Tou Tokagaʼi Te ʼu Gāue Fakaofoofo ʼa Te ʼAtua
Neʼe lahi te ʼu meʼa ʼaē neʼe ke fai, Ê Sehova toku ʼAtua, ei tau ʼu gāue fakaofoofo pea mo tau ʼu manatu kia mātou; ʼe mole he tahi ʼe tatau mo koe.”—Pesalemo 40:5.
1, 2. Koteā te ʼu fakamoʼoni ʼe tou maʼu ʼo ʼuhiga mo te ʼu gāue fakaofoofo ʼa te ʼAtua, pea ʼe uga ai tatou ke tou fai tea?
KA KOUTOU lau te Tohi-Tapu, pea ʼe koutou sio ai neʼe fai e te ʼAtua te ʼu meʼa fakaofoofo ki Iselaele, tana hahaʼi ʼo te temi muʼa. (Sosue 3:5; Pesalemo 106:7, 21, 22) Tatau aipe peʼe mole toe fai anai e te ʼAtua te ʼu meʼa ʼaia ʼi te temi nei, kae ʼe tou maʼu ʼi ʼotatou ʼu tafaʼaki te ʼu fakamoʼoni ʼo tana ʼu gāue fakaofoofo. Koia ʼe feala ai ke tou ʼui fakatahi fēnei mo te tagata fai pesalemo: “ ʼE lahi tau ʼu gāue, Ê Sehova! Neʼe ke fai tau ʼu gāue fuli ʼaia ʼaki te poto. ʼE mahu tou ʼu koloā ʼi te kele.”—Pesalemo 104:24; 148:1-5.
2 Tokolahi ia ʼaho nei ʼe nātou meʼa noaʼi peʼe nātou fakafisi ki te ʼu fakamoʼoni ʼo te ʼu gāue ʼa te Tupuʼaga. (Loma 1:20) Kae ʼe ʼaoga kia tatou ke tou fakakaukauʼi te ʼu meʼa ʼaia, pea mo vakaʼi totatou ʼaluʼaga ia muʼa ʼo totatou Tupuʼaga pea mo te ʼu meʼa ʼaē ʼe tonu ke tou fai. ʼE tokoni lelei mai te kapite 38 ki te 41 ʼo Sopo ʼi te faʼahi ʼaia, heʼe fakatokagaʼi e Sehova kia Sopo ni ʼihi faʼahi ʼo Tana ʼu gāue fakaofoofo. Koutou fakatokagaʼi ni ʼihi fehuʼi maʼuhiga neʼe lagaʼi e te ʼAtua.
Te ʼu Gāue Mālohi Pea Mo Fakaofoofo
3. Ohage ko tona fakamatala ia Sopo 38:22, 23, 25-29, koteā te ʼu faʼahi ʼaē neʼe lagaʼi ai e te ʼAtua te ʼu fehuʼi?
3 ʼI te tahi moʼi temi, neʼe fehuʼi fēnei e te ʼAtua kia Sopo: “Neʼe kua ke hū koa ki te ʼu fale koloā ʼo te nive, peʼe kua ke sio koa ki te ʼu fale koloā ʼo te ʼu ʼua maka ʼaisi, ʼaē neʼe ʼau tānaki ki te ʼu temi ʼo te mamahi, ki te ʼaho ʼo te fihi pea mo te tau?” Kua māhani te hahaʼi ʼo ʼihi fenua ki te sio ki te nive pea mo te ʼua maka ʼaisi. Neʼe toe hoko atu fēnei e te ʼAtua: “Ko ai ʼaē neʼe ina vaheʼi he ava ki te lōmaki pea mo he ala ki te ʼuhila pea mo te mana, ke ʼua ki te kele ʼaē ʼe mole nofoʼi e he tagata, ki te toafa ʼaē ʼe mole nofoʼi e he tagata kelekele, moʼo fakamākona te ʼu koga meʼa ʼaē neʼe afāsia pea mo toafa pea mo fakahomo ake te ʼu muko ʼo te luna? ʼE ʼi ai koa he tāmai ʼo te ʼua, peʼe ko ai koa ʼaē neʼe ina fakatupu te ʼu mosiʼi hahau? ʼO ai te fatu ʼaē ʼe haʼu mai ai te ʼaisi, pea ko ai ʼaē neʼe ina fānauʼi te nive ʼo te lagi?”—Sopo 38:22, 23, 25-29.
