Tou Fai He ʼu Tonu Fakapotopoto

1, 2. ʼE kotou leleiʼia koa te fai ʼo he ʼu tonu? Kotea takotou manatu ʼo ʼuhiga mo ʼihi tonu neʼe kotou fai?

ʼI TE ʼaho fuli ʼe lahi te ʼu tonu ʼe maʼua ke tou fai. Kotea takotou manatu ʼo ʼuhiga mo te fai ʼo he ʼu tonu? Ko ʼihi hahaʼi ʼe natou fiafia ʼi te fai ʼo he ʼu tonu maʼa natou. Kia natou, ʼe tonu pe ke fai e natou totonu ʼanatou tonu fuli. Pea ʼe mole natou leleiʼia te manatu ʼae ke toʼo e he tahi kehe te tonu maʼa natou. Ko ʼihi ʼe natou matataku ʼi te fai ʼo te ʼu tonu maʼuhiga. Ko ʼihi age ʼe natou kumi tokoni ʼi te ʼu tohi peʼe ki te hahaʼi faitokoni. Pea ʼe toe lahi mo te paʼaga ʼae ʼe natou fakaʼaogaʼi ke natou maʼu te tokoni ʼae ʼe ʼaoga moʼo fai ʼo ni tonu.

² Tokolahi ia tatou ʼe tou mahino ko ʼihi tonu ʼe mole ʼa tatou tona fai, kaʼe ʼe lahi te ʼu tonu ʼo ʼuhiga mo tatou totonu ʼe feala ke tou fai ʼi totatou maʼuli. (Kal. 6:5) Kaʼe, ʼe lagi tou iloʼi lelei ko te ʼu tonu fuli ʼae ʼe tou fai ʼe mole fakapotopoto peʼe mole fua lelei kia tatou.

3. Kotea te ʼu fakatotonu ʼe tokoni mai ke tou fai ni tonu? Pea he ko ʼe ʼe mole faigafua tuʼumaʼu?

³ ʼE tou kaugana kia Sehova, pea ʼe feala ke tou fiafia heʼe ina foaki mai he ʼu fakatotonu ʼo ʼuhiga mo ni faʼahi maʼuhiga ʼo totatou maʼuli. Kapau ʼe tou mulimuli ki ʼana fakatotonu, pea ʼe tou iloʼi ʼe feala ke tou fai ni tonu ʼe leleiʼia e Sehova mo fua lelei kia tatou. Kaʼe ʼe mole foaki mai ʼi te Tohi-Tapu he ʼu fakatotonu ki te ʼu fihifihia peʼe aluʼaga fuli. Kotea anai te tonu ʼe maʼua ke tou fai? Ohage la, ʼe ui ʼi te Tohi-Tapu ke ʼaua naʼa tou kaihaʼa. (Efe. 4:28) Kaʼe ʼe ui e ʼihi ʼe mole kovi te toʼo e he tahi he meʼa ʼe mole ʼaʼana, heʼe ko te kiʼi meʼa noa pe pea ʼe ʼaoga moʼoni te meʼa ʼaia ki ai. Logo ai ʼe ui e ʼihi ʼe mole he fakatotonu ʼe fakaha lelei ai pe kotea ʼae ʼe tonu ke tou fai, kaʼe ʼe feafeaʼi anai hatatou fai he tonu? Kotea ʼae ka tokoni mai anai?

