Ko Sehova ʼe Ko He Kaumeʼa ʼo Te Faitotonu
“Ko au Sehova, ʼe au ʼofa ki te faitotonu.”—Isaia 61:8.
1, 2. (a) Koteā te faka ʼuhiga ʼo te ʼu kupu “faitotonu” pea mo “heʼe faitotonu”? (b) Koteā ʼaē ʼe ʼui ʼi te Tohi-Tapu ʼo ʼuhiga mo Sehova pea mo tona kalitātē ʼaē ko te faitotonu?
KO TE faka ʼuhiga ʼo te faitotonu ʼe ko he ‘kalitātē ʼe heʼe fakapalatahi, mo totonu, pea mo ʼalutahi mo te aga ʼaē ʼe lelei ke fai.’ Kae ki te heʼe faitotonu ko tona faka ʼuhiga ʼe kākā, mo fakapalatahi, mo kovi, mo he gaohi koviʼi ʼo niʼihi.
2 Kua hili nei kiai taʼu e 3 500, neʼe tohi fēnei e Moisese ʼo ʼuhiga mo Sehova ia te Tuʼi ʼAliki ʼo Te ʼAtulaulau: “Ko tona ʼu ala fuli ʼe faitotonu. ʼAtua ʼo te agatonu, ʼaē ʼe mole iā te ia te heʼe faitotonu.” (Teutalonome 32:4) Hili kiai sēkulō e fitu, neʼe takitaki e te ʼAtua ia Isaia ke ina tohi te ʼu palalau ʼaenī: “Ko au Sehova, ʼe au ʼofa ki te faitotonu.” (Isaia 61:8) Pea ʼi te ʼuluaki sēkulō, neʼe ʼui fēnei e Paulo: “ ʼE maʼu koa te heʼe faitotonu ʼi te ʼAtua? Ke mole hoko he meʼa fēia.” (Loma 9:14) ʼI te sēkulō pē ʼaia, neʼe ʼui fēnei e Petelo: “Ko te ʼAtua ʼe mole fakapalatahi; kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.” (Gāue 10:34, 35) ʼEī, “ko Sehova ʼe ko he kaumeʼa ʼo te faitotonu.”—Pesalemo 37:28; Malakia 3:6.
Kua Mafola Te Heʼe Faitotonu
3. Neʼe kamata feafeaʼi te heʼe faitotonu ʼi te kele?
3 Iā ʼaho nei, ko te faitotonu ʼe mole ko he kalitātē ʼe maʼuliʼi e te hahaʼi fuli. ʼE feala ke fai mai kiā kita he ʼu aga heʼe faitotonu ʼi te ʼu faʼahi fuli ʼo totatou maʼuli ʼi te mālama ʼaenī: ʼi tatatou fale gāue, ʼi te faleako, ʼi tatatou ʼu felōgoi mo te ʼu hahaʼi takitaki pea mo ʼihi atu faʼahi—māʼiapē lā ʼi totatou maʼuli faka fāmili. ʼE moʼoni, ʼe mole foʼou ia te ʼu taʼi aga heʼe faitotonu ʼaia. Neʼe hoko te ʼu aga ʼaia ʼi te hisitolia ʼo te tagata ʼi te temi ʼaē neʼe talagataʼa ai tatatou ʼuluaki mātuʼa pea mo nā maumauʼi te lao, he neʼe fakahalaʼi nāua e te ʼāselo agatuʼu ʼaē neʼe liliu ki muli age ko Satana te Tēvolo. ʼE mahino ia, neʼe heʼe faitotonu ia Atama mo Eva pea mo Satana ʼi tanatou fakaʼaogaʼi kovi te meʼa ʼofa taulekaleka ʼaē ko te loto faʼitaliha, ʼaē neʼe foaki age e Sehova kiā nātou. Ko te ʼu fua ʼo tanatou agakovi ko te mamahi lahi pea mo te mate ki te mālamanei kātoa.—Senesi 3:1-6; Loma 5:12; Hepeleo 2:14.