4-6. He koʼe ʼe mole mahino katoa te tagata ki te nive?
4 Kia nātou ʼaē ʼe maʼuʼuli ʼi he sosiete ʼe maʼumaʼua ʼaupito pea mo fai folau, ko te nive ʼe lagi ko he meʼa ʼe ina tāʼofi tanatou ʼu gāue. Kae ki te tokolahi ko te nive ʼe ko he meʼa matalelei, ʼe matalelei te fenua ʼi te temi nive pea ʼe feala ke fai ai he ʼu gāue makehe. ʼAki te fehuʼi ʼaē neʼe fai e te ʼAtua, ʼe koutou ʼiloʼi lelei koa te nive, peʼe feafeaʼi tona agaaga? ʼE moʼoni ʼe tou ʼiloʼi peʼe feafeaʼi te agaaga ʼo he tuʼuga nive, neʼe lagi tou sio ʼi te ʼu paki ʼaē ʼe hā ai te ʼu moʼuga nive peʼe kua lagi tou sio tonu ki he tuʼuga nive. Kae ʼe feafeaʼi mo kapau ʼe koutou sioʼi he eveʼi nive e tahi? ʼE koutou ʼiloʼi koa peʼe feafeaʼi, neʼe lagi koutou vakavakaʼi lelei te ʼu meʼa ʼaia?
5 Ko ʼihi tagata neʼe nātou fakaʼaogaʼi te ʼu taʼu e hogofulu moʼo ako pea mo fai he ʼu paki ʼo te ʼu eveʼi nive. ʼE faʼufaʼu te eveʼi nive e te ʼu lauʼi teau kiʼi moʼi ʼaisi ʼe kehekehe tonatou agaaga pea mo matalelei. ʼE ʼui fēnei e te tohi Atmosphere: “Kua ʼiloʼi talu mai fualoa ʼe kehekehe te ʼu eveʼi nive, pea logola te ʼui ʼa te kau popoto ʼe mole he lao ʼi te natula ʼe ina tapuʼi ke ʼi ai he ʼu meʼa e lua e nā tatau ʼi te nive, kae neʼe mole heʼeki maʼu he ʼu eveʼi nive ʼe lua ʼe nā tatau. Neʼe fai te kumi loloto e . . . Wilson A. Bentley, ʼaē neʼe taʼu 40 tupu tana vakavakaʼi pea mo toho paki ia te ʼu eveʼi nive, ʼaki te meʼa moʼo fakaʼaʼata ʼo te ʼu meʼa ʼaē ʼe mole feala ke tou sio mata kiai, kae neʼe mole ina maʼu he ʼu eveʼi nive e lua ʼe nā tatau.” Tatau aipe peʼe maʼu he ʼu eveʼi nive e lua ʼe nā tatau, logola ʼe tahitahiga te faʼahi ʼaia, kae ʼe fetogi moʼoni anai koa e te faʼahi ʼaia te kehekehe ʼaupito ʼo te ʼu eveʼi nive?
6 Koutou manatuʼi te fehuʼi ʼaenī ʼa te ʼAtua: “Neʼe kua ke hū koa ki te ʼu fale koloā ʼo te nive?” Ki te hahaʼi tokolahi ʼe hage te ʼu ʼao ʼe ko te fale koloā ʼaia ʼo te nive. ʼE koutou manatu koa ʼe koutou lava ʼolo ki te ʼu fale koloā ʼaia ʼo tohi ʼi he moʼi pepa te ʼu eveʼi nive kehekehe, pea mo koutou kumi pe neʼe nātou fakatupu feafeaʼi? ʼE ʼui fēnei e te tohi ʼo te ʼu meʼa fakapoto lalahi: “ ʼE mole heʼeki tou mahino lelei ki te agaaga pea mo te haʼuʼaga ʼo te ʼaisi, heʼe tonu ke hifo te momoko ki te -40°C ke feala ke fefeka ai te ʼu mosiʼi vai.”—Pesalemo 147:16, 17; Isaia 55:9, 10.
7. ʼE feafeaʼi te mahino ʼa te tagata ki te ʼua?
