“E Mole Pe Hoko He Malaia Kia Natou” ʼAe ʼe ʼOʼofa Kia Sehova

1. Neʼe fakaha feafeaʼi e te fafine lele ia tana mole loto ʼae ke tuku tana kau ʼi te ʼu lele?

NEʼE kamata kau ia Mary Decker ki te ʼu lele kaʼe kei finemui. ʼI te taʼu 1984, neʼe kua lelei ʼosi tana lele ʼo manatu ai ʼihi ʼe ina maʼu anai te metai aulo ʼi te faigaoʼi Jeux olympiques. Kaʼe neʼe hoko te meʼa fakaʼofaʼofa kia ia. ʼI te lolotoga ʼo te lele ʼo te meta 3 000, neʼe tukia ʼi te vaʼe ʼo te tahi fafine lele pea toka ai. Neʼe mole feala hana fakaʼosi te lele ʼaia, kaʼe neʼe mole gata ai tana kau ki te ʼu lele. Mole ʼosi he taʼu katoa ki ai, pea neʼe ina maʼu ia te muʼasika ʼo te lele ʼo te meta 1 000 ʼa te hahaʼi fafine.

2. Ko te faʼahiga lele fea ʼae ʼe kau ai te kau Kilisitiano? ʼE tonu ke feafeaʼi tanatou lele?

² ʼE fakatatau totatou maʼuli Fakakilisitiano ki he lele ki te maʼu ʼo te maʼuli heʼe gata. ʼE tonu ke ʼaua naʼa tou tuku he meʼa ke ina taʼofi tatatou kau ki te lele ʼaia. ʼE mole ko he lele ʼe nounou ke tou lele gaholo ke tou malo ai. Pea ʼe mole ko he lele mamalie, ke tou lele fakatokatoka pea mo tou tutuʼu moka tou loto ki ai. Kaʼe ʼe ko te lele manava. ʼE tonu ke kataki ia te tagata lele manava ʼo lele ke kaku ki te fakaʼosi. Neʼe tohi fenei e te apositolo ko Paulo ki te kau Kilisitiano ʼo Kolinito: “Pe e mole kotou iloi ko natou e lele i te malae faigaoi e natou lele fuli, kae ko te toko tahi pe ae e ina mau te fakapale? Kotou lele ke kotou mau ia!”—1 Ko. 9:24.

3. Ko ai ʼae ʼe feala ke malo ʼi te lele ʼae ki te maʼuli heʼe gata?

³ ʼE ui mai ʼi te Tohi-Tapu ke tou kau ki te lele ʼaia. (Lau ia 1 Kolinito 9:25-27.) Pea ko te fakapale ʼe ko te maʼuli heʼe gata. ʼE mole hage ia ko te ʼu lele fuli ʼae, koteʼuhi ʼe feala ke maʼu te fakapale e natou fuli ʼae ʼe kau ai mo kapau ʼe natou fakaʼosi te lele. (Mat. 24:13) ʼE feala ke mole maʼu e he tahi te fakapale mo kapau ʼe mole ina muliʼi te ʼu lao ʼo te lele pe ʼe ina tuku tana lele kaʼe heʼeki ʼosi. Pea ʼe ko te lele pe ʼaia ʼe tahi ʼe ina fakapale te kau lele ʼaki te maʼuli heʼe gata.

4. He ko ʼe koa ʼe mole faigafua te kau ki te lele ʼaia ki te maʼuli heʼe gata?

⁴ ʼE mole faigafua te kau ki te lele ʼaia ki te maʼuli heʼe gata. ʼE mole feala ki he tahi ia tatou ke hage ko Sesu ʼae neʼe mole higa tuʼa tahi ʼi te lele ʼaia. Neʼe ui e Sakopo “e tou tukia fuli i te u mea kehekehe.” (Sakp. 3:2) ʼE feala ke kinakina pe ʼe tuʼu ʼosi tatatou lele ʼuhi ko ʼatatou agahala pe ʼe ko ʼae ʼa ʼihi. Kapau koia, pea ʼe ʼaoga he tokoni ke tou toe hoko atu tatatou lele. ʼE mole tonu ke tou punamaʼuli moka tou higa ʼi ʼihi temi.—1 Hau 8:46.

