Tou Kaumeʼa Mo Sehova
NEʼE tohi fēnei e te tisipulo ko Sake: “Koutou fakaovi ki te Atua pea e fakaovi atu anai kia koutou.” (Sakopo 4:8) Pea neʼe hiva fēnei te tagata fai pesalemo ko Tavite: “ ʼE kaumeʼa Sehova mo nātou ʼaē ʼe manavasiʼi kia te ia.” (Pesalemo 25:14) ʼE hā lelei ai, ʼe loto e Sehova ʼAtua ke tou kaumeʼa mo ia. Kae logope la ko ʼihi ʼe nātou tauhi ki te ʼAtua pea mo nātou fakalogo ki tana ʼu lao, kae ʼe mole nātou felogoi lelei mo ia.
E feafeaʼi kia koutou? ʼE koutou felogoi lelei koa mo te ʼAtua? ʼE mahino papau ia, ʼe koutou fia felogoi lelei mo ia. ʼE lava feafeaʼi hatatou kaumeʼa mo te ʼAtua? Koteā tona faka ʼuhiga kia tatou? ʼE tali ki te ʼu fehuʼi ʼaia te tolu kapite ʼo te tohi faka Tohi-Tapu ʼo te Tāʼaga Lea.
Tou Lotoʼofa Pea Mo Maʼuliʼi Te Moʼoni
ʼE kamata e Salomone, te hau ʼo Iselaele ʼāfea, ia te kapite tolu ʼo te Tāʼaga Lea ʼaki te ʼu palalau ʼaenī: “Ê toku foha, ʼaua naʼa galo kia te koe taku lao, pea ke taupau e tou loto taku ʼu fakatotonu, heʼe hilifaki atu anai kia te koe te loaloaga ʼo te ʼu ʼaho, pea mo te ʼu taʼu maʼuli pea mo te tokalelei.” (Tāʼaga Lea 3:1, 2) Mai tona ʼaluʼaga ʼaē neʼe tohi e Salomone ʼaki te laumālie maʼoniʼoni, koia ko te tokoni fakatāmai ʼaia, ʼe haʼu mai ia Sehova ʼAtua pea ʼe fai mai kia tatou. ʼE ʼui mai ʼi henī ke tou mulimuli ki te ʼu fakamanatu ʼa te ʼAtua—tana ʼu lao, peʼe ko tana ʼu akonaki, mo tana ʼu fakatotonu—ʼaē ʼe tuʼu ʼi te Tohi-Tapu. Kapau ʼe tou fai te faʼahi ʼaia pea ‘ ʼe hilifaki anai kia tatou te loaloaga ʼo te ʼu ʼaho pea mo te ʼu taʼu maʼuli pea mo te tokalelei.’ Ei, ʼe feala ʼi te temi ʼaenī ke tou maʼuli fīmālie, pea mo tou tekeʼi te ʼu tuʼutāmaki ʼaē ʼe feala ke tou mamate ai ohage ko te hahaʼi māmio kovi. Tahi ʼaē meʼa, ʼe tou ʼamanaki ki te maʼuli heʼegata ʼi te mālama foʼou ʼaē ka maʼu ai te tokalelei.—Tāʼaga Lea 1:24-31; 2:21, 22.
Pea neʼe hoko atu fēnei e Salomone: “Ke mole mavae ia te koe te lotoʼofa pea mo te moʼoni! Nonoʼo ki tou kia. Tohi ki te maka tohi ʼo tou loto, pea ke maʼu ai te ʼofa pea mo te fakasiosio lelei ia mata ʼo te ʼAtua pea mo te tagata kelekele.”—Tāʼaga Lea 3:3, 4.
ʼI te ʼuluaki lea ʼaē neʼe tohi ʼaki te Tohi-Tapu, ko te kupu ʼaē neʼe fakaliliu ʼaki te kupu “lotoʼofa” ʼe fakaliliu ʼi ʼihi temi ʼaki te kupuʼi palalau “ ʼofa agatonu” pea ʼe faka ʼuhiga ki te agatonu pea mo te logo tahi. ʼE tou fia nofo agatonu koa kia Sehova, tatau aipe pe koteā ʼaē ka hoko kia tatou? ʼE tou lotoʼofa koa mokā tou felogoi mo totatou ʼu tēhina mo tuagaʼane? ʼE tou faigaʼi koa ke tou kaumeʼa mo nātou? ʼE tou faiga koa ʼi te ʼaho fuli ke tou taupau ‘te lao ʼo te lotoʼofa ʼi tatatou ʼu palalau,’ māʼiape la te ʼu faigataʼaʼia?—Tāʼaga Lea 31:26.