7 E feafeaʼi ʼo ʼuhiga mo te ʼua? Neʼe fehuʼi fēnei e te ʼAtua kia Sopo: “ ʼE ʼi ai koa he tāmai ʼo te ʼua, peʼe ko ai koa ʼaē neʼe ina fakatupu te ʼu mosiʼi hahau?” ʼE ʼui fēnei e te tohi pe ʼaia ʼo te ʼu meʼa fakapoto lalahi: “ ʼUhi ko te faigataʼa ʼo te ʼu gāue ʼaē ʼe hoko ʼi te ʼaele pea mo te fetogi lahi ʼaē ʼe hoko ʼi te hahau pea mo te ʼu meʼa ʼaē ʼe maʼu ʼi te ʼaele, koia ʼe mole feala ke fakamahino lelei peʼe feafeaʼi te faʼu ʼo te ʼu ʼao pea mo te tō ʼo te ʼua.” ʼI tona fakanounou, neʼe lahi ʼaupito te ʼu manatu ʼaē neʼe maʼu e te kau popoto, kae neʼe mole nātou lava fakamahino katoa te ʼua. Kae ʼe tou ʼiloʼi ʼe tō te ʼua, ʼe ina palapalaʼi te kele, mo fakavai te ʼu ʼakau, ʼo feala ai ke tou maʼuʼuli ai pea mo fiafia.
8. He koʼe ʼe totonu te ʼu palalau ʼaē neʼe fai e Paulo ia Gaue 14:17?
8 ʼE mole koutou manatu tahi koa mo te ʼapositolo ko Paulo? Neʼe ina fakaloto mālohiʼi te hahaʼi ke nātou faka ʼuhiga te ʼu gāue fakaofoofo ʼaia, ʼe ko he ʼu fakamoʼoni ʼo ʼuhiga mo Ia ʼaē neʼe ina fakatupu te ʼu meʼa ʼaia. Neʼe ʼui fēnei e Paulo ʼo ʼuhiga mo Sehova ʼAtua: “Nee mole haganoa ia i tona manavaofa, e ina fakato ifo te ua mai te lagi kia tatou pea mo fakafua te u taukai i onatou temi, e ina fakamahu tatou pea mo fakafonu fiafia o tatou loto.”—Gaue 14:17; Pesalemo 147:8.
9. ʼE hā feafeaʼi te mālohi ʼaupito ʼo te ʼAtua ʼi tana ʼu gāue fakaofoofo?
9 ʼE mahino papau ia ko Ia ʼaē neʼe ina fai te ʼu gāue fakaofoofo pea mo ʼaoga ʼaia ʼe ina maʼu he poto ʼe heʼegata pea mo he toe mālohi lahi. ʼO ʼuhiga mo tona mālohi, koutou fakakaukauʼi age muʼa te faʼahi ʼaenī: Neʼe ʼui ʼe hoko te ʼu afā e 45 000 ʼi te ʼaho fuli, ko afā e 16 miliona tupu ʼi te taʼu. Ko tona faka ʼuhiga ʼe lolotoga hoko nei ia afā e 2 000. ʼI te afā e tahi, ko te mālohi ʼo te ʼu ʼao ʼe tuʼa hogofulu peʼe laka atu ʼi te mālohi ʼo te ʼu pulu faka nukelea ʼaē neʼe fakaʼaogaʼi ʼi te Lua Tau Faka Malamanei. ʼE koutou sio ki he koga ʼo te mālohi ʼaia mokā hila te lagi. ʼE moʼoni ko te ʼuhila ʼe ko he meʼa fakaofoofo, kae ʼe toe tokoni moʼoni ki te fakatupu ʼo te faʼahiga kasa ʼaē, ʼi tana aʼu ki te kele, ʼe fakaʼaogaʼi e te ʼu fuʼu ʼakau ohage ko he meʼa fakagako kele. Koia ʼe ʼi ai te mālohi ʼi te ʼuhila, kae ʼe ina toe foaki moʼoni he ʼu meʼa lelei.—Pesalemo 104:14, 15.
Koteā Takotou Manatu Kiai?
10. ʼE koutou tali feafeaʼi anai ki te ʼu fehuʼi ʼaē ʼe tou maʼu ia Sopo 38:33-38?