KAPAU ʼE TOU HIGA, TOU HAGA KAU ʼI TE LELE

5, 6. (1) He ko ʼe koa “e mole pe hoko he malaia” ki he Kilisitiano? Ka higa he Kilisitiano, kotea ʼae ka tokoni anai ki ai ke “toe tuu ake ki oluga”? (2) He ko ʼe koa ʼe mole “toe tuu ake ki oluga” ʼihi moka natou higa?

⁵ ʼE iloga totatou ʼuhiga ʼi te meʼa ʼae ʼe tou fai moka tou higa. Ko ʼihi ia natou ʼae neʼe higa neʼe natou fakahemala pea mo hoko atu tanatou tauhi ki te ʼAtua. Kaʼe ko ʼihi ia neʼe natou filifili ke mole natou fakahemala. ʼE ui fenei ia Taaga Lea 24:16: “Koteuhi e higa tua fitu te tagata agatonu, pea e toe tuu ake ia ki oluga, kae e laku te kau agakovi ki te malaia.”

⁶ Tatau aipe pe ʼe tou higa, ʼe feala pe ke tou toe tutuʼu ake. Kapau ʼe tou falala tuʼumaʼu kia Sehova, pea ʼe lotolelei anai ia ke tokoni mai ʼi te ʼu temi ʼae ʼe tou tau ai mo te ʼu faigataʼaʼia pe ʼe tou fai ni laka hala. ʼE tokoni mai anai kia tatou ke tou “toe tuu ake ki oluga,” koteʼuhi ʼe ina iloʼi ʼe tou ʼoʼofa ia te ia. Kaʼe ko te kau agakovi ʼe mole natou fia “tuu ake ki oluga.” ʼE natou fakafisi ki te tokoni ʼa te Laumalie maʼoniʼoni ʼo te ʼAtua pea mo tana hahaʼi. ʼE ui ʼi te Tohi-Tapu “e mole pe hoko he malaia kia natou” ʼae ʼe ʼoʼofa ki te ʼu lao ʼa Sehova. Ko tona fakaʼuhiga ʼe feala ke tou toe liliu mai ki te lele ʼae ki te maʼuli heʼe gata.—Lau ia Pesalemo 119:165.

7, 8. ʼE feafeaʼi koa ki he tahi ʼe higa ke ina maʼu te tapuakina ʼa te ʼAtua?

⁷ ʼI ʼihi temi, ʼe agahala he tahi ʼuhi ko hona vaivaiʼaga. Pea ʼe feala ke ina fai liuliuga te agahala ʼaia. Kaʼe ʼe agatonu te tagata ʼaia kia mata ʼo Sehova mo kapau ʼe “toe tuu ake ia ki oluga” ʼo fakahemala moʼoni pea mo faiga malohi ke ina fai te meʼa ʼae ʼe lelei. Neʼe agatonu te kau Iselaele kia mata ʼo te ʼAtua ʼi te ʼu lakaga ʼae neʼe natou fakahemala ai ki ʼanatou agahala. (Esa. 41:9, 10) ʼE mole fia fakatokagaʼi e Taaga Lea 24:16 te ʼu agahala ʼae ʼe tou fai kaʼe ina fakaha te fia tokoni ʼae ʼa Sehova kia tatou ke tou “toe tuu ake ki oluga.” (Lau ia Esaia 55:7.) ʼE falala ia Sehova ʼAtua pea mo Sesu Kilisito ʼe tou faiga fakamalotoloto anai, pea ʼe nā fakalotomalohiʼi tatou ke tou “toe tuu ake ki oluga.”—Pes. 86:5; Soa. 5:19.