ʼI te mahu ʼo tona lotoʼofa, ʼe “fakamolemole gafua” ia Sehova. (Pesalemo 86:5) Kapau neʼe tou fakahemala ʼo ʼuhiga mo tatatou ʼu agahala ʼāfea pea mo tou fakatonutonuʼi tatatou ʼu ala, tou tui papau ʼe tou maʼu anai he ʼu “temi mokomoko” mai ia Sehova. (Gaue 3:19) ʼE mole tonu koa la ke tou faʼifaʼitakiʼi totatou ʼAtua ʼo tou fakamolemole ki te ʼu hala ʼa te hahaʼi?—Mateo 6:14, 15.
Ko Sehova ʼe ko te “ ʼAtua ʼo te moʼoni” pea ʼe ina loto ki te hahaʼi ʼaē ʼe fia kaumeʼa mo ia ke nātou maʼuliʼi te “moʼoni.” (Pesalemo 31:5) ʼE tou lava kaumeʼa koa mo te ʼAtua kapau ʼe tou maʼuli fakakākā ohage ko te “hahaʼi malualoi” ʼaē ʼe nātou fakaū tonatou ʼuhiga moʼoni—heʼe lagi kehe tatatou aga mokā tou fakatahi mo te ʼu tēhina pea mokā tou fakatahi mo he tahi ʼu hahaʼi? (Pesalemo 26:4) ʼE ko he agavale ʼaia koteʼuhi “ko meafuape e telefua mo fasi ifo [ia] mua” ʼo Sehova!—Hepeleo 4:13.
Ko te lotoʼofa pea mo te moʼoni ʼe tonu ke hage ko he kahoa maʼugataʼa ʼe ‘nonoʼo ki totatou kia,’ heʼe nā tokoni mai ke ‘tou maʼu te ʼofa ʼa te ʼAtua pea mo te ʼofa ʼo te tagata kelekele.’ ʼE tonu ke tou fakahā te ʼu kalitate ʼaia kae ʼe toe tonu foki ke togi te ʼu kalitate ʼaia ki ‘te maka tohi ʼo totatou loto,’ ke kau te ʼu kalitate ʼaia ki totatou ʼulugaaga.
Tou Taupau Tatatou Falala Kia Sehova
ʼE hoko atu fēnei e te hau poto: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.”—Tāʼaga Lea 3:5, 6.
ʼE mahino papau ia, ʼe tonu ke tou falala kia Sehova. ʼI tona ʼuhiga Tupuʼaga, ʼe “mālohi ʼi tona māfimāfi” pea ʼe ko te matapuna ʼo te “mālohi.” (Isaia 40:26, 29) ʼE ina lava fakahoko ia meʼa fuli ʼaē neʼe ina fakatuʼutuʼu. Ko te faka ʼuhiga ʼo tona huafa “ ʼE Ina Fakahoko,” ʼe hā ʼaki mai ʼe feala hatatou tui papau ki tana fealagia ʼaē ke ina fakahoko te meʼa ʼaē neʼe ina fakapapauʼi mai! Mai tona ʼuhiga ʼaē “e mole feala ki te Atua ke lohi” ko ia ʼe ko te faʼifaʼitaki totonu ʼo te moʼoni. (Hepeleo 6:18) Ko tona kalitate tāfito ʼe ko te ʼofa. (1 Soane 4:8) ʼE “faitotonu ʼi tana ʼu ala fuli pea ʼe agatonu ʼi tana ʼu gāue fuli.” (Pesalemo 145:17) Kapau ʼe mole feala hatatou falala ki te ʼAtua, pea ko ai ʼaē ʼe feala ke tou falala ki ai? ʼE mahino ia, ke feala hatatou falala kia te ia, ʼe tonu ke tou “ ʼahiʼahi pea mo [tou] vakaʼi ko Sehova ʼe lelei,” ʼo tou maʼuliʼi te ʼu meʼa ʼaē ʼe tou ako ʼi te Tohi-Tapu pea mo tou fakakaukauʼi tona ʼu fua lelei.—Pesalemo 34:8.