10 Koutou fakakaukauʼi age ko koutou ia Sopo, pea ʼe fakafehuʼi koutou e te ʼAtua Māfimāfi. ʼE koutou manatu tahi anai ki te ʼui ʼaē ʼe mole kei tokagaʼi e te tokolahi te ʼu gāue fakaofoofo ʼa te ʼAtua. ʼE fai mai e Sehova kia tatou te ʼu fehuʼi ʼaē ʼe tou maʼu ia Sopo 38:33-38. “Kua ke ʼiloʼi koa te ʼu fakatuʼutuʼu ʼo te lagi, peʼe feala koa haʼu fakatuʼu tana pule ki te kele? ʼE feala koa ke ke fakaʼau tou leʼo ki te ʼao, ke ʼaofi ai koe e he toe vai ʼe tokakovi? ʼE feala koa hau fekauʼi te ʼu ʼuhila ke nātou ʼolo pea mo nātou ʼui fēnei atu kia te koe: ‘Koʼeni mātou!’? Ko ai koa ʼaē neʼe ina ʼai te poto ki te ʼu ʼao, peʼe ko ai koa ʼaē neʼe ina foaki te poto ki te meʼa ʼaē ʼe hoko ʼi te lagi? Ko ai koa ʼaē ʼe feala ʼaki te poto ke ina lau ʼo tonu pe ko ʼao e fia, peʼe ko ai koa ʼaē ʼe feala ke ina huaʼi te ʼu ipu ʼo te lagi, mokā hali te efu ohage ko he ukamea kua haka, pea mo pipiki tahi te ʼu koga kele?”
11, 12. Koteā ʼihi ʼu meʼa ʼaē ʼe nātou fakamoʼoni ai ʼe fai e te ʼAtua he ʼu gāue fakaofoofo?
11 Neʼe tou talanoa pe ki ʼihi ʼu manatu ʼaē neʼe fakatokagaʼi age e Eliu kia Sopo, pea neʼe tou vakaʼi ni ʼihi ʼu fehuʼi ʼaē neʼe kole ai e Sehova ke tali kiai e Sopo “ohage ko he tagata mālohi.” (Sopo 38:3) ʼE tou ʼui neʼe tou talanoa pe ki ni “ ihi” ʼu fehuʼi, koteʼuhi ʼi te ʼu kapite 38 pea mo 39, neʼe fakatokagaʼi mai e te ʼAtua te tahi ʼu faʼahi maʼuhiga ʼo tana fakatupu. Ohage la ko te ʼu fetuʼu ʼo te lagi. Ko ai ʼaē ʼe ina ʼiloʼi katoa tanatou ʼu lao? (Sopo 38:31-33) Neʼe talanoa age ia Sehova kia Sopo ʼo ʼuhiga mo ʼihi manu—te laione pea mo te kāleva, te tao ʼo te ʼu moʼuga pea mo te zèbre, te vitulo pea mo te autruche, te hōsi mālohi pea mo te akuila. ʼE moʼoni, neʼe kole age e te ʼAtua kia Sopo pe neʼe ko ia ʼaē neʼe ina fakatupu te ʼu manu kehekehe ʼaia mo tonatou ʼu agaaga, ke feala ke nātou maʼuʼuli pea mo tuputupu. ʼE koutou leleiʼia anai te ako ʼo te ʼu kapite ʼaia, tāfito mo kapau ʼe koutou leleiʼia te ʼu hōsi pea mo te tahi ʼu manu.—Pesalemo 50:10, 11.
12 ʼE feala ke koutou toe vakaʼi mo te ʼu kapite 40 pea mo 41 ʼo Sopo, ʼaē ʼe toe kole ai e Sehova kia Sopo ke ina tali ki te ʼu fehuʼi ʼo ʼuhiga mo te ʼu manu makehe e lua. Kua tou ʼiloʼi ʼe ko te ipopotame (ko Pehemote), ko he manu e lahi pea mo sino mālohi, pea mo te kolokotile fakamataku ʼo te vaitafe ʼo te Nile (ko Leviata). ʼE lelei ke tou tokagaʼi te ʼu manu takitahi ʼaia neʼe fakatupu. Tou vakaʼi nei pe koteā te manatu ʼaē ʼe tonu ke tou maʼu.
