Te ʼu Meʼa ʼAē ʼe Tonu Ke Tou Hola Mai Ai

“Faga ʼuhiʼi gata, ko ai ʼaē neʼe ina ʼui atu kiā koutou ke kotou feholaki ʼi te hauhau ʼaenī ʼe haʼu?”—MAT. 3:7.

1. Ko ai te ʼu hahaʼi ʼe fakahā ʼi te Tohi-Tapu neʼe natou feholaki?

KOTEĀ takotou manatu mokā kotou logo ki te kupu “feholaki”? ʼE lagi ko ʼihi ʼe natou manatu ki te hola ʼaē ʼa te tama tūpulaga ko Sosefo mai te ʼu fakahala ʼa te ʼohoana ʼo Potifale. (Sen. 39:7-12) Ko ʼihi, ʼe lagi natou manatu ki te ʼu Kilisitiano ʼaē neʼe feholaki mai Selusalemi ʼi te taʼu 66 ʼo totatou temi, ʼi tanatou fakalogo ki te fakatokaga ʼaenī ʼa Sesu: “Kā kotou sisio anai ʼe takatakai ia Selusalemi e he ʼu kautau neʼe fakaʼapitaki-tau, pea . . . ko nātou ʼaē kā nonofo anai ʼi Sutea, ke natou feholaki ki te ʼu moʼuga, pea ko nātou kā nonofo anai ʼi tona lotolotoiga ke natou mavae mai ai.”—Luka 21:20, 21.

2, 3. (a) Neʼe koteā te fakaʼuhiga ʼo te palalau ʼaē neʼe fai e Soane Patita ki te kau takitaki lotu? (b) Neʼe fakamālohiʼi feafeaʼi e Sesu ia te fakatokaga ʼaē kua fai e Soane?

² Ko te ʼu faʼifaʼitaki ʼaē neʼe tou talanoa kiai neʼe tonu ke natou feholaki moʼoni. Iā ʼaho nei, ki te kau Kilisitiano moʼoni teitei pē ʼi te mālamanei kātoa, ʼe maʼuhiga ʼaupitō kiā nātou ke natou feholaki. Neʼe fakaʼaogaʼi e Soane Patita ia te kupu “feholaki” ʼo ʼuhiga mo te faʼahi ʼaia. Iā nātou ʼaē neʼe ʼomai kiā Soane, neʼe kau ai te kau takitaki Sutea ʼaē ʼe natou lau ʼe natou faitotonu pea ʼi tanatou manatu neʼe mole ʼaoga ia ke natou fakahemala. Neʼe natou manukinuki ki te hahaʼi fakalogo ʼaē neʼe papitema moʼo fakahā ia tanatou kua fakahemala ki tanatou ʼu aga ʼāfea. ʼAki he lototoʼa, neʼe fakahā lelei e Soane ki te kau takitaki mālualoi ʼaia: “Faga ʼuhiʼi gata, ko ai ʼaē neʼe ina ʼui atu kiā koutou ke kotou feholaki ʼi te hauhau ʼaenī ʼe haʼu? Kotou fakatupu te fua ʼaē ʼe gali mo te fakahemala.”—Mat. 3:7, 8.

³ Neʼe mole fakaʼuhiga ia te palalau ʼa Soane ki hata feholaki moʼoni mai he meʼa. Neʼe ina fakatokaga te kau Sutea ʼo ʼuhiga mo te hoko mai ʼo te tautea, te ʼaho ʼo te hauhau; pea neʼe ina fakahā ki te kau takitaki lotu mo kapau ʼe natou fia hao ʼi te ʼaho ʼaia, ʼe tonu anai ke natou fakatupu ia te fua moʼo fakamoʼoni ʼaki tanatou fakahemala. Ki muli age, ʼaki he lototoʼa neʼe tauteaʼi e Sesu te aga ʼa te kau takitaki lotu, pea ko tanatou aga fakapō neʼe natou fakahā ai ko te Tēvolo neʼe ko tanatou tamai totonu ʼaia. (Soa. 8:44) ʼO ina toe fakamālohiʼi age ia te fakatokaga ʼuluaki ʼaē neʼe fai e Soane, neʼe higoaʼi e Sesu ia nātou ko te “faga ʼuhiʼi gata” pea mo ina fai age kiā nātou ia te fehuʼi ʼaenī: “ ʼE feala feafeaʼi anai hakotou hola ʼi te fakamāu ʼa te Seʼeni?” (Mat. 23:33) Koteā ʼaē neʼe manatu kiai ia Sesu ʼaki te kupu “Seʼeni”?

