Te Maʼuli Fakalaumalie

ʼE fakaʼaogaʼi ʼi te Tohi-Tapu te kupusiga palalau ʼaeni “he ʼu manatu fakalaumalie” moʼo fakaʼuhiga ki he faʼahiga fakasiosio ʼo te maʼuli. (Suta 18, 19) Ko he tahi ʼe loto ke takitaki e te ʼAtua, ʼe ina fakamaʼuhigaʼi te ʼu lekula ʼa te ʼAtua. Kae ko ia ʼae ʼe manatu ki te kakano ʼe tokaga pe ia kia ia totonu.—Efeso 5:1.

TE ʼAMANAKI

PELESEPETO FAKATOHI-TAPU: “Kapau e ke vaivai i te aho o te mamahi, ko tou malohi e veliveli pe.”—Taaga Lea 24:10.

TONA FAKAʼUHIGA: Ka tou lotovaivai ʼe feala ke puli ai te malohi ʼae ʼe ʼaoga moʼo tauʼi te ʼu fihifihia ʼo te maʼuli. Kae ko te ʼamanaki ʼe ina uga tatou ke tou faʼa kataki. ʼE fakalotofimalie ia tatatou mahino ʼae ko te ʼu faigataʼaʼia ʼe fakatemi pe, he ʼe ki ʼamuli ʼe tou maʼu ai he ʼu fua lelei.

TE ʼU TOKONI: Fakakaukauʼi te ʼu meʼa lelei ʼae ka hoko ʼi te ka haʼu. Mulimuli ki tau ʼu fakatuʼutuʼu, kae ʼaua tau tuʼania ki te meʼa ʼae ʼe feala ke hoko pea ʼe mole ke fakatalitali pe ke to lelei ia meʼa fuli, he ko te ʼu aluʼaga fakafokifa ʼe hoko kia tatou fuli. (Ekelesiasi 9:11) ʼE tou tuʼania fau kae ʼi tona fakahagatonu, neʼe to lelei. Koia, ʼe ui ʼi te faʼifaʼitaki Fakatohi-tapu ʼaeni ʼo ʼuhiga mo te gaue kele: “Nunusi tau pulapula mai te uhu pea aua naa tuku ke malolo tou nima i te afiafi, koteuhi e mole ke iloi te mea ae e mauli lelei anai, aeni pee ko ae, pee ko naua toko lua.”—Ekelesiasi 11:6.

TE ʼU TALI KI TE ʼU FEHUʼI MAʼUHIGA ʼO TE MAʼULI

PELESEPETO FAKATOHI-TAPU: “Foaki mai kia au te atamai . . . Tau folafola ko te mooni.” —Pesalemo 119:144, 160.

TONA FAKAʼUHIGA: ʼE tali te Tohi-Tapu ki te ʼu fehuʼi ʼae ʼe feʼekeʼaki e te hahaʼi fuli ohage ko ʼaeni:

• ʼE tou haʼu maifea?

• Kotea te ʼuhiga ʼo totatou maʼuli ʼi te kele?

• Kotea ʼae ʼe hoko moka mate he tahi?

• Ko siʼi gataʼaga pe koa ʼaeni ʼo te maʼuli?

Ko te toko lauʼi miliona hahaʼi neʼe natou fetogi tonatou faʼahiga maʼuli ʼi tanatou vakavakaʼi te ʼu tali ʼo te Tohi-Tapu ki te ʼu fehuʼi ʼaia pea mo ʼihi atu.

TE ʼU TOKONI: Ke ke vakaʼi totonu te ʼu moʼoni Fakatohi-tapu. Kole ki he Fakamoʼoni ʼa Sehova ke tokoni atu ke ke mahino ki te Tohi-Tapu. Vakaʼi tamatou tuʼasila ʼi te Neti jw.org, peʼe ke kau ki ʼamatou fono hala totogi he ʼe ava ki te hahaʼi fuli.

TAHI ʼU PELESEPETO FAKATOHI-TAPU

FAKAMAʼUHIGAʼI TE ʼU MEA FAKALAUMALIE.

“Manuʼia ia natou ʼae ʼe natou mahino ʼe ʼaoga kia natou te ʼu meʼa fakalaumalie.”​—MATEO 5:3.

KE KE AKO FAKAMALOTOLOTO TE ʼATUA ʼO TE TOHI-TAPU.

“Ke natou kumi ia te ʼAtua . . . ʼe feala hanatou maʼu moʼoni ia ia . . . ʼE mole mamaʼo ia tatou takitokotahi.”​—GAUE 17:27.

LAU MO METITASIO KI TE LOGO ʼO TE TOHI-TAPU.

“Kae e mau tona fiafia i te lao a [“Sehova,” MN]a, pea e metitasio ki ai i te aho mo te pouli! . . . Ko mea fuli ae e ina fai e manuia kia ia.”​—PESALEMO 1:2, 3.