13. Neʼe malave feafeaʼi kia Sopo tona fakafehuʼi e te ʼAtua, pea ʼe tonu ke malave feafeaʼi te ʼu meʼa ʼaia kia tatou?
13 ʼE fakahā mai ia Sopo 42, pe neʼe malave feafeaʼi kia Sopo ia te ʼu fehuʼi ʼaē neʼe fai age ki ai e te ʼAtua. ʼI te kamata, neʼe tokagaʼi fau e Sopo ia ia totonu pea mo te hahaʼi. Kae neʼe ina fetogi tana manatu, he neʼe ina tali tana fakatonutonuʼi ia ia ʼaki te ʼu fehuʼi ʼaē neʼe fai e te ʼAtua. Neʼe ina tala fēnei: “ ʼE ʼau ʼiloʼi [Sehova] ʼe ke lava fai ia meʼa fuli, pea ʼe mole he fakakaukau ʼe faigataʼa kia te koe. ‘Ko ai ʼaē ʼe ina fakapōʼuliʼi te tokoni ka mole ina ʼiloʼi he meʼa?’ Neʼe ʼau palalau foki, kae neʼe mole ʼau mahino ki he ʼu meʼa ʼe fakatalakitupua fau kia te ʼau, ʼe mole ʼau ʼiloʼi.” (Sopo 42:2, 3) Ei, ʼi tana ʼosi tokagaʼi te ʼu gāue ʼa te ʼAtua, neʼe ʼui e Sopo ko te ʼu meʼa ʼaia ʼe ko he ʼu meʼa ʼe fakaofoofo fau kia ia. ʼI tatatou ʼosi vakaʼi te ʼu meʼa fakatalakitupua ʼaia neʼe fakatupu, ʼe tonu mo tatou ke tou ōfo ʼi te poto pea mo te mālohi ʼo te ʼAtua. Koteā tona tupuʼaga? ʼE tou fai anai koa ʼuhi pe ke tou ōfo ai ʼi te mālohi pea mo te poto lahi ʼo Sehova? Peʼe ʼi ai koa hona tahi tupuʼaga?
14. Neʼe malave feafeaʼi kia Tavite te ʼu gāue fakaofoofo ʼa te ʼAtua?
14 Ia Pesalemo 86, ʼe tou maʼu ai te ʼu palalau neʼe fai e Tavite, pea neʼe ina ʼui fēnei ʼi te ʼu ʼuluaki pesalemo: “ ʼE kalagaʼi e te lagi te kolōlia ʼo te ʼAtua. Pea ko te laulahi ʼo te lagi ʼe ina fakahā te gāue ʼo tona ʼu nima. Ko he ʼaho ki he tahi ʼaho ʼe ina fakamafisi te lea, pea ko he po ki he tahi po ʼe ina fakahā te mālama.” (Pesalemo 19:1, 2) Kae ʼe toe hoko atu e Tavite, ʼo ina ʼui fēnei ia Pesalemo 86:10, 11: “ ʼE ke lahi pea ʼe ke fai te ʼu meʼa fakaofoofo; ʼe ke ʼAtua, ia koe tokotahi. Akoʼi mai kia te ʼau tou ala, Ê Sehova! ʼE ʼau haʼele anai ʼi tau moʼoni. Fai ke tahi toku loto ke ʼau manavasiʼi ki tou huafa.” Ko te manavahe ʼaia ʼa Tavite ki te Tupuʼaga ʼuhi ko Tana ʼu gāue fakaofoofo, neʼe toe kau kiai mo tana manavasiʼi fakaʼatua. ʼE tou mahino ki tona tupuʼaga. Neʼe mole fia fai e Tavite he meʼa ke ʼita ai Ia ia ʼaē ʼe ina lava fai te ʼu gāue fakaofoofo ʼaia, pea ʼe toe feiā mo tatou.
15. He koʼe neʼe tau mo feʼauga ke manavasiʼi Tavite ki te ʼAtua?
15 Neʼe lagi mahino kia Tavite neʼe maʼu pea mo puleʼi e te ʼAtua te toe mālohi lahi, pea ʼe feala ai ke ina fakaʼaogaʼi moʼo fakaʼauha ia nātou ʼaē ʼe mole ina leleiʼia. Kia nātou ʼe ko he meʼa fakamataku. Neʼe fehuʼi fēnei e te ʼAtua kia Sopo: “Neʼe kua ke hū koa ki te ʼu fale koloā ʼo te nive, pe neʼe kua ke sio koa ki te ʼu fale koloā ʼo te ʼua maka ʼaisi, ʼaē neʼe ʼau tānaki ki te temi ʼo te mamahi, ki te ʼaho ʼo te fihi pea mo te tau?” Ko te nive, te ʼaisi, te ʼu afā, te matagi, pea mo te ʼuhila ʼe ko tana ʼu mahafu fuli ʼaia. Pea ko he ʼu toe mālohi lahi ʼaupito!—Sopo 38:22, 23.
