Tou Faʼifaʼitakiʼi Ia Sehova—Tou Fakahā Te Faitotonu Pea Mo Te Agatonu
“Ko ʼau ia Sehova, ia Ia ʼaē ʼe lotoʼofa, mo faitotonu pea mo agatonu ki te kele; heʼe ʼau fiafia ʼi te ʼu meʼa ʼaia.”—Selemia 9:24.
1. Koteā te ʼamanaki fakatalakitupua ʼaē neʼe foaki mai e Sehova?
NEʼE fakapapau e Sehova ʼe hoko mai anai te ʼaho ʼaē ka ʼiloʼi ai ia ia e te hahaʼi fuli. Neʼe ina ʼui fēnei ʼaki tana polofeta ko Isaia: “ ʼE mole nātou fai anai he meʼa ʼe kovi pea ʼe mole fakatupu anai he maumau ʼi toku moʼuga maʼoniʼoni katoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.” (Isaia 11:9) ʼE ko he ʼamanaki fakatalakitupua!
2. Koteā te faka ʼuhiga ʼo te ʼui ʼaē ke tou ʼiloʼi ia Sehova? Koteā tona tupuʼaga?
2 Kae koteā te faka ʼuhiga ʼo te ʼui ʼaē ke tou ʼiloʼi ia Sehova? Neʼe fakahā e Sehova kia Selemia te meʼa ʼaē ʼe maʼuhiga tāfito: “Ke fakasiosio tonu pea ke . . . ʼiloʼi ʼau, ko ʼau ia Sehova, ia Ia ʼaē ʼe lotoʼofa, mo faitotonu pea mo agatonu ki te kele; heʼe ʼau fiafia ʼi te ʼu meʼa ʼaia.” (Selemia 9:24) Koia, ko te faka ʼuhiga ʼaē ke tou ʼiloʼi ia Sehova ʼe ko tatatou ʼiloʼi ʼaē pe neʼe feafeaʼi tana fakahoko te faitotonu pea mo te agatonu. Kapau ʼe tou maʼuliʼi te ʼu kalitate ʼaia, pea ʼe fiafia anai. ʼE lava feafeaʼi hatatou fai te faʼahi ʼaia? Neʼe taupau e Sehova ʼi tana Folafola, te Tohi-Tapu, te ʼu fakamatala ʼo tana aga ki te hahaʼi ʼi te ʼu temi fuli pe. Kapau ʼe tou ako te Tohi-Tapu, pea ʼe tou ʼiloʼi ai anai peʼe fakahā feafeaʼi e Sehova te faitotonu pea mo te agatonu, ʼo feala ai hatatou faʼifaʼitakiʼi ia ia.—Loma 15:4.
ʼE Faitotonu Kae ʼe Manavaʼofa
3, 4. He koʼe neʼe totonu te fakaʼauha ʼaē neʼe fai e Sehova kia Sotoma pea mo Komola?
3 Ko te fakamāuʼi e te ʼAtua ia Sotoma pea mo Komola ʼe ko he faʼifaʼitaki lelei ʼaupito ʼaia, he neʼe hā ai te ʼu faʼahi kehekehe ʼo te faitotonu ʼa Sehova. Neʼe mole tonu pe ke ina fakahoko te tautea kae neʼe toe maʼua foki ke ina hāofaki te hahaʼi ʼaē neʼe agatonu. Neʼe tonu koa ke fakaʼauha te ʼu kolo ʼaia? ʼI te kamata, neʼe manatu e Apalahamo neʼe mole tonu ke hoko te faʼahi ʼaia, he neʼe mole mahino katoa ia ki te kua mafola ʼo te agakovi ʼo Sotoma. Neʼe fakapapau age e Sehova kia Apalahamo, kapau ʼe ina maʼu he hahaʼi agatonu e toko hogofulu, pea ʼe mole ina fakaʼauha anai te kolo. Koia ʼe hā mai, ʼe mole fefeka peʼe heʼeʼofa te faitotonu ʼa Sehova.—Senesi 18:20-32.