ʼE lava feafeaʼi ‘hatatou tokagaʼi ia Sehova ʼi totatou ʼu ala fuli’? ʼE ʼui fēnei e te tagata fai pesalemo: “Ei, ʼe ʼau metitasio anai ki tau ʼu gāue fuli, pea ʼe ʼau tokagaʼi anai tau ʼu faʼahiga aga.” (Pesalemo 77:12) ʼE mole feala hatatou sio ki te ʼAtua, koia kapau ʼe tou fia kaumeʼa mo ia, pea ʼe maʼuhiga ʼaupito ke tou metitasio ki tana ʼu gāue lahi pea mo tana ʼu faʼahiga felogoi mo tana hahaʼi.
ʼE tou toe fakahā ʼe tou tokagaʼi ia Sehova mo kapau ʼe tou faikole kia te ia. Neʼe fetapā kia Sehova te hau ko Tavite “ ʼi te ʼaho katoa.” (Pesalemo 86:3) Neʼe tau faikole ia Tavite ʼi te po katoa, ohage ko te temi ʼaē neʼe feholaʼaki ai ʼi te toafa. (Pesalemo 63:6, 7) Neʼe fakaloto mālohiʼi mai e te ʼapositolo ko Paulo ke tou “faikole ʼi te ʼu lakaga fuli pe ʼi te laumālie.” (Efeso 6:18, MN) ʼE tou tau faikole koa? ʼE tou leleiʼia koa tatatou felogoi mo te ʼAtua? ʼE tou kole tokoni koa kia te ia mokā tou tau mo he ʼu ʼahiʼahi? ʼE tou faikole koa ke ina takitaki tatou ʼi muʼa ʼo hatatou fai he ʼu tonu maʼuhiga? ʼE ʼāsili ʼofainaʼi anai tatou e Sehova mo kapau ʼe tou faikole fakamalotoloto kia te ia. Pea ʼe tou tui papau ʼe fakalogo anai ki tatatou ʼu faikole pea ʼe ina ‘fakatonutonuʼi anai tatatou ʼu ala.’
ʼE ko he agavale takita ‘falala ki tokita ʼatamai totonu’ peʼe ki te hahaʼi maʼu tuʼulaga ʼo te mālama ʼaenī, kae ʼe lelei age hakita tuku takita falala katoa kia Sehova! ʼE ʼui e Salomone: “ ʼAua naʼa ke ʼui kua ke poto.” Kae ʼe ina ʼekenaki fēnei: “Manavasiʼi kia Sehova pea mo lītuʼa mai te kovi. Ke liliu te meʼa ʼaia ko he faitoʼo ki tou pito pea mo he fakamokomoko ki tou ʼu hui.” (Tāʼaga Lea 3:7, 8) Ko te tuʼania ʼaē naʼa mole tou fakafiafia te ʼAtua, ʼe tonu ke ina takitaki tatatou ʼu aga fuli, tatatou ʼu manatu pea mo te ʼu meʼa ʼaē ʼe tou logoʼi ʼi totatou loto. Ko te manavasiʼi ʼaia ʼe ina tāʼofi anai tatou ke ʼaua naʼa tou fai he ʼu meʼa kovi pea ʼe tokoni mai anai ʼi te faʼahi fakalaumālie pea ʼe ina fakamokomoko anai tatou.