⁸ Tatau aipe pe neʼe toka he tagata lele, kaʼe ʼe ina maʼu pe te temi ke toe tuʼu ake pea mo fakaʼosi tana lele mo kapau ʼe tuʼu fakavilivili ki ʼoluga. ʼE mole tou iloʼi te “aho pea mo te hola” ʼae ka ʼosi ai te lele ki te maʼuli heʼe gata. (Mat. 24:36) Kaʼe kapau ʼe tou faiga malohi ke ʼaua naʼa tou higa, pea ʼe faigafua anai kia tatou te fakaʼosi ʼo te lele. Koia, kotea ʼae ʼe tonu ke tou tekeʼi ke ʼaua naʼa tou higa?

TE ʼU MEʼA ʼAE ʼE FAKATUPU HIGA

9. Kotea te ʼu faʼahi ʼaia ʼe nima ʼae ka tou talanoa ki ai?

⁹ ʼE tou talanoa anai kia faʼahi ʼe nima ʼe feala ke tou higa ai: ko ʼotatou vaivaiʼaga, mo te ʼu holi ʼo te kakano, mo he aluʼaga heʼe faitotonu ʼi te kokelekasio, mo te ʼu mamahi pe ʼe ko te ʼu fakataga, pea mo te ʼuhiga agahala ʼo te ʼu tehina mo tuagaʼane. Kapau neʼe kotou higa ʼuhi ko he aluʼaga ʼi te ʼu faʼahi ʼaia, kotou manatuʼi ʼe kataki fualoa ia Sehova pea ʼe mole fiu vave anai ia tatou.

10, 11. Kotea te vaivaiʼaga ʼo Tavite?

¹⁰ ʼE hage ʼotatou vaivaiʼaga ko he ʼu foʼi maka ʼe leta ʼi te ʼala. ʼE feala ke tou maʼu mai te maʼuli ʼo te Hau ko Tavite pea mo ʼae ʼo te apositolo ko Petelo he ako ʼo ʼuhiga mo te ʼu vaivaiʼaga ʼe lua. Ko Tavite neʼe mole ina maʼu tuʼumaʼu ia te loto lolomi pea ko Petelo ia neʼe ina tuʼania te tagata ʼi ʼihi temi.

¹¹ Neʼe mole maʼu tuʼumaʼu e te Hau ko Tavite ia te loto lolomi. ʼUhi ko tona vaivaiʼaga ʼaia, neʼe tono ai mo Pate-Sepa. Ki muli age, neʼe ina fia fakapogi ia Napale ʼi tana laukovi ʼae kia ia. Logope la neʼe fai e Tavite ni meʼa neʼe mole ina fakakaukauʼi kaʼe neʼe mole ina tuku tana faiga ʼae ke fiafia te loto ʼo Sehova. ʼAki te tokoni ʼa ʼihi, neʼe “toe tuu ake ki oluga” ʼi te ʼu temi ʼae neʼe agahala ai.—1 Sam. 25:5-13, 32, 33; 2 Sam. 12:1-13.

12. Kotea ʼae neʼe tokoni kia Petelo ke hoko atu tana lele logola te ʼu laka hala neʼe ina fai?

¹² Neʼe tuʼania ia Petelo ki te tagata. Neʼe nofo agatonu kia Sehova pea mo Sesu logola tana laka hala ʼi ʼihi temi ʼuhi ko tana tuʼania ʼae te tagata. Ohage la, neʼe fakafisi tuʼa tolu ʼo ina ui ʼe mole ina iloʼi ia Sesu. (Luka 22:54-62) ʼI te tahi lakaga, neʼe mole ina fakamaʼuhigaʼi tatau te kau Kilisitiano. Neʼe mole lelei te aga ʼaia ʼa Petelo pea neʼe feala ke faʼifaʼitakiʼi e ʼihi ʼo te kokelekasio. Koia neʼe fakatonutonuʼi malohi ai e Paulo ia Petelo. (Kal. 2:11-14) Neʼe lotomamahi koa ia Petelo ʼi tona fakatonutonuʼi ʼaia ʼo tuku ai tana lele ki te maʼuli? Kailoa ia. Neʼe ina fakakaukauʼi lelei te ʼu palalau ʼa Paulo, mo fetogi ai tana aga pea mo hoko atu tana lele.