4 Ko te ʼaʼahi ʼaē neʼe fai e te ʼu ʼaselo e toko lua neʼe ina fakamoʼoni ki te kua aga fakalialia ʼa te hahaʼi ʼo Sotoma. Ko te ʼu tagata ʼo te kolo, “mai te tama ki te matuʼa,” ʼi tanatou ʼiloʼi ʼaē neʼe nonofo te ʼu tagata e toko lua ʼi te ʼapi ʼo Lote, neʼe nātou ʼohofiʼi tona ʼapi he neʼe nātou fia felāveʼi fakasino mo nāua. Neʼe kua kovi ʼaupito tanatou ʼu aga! ʼE mahino papau ia, neʼe faitotonu te fakamāu ʼaē neʼe fai e Sehova ki te kolo ʼaia.—Senesi 19:1-5, 24, 25.
5. Neʼe hāofaki feafeaʼi e te ʼAtua ia Lote mo tona famili mai Sotoma?
5 ʼI tana ʼosi fakaʼaogaʼi te fakaʼauha ʼaia ʼo Sotoma pea mo Komola ohage ko he faʼifaʼitaki moʼo fakatokagaʼi te hahaʼi, neʼe tohi fēnei e te ʼapositolo ko Petelo: “ ʼE ʼiloʼi e Sehova peʼe feafeaʼi te fakahāo mai te ʼahiʼahi te hahaʼi ʼaē ʼe pipiki kia te ia.” (2 Petelo 2:6-9) Neʼe mole feala ke ʼui neʼe fakahoko te faitotonu mo kanapaula neʼe matehi fakatahi te tagata agatonu ko Lote mo tona famili pea mo te hahaʼi ʼo Sotoma ʼaē neʼe mole pipiki ki te ʼAtua. Koia, neʼe fakahā e te ʼu ʼaselo ʼa Sehova kia Lote te kua ōvi mai ʼo te fakaʼauha. ʼI te tuai ʼa Lote, ko te ʼu ʼaselo “ ʼi te manavaʼofa ʼa Sehova” neʼe nātou taki ia ia, mo tona ʼohoana, pea mo tana ʼu ʼofafine ki tuʼa ʼo te kolo. (Senesi 19:12-16) ʼE feala ke tou falala ʼe toe tokaga anai ia Sehova ki te hahaʼi agatonu ʼi te fakaʼauha ʼaē ka hoko mai ki te tuʼu ʼo te ʼu faʼahiga meʼa agakovi ʼaenī.
6. He koʼe ʼe mole tonu ke lahi fau tatatou tuʼania ʼo ʼuhiga mo te fakaʼauha ʼaē ka hoko mai ki te tuʼu ʼo te ʼu faʼahiga meʼa agakovi ʼaenī?
6 Logope la ko te fakaʼosi ʼo te tuʼu ʼo te ʼu faʼahiga meʼa ʼaenī ʼe ko he temi anai ki “te fakatūʼa ʼo mulimuli ki te faitotonu,” kae ʼe mole tonu ke lahi fau tatatou tuʼania. (Luka 21:22) Ko te fakamāu ʼaē ka fakahoko anai e te ʼAtua ʼi Halamaketone ʼe “totonu katoa” anai. (Pesalemo 19:9) Ohage ko te meʼa ʼaē neʼe mahino kiai ia Apalahamo, ʼe tonu ke tou falala katoa ki te faitotonu ʼa Sehova, ʼaē ʼe māʼoluga age ʼi tatatou faitotonu. Neʼe fehuʼi fēnei e Apalahamo: “Ko te Tuʼi Fakamāu ʼo te kele katoa ʼe mole ina fai anai koa te meʼa ʼaē ʼe totonu?” (Senesi 18:25; vakaʼi ia Sopo 34:10.) Peʼe ohage ko tona tohi fakalelei e Isaia, “ko ai ʼaē ʼe ina akoʼi [kia Sehova] te ala ʼo te faitotonu?”—Isaia 40:14.
