Ke Tou Leleiʼia Te Loto Foaki Mo Te Fakapotopoto ʼa Sehova

1, 2. Kotea ʼae ʼe feala anai ke tou fai ki te heʼe gata?

KO TE tuagaʼane ʼe higoa ko Monika kua teitei taʼu 35 tana kua ʼohoana, ʼe ina ui fenei: “Ko au mo toku ʼohoana ʼe ma feiloʼiʼaki lelei. Kaʼe maʼia ʼi te hili ʼo te ʼu taʼu ʼaia, ʼe kei ma ako pe te ʼu faʼahi neʼe heʼeki ma iloʼi ʼo ʼuhiga mo maua!” Tokolahi ia tatou ʼe feala ke tou ui te faʼahi ʼaia ʼo ʼuhiga mo totatou ʼohoana, peʼe ko ʼotatou kaumeʼa.

² ʼE tou fiafia moka tou iloʼi lelei age natou ʼae ʼe tou ʼoʼofa ai. Kaʼe ʼe toe lahi age tatatou fiafia ʼi tatatou iloʼi lelei age ia Sehova, totatou kaumeʼa lelei tokotahi. ʼE mole feala ia ke tou iloʼi ia meʼa fuli ʼo ʼuhiga mo ia. (Loma 11:33) Kaʼe ʼe feala anai hatatou haga ako pea mo leleiʼia lahi age ki te heʼe gata ia te ʼu kalitate ʼo Sehova.—Ekl. 3:11.

3. Kotea ʼae ka tou ako ʼi te alatike ʼaeni?

³ Ko te alatike ʼae neʼe hoki ʼosi atu, neʼe tokoni mai ke tou leleiʼia lahi age te ʼu kalitate ʼe lua ʼo Sehova. Neʼe tou ako ʼe faigafua te fakaovi kia te ia pea ʼe mole fakapalatahi. ʼI te alatike ʼaeni, ʼe tou ako ai anai ko Sehova ʼe loto foaki mo fakapotopoto. ʼE tou mahino lelei ai anai ko Sehova “e agalelei . . . ki te u tagata fuli, pea e mafola tona manavaofa ki ana gaueaga fuli.”—Pes. 145:9.

KO SEHOVA ʼE LOTO FOAKI

4. Kotea te fakaʼuhiga ʼo he tahi ʼe loto foaki?

⁴ Kotea te fakaʼuhiga ʼo he tahi ʼe loto foaki? ʼE tou maʼu tona tali ʼi te ʼu palalau ʼaeni ʼa Sesu ia Gaue 20:35: “E lahi age te manuia i te foaki i te tali.” Koia, ko he tahi ʼe loto foaki ʼe fiafia ʼi te foaki ʼo tona temi, mo tona malohi pea mo te ʼu meʼa ʼe ina maʼu moʼo tokoni ki ʼihi. ʼE mole loto foaki ʼuhi heʼe totogi kovi te ʼu meʼa ʼae ʼe ina foaki, kaʼe ʼuhi heʼe loto moʼoni ki ai. (Lau ia 2 Kolinito 9:7.) ʼE mole he tahi ʼe loto foaki ohage ko Sehova, totatou “Atua manuia.”—1 Tim. 1:11.

5. ʼE fakaha feafeaʼi e Sehova ia tana loto foaki?

⁵ ʼE fakaha feafeaʼi e Sehova ia tana loto foaki? ʼE ui fenei ʼi te Tohi-Tapu: “E agalelei [Sehova] ki te tagata fuli.” (Ko matou ʼae neʼe matou fakaʼiloga keheʼi.) ʼE ina foaki ki te hahaʼi fuli te ʼu meʼa ʼae ʼe ʼaoga kia natou, maʼia mo natou ʼe heʼeki tauhi kia te ia. “E ina fakahopo fakatatau tana laa ki te kau agakovi pea mo te kau agalelei, pea e ina fakato fakatatau tana ua ki te kau agatonu pea mo te kau agahala.” (Mat. 5:45) Koia neʼe feala ai ke ui e Paulo ki ʼihi ʼae neʼe mole ko he ʼu Kilisitiano, ko Sehova neʼe ina “fai te u mea lelei, i tana foaki kia koutou mai te lagi te u ua mo te u temi mahu, i tana foaki atu kia koutou te meakai o lahi aupito, pea mo tana fakafonu koutou aki te fiafia.” (Gaue 14:17) ʼE ha lelei mai ai ko Sehova ʼe loto foaki ki te hahaʼi fuape.—Luka 6:35.

