ʼE Foaki e Sehova Te Mālohi Kia Ia ʼAē ʼe Vaivai

“Ko nātou ʼaē ʼe falala kia Sehova ʼe nātou toe mālolohi anai. ʼE nātou lele ake anai ʼaki he ʼu kapakau ohage ko te ʼu akuila.”—Isaia 40:31.

1, 2. Koteā ʼaē ʼe foaki e Sehova kia nātou ʼaē ʼe falala kia te ia, pea koteā ʼaē ka tou vakaʼi ʼi te temi nei?

KO TE ʼu akuila ʼe nātou kau ki te ʼu manulele mālohi ʼo te lagi. ʼE feala hanatou lele ʼi he temi loaloaga ʼi te lagi, ka mole nātou tā tonatou ʼu kapakau. ʼAki tona ʼu kapakau ʼaē ʼe feala ke meta lua tona loa, ko te “Hau ʼo te ʼu Manulele,” te akuila aulo, “ ʼe kau ʼi te ʼu akuila ʼaē ʼe mamalu ʼaupito; ʼe lele ʼi te ʼu moʼuga pea mo te ʼu mafa, [ʼe] lele lolotoga he ʼu hola ʼi te ʼu moʼuga māʼoluga, pea mo lele ʼo hakehake ki ʼoluga ʼo takaminomino ʼo aʼu ki tana liliu ko he meʼa ʼe mole kei hā lelei ʼi te lagi.”—The Audubon Society Encyclopedia of North American Birds.

² Neʼe lagi manatuʼi e Isaia te mālohi ʼo te akuila, ʼi tana ʼui ʼaē: “ ʼE ina [ia Sehova] foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē kua puli ʼi ai te mālohi. Ko te kau tamaliki tagata ʼe nātou gaʼegaʼe anai pea mo vaivavai anai, pea ko te kau talavou ʼe mahino papau ia ʼe nātou tūkia anai, kae kia nātou ʼaē ʼe nātou falala kia Sehova ʼe nātou toe mālolohi anai. ʼE nātou lele ake anai ʼaki he ʼu kapakau, ohage ko te ʼu akuila. ʼE nātou lele anai pea ʼe mole nātou vaivavai anai; ʼe nātou haʼele anai pea ʼe mole nātou gaʼegagaʼe anai.” (Isaia 40:29-31) ʼI meʼa fakaloto fīmālie te ʼiloʼi ʼaē ko Sehova ʼe ina foaki te mālohi kia nātou ʼaē ʼe falala kia te ia, ke nātou hoko atu tanatou gāue, ohage ʼe ina foaki kia nātou he ʼu kapakau mālohi ʼo te akuila ʼaē ʼe hakehake ki te lagi! Koutou fakatokagaʼi ʼi te temi nei, te tahi ʼu fakatuʼutuʼu neʼe ina fai moʼo foaki te mālohi kia ia ʼaē ʼe vaivai.

Te Mālohi ʼo Te Faikole

3, 4. (a) Koteā te meʼa ʼaē neʼe fakaloto mālohiʼi e Sesu tana kau tisipulo ke nātou fai? (b) ʼE tali feafeaʼi e Sehova ki ʼatatou ʼu faikole?

³ Neʼe fakaloto mālohiʼi e Sesu tana kau tisipulo ke nātou “faikole tuʼumaʼu pea mo ʼaua naʼa nātou fiu.” (Luka 18:1) Kapau ʼe tou fakahā kia Sehova te ʼu meʼa ʼaē ʼi totatou loto, ʼe feala moʼoni koa ke tokoni kia tatou ke tou toe mālolohi, pea ke ʼaua naʼa tou fiu mokā hage ʼe lahi fau te ʼu faigataʼaʼia ʼo te maʼuli? Ei, kae ʼe ʼi ai te ʼu meʼa ʼe mole tonu ke galo kia tatou.