Ko He Aga Faitotonu Moʼo Hāofaki Te Malamanei
7. Koteā te pikipikiga ʼo te faitotonu ʼa te ʼAtua pea mo tana manavaʼofa?
7 Neʼe mole hā pe te faitotonu ʼa te ʼAtua ʼi tana tauteaʼi te kau agakovi. ʼE ʼui e Sehova ʼo ʼuhiga mo ia, ko “he ʼAtua agatonu pea ʼe ko te Hāofakiʼaga.” (Isaia 45:21) ʼE hā ʼaki mai, ʼe pipiki te faitotonu ʼa te ʼAtua ki tona finegalo ʼaē ke hāofaki te malamanei mai te ʼu fua ʼo te agahala. ʼI tana talanoa ki te vaega ʼaia, ʼe fakahā e The International Standard Bible Encyclopedia, ʼaē neʼe tā ʼi te taʼu 1982, ko te “faitotonu ʼa te ʼAtua ʼe ina kumi he ʼu ʼaluʼaga ke ina fakahā ai Tona manavaʼofa pea mo ina fai Tona hāofaki.” ʼE mole faka ʼuhiga leva ʼe tonu ke fakavaivaiʼi te faitotonu ʼa te ʼAtua ʼaki te manavaʼofa, kailoa, kae ko tona faka ʼuhiga ko te faitotonu ʼa te ʼAtua ʼe manavaʼofa. Ko te foaki e te ʼAtua te totogi ki te malamanei, ʼe ko te faʼifaʼitaki lahi tokotahi ʼaia ʼo te faitotonu manavaʼofa ʼa te ʼAtua.
8, 9. (a) Koteā ʼaē ʼe pipiki ki te ʼui ʼaē ko te foaki ʼo te totogi ʼe ko he “aga ʼe totonu”? Koteā tona tupuʼaga? (b) Koteā ʼaē ʼe kole mai e Sehova ke tou fai?
8 Ko te totogi—te maʼuli maʼuhiga ʼo te ʼAlo ʼulu tokotahi ʼa te ʼAtua, ia Sesu Kilisito—neʼe ko he totogi lahi koteʼuhi ko te ʼu lekula ʼa Sehova ʼe māʼoluga pea ʼe mulimuli kiai. (Mateo 20:28) Neʼe puli te maʼuli haohaoa ʼa Atama, koia neʼe ʼaoga ai he maʼuli haohaoa moʼo toe totogi te maʼuli ʼo te hōloga ʼo Atama. (Loma 5:19-21) Neʼe fakamatala e te ʼapositolo ko Paulo ko te nofo agatonu ʼa Sesu, ʼo kau ai mo tana foaki te totogi, neʼe ko “he aga ʼe totonu.” (Loma 5:18, kiʼi nota ʼi te lalo pasina) Koteā tona tupuʼaga? Heʼe kia Sehova, neʼe totonu pea mo faitotonu te meʼa ʼaē neʼe ina fai moʼo totogi ʼaki te malamanei, tatau aipe pe neʼe lahi ʼaupito kia ia te totogi ʼaia. Neʼe hage te hōloga ʼo Atama ko he “kaho kua volu,” pea neʼe mole loto e te ʼAtua ke ina malakiʼi, pe neʼe hage ko he “vavaeʼi lino ʼaē ʼe kohu,” neʼe mole ina loto ke ina matehi. (Mateo 12:20) Neʼe falala te ʼAtua ʼe tokolahi anai te kau tagata mo te kau fafine agatonu ʼi te hōloga ʼo Atama.—Vakaʼi ia Mateo 25:34.
9 Koteā te meʼa ʼaē ʼe tonu ke tou fai moʼo tali ki te agaʼofa pea mo faitotonu lahi ʼaia? Ko te tahi ʼi te ʼu meʼa ʼaē ʼe kole mai e Sehova ke tou fai ʼe ko te “maʼuliʼi ʼo te faitotonu.” (Mikea 6:8) ʼE tou lava fai feafeaʼi te meʼa ʼaia?