TOU FAI ʼATATOU TONU ʼAKI HE AGAFAKAPOTOPOTO

4. Kotea te tokoni ʼe tou maʼu ʼi ʼihi temi moka ʼe tonu ke tou fai he tonu?

⁴ Moka tou ui ki he Kilisitiano ʼe ʼi ai te tonu maʼuhiga ʼe tonu ke tou fai, pea ʼe lagi ina ui mai anai ke tou fai te tonu ʼaia ʼaki he agafakapotopoto. ʼE ko he tokoni lelei ʼaia. ʼI te Tohi-Tapu, ʼe foaki mai te tokoni ʼaeni ke ʼaua naʼa tou fai fakavilivili he tonu: “Ko ia ae e gaohi mea fakavilivili e tau anai mo te hoge.” (Taag. 21:5) Kaʼe kotea te fakaʼuhiga ʼo te fai he tonu ʼaki he agafakapotopoto? ʼE fakaʼuhiga pe koa ʼe tonu ke tou fakakaukauʼi fakalelei he aluʼaga, ke tou fakapotopoto, pea mo tou faiga ke tou mahino kia meʼa fuli ʼi muʼa ʼo te fai ʼo he tonu? Ko te ʼu faʼahi fuli ʼaia ʼe maʼuhiga, kaʼe ko te maʼu ʼo te agafakapotopoto ʼe mole gata ai.—Loma 12:3; 1 Pet. 4:7.

5. He ko ʼe ʼe mole haohaoa ʼatatou manatu?

⁵ ʼE mole he tahi ia tatou neʼe tupu ake mo he ʼatamai haohaoa. ʼE tou agahala mo heʼe haohaoa fuli, koia ʼae ʼe mole haohaoa ai totatou malolō fakasino peʼe ko ʼatatou manatu. (Pes. 51:7; Loma 3:23) Pea ko te tokolahi ia tatou neʼe fakakiviʼi e Satana ʼo kaku ki tatatou iloʼi ia Sehova pea mo ʼana pelesepeto. (2 Ko. 4:4; Tito 3:3) Koia kapau ʼe tou fakatafito pe ʼatatou tonu ki te meʼa ʼae ʼe matatonu mo fakapotopoto kia tatou, pea ʼe feala ke tou faihala tatau aipe pe neʼe lahi te temi ʼae neʼe tou fakakaukau ki ai.—Taag. 14:12.

6. Kotea ʼae ʼe lava tokoni mai ke tou fakapotopoto?

⁶ Logo la ʼe tou heʼe haohaoa, kaʼe ko Sehova, tatatou Tamai ʼae ʼi selo, ʼe haohaoa ia ia faʼahi fuli. (Tet. 32:4) Neʼe ina foaki mai te ʼu meʼa ʼae ʼe ʼaoga ke fetogi ai tatatou faʼahiga manatu pea mo tou ako ai ke tou fakapotopoto. (Lau ia 2 Timoteo 1:7.) ʼI totatou ʼuhiga Kilisitiano, ʼe tou loto ke fakapotopoto ʼatatou manatu mo tatatou fakakaukau pea mo tatatou aga. Koia ʼe ʼaoga ai ke tou ako ke tou puleʼi ʼatatou manatu mo te ʼu meʼa ʼae ʼe tou logoʼi. Pea ʼe toe ʼaoga ke tou faʼifaʼitakiʼi te faʼahiga manatu ʼa Sehova pea mo tana aga.

7, 8. Kotea te aluʼaga ʼe ha ai ʼe feala hatatou fai he tonu ʼe lelei logo la te ʼu fakaneke ʼa ʼihi pea mo te ʼu faigataʼaia?

⁷ Tou toʼo he faʼifaʼitaki. Ko ʼihi hahaʼi matapule, ʼe ko hanatou aga ʼi fenua tanatou fakafolau ʼanatou toe kei meamea ki tonatou famili ʼi tonatou fenua. ʼI tanatou fai ʼaia, ʼe feala ai ki te ʼu matuʼā ke natou hoko atu tanatou gaue pea mo maʼu paʼaga ʼi te fenua ʼae ʼe natou nonofo ai.a Ko te fafine neʼe ina maʼu tana toe tagata kei meamea. ʼI te temi ʼaia, neʼe kua ina kamata ako te Tohi-Tapu pea mo maʼuliʼi te ʼu manatu ʼae neʼe ina ako. Neʼe kamata ui age e ʼona kaumeʼa mo kaiga kia ia mo tona ʼohoana, ʼe ko he aga ʼi fenua te fakafolau ʼo te ʼu toe kei meamea ki tonatou famili ke feala ai honatou pusiaki e te ʼu kui. Kaʼe neʼe mahino te fafine, neʼe foaki age e Sehova kia naua taumatuʼa te maʼua ʼae ke nā pusiaki tanā tamasiʼi. (Pes. 127:3; Efe. 6:4) ʼE tonu koa ke mulimuli ki te aga ʼi fenua ʼaia he neʼe manatu e te tokolahi neʼe ko he faʼahi neʼe tonu ke fai? Peʼe ina maʼuliʼi koa te ʼu manatu ʼae neʼe ina ako mai te Tohi-Tapu, logo la te fihifihia fakapaʼaga ʼae ka tau mo naua pea mo tona fatufatuʼi e ʼihi? Kotea ʼae ka kotou fai anai mo ka na pau la neʼe ko koutou?