16, 17. Koteā ʼaē ʼe hā ai te mālohi ʼaupito ʼo te ʼAtua, pea neʼe ina fakaʼaogaʼi feafeaʼi te mālohi ʼaia ʼi te temi muʼa?
16 E lagi koutou manatuʼi te ʼu maumau ʼaē neʼe hoko ʼi te ʼu meʼa ʼaia—te afā, te ʼāhiohio, te ʼua maka ʼaisi, peʼe ko te lōmaki. ʼO ʼuhiga mo te faʼahi ʼaia, ʼi te fakaʼosi ʼo te taʼu 1999, neʼe maumauʼi e te toe afā mālohi te potu saute mo uesite ʼo Eulopa. Māʼia mo te kau popoto neʼe nātou punamaʼuli ai. Neʼe 200 kilometa ʼi te hola te mālohi ʼo te matagi, ʼo ina taʼaki te ʼu ʼato, mo tokahi te ʼu pou hila, pea mo fakamafuli te ʼu kamio. Koutou fakakaukauʼi age muʼa te faʼahi ʼaenī: Ko te afā ʼaia neʼe ina taʼaki peʼe fasiʼi lua te ʼu fuʼu ʼakau e 270 miliona, ko fuʼu ʼakau ʼe 10 000 neʼe maumau ʼi te ʼōloto pe ʼo Versailles, ʼi tuʼa ʼo Palesi. Neʼe mole ʼi ai he hila ʼi te ʼu lauʼi miliona loto fale. Neʼe mamate ai te teitei hahaʼi ʼe toko 100. Neʼe hoko te ʼu meʼa fuli ʼaia ʼi he kiʼi temi nounou. ʼI toe mālohi leva!
17 ʼE feala ke ʼui e he tahi ka hoko he ʼu afā pea ʼe fakapunamaʼuli, mole ʼiloʼi te potu ʼaē ʼe ʼalu kiai, pea ʼe mole lava puleʼi. Kae ʼe feafeaʼi anai mo kapau ʼe fai e Ia ʼaē ʼe ina maʼu te mālohi katoa, he ʼu gāue fakaofoofo ʼo ina fakaʼaogaʼi te ʼu mālohi ʼaia, kae ʼe ina puleʼi pea mo takitaki te ʼu mālohi ʼaia? Neʼe ina fai te faʼahi ʼaia ʼi te temi ʼo Apalahamo, ʼaē neʼe mahino kia ia ko te Tuʼi Fakamāu ʼo te kele katoa neʼe ina fakafuafua te agakovi ʼo te ʼu kolo e lua, ko Sotoma pea mo Komola. Neʼe lahi ʼaupito te agakovi, ʼo hake ake ki te ʼAtua te ʼu kalaga ʼo ʼuhiga mo nātou ʼaia, pea neʼe tokoni ai te ʼAtua ki te kau faitotonu fuli ke nātou hāo mai te tūʼa ʼo te ʼu kolo ʼaia. ʼE fakamatala fēnei e te hisitolia: “Pea neʼe fakaʼua e Sehova te ʼua sulifa pea mo te afi mai ia Sehova, mai te lagi,” ki te ʼu kolo ʼaia. Neʼe ko he gāue fakaofoofo, he neʼe hāofaki te kau faitotonu pea mo fakaʼauha te kau agakovi fuli.—Senesi 19:24.