Tou Kumi Te Faitotonu, Tou Haga Fai Te Agatonu
10. (a) Koteā te ʼuluaki faʼahi ʼaē ʼe feala ke tou fai moʼo maʼuliʼi te faitotonu? (b) ʼE lava feafeaʼi ke tou ʼuluaki kumi te faitotonu ʼa te ʼAtua?
10 ʼUluaki, ʼe tonu ke tou mulimuli ki te ʼu lekula ʼa te ʼAtua ʼo ʼuhiga mo te aga ʼaē ʼe tonu ke fai. Mai tona ʼaluʼaga ʼaē ko te ʼu lekula ʼa te ʼAtua ʼe faitotonu pea mo agatonu, koia ʼe tou maʼuliʼi te faitotonu mokā tou mulimuli kiai. ʼE ko te meʼa ʼaia ʼaē ʼe loto e Sehova ke fai e tana hahaʼi. Neʼe ʼui fēnei e Sehova ki te kau Iselaelite: “Koutou ako te fai ʼo te meʼa ʼaē ʼe lelei; koutou kumi te faitotonu.” (Isaia 1:17) Neʼe fai e Sesu te tokoni feiā ki te hahaʼi ʼaē neʼe fagono kia te ia ʼi te Akonaki ʼi te Moʼuga, ʼi tana fakatotonu ʼaē ke nātou ‘ ʼuluaki kumi muʼa te puleʼaga pea mo te faitotonu ʼa te ʼAtua.’ (Mateo 6:33) Neʼe fakaloto mālohiʼi e Paulo ia Timoteo ke “hoko atu ʼi te faitotonu.” (1 Timoteo 6:11) Ka tou maʼuliʼi te ʼu lekula ʼa te ʼAtua ʼo ʼuhiga mo te aga ʼaē ʼe lelei pea mo tou kofuʼi te ʼuhiga tagata foʼou, pea ʼe hoko atu tatatou haʼele ʼi te faitotonu pea mo te agatonu moʼoni. (Efesi 4:23, 24) Ko tona faka ʼuhiga, ʼe tou kumi te faitotonu ʼi tatatou fai te ʼu meʼa ʼaē ʼe loto kiai te ʼAtua.
11. He koʼe ʼe tonu ke tou tauʼi te pule ʼo te agahala, pea ʼe lava feafeaʼi hatatou fai te faʼahi ʼaia?
11 ʼE tou ʼiloʼi lelei, ʼe mole faigafua tuʼumaʼu ki te hahaʼi agahala ke nātou fai te meʼa ʼaē ʼe faitotonu pea mo agatonu. (Loma 7:14-20) Neʼe fakaloto mālohiʼi e Paulo te kau Kilisitiano ʼo Loma ke nātou tauʼi te pule ʼo te agahala, ke feala hanatou tuku tonatou sino ki te ʼAtua ohage “ko he ʼu mahafu ʼo te faitotonu,” ʼaē ka ʼaoga anai ki te ʼAtua moʼo fakahoko tana fakatuʼutuʼu. (Loma 6:12-14) ʼO toe feiā aipe, ʼi tatatou ako tuʼumaʼu pea mo maʼuliʼi te Folafola ʼa te ʼAtua, ʼe feala ke tou maʼu te “manatu ʼa Sehova” pea mo tou ‘fakatonutonuʼi [tatou] ʼi te faitotonu.’—Efesi 6:4; 2 Timoteo 3:16, 17.
12. Koteā ʼaē ʼe mole tonu ke tou fai mo kapau ʼe tou fia fai ki te hahaʼi te aga ʼaē ʼe tou loto ke fai mai e Sehova kia tatou?
