Ko Te Lau ʼo Te Tohi-tapu ʼe ʼAoga Pea Mo Fakafiafia
“ ʼE tonu anai ke ke lau . . . ʼi te ʼaho mo te po.”—Sosue 1:8.
1. Koteā ʼihi ʼu lelei ʼe tou maʼu ʼi te lautohi, kae tāfito ʼo ʼuhiga mo te lau ʼo te Tohi-Tapu?
ʼE FUA lelei kia kita mokā kita lau he tohi lelei. Neʼe tohi fēnei e te tagata Falani fai filosofia faka politike ko Montesquieu (Charles-Louis de Secondat): “Kia ʼau, ko te ako neʼe ko te faitoʼo lahi tuʼumaʼu ʼaia moʼo tauʼi te ʼaluʼaga fakaʼofaʼofa ʼo te maʼuli. Neʼe mole ʼau lotomamahi ʼi he temi mokā ʼau fakaʼaogaʼi he hola katoa moʼo fai taku lautohi.” Pea ʼe moʼoni tāfito te faʼahi ʼaia ʼo ʼuhiga mo te lau ʼo te Tohi-Tapu. ʼAki te takitaki ʼa te ʼAtua, neʼe ʼui fēnei e te tagata fai pesalemo: “Ko te lao ʼa Sehova ʼe haohaoa, ʼo ina fakamaʼuli te nefesi. Ko te fakamanatu ʼa Sehova ʼe tāu mo te falala, ʼo ina fakaliliu ʼo poto ia ia ʼaē ʼe mole heʼeki fakapotopoto. Ko te ʼu fakatotonu ʼa Sehova ʼe totonu, ʼo nātou fakafiafia te loto.”—Pesalemo 19:7, 8.
2. He koʼe neʼe taupau e Sehova te Tohi-Tapu lolotoga te ʼu sēkulō, pea koteā ʼaē ina loto ke fai e tana hahaʼi?
2 Mai tona ʼaluʼaga ʼaē ʼe haʼu te Tohi-Tapu mai ia Sehova ʼAtua, koia neʼe ina taupau te tohi ʼaia lolotoga te ʼu sēkulō ʼaē neʼe kovi ai te ʼu fakafeagai ʼa te ʼu fili faka lotu pea mo fakamālama. Ko tona finegalo “ke fakamauli te tagata fuape, pea ke natou kaku ki te iloi o te mooni,” koia neʼe ina fai ke lava maʼu e te hahaʼi fuape tana Folafola. (1 Timoteo 2:4) ʼE fakafuafua ko hahaʼi ʼe teitei 80 ʼi te teau ʼi te kele katoa ʼe nātou mahino ki he lea e tahi ʼi te ʼu lea e 100 ʼaē ʼe lahi tona fakaʼaogaʼi. Kua fakaliliu te Tohi-Tapu katoa kia lea e 370, pea kua feala ke lau tona tahi ʼu koga ia lea e 1 860 tupu. ʼE loto e Sehova ke lau e tana hahaʼi tana Folafola. ʼE ina tapuakina tana ʼu kaugana ʼaē ʼe nātou vakaʼi tana Folafola, ei, ʼaē ʼe nātou lau ʼi te ʼaho fuli.—Pesalemo 1:1, 2.
ʼE Fakamaʼua Ki Te ʼu Tēhina Taupau Ke Nātou Lau Te Tohi-Tapu
3, 4. Koteā ʼaē neʼe fakamaʼua e Sehova ki te ʼu hau ʼo Iselaele, pea he koʼe ʼe toe fakamaʼua te faʼahi ʼaia ki te kau tagata ʼāfea ia ʼaho nei?