13. He ko ʼe koa ʼe feala ke fakatupu higa te mahaki?

¹³ ʼE feala ke faigataʼa totatou maʼuli ʼuhi ko te mahaki ʼo feala ke tuʼu ai tatatou lele. Ohage la, neʼe mahaki kovi leva te tuagaʼane Saponia kua ʼosi taʼu ʼe 17 ki tona papitema. ʼI te lahi fau ʼo tana tuʼania ki tona mahaki neʼe liliu ia ʼo vaivai ʼi te moʼoni. Neʼe ʼaʼahi mo fakalotomalohiʼi ia ia e te ʼu tagata ʼafeā ʼe toko lua. ʼI tana toe kau ki te ʼu fono, neʼe tagi he neʼe lave kia ia tona tali fakafiafia pea mo te fakamalō age ʼa te kau tagata ʼafeā. ʼEi, kua toe hoko atu nei te lele ʼo totatou tuagaʼane.

14, 15. Kotea ʼae ʼe tonu ke tou fai moka hake ia tatou he ʼu holi ʼe kovi? Kotou tuku mai he faʼifaʼitaki.

¹⁴ Neʼe higa te tokolahi ʼuhi ko te ʼu holi ʼo te kakano. Kapau ʼe hake ia tatou he ʼu holi ʼe kovi, pea ʼe tonu ke tou faiga malohi ke tou taupau te faʼahiga manatu pea mo te aga ʼae ʼe alu tahi mo te ʼu lekula ʼa te ʼAtua. Neʼe ui e Sesu kapau ʼe fakatupu higa hotatou foʼi mata pe ko hotatou nima pea ʼe tonu ke tou “li mamao” te koga ʼaia ʼo totatou sino. ʼE tonu ke tou taʼaki te ʼu manatu heʼe maʼa pea mo te ʼu aga ʼae ʼe feala ke tuku ai tatatou lele.—Lau ia Mateo 5:29, 30.

¹⁵ Neʼe fakamatala e te tehina neʼe manako tagata ʼi muʼa atu. Logo la tana lahilahi ake ʼi te loto fale Kilisitiano, kaʼe neʼe ina logoʼi tona kehekehe pea mo te hahaʼi. ʼI tona taʼu 20, neʼe liliu ʼo pionie katoa pea mo tagata faifekau fakaminisitelio ʼi te kokelekasio. Ki muli age neʼe ina fai tana agahala mamafa pea neʼe fakatonutonuʼi, pea neʼe tokoni age ki ai te kau tagata ʼafeā. Ko tana faikole mo tana ako te Tohi-Tapu pea mo tana faiga ʼae ke tokoni ki te hahaʼi, neʼe tokoni kia ia ke toe hoko atu tana lele. Neʼe kua fualoa te aluʼaga ʼaia neʼe hoko kaʼe ʼe ina ui fenei: “ ʼI ʼihi temi ʼe toe hake te holi ʼaia ʼi au kaʼe ʼe au faiga ke ʼaua naʼa ina puleʼi au. ʼE au iloʼi ʼe mole tali anai e Sehova ke fakahalaʼi tatou ʼo fakalaka ʼi te meʼa ʼae ʼe tou lavaʼi. Koia, ʼe au tui papau ai ʼe iloʼi e te ʼAtua ʼe feala ke au tekeʼi te holi ʼaia.” ʼE mole fakafealagia e te tehina ʼaeni ki he meʼa ke ina fakamavae ia ia mai te lele. ʼE ina iloʼi te maʼua ʼae ke tou kataki ʼi te temi nei ʼuhi ko te maʼuhiga ʼo te maʼuli ʼi te tuʼu foʼou. ʼE ina ui fenei: “Kua au fakatotonu ʼe au tauʼi anai te holi ʼaia ʼo kaku ki te tuʼu foʼou.”