12 Lua, ʼe tou maʼuliʼi te faitotonu mokā tou fai ki te hahaʼi te aga ʼaē ʼe tou loto ke fai mai e Sehova kia tatou. ʼE faigafua tatatou fakahā he ʼu aga kehekehe e lua—ke tou agalelei mo te hahaʼi ʼaē ʼe tou leleiʼia kae tou aga fefeka mo ʼihi. ʼE tou foimo takuʼaki tatatou ʼu hala, kae ʼe tou valoki te ʼu hala ʼa ʼihi, ʼaē ʼe lagi veliveli age ʼi tatatou ʼu hala. Neʼe fehuʼi fakahagatonu fēnei e Sesu: “He koʼe ia ʼe ke sioʼi koe te mohuku ʼaē ʼe ʼi te mata ʼo tou tēhina, ka mole ke tokaga koe ki te lalago ʼaē ʼe ʼi tou mata ʼo koe?” (Mateo 7:1-3) ʼE tonu ke tou manatuʼi, kapau ʼe vakavakaʼi fakalelei e Sehova tatatou ʼu hala pea ʼe mole he tahi ia tatou ʼe feala anai ke tuʼu. (Pesalemo 130:3, 4) Kapau ʼe fakagafua e te faitotonu ʼa Sehova ke mole ina tokagaʼi te ʼu vaivaiʼaga ʼo totatou ʼu tēhina, pea ko ai koa ia tatou ke tou fakamāuʼi kovi nātou?—Loma 14:4, 10.
13. He koʼe ʼe ko he maʼua ki he tahi ʼe agatonu ke ina faka mafola te logo lelei ʼo te Puleʼaga?
13 Tolu, ʼe tou fakahā te faitotonu ʼa te ʼAtua mokā tou kau mālohi ki te gāue fai faka mafola. ʼE tokoni fēnei mai ia Sehova kia tatou: “ ʼAua naʼa ke fakafisi te meʼa ʼaē ʼe lelei kia nātou ʼaē ʼe tonu ke foaki kiai, mo kapau ʼe feala ki tou nima ke ina fai te faʼahi ʼaia.” (Tāʼaga Lea 3:27) ʼE mole tou agatonu anai mo kapau ʼe tou taupau maʼa tatou te ʼatamai mālama ʼa te ʼAtua ʼo ʼuhiga mo te maʼuli, ʼaē neʼe foaki lahi mai e te ʼAtua kia tatou. ʼE moʼoni, tokolahi ʼe lagi nātou fakafisi ki te logo ʼaē ʼe tou tala, kae kapau ʼe haga fakahā mai e te ʼAtua tana manavaʼofa kia tatou, pea ʼe tonu ke tou lotolelei mo tatou ke tou haga foaki ki te hahaʼi te fealagia ʼaē ke nātou “aʼu ki te fakahemala.” (2 Petelo 3:9) Pea ohage ko Sesu, ʼe tou fiafia mokā feala ke tou tokoni ki he tahi ke ina kumi te faitotonu pea mo te agatonu. (Luka 15:7) ʼE ko te temi lelei ʼaenī ke tou ‘tūtū ʼi te faitotonu.’—Osea 10:12.
“Te ʼu Tama ʼAliki Ki Te Faitotonu”
14. Koteā te gāue ʼaē ʼe fai e te kau tagata ʼāfea ʼo ʼuhiga mo te faitotonu?
14 Ko tatou fuli ʼe tonu ke tou haʼele ʼi te faitotonu, kae ko te kau tagata ʼāfea ʼo te kokelekasio, ʼe ʼi ai tonatou maʼua tāfito ʼo ʼuhiga mo te faʼahi ʼaia. Ko te pule ʼa Sesu ʼi tona ʼuhiga tama ʼaliki, ʼe ina ‘fai ʼaki te faitotonu pea mo te agatonu.’ Koia ʼe tonu ke mulimuli te kau tagata ʼāfea ki te faitotonu ʼa te ʼAtua. (Isaia 9:7) ʼE nātou manatuʼi te lea faka polofeta ʼaē ʼe tuʼu ia Isaia 32:1: “Koʼeni! ʼE pule anai he hau ki te faitotonu; pea ʼo ʼuhiga mo te kau tama ʼaliki, ʼe nātou pule anai ohage ko te ʼu tama ʼaliki ki te faitotonu.” ʼI tonatou ʼuhiga kau tagata taupau ʼaē neʼe hinoʼi e te laumālie, peʼe ko he ʼu ‘tagata tauhi ʼa te ʼAtua,’ ʼe tonu ke faʼifaʼitakiʼi e te kau tagata ʼāfea te ʼAtua.—Tito 1:7.