6, 7. (1) ʼE fiafia tafitō ia Sehova ʼi te tokoni kia ai? (2) Kotea te faʼifaʼitaki ʼe ha ai ʼe tokaga te ʼAtua ki te ʼu meʼa ʼae ʼe ʼaoga ki ʼana kaugana?

⁶ ʼE fiafia tafitō ia Sehova ʼi te foaki ki ʼana kaugana te ʼu meʼa ʼae ʼe ʼaoga kia natou. Neʼe ui fenei e te Hau ko Tavite: “Nee au tupulaga, pea kua au matua, kae e heeki au sio nee siaki te tagata agatonu, pe nee kai kolekole tona hakoga tana pane.” (Pes. 37:25) Tokolahi te kau Kilisitiano agatonu neʼe natou sio ki te tokaga ʼae ʼa Sehova kia natou ʼi tonatou maʼuli.

⁷ Ohage la, kua hili ki ai ni taʼu, neʼe hoko he aluʼaga faigataʼa ki te pionie ʼe higoa ko Nancy. Neʼe tonu ke ina maʼu he 6 086 moʼo huʼi ʼaki tona koga fale ʼi te ʼaho ake. Kaʼe neʼe mole ina maʼu te falā ʼaia. ʼE ina ui fenei: “Neʼe au faikole ʼo ʼuhiga mo te faigataʼaia ʼaia, pea hoki au alu leva ki taku gaue ʼi te fale kai. Neʼe mole au ʼamanaki ʼe lahi anai te ʼu meʼa ʼofa ʼae ka foaki mai ʼi te afiafi ʼaia, heʼe ʼi te agamahani neʼe mole faʼa hahaʼi te ʼaho ʼaia ʼi te vahaʼa. Kaʼe neʼe au punamaʼuli, he neʼe hahaʼi natou neʼe ʼomai ki te fale kai ʼi te po ʼaia. ʼI te ʼosi ʼo taku gaue neʼe au tanaki leva te ʼu meʼa ʼofa ʼae neʼe foaki mai, pea ko te lahi ʼo te falā neʼe ko te 6 086.” ʼE tui papau ia Nancy neʼe ko Sehova ʼae neʼe tokoni age ki ai ke ina maʼu tonu te meʼa ʼae neʼe ʼaoga ki ai.—Mat. 6:33.

8. Kotea te meʼa ʼofa lelei ʼaupito ʼae neʼe foaki mai e Sehova?

⁸ ʼE foaki e Sehova te meʼa ʼofa ʼae ʼe lelei ʼaupito ki te hahaʼi fuli. Kotea te meʼa ʼofa ʼaia? ʼE ko te sakilifisio ʼo tona ʼAlo. Neʼe ui fenei e Sesu: “He nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.” (Soa. 3:16) ʼI heni, ko te kupu “malamanei” ʼe fakaʼuhiga ki te hahaʼi fuli. Koia ʼe foaki e Sehova tana meʼa ʼofa lelei ʼaupito ki te hahaʼi fuli ʼae ʼe natou loto ki ai. Ko ia ʼae ʼe tui kia Sesu ʼe ina maʼu anai te maʼuli heʼe gata! (Soa. 10:10) ʼE ko he fakamoʼoni lahi ʼaia ko Sehova ʼe loto foaki.

KE TOU LOTO FOAKI OHAGE KO SEHOVA

9. ʼE feafeaʼi hatatou loto foaki ohage ko Sehova?

