ʼE ʼAoga Kia Tatou He ʼu Kaumeʼa Moʼoni
KO JENNY pea mo Sue ʼe mahōlō tanā fai palalau. Ko he ʼu malimali, te gigila ʼo te ʼu mata—ko te ʼu meʼa fuli ʼaē ʼe hā ʼi tanā ʼu aga ʼe hā ʼaki ai te tokaga moʼoni ki te ʼu meʼa ʼaē ʼe ʼui e ia ʼaē. Logope te kehekehe ʼo tonā faʼahiga maʼuli, ʼe lahi te ʼu meʼa ʼe nā felogoi kiai pea mo nā fefakaʼapaʼapaʼaki.
ʼI te tahi koga meʼa, ko Eric pea mo Dennis ʼe nā gāue fakatahi ʼi te fakatuʼutuʼu, talu mai te ʼu taʼu kua loaloaga. ʼE nā loto fīmālie, pea ʼe nā hoko kakata pe. Māʼiape la mokā nā palalau ki he ʼu meʼa maʼuhiga, ʼe nā palalau fefakahagatonuʼaki. ʼE nā fefakaʼapaʼapaʼaki. Ohage pe ko Jenny pea mo Sue, ko Eric pea mo Dennis ʼe ko he ʼu kaumeʼa moʼoni.
Ko te ʼu fakamatala ʼaia ʼe feala ke lave ki tokotou loto, ʼo koutou manatuʼi ai tokotou ʼu kaumeʼa. ʼI te tahi age faʼahi, ʼe koutou fakaʼamu ke koutou maʼu te taʼi faʼahiga kaumeʼa ʼaia. ʼE feala mo koutou ke koutou maʼu he ʼu kaumeʼa feiā!
He Koʼe ʼe ʼAoga Kia Tatou He ʼu Kaumeʼa Moʼoni
Ko he ʼu fakakaumeʼa lelei ʼe ʼaoga ʼaupito ki he maʼuli mālōlō ʼi te faʼahi fakaʼatamai pea mo fakasino. Kae, ʼi te temi ʼaē ʼe tou logo tokotahi ai, ʼe mole faka ʼuhiga leva e te faʼahi ʼaia ʼe ʼi ai he meʼa ʼe kovi ia tatou. ʼE ʼui e ʼihi tagata kumi, ko te logo tokotahi ʼe hage ko te fia kai, ko te fakaʼiloga lelei ʼaia ʼe ʼaoga kia tatou he fakakaugā. Koia, ohage pe ko te meʼa kai ʼe ina fakasiʼisiʼi peʼe ina pulihi te fia kai, ko he fakakaumeʼa lelei ʼe feala ke ina fakasiʼisiʼi te logo tokotahi peʼe ina pulihi. Pea tahi ʼaē, ko te maʼu ʼo he ʼu kaumeʼa ʼe tou leleiʼia ʼe ko he faʼahi ʼe feala.
Neʼe fakatupu te tagata ʼaki te ʼaoga ʼaē ke fakakaugā. (Senesi 2:18) ʼE ʼui e te Tohi-Tapu ʼo ʼuhiga mo he kaumeʼa moʼoni, peʼe ko he fakakaugā, “ ʼe tupu mokā ʼe ʼi ai he mamahi.” (Tāʼaga Lea 17:17) Koia, ko he ʼu kaumeʼa moʼoni ʼe feala ke nā fetokoniʼaki mokā ʼe ʼaoga. Kae ko he kaumeʼa ʼe fakalaka age ia ʼi tona faka ʼuhiga pe ʼaē ki he kumi tokoni, peʼe ko he fakakaugā ʼi te gāue peʼe ʼi te faigaoʼi. Ko te ʼu kaumeʼa lelei ʼe nātou tahi fefakahāʼaki te ʼu kalitate ʼaē ʼe nātou maʼu. ʼE ʼui fēnei ia Tāʼaga Lea 27:17: “Ko te ukamea ʼe fakamāsila ʼaki te ukamea. Koia ko te tagata ʼe ina fakamāsila te fofoga ʼo he tahi tagata.” Ohage pe ko he koga ukamea ʼe feala ke ina fakamāsilaʼi he ukamea, ʼe feala pe ki he kaumeʼa ke ina fakamāsilaʼi te ʼu kalitate fakaʼatamai pea mo fakalaumālie ʼo he tahi age. Kapau ʼe tou lotomamahi, ko he sio manavaʼofa ʼo hotatou kaumeʼa pea mo he ʼu fakaloto mālohi ʼe toʼo mai te Tohi-Tapu, ʼe feala ke lelei ʼaupito kia tatou.
ʼI te Tohi-Tapu, ko te fakakaumeʼa ʼe pipiki ki te ʼofa, mo te feʼiloʼiʼaki lelei, mo te fakamatala ʼo he ʼu meʼa fakalilolilo, pea mo te fakakaugā. ʼE feala ke kau ki te fakakaumeʼa te ʼu hahaʼi ʼo te vāhaʼa fale, te ʼu kaugā gāue, pea mo ʼihi atu. Ki ʼihi ʼe kau ki tonatou ʼu kaumeʼa lelei te hahaʼi ʼo tonatou ʼu famili. Kae, maʼa te tokolahi ia ʼaho nei, ko te maʼu ʼo he ʼu kaumeʼa lelei pea mo taupau maʼu, ʼe ko he meʼa faigataʼa. He koʼe koa ʼe feiā? ʼE feala koa ke tou fiafia ʼi he fakakaumeʼa moʼoni pea mo fualoa?