“Te ʼu Aka ʼe Molemo Feala Hona Taʼaki”
ʼI TE ʼu meʼa maʼuli ʼo te kele ʼaē ʼe laulahi ʼaupito pea mo ʼāfea ʼosi, ʼe tou maʼu te ʼu fuʼu ʼakau ʼaē ko te ʼu sekoia ʼo Californie. Ko te ʼu fuʼu ʼakau ʼaia ʼaē ʼe fakaofoofo tanatou māʼoluga, ʼe feala ke aʼu kia meta e 90 tona lahi mokā kaku ki tona temi ʼaē ʼe kua matuʼa ai pea ʼe feala ke maʼuli ia taʼu e 3 000 tupu.
Logope la te fakaofoofo ʼo te sio ʼaē ki te sekoia, ko te gāue ʼo tona ʼu aka ʼaē ʼe ū, ʼe toe fakaofoofo pe foki. Ko te ʼu aka ʼo te sekoia ʼe feala ke nātou ʼaofi he koga meʼa ko tona laulahi ko te ēketa e 1,2 peʼe 1,6. Ko te toe gāue ʼaia ʼo te ʼu aka ʼe ina faka fealagia ke maʼu te tuʼu ʼo te fuʼu ʼakau tatau aipe mokā hoko he ʼu tulivio pe ko ni ʼu matagi lalahi. ʼE toe feala pe foki ki te sekoia ke haga tuʼu aipe logope la he mafuike mālohi!
Neʼe fili e te Hau ko Salomone te faʼahiga gāue mālohi ʼo te ʼu aka ʼo he fuʼu ʼakau moʼo fai ʼaki hana fakatā ʼi tana tāʼaga lea. Neʼe ina ʼui ʼo fēnei: “ ʼE mole ʼi ai he tagata ʼe fakatuʼu anai ʼaki te agakovi, kae ko te hahaʼi ʼaē ʼe agalelei ʼe ʼi ai tanatou ʼu aka ʼe mole feala ke taʼaki.” (Tāʼaga Lea 12:3, The New English Bible) ʼIo, ko te kau agakovi ʼe mole nātou tuʼu mālohi. Ko he faʼahiga mālo pe ʼe hage mai ʼe nātou maʼu, ʼe faka temi pe ia, koteʼuhi ʼe fakapapau e Sehova “ko te ʼamanaki ʼo te kau agakovi ʼe mole anai ia.”—Tāʼaga Lea 10:28.
ʼE ko he fakatokaga ia kia nātou ʼaē ʼe nātou ʼui ko nātou ko te kau Kilisitiano, he neʼe ʼui e Sesu ko ʼihi ʼe mole ʼi ai anai honatou ʼu “aka” pea ʼe nātou fetōkaʼi anai. (Mateo 13:21) Tahi ʼaē meʼa, neʼe tohi e te ʼapositolo ko Paulo ʼo ʼuhiga mo te hahaʼi ʼaē ʼe liliu anai ʼo “ ʼe fetafeaʼaki pea mo feʼāveʼaki e te matagi ʼo te ʼu akonaki loi.” (Efesi 4:14) ʼE lava feafeaʼi ke mole hoko te faʼahi ʼaia?
Ohage pe ko te ʼu aka ʼo te sekoia ʼaē ʼe mafola ʼaupito ʼi te kele ʼaē ʼe lelei, ʼe ʼaoga ki ʼotatou ʼu ʼatamai pea mo ʼotatou ʼu loto ke lahi tanatou kumi te Folafola ʼa te ʼAtua pea mo toʼo mai ai tana vai ʼaē ʼe ina foaki te maʼuli, ke tou fīmālie ai. Ko te faʼahi ʼaia ʼe tonu ke ina uga mālohi tatou ke tou fakatuputupu he tui ʼe tuʼu mālohi tona ʼu aka. ʼE mahino papau ia, ʼe tou logoʼi anai te ʼu fua ʼi he ʼu ʼahiʼahi faigataʼa ʼaupito. ʼE toe feala pe foki ke tou matataku mokā hoko te fakafeagai, ohage pe ko te feueueʼaki ʼo he fuʼu ʼakau. Kae kapau ʼe lelei te fakatafito ʼo tatatou tui, ʼe tou fakahā anai ko ʼotatou ʼu “aka ʼe molemo feala hona taʼaki.”—Vakaʼi ia Hepeleo 6:19.