⁹ ʼE feafeaʼi hatatou loto foaki ohage ko Sehova? Ohage pe ko Sehova ʼae ʼe ina foaki fakalahi mai ia meʼa fuli ke tou fiafia ai, ʼe tonu foki mo tatou ke tou foaki ki ʼihi he ʼu meʼa ke natou fiafia ai. (1 Tim. 6:17-19) ʼE tou fiafia ʼi te foaki he ʼu meʼa ʼofa ki ʼotatou kaumeʼa mo ʼotatou famili pea mo tokoni kia natou ʼae ʼe ʼaoga ki ai. (Lau ia Tetelonome 15:7.) Kotea ʼae ʼe lava tokoni mai ke tou manatuʼi ai ʼe tonu ke tou loto foaki? Ko ʼihi neʼe natou fakatotonu ʼi te temi ʼae ʼe foaki age he meʼa ʼofa, pea ʼe natou kumi anai he faigamalie moʼo foaki he meʼa ʼofa ki he tahi age. Tokolahi ʼi te hahaʼi ʼa Sehova ia ʼaho nei ʼe ko he ʼu faʼifaʼitaki lelei ʼo ʼuhiga mo te loto foaki.

10. Kotea te faʼahi lelei ʼae ʼe feala ai ke tou loto foaki?

¹⁰ Ko te faʼahi lelei ʼae ʼe feala ai ke tou loto foaki, ʼe ko te fakaʼaogaʼi ʼo totatou temi, mo totatou malohi moʼo tokoni pea mo fakalotomalohiʼi ʼihi. (Kal. 6:10) ʼE kotou loto foaki feia koa? ʼE feala ke kotou fai te ʼu fehuʼi ʼaeni: “ ʼE au fakaha koa ʼe au loto lelei ke au fagono ki ʼihi? Kapau ʼe kole mai e he tahi ke au tokoni age moʼo fai he gaue peʼe ke au fai hana fakatau, pea ʼe au loto lelei koa ki ai? Neʼe ko ʼanafea ʼae neʼe au vikiʼi ai he tahi ʼo te famili peʼe ʼi te kokelekasio?” Kapau ʼe tou “fakamahani ʼi te foaki,” pea ʼe tou ovi age ai kia Sehova mo ʼotatou kaumeʼa.—Luka 6:38, MN; Taag. 19:17.

11. Kotea ʼihi faʼahi ʼe feala ai ke tou loto foaki kia Sehova?

¹¹ ʼE toe feala foki ke tou loto foaki kia Sehova. ʼE fakalotomalohiʼi tatou ʼi te Tohi-Tapu ke tou fakamaʼuhigaʼi ia Sehova ʼaki ʼatatou “mealelei.” (Taag. 3:9) ʼI te ʼu meʼa lelei ʼaia ʼe kau ai totatou temi, totatou malohi pea mo te falā ʼae ʼe feala ke tou fakaʼaogaʼi ʼi tana tauhi. Maʼia mo te tamaliki liliki ʼe feala ke natou ako ke natou loto foaki kia Sehova. ʼE ui fenei e te tamai ʼe higoa ko Jason: “Moka foaki e tomatou kiʼi famili he meʼa ʼofa ʼi te Fale Fono, pea ʼe ma tuku ke ʼai e tamā fanau te falā ki te puha meʼa ʼofa. ʼE natou fiafia ai heʼe natou ui ʼe hage pe ʼe natou foaki he meʼa maʼa Sehova.” Kapau ʼe mahino te fanau ʼi tanatou kei veliveli ʼe fakatupu fiafia te foaki kia Sehova, pea ʼe hoko atu anai tanatou loto foaki kia te ia moka natou lalahi ake.—Taag. 22:6.

KO SEHOVA ʼE FAKAPOTOPOTO

12. Kotea te fakaʼuhiga ʼo he tahi ʼe fakapotopoto?

¹² Ko te tahi kalitate fakatalakitupua ʼo Sehova, ʼe ko tana fakapotopoto. Kotea te fakaʼuhiga ʼo he tahi ʼe fakapotopoto? (Tito 3:1, 2) ʼE ko he tahi ʼe loto lelei ke mulimuli ki te loto ʼo he tahi, kaʼe ʼe mole pipiki fau ia ki te lao. ʼE mole aga fefeka. ʼE agalelei mo te hahaʼi pea ʼe faiga moʼoni ke mahino ki ʼonatou aluʼaga. ʼE loto lelei ke fagono ki ʼihi, pea moka ʼe feala, ʼe ina fakagafua kia natou ke natou maʼu peʼe fai te meʼa ʼae ʼe natou loto ki ai.