Tou Foaki Kia Sehova Te Meʼa ʼAē ʼe Lelei Tāfito
Koteā te tahi meʼa ʼaē ʼe feala ke tou fai ke tou kaumeʼa mo te ʼAtua? ʼE fai mai e te hau te fakatotonu ʼaenī: “Faka maʼuhiga ia Sehova ʼaki tou ʼu koloā pea mo te ʼu ʼuluaki fua ʼo tou ʼu koloā fakakelekele fuli.” (Tāʼaga Lea 3:9) Moʼo faka maʼuhigaʼi ia Sehova, ʼe tonu ke kita fakaʼapaʼapa lahi kia te ia pea mo vikiʼi ia te ia ʼo kita logologo tona huafa ki te kaugamālie. Ko te ʼu meʼa maʼuhiga ʼaē ʼe tou fakaʼaogaʼi moʼo faka maʼuhigaʼi ia te ia ʼe ko totatou temi, totatou ʼu faiva, totatou mālohi pea mo tatatou ʼu koloā. ʼE tonu ke tou ʼuluaki fakaʼaogaʼi tatatou ʼu meʼa lelei tāfito ʼaia maʼa te ia. ʼE mole tonu koa la ke hā ʼi te faʼahiga fakaʼaogaʼi ʼo totatou ʼu koloā, ʼe tou lotomālohi ke tou ‘haga kumi muʼa te puleʼaga pea mo te faitotonu ʼo te ʼAtua’?—Mateo 6:33, MN.
Kapau ʼe tou fakaʼaogaʼi totatou ʼu koloā kia Sehova pea ʼe tou maʼu anai hona ʼu fua lelei. ʼE fakapapauʼi fēnei mai e Salomone: “Pea ko tou ʼu faleoko ʼe mahu anai, pea ko tou ʼu tane lalahi ʼe fonu gutugutu anai ʼi te vino foʼou.” (Tāʼaga Lea 3:10) ʼE mole tou koloaʼia anai ʼi te faʼahi fakasino kapau ʼe tou koloaʼia ʼi te faʼahi fakalaumālie, kae ʼe tou maʼu anai he ʼu fakapale lahi kapau ʼe tou fakaʼaogaʼi tatatou ʼu koloā moʼo faka maʼuhigaʼi ia Sehova. Kia Sesu ko te fai ʼo te finegalo ʼo te ʼAtua neʼe hage kia ia ko hana “meakai.” (Soane 4:34) ʼO toe feiā pe, ʼe hage ko hatatou meʼa kai mokā tou kau ki te gāue ʼaē ko te fakavikiviki ʼo Sehova, ohage ko te fai faka mafola pea mo te fai ʼo ni ʼu tisipulo. Kapau ʼe tou kātaki ʼi te gāue ʼaia pea ʼe mahu anai tatatou ʼu faleoko fakalaumālie. Ko tatatou fiafia—ʼaē ʼe fakatātā e te vino foʼou—ʼe fonu gutugutu anai.
ʼE tou kumi koa ia Sehova pea mo faikole kia te ia ke ina foaki mai te meʼa kai ʼaē ʼe ʼaoga kia tatou ʼi te ʼaho fuli? (Mateo 6:11) ʼI tona fakahagatonu, ko meʼa ʼaē ʼe tou maʼu, neʼe foaki mai e tatatou Tāmai ʼofa ʼaē ʼi selo. ʼE toe foaki mai anai e Sehova te tahi ʼu tapuakina, mo kapau ʼe tou fakaʼaogaʼi tatatou ʼu koloā moʼo fakavikiviki kia ia.—1 Kolonito 4:7.
Tou Tali Fakalelei Totatou Akonakiʼi e Sehova
Neʼe ʼui e te hau ʼo Iselaele ʼe maʼuhiga ke fakatonutonuʼi tatou mo kapau ʼe tou fia kaumeʼa mo Sehova, pea ʼe ina fai mai te tokoni ʼaenī: “ ʼAua naʼa ke fakafisi, Ê toku foha, ki te akonaki ʼa Sehova; pea ʼaua naʼa ke fehiʼa ki tana fakatonutonu, koteʼuhi ko ia ʼaē ʼe ʼofa ki ai Sehova, ʼe ina fakatonutonuʼi, ohage ko he tāmai ʼe ina fakatonutonuʼi tona foha ʼaē ʼe fiafia ai.”—Tāʼaga Lea 3:11, 12.
