ʼE Toe Fiameʼalahi Te Kau Apositolo

Neʼe hoko atu e Sesu mo ʼana tisipulo tanatou faifagona ki Selusalemi, ʼo natou mavae mai Pele pea neʼe natou fakalaka ʼi te Vai Tafe ʼo Solotane, ki he koga meʼa neʼe ovi ki Seliko. Neʼe ʼi ai te ʼu hahaʼi neʼe faifagona mo natou ke natou kau ki te Pasikate ʼo te taʼu 33 H.T.S.

Neʼe muʼamuʼa ia Sesu ʼi ʼana tisipulo, he neʼe loto ia ke tautonu ki te Pasikate. Kaʼe neʼe matataku te ʼu tisipulo. ʼI muʼa atu, ʼi te mate ʼa Lasalo pea mo te ʼamanaki mavae ʼa Sesu mai Pele ʼo alu ki Sutea, neʼe ui fenei e Tomasi ki te tahi ʼu tisipulo: “Tou olo mo tatou, ke tou mamate mo ia.” (Soane 11:16, 47-53) Koia ʼe tou mahino ai ki te matataku ʼa te ʼu tisipulo, he neʼe feala ke natou mamate ʼi tanatou olo ʼaia ki Selusalemi.

Moʼo teuteuʼi ʼo natou ki te ʼu meʼa ʼae ka hoko, neʼe toʼo ʼateaina e Sesu te kau apositolo pea neʼe ina ui fenei age kia natou: “ ʼE tou hake ki Selusalemi, pea ʼe tuku anai ia te Foha ʼo te tagata ki te kau pelepitelo pule pea mo te kau sekelipa. ʼE natou fakatuʼā anai ia ia ki te mate pea ʼe natou tuku anai ia ia ki te hahaʼi ʼae ʼe mole Sutea ke manukiʼi, ke huipiʼi pea ke tutuki ki he pou. Pea ʼe fakatuʼuake anai ʼi te tolu ʼaho.”—Mateo 20:18, 19.

Neʼe ko te tuʼa tolu ʼaia ʼo te tala e Sesu ki ʼana tisipulo tona mate pea mo tona fakatuʼuake. (Mateo 16:21; 17:22, 23) Kaʼe neʼe ko tana hoki ui age ʼae kia natou ʼe tutuki anai ki he pou. Neʼe natou fagono ki ai, kaʼe neʼe mole natou mahino. Neʼe lagi natou fakaʼamu ki te toe fakatuʼu ʼo te puleʼaga hau ʼo Iselaele ʼi te kele, ʼo natou fia maʼu te kololia mo te fakaʼapaʼapa fakatahi mo Kilisito ʼi he puleʼaga ʼi te kele.

Neʼe kau ʼi te hahaʼi faifagona te faʼe ʼa te ʼu apositolo ko Sakopo mo Soane, ʼae neʼe lagi ko Salome. Neʼe foaki e Sesu ki te ʼu apositolo ʼaia ʼe toko lua he higoa neʼe ko tona fakaʼuhiga “Te ʼu Foha ʼo Te Mana,” neʼe lagi ʼuhi ko tanā hoko ʼoho. (Maleko 3:17; Luka 9:54) Kua fuafualoa pe te fakaha e te ʼu tagata ʼaia tanā fia maʼu he tuʼulaga ʼi te Puleʼaga ʼo Kilisito. Neʼe iloʼi e tanā faʼe te faʼahi ʼaia. Koia, neʼe fakaovi ai kia Sesu, ʼo hu kia te ia pea ina fai he kole ʼo ʼuhiga mo ʼana tama. Neʼe ui fenei age e Sesu: “Kotea ʼae ʼe ke loto ki ai?” Neʼe ina tali fenei age: “Fakatotonu ke heheka ʼaku tama ʼaeni ʼe toko lua ʼi tou Puleʼaga, he tahi ʼi tou toʼomataʼu pea mo he tahi ʼi tou toʼohema.”—Mateo 20:20, 21.

ʼI tona ʼuhiga moʼoni, neʼe ko Sakopo mo Soane ʼae neʼe nā loto ki te faʼahi ʼaia. Neʼe hoki ʼosi fakaha age pe e Sesu te ufiufi mo te lainoa ʼae ka hoko kia te ia, koia neʼe ina ui fenei kia naua: “ ʼE mole kolua mahino ki te meʼa ʼae ʼe kolua kole mai. ʼE kolua lava inu koa ki te ipu ʼae ʼe au ʼamanaki inu?” Neʼe nā tali fenei age: “ ʼE ma lavaʼi.” (Mateo 20:22) Kaʼe neʼe lagi mole nā mahino ki tona fakaʼuhiga.

Logo la te faʼahi ʼaia, neʼe ui fenei e Sesu kia naua: “ ʼE moʼoni, ʼe kolua iinu anai ki toku ipu, kaʼe ki te heka ʼi toku toʼomataʼu pea mo toku toʼohema ʼe mole fakalogo ia kia te au, kaʼe ʼe ʼa natou ʼae neʼe teuteuʼi ki ai e taku Tamai.”—Mateo 20:23.

Neʼe iita te kau apositolo ʼae ʼe toko hogofulu, ʼi tanatou iloʼi te kole ʼa Sakopo mo Soane. ʼI te fihi ʼae neʼe hoko ki muʼa atu ʼi te kau apositolo, ke iloʼi pe ko ai ʼae neʼe lahi age, neʼe lagi lahi te palalau ʼa Sakopo mo Soane. (Luka 9:46-48) Neʼe ha ʼi te kole ʼaia neʼe fai, neʼe mole mulimuli te toko Hogofulu-ma-lua ki te tokoni ʼae neʼe fai e Sesu ke natou hage ko he tahi ʼe veliveli ʼosi ia natou. Neʼe kei natou fiameʼalahi pe.

Neʼe mole tuku feia e Sesu te fihi fakamuli pea mo te tokakovi ʼae neʼe feala ke hoko. Kaʼe neʼe ina pauʼi te toko Hogofulu-ma-lua pea ʼi tana ʼofa kia natou, neʼe ina fai age te tokoni ʼaeni: “ ʼE kotou iloʼi ko natou ʼae ʼe hage ko te ʼu hau ʼo te ʼu puleʼaga ʼe natou puleʼi ia te hahaʼi pea ʼe takitaki fakamalohi natou e tanatou kau maʼu tuʼulaga. ʼE mole tonu ke feia ia koutou. Kaʼe ko ʼae ia koutou ʼe loto ke liliu ʼo lahi, ʼe tonu ke ina tauhi koutou, pea ko ʼae ia koutou ʼe loto ke ʼuluaki, ʼe tonu ke liliu ʼo kaugana kia koutou fuli.”—Maleko 10:42-44.

Neʼe fakaha e Sesu neʼe tonu ke natou faʼifaʼitakiʼi ia ia, ʼi tana ui fenei: “Ko te Foha ʼo te tagata, neʼe mole haʼu ia ke tauhi ia ia, kaʼe ke ina tauhi te hahaʼi pea mo foaki tona maʼuli ko he totogi maʼa te tokolahi.” (Mateo 20:28) Lolotoga taʼu ʼe tolu, neʼe tauhi e Sesu te hahaʼi. Pea neʼe ina hoko atu ʼo kaku ki tana mate maʼa te malamanei. Neʼe tonu ke maʼu e te ʼu tisipulo te faʼahiga manatu ʼa Kilisito, ke natou fia tauhi te hahaʼi kaʼe ke mole tauhi natou, pea ke natou fia hage ko he tahi ʼe veliveli ʼosi kaʼe ke mole natou fiameʼalahi.