13, 14. (1) ʼE fakaha feafeaʼi e Sehova tana fakapotopoto? (2) ʼO ʼuhiga mo te fakapotopoto, kotea te ako ʼe kotou taʼofi mai te aga ʼae ʼa te ʼAtua kia Lote?

¹³ ʼE fakaha feafeaʼi e Sehova tana fakapotopoto? ʼE ina tokagaʼi te ʼu meʼa ʼae ʼe logoʼi e ʼana kaugana pea ʼe ina tau tuku ke natou fai te meʼa ʼae ʼe natou loto ki ai. Ohage la kotou fakakaukauʼi te aga ʼae ʼa Sehova ki te tagata agatonu ko Lote. ʼI te temi ʼae neʼe tonu ai ke fakaʼauha e Sehova te ʼu kolo ko Sotoma mo Komola, neʼe ina fakatotonu lelei kia Lote ke hola ki te ʼu moʼuga. Kaʼe neʼe kole mamahi e Lote kia Sehova ke ina fakagafua ke alu ki te tahi koga meʼa, pea ʼe mole tou iloʼi tona tupuʼaga. Kotou fakakaukauʼi age muʼa te faʼahi ʼaeni: Neʼe kole e Lote kia Sehova ke ina fetogi ʼAna fakatotonu!—Lau ia Senesi 19:17-20.

¹⁴ Moka kotou lau te fakamatala ʼaia, ʼe feala ke kotou manatu neʼe vaivai te tui ʼa Lote peʼe neʼe talagataʼa. ʼE moʼoni neʼe mole ʼaoga kia Lote ke mataku, he neʼe feala pe ke haofaki ia ia e Sehova ʼi he potu pe. Kaʼe neʼe mataku Lote. Neʼe fakaʼapaʼapa ia Sehova ki te ʼu meʼa ʼae neʼe logoʼi e Lote ʼo ina fakagafua ai kia ia ke hola ki te tahi kolo, logola neʼe kua fakatuʼutuʼu e Sehova ke ina fakaʼauha mo te kolo ʼaia. (Lau ia Senesi 19:21, 22.) ʼE ha lelei mai ai ko Sehova ʼe feala ke ina fetogi ʼana fakatuʼutuʼu pea ʼe mole aga fefeka. ʼE fakapotopoto tuʼumaʼu pe ia.

15, 16. Neʼe ha feafeaʼi te fakapotopoto ʼa Sehova ʼi te Lao ʼae neʼe ina foaki ki te kau Iselaele? (Vakaʼi te pakī ʼo te pasina 12.)

¹⁵ ʼI te Lao ʼae neʼe foaki e Sehova ki te kau Iselaele, neʼe toe ha ai tana fakapotopoto. Ohage la kapau neʼe mole lava foaki e he Iselaele he akeno peʼe ko he tao moʼo sakilifisioʼi he neʼe masiva, pea neʼe feala ke ina foaki he talua ʼi lupe peʼe ko he talua ʼi kulukulu. Kaʼe neʼe feafeaʼi mo kapau neʼe masiva ʼosi he Iselaele ʼo mole feala pe la hana foaki he talua ʼi kulukulu? Neʼe fakagafua e Sehova ke ina foaki he moʼi falena. Kaʼe neʼe mole ko te moʼi falena mahani ʼae neʼe loto ki ai Sehova. Neʼe ui ʼi te Lao neʼe tonu ko te faʼahiga falena ʼae neʼe fakaʼaogaʼi e te kau Iselaele moka natou fakaafe ni hahaʼi maʼuhiga. (Sen. 18:6) ʼE ha feafeaʼi ʼi te faʼifaʼitaki ʼaeni ko Sehova ʼe fakapotopoto?—Lau ia Levitiko 5:7, 11.