Kae ʼe lagi mole faigafua tatatou tali ke akonakiʼi tatou. Neʼe tohi fēnei e te ʼapositolo ko Paulo: “Ko te fakatonutonu fuape e ata mai e mole ko he temi o te fiafia kae ko te temi o te mamahi, kae ki amuli, e ina liufaki kia natou nee ina fai ki ai te fua o te tokalelei mo te susitisia.” (Hepeleo 12:11) ʼE kau ia te akonaki pea mo te fakatonutonu ki totatou akoʼi pea ʼe nā fakaōvi ai tatou ki te ʼAtua. Ko te akonakiʼi ʼo tatou e Sehova—ʼe ina fai ʼaki tatatou ʼu mātuʼa, peʼe ko te kokelekasio faka Kilisitiano, peʼe ko tatatou metitasioʼi te Tohi-Tapu mokā tou ako takitokotahi—pea ʼe ko te fakamoʼoni ʼaia ko Sehova ʼe ʼofa kia tatou. ʼE ko he agapoto hatatou tali te akonaki ʼaia.
Tou Taupau Maʼu Te Agapoto Pea Mo Te Fakasiosio Tonu
Pea ʼe fakatokagaʼi mai e Salomone ʼe maʼuhiga te agapoto pea mo te fakasiosio tonu kapau ʼe tou fia felogoi lelei mo te ʼAtua. ʼE ina ʼui fēnei: “Manuʼia te tagata ʼaē neʼe ina maʼu te poto, pea mo te tagata ʼaē ʼe ina maʼu te fakasiosio tonu, heʼe ko te totogi ʼaki te faʼahi ʼaia ʼe maʼuhiga age ia ʼi he totogi ʼaki te paʼaga, pea ko tona maʼu ʼe maʼuhiga age ia ʼi te aulo. . . . ʼE ko he fuʼu ʼakau ʼo te maʼuli kia nātou ʼaē ʼe nātou tapiki kiai, pea kia nātou ʼaē ʼe nātou puke maʼu, ʼe tonu ke kalagaʼi nātou ko he hahaʼi fiafia.”—Tāʼaga Lea 3:13-18.
ʼE fakamanatuʼi mai e te hau kia tatou te agapoto pea mo te fakasiosio tonu ʼa Sehova ʼaē ʼe hā ʼi te ʼu gāue taulekaleka ʼi tana ʼu meʼa ʼaē neʼe ina fakatupu, pea ʼe ina ʼui fēnei: “ ʼAki te poto neʼe faʼu e Sehova te kele. ʼAki te fakasiosio tonu neʼe ina fakatuʼu maʼu te lagi. . . . Ê toku foha, ke ʼaua naʼa nā mamaʼo ʼi ʼou mata! Taupau te poto ʼaoga pea mo te fealagia fakakaukau, pea ʼe nā liliu anai ko he maʼuli ki tou nefesi, pea mo he meʼa teuteu ki tou kia.”—Tāʼaga Lea 3:19-22.
Ko te agapoto pea mo te fakasiosio tonu ʼe ko he ʼu kalitate fakaʼatua. ʼE mole tonu pe ke tou gāueʼi te ʼu kalitate ʼaia, kae ʼe toe tonu foki ke tou taupau maʼu ʼo mole tou meʼa noaʼi tatatou ako Tohi-Tapu pea mo tou maʼuliʼi te ʼu meʼa ʼaē ʼe tou ako. ʼE hoko atu fēnei e Salomone: “Pea ʼe ke haʼele fīmālie anai ʼi tou ala, pea ʼe mole tūkia anai tou vaʼe ki he meʼa.” Pea ʼe ina toe ʼui fēnei: “Ka ke takoto anai, ʼe mole ke mataku anai; ei ʼe ke takoto anai, pea ʼe ke moe lelei anai.”—Tāʼaga Lea 3:23, 24.
Ei, ʼe feala hatatou haʼele ʼi te fīmālie pea mo tou moe lelei ʼi tatatou talitali ki te ʼaho ʼaē ka ‘hoko fakafokifā ai te fakaʼauha’ ki te mālama agakovi ʼa Satana. (1 Tesalonika 5:2, 3; 1 Soane 5:19) Tatau aipe mokā hoko anai te toe mamahi lahi, kae ʼe tou tui papau ki te palalau ʼaenī: “ ʼE mole ke manavasiʼi anai ki he meʼa fakamataku ʼe hoko fakafokifā mai, pe ko he afā ʼe hoko mai ki te kau agakovi. Heʼe ko Sehova totonu ʼe liliu anai ko tou falalaʼaga, pea ʼe mahino papau ia, ʼe ina taupau anai tou vaʼe ke ʼaua naʼa maʼua.”—Tāʼaga Lea 3:25, 26; Mateo 24:21.