15, 16. (a) E feafeaʼi te faʼifaʼitakiʼi e te kau tagata ʼāfea te tagata tauhi manu agatonu ʼo te lea fakatātā ʼa Sesu? (b) Koteā te manatu ʼaē ʼe tonu ke maʼu e te kau tagata ʼāfea ʼo ʼuhiga mo nātou ʼaē kua hēhē ʼi te faʼahi fakalaumālie?
15 Neʼe fakahā e Sesu ko te faitotonu ʼa Sehova ʼe ʼofa, mo loto manavaʼofa, pea ʼe fakafuafua lelei. Ia meʼa fuli, neʼe ina faiga ke tokoni kia nātou ʼaē neʼe tau mo he ʼu fihifihia, pea mo ina “kumi pea mo hāofaki te meʼa ʼaē neʼe kua puli.” (Luka 19:10) Ohage ko te tagata tauhi manu ʼo te lea fakatātā ʼa Sesu, ʼaē neʼe ina haga kumi ʼo aʼu ki tana toe maʼu te ōvi ʼaē neʼe puli, ʼe kumi e te kau tagata ʼāfea ia nātou ʼaē kua hēʼia ʼi te faʼahi fakalaumālie pea mo nātou faiga ke nātou toe taki nātou ki te lotoʼā.—Mateo 18:12, 13.
16 ʼE mole tauteaʼi e te kau tagata ʼāfea ia nātou ʼaē neʼe lagi nātou fai he agahala mamafa, kae ʼe faiga e te kau tagata ʼāfea ke maʼu e te hahaʼi ʼaia he fakamālōlō pea ke nātou fakahemala, mo kapau ʼe feala. ʼE nātou fiafia mokā feala ke nātou tokoni ki he tahi neʼe hēʼia. Kae ʼe nātou lotomamahi mokā mole fia fakahemala ia ia ʼaē neʼe agahala. ʼI te temi ʼaia, ʼe maʼua ai ke nātou fakahoko te ʼu lekula faitotonu ʼa te ʼAtua, ʼo nātou fakamavae ia ia ʼaē ʼe mole fia fakahemala. Māʼia mo te temi ʼaia, ohage ko te tāmai ʼo te foha maumau koloā, ʼe nātou ʼamanaki ʼo ʼuhiga mo ia ʼaē kua hēhē, ke ‘toe mālama’ ʼi he ʼaho. (Luka 15:17, 18) Koia, ʼe ʼaʼahi e te kau tagata ʼāfea ia nātou ʼaē kua fakamavae moʼo fakamanatuʼi age kia nātou peʼe lava feafeaʼi hanatou toe liliu mai ki te kautahi ʼa Sehova.a
17. Koteā te fakatuʼutuʼu ʼa te kau tagata ʼāfea mokā nātou vakavakaʼi te ʼu agahala ʼaē neʼe hoko, pea koteā te kalitate ʼaē ka tokoni anai kia nātou ke nātou fai te faʼahi ʼaia?