4. Talu mai ʼanafea ia te heʼe faitotonu ʼa te mālamanei?
4 Kua hili nei kiai taʼu e 6 000 ki te agatuʼu ʼaē neʼe fai ʼi Eteni, kua liliu te heʼe faitotonu ko he agamāhani ʼe fai ʼi te mālama ʼaenī. ʼE mole tou punamaʼuli kiai heʼe ko Satana ko te ʼatua ʼo te mālamanei. (2 Kolonito 4:4) ʼE gutuloi pea ko te tamai ʼo te loi, ko he ʼāselo fai fakapō pea ʼe fakafeagai kiā Sehova. (Soane 8:44) ʼE ina fai tuʼumaʼu pē te ʼu aga heʼe faitotonu. Ohagē lā, ʼi te fakahalaʼi e Satana ia te hahaʼi ʼi muʼa ʼo te tō ʼo te Tulivio ʼi te temi ʼo Noe, neʼe tokagaʼi e te ʼAtua neʼe ‘kua lahi ʼaupitō te agakovi ʼa te tagata ʼi te kele pea ko te ʼu fakakaukau fuli ʼo tona loto neʼe kovi tuʼumaʼu pē ia.’ (Senesi 6:5) Mo te temi ʼo Sesu, neʼe kei fēia pē te maʼuli ʼo te hahaʼi. Neʼe ina ʼui fēnei: “E tahi uta pē te ʼaho mo tona kovi” ko tona faka ʼuhiga ko te ʼaho pē mo tona ʼu fihifihia, ohagē lā ko te heʼe faitotonu. (Mateo 6:34) Koia ʼe ʼui fakalelei fēnei ʼi te Tohi-Tapu: “Ko te ʼu meʼa fuli ʼaē neʼe fakatupu, ʼe natou haga lāuga fakatahi pea mo mamahi fakatahi.”—Loma 8:22.
5. He koʼē kua lahi age te heʼe faitotonu ʼi totatou temi?
5 Koia, ko te ʼu aga ʼaē ʼe kovi ʼaē neʼe iku ai ki he ʼu aga heʼe faitotonu, neʼe hoko ʼi te temi fuli pē ʼi te hisitolia ʼo te tagata. ʼI te temi nei kua ʼāsili age te kovi ʼo te heʼe faitotonu. Koteā tona tupuʼaga? Koteʼuhi kua fualoa te nofo ʼa te mālama agakovi ʼaenī ʼi “te ʼu ʼaho fakamuli,” pea ʼi te kua ovi mai ʼo tana fakaʼosi, ʼe tau nei mo “te ʼu temi maʼuhiga ʼaupitō mo faigataʼa.” Neʼe fakakikite ʼi te Tohi-Tapu ʼi te lolotoga ʼo te temi ʼaia ʼo te hisitolia, ko te hahaʼi ʼe natou “kaumeʼa pē anai mo nātou totonu, kaumeʼa mo te paʼaga, fiatuʼu, fialahi, fasituʼu, . . . maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi.” (2 Timoteo 3:1-5) Ko te ʼu aga kovi ʼaia ʼe iku ki te ʼu aga heʼe faitotonu fuapē.
6, 7. Ko te ʼu aga heʼe faitotonu fea ʼaē neʼe hoko ki te mālamanei ʼi totatou temi?