Tou Fai Te Meʼa ʼAē ʼe Lelei
ʼE ʼekenaki fēnei e Salomone: “ ʼAua naʼa ke fakafisi te lelei kia nātou ʼaē ʼe tonu ke foaki kiai, mo kapau ʼe lava fai e tou nima ia te faʼahi aia.” (Tāʼaga Lea 3:27) Moʼo fai ʼo te lelei ki te hahaʼi, ʼe feala ke tou fakaʼaogaʼi tatatou ʼu koloā maʼa nātou, pea ʼe lahi te ʼu faʼahiga agaaga moʼo fakahoko te faʼahi ʼaia. Kae “ ʼi te temi fakaʼosi” ʼaenī, ko te meʼa lelei tāfito ʼaē ʼe feala ke tou fai maʼa nātou, ʼe mole koa la ko tatatou tokoni kia nātou ke nātou felogoi lelei mo te ʼAtua moʼoni? (Taniela 12:4) Koia ʼi te temi ʼaenī ʼe tonu ke tou kau fakamalotoloto ki te faka mafola ʼo te Puleʼaga pea mo fai ʼo ni ʼu tisipulo.—Mateo 28:19, 20.
ʼE toe fakahā mai e te hau poto te ʼu aga ʼaē ʼe tonu ke tou tekeʼi: “ ʼAua naʼa ke ʼui age ki tou tatau: ʼAlu pea ke toe liliu mai, pea ʼe ʼau foaki atu anai ʼapogipogi, kae tālā ʼe ʼi ai tau meʼa. ʼAua naʼa ke fai he fakatuʼutuʼu kovi ki tou kāiga, mokā ʼe nofo mo koe ʼaki he loto fīmālie. ʼAua naʼa ke hoko kē mo he tagata, kapau neʼe mole ina fai atu he meʼa kovi kia te koe. ʼAua naʼa ke fakaʼamu ki te tagata agamālohi pea ʼaua naʼa ke fili he ala e tahi ʼi tona ʼu ala.”—Tāʼaga Lea 3:28-31.
ʼE fakamahino fēnei e Salomone pe koʼe neʼe ina fai te tokoni ʼaia: “He ko te tagata ʼaē ʼe fakapikopiko ʼe ko he meʼa fakalialia kia Sehova, kae ʼe kaumeʼa ia mo te hahaʼi faitotonu. Ko te malaʼia ʼa Sehova ʼe tuʼu ki te ʼapi ʼo te agakovi, kae ʼe ina tapuakina te nofoʼaga ʼo te kau faitotonu. Kapau ʼe ko he kau vāvā pea ʼe ina vāʼi anai nātou, kae ʼe ʼofa anai ki te kau agavaivai. ʼE maʼu anai e te kau poto te fakaʼapaʼapa, kae ko te kau vale ʼe nātou vikiʼi te lainoa.”—Tāʼaga Lea 3:32-35.
Kapau ʼe tou fia kaumeʼa mo Sehova, pea ʼe mole tonu ke tou fai he ʼu fakatuʼutuʼu fakakākā. (Tāʼaga Lea 6:16-19) ʼE hoki tou maʼu anai te tapuakina pea mo te ʼofa ʼa te ʼAtua, mo kapau ʼe tou fai te meʼa ʼaē ʼe faitotonu ʼi ʼona mata. ʼE lagi vikiʼi anai tatou e te hahaʼi mokā nātou sio anai ki tatatou aga ʼaē ʼe ʼalutahi mo te poto fakaʼatua. Koia tou fakafisi ki te ʼu aga kākā ʼo te mālama agakovi pea mo agamālohi ʼaenī. Tou mulimuli ki te ala ʼaē ʼe lelei pea mo tou taupau tatatou vāhaʼa fakakaumeʼa mo Sehova!
[Paki ʼo te pasina 25]
“Faka maʼuhiga ia Sehova ʼaki tou ʼu koloā”