⁴ ʼE tonu ke tou mahino lelei ki te ʼu faʼahiga meʼa ʼaē ʼe fai e Sehova moʼo tali ki ʼatatou ʼu faikole. Neʼe fakatokagaʼi ki muli age e te tuagaʼane neʼe tō māmālie ki te lotomamahi ʼaupito: “Ohage pe ko ʼihi ʼu mahaki, ʼe mole fakahoko e Sehova he ʼu milakulo ʼi te temi ʼaenī. Kae ʼe tokoni mai kia tatou ke tou kātakiʼi te ʼu mahaki ʼaia pea ke tou maʼuli mālōlō ʼi te tuʼu ʼaenī, mo kapau ko he meʼa ʼe feala.” ʼI tana fakamahino ʼaē te tokoni ʼaē neʼe ina maʼu ʼi tana ʼu faikole, neʼe ina toe ʼui fēnei: “ ʼE feala ke ʼau maʼu ʼi te temi fuli pe te laumālie maʼoniʼoni ʼo te ʼAtua.” Kae ko Sehova ʼe mole ina fakaū tatou ke tou hāo ʼi te ʼu mamahi ʼo te maʼuli ʼaē ʼe feala ke hoko kia tatou, kae ʼe ina “foaki . . . te laumālie maʼoniʼoni kia nātou ʼaē ʼe nātou kole kia te ia!” (Luka 11:13; Pesalemo 88:1-3) ʼE feala ki te laumālie ʼaia ke ina faka fealagia kia tatou ke tou tauʼi te ʼu faigataʼaʼia pea mo te ʼu fihifihia ʼaē ʼe feala ke hoko kia tatou. (1 Kolonito 10:13) Kapau ʼe ʼaoga, ʼe feala ki te laumālie ʼaia ke ina tuku mai “te mālohi ʼaē ʼe laka age ʼi te mālohi māhani,” ke tou faʼa kātaki ʼo aʼu ki te temi ʼaē ka pulihi ai e te Puleʼaga ʼa te ʼAtua, te ʼu fihifihia fuli ʼi te mālama foʼou ʼaē kua ōvi mai.—2 Kolonito 4:7.

5. (a) Kapau ʼe tou loto ke ʼi ai he ʼu fua ʼo ʼatatou ʼu kole, koteā te ʼu meʼa maʼuhiga e lua ʼaē ʼe tonu ke tou fai? (b) Koteā te faʼahiga kole ʼaē ʼe feala ke tou fai mo kapau ʼe tou tau pea mo he vaivaiʼaga ʼo te kakano? (c) Koteā anai te sio ʼa Sehova mo kapau ʼe tou haga kole pea mo fakahā lelei te ʼu meʼa ʼaē ʼe tou loto kiai?

⁵ Kae, kapau ʼe tou loto ke ʼi ai he ʼu fua ʼo tatatou ʼu kole, pea ʼe tonu ke tou haga fai, pea ke tou fakahā lelei te ʼu meʼa ʼaē ʼe tou loto kiai. (Loma 12:12) Ohage la, kapau ʼe koutou gaʼegaʼe ʼi ʼihi temi ʼuhi he koutou tauʼi he vaivaiʼaga ʼo te kakano, ʼi te ʼala uhu fuli, koutou kole kia Sehova ke tokoni atu kia koutou ke ʼaua naʼa koutou tō ki te vaivaiʼaga ʼaia ʼi te lolotoga ʼo te ʼaho. Koutou faikole feiā lolotoga te ʼaho katoa pea ʼi te po fuli ʼi muʼa ʼo takotou momoe. Kapau neʼe koutou fai he hala, koutou kole kia Sehova ke ina fakamolemole te hala ʼaia, kae koutou palalau foki kia ia ʼo ʼuhiga mo te ʼu ʼaluʼaga ʼaē neʼe koutou tō ai ki te hala ʼaia, pea koteā te ʼu meʼa ʼaē ka koutou fai anai ke ʼaua naʼa toe hoko te meʼa ʼaia. Kapau ʼe koutou haga fai te taʼi ʼu kole ʼaia pea mo koutou fakahā lelei te ʼu meʼa ʼaē ʼe koutou loto kiai, ʼe hā moʼoni anai kia “Ia ʼaē ʼe fagono ki te faikole” takotou holi moʼoni ʼaē ke koutou mālo ʼi te meʼa ʼaia ʼaē ʼe koutou tauʼi.—Pesalemo 65:2; Luka 11:5-13.

6. He koʼe ʼe feala ke tou falala ko Sehova ʼe fakalogo ki ʼatatou ʼu faikole logope tatatou manatu ʼaē ʼe mole tau mo tatou ke tou faikole?

⁶ Kae, ʼi ʼihi temi, ko nātou ʼaē ʼe gaʼegaʼe ʼe feala ke nātou manatu ʼe mole tau mo nātou ke nātou faikole. Ko te fafine Kilisitiano neʼe ina maʼu te taʼi manatu ʼaia, neʼe ina ʼui fēnei ki muli mai: “ ʼE mole lelei te taʼi manatu ʼaia, heʼe ko he fakamāu ʼaia ʼe tou fai kia tatou totonu, kae mole ʼa tatou te fakamāuʼi ʼo tatou totonu.” ʼIo “ko te ʼAtua totonu te Tuʼi Fakamāu.” (Pesalemo 50:6) ʼE fakapapau fēnei mai e te Tohi-Tapu kia tatou, tatau aipe peʼe “tauteaʼi tatou e totatou loto . . . , [kae] ko te ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli.” (1 Soane 3:20) ʼI meʼa fakaloto fīmālie hatatou ʼiloʼi tatau aipe peʼe tou manatu ʼe mole tau mo tatou ke tou faikole, ko Sehova ʼe mole manatu feiā ʼo ʼuhiga mo tatou! ʼE ina “ ʼiloʼi ia meʼa fuli” ʼo ʼuhiga mo tatou, ʼo kau kiai te ʼu ʼaluʼaga ʼo totatou maʼuli ʼaē e lagi tupu ai tatatou manatu ʼaē ʼe mole tau mo tatou ke tou faikole. (Pesalemo 103:10-14) Ko tona manavaʼofa pea mo tana mahino lahi ʼe ina uga ia ia ke fagono ki te ʼu faikole ʼo nātou ʼaē ʼe “lavea tonatou loto pea mo taʼomia.” (Pesalemo 51:17) ʼE lava feafeaʼi ke mole fagono ia Sehova ki tatatou ʼu kalaga ki he tokoni mokā ʼe ina fakatūʼa ia ia “ ʼaē ʼe ina māpunuʼi tona taliga ki te tagi fakaʼofaʼofa ʼo ia ʼaē ʼe veliveli”?—Tāʼaga Lea 21:13.