3 ʼO ʼuhiga mo te temi ʼaē ka fakanofo anai he hau ʼi Iselaele, neʼe ʼui fēnei e Sehova: “Ka heka anai ki te hekaʼaga faka hau ʼo tona puleʼaga, ʼe tonu anai ke ina hiki maʼana ki he tohi te lao ʼaia, ʼo mulimuli ki te lao ʼaē ʼe taupau e te ʼu pelepitelo, te kau Levite. Pea ʼe tonu anai ke nofo mo ia, pea ʼe tonu anai ke ina lau ai ʼi te ʼaho fuli pe ʼo tona maʼuli, ke ina ako te manavasiʼi ʼaē kia Sehova, tona ʼAtua, ke feala hana taupau te ʼu folafola fuli ʼo te lao ʼaia, pea mo te ʼu fakatotonu ʼaia, ʼo ina maʼuliʼi; ke ʼaua naʼa fia māʼoluga age tona loto ʼi ʼona ʼu tēhina pea ke ʼaua naʼa mavae kehe mai te fakatotonu ki te faʼahi mataʼu peʼe ki te faʼahi hema.”—Teutalonome 17:18-20.
4 Koutou fakatokagaʼi te ʼu tupuʼaga ʼo te fakamaʼua e Sehova ki te ʼu hau fuli ke nātou lau ʼi te ʼaho fuli te tohi ʼo te lao fakaʼatua: (1) “ke ina ako te manavasiʼi ʼaē kia Sehova tona ʼAtua, ke feala hana taupau te ʼu folafola fuli ʼo te lao ʼaia, pea mo te ʼu fakatotonu ʼaia, ʼo ina maʼuliʼi”; (2) “ke ʼaua naʼa fia māʼoluga age tona loto ʼi ʼona ʼu tēhina”; (3) “ke ʼaua naʼa mavae kehe mai te fakatotonu ki te faʼahi mataʼu peʼe ki te faʼahi hema.” Ia ʼaho nei, ʼe mole tonu koa ke manavasiʼi te ʼu tēhina taupau kia Sehova, ke nātou fakalogo ki tana ʼu lao, ke ʼaua naʼa nātou fia māʼoluga ake ʼi ʼonatou ʼu tēhina, pea ke ʼaua naʼa nātou hēhē mai te ʼu fakatotonu ʼa Sehova? ʼE mahino ia, ʼe toe maʼuhiga kia nātou te lau ʼo te Tohi-Tapu ʼi te ʼaho fuli ohage ko te ʼu hau ʼo Iselaele.
5. Mole heʼeki faʼa fualoa, koteā ʼaē neʼe tohi e te Kolesi Pule kia nātou ʼo te ʼu Filiale ʼo ʼuhiga mo te lau ʼo te Tohi-Tapu, pea he koʼe ʼe lelei ke mulimuli te kau tagata ʼāfea ki te tokoni ʼaia?
5 Ia ʼaho nei, ʼe maʼumaʼua ʼaupito te kau tagata ʼāfea, pea ʼe feala ke faigataʼa kia nātou te lau ʼo te Tohi-Tapu ʼi te ʼaho fuli. Ohage ko te ʼu tēhina ʼo te Kolesi Pule ʼo te kau Fakamoʼoni ʼa Sehova pea mo nātou ʼo te ʼu Filiale ʼi te malamanei katoa, ʼe lahi ʼaupito tanatou ʼu gāue. Kae mole heʼeki faʼa fualoa, neʼe fakahā lelei ʼi te tohi neʼe fai e te Kolesi Pule ki te ʼu Filiale fuli, ʼe maʼua ke kita lau te Tohi-Tapu ʼi te ʼaho fuli pea mo kita fakamāhani ʼi tona ako. Neʼe fakahā lelei ʼi te tohi, ko te faʼahi ʼaia ʼe ina fakatuputupu anai tatatou ʼofa kia Sehova pea mo te moʼoni, pea “ ʼe tokoni mai anai ke tou taupau tatatou tui, mo totatou fiafia, pea mo tou kātaki ʼo aʼu ki te hoko mai ʼo te fakaʼosi faka kolōlia.” ʼE manatu feiā te kau tagata ʼāfea fuli ʼo te ʼu kokelekasio ʼa te kau Fakamoʼoni ʼa Sehova. Ko te lau ʼo te Tohi-Tapu ʼi te ʼaho fuli ʼe tokoni anai kia nātou ke nātou “fakapotopoto.” (Sosue 1:7, 8) Kia nātou tāfito ʼaia, ko te lau ʼo te Tohi-Tapu “ ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.”—2 Timoteo 3:16, MN.