¹⁶ Fakakaukauʼi age muʼa ko koe ko he Iselaele pea ʼe ke masiva ʼosi. ʼI tau ʼaumai ki te tapenakulo tau moʼi falena ke ke momoli ko he sakilifisio, ʼe ke sio ai ki ʼihi kau Iselaele maʼu koloa ʼe natou ʼaumai ʼanatou manu ke momoli. ʼE lagi ke ufiufi ʼo ʼuhiga mo tau sakilifisio. Kaʼe ʼe ke manatuʼi ai leva ʼe maʼuhiga ʼaupito kia Sehova tau sakilifisio. Kotea tona tupuʼaga? He neʼe fakamaʼua ʼi te Lao ʼa Sehova ke ke ʼaumai ia te faʼahiga falena ʼae ʼe lelei ʼaupito. ʼE hage pe neʼe ui fenei atu e Sehova: “ ʼE au mahino ʼe mole feala ke ke foaki lahi mai ohage ko natou ake ʼae, kaʼe ʼe au toe iloʼi foki ʼe ke foaki mai kia te au te meʼa ʼae ʼe lelei ʼaupito.” ʼE mahino ia ʼe ha ʼi te faʼifaʼitaki ʼaia te fakapotopoto ʼa Sehova. ʼE mole ina kole ki ʼana kaugana te meʼa ʼae ʼe mole natou lavaʼi.—Pes. 103:14.

17. Kotea te tauhi ʼae ʼe tali e Sehova?

¹⁷ ʼE fakalotofimalie tatatou iloʼi ʼae ko Sehova ʼe fakapotopoto pea mo ina tali tatatou tauhi moka ʼe tou foaki kia te ia te meʼa ʼae ʼe lelei ʼaupito. (Kol. 3:23) Ko te tuagaʼane ʼi Italia kua vaivai matuʼa ʼe higoa ko Constance neʼe ina ui fenei: “Ko te meʼa ʼae neʼe au loto tuʼumaʼu ki ai, ko taku palalau ki te hahaʼi ʼo ʼuhiga mo toku Tupuʼaga. Koia ʼe au haga faifakamafola pea mo fai te ʼu ako Tohi-Tapu. ʼI ʼihi temi, ʼe au fakahemala ʼi te mole lahi age ʼo haku ʼu gaue ʼuhi ko te vaivai matuʼa. Kaʼe ʼe au iloʼi ko Sehova ʼe ina iloʼi ʼoku tuʼakoi pea ʼe ʼofa kia au pea mo ina leleiʼia te meʼa ʼae ʼe au lavaʼi.”

KE TOU FAKAPOTOPOTO OHAGE KO SEHOVA

18. Kotea te faʼahi ʼae ʼe feala ai ke faʼifaʼitakiʼi e te ʼu matuʼā ia Sehova?

¹⁸ ʼE feafeaʼi hatatou fakapotopoto ohage ko Sehova? Tou toe fakakaukauʼi te aga ʼae ʼa Sehova kia Lote. ʼE mahino ia neʼe ko Sehova te pule, pea neʼe feala ai ke ina fakatotonu kia Lote te koga meʼa ʼae neʼe tonu ke alu ki ai. Kaʼe neʼe agalelei ia Sehova; neʼe fagono ia ki te fakamahino e Lote ʼana manatu ʼo ina tuku ai Lote ke alu ki te koga meʼa ʼae neʼe loto ki ai. Kapau ʼe kotou maʼu fanau, ʼe feala koa hakotou faʼifaʼitakiʼi ia Sehova? ʼE lagi feala ke kotou fagono ki te faʼahi ʼae ʼe loto ki ai takotou fanau, pea moka ʼe feala, ke kotou fetogi te faʼahi ʼae ʼe kotou loto ki ai. ʼE lava feafeaʼi hakotou fai te faʼahi ʼaia? ʼI Te Tule Leʼo ʼo te ʼaho 1 ʼo Sepetepeli 2007, ʼe ui ai moka fakatuʼu e ʼihi matuʼā he ʼu lekula ke mulimuli ki ai te famili, pea ʼe natou fagono ki te faʼahi ʼae ʼe fia palalau ki ai te fanau. Ohage la, ʼe feala ke fakatuʼu e te ʼu matuʼā he hola ʼe tonu ai ki te fanau ke natou toe liliu mai ki fale mo kapau ʼe olo ʼo haʼele poʼuli. ʼE mahino ia ʼe fakahoko e te ʼu matuʼā tonā ʼuhiga pule, kaʼe ʼe feala hanā palalau mo tanā fanau ʼi muʼa ʼo te fakatuʼu he hola. Pea kapau ʼe feala, ʼo mulimuli ki ʼihi aluʼaga, ʼe lagi tali anai e te ʼu matuʼā ke nā fetogi te hola ʼae ʼe tonu ke toe liliu mai ai te fanau ki fale. Kapau ʼe palalau te ʼu matuʼā mo tanatou fanau ʼi muʼa ʼo hanatou fakatuʼu he ʼu lekula, pea ʼe mahino lelei anai ki ai te fanau pea mo loto lelei ʼo mulimuli ki ai.