17 ʼE ʼaoga tāfito ke faʼifaʼitakiʼi e te kau tagata ʼāfea te faitotonu ʼa Sehova mokā nātou vakavakaʼi te ʼu agahala ʼaē neʼe hoko. Neʼe “fakaōvi fuli” te hahaʼi agahala kia Sesu he neʼe nātou ʼiloʼi ʼe mahino anai kia nātou pea mo tokoni anai kia nātou. (Luka 15:1; Mateo 9:12, 13) ʼE mahino ia, neʼe mole tali e Sesu te fai ʼo te agahala. ʼI tana kai fakatahi mo Sesu, neʼe uga ai ia Sakeo, te tagata neʼe ina kaihaʼa fakakākā te hahaʼi, ke fakahemala pea ke ina fakatokatoka te ʼu mamahi fuli ʼaē neʼe ina fai ki te hahaʼi. (Luka 19:8-10) Ia ʼaho nei, ʼe toe kumi e te kau tagata ʼāfea ke hoko te faʼahi ʼaia ʼi tanatou fai fakamāu—ke fakahemala ia ia ʼaē neʼe agahala. Kapau, ohage ko Sesu, ʼe faigafua te fakaōvi kia nātou, pea ʼe faigafua anai kia nātou ʼaē neʼe agahala ke nātou ʼolo ʼo kumi tokoni kia nātou.
18. Koteā ʼaē ʼe tonu ke maʼu e te kau tagata ʼāfea ke nātou hage ko “he nonoʼaga ki te matagi”?
18 Kapau ʼe maʼu e te kau tagata ʼāfea he lototokaga ki te hahaʼi, pea ʼe tokoni anai te faʼahi ʼaia kia nātou ke nātou fakahoko te faitotonu ʼa te ʼAtua, ʼaē ʼe mole fefeka pea ʼe mole ina meʼa noaʼi te meʼa ʼaē ʼe logoʼi e te hahaʼi. ʼE lelei ke tou fakatokagaʼi, ko Esitalasi neʼe mole ina teuteuʼi pe tana ʼatamai moʼo akoʼi te faitotonu ki te kau Iselaelite, kae neʼe ina toe teuteuʼi mo tona loto. (Esitalasi 7:10) Ko he lotomahino ʼe ina faka fealagia anai ki te kau tagata ʼāfea ke nātou foaki te ʼu pelesepeto faka Tohi-Tapu ʼaē ʼe ʼaoga, pea mo nātou tokagaʼi te ʼu ʼaluʼaga ʼa te hahaʼi takitokotahi. ʼI te temi ʼaē neʼe fakamālōlō ai e Sesu te fafine ʼaē neʼe ʼalu te toto ia ia, neʼe ina fakahā ai ko te faka ʼuhiga ʼo te faitotonu ʼa Sehova ʼe ko te mahino ki te ʼuhiga ʼo te lao. (Luka 8:43-48) Ko te kau tagata ʼāfea ʼaē ʼe nātou fakahoko te faitotonu ʼaki te ʼofa, ʼe nātou hage anai ko “he nonoʼaga ki te matagi,” kia nātou ʼaē ʼe mamahi ʼuhi ko tanatou ʼu vaivaiʼaga peʼe ʼuhi ko te tuʼu ʼo te ʼu faʼahiga meʼa agakovi ʼaenī ʼaē ʼe tou maʼuʼuli ai.—Isaia 32:2.
19. Koteā ʼaē neʼe fai e te tuagaʼane moʼo tali ki te fakahā ʼo te faitotonu ʼa te ʼAtua?
19 Ko te tuagaʼane neʼe agahala mamafa neʼe ina leleiʼia ki muli age te faitotonu fakaʼatua. ʼE ina ʼui fēnei: “ ʼI tona fakahagatonu, neʼe ʼau mataku ʼi te ʼalu ki te kau tagata ʼāfea. Kae neʼe nātou agaʼofa pea mo tokagaʼi toku matagafua. Neʼe hage te ʼu tagata ʼāfea ko he ʼu tāmai kae mole ko he ʼu tuʼi fakamāu aga fefeka. Neʼe nātou fakamahino mai ʼe mole līaki anai ʼau e Sehova mo kapau ʼe ʼau fakatotonu ke ʼau fetogi. Neʼe ʼau mahino ai peʼe feafeaʼi tana fakatonutonuʼi tatou ohage ko he Tāmai ʼofa. Neʼe feala ai leva ke ʼau fakahā kia Sehova te ʼu meʼa ʼaē neʼe ʼi toku loto, ʼaki te falala ʼaē ʼe fagono anai ki taku kole. ʼI taku manatuʼi te faʼahi ʼaia, ʼe feala ke ʼau ʼui ko taku fai palalau ʼaia mo te kau tagata ʼāfea kua hili kiai taʼu e fitu, neʼe ko he tapuakina mai ia Sehova. Talu mai ai, kua mālohi age taku ʼu felogoi mo ia.”