Ko He Fakamaʼua Kia Nātou Tūpulaga Pea Mo Matutuʼa
6. He koʼe neʼe lau leʼolahi e Sosue te ʼu folafola fuli ʼa Sehova ia muʼa ʼo te ʼu telepi ʼo Iselaele ʼaē neʼe fakatahitahi pea mo te kau matāpule?
6 ʼI te ʼu temi muʼa, neʼe mole maʼu e te hahaʼi hanatou Tohi-Tapu, koia neʼe lau ai te Tohi-Tapu ia muʼa ʼo te hahaʼi ʼaē neʼe fakatahitahi. ʼI te ʼosi foaki age e Sehova kia Sosue te mālo ki te kolo ʼo Ai, neʼe fakatahitahiʼi e Sosue te ʼu telepi ʼo Iselaele ʼi muʼa ʼo te Moʼuga ʼo Epale pea mo te Moʼuga ʼo Kelisime. Pea ʼe tou lau fēnei: “Neʼe ina lau leʼolahi te ʼu folafola fuli ʼo te lao, te tapuakina pea mo te malaʼia, ʼo mulimuli kia meʼa fuli ʼaē neʼe tohi ʼi te tohi ʼo te lao. Neʼe mole he folafola ʼi te ʼu folafola ʼaē neʼe fakatotonu e Moisese neʼe mole lau leʼolahi e Sosue ia muʼa ʼo te kokelekasio katoa ʼo Iselaele, ʼo fakatahi kiai mo te hahaʼi fafine pea mo nātou liliki pea mo te hahaʼi matāpule ʼaē neʼe haʼele mo nātou.” (Sosue 8:34, 35) Ko te kau tūpulaga mo te kau matutuʼa, mo te hahaʼi ʼo te fenua pea mo te kau matāpule, neʼe tonu ʼi hona ʼaluʼaga fakatātā, ke nātou tohi ʼi tonatou loto pea mo tonatou ʼatamai, te aga ʼaē neʼe feala ke tapuakiʼi ai nātou e Sehova pea mo te aga ʼaē ʼe fehiʼa kiai Sehova. Kapau ʼe tou lau tuʼumaʼu te Tohi-Tapu, pea ʼe mahino papau ia ʼe tokoni mai anai kia tatou ʼi te faʼahi ʼaia.
7, 8. (a) Ko ai ia ʼaho nei ʼe nātou hage ko “te kau matāpule,” pea he koʼe ʼe maʼua ke nātou lau ia te Tohi-Tapu ʼi te ʼaho fuli? (b) Koteā te ʼu faʼahi ʼaē ʼe feala ai kia “nātou liliki” ʼi te hahaʼi ʼa Sehova ke nātou mulimuli ki te faʼifaʼitaki ʼa Sesu?
7 Ia ʼaho nei, ʼi te faʼahi fakalaumālie, ko te lauʼi miliona ʼu kaugana ʼa Sehova ʼe nātou hage ko “te kau matāpule” ʼaia. ʼI te temi muʼa, neʼe nātou mulimuli ʼi tonatou maʼuli ki te ʼu lao ʼo te mālama, kae neʼe nātou fetogi tonatou maʼuli. (Efeso 4:22-24; Kolose 3:7, 8) ʼE ʼaoga ke fakamanatuʼi tuʼumaʼu kia nātou te ʼu lekula ʼo Sehova ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi. (Amosi 5:14, 15) Ko te lau ʼo te Tohi-Tapu ʼi te ʼaho fuli ʼe tokoni kia nātou ke nātou fai te faʼahi ʼaia.—Hepeleo 4:12; Sakopo 1:25.