Te ʼOfa Fakatautehina

7. (a) Koteā te tahi fakatuʼutuʼu neʼe fai e Sehova moʼo tokoni kia tatou ke tou toe maʼu te mālohi? (b) Koteā ʼaē ʼe tou ʼiloʼi ʼo ʼuhiga mo ʼotatou ʼu tēhina, ʼaē ʼe feala ai ke ina faka lotomālohiʼi tatou?

⁷ Ko te tahi fakatuʼutuʼu neʼe fai e Sehova moʼo tokoni kia tatou ke tou toe maʼu te mālohi, ko totatou ʼu tēhina Kilisitiano. Ko te pilivilesio lahi tatatou kau ki te famili faka malamanei ʼo te ʼu tēhina pea mo tuagaʼane! (1 Petelo 2:17) ʼI te temi ʼaē ʼe tou toka ai ʼuhi ko te ʼu faigataʼaʼia ʼo te maʼuli, ʼe tokoni kia tatou te ʼofa fakatautehina ke tou toe mālohi. ʼO feafeaʼi? ʼE tou toe mālohi heʼe tou ʼiloʼi ʼe mole ko tatou tokotahi ʼaē ʼe tau mo te ʼu mamahi ʼaia. ʼI totatou ʼu tēhina pea mo tuagaʼane, ʼe mahino papau ia ʼe ʼi ai niʼihi ia nātou ʼe nātou tau mo te ʼu faigataʼaʼia ʼaia peʼe ko te ʼu fihifihia ʼaia, pea mo nātou maʼu te ʼu faʼahiga manatu ʼaē neʼe tau mo tatou. (1 Petelo 5:9) ʼE ko he meʼa fakaloto fīmālie te ʼiloʼi ʼaē ko te ʼu meʼa ʼaē ʼe tau mo tatou ʼe toe tau pe foki mo ʼihi, pea ʼe toe tatau pe foki te ʼu meʼa ʼaē ʼe nātou manatu kiai ohage ko tatou.

8. (a) Koteā te ʼu faʼifaʼitaki ʼaē ʼe hā ʼaki ai ʼe feala hatatou maʼu he tokoni lahi pea mo he fakaloto fīmālie ʼi ʼotatou ʼu tēhina? (b) Neʼe koteā he faʼahiga tokoni pe ko he fakaloto fīmālie neʼe fai atu e ‘hokotou kaumeʼa moʼoni’?

⁸ ʼI te ʼofa fakatautehina, ʼe feala hatatou maʼu ‘he ʼu kaumeʼa moʼoni,’ ʼe feala ke nātou tokoni lahi kia tatou pea mo fakafimālieʼi tatou, ʼi te ʼu temi ʼaē ʼe tou lotomamahi ai. (Tāʼaga Lea 17:17) ʼE tau fai te taʼi tokoni ʼaia ʼaki he ʼu palalau agalelei peʼe ko he fakahā ʼo he lototokaga. ʼE manatuʼi e te tuagaʼane neʼe ina tauʼi te manatu ʼaē ʼe mole hona ʼaoga, ʼo ina ʼui fēnei: “Neʼe ʼi ai toku ʼu kaumeʼa neʼe nātou fakahā mai te ʼu manatu ʼe lelei ʼo ʼuhiga mo ʼau, moʼo tokoni kia ʼau ke ʼau tauʼi te ʼu manatu ʼaē ʼe mole ʼaoga ke ʼau taupau.” (Tāʼaga Lea 15:23) ʼI te mate ʼo tana taʼahine muli, neʼe ko he meʼa faigataʼa ki te tuagaʼane tana hivaʼi te ʼu katiko ʼo te Puleʼaga ʼi te ʼu fono ʼo te kokelekasio, tāfito te ʼu katiko ʼaē ʼe nātou talanoa ai ki te fakatuʼuake. ʼE ina manatuʼi te meʼa ʼaenī neʼe hoko kia ia: “ ʼI te tahi lakaga, ko te tēhina neʼe nofo ʼi te tahi ʼatu ʼo te fale fono, neʼe sio ki taku tagi. Neʼe haʼu ʼo hili tona nima kia ʼau, pea mo hiva fakatahi mo ʼau te fakaʼosi ʼo te katiko. Neʼe ʼau fonu ʼi te ʼofa ki ʼoku tēhina mo tuagaʼane pea mo ʼau fiafia ʼi tamatou kau ki te ʼu fono, ʼo mahino ai kia ʼau ko te potu ʼaē ʼe tou maʼu ai te tokoni ʼe ko te Fale ʼo te Puleʼaga.”