6 ʼI te ʼu taʼu e teau kua hili atu, neʼe fakatokagaʼi te kua lahi age ʼo te heʼe faitotonu. Ohagē lā ʼi te ʼu taʼu ʼaia neʼe lahi age te ʼu tau ʼaē neʼe hoko. Ko ʼihi hahaʼi fai hisitolia, ʼe natou fakafuafua ʼi te Lua Tau Faka Mālamanei neʼe lau ko mātea e 50 miliona ki te 60 miliona, pea tokolahi te kau mamate neʼe mole ko he kau sōlia—kae neʼe ko te hahaʼi tagata, mo fafine, pea mo te fānau neʼe mole natou fai he meʼa ʼe kovi. Talu mai te temi ʼaē neʼe ʼosi ai te tau ʼaia, neʼe mamate ia te ʼu lauʼi miliona hahaʼi tupu ʼi te ʼu fihi kehekehe, pea neʼe kaugamālie pē ia te hahaʼi sevile ʼaē neʼe mamate. ʼE fakatupu e Satana ia te ʼu aga heʼe faitotonu ʼaia heʼe nofo mo tona ʼita lahi koteʼuhi ʼe ina ʼiloʼi kua vave fakaʼauha ia ia e Sehova. ʼE ʼui fēnei ʼi te lea faka polofetā ʼi te Tohi-Tapu: “Kua hifo atu ia te Tēvolo kiā koutou, mo tona ʼita lahi, heʼe kua ina ʼiloʼi kua nounou tona temi.”—Fakahā 12:12.
7 Ko te teitei falā e 91 200 miliale ʼaē ʼe fakaʼaogaʼi ʼi te taʼu fuli ki te ʼu foʼi kautau sōlia. Ko te lauʼi miliona hahaʼi ʼe mole natou maʼu pē lā ia te ʼu meʼa ʼaē ʼe ʼaoga ki tonatou maʼuli, koia kotou fakafuafua age muʼa ki te falā fuli ʼaia neʼe feala ke maʼu maʼa nātou mo kanapau lā neʼe fakaʼaogaʼi lelei. ʼE fakafuafua ko hahaʼi e tahi miliale ʼe natou pakupaku, kae ko ʼihi ʼe natou mahu ʼi te meʼa kai. ʼE ʼui e te ʼu Puleʼaga Fakatahi, ʼe teitei nima miliona te tamaliki liliki ʼe mamate ʼi te taʼu fuli heʼe mole ʼi ai hanatou meʼa kai. ʼI meʼa fakaʼofaʼofa! Pea kotou toe fakakaukauʼi age muʼa mo te kaugamālie ʼo te ʼu toe kei meamea ʼaē neʼe mamate ʼi te ʼu fakatō fatu. ʼE fakafuafua ʼe ko te toko 40 miliona ki te toko 60 miliona ʼi te taʼu fuli ʼi te mālamanei! ʼI aga heʼe faitotonu mo fakamataku!
8. ʼE hoki feala ke maʼu feafeaʼi ia te faitotonu moʼoni maʼa te mālamanei?
8 ʼE mole heʼeki maʼu e te kau pule ia he ʼu puleʼaki ki te ʼu fihifihia lahi ʼaē ʼe mafola ʼi te mālamanei iā ʼaho nei; pea ʼe mole lelei age anai ia te maʼuli ʼaki te ʼu faiga ʼa te tagata. Ko te Folafola ʼa te ʼAtua neʼe ina fai te fakakikite ʼaenī ʼo ʼuhiga mo totatou temi: “Ko te ʼu tagata agakovi pea mo te ʼu hahaʼi kākā ʼe natou tuputupu anai ki te kovi ʼaupitō, ʼo natou fakahēʼi pea mo natou hēʼia.” (2 Timoteo 3:13) Ko te heʼe faitotonu ʼe ko he ʼaluʼaga ʼe hoko tuʼumaʼu ʼi te maʼuli ʼo te ʼaho fuli, pea ʼe mole feala ke pulihi e te tagata. ʼE gata pē ki te ʼAtua ʼo te faitotonu ʼe feala ke ina pulihi ia te heʼe faitotonu. Ko ia tokotahi pē ʼe feala ke ina fakaʼauha ia Satana, mo te kau temonio, pea mo te hahaʼi agakovi.—Selemia 10:23, 24.
ʼE Moʼoni Te Tuʼaniaʼi ʼAē e ʼIhi Ia Te Heʼe Faitotonu
9, 10. He koʼē neʼe kua lotovaivai ia Asafe?