8 ʼE toe tokolahi foki mo “nātou liliki” ʼi te hahaʼi ʼa Sehova ʼaē neʼe akoʼi kia nātou e tanatou ʼu mātuʼa te ʼu lekula ʼa Sehova, kae ʼe tonu ke nātou ʼiloʼi papau ko tona finegalo ʼe faitotonu. (Loma 12:1, 2) ʼE lava feafeaʼi hanatou fai te faʼahi ʼaia? ʼI Iselaele, neʼe fakatotonu fēnei ki te kau pelepitelo pea mo te ʼu tagata matutuʼa: “ ʼE ke lau anai te lao ʼaenī ia muʼa ʼo Iselaele katoa, ki tonatou ʼu taliga. Fakatahiʼi te hahaʼi, te hahaʼi tagata mo fafine pea mo nātou liliki pea mo tau hahaʼi matāpule ʼaē ʼi tou ʼu matapā, ke nātou fagono pea ke nātou ako, heʼe tonu ke nātou manavasiʼi kia Sehova tou ʼAtua pea mo tokakaga ʼo maʼuliʼi te ʼu folafola fuli ʼo te lao ʼaenī. Pea ko tonatou ʼu foha ʼaē neʼe mole nātou ʼiloʼi, ʼe tonu ke nātou fakalogo, pea ʼe tonu ke nātou ako ke nātou manavasiʼi kia Sehova tou ʼAtua.” (Teutalonome 31:11-13) ʼI tana fakalogo ki te Lao, ko Sesu ʼi tona taʼu 12 neʼe ina fakahā tana fia mahino lahi ki te ʼu lao ʼo tana Tāmai. (Luka 2:41-49) Ki muli age, neʼe ko tana agamāhani te fakalogo pea mo tana kau ki te lau ʼo te Tohi-Tapu ʼi te sinakoka. (Luka 4:16; Gaue 15:21) ʼE lelei anai mo kapau ʼe mulimuli te kau tūpulaga ia ʼaho nei ki te faʼifaʼitaki ʼa Sesu, ʼo nātou lau te Folafola ʼa te ʼAtua ʼi te ʼaho fuli, pea mo nātou kau tuʼumaʼu ki te ʼu fono ʼaē ʼe lau ai pea mo akoʼi ai te Tohi-Tapu.
Ke Fakamuʼamuʼa Te Lau ʼo Te Tohi-Tapu
9. (a) He koʼe ʼe tonu ke tou filifili lelei te ʼu tohi ʼaē ʼe tou lau? (b) Koteā ʼaē neʼe ʼui e te hahaʼi ʼaē ʼe nātou tā te nusipepa ʼaenī ʼo ʼuhiga mo te ʼu tohi ʼaē ʼe tokoni ki tatatou mahino ki te Tohi-Tapu?
9 Neʼe tohi fēnei e te Hau poto ko Salomone: “Tokagaʼi te fakatokaga ʼaenī: Ko te faʼu ʼo te ʼu tuʼuga tohi ʼe mole ʼi ai hona gataʼaga, pea ko te lahi fau ʼo tona lau ʼe fakatupu gaʼegaʼe ki te sino.” (Tagata Tānaki 12:12) Pea ʼe lagi ʼui e he tahi ko te lau ʼo te ʼu tuʼuga tohi ʼaē kua tā ia ʼaho nei ʼe fakatupu gaʼegaʼe ki te sino, pea ʼi tona fakahagatonu, ʼe kovi ki te fakakaukau. Koia ʼe maʼuhiga ke tou filifili lelei te ʼu tohi ʼaē ʼe tou lau. ʼO hilifaki ki tatatou lau tatatou ʼu tohi ako faka Tohi-Tapu, ʼe tonu ke tou lau mo te Tohi-Tapu. Ko te hahaʼi ʼaē ʼe nātou tā te nusipepa ʼaenī neʼe nātou tohi fēnei ki te kau lautohi: “ ʼAua naʼa galo kia tatou ʼe tou mulimuli ki te Tohi-Tapu, pea ko meʼa fuape ʼaē neʼe tuku mai e te ʼAtua moʼo tokoni mai kia tatou, ʼe ko he ʼu ‘tokoni’ pe ia kae mole fetogi e nātou te Tohi-Tapu.”a Koia, ʼe mole tou meʼa noaʼi anai te ʼu tohi faka Tohi-Tapu kae ʼe tonu ke tou lau tāfito te Tohi-Tapu.
