʼe fakagata e te mate faka sakilifisio ʼa Sesu ia te Lao pea mo tona fakamaʼua ʼaē ke totogi te time. (Efeso 2:​13-​15) ʼI te ʼuluaki kokelekasio, neʼe ko te fakatuʼutuʼu, ke tahi foaki e te Kilisitiano ʼo mulimuli ki te meʼa ʼaē neʼe ina maʼu pea mo te meʼa ʼaē neʼe kua ina fakatuʼutuʼu ʼi tona loto. (2 Kolonito 9:​5, 7)​—1/12, pasina 4 ki te 6.

• ʼE fakahā koa e Apokalipesi 20⁠:​8, ʼi te ʼahiʼahi fakaʼosi, ʼe hahaʼi ʼaupito anai ia nātou ʼaē ka fakahēʼi e Satana?

ʼE ʼui e te vaega ʼaia ko nātou ʼaē ka fakahēʼi ʼe nātou hage anai “ko te ʼone ʼo te tai.” ʼI te Tohi-Tapu, ʼe tau faka ʼuhiga te kupuʼi palalau ʼaia ki he meʼa ʼe lahi ʼaupito, kae mole faka ʼuhiga ki he meʼa ʼe lahi ke feafeaʼi. Ko te hōloga ʼo Apalahamo, ʼaē neʼe tonu ke hage “ko te ʼu fisiʼi ʼone ʼaē ʼi te matatai,” neʼe liliu ko te toko 144 000 hahaʼi, pea mo Sesu Kilisito. (Senesi 22:17; Apokalipesi 14:1-4, MN )​—1/12, pasina 29.