4. Neʼe koteā ʼaē neʼe manatu kiai ia Sesu ʼi tana talanoa ʼaē ʼo ʼuhiga mo te Seʼeni?

⁴ Ko te Seʼeni neʼe ko te malaʼe ʼi tuʼa atu ʼo te ʼu kaupā ʼo Selusalemi pea neʼe laku kiai te ʼu ʼotaʼota pea mo te ʼu manu kua mate, ʼo tutu ai. Neʼe fakaʼaogaʼi e Sesu ia te kupu Seʼeni moʼo fakatā ia te mate heʼegata. Neʼe ina fakahā ʼi tana fehuʼi ʼaē ʼo ʼuhiga mo te feholaki mai te Seʼeni, ko te kau takitaki lotu ʼaia kua tuha mo nātou ki te fakaʼauha ʼo heʼegata.—Mat. 5:22, 29.

5. ʼE fakamoʼoni feafeaʼi ʼi te hisitolia ko te ʼu fakatokaga ʼaē neʼe fai e Soane mo Sesu neʼe hoko moʼoni?

⁵ Neʼe toe lēsili age te ʼu agahala ʼa te kau takitaki Sutea ʼi tanatou fakatagaʼi ia Sesu pea mo tana ʼu tisipulo. Ki muli age, ohagē ko te fakatokaga ʼa Soane pea mo Sesu, neʼe hoko moʼoni ia te ʼaho hauhau ʼo te ʼAtua. Pea ko ‘te hauhau ʼaē ʼe haʼu’ neʼe ʼamanaki hoko pē ki te koga meʼa e tahi, ko Selusalemi pea mo Suta, pea koia ʼaē neʼe feala ke feholaki mai ai. Neʼe hoko te hauhau ʼaia ʼi te temi ʼaē neʼe fakaʼauha ai ia Selusalemi pea mo tona fale lotu e te kautau Loma ʼi te taʼu 70 ʼo totatou temi. Ko te “mamahi” ʼaia neʼe lahi age ia ʼi te ʼu meʼa fuli kua hoko ki Selusalemi. Tokolahi neʼe mamate pe neʼe pilisoniʼi. Ko te fakamelomelo ʼaia ʼo te fakaʼauha lahi age ʼe ʼamanaki hoko mai ki te tokolahi ʼe natou lau ʼe natou Kilisitiano pea mo nātou ʼe kau ki ʼihi lotu.—Mat. 24:21.

ʼE Tonu Ke Tou Feholaki Mai Te Hauhau ʼe ʼAmanaki Hoko Mai

6. Koteā ʼaē neʼe kamata tuputupu ʼi te ʼuluaki kōkelekāsio ʼa te kau Kilisitiano?

⁶ Ko ʼihi ʼi te kau ʼuluaki Kilisitiano neʼe liliu ko he kau ʼapositā pea neʼe natou maʼu tanatou ʼu tisipulo neʼe muli iā nātou. (Gāue 20:29, 30) ʼI te kei māʼuʼuli ʼaē ʼa te kau ʼapositolo ʼa Sesu, neʼe natou “tāʼofi” ia te taʼi ʼapositā ʼaia, kae ʼi tanatou kua mamate leva, neʼe lahi ʼaupitō ia te ʼu magaʼi lotu Kilisitiano loi neʼe malaga ake. Iā ʼaho nei, ʼe lahi te ʼu fihi fakalotu ʼi te Keletiate. Neʼe fakakikite e te Tohi-Tapu ia te mālohi ake ʼa te Keletiate, ʼo ina ʼui ko nātou ʼaia ʼe ko “te tagata ʼaē ʼe manuki ki te lao” pea ko “te foha ʼo te fakaʼauha . . . ʼaē kā molehi anai e te ʼAliki ko Sesu . . . pea mo ina fakaʼauha ʼi te hā ʼo tana ʼi henī.”—2 Tes. 2:3, 6-8.