10. Neʼe fakahā lelei feafeaʼi e “te kaugana agatonu mo fakapotopoto” te maʼuhiga ʼaē ke tou lau te Tohi-Tapu?
10 ʼI tana mahino ki te maʼua ʼaia, neʼe fakatuʼutuʼu e “te kaugana agatonu mo fakapotopoto” talu mai ni ʼu taʼu, ke ʼi ai he polokalama lau ʼo te Tohi-Tapu ʼi te Ako ʼo Te Minisitelio Faka Teokalatike ʼi te ʼu kokelekasio fuli. (Mateo 24:45) ʼAki te polokalama ʼo te lau ʼo te Tohi-Tapu ʼaē ʼe tou mulimuli nei kiai, ʼe tou lau te Tohi-Tapu katoa ia teitei taʼu e fitu. Ko te polokalama ʼaia ʼe ʼaoga kia tatou fuli kae tāfito kia nātou ʼaē ʼe foʼofoʼou mai, ʼaē neʼe mole heʼeki nātou lau katoa te Tohi-Tapu. ʼE fakamaʼua ke lau ʼi te taʼu katoa te Tohi-Tapu katoa kia nātou ʼaē ʼe kau ki te Faleako Faka Tohi-Tapu ʼo Kalaate maʼa te kau misionea pea mo te Ako ʼaē ʼe ina Teuteuʼi Ki Te Minisitelio, ʼo feiā mo te Ako ʼa Te Kau Petelite foʼou. Tatau aipe pe koteā te polokalama ʼaē ʼe koutou mulimuli kiai, peʼe koutou lau takitokotahi peʼe koutou lau fakatahi mo takotou famili, kae kapau ʼe koutou fia mulimuli kiai, pea ʼe tonu ke takimuʼa kia koutou te lau ʼo te Tohi-Tapu.
Koteā ʼAē ʼe Hā ʼi Takotou Lautohi Māhani?
11. ʼE tou lava kai feafeaʼi ki te ʼu folafola ʼa Sehova ʼi te ʼaho fuli, pea koteā tona tupuʼaga?
11 Kapau ʼe faigataʼa hakotou mulimuli ki takotou polokalama lautohi ʼo te Tohi-Tapu, pea ʼe lelei ke koutou fai te fehuʼi ʼaenī: ‘Ko taku māhani ʼi te lau ʼo he ʼu tohi peʼe ko te sioʼi ʼo te televisio, ʼe malave feafeaʼi koa ki taku lava lau te Folafola ʼa te ʼAtua?’ Koutou manatuʼi te meʼa ʼaē neʼe tohi e Moisese—pea neʼe toe talanoa kiai Sesu—“ko te tagata ʼe mole tonu ke maʼuli ʼaki pe te pane, kaʼe ʼaki te folafola fuli pe ʼe haʼu mai te gutu ʼo Sehova.” (Mateo 4:4, MN; Teutalonome 8:3) Ohage pe ko te maʼua ʼaē ke tou kai ki te pane ʼi te ʼaho fuli peʼe ko he tahi age ʼu meʼa kai ke mālohi ai totatou kakano, ʼo toe feiā pe ʼe maʼua ke tou maʼu te ʼu manatu ʼa Sehova ʼi te ʼaho fuli ke tou mālolohi ai ʼi te faʼahi fakalaumālie. ʼE tou lava maʼu te ʼu manatu ʼa te ʼAtua ʼi te ʼaho fuli pe mokā tou lau ia te Tohi-Tapu.
12, 13. (a) ʼE fakatātā kiteā e te ʼapositolo ko Petelo te holi ʼaē ʼe tonu ke tou maʼu ki te Folafola ʼa te ʼAtua? (b) ʼE kehekehe feafeaʼi te fakaʼaogaʼi e Paulo pea mo Petelo te lea fakatātā ʼaē ʼo ʼuhiga mo te huʼa pipi?