⁸ Neʼe loto hoha te fafine ʼuhi ko tona fakaneke e ʼihi. Koia neʼe faikole ai kia Sehova ʼo ʼuhiga mo te ʼu meʼa ʼae neʼe ina logoʼi pea mo kole mamahi ia tana takitaki. ʼI tana palalau kia ia ʼae ʼe ina fai tana ako pea mo ʼihi ʼi te kokelekasio, neʼe kamata mahino ai pe kotea te manatu ʼa Sehova ʼo ʼuhiga mo te aluʼaga ʼaia. Neʼe toe mahino ai, kapau ʼe nofo mamaʼo tana tamasiʼi mai ʼana matuʼā, pea ʼe fakatupu kovi anai moka lahilahi ake. ʼI tana ʼosi fakakaukauʼi lelei pe kotea ʼae ʼe ui ʼi te Tohi-Tapu ʼo ʼuhiga mo tona aluʼaga, neʼe ina fai ai te tonu ʼae ke ina taupau tana tamasiʼi. Neʼe sio tona ʼohoana ki te tokoni ʼo te kokelekasio kia naua pea mo te maʼuli malolō lelei ʼo tanā kiʼi toe. Pea neʼe ina tali ai ke fai hana ako Tohi-Tapu pea mo kamata kau ki te ʼu fono mo tona ʼohoana.

9, 10. Kotea te fakaʼuhiga ʼo te maʼu ʼo te agafakapotopoto? ʼE tou lava maʼu feafeaʼi te agafakapotopoto?

⁹ ʼE ko he faʼifaʼitaki pe ʼaia, kaʼe ʼe ha ai ko te maʼu ʼo te agafakapotopoto ʼe mole gata ʼaki pe tatatou fai te meʼa ʼae ʼe matatonu kia tatou pea mo ʼae ʼe lelei peʼe faigafua age ki ʼihi. ʼE heʼe haohaoa totatou ʼatamai mo totatou loto pea ʼe feala ke fakatatau ki he ʼuasi ʼe tomuʼa fau peʼe tuai fau. Kapau ʼe tou falala ki he ʼuasi ʼe hala, pea ʼe feala ke tou tau mo ni faigataʼaia lahi. (Sel. 17:9) Ke tou tekeʼi te ʼu faigataʼaia, ʼe ʼaoga ke tou tokakaga ke takitaki ʼatatou fakakaukau mo ʼatatou manatu e te ʼu pelesepeto ʼa te ʼAtua.—Lau ia Esaia 55:8, 9.

¹⁰ ʼE tou maʼu te tokoni poto ʼaeni ʼi te Tohi-Tapu: “Falala [kia Sehova] i tou loto katoa, kae aua naa ke falala ki tou poto, ke ke falala kia ia i ou ala fuli, pea e ina fakatokatoka anai ou ala.” (Taag. 3:5, 6) Kotou tokagaʼi ʼe ui “aua naa ke falala ki tou poto” kaʼe “ke ke falala” kia Sehova. ʼE ko Ia tokotahi pe ʼae ʼe katoa tana agafakapotopoto. Koia ʼi te temi fuli pe ʼae ʼe maʼua ai ke tou fai he tonu, ʼe ʼaoga ke tou kumi ʼi te Tohi-Tapu te manatu ʼa te ʼAtua ʼo ʼuhiga mo he aluʼaga, ke feala ai hatatou fai te tonu ʼae ʼe loto ki ai. Kapau ʼe tou fia maʼu te agafakapotopoto, pea ʼe tonu ke tou faʼifaʼitakiʼi te faʼahiga manatu ʼa Sehova.