9, 10. (a) ʼE lava feafeaʼi hakotou lagolago ki te ʼofa fakatautehina? (b) Ko ai ʼaē ʼe ʼaoga tāfito ki ai he ʼu fakatahi lelei? (c) Koteā ʼaē ʼe feala ke tou fai moʼo tokoni kia nātou ʼaē ʼe ʼaoga ki ai he fakaloto mālohi?

⁹ ʼE mahino papau ia, ko tatou takitokotahi ʼe maʼua ke tou lagolago ki te ʼofa fakatautehina faka Kilisitiano. Koia ʼe tonu ke tou “faka fālahi” totatou loto, ke tou faka kau kiai totatou ʼu tēhina pea mo tuagaʼane fuli. (2 Kolonito 6:13) ʼI meʼa fakaʼofaʼofa foki kia nātou ʼaē ʼe gaʼegaʼe hanatou logoʼi ʼi tonatou loto ko te ʼofa fakatautehina ʼe mole mālohi tona fai age kia nātou! Pea tahi ʼaē meʼa, ʼe ʼui e ʼihi Kilisitiano ʼe hage kia nātou ʼe mole tokagaʼi nātou e he tahi peʼe mole gaohi fakaleleiʼi nātou. ʼE ʼui fēnei e te tuagaʼane ʼe fakafeagai tona ʼohoana ki te moʼoni: “Ko ai ʼaē ʼe fakafisi pea ʼe mole ʼaoga ki ai he ʼu kaumeʼa ʼe nātou tokoniʼi, mo fakafisi ki he fakaloto mālohi, pea mo he ʼu fakatahi ʼe hā ai te ʼofa? ʼAua naʼa galo kia tatou te ʼaoga ʼo totatou ʼu tēhina mo tuagaʼane!” Ei, tāfito kia nātou ʼaē ʼe nātou tō ʼuhi ko te ʼu ʼaluʼaga ʼo te maʼuli—ohage ko nātou ʼaē ko ʼonatou ʼohoana ʼe mole kau ʼi te moʼoni, ia nātou ʼaē kua mamate tonatou ʼu ʼohoana, ia nātou ʼaē ʼe mahamahaki, ia nātou ʼaē kua matutuʼa, pea mo ʼihi ʼatu—ʼe ʼaoga kia nātou ʼaia he ʼu fakatahitahi lelei. ʼE ʼaoga koa ki ʼihi ia tatou ke fakamanatuʼi ki ai te faʼahi ʼaia?

¹⁰ Koteā ʼaē ʼe feala ke tou fai moʼo tokoni ki niʼihi? Tou fakahā totatou ʼofa ʼi he ʼu ʼaluʼaga kehekehe. Ka tou fai he ʼu fakaafe, ʼaua naʼa tou galoʼi ia nātou ʼaē ʼe ʼaoga kiai he fakaloto mālohi. (Luka 14:12-14; Hepeleo 13:2) Tou fakaafe ia nātou, kae ke ʼaua naʼa tou manatu ʼe mole nātou tali anai. Pea tou tuku ke nātou vakaʼi peʼe nātou ʼōmai anai peʼe kailoa. Tatau aipe peʼe mole feala hanatou ʼōmai ki te fakaafe ʼaia, kae ʼe mahino papau ia ʼe fakaloto mālohiʼi anai nātou heʼe nātou ʼiloʼi ko ʼihi neʼe nātou manatuʼi ia nātou. Neʼe lagi ʼaoga te meʼa ʼaia moʼo fakaloto mālohiʼi ʼo nātou.