9 ʼI te temi muʼa, māʼia mo ʼihi kau tagata faitohi ʼo te Tohi-Tapu neʼe natou feʼekeʼaki pe koʼē ʼe mole heʼeki fakatokatoka e te ʼAtua ia te ʼu fihifihia ʼo te tagata pea mo fakatuʼu ia te faitotonu moʼoni pea mo te agatonu. Tou vakaʼi age muʼa ia te faʼifaʼitaki ʼa te tagata ʼi te temi ʼaia. ʼE tou maʼu ia te higoa ʼo Asafe ʼi te ʼu palalau ʼaē ʼe tohi ʼi ʼoluga ʼo te Pesalemo 73, ʼe lagi neʼe ko he Levite fai māholo ʼiloa ʼi te temi ʼo te Hau ko Tavite peʼe ko te kau hiva ʼo te ʼapi ʼaē neʼe takitaki e Asafe ʼi tona ʼuhiga tamai pea mo pule. Ko Asafe pea mo tona hōloga neʼe natou faʼu te ʼu hiva neʼe hivaʼi ʼi te tauhi ʼa te hahaʼi. Kae ʼi te temi ʼaia ʼo tona maʼuli, ko te tagata fai tohi ʼaia ʼo te Pesalemo neʼe kua lotovaivai ʼi te faʼahi fakalaumālie. Neʼe sio ia ki te maʼuli koloaʼia ʼo te hahaʼi agakovi, pea neʼe ina fakatokagaʼi ʼi te agamāhani ʼe hagē pē e natou maʼuli fīmālie, ʼe mole fua kovi kiā nātou tonatou faʼahiga maʼuli.
10 ʼE tou lau fēnei: “Neʼe au maheka ʼo ʼuhiga mo te ʼu tagata ʼaē ʼe natou faka kolōliaʼi pē iā nātou, ʼi taku sio ki te tokalelei ʼo te hahaʼi agakovi. Heʼe mole natou hoha ki he meʼa ʼo aʼu ki tonatou mate; pea kua gako ʼonatou fatu. ʼE mole natou maʼu pē lā te ʼu mamahi ʼo te tagata fuli, pea ʼe mole natou malaʼia ohagē ko ʼihi tagata.” (Pesalemo 73:2-8) Kae ʼaki te temi neʼe mahino leva ki te tagata fai Pesalemo neʼe mole lelei tana taʼi faʼahiga manatu ʼaia. (Pesalemo 73:15, 16) Neʼe faiga e te tagata fai Pesalemo ke ina fakatonutonuʼi tana faʼahiga manatu, kae neʼe mole feala hana mahino kātoa pe koʼē neʼe hagē ʼe hao ia te kau agakovi mai te malaʼia kae mamahi tuʼumaʼu pē te hahaʼi lotoʼofa.
11. Koteā ʼaē neʼe mahino leva kiai ia te tagata fai pesalemo ko Asafe?
11 Ki muli age neʼe mahino leva ki te matuʼa agatonu ʼaia ia te ikuʼaga ʼo te kau agakovi—ko Sehova ʼaē kā ina tautea anai nātou. (Pesalemo 73:17-19) Neʼe tohi fēnei e Tavite: “Falala kiā Sehova pea taupau tona ala, pea ʼe ina hikihiki anai koe ke ke maʼu te kele. Kā toʼo kehe anai te hahaʼi agakovi, ʼe ke sio anai kiai.”—Pesalemo 37:9, 11, 34.
12. (a) Koteā te fakatuʼutuʼu ʼa Sehova ʼo ʼuhiga mo te agakovi pea mo te heʼe faitotonu? (b) Koteā takotou manatu ki te puleʼaki ʼaia ʼo ʼuhiga mo te heʼe faitotonu?