TOU AKOAKO TE FAKAʼAOGAʼI ʼO TOTATOU FEALAGIA FAKAKAUKAU

11. Kotea ʼae ʼe ʼaoga ke fai e he tahi ke ina fai ni tonu ʼe fakapotopoto?

¹¹ ʼE mole faigafua te iloʼi ʼo te fai ʼo ni tonu ʼe fakapotopoto pea mo mulimuli ki ai. ʼE feala ke faigataʼa te faʼahi ʼaia tafitō la kia natou ʼae neʼe hoki papitema mo natou ʼae neʼe hoki tuputupu pe ʼi te moʼoni. Kaʼe ʼe feala hanatou tuputupu moʼoni ʼi te faʼahi fakalaumalie. ʼE fakahigoaʼi natou ʼi te Tohi-Tapu ko ni toe kei meamea. Heʼe natou hage ko he tamasiʼi ʼe kamakamata haʼele ʼae ʼe liliu ʼaki tana faiga tuʼumaʼu ʼo poto ʼi te haʼele. ʼE toe feia mo natou ʼae ʼe natou ako ke natou iloʼi te fai ʼo ni tonu ʼe fakapotopoto. Neʼe ui e te apositolo ko Paulo ko te hahaʼi ʼae kua fotufotuʼa ʼe ko natou ʼae “kua natou maʼu te ʼu fealagia fakakaukau kua akoako ke natou iloʼi te meʼa ʼae ʼe lelei pea mo te meʼa ʼae ʼe kovi.” ʼAki te kupu “fakaʼaogaʼi” mo “akoako,” ʼe ha ai ʼe ʼaoga ke tou hoko atu ʼatatou faiga. Koia ʼe ʼaoga ai kia natou kei foʼofoʼou ke natou hoko atu tanatou faiga ʼae ke natou iloʼi te fai ʼo ni tonu ʼe fakapotopoto.—Hep. 5:13, 14, MN.

12. Kotou fakaha pe tou lava fakaʼaogaʼi feafeaʼi totatou fealagia fakakaukau moʼo fai he ʼu tonu ʼe fakapotopoto.

¹² ʼI te ʼaho fuli ʼe maʼua ke tou fai ni tonu ʼe maʼuhiga peʼe mole faʼa maʼuhiga. ʼO mulimuli ki te sivi neʼe fai, ʼe tou tautau fakatafito ʼatatou tonu ki ʼatatou agamahani kaʼe mole fakakaukauʼi lelei. Ohage la, ʼi te uhu fuli ʼe tonu ke kotou filifili pe ko te teu fea ʼae ka kotou tui. Kia koutou, ʼe lagi mole faʼa maʼuhiga te faʼahi ʼaia pea ʼe mole ʼaoga ke lahi te temi ʼae ʼe kotou fakakaukau ki ai. Kaʼe ʼe maʼuhiga ke kotou vakaʼi pe ko te teu ʼae ʼe kotou tui ʼe tuha mo he kaugana ʼa Sehova. (2 Ko. 6:3, 4) Moka kotou toʼo mutu ʼi meʼa, pea ʼe lagi kotou manatu ki te faʼahiga teu ʼae ʼe leleiʼia e te tokolahi. Kaʼe ʼe kotou toe manatu koa pe fakapoipoi te mutu ʼi meʼa ʼaia pea mo feʼauga takotou foʼi falā moʼona totogi ʼaki? Ka lelei tatatou filifili ʼi te ʼu meʼa liliki, pea ʼe feala ai ke tou akoako totatou fealagia fakakaukau. Kapau ʼe tou fai feia, pea ʼe tokoni mai anai ke tou fai he tonu ʼe lelei ʼi te ʼu faʼahi ʼae ʼe maʼuhiga age.—Luka 16:10; 1 Ko. 10:31.