18. Koteā te ʼu manatu fakaofoofo ʼe fakahā ia Isaia kapite 25?
18 Ki muli age, neʼe fai e te ʼAtua te fakamāu ki te kolo ʼāfea ʼo Papiloni, ʼe ko te lagi kolo ʼaia ʼe talanoa kiai ia Isaia ʼi te kapite 25. Neʼe fakakikite e te ʼAtua ʼe maumauʼi anai te kolo ʼaia, ʼo ina ʼui fēnei: “Neʼe ke fakaliliu te kolo ko he tuʼuga maka, te kolo mālohi ko he kolo neʼe maumauʼi; mo fakaliliu te tule ʼaē neʼe nofoʼi e te kau matāpule, ke mole kei hage ko he kolo: ʼe mole he temi ʼe toe fakatuʼu ai anai.” (Isaia 25:2) Ko nātou ʼaē ʼe nātou mamata ki te ʼu toega ʼo Papiloni ʼi te temi nei, ʼe feala ke nātou fakamoʼoni ki te ʼu folafola ʼaia. Neʼe hoko feiā pe koa te maumauʼi ʼo Papiloni? Kailoa. ʼE feala ke tou manatu ohage ko Isaia, ʼaē neʼe ina ʼui fēnei: “Ê Sehova, ko koe toku ʼAtua. ʼE ʼau fakavikiviki kia te koe, ʼe ʼau vikiʼi tou huafa, he neʼe ke fai te ʼu meʼa fakaofoofo, te ʼu tokoni talu mai te ʼu temi ʼāfea, ʼaki te agatonu pea mo te falala.”—Isaia 25:1.
He ʼu Gāue Fakaofoofo ʼi Te Ka Haʼu
19, 20. Koteā te ʼamanaki ʼaē ʼe tou maʼu ia Isaia 25:6-8?
19 ʼI te temi muʼa, neʼe fakahoko e te ʼAtua te lea faka polofeta ʼaē ʼe tuʼu ʼi ʼoluga, pea ʼe ina toe fai anai he ʼu gāue fakaofoofo ʼi te ka haʼu. ʼI te ʼu palalau ʼaia neʼe fai e Isaia, ʼaē ʼe talanoa ai ki te ʼu “meʼa fakaofoofo” ʼa te ʼAtua, ʼe tou maʼu te lea faka polofeta ʼe feala ke tou falala ʼe hoko moʼoni anai, ohage pe ko te hoko ʼo te fakamāu ki Papiloni. Koteā te ‘meʼa fakaofoofo’ ʼe fakapapau ai? ʼE ʼui fēnei ia Isaia 25:6: “Ei ʼe fai anai e Sehova ʼo te ʼatu kautau maʼa te hahaʼi fuli, ʼi te moʼuga ʼaia, he kātoaga meʼa kai neʼe loloʼi lelei, he kātoaga ʼo he ʼu vino kua tuku ke toka tona veveli, he ʼu meʼa kai neʼe loloʼi lelei pea ʼe fonu ʼi te gako, mo te vino kua tuku ke toka tona veveli pe neʼe fakaoʼo.”
20 ʼE hoko moʼoni anai te lea faka polofeta ʼaia ʼi te mālama foʼou ʼaē ʼe fakapapauʼi mai e te ʼAtua, ʼaē kua ōvi mai. ʼI te temi ʼaia, ʼe pulihi anai ʼi te malamanei te ʼu fihifihia ʼaē ʼe taʼomia ai te hahaʼi tokolahi. ʼI tona fakahagatonu, ko te lea faka polofeta ʼo Isaia 25:7, 8 ʼe ina fakapapau mai ʼe fakaʼaogaʼi anai e te ʼAtua tona mālohi fakatupu moʼo fakahoko te gāue ʼaē ʼe fakaofoofo tokotahi ʼi te ʼu temi: “ ʼE ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pe. Pea ʼe ina toʼo anai te lainoa ʼa tana hahaʼi ʼi te kele katoa, he neʼe ʼui totonu e Sehova.” Neʼe toe talanoa te ʼapositolo ko Paulo ʼo ʼuhiga mo te ʼu vaega ʼaia pea mo ina faka ʼuhiga ki te fakatuʼuake ʼo te kau mate e te ʼAtua. ʼE ko he gāue fakaofoofo anai!—1 Kolonito 15:51-54.
21. Koteā te ʼu gāue fakaofoofo ʼaē ka fai e te ʼAtua maʼa te kau mate?
21 ʼE pulihi anai te ʼu loʼimata ʼo te lotomamahi heʼe mole kei ʼi ai anai he ʼu mahaki. ʼI te maʼuli ʼa Sesu ʼi te kele, neʼe ina fakamālōlō te tokolahi—neʼe toe sio te ʼu kivi, neʼe toe logo te ʼu tuli, mo toe mālohi ia nātou ʼaē neʼe māʼimoa. Ia Soane 5:5-9, ʼe fakamatala ai neʼe ina fakamālōlō te tagata neʼe mahaki ia taʼu e 38. Kia nātou ʼaē neʼe nātou mamata ki te milakulo ʼaia, neʼe ko he gāue fakaofoofo. Pea ʼe moʼoni! Kae neʼe ʼui age e Sesu kia nātou ʼe fakaofoofo lahi age anai tana fakatuʼuake ia te kau mate: “Aua naa koutou punamauli i te mea aeni! He hoko mai te hola e fakalogo anai tona leo e natou i te u faitoka. Pea ko natou nee natou fakahoko te lelei, e natou laka mai anai ki te tuuake o te mauli.”—Soane 5:28, 29.