19. ʼE lava faiga feafeaʼi e te kau tagata ʼafeā ke natou fakapotopoto ohage ko Sehova?

¹⁹ ʼI te ʼu kokelekasio ʼe tonu ke faiga te kau tagata ʼafeā ke natou fakapotopoto ohage ko Sehova. ʼE feala ke natou fai te faʼahi ʼaia ʼo mole lahi fau te ʼu meʼa ʼae ʼe natou fakamaʼua ki te ʼu tehina mo tuagaʼane. Kotou manatuʼi neʼe maʼuhiga pe la kia Sehova te ʼu sakilifisio ʼa te kau Iselaele masisiva. ʼO toe feia, ko ʼihi tehina mo tuagaʼane ʼe mole lahi te temi ʼae ʼe natou fakaʼaogaʼi ki te minisitelio, lagi heʼe natou mahahaki peʼe kua vaivai matuʼa. Pea ʼe feafeaʼi moka natou lotovaivai ʼuhi heʼe mole feala ke lahi ʼanatou gaue, logola te tuʼu ʼo tonatou loto? ʼE feala ke tokoni te kau tagata ʼafeā kia natou ke natou mahino ʼe ʼofa Sehova kia natou heʼe natou fai te meʼa ʼe natou lavaʼi ʼi tana tauhi.—Mko. 12:41-44.

20. Kotea te fakaʼuhiga ʼo te fakapotopoto ʼi tatatou tauhi ki te ʼAtua?

²⁰ ʼE moʼoni, ko te fakapotopoto ʼe mole fakaʼuhiga leva ke tou fakafifimalie pe tatou ʼo mole lahi ʼatatou gaue ki te ʼAtua heʼe tou fia “agalelei” pe kia tatou. (Mat. 16:22, MN) Pea ʼe mole tou loto ke veliveli ʼatatou gaue ʼae ʼe tou fai kaʼe ʼe tou iloʼi ʼe feala ia ke lahi age. Kaʼe ʼe ʼaoga ke tou manatuʼi fuli te ʼu palalau ʼaeni ʼa Sesu: “Koutou faiga.” (Luka 13:24) Koia ʼe tonu ke tou fakafuafua lelei. Ke tou foaki te meʼa ʼae ʼe lelei ʼaupito ʼi tatatou tauhi ki te ʼAtua pea mo tou toe manatuʼi foki ʼe mole kole mai e Sehova ʼi he temi he meʼa ʼe mole tou lavaʼi. Kapau ʼe tou fai te faʼahi ʼaia, ʼe feala ke tou tui papau ʼe tou fakafiafiaʼi tona loto. ʼE ko he meʼa fakaofoofo ia tatatou tauhi ki te ʼAtua fakapotopoto ʼaia! ʼI te alatike ʼae ka hoa mai ʼe tou talanoa anai ki te tahi ʼu kalitate matalelei ʼe lua ʼo Sehova.—Pes. 73:28.