7. He koʼē ko te kupusiga palalau “tagata ʼaē ʼe manuki ki te lao” ʼe tuha mo te kau takitaki lotu ʼo te Keletiate?

⁷ Ko te kau takitaki ʼo te Keletiate ʼe natou manuki ki te lao heʼe natou kākāʼi ia te ʼu toko lauʼi miliona ʼaki tanatou tuku ke hoholo ia te ʼu akonaki, mo te ʼu ʼaho lalahi, pea mo te ʼu aga ʼaē ʼe fakafeagai ki te Tohi-Tapu. Ohagē ko te kau takitaki lotu ʼaē neʼe tauteaʼi e Sesu, ko te kau ʼatolasio iā ʼaho nei ʼaē ʼe natou kau ki “te foha ʼo te fakaʼauha” ʼe hoko anai kiā nātou ia te fakaʼauha ʼe mole toe fakatuʼuake ai anai nātou. (2 Tes. 1:6-9) Kae koteā ʼaē kā hoko ki te hahaʼi ʼaē neʼe kākāʼi e te kau takitaki lotu ʼo te Keletiate pea mo ʼihi kau takitaki ʼo ʼihi lotu hala? Moʼo tali ki te fehuʼi ʼaia, tou vakaʼi age muʼa te ʼu meʼa neʼe hoko ki muli age ʼo te ʼuluaki fakaʼauha ʼo Selusalemi, ʼaē neʼe hoko ʼi te taʼu 607 ʼi muʼa ʼo totatou temi.

“Kotou Feholaki Mai Te Lotolotoiga ʼo Papiloni”

8, 9. (a) Koteā te logo fakapolofetā ʼaē neʼe fai e Selemia ki te kau Sutea ʼaunofo ʼi Papiloni? (b) ʼI te kua ʼosi mālo ʼa te kau Metia pea mo te kau Pelesia ʼi Papiloni, neʼe koteā te faʼahiga feholaki neʼe kua feala ke natou fai?

⁸ Neʼe fakakikite e te polofetā ko Selemia ia te fakaʼauha ʼo Selusalemi ʼaē neʼe hoko ʼi te taʼu 607 ʼi muʼa ʼo totatou temi. Neʼe ina ʼui ko te hahaʼi ʼa te ʼAtua ʼe ʼave anai ʼo pilisoniʼi kae ʼe natou toe liliu mai anai ki tonatou fenua hili kiai “taʼu e fitugofulu.” (Sel. 29:4, 10) Maʼa te kau Sutea ʼaunofo ʼi Papiloni, neʼe ko he logo maʼuhiga ʼa Selemia, ke ʼaua naʼa natou pikisia ʼi te lotu hala ʼaē neʼe tauhi kiai te hahaʼi ʼi Papiloni. Kapau ʼe natou fai ia te faʼahi ʼaia, pea ʼe hoki feala ke natou nonofo teuteu anai ki tanatou toe liliu ki Selusalemi pea mo natou toe laga te tauhi moʼoni mokā natou au atu kiai. Neʼe hoko te faʼahi ʼaia mole faʼa fualoa ki te ʼosi mālo ʼa te kau Metia pea mo te kau Pelesia iā Papiloni ʼi te taʼu 539 ʼi muʼa ʼo totatou temi. Pea neʼe fai e te Hau ʼo Pelesia ko Siliusi 2 ia te tohi maʼa te kau Sutea ke natou toe liliu pea mo natou toe laga te fale lotu ʼo Sehova ʼi Selusalemi.—Esita. 1:1-4.

⁹ Neʼe fakaʼaogaʼi e te ʼu toko lauʼi afe Sutea ia te fealagia ʼaia ke natou toe liliu ki tonatou fenua. (Esita. 2:64-67) ʼI tanatou fai ia te faʼahi ʼaia, neʼe natou fakahoko ia te fakatotonu fakapolofetā ʼa Selemia, ʼaē ʼe tonu ke natou feholaki, ke natou mavae ki he tahi koga meʼa. (Lau ia Selemia 51:6, 45, 50.) Neʼe mole feala ki te kau Sutea fuli ke natou fai te toe fagona loaloaga ʼaia ki Selusalemi pea mo Suta. Ohagē ko te polofetā matuʼa ko Taniela ko nātou ʼaē neʼe nonofo ʼi Papiloni, neʼe natou maʼu ia te tapuakina ʼa te ʼAtua ʼi te temi fuli pē neʼe natou lagolago mo tonatou loto kātoa ki te tauhi maʼa ʼaē neʼe tuʼu ʼi Selusalemi pea mo natou fakamamaʼo mai te tauhi hala ʼa te kau Papiloni.