12 Kapau ʼe tou leleiʼia te Tohi-Tapu, ʼo mole “hage ko he [“folafola,” MN ] a te tagata, kae . . . i tona uhiga mooni, ko he folafola a te Atua,” ʼe tou fia fakaʼaogaʼi anai ohage ko te kiʼi toe meamea ʼaē ʼe holi ki te huʼa pipi ʼo tana faʼe. (1 Tesalonika 2:13) Neʼe fai e te ʼapositolo ko Petelo te fakatātā ʼaia, ʼo ina tohi fēnei: “Ohage ko he ʼu fānau meamea, koutou holi mālohi ki te huʼa pipi maʼa ʼo te folafola, ke feala ʼaki te meʼa ʼaia ke koutou tuputupu ki te hāofaki, mo kapau foki neʼe koutou ʼahiʼahi ko te ʼAliki ʼe agalelei.” (1 Petelo 2:2, 3, MN ) Kapau ko tatou takitokotahi, neʼe tou ʼahiʼahiʼi moʼoni “ko te ʼAliki ʼe agalelei,” pea ʼe tou fakatuputupu anai tatatou holi ʼaē ke tou lau te Tohi-Tapu.
13 ʼE tonu ke tou fakatokagaʼi, ko Petelo ʼi te vaega ʼaia neʼe mole tatau tana fakaʼaogaʼi te fakatātā ʼo te huʼa pipi pea mo te ʼapositolo ko Paulo. Ko te kiʼi toe ʼaē kei meamea, ʼe ina maʼu ʼi te huʼa pipi te ʼu meʼa fuli ʼaē ʼe ʼaoga kia ia. ʼE fakahā e te ʼu palalau fakatā ʼa Petelo, ʼe tou maʼu ʼi te Folafola ʼa te ʼAtua ia meʼa fuli ʼaē ʼe ʼaoga kia tatou ke tou “tuputupu ki te fakamaʼuli.” ʼI te tahi faʼahi, ko Paulo ʼe ina fakaʼaogaʼi te fia ʼinu ki te huʼa pipi, moʼo fakatātā te māhani ʼa ʼihi, ko te mole kai lelei pea ʼe nātou lau kua nātou lalahi ʼi te faʼahi fakalaumālie. Neʼe tohi fēnei e Paulo ki te kau Kilisitiano Hepeleo: “Io, nee kua tonu, i aeni temi, kua koutou hoko ko he kau faiʼako, kae e aoga ke toe fakaʼako koutou e he tahi ki te u uluaki pelesepeto o te u folafola a te Atua. Kua koutou kaku ki te temi e aoga ai kia koutou te huapipi, mole ko te meakai fefeka. Koteuhi ko he tahi kei fafaga aki te huapipi, e mole feala ke ina muliʼi te folafola o te susitisia, kei tamasiʼi ia. Kae ko te meakai fefeka maʼa te hahai lalahi, kia natou e natou akoi onatou ulugaʼaga ki te iloi o te kehekehe o te lelei pea mo te kovi.” (Hepeleo 5:12-14) Kapau ʼe tou lau fakalelei ia te Tohi-Tapu, pea ʼe tuputupu anai tatatou ʼu fealagia fakakaukau pea mo uga anai tatatou fia fakaʼaogaʼi te ʼu meʼa kai fakalaumālie.
E Feafeaʼi Te Lau ʼo Te Tohi-Tapu
14, 15. (a) Koteā te pilivilesio ʼaē ʼe foaki mai e te Tupuʼaga ʼo te Tohi-Tapu? (b) ʼE tou lava maʼu feafeaʼi te poto fakaʼatua? (Koutou tuku mai he ʼu faʼifaʼitaki.)
14 Kapau ʼe tou loto ke lelei tatatou lau ia te Tohi-Tapu, pea ʼe mole tou kamata anai ʼaki tona lau, kae ʼaki te faikole. Ko te faikole ʼe ko he pilivilesio maʼuhiga. ʼE hage ko hakotou kamata lau he tohi ʼe talanoa ki he faʼahi ʼe maʼuhiga, pea ʼe koutou kole kia ia ʼaē neʼe ina tohi ke tokoni atu ke koutou mahino ki te meʼa ʼaē ʼe koutou lau. ʼE koutou sio anai ki tona ʼaoga ʼaupito! Ko ia ʼaē neʼe ina tohi te Tohi-Tapu, ia Sehova, ʼe ina tuku atu te pilivilesio ʼaia. Neʼe ʼi ai te tēhina ʼo te kolesi pule ʼo te ʼuluaki sēkulō neʼe ina tohi fēnei ki tona ʼu tēhina: “Kapau ko he tahi ia koutou e ina fia mau te poto, ke ina kole ki te Atua, e ina foaki mo te ofa ki te tagata fuape pea e mole ina valoki, e ina foakiʼage anai kia te ia. Kae ke ina kole mo tui, aua naa lotolotolua i he mea.” (Sakopo 1:5, 6) Ko te Kolesi Pule ʼo totatou temi ʼe ina fakaloto mālohiʼi tuʼumaʼu tatou ke tou faikole ʼi muʼa ʼo tatatou lau te Tohi-Tapu.