Tou Taupau Te Faitotonu Pea Mo Fai Te Meʼa ʼAē ʼe Totonu
20. Koteā te ʼu fua lelei ʼaē ʼe tou maʼu ʼi tatatou mahino pea mo tatatou maʼuliʼi te faitotonu pea mo te agatonu?
20 Meʼa fakafiafia foki, heʼe mole faka ʼuhiga pe te faitotonu ʼa te ʼAtua ki te foaki ki te tagata takitokotahi te meʼa ʼaē ʼe tonu ke ina maʼu. Ko te faitotonu ʼa Sehova neʼe ina uga ia ia ke ina foaki te maʼuli heʼegata kia nātou ʼaē ʼe tui. (Pesalemo 103:10; Loma 5:15, 18) ʼE feiā te aga ʼa te ʼAtua kia tatou heʼe ina tokagaʼi tatatou ʼu ʼaluʼaga, pea ʼe ina kumi ke ina hāofaki tatou kae mole ina tauteaʼi tatou. Ei, ko tatatou mahino ki te lahi ʼo te faitotonu ʼa Sehova ʼe ina fakaōvi tatou kia te ia. Pea ʼi tatatou faiga ʼaē ke tou faʼifaʼitakiʼi te faʼahi ʼaia ʼo tona ʼulugaaga, ʼe tapuakina lahi anai totatou maʼuli pea mo te maʼuli ʼa ʼihi. ʼE tokagaʼi anai e tatatou Tāmai ʼaē ʼe ʼi selo tatatou haga kumi te faitotonu. ʼE fakapapau fēnei mai e Sehova kia tatou: “Koutou taupau te faitotonu, pea koutou fai te meʼa ʼaē ʼe totonu. He kua vave hoko mai taku hāofaki, pea kua vave hā taku agatonu. Manuʼia te tagata ʼaē ʼe ina fai te meʼa ʼaia.”—Isaia 56:1, 2.
[Nota ʼi te lalo pasina]
a Koutou vakaʼi Te Tule Leʼo Fakafalani ʼo te ʼaho 15 ʼo ʼApelili 1991, ʼi te pasina 22 ki te 23.
Kei Koutou Manatuʼi Koa?
◻ Koteā ʼaē ʼe akoʼi mai kia tatou e te fakaʼauha ʼo Sotoma pea mo Komola ʼo ʼuhiga mo te faitotonu ʼa Sehova?
◻ He koʼe ko te totogi ʼe ko te fakahā lahi tokotahi ʼaia ʼo te faitotonu pea mo te ʼofa ʼa te ʼAtua?
◻ Koteā te ʼu faʼahi e tolu ʼaē ʼe feala ai ke tou maʼuliʼi te faitotonu?
◻ Koteā te faʼahi tāfito ʼaē ʼe feala ke faʼifaʼitakiʼi ai e te kau tagata ʼāfea te faitotonu ʼa te ʼAtua?
[Paki ʼo te pasina 15]
ʼI tatatou kau ki te gāue fai faka mafola, ʼe tou fakahā ai te faitotonu ʼa te ʼAtua
[Paki ʼo te pasina 16]
Ka mulimuli te kau tagata ʼāfea ki te faitotonu ʼa te ʼAtua, pea ʼe faigafua ai kia nātou ʼaē ʼe tau mo he ʼu fihifihia ke nātou kumi tokoni kia nātou