16, 17. (1) Kotea ʼae ʼe feala ke tokoni ki he tehina neʼe manatu ia neʼe hoko kia ia he aluʼaga heʼe faitotonu? (2) Kotea ʼae ʼe tonu ke tou manatuʼi ʼo ʼuhiga mo te kokelekasio ke ʼaua naʼa tou higa?

¹⁶ ʼE toe feala ke tou higa ʼuhi ko he aluʼaga heʼe faitotonu ʼi te kokelekasio. ʼI Falani, neʼe ui ia e te tagata ʼafeā neʼe hoko kia ia he aluʼaga heʼe faitotonu pea neʼe mamahi ai tona loto ʼo tuku ai tana kau ki te ʼu fono pea mo te minisitelio. Neʼe ʼaʼahi ia ia e te ʼu tagata ʼafeā ʼe toko lua pea neʼe nā fakalogo tana manatu ʼo ʼuhiga mo te meʼa ʼae neʼe hoko. Neʼe nā fakalotomalohi ia ia ke falala kia Sehova pea mo fakamanatuʼi age ko te faʼahi ʼae ʼe maʼuhiga ʼe ko tana fai te meʼa ʼae ʼe fiafia ai te loto ʼo te ʼAtua. Neʼe ina tali leleiʼi tanā tokoni ʼo feala ai tana hoko atu te lele.

¹⁷ ʼE ʼaoga ke tou manatuʼi fuli ʼe ko Sesu Kilisito ʼae neʼe hinoʼi e te ʼAtua ko te Pule ʼo te kokelekasio pea ʼe tou agahala fuli. ʼE hage te ʼu mata ʼo Sesu ko “he ulo o he afi” ko tona fakaʼuhiga ʼe mahino lelei age ia ki te ʼu meʼa fuli ʼae ʼe hoko ʼi te kokelekasio ia tatou. (Apk. 1:13-16) Ohage la, ʼe feala ke tou ui neʼe hoko he aluʼaga heʼe faitotonu ʼi te kokelekasio ʼuhi pe he neʼe mole tou mahino ki te aluʼaga ʼae neʼe hoko. ʼE fakatokatoka e Sesu ia te ʼu fihifihia ʼi te kokelekasio ʼaki tona faʼahiga fai ʼae ʼe totonu pea ʼi tona temi totonu. Koia ʼe mole tonu ai ke tou tuku he aga ʼa he Kilisitiano ke ina fakahiga tatou mai te lele.

18. ʼE feala ke tou taupau feafeaʼi tatatou agatonu lolotoga te ʼu temi mamahi pe ʼe ko te fakataga?

¹⁸ Ko te tahi ʼu faʼahi ʼe lua ʼe toe fakatupu higa ʼe ko te ʼu mamahi pe ʼe ko te ʼu fakataga pea mo te ʼuhiga agahala ʼo te ʼu tehina mo tuagaʼane. ʼI te lea fakata ʼo te tagata to pulapula, neʼe ui ai e Sesu ko ʼihi ia natou ʼae ʼe natou fia liliu ko he ʼu kaugana ʼa te ʼAtua ʼe natou higa anai ʼuhi ko “he mamahi pee ko he fakataga.” Ko te mamahi pe ʼe ko te fakataga ʼe feala ke tupu mai totatou famili, mai ʼotatou vahaʼa fale pe ʼe mai he puleʼaga ʼuhi ko te moʼoni. E feala ke higa tafitō he tahi mo kapau “e mole ina mau ni aka ia ia totonu,” ʼei, mo kapau ʼe mole malohi tana tui. (Mat. 13:21) Kaʼe kapau ʼe tou fakatotonu ke tou nonofo ovi kia Sehova, pea ʼe tokoni mai anai te logo lelei ʼo te Puleʼaga ʼo te ʼAtua ke tou maʼu he ʼu aka ʼe malohi. Koia ka tou tau mo he ʼu aluʼaga faigataʼa, tou metitasio ki te ʼu meʼa fuli ʼae ʼe tonu ke vikiʼi. (Lau ia Filipe 4:6-9.) ʼE foaki mai anai e Sehova te malohi ʼae ʼe ʼaoga moʼo taupau tatatou agatonu lolotoga te ʼu temi ʼo te fakataga ke ʼaua naʼa tou higa ʼi te lele.