12 ʼE ko te finegalo ʼo Sehova ke ina pulihi ia te agakovi pea mo tona ʼu fua heʼe faitotonu ʼi te kele ʼi tona temi totonu. ʼE ko he faʼahi ʼe tonu ke manatuʼi tuʼumaʼu e te kau Kilisitiano agatonu. ʼE teuteu Sehova ke ina pulihi ʼi te kele ia nātou ʼaē ʼe natou fakafeagai ki tona finegalo, pea ʼe ina fakapale anai ia nātou ʼaē ʼe fakalogo ki tona finegalo. “ ʼE fakasiosio tona ʼu mata, ko tona ʼu mata gigila ʼe nā sivisivi te ʼu foha ʼo te tagata. Ko Sehova totonu ʼe ina sivisivi te agatonu pea mo te agakovi, pea ko ʼaē ʼe manako ki te agamālohi, ʼe mahino ia, ʼe fehiʼa ki ai Tona nefesi. ʼE ina fakaʼua anai ki te kau agakovi he ʼu hele, mo te afi mo te sufe pea mo te matagi vela. . . . Heʼe faitotonu ia Sehova; pea ʼe ina leleiʼia te ʼu aga faitotonu.”—Pesalemo 11:4-7.
Ko He Mālama Foʼou Faitotonu
13, 14. He koʼē ʼe maʼu anai ʼi te mālama foʼou ia te agatonu pea mo te faitotonu?
13 ʼI te temi ʼaē kā fakaʼauha ai anai e Sehova ia te mālama heʼe faitotonu ʼaenī ʼe puleʼi e Satana, ʼe ina fakatuʼu anai he mālama foʼou taulekaleka. ʼE puleʼi anai e te Puleʼaga ʼo te ʼAtua ʼe tuʼu ʼi selō, ʼaē neʼe akoʼi e Sesu ke faikole kiai tana kau tisipulo. ʼE fetogi anai te agakovi pea mo te heʼe faitotonu ʼaki te agatonu pea mo te faitotonu, pea ʼi te temi leva ʼaia kua fakahoko kātoa ia te faikole ʼaenī: “Ke hoko mai tou puleʼaga. Ke fai tou finegalo ʼi te kele, ohagē ko selō.”—Mateo 6:10.
14 ʼE fakahā mai ʼi te Tohi-Tapu ia te faʼahiga takitaki ʼaē ʼe tou lava fakaʼamu kiai, pea ko he takitaki ʼe fakaʼamu nei kiai te hahaʼi agatonu fuli. ʼE hoko kātoa anai ia te ʼu palalau ʼaē iā Pesalemo 145:16: “[Sehova ʼAtua] ʼe ke ʼavahi tou nima pea ʼe ke fafaga te loto ʼo te meʼa maʼuli fuli pē.” Pea ʼe toe ʼui fēnei iā Isaia 32:1: “Koʼenī! ʼE pule anai he hau [ko Kilisito Sesu ʼi selō] ki te faitotonu; pea ki te kau tama ʼaliki [te kau fakafofoga ʼo Kilisito ʼi te kele], ʼe natou pule anai ohagē ko he ʼu tama ʼaliki ki te faitotonu.” ʼO ʼuhiga mo te Hau ko Sesu Kilisito, ʼe fakakikite fēnei iā Isaia 9:7: “Ki te mahu ʼo te pule fakaʼaliki pea mo te tokalelei ʼe mole ʼi ai anai hona gataʼaga, ʼi te hekaʼaga hau ʼo Tavite pea mo tona puleʼaga, moʼo fakatuʼu maʼu pea mo lagolago ʼaki te faitotonu, ʼi te temi nei ʼo aʼu ki te ʼu temi heʼegata. Pea ko te mālohi pē ʼo Sehova ʼaē kā ina fai te faʼahi ʼaia.” ʼE kotou fakaʼamu koa ke kotou māʼuʼuli ʼi te takitaki faitotonu ʼaia?