10. Ko “te ʼu meʼa fakalialia” fea ʼaē ʼe tukugākoviʼi ai ia “Papiloni Lahi”?

¹⁰ Iā ʼaho nei, ko te toe hahaʼi tokolahi ʼe natou tauhi ki te ʼu faʼahiga lotu hala kehekehe, pea ʼe feala pē ke ʼui ko te ʼu lotu fuli ʼaia ʼe ʼomai mai te Papiloni ʼāfea. (Sen. 11:6-9) Ko te ʼu lotu fuli ʼaia ʼe fakahigoaʼi ko “Papiloni Lahi, te faʼē ʼa te kau fafine paomutu pea mo te ʼu meʼa fakalialia ʼo te kele.” (Fakh. 17:5) Kua fualoa ia te lagolago ʼa te lotu hala ki te ʼu pule fakapolitike ʼo te mālama ʼaenī. ʼI “te ʼu meʼa fakalialia” ʼaē ʼe tukugākoviʼi ai ia te lotu hala, ʼe ko te ʼu tuʼuga tau ʼaē neʼe “fakapōgi ʼi te kele” ia te ʼu toko lauʼi teau miliona hahaʼi. (Fakh. 18:24) Ko te tahi “ ʼu meʼa fakalialia” ʼe ko te fakaʼalikiʼi ʼo te tamaliki liliki pea mo ʼihi aga heʼeʼaoga neʼe fai e te kau takitaki lotu pea neʼe fakagafua pē te ʼu aga ʼaia e te kau takitaki ʼo te ʼu ʼēkelesia. ʼE mole mata tonu koa te kua vave pē te fakaʼauha anai e Sehova ʼAtua ia te lotu hala ʼi te kele?—Fakh. 18:8.

11. ʼO aʼu ki te temi ʼaē kā fakaʼauha ai anai ia Papiloni Lahi, koteā te maʼua ʼo te kau Kilisitiano?

¹¹ Ko te kau Kilisitiano moʼoni, ʼaē ʼe natou ʼiloʼi ia te faʼahi ʼaia, ko tonatou maʼua ke natou fakatokaga te hahaʼi ʼaē ʼe lagolago kiā Papiloni Lahi. ʼE natou fakatokaga te hahaʼi, ʼaki tanatou tufa ia te ʼu Tohi-Tapu pea mo te ʼu tohi fakatohi-tapu neʼe tā e “te tagata kaugana agatonu mo poto,” ʼaē neʼe fakanofo e Sesu moʼo foaki ia te ‘meʼa kai fakalaumālie ʼi tona temi totonu.’ (Mat. 24:45) Kā fia logo ia te hahaʼi ki te ʼu moʼoni ʼo te Tohi-Tapu, ʼe fai te ʼu fakatuʼutuʼu moʼo tokoni kiā nātou ʼaia ʼaki he ako Tohi-Tapu. ʼE tou fakaʼamu, ʼe natou sio anai ki te ʼaoga ke natou “feholaki mai te lotolotoiga ʼo Papiloni” heʼe mole heʼeki tauhala.—Fakh. 18:4.

Feholaki Mai Te Tauhi Tamapua

12. Koteā te manatu ʼa te ʼAtua ʼo ʼuhiga mo te tauhi ki te ʼu pāki pea mo te ʼu fakatātā?

¹² Ko te tahi aga fakalialia ʼe tou maʼu ʼi Papiloni Lahi ʼe ko te tauhi ki te ʼu pāki pea mo te ʼu fakatātā. ʼE fakahigoaʼi e te ʼAtua te ʼu meʼa ʼaia ko “te ʼu meʼa fakalialia” pea mo te “ ʼu taulāʼatua heʼemaʼa.” (Teu. 29:17) Ko nātou fuli ʼaē ʼe natou loto ke leleiʼia nātou e te ʼAtua, ʼe tonu ke natou fakamamaʼo mai te tauhi tamapua, ʼo mulimuli ki te fakatotonu ʼaenī ʼa te ʼAtua: “Ko au ia Sehova. Ko toku huafa ʼaia; pea ʼe mole au foaki anai toku kolōlia ki he tahi age, peʼe ko toku fakavikiviki ki he ʼu fakatātā neʼe togi.”—Isa. 42:8.