15 Ko te poto ʼe ko te maʼuliʼi ʼo te ʼatamai mālama. Koia, ʼi muʼa ʼo takotou avahi takotou Tohi-Tapu, koutou kole kia Sehova ke tokoni atu ke koutou tokagaʼi ʼi takotou lautohi te ʼu puani ʼaē ʼe ʼaoga ke koutou maʼuliʼi. Koutou fakatahiʼi te ʼu meʼa foʼou ʼaē ʼe koutou ako mo te ʼu meʼa ʼaē kua koutou mālama kiai. Koutou fakapipiki te ʼu meʼa ʼaia mo “te faʼifaʼitaki ʼo te ʼu folafola ʼo te maʼuli” ʼaē kua koutou ʼiloʼi. (2 Timoteo 1:13) Koutou fakakaukauʼi te ʼu fakamatala ʼo te maʼuli ʼa te ʼu kaugana ʼa Sehova ʼo te temi muʼa, pea mo koutou fakakaukauʼi peʼe feafeaʼi age la mo kanapaula neʼe ko koutou.—Senesi 39:7-9; Taniela 3:3-6, 16-18, Gaue 4:18-20.
16. Koteā te ʼu tokoni lelei ʼaē ʼe tou lava maʼuliʼi ke ʼaoga ai tatatou lau ia te Tohi-Tapu?
16 ʼAua naʼa koutou lau pe te ʼu pasina ʼaē neʼe koutou fakatuʼutuʼu ke koutou lau. Koutou lau māmālie. Koutou tokagaʼi lelei te ʼu meʼa ʼaē ʼe koutou lau. Kapau ʼe mole koutou mahino ki he manatu, pea koutou lau te ʼu vaega ʼaē ʼe fakapipiki kiai, mo kapau ʼe maʼu ʼi takotou Tohi-Tapu. Kapau mole heʼeki koutou mahino kiai, pea koutou tohi ʼi he moʼi pepa ke koutou fai he tahi ʼu kumi. Ka koutou lautohi, pea koutou fakaʼiloga te ʼu vaega ʼaē ʼe koutou fia tāʼofi peʼe koutou hiki ki he moʼi pepa. ʼE feala ke koutou toe tohi ʼi te faʼahi ʼo te pasina hakotou tahi ʼu manatu pea mo te ʼu vaega ʼaē ʼe pipiki kiai. ʼO ʼuhiga mo te ʼu vaega ʼaē ʼe koutou manatu ʼe ʼaoga anai kia koutou ʼi takotou gāue fai faka mafola pea mo takotou ʼu ako, koutou tohi te kupu tāfito pea mo kumi ʼi te tānakiʼaga ʼo te ʼu kupu faka Tohi-Tapu ʼi te fakaʼosi ʼo takotou Tohi-Tapu.b
