ʼE Lahi ʼAupito Te ʼu Tohi!

Neʼe tohi fēnei e te Hau poto ʼo te temi muʼa ko Salomone: “Ko te faʼu ʼo te ʼu tuʼuga tohi, ʼe mole hona gataʼaga.” (Tagata Tānaki 12:⁠12) Lolotoga te taʼu 1995 neʼe teitei pe ko te tohi foʼou e tahi neʼe tā ʼi Pilitania ki te hahaʼi e toko 580, ʼo liliu ai te fenua ʼaia ko te ʼuluaki fenua ʼi te malamanei ʼaē ʼe tā ai te ʼu tohi foʼou. ʼI Pilitania neʼe tā ai te ʼu tohi e 95 015, pea ko Siaina, te fenua ʼaē ʼe hahaʼi tokotahi ʼi te malamanei, ʼe ko te lua fenua ʼaia ʼi te tā tohi, ʼaki te ʼu tohi foʼou e 92 972. Neʼe hoa atu kiai ia Siamani (ʼaki tona ʼu tohi e 67 206) pea hoa kiai te ʼAtu Fenua ʼo Amelika (49 276) pea mo Falani (41 234). ʼE fakatokagaʼi fēnei e te nusipepa ʼo Lonitoni The Daily Telegraph: “ ʼO ʼuhiga mo te faʼahi ʼaia ʼe tuʼu tāfito ki muʼa ia Pilitania ʼi te malamanei katoa ʼuhi pe ko tana lea Fakapilitānia.”

ʼE fakahā e ʼihi fakamatala, ko te fakatau ʼo te ʼu tohi ʼe mole haʼele lelei talu mai ni ʼu taʼu pea ʼi te temi nei, ko te toko 80 ʼi te 100 ʼo te hahaʼi lalahi, ʼe nātou totogi ʼi te taʼu katoa te tohi e tahi peʼe laka atu. Kae ʼe lau koa e te hahaʼi te ʼu tohi fuli ʼaē ʼe nātou toʼo?

Kae ko te tohi ʼaē ʼe kei lahi tona tufa pea mo tona lau, ʼe ko te Tohi-Tapu pea ʼe feala ke maʼu katoa peʼe fakakoga ʼi te ʼu lea e 2 120 tupu. Kapau ʼe mole heʼeki ʼi ai hakotou Tohi-Tapu, koutou kole ki te pilō ʼo te Sosiete Watch Tower ʼaē ʼe ōvi atu kiō koutou, ke foaki atu hakotou Tohi-Tapu. Kapau ʼe ʼi ai hakotou Tohi-Tapu, koutou toʼo pea mo vakaʼi ai te ʼu vaega faka Tohi-Tapu ʼaē ʼe tuʼu ʼi te ʼu alatike ʼo te nusipepa ʼaenī. Kapau ʼe koutou fai feiā, pea ʼe koutou maʼu ai anai te ʼatamai mālama ʼo ʼuhiga mo te Tohi-Tapu ʼaē ʼe ina foaki mai te maʼuli.