13. Ko te faʼahiga tauhi tamapua fea ʼaē ʼe tonu ke tou feholaki mai ai?

¹³ ʼE toe fakahā mai ʼi te Folafola ʼa te ʼAtua ia te tahi ʼu faʼahiga tauhi tamapua. Ohagē lā, ʼe ina fakahigoaʼi te mānumānu ko he “tauhi tamapua.” (Kol. 3:5) Ko te mānumānu ʼe ko he holi ki he meʼa ʼe tapu, ohagē ko he ʼu koloa ʼa he tahi kehe. (Eke. 20:17) Ko te ʼāselo ʼaē neʼe liliu ko Satana te Tēvolo, neʼe ina fakatuputupu ʼi tona loto ia te mānumānu ʼaē ke tatau mo te Māʼoluga ʼAupitō pea ke tauhi age te hahaʼi ki ai. (Luka 4:5-7) Ko te aga ʼaia neʼe tupu ai leva ia tana fakafeagai kiā Sehova pea mo ina fakahalaʼi ia Eva ke mānumānu ki te meʼa ʼaē neʼe tapuʼi age e te ʼAtua. Mo Atama foki neʼe toe tauhi tamapua ʼaki tana fakagafua ʼaē ki tona holi ʼaē ki tona ʼohoana ke maʼuhiga age ʼi tana fakalogo ki tana Tamai ʼofa ʼaē ʼe ʼi selō. Kae ko nātou fuli ʼaē ʼe natou fia feholaki ʼi te ʼaho hauhau ʼo te ʼAtua, ʼe tonu ke natou pipiki ʼāteaina kiā te ia pea mo te tekeʼi ia te faʼahiga loto mānumānu fuli.

“Hola Mai Te Fai Folonikāsio”

14-16. (a) He koʼē ko Sosefo ʼe ko he faʼifaʼitaki lelei ʼo ʼuhiga mo te aga ʼaē ʼe tonu ke fai? (b) Koteā ʼaē ʼe tonu ke tou fai mo kapau ʼe tou maʼu ni ʼu holi fakasino heʼemaʼa? (c) ʼE tou lava hola feafeaʼi mai te fai folonikāsio?

¹⁴ Lau ia 1 Kolonito 6:18. ʼI te temi ʼaē neʼe faiga ai te ʼohoana ʼo Potifale ke ina fakahalaʼi ia Sosefo, neʼe hola moʼoni ia mai te fafine ʼaia. ʼE ko he faʼifaʼitaki lelei neʼe ina tuku mai ki te kau Kilisitiano, peʼe kei natou selipatea peʼe kua natou ʼohoana! ʼIo, ko te leʼo ʼo loto ʼo Sosefo neʼe akoʼi ʼaki te ʼu ʼuluaki fakatotonu ʼa te ʼAtua. Kapau ʼe tou loto ke tou fakalogo ki te fakatotonu ʼaē ke tou “hola mai te fai folonikāsio” ʼe tou tekeʼi anai te ʼu holi fakasino ʼaē ʼe feala ke tou logoʼi ki he tahi age ʼi totatou ʼohoana. ʼE ʼui fēnei mai kiā tātou: “Kotou fakamate te ʼu koga ʼo tokotou sino . . . ʼo ʼuhiga mo te fai folonikāsio, mo te aga heʼemaʼa, mo te holi ki te ʼu felāveʼi fakasino, mo te holi ki te meʼa ʼaē ʼe kovi, mo te mānumānu, ʼaē ʼe ko he tauhi tamapua. ʼE hoko mai te hauhau ʼa te ʼAtua ʼuhi ko te ʼu meʼa ʼaia.”—Kol. 3:5, 6.

¹⁵ Kotou fakatokagaʼi “ ʼe hoko mai te hauhau ʼa te ʼAtua.” Tokolahi ʼi te mālamanei ʼe natou maʼu ia te ʼu holi fakasino heʼemaʼa pea mo te ʼu aga heʼemaʼa, pea ʼe natou mulimuli pē ki tonatou ʼu holi ʼaia. Koia, ko tātou ʼu Kilisitiano ʼe tonu ke tou faikole ki te ʼAtua pea mo kole ia tona laumālie māʼoniʼoni ke tokoni mai ke ʼaua naʼa puleʼi tātou e te ʼu holi fakasino heʼemaʼa. Tahi ʼaē meʼa, ko te ako ʼo te Tohi-Tapu, mo te kau ki te ʼu fono, pea mo te fakahā ʼo te logo lelei ki te hahaʼi, ʼe tokoni mai anai ke tou “haga haʼele ʼaki te laumālie.” Koia ʼe “mole [tou] fakahoko ai anai he holi ʼo te kakano.”—Kal. 5:16.