Ke Liliu Te Lau ʼo Te Tohi-Tapu Ko He Meʼa Fakafiafia
17. He koʼe ʼe tonu ke tou fiafia ʼi te lau ʼo te Tohi-Tapu?
17 Neʼe palalau te tagata fai pesalemo ʼo ʼuhiga mo te tagata ʼaē ʼe fiafia, ʼo ina ʼui “ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po.” (Pesalemo 1:2) Ko tatatou lau te Tohi-Tapu ʼi te ʼaho fuli ʼe mole tonu ke hage ko he fakakinau, kae ke tou fiafia moʼoni ʼi tona fai. Ko te faʼahi ʼaē ʼe feala ke liliu ai ko he meʼa fakafiafia, ʼe ko te ʼiloʼi ia te maʼuhiga ʼo te meʼa ʼaē ʼe tou ako. Neʼe tohi fēnei e te Hau poto ko Salomone: “Manuʼia te tagata ʼaē neʼe ina maʼu te poto, . . . Ko tona ʼu ala ʼe ko te ʼu ala ʼe matalelei ʼaupito, pea ko tana ʼu ala fuli pe ʼe tokalelei. ʼE ko he fuʼu ʼakau ʼo te maʼuli kia nātou ʼaē ʼe nātou tapiki kiai, pea kia nātou ʼaē ʼe nātou puke maʼu, ʼe tonu ke kalagaʼi nātou ko he hahaʼi fiafia.” (Tāʼaga Lea 3:13, 17, 18) ʼE tonu ke tou faiga mālohi ke tou maʼu te poto, koteʼuhi ko tona ʼu ala ʼe matalelei, mo tokalelei, pea ki ʼamuli, ʼe kita maʼu ai te maʼuli.
18. ʼO hilifaki ki tatatou lau ia te Tohi-Tapu, koteā te meʼa ʼaē ʼe tonu ke tou fai, pea koteā ʼaē ka tou vakaʼi ʼi te alatike ʼaē ka hoa mai?
18 Ei, ko te lau ʼo te Tohi-Tapu ʼe ʼaoga pea mo fakafiafia. Kae ʼe ko tona gataʼaga koa ʼaia? Ko te hahaʼi ʼo te Keletiate ʼe nātou lau te Tohi-Tapu talu mai ni ʼu sēkulō, ʼo “natou [“haga,” MN ] ako, kae e mole feala ke natou kaku ki te iloi o te mooni.” (2 Timoteo 3:7) Ke tou maʼu he ʼu fua lelei ʼi tatatou lau te Tohi-Tapu, ʼe tonu ke tou fai ʼaki te manatu ʼaē ke tou maʼuliʼi te ʼatamai mālama ʼaē ʼe tou maʼu, pea mo fakaʼaogaʼi ʼi tatatou gāue fai faka mafola pea mo tatatou ʼu ako. (Mateo 24:14; 28:19, 20) Moʼo ako ʼo te Tohi-Tapu, ʼe tonu ke tou faiga mālohi pea mo fai fakalelei te ako ʼaia, heʼe feala ke tou fiafia ai pea mo fua lelei kia tatou, ohage ko te meʼa ʼaē ka tou vakaʼi anai ʼi te alatike ʼaē ka hoa mai.
[Kiʼi nota]
a Vakaʼi te tohi Les Témoins de Jéhovah : Prédicateurs du Royaume de Dieu, neʼe tā e te Watchtower Bible and Tract Society of New York, Inc., pasina 241.
b Vakaʼi Te Tule Leʼo ʼo te ʼaho 1 ʼo Maio 1995, pasina 16-17, te kupu tāfito “Ko He ʼu Tokoni Moʼo Fakatuputupu Takotou Lau Ia Te Tohi-Tapu.”
Te ʼu Fehuʼi Fakamanatu
• Koteā te tokoni ʼaē neʼe foaki ki te ʼu hau ʼo Iselaele ʼe kei ʼaoga ia ʼaho nei ki te ʼu tēhina taupau, pea koteā tona tupuʼaga?
• Ko ai ia ʼaho nei ʼe nātou hage ko “te kau matāpule” pea mo “nātou liliki,” pea he koʼe ʼe tonu ke nātou lau te Tohi-Tapu ʼi te ʼaho fuli?
• Koteā te ʼu tokoni ʼaoga ʼaē ʼe foaki mai e “te kaugana agatonu mo fakapotopoto” ke tou lau tuʼumaʼu ai te Tohi-Tapu?
• ʼE tou lava maʼu feafeaʼi he ʼu fua lelei pea mo he fiafia moʼoni ʼi tatatou lau ia te Tohi-Tapu?
[Paki ʼo te pasina 9]
ʼE tonu tāfito ki te kau tagata ʼāfea ke nātou lau te Tohi-Tapu ʼi te ʼaho fuli
[Paki ʼo te pasina 10]
Neʼe kau māhani ia Sesu ki te lau ʼo te Tohi-Tapu ʼi te sinakoka