TOU LOTOMALOHI KE TOU FAI TE MEʼA ʼAE ʼE LELEI

13. Kotea ʼae ka tokoni mai ke tou mulimuli ki te tonu ʼae neʼe tou fai?

¹³ Maʼia moka tou fai te tonu ʼae ʼe lelei, ʼe faigataʼa hatatou mulimuli tuʼumaʼu ki ai. Ohage la, ko ʼihi ʼe natou loto ke natou fakagata tanatou suluka, kaʼe ʼe mole natou lavaʼi. Koia ʼe ʼaoga ai ke tou maʼu he lotomalohi ke tou mulimuli ki te tonu ʼae neʼe tou fai. ʼE ui e ʼihi ko te lotomalohi ʼe hage ko he ivi, heʼe ka gaueʼi tuʼumaʼu he ivi, pea ʼe liliu anai ʼo malohi, kaʼe kapau ʼe mole tou gaueʼi, pea ʼe liliu anai ʼo vaivai. Kotea ʼae ʼe lava tokoni mai ke tou lotomalohi ʼi te fai ʼo te ʼu meʼa ʼae neʼe tou fakatotonu ki ai? ʼE ʼaoga ke tou falala ki te tokoni ʼa Sehova.—Lau ia Filipe 2:13.

14. He ko ʼe neʼe lotomalohi Paulo ke mulimuli ki te meʼa ʼae neʼe tonu ke ina fai?

¹⁴ Neʼe mahino ia Paulo ki te faigataʼa ʼo te fai ʼo te meʼa ʼae ʼe lelei ʼuhi ko te ʼu aluʼaga neʼe hoko ki ai. ʼI te tahi lakaga neʼe ina ui neʼe fakaʼamu ke ina fai te meʼa ʼae ʼe “lelei,” kaʼe ʼi ʼihi temi neʼe faigataʼa kia ia. Neʼe ina iloʼi te meʼa ʼae neʼe loto ki ai pea mo te meʼa ʼae neʼe tonu ke ina fai, kaʼe ʼihi temi neʼe mole ina lava fai te ʼu faʼahi ʼaia. Neʼe ina fakamoʼoni fenei: “I te takele o toku loto, e au fakafiafia i te lao a te Atua; kae e au sio i oku kogasino ki he tahi age lao ae e tau fakafehagai ki te lao o toku atamai, pea e ina fakapopulai au i te lao o te agahala ae e nofo i oku kogasino.” Kaʼe neʼe ʼi ai tona tupuʼaga lelei ke lotofalala ai. He neʼe ina ui fenei: “Ke fakafetai ki te Atua [ʼaki] ia Sesu-Kilisito totatou Aliki!” (Loma 7:18, 22-25) Neʼe ina toe tohi fenei: “E au fealagia te u mea fuli i ae e ina fakamalohii au.”—Filp. 4:13.

15. He ko ʼe ʼe ʼaoga ke tou fakatotonu ke tou fai te meʼa ʼae ʼe lelei?

¹⁵ Ke leleiʼia tatou e te ʼAtua, ʼe ʼaoga ke tou filifili ke tou fai te meʼa ʼae ʼe lelei pea mo tou fakatotonu ke tou mulimuli ki ai. Kotou manatuʼi te ʼu palalau ʼaeni neʼe fai e Elia ki te kau atolasio ʼa Paale mo te kau aposeta Iselaele ʼi te Moʼuga ʼo Kalemelo: “E kaku anai ki afea takotou loto vaelua? Kapau e Atua [ia Sehova], kotou mulimuli ia ia; pea kapau ko Paale, kotou mulimuli ia ia!” (1 Hau 18:21) Neʼe iloʼi e te ʼu foha ʼo Iselaele neʼe tonu ke natou atolasio ʼateaina pe kia Sehova. Neʼe natou “loto vaelua” he neʼe natou faiga ke natou tauhi kia Sehova mo Paale. Kaʼe neʼe mole feia ia Sosue. ʼI ni taʼu ki muʼa atu, neʼe ina ui fenei ki te kau Iselaele: “Kapau e mole kotou fia tauhi anai [kia Sehova], e kotou filifili leva i te aho nei ia ia ae e kotou fia tauhi ki ai. . . . Ko au mo toku famili, e matou tauhi anai [kia Sehova].” (Sos. 24:15) Kotea te tapuakina neʼe ina maʼu mo natou ʼae neʼe nonofo agatonu? Neʼe feala hanatou ulu ki te Kele ʼo Te Fakapapau, ʼae neʼe ko he “fenua . . . e tafe ai te hua manu mo te hua meli.”—Sos. 5:6.