15. Koteā ʼaē kā fai anai e Sehova ʼi te mālama foʼou maʼa te hahaʼi fuli?
15 ʼI te mālama foʼou ʼa te ʼAtua, ʼe mole ʼi ai anai he ʼuhiga ʼo hatatou fai te ʼu palalau ʼaē ʼe tuʼu iā Tagata Tānaki 4:1: “Neʼe au mafuli ke au vakaʼi te ʼu gāue faka taʼomia fuli ʼaē neʼe fai ʼi te lalo laʼā pea koʼenī, te ʼu loʼimata ʼo nātou ʼaē neʼe māʼuʼuli taʼomia, kae neʼe mole ʼi ai honatou tagata fakaloto fīmālie; pea neʼe maʼu te mālohi ʼi te faʼahi ʼo nātou ʼaē ʼe natou faka taʼomia ia nātou, koia neʼe mole ʼi ai honatou tagata fakafīmālie.” ʼIo, ʼuhi ko totatou ʼuhiga agahala, ʼe faigataʼa anai hatatou fakakaukauʼi peʼe feafeaʼi anai te taulekaleka ʼo te mālama foʼou faitotonu. ʼE mole toe ʼi ai anai te agakovi, kae ʼe hoko anai ʼi te ʼaho fuli pē he ʼu meʼa ʼe lelei. ʼEī, ko Sehova ʼe ina fetogi anai ia meʼa fuli ʼe kovi, ʼo mole feala hatatou fakafuafua te lelei ʼo te meʼa ʼaē kā ina fai. Koia ʼe tāu mo feʼauga te takitaki ʼaē e Sehova ʼAtua ia te ʼapositolo ko Petelo ke ina tohi fēnei: “Ohagē ko tana fakapapau mai, ʼe tou talitali ki te ʼu lagi foʼou pea mo te kele foʼou ʼaē ʼe tonu ke nofo ai te faitotonu”!—2 Petelo 3:13.
16. Neʼe fakatuʼu feafeaʼi te “ ʼu lagi foʼou,” pea koteā te faka ʼuhiga o te ʼui ʼaē kua fakatuʼu iā ʼaho nei te “kele foʼou”?
16 Ko te “ ʼu lagi foʼou,” ia te Puleʼaga ʼo te ʼAtua ʼi selō ʼaē ʼe takitaki e Kilisito, kua fakatuʼu ia. Ko nātou ʼaē kā natou faʼufaʼu ia te “kele foʼou,” ia he mālama foʼou ʼe faʼufaʼu e te hahaʼi lotolelei, ʼe fakatahitahi nei ʼi te ʼu ʼaho fakamuli. Kua teitei pē ke natou toko fitu miliona, iā fenua e 235 pea iā kōkelekāsio e 100 000. Neʼe ako e te ʼu toko miliona hahaʼi ʼaia ia te ʼu ala agatonu pea mo faitotonu ʼo Sehova, pea ko tona fua ʼi te mālamanei ko tanatou logo tahi ʼi te ʼofa faka Kilisitiano ʼaē ko he noʼo mālohi. ʼE fakaofoofo pea mo tologa tanatou logo tahi ʼi te hisitolia ʼo te tagata, ko he logo tahi ʼe mole maʼu ʼi te lotolotoiga ʼo te hahaʼi ʼa Satana. Ko te taʼi ʼofa pea mo logo tahi ʼaia, ʼe ko he ʼu fakaʼata ʼo te temi taulekaleka ʼi te mālama foʼou ʼo te ʼAtua, ʼaē kā pule ai anai ia te agatonu pea mo te faitotonu.—Isaia 2:2-4; Soane 13:34, 35; Kolose 3:14.