11. Ko te ʼu faʼahiga tokoni fea ʼaē ʼe feala ke foaki kia nātou ʼaē ʼe mafasia?

¹¹ Ko nātou ʼaē ʼe mafasia e lagi ʼaoga kia nātou he tahi ʼu faʼahiga tokoni. Ohage la, ko he fafine kua mate tona ʼohoana, ʼe feala anai ki he tēhina kua fotufotuʼa tagata ke tokaga ki tana tama ʼaē ʼe hala mo tāmai. (Sake 1:27) Ko he tēhina peʼe ko he tuagaʼane ʼe mahaki kovi, e lagi ʼaoga ki ai he tokoni moʼo fai tana ʼu fakatau ʼi te fale koloā peʼe ko he tokoni ki te ʼu gāue ʼo te loto fale. Ko he tahi kua matuʼa e lagi ʼaoga ki ai ke fakatahi mo he ʼu hahaʼi peʼe ʼaoga ki ai ke tokoni age he tahi ki te gāue faka minisitelio. ʼE ko he ‘ ʼahiʼahi moʼoni ʼaia ʼo totatou ʼofa,’ mo kapau ʼe tokolahi ia nātou ʼaē ʼe ʼaoga kiai te taʼi tokoni ʼaia. (2 Kolonito 8:8) ʼAua naʼa tou līaki ia nātou ʼaē ʼe ʼaoga kiai he tokoni ʼuhi ko te temi pea mo te ʼu faiga ʼaē ʼe tonu ke fakaʼaogaʼi kia nātou, kae tou fakahā totatou ʼofa faka Kilisitiano, ʼo gaohi fakalelei pea mo tou tokaga ki te ʼu meʼa ʼaē ʼe ʼaoga ki niʼihi.

Te Mālohi ʼo Te Folafola ʼa Te ʼAtua

12. ʼE tokoni feafeaʼi mai te Folafola ʼa te ʼAtua ke tou toe lotomālohi?

¹² Ko he tahi ʼe mole kei kai, ʼe puli anai tona mālohi. Koia, ko te tahi faʼahi ʼe fakaʼaogaʼi e Sehova moʼo fakaloto mālohiʼi ʼo tatou, ʼe ko tana fafaga lelei ʼo tatou ʼi te faʼahi fakalaumālie. (Isaia 65:13, 14) Koteā te meʼa kai fakalaumālie ʼaē ʼe ina foaki mai? ʼI te ʼu meʼa kai fakalaumālie fuli ʼaia, ko te meʼa ʼaē ʼe maʼuhiga tāfito ʼe ko tana Folafola, te Tohi-Tapu. (Mateo 4:4; vakaʼi ia Hepeleo 4:12.) ʼE lava feafeaʼi hana toe foaki mai kia tatou he lotomālohi? Ka kamata puli totatou mālohi ʼuhi ko te ʼu faigataʼaʼia pea mo te ʼu fihifihia ʼaē ʼe tau mo tatou, ʼe feala ke tou maʼu he mālohi mo kapau ʼe tou lau ʼi te Tohi-Tapu te ʼu manatu pea mo te ʼu fihifihia moʼoni ʼaē neʼe tau mo te ʼu tagata mo te ʼu fafine agatonu ʼi te ʼu temi faka Tohi-Tapu. Logope ko te ʼu hahaʼi ʼaia ʼe ko he ʼu faʼifaʼitaki maʼuhiga ʼo ʼuhiga mo te nofo agatonu ki te ʼAtua, kae ‘ko te ʼu meʼa ʼaē neʼe nātou logoʼi ʼi ʼonatou loto, neʼe tatau pea mo tatou.’ (Sake 5:17; Gāue 14:15) Neʼe nātou tauʼi te ʼu ʼahiʼahiʼi pea mo te ʼu faigataʼaʼia ohage ko tatou. Tou vakaʼi te ʼu faʼifaʼitaki ʼaenī.

13. Koteā te ʼu faʼifaʼitaki faka Tohi-Tapu ʼaē ʼe nātou fakahā mai, ko te ʼu tagata mo te ʼu fafine agatonu ʼo te temi muʼa neʼe nātou logoʼi pea mo hoko kia nātou te ʼu meʼa ohage ko te ʼu meʼa ʼaē ʼe hoko kia tatou?

¹³ Ko te pateliaka ko Apalahamo neʼe lotomamahi ʼaupito ʼi te mate ʼo tona ʼohoana, logope la tana tui ʼaē ki te fakatuʼuake. (Senesi 23:2; vakaʼi ia Hepeleo 11:8-10, 17-19.) Ko te tagata loto fakahemala ko Tavite neʼe manatu ia ʼe mole tau mo ia ke tauhi ki te ʼAtua ʼuhi ko tana ʼu agahala. (Pesalemo 51:11) Neʼe manatu e Moisese ʼe mole feala ke ina fakahoko te fekau ʼaē neʼe fakatotonu kiai e te ʼAtua. (Ekesote 4:10) Neʼe lotovaivai ia Epafolotite ʼi te temi ʼaē neʼe ina ʼiloʼi ai ʼe faka tuʼakoi tana “gāue ʼi te ʼAliki” ʼuhi ko te kovi ʼo tona mahaki. (Filipe 2:25-30) Neʼe tonu ke tauʼi e Paulo te kakano agahala. (Loma 7:21-25) Ko Evoti pea mo Sinitisi, te ʼu tuagaʼane fakanofo e lua ʼi te kokelekasio ʼo Filipe, neʼe mole lagi feala hana gāue fakatahi. (Filipe 1:1; 4:2, 3) ʼI meʼa fakaloto mālohi te ʼiloʼi ʼaē ko te ʼu hahaʼi agatonu ʼaia, neʼe nātou logoʼi pea mo hoko kia nātou te ʼu meʼa ohage ko te ʼu meʼa ʼaē ʼe hoko kia tatou, kae neʼe mole nātou fiu! Neʼe mole he temi neʼe līaki ai nātou e Sehova.