22. He koʼe ʼe feala ke loto falala te masiva pea mo ia ʼe lotomamahi ki te ka haʼu?
22 ʼE hoko moʼoni anai te faʼahi ʼaia heʼe ko te fakapapau ʼa Sehova. Ke tou ʼiloʼi papau ʼe fakaofoofo mokā ina fakaʼaogaʼi anai pea mo takitaki fakalelei anai tona mālohi moʼo toe fakatuʼu ia meʼa fuli. ʼE fakahā ʼi te Pesalemo 72 te ʼu meʼa ʼaē ka ina fai ʼaki tona ʼAlo te Hau. ʼE tupu ai anai te faitotonu. ʼE mahu anai te tokalelei. ʼE hāofaki anai e te ʼAtua ia ia ʼaē ʼe masiva pea mo taʼomia. ʼE ina fakapapau fēnei: “ ʼE mahu anai te pulapula ʼi te kele; ʼe tapuke anai ʼi te tumutumu ʼo te ʼu moʼuga. Ko tona fua ʼe hage anai ko te fua ʼo te Lipani [ʼāfea], pea ko te hahaʼi ʼaē ʼe ʼōmai mai te kolo ʼe nātou fisi anai ohage ko te vao ʼo te kele.”—Pesalemo 72:16.
23. Koteā ʼaē ʼe tonu ke tou fai ʼuhi ko te ʼu gāue fakaofoofo ʼa te ʼAtua?
23 ʼE mahino mai, ʼe tonu ke tou tokagaʼi te ʼu gāue fakaofoofo fuli ʼa Sehova—te ʼu meʼa ʼaē neʼe ina fai ʼi te temi muʼa, te ʼu meʼa ʼaē ʼe ina lolotoga fai nei, pea mo te ʼu meʼa ka ina vave fai ʼi te ka haʼu. “Ke vikiʼi ia Sehova ʼAtua, te ʼAtua ʼo Iselaele, heʼe ko ia tokotahi pe ʼe ina fai te ʼu gāue fakaofoofo. Pea ke vikiʼi tona huafa kolōlia ʼo talu ai, pea ke fakafonu e tona kolōlia te kele katoa. Ameni pea mo Ameni.” (Pesalemo 72:18, 19) ʼE tonu ke tou palalau fakafiafia tuʼumaʼu ki te ʼu meʼa ʼaia mo totatou ʼu kāiga pea mo te hahaʼi. Ei, tou “kalagaʼi tona kolōlia ʼi te lotolotoiga ʼo te ʼu puleʼaga, pea mo tana ʼu gāue fakaofoofo ʼi te lotolotoiga ʼo te hahaʼi fuli.”—Pesalemo 78:3, 4; 96:3, 4.
ʼE Koutou Tali Feafeaʼi Anai?
• ʼE fakahā feafeaʼi e te ʼu fehuʼi ʼaē neʼe fai kia Sopo te tuʼakoi ʼo te poto ʼa te tagata?
• Koteā ʼihi ʼu gāue fakaofoofo ʼa te ʼAtua neʼe koutou ōfo ai ʼi te kapite 37 ki te 41 ʼo Sopo?
• Koteā ʼaē ʼe tonu ke tou fai ʼi tatatou ʼosi vakaʼi ʼihi ʼu gāue fakaofoofo ʼa te ʼAtua?
[Paki ʼo te pasina 10]
Koteā takotou manatu ʼo ʼuhiga mo te fakaofoofo ʼo te kehekehe ʼo te ʼu eveʼi nive pea mo te mālohi fakatalakitupua ʼo te hila?
[Haʼuʼaga ʼo te paki]
snowcrystals.net
[Paki ʼo te pasina 13]
Koutou palalau tuʼumaʼu ki te ʼu gāue fakaofoofo ʼa te ʼAtua