TOU FAI HE ʼU TONU FAKAPOTOPOTO PEA ʼE TAPUAKINA ANAI TATOU

16, 17. Kotea te ʼu tapuakina ʼe tou maʼu moka tou fai te ʼu tonu ʼae ʼe leleiʼia e Sehova?

¹⁶ Ko te tehina neʼe hoki papitema pe, pea neʼe maʼu ʼana toe ʼe toko tolu mo tona ʼohoana. ʼI tana gaue ʼe mole lelei tona totogi, kaʼe neʼe ina filifili te gaue ʼaia ke feala ʼi te ʼu fakaʼosi vahaʼa hana kau mo tona kiʼi famili ki te ʼu fono pea mo te minisitelio. ʼI te tahi ʼaho, neʼe ui age e tona kauga gaue ke nā olo ki te tahi fale gaue ʼe lahi age ai te totogi pea mo te ʼu lelei ka nā maʼu anai. Neʼe fakakaukau mo faikole te tehina ʼo ʼuhiga mo te tonu ʼae ka ina fai. Neʼe mahino kia ia kapau ʼe ina tali te gaue ʼaia, pea ʼe lagi talitali fualoa anai ke feala hana mole gaue ʼi te ʼu fakaʼosi vahaʼa. Ka na pau la neʼe ko koutou, kotea anai ka kotou fai?

¹⁷ ʼI tana ʼosi fakakaukauʼi pe malave feafeaʼi anai te tonu ʼae ka ina fai ki ʼana felogoʼi mo Sehova, neʼe mole ina tali te gaue ʼaia ʼae ʼe lahi age ai te totogi. ʼI takotou manatu neʼe fakahemala koa ki muli age ʼi tana fai te tonu ʼaia? Kailoa ia. Heʼe kia ia, neʼe maʼuhiga age tana fakaovi mo tona kiʼi famili kia Sehova ʼi hana maʼu he foʼi falā ʼe lahi age. Neʼe fiafia ʼaupito te tehina mo tona ʼohoana ʼi te ui age e tanā taʼahine ʼe taʼu hogofulu, ʼe ʼofa ia naua mo te ʼu tehina mo tuagaʼane pea ʼe ʼofa lahi kia Sehova. Neʼe ina ui ʼe ina fia foaki tona maʼuli kia Sehova pea mo papitema. Neʼe fua lelei kia ia te faʼifaʼitaki ʼae neʼe tuku e tana tamai ʼi tana fakamuʼamuʼa te tauhi ʼae kia Sehova.

18. He ko ʼe ʼe maʼuhiga ke tou fai ni tonu ʼe fakapotopoto ʼi te ʼaho fuli?

¹⁸ Ohage pe ko te taki e Moisese te kau Iselaele ʼi te toafa, ko Sesu Kilisito ʼe ina taki te hahaʼi ʼa te ʼAtua ʼi te malama ʼa Satana talu mai fualoa. Kua tau ovi pe tona fakaʼauha. Pea ohage pe ko te taki e Sosue te kau Iselaele ki te Kele ʼo Te Fakapapau, ʼe taki anai e Sesu ʼana tisipulo ki te malama foʼou mo faitotonu ʼae neʼe fakapapauʼi mai. (2 Pet. 3:13) ʼI te kua ovi mai ʼo te ʼaho ʼaia, ʼe mole ko he agafakapotopoto anai hatatou toe liliu ki te ʼu manatu, mo agamahani, mo pelesepeto pea mo te ʼu fakatuʼutuʼu ʼae neʼe tou maʼu ʼi muʼa atu. ʼE ʼaoga ke toe lahi age tatatou mahino ki te faʼahiga maʼuli ʼae ʼe leleiʼia e te ʼAtua ke tou maʼu. (Loma 12:2; 2 Ko. 13:5) Ke fakapotopoto te ʼu tonu mo te ʼu filifili ʼae ʼe tou fai, ke tou liliu ai ko te faʼahiga tagata ʼae ka tapuakinaʼi anai e Sehova ʼo talu ai.—Lau ia Hepeleo 10:38, 39.