¹⁶ ʼE mahino ia, kapau ʼe tou sioʼi he ʼu pāki pea mo he ʼu ʼata ʼe fai ai ni ʼu felāveʼi fakasino fakalialia mo heʼeʼaoga, pea ʼe mole tou ‘haʼele anai ʼaki te laumālie.’ ʼO toe fēia mo te kau Kilisitiano fuli, ʼe tonu ke natou tōkakaga ki te ʼu tohi, mo te ʼu ʼata, peʼe ko te ʼu musika ʼaē ʼe fakahāhā ai pea mo talanoa ai ki ni ʼu felāveʼi fakasino heʼeʼaoga. ʼE mahino foki, ʼe kovi ki te “kau māʼoniʼoni” ʼa te ʼAtua ke natou fakafiafia ʼi te fakahuahua ki te ʼu meʼa ʼaia peʼe mo fai palalau kiai. (Efe. 5:3, 4) Koia tou fakahā ki tatatou Tamai ʼofa ʼe tou fia hao ʼi tona hauhau ʼaē kā ʼamanaki hoko mai pea ʼe tou fia māʼuʼuli ʼi tona mālama foʼou pea mo faitotonu.

Hola Mai “Te Manako Ki Te Paʼaga”

17, 18. He koʼē ʼe tonu ke tou feholaki mai “te manako ki te paʼaga”?

¹⁷ ʼI tana ʼuluaki tohi kiā Timoteo, neʼe fakahā lelei e Paulo ia te ʼu pelesepeto ʼaē ʼe tonu ke mulimuli kiai ia te ʼu sinifu Kilisitiano, pea ko ʼihi ʼi te ʼu sinifu ʼaia neʼe natou ʼamanaki ʼe natou maʼu anai he ʼu lelei fakasino koteʼuhi ko tonatou ʼu pule neʼe ko te ʼu Kilisitiano. ʼE lagi ko ʼihi neʼe natou fia fakaʼaogaʼi te meʼa ʼaē neʼe taputapu ke natou maʼu meʼa ai. Neʼe fai e Paulo ia te fakatokaga ʼo ʼuhiga mo te “manatu ko te pipiki ki te ʼAtua ʼe ko he meʼa ʼe feala ke maʼu ai he koloa lahi.” Ko te tafitoʼaga ʼo te fihifihia ʼe lagi ko “te manako ki te paʼaga” ʼaē ʼe fakatupu kovi ki he tahi ʼe koloaʼia peʼe masiva.—1 Tim. 6:1, 2, 5, 9, 10.

¹⁸ ʼE kotou ʼiloʼi koa ni fakamatala ʼi te Tohi-Tapu ʼo ʼuhiga mo ni hahaʼi neʼe fua kovi tanatou ʼu felōgoi ʼaē mo te ʼAtua ʼuhi ko tanatou “manako ki te paʼaga” peʼe ko tanatou manako ki he ʼu meʼa noa neʼe feala ke totogi ʼaki te paʼaga? (Sos. 7:11, 21; 2 Hau 5:20, 25-27) Neʼe fakalotomālohiʼi fēnei e Paulo ia Timoteo: “Kiā te koe, Ê tagata ʼa te ʼAtua, hola mai te ʼu meʼa ʼaia. Kae ke tuli koe ia te faitotonu, te pipiki ki te ʼAtua, te tui, te ʼofa, te faʼa kātaki, mo te agamalū.” (1 Tim. 6:11) ʼE maʼuhiga ʼaupitō kiā nātou fuli ʼaē ʼe fia hao mai te ʼaho ʼo te hauhau ke natou fakalogo ki te tokoni ʼaia.