14. (a) Ko ai ʼaē neʼe fakaʼaogaʼi e Sehova moʼo tokoni kia tatou ke tou maʼu te mālohi ʼi tana Folafola? (b) He koʼe neʼe tā ʼi Te Tule Leʼo pea mo te Réveillez-vous! te ʼu alatike ʼo ʼuhiga mo te fefelogoiʼaki ʼa te hahaʼi, ʼo ʼuhiga mo te ʼu fihifihia faka famili pea mo te ʼu fihifihia ʼo te loto?

¹⁴ Moʼo tokoni kia tatou ke tou maʼu te mālohi ʼi tana Folafola, ʼe fakaʼaogaʼi e Sehova te tagata kaugana agatonu mo poto ke ina foaki tuʼumaʼu mai kia tatou he tuʼuga “meʼa kai ʼi tona temi totonu.” (Mateo 24:45) Neʼe fualoa te fakaʼaogaʼi e te tagata kaugana agatonu te ʼu nusipepa ʼaē ko Te Tule Leʼo pea mo te Réveillez-vous! moʼo lagolago ki te moʼoni ʼo te Tohi-Tapu, pea mo kalagaʼi te Puleʼaga ʼo te ʼAtua ʼe ko te ʼamanaki pe ʼaia e tahi maʼa te tagata. Tāfito ʼi te ʼu lauʼi taʼu e hogofulu kua ʼosi, ko te ʼu nusipepa ʼaia neʼe nātou foaki, ʼi tona temi totonu, te ʼu alatike faka Tohi-Tapu ʼo ʼuhiga mo te fefelogoiʼaki ʼa te hahaʼi, ʼo ʼuhiga mo te famili, pea mo te ʼu fihifihia ʼo te loto, ʼaē neʼe felāveʼi mo te hahaʼi ʼa te ʼAtua. He koʼe neʼe tā te ʼu faʼahiga alatike ʼaia? ʼE mahino papau ia neʼe tā moʼo tokoni kia nātou ʼaē ʼe tau mo te ʼu fihifihia ʼaia, ke nātou maʼu he mālohi pea mo he faka lotomālohi ʼi te Folafola ʼa te ʼAtua. Kae ʼe toe tokoni pe foki kia tatou fuli te ʼu faʼahiga alatike ʼaia, ke tou mahino lelei ki te ʼu meʼa ʼaē e lagi hoko ʼi te maʼuli ʼo ʼihi ʼi ʼotatou ʼu tēhina pea mo tuagaʼane. Kua katoa kia tatou te ʼu meʼa fuli ke tou mulimuli ki te ʼu palalau ʼaenī ʼa Paulo: “Koutou fai he ʼu palalau fakaloto fīmālie ki te ʼu nefesi ʼaē ʼe lotomamahi, koutou lagolago kia nātou ʼe vaivai, pea mo koutou kātaki fualoa ki te hahaʼi fuli pe.”—1 Tesalonika 5:14.

Ko Te Kau Tagata ʼĀfea ʼe Ko “He Nonoʼaga Ki Te Matagi”

15. Koteā ʼaē neʼe fakakikite e Isaia ʼo ʼuhiga mo te kau tagata ʼāfea, pea koteā tonatou ʼu maʼua?

¹⁵ Neʼe foaki e Sehova te tahi meʼa moʼo tokoni kia tatou mokā tou lotovaivai—ko te kau tagata ʼāfea ʼo te kokelekasio. ʼO ʼuhiga mo nātou ʼaia, neʼe tohi fēnei e te polofeta ko Isaia: “ ʼE tonu anai ke tahi liliu ko he nonoʼaga ki te matagi pea ko he tauʼaga ki te afā, ohage ko he ʼu kiʼi vaitafe ʼi he potu moamoa, ohage ko te malumalu ʼo he maka lahi ʼi he kele kua vaivai.” (Isaia 32:1, 2) Koia, ʼe maʼua ki te kau tagata ʼāfea ke nātou maʼu te ʼu kalitate ʼaē neʼe fakakikite e Sehova ʼo ʼuhiga mo nātou. ‘ ʼE tonu ke nātou liliu’ ko he ʼu tagata ʼe nātou fakaloto fīmālieʼi niʼihi pea mo fakapelepeleʼi nātou, pea ke nātou lotolelei ʼo “feʼamoʼaki te ʼu kavega [peʼe ko “te ʼu meʼa faigataʼaʼia”; ʼi tona ʼuhiga moʼoni, ʼe ko “he ʼu meʼa mamafa”].” (Kalate 6:2, tā fakapilitānia, vakaʼi te kiʼi nota ʼi te lalo pasina) ʼE lava feafeaʼi hanatou fai te faʼahi ʼaia?