ʼE Mole Fua Anai Ia Te ʼOhofi ʼa Satana
17. He koʼē ʼe mole fua anai ia te ʼohofi fakaʼosi ʼa Satana ʼo te ʼu kaugana ʼa Sehova?
17 Ko Satana pea mo tana ʼu kaugana kua vave pē anai tanatou fakafeagai ki te ʼu kaugana ʼa Sehova ʼi tanatou faiga ʼaē ke natou fakaʼauha ia nātou. (Esekiele 38:14-23) ʼE kau te faʼahi ʼaia ki te meʼa ʼaē neʼe higoaʼi e Sesu ko “te mamahi lahi, ʼe mole hona tatau kua hoko talu mai te kamataʼaga ʼo te mālamanei ʼo kaku mai ki te temi nei, kailoa, pea ʼe mole toe hoko anai he tahi mamahi fēia.” (Mateo 24:21) ʼE fua anai koa te ʼohofi ʼa Satana? Kailoa ia. ʼE fakapapau fēnei mai ʼi te Folafola ʼa te ʼAtua: “Ko Sehova ʼe ko he kaumeʼa ʼo te faitotonu, pea ʼe mole ina liʼaki anai tana hahaʼi agatonu. Ki he ʼu temi ʼe mole ʼiloʼi hona gataʼaga, ʼe taupau anai nātou; kae ko te hōloga ʼo te kau agakovi, ʼe tāʼaki anai nātou. ʼE maʼu anai te kele e te kau faitotonu, pea ʼe natou nonofo ai anai ʼo talu ai.”—Pesalemo 37:28, 29.
18. (a) Koteā anai kā fai e te ʼAtua mokā ʼohofiʼi e Satana ia Tana hahaʼi? (b) He koʼē ʼe lelei ke kotou toe vakaʼi te manatu ʼi te Tohi-Tapu ʼo ʼuhiga mo te mālo ʼo te faitotonu?
18 Ko te ʼohofiʼi e Satana pea mo tana kau temonio ia te ʼu kaugana ʼa Sehova, ʼe ko tanatou fakafeagai fakaʼosi leva ʼaia ki te ʼAtua. ʼAki ia Sakalia, neʼe fakakikite fēnei e Sehova: “Ko ʼaē ʼe ala kiā koutou ʼe ala ia ki toku kanoʼi mata.” (Sakalia 2:8) ʼE hagē ko he tahi ʼe ina ʼai tona kauʼi tuhi ki te mata ʼo Sehova. ʼE ina foimo tali atu aipē pea mo matehi ia nātou ʼaia. Ko te ʼu kaugana ʼa Sehova ʼe ko te hahaʼi ʼo te kele ʼaē ʼe feʼofaniʼaki lahi, mo logo tahi, mo tokalelei pea mo fakalogo ki te lao. Koia ʼe mole he tupuʼaga lelei ʼo te ʼohofiʼi ʼaia ʼo nātou ʼe mole tuha anai mo nātou, ʼe heʼe faitotonu ia. ʼE mole tali anai e te ‘kaumeʼa lahi ʼo te faitotonu’ ke hoko he meʼa fēia ki tana ʼu kaugana. ʼE ina fakaʼauha ai anai ʼo talu ai te ʼu fili ʼo tana hahaʼi, pea ʼe mālo te faitotonu, pea mo haofaki nātou ʼaē ʼe tauhi ki te ʼAtua moʼoni pē e tahi. ʼE ko he ʼu gāue fakaofoofo ʼe tou fakatalitali kiai kā ʼamanaki hoko mai!—Tāʼaga Lea 2:21, 22.
ʼE Kotou Tali Feafeaʼi Anai?
• He koʼē kua mafola ia te heʼe faitotonu?
• ʼE fakatokatoka feafeaʼi anai e Sehova ia te heʼe faitotonu ʼi te kele?
• Koteā ʼaē neʼe malave kiā koutou ʼi takotou ako ʼo ʼuhiga mo te mālo ʼo te faitotonu?
[Paki ʼo te pasina 9]
Neʼe kua mahu te agakovi ʼi muʼa ʼo te tō ʼo te Tulivio, pea ʼe mahu ʼi te “ ʼu ʼaho fakamuli” ʼaenī
[Paki ʼo te pasina 10]
ʼI te mālama foʼou ʼo te ʼAtua, ʼe fetogi anai e te faitotonu pea mo te agatonu ia te agakovi