“Hola Mai Te ʼu Holi ʼo Te Temi Tūpulaga”

19. Koteā ʼaē ʼe ʼaoga ki te kau tūpulaga fuli?

¹⁹ Lau ia Tāʼaga Lea 22:15. Ko te agavale ʼaē ʼi te loto ʼo he tūpulaga ʼe feala ke ina taki ia ia ki te tuʼutāmaki. Ko te meʼa ʼaē ʼe feala ke tokoni ki ai moʼo tekeʼi te faʼahi ʼaia ʼe ko te fakatonutonu Fakatohi-tapu. Tokolahi te ʼu Kilisitiano tūpulaga ʼaē ko tanatou ʼu mātuʼa ʼe mole natou tui kiā Sehova, ʼe natou faiga ke natou maʼu ia te fiafia pea mo maʼuliʼi te ʼu pelesepeto ʼo te Tohi-Tapu. Ko ʼihi ʼe natou fakalogo ki te ʼu tokoni fakapotopoto ʼa te ʼu tehina mo tuagaʼane ʼi te kōkelekāsio kua fotufotuʼa ʼi te faʼahi fakalaumālie. Tatau aipē pe ko ai ʼaē ʼe ina fai te tokoni Fakatohi-tapu, kae ko ʼaē ʼe fakalogo kiai ʼe ina maʼu ai te maʼuli fiafia ʼi te temi nei pea mo te kā haʼu.—Hep. 12:8-11.

20. Koteā te tokoni ʼaē ʼe feala ke maʼu e te ʼu tūpulaga ke feala ai hanatou hola mai te ʼu holi ʼe kovi?

²⁰ Lau ia 2 Timoteo 2:20-22. Tokolahi te kau tūpulaga ʼaē neʼe mole akonakiʼi fakalelei, neʼe natou fai te ʼu aga ʼe mole lelei, ohagē lā neʼe natou fia fakataupiepie, mo mānumānu, mo fai folonikāsio, mo manako ki te paʼaga, pea mo faiga ki te ʼu fakafiafia. Ko te ʼu aga ʼaia ʼe ko “te ʼu holi ʼo te temi tūpulaga,” ʼaē ʼe fakalotomālohiʼi mai ʼi te Tohi-Tapu ke tou hola mai ai. Kapau ʼe fia hola he tūpulaga Kilisitiano mai te ʼu meʼa ʼaia, pea ʼe tonu ke fakamamaʼo mai te ʼu fakakaugā kovi fuli pē. Kae ko te tokoni ʼaē ʼe ʼaoga tāfito, ʼe ko te tokoni ʼa te ʼAtua ʼaē ke tou faiga ke tou maʼu ia te ʼu kalitātē “mo nātou ʼaē ʼe natou fetapa ki te ʼAliki ʼaki he loto ʼe maʼa.”

21. Koteā te fakapapau taulekaleka neʼe fai e Sesu Kilisito ʼo ʼuhiga mo tana ʼu tisipulo ʼaē ʼe ina fakatatau ki ni ʼu ovi?

²¹ Peʼe tou tūpulaga peʼe kua tou mātutuʼa, kapau ʼe tou tekeʼi mālohi te hahaʼi ʼaē ʼe natou faigaʼi ke natou kākāʼi tātou, pea ʼe tou fakahā ai tatatou loto ʼaē ke tou kau ʼi te ʼu tisipulo ʼa Sesu ʼaē ʼe fakatatau ki ni ʼu ovi, ʼaē ʼe natou ‘feholaki mai te leʼo ʼo te hahaʼi kehe.’ (Soa. 10:5) Kae ke tou hao mai te ʼaho hauhau ʼo te ʼAtua, ʼe mole tonu pē ke tou hola mai te ʼu meʼa ʼaē ʼe fakatupu tuʼutāmaki. ʼE tonu foki ke tou toe faigaʼi ke tou maʼu ia he ʼu kalitātē ʼe lelei. ʼE tou vakaʼi anai te ʼu kalitātē e fitu ʼi te ʼalatike ʼaē kā hoa mai. ʼE ʼaoga ke tou vakaʼi fakalelei te ʼu kalitātē ʼaia, heʼe fai e Sesu ia te fakapapau taulekaleka ʼaenī: “ ʼE au foaki age [ki taku faga ovi] te maʼuli heʼegata, pea ʼe mole fakaʼauha anai ia nātou, kailoa, pea ʼe mole he tahi ʼe ina faʼao anai ia nātou ʼi toku nima.”—Soa. 10:28.

ʼE Kotou Tali Feafeaʼi Anai?

• Koteā te fakatokaga neʼe fai e Sesu ki te kau takitaki lotu?

• Ko te ʼaluʼaga fakamataku fea ʼaē ʼe tau nei mo te hahaʼi tokolahi iā ʼaho nei?

• Ko te ʼu faʼahiga tauhi tamapua fea ʼaē ʼe tonu ke tou hola mai ai?

[Paki ʼo te pasina 15]

Koteā takotou manatu mokā kotou logo ki te kupu “feholaki”?