16. Koteā ʼaē ʼe tonu ke fai e te kau tagata ʼāfea moʼo tokoni kia ia ʼaē ʼe manatu ʼe mole tau mo ia ke faikole?

¹⁶ Ohage ko te meʼa ʼaē neʼe kua tou ʼui, ʼi ʼihi temi ʼe feala kia ia ʼaē ʼe gaʼegaʼe ke manatu ʼe mole tau pea mo ia ke faikole. Koteā ʼaē ʼe feala ke fai e te ʼu tagata ʼāfea? ʼE feala ke nātou faikole mo te Kilisitiano ʼaia peʼe nātou faikole ʼo ʼuhiga mo ia. (Sake 5:14) ʼE mahino papau ia ʼe fīmālie anai te loto ʼo ia ʼaē kua lotovaivai, mo kapau ʼe fagono ki te ʼu kole ʼaē ʼe fai kia Sehova, moʼo tokoni kia ia ke mahino ʼe ʼofa ia Sehova pea mo ʼona tēhina kia ia. Ko tana logo ʼaē ki te faikole fakamalotoloto ʼa te tagata ʼāfea ʼaki tona loto katoa, ʼe feala ke toe mālohi ai te falala ʼo ia ʼaē ʼe lotomamahi. ʼI te falala ʼaē ʼa te ʼu tagata ʼāfea ʼe tali anai e Sehova ki te ʼu kole ʼo ʼuhiga mo ia ʼaē ʼe gaʼegaʼe, ʼe tokoni ai kia ia ke mahino ʼe feala ke ina maʼu te taʼi falala ʼaia.

17. He koʼe ʼe tonu ke liliu te kau tagata ʼāfea ko he ʼu tagata ʼe popoto ʼi te fagono pea mo nātou mahino ki te ʼu ʼaluʼaga ʼaē ʼe tau mo ʼihi?

¹⁷ ʼE ʼui fēnei ia Sake 1:19: “ ʼE tonu ki te tagata fuli pe, ke vave ʼi te fagono, ke tuai ʼi te palalau.” Moʼo tokoni kia nātou ʼaē kua lotovaivai ke nātou toe mālolohi, ʼe toe maʼua foki ki te kau tagata ʼāfea ke nātou popoto ʼi te fagono pea mo nātou mahino ki te ʼu ʼaluʼaga ʼaē ʼe tau mo ʼihi. Ohage la ko te kokelekasio, ko ʼihi ʼe feala ke tau mo he ʼu fihifihia pe ko he ʼu faigataʼaʼia ʼe mole feala hona puleʼakiʼi ʼi te tuʼu ʼo te ʼu faʼahiga meʼa ʼaenī. ʼE mole lagi kumi ia e nātou he puleʼaki moʼo tauʼi tanatou ʼu fihifihia, kae e lagi nātou fia palalau pe nātou mo he tahi ʼe fagono lelei—mole ko he tahi ʼe ina ʼui age anai ke nātou feiā mo feiā, kae ko he tahi ʼe fagono lelei anai, ʼo mole ina fakamāuʼi nātou.—Luka 6:37; Loma 14:13.

18, 19. (a) Kapau ʼe fagono lelei he tagata ʼāfea, pea ʼe lava feafeaʼi anai kia ia ke mole ina fakaʼāsili mamafa te kavega ʼaē ʼe ʼamo e ia ʼaē kua lotovaivai? (b) Koteā te ʼu fua ʼaē ʼe maʼu e te kau tagata ʼāfea mo kapau ʼe nātou ‘lotomahino’?

¹⁸ Kau tagata ʼāfea, kapau ʼe koutou fagono lelei, pea ʼe feala anai ke mole koutou fakaʼāsili mamafa te kavega ʼaē ʼe ʼamo e ia ʼaē kua lotovaivai. Ohage la, kapau ko he tēhina pe ko he tuagaʼane neʼe tōtō ʼi te ʼu fono peʼe kua tahitahiga tana kau ki te gāue faka minisitelio, ʼe ʼaoga moʼoni koa ke tokoniʼi ia ia ke lahi age tana gāue ʼi te minisitelio pea mo kau tuʼumaʼu ki te ʼu fono? E lagi ʼaoga te faʼahi ʼaia. Kae kua koutou ʼiloʼi lelei koa te ʼu ʼaluʼaga ʼaē ʼe tau mo ia? ʼE mahamahaki koa? Neʼe hoko koa he ʼu fetogi ʼi tona maʼuli faka famili? ʼE ʼi ai koa he tahi ʼu ʼaluʼaga peʼe ko he ʼu faigataʼaʼia ʼaē ʼe tupu ai tana lotovaivai? Koutou manatuʼi, e lagi hoha te ʼatamai ʼo te Kilisitiano ʼaia ʼi te mole feala ʼaē ke lahi age tana gāue.

