ʼE Hage Koa Takotou ʼu Palalau Ko He Heletā Peʼe Ko He Faitoʼo?
ʼI TE ʼu temi faigataʼa ʼaenī ʼe mole ko he meʼa fakapunamaʼuli ki te kua tokolahi ʼo te hahaʼi ʼaē “ ʼe lavea tonatou loto” pea mo “taʼomia tonatou laumālie.” (Pesalemo 34:18) Koia ohage ko tona hā mai ʼi te ʼu palalau ʼo te ʼapositolo ko Paulo, ʼe ʼaoga tuʼumaʼu ke tou “fai he ʼu palalau fakaloto fīmālie kia nātou ʼaē ʼe vaivavai.” (1 Tesalonika 5:14) Kae e feafeaʼi mo kapau ʼe hala mai he tahi kia tatou peʼe ina fai mai he meʼa ʼe kovi ʼaupito? ʼI te ʼaluʼaga ʼaia, lagi ʼe tou manatu ʼe tonu ke tou fakatonutonuʼi ia ia. Kae ʼe tonu ke tou tokakaga. Ko te fai tokoni, tatau aipe peʼe tonu ke fai, kae ʼe feala ke fakatupu kovi mokā fai ʼaki he aga fefeka. ʼE ʼui fēnei ia Tāʼaga Lea 12:18: “ ʼE ʼi ai ia ia ʼaē ʼe palalau vale ohage ko he ʼu tā ʼe fai ʼaki he heletā.”
Koia, ka tou fia fakatonutonuʼi he tahi peʼe tou fakatokatoka he fihi, ʼe maʼuhiga ʼaupito ke tou manatuʼi te lua koga ʼaenī ʼo Tāʼaga Lea 12:18: “Ko te ʼalelo ʼo te kau popoto ʼe ko he faitoʼo ia.” Koutou fai tuʼumaʼu kia koutou te fehuʼi ʼaenī, ‘Kapau ʼe tonu ke fakatonutonuʼi ʼau, pea ʼe ʼau loto ke feafeaʼi tona fai?’ Ki te tokolahi ia tatou ʼe lave lelei age te ʼu fakaloto mālohi ʼi te ʼu valoki. Koia koutou fai he ʼu palalau fakavikiviki. Lagi ko te faʼahi ʼaia ʼe ina uga anai ia ia ʼaē neʼe agahala atu kia koutou ke ina fetogi tana aga, pea ʼe loto fakafetaʼi anai ki te ʼu tokoni ʼaē ka koutou fai age ki ai.
ʼE ko he meʼa maʼuhiga ke mālū tatatou ʼu palalau! Ko te ʼu palalau ʼaē ʼe hage ko he faitoʼo, ʼe malave anai kia ia ʼaē ʼe fakalogo kiai, ohage ko tona ʼui e te tagata fai pesalemo: “Kapau ʼe tāʼi ʼau e te agatonu pea ʼe ko he lotoʼofa ia; pea kapau ʼe ina fakatonutonuʼi ʼau, ʼe ko he lolo anai ia ki te ʼulu, pea ʼe mole fakafisi anai kiai toku ʼulu.”—Pesalemo 141:5.