ʼU Tauhi Ovi, Kotou Faʼifaʼitakiʼi Ia Te ʼu Tauhi Ovi Lahi

1, 2. (1) Kotea tona fua moka taupau lelei te ʼu ovi? (2) He ko ʼe ko te tokolahi ʼi te temi ʼo Sesu neʼe hage ko ni ovi neʼe mole honatou tauhi ovi?

ʼE MALOHI te ʼu ovi moka tokaga lelei tanatou tauhi ovi kia natou. ʼE ui ʼi te tohi ʼo ʼuhiga mo te tauhi ʼo te ʼu ovi, kapau ʼe haga fafaga pe e he tauhi ovi ʼana ovi kaʼe mole tokaga ia ki ʼihi meʼa ʼe ʼaoga kia natou, pea mole faʼa fualoa ʼe natou vaivai mo mahahaki anai. Kaʼe moka taupau lelei e he tauhi ovi ʼana ovi takitahi, pea ʼe malohi mo maʼuli lelei anai te faga ovi katoa.

² ʼE toe moʼoni te faʼahi ʼaia ʼi te kokelekasio. Moka tokaga lelei te ʼu tauhi ovi Kilisitiano ki te ʼu ovi takitahi, pea ʼe fua lelei anai ki te kokelekasio katoa. ʼE lagi kotou manatuʼi neʼe ʼofa ia Sesu ki te hahaʼi he neʼe natou “fakaofaofa mo ogosia o hage ko ni ovi ae e hala tauhi ovi.” (Mat. 9:36) He ko ʼe ko te hahaʼi ʼi te temi ʼo Sesu neʼe hage ko ni ovi neʼe mole honatou tauhi ovi? Koteʼuhi, ko natou ʼae neʼe maʼua ke natou akoʼi kia natou te Lao ʼa te ʼAtua, neʼe natou aga fefeka mo lahi fau te ʼu meʼa ʼae neʼe natou fakamaʼua, pea neʼe mole natou maʼuliʼi te ʼu faʼahi neʼe natou akoʼi ki te hahaʼi. Neʼe mole ʼofa te kau takitaki ʼaia pea mo tokakaga ki te hahaʼi, ʼo faigataʼa ʼaupito ai kia natou hanatou tauhi ki te ʼAtua. Neʼe hage ia ki te hahaʼi neʼe natou ʼamo “ni kavega mamafa” ʼi ʼonatou fuga ʼuma.—Mat. 23:4.

3. Kotea ʼae ʼe tonu ke manatuʼi e te kau tagata ʼafeā moka natou tokakaga ki te ʼu ovi?

³ Ia ʼaho nei, ʼe ʼi ai te gaue maʼuhiga ʼe maʼu e te kau tagata ʼafeā. Ko te ʼu ovi ʼae ʼe natou tokakaga ki ai ʼe ʼa Sehova pea mo Sesu. ʼE maʼuhiga te ʼu ovi ʼaia kia Sesu, te tauhi ovi lelei, ʼae neʼe ina foaki tona maʼuli maʼa natou. Neʼe ina totogi natou ʼaki tona taʼataʼa maʼuhiga. (Soa. 10:11; 1 Ko. 6:20; 1 Pet. 1:18, 19) ʼE tonu ke manatuʼi tuʼumaʼu e te kau tagata ʼafeā ko tanatou tagata taupau ʼe ko Sesu Kilisito, “te tagata tauhiovi lahi o te u ovi.” Koia ʼe natou huʼi maʼua anai kia te ia ʼo ʼuhiga mo tanatou taupau te faga ovi.—Hep. 13:20.

4. Kotea ʼae ka tou ako anai ʼi te alatike ʼaeni?

⁴ ʼE tonu ke feafeaʼi te aga ʼa te kau tagata ʼafeā ki te ʼu ovi? ʼE fakalotomalohiʼi ia te takitokotahi ʼi te kokelekasio ke natou “fakalogo ki [ʼonatou] takitaki.” Kaʼe ʼe toe ui foki e Sehova ki te kau tagata ʼafeā ke mole natou “pule kia natou ae kua tuku [age] ke [natou] tokaga ki ai.” (Hep. 13:17; lau ia 1 Petelo 5:2, 3.) ʼE lava feafeaʼi ki te kau tagata ʼafeā hanatou haga “takitaki” te faga ovi kaʼe mole natou “pule” kia natou? ʼE lava tokaga feafeaʼi te kau tagata ʼafeā ki te faga ovi ʼo mulimuli ki te ʼu tuʼakoi ʼae neʼe fai e te ʼAtua ʼo ʼuhiga mo tanatou faʼahiga takitaki?

“ ʼE INA FUA ANAI NATOU ʼI TONA FATAFATA”

5. Kotea ʼae ʼe tou ako ʼo ʼuhiga mo Sehova ia