¹⁹ Kae, ʼe lava feafeaʼi hakotou tokoni ki te tēhina ʼaia peʼe ko te tuagaʼane ʼaia? ʼI muʼa ʼo hakotou palalau pea mo fai tokoni, koutou fagono muʼa! (Tāʼaga Lea 18:13) ʼAki he ʼu fehuʼi fakapotopoto, koutou ‘kumi’ ke koutou ʼiloʼi te ʼu meʼa ʼaē ʼe ʼi tona loto. (Tāʼaga Lea 20:5) ʼAua naʼa koutou meʼa noaʼi te ʼu meʼa ʼaia—koutou tokagaʼi. E lagi ʼaoga ke ʼiloʼi e ia ʼaē kua lotovaivai, ko Sehova ʼe tokaga kia tatou pea ʼe mahino ko ʼihi temi ʼe lahi te ʼu meʼa ʼe tou fia fai, kae ʼe faigataʼa ʼuhi ko te ʼu ʼaluʼaga ʼaē ʼe tau mo tatou. (1 Petelo 5:7) Ka fakahā e te kau tagata ʼāfea te taʼi ‘lotomahino’ ʼaia, ko nātou ʼaē kua lotovaivai ʼe nātou ‘maʼu anai he fakafimālie ki ʼonatou nefesi.’ (1 Petelo 3:8; Mateo 11:28-30) Ka nātou maʼu te taʼi fīmālie ʼaia, ʼe mole ʼaoga anai ke ʼui age kia nātou ke lahi age te ʼu meʼa ʼaē ʼe tonu ke nātou fai; ʼe uga anai nātou e tonatou loto ke nātou fai ia meʼa fuli ʼaē ʼe feala ke nātou fai, ʼi te tauhi ʼaē kia Sehova.—Vakaʼi ia 2 Kolonito 8:12; 9:7.

20. ʼI te kua ōvi mai ʼo te fakaʼosi ʼo te taʼiake agakovi ʼaenī, koteā ʼaē ʼe tonu ke tou lotomālohi ʼo fai?

²⁰ ʼIo, ʼe tou maʼuʼuli ʼi te temi ʼaē ʼe mole hona fakatatau ʼi te hisitolia katoa ʼo te tagata. ʼE fakaʼāʼāsili te ʼu faigataʼaʼia ʼo te mālama ʼa Satana, heʼe kua tou fakaōvi ki te temi ʼo te fakaʼosi. Koutou manatuʼi, ohage ko he laione ʼe gugulu, ʼe talitali te Tevolo ke koutou vaivavai pea ke tou fiu ke faigafua kia ia hana kai ia tatou. ʼE feala ke tou fakafetaʼi kia Sehova ʼi tana foaki te mālohi kia ia ʼaē kua vaivai! Tou fakaʼamu ke tou fakaʼaogaʼi fuli te ʼu fakatuʼutuʼu ʼaē neʼe ina fai moʼo fakaloto mālohiʼi ʼo tatou ke tou hoko atu, ohage ʼe tokoni kia tatou ʼaki he ʼu kapakau ʼo te akuila ʼaē ʼe hakehake ki te lagi. ʼI te kua ōvi mai ʼo te fakaʼosi ʼo te taʼiake agakovi ʼaenī, ʼe mole ko he temi ʼaenī ke tou tuku tatatou lele ki te totogi—ʼaē ko te maʼuli heʼegata.—Hepeleo 12:1.

Koteā Takotou Tali?

◻ ʼE tali feafeaʼi e Sehova ki ʼatatou ʼu faikole?

◻ Ko te ʼu faʼahiga ʼaluʼaga fea ʼaē ʼe feala ai ke tou maʼu he lotomālohi mai totatou ʼu tēhina Kilisitiano?

◻ ʼE tokoni feafeaʼi mai te Folafola ʼa te ʼAtua ke tou toe lotomālohi?

◻ Koteā ʼaē ʼe feala ke fai e te kau tagata ʼāfea moʼo tokoni kia nātou ʼaē kua lotovaivai ke nātou toe lotomālohi?

[Paki ʼo te pasina 17]

Ka tou fai he ʼu fakaafe, tou manatuʼi ia nātou ʼaē ʼe ʼaoga ki ai he faka lotomālohi

[Paki ʼo te pasina 18]

ʼE feala ke kole e te kau tagata ʼāfea kia Sehova ke tokoni kia nātou ʼaē kua lotovaivai, ke nātou mahino ʼe ʼofainaʼi nātou