19. Kotea ʼae ʼe tonu ke tou fai moka tou mamahi ki he tahi?

¹⁹ Ko ʼihi ʼe natou tuku tanatou tauhi kia Sehova ʼuhi ko te ʼuhiga heʼe haohaoa ʼo te ʼu tehina mo tuagaʼane pe neʼe tukia tonatou leʼo ʼo loto ʼuhi ko te aga ʼa ʼihi. (1 Ko. 8:12, 13) Kapau ʼe kotou mamahi ʼuhi ko he tahi, ʼe kotou iita anai koa ʼo mavae ʼi te moʼoni? ʼE ui mai ʼi te Tohi-Tapu ke ʼaua pe naʼa tou fakamauʼi he tahi kaʼe ke tou fakamolemole ki ai, tatau aipe pe ʼe tou tonu. (Luka 6:37) Ka tou mamahi, tou fai te fehuʼi ʼaeni kia tatou: “ ʼE au fakamauʼi koa ia natou ʼo mulimuli pe ki te meʼa ʼae ʼi toku loto? ʼE au tuku anai koa te moʼoni ʼuhi pe ko te ʼuhiga agahala ʼo ʼoku tehina?” ʼE tokoni mai totatou ʼofa ʼae kia Sehova ke ʼaua naʼa tou tuku he aga ʼa ʼihi ke ina fakagata tatatou kau ki te lele ʼo te maʼuli.

TOU KATAKI ʼO LELE PEA ʼAUA NAʼA TOU HIGA

20, 21. Kotea ʼae ʼe tonu anai ke tou fai ʼi te lele ʼae ki te maʼuli heʼe gata?

²⁰ ʼE kotou fia “lele o kaku ki te fakaosi”? (2 Tim. 4:7, 8) Kapau koia ʼaia pea ʼe tonu ke kotou ako te Tohi-Tapu pea mo ʼatatou tohi fakatohi-tapu, mo fai he ʼu fekumi pea mo metitasio ke feala hakotou iloʼi te ʼu meʼa ʼae ʼe fakatupu higa. Tou kole kia Sehova ke ina fakamalohiʼi tatou ʼaki tona laumalie maʼoniʼoni. Tou manatuʼi, kapau ʼe tou higa, pea ʼe kei feala pe hatatou toe kau ki te lele ʼo fakaʼosi. ʼE tonu ke tou taʼofi he ʼu ako mai te hala ʼae neʼe tou fai ʼi muʼa atu ke lelei age tatatou lele.

²¹ ʼE ui ʼi te Tohi-Tapu ʼe tonu ke tou lele ʼo kaku ki te fakaʼosi mo kapau ʼe tou loto ke tou maʼu te fakapale ʼae ʼo te maʼuli heʼe gata. ʼI tatatou lele ʼaia, “e lahi aupito te tokalelei” ʼae ka foaki mai anai e Sehova. (Pes. 119:165) ʼE hoko atu anai tana tokoni kia tatou pea mo ina foaki mai te ʼu tapuakina heʼe gata mo kapau ʼe tou fakaʼosi te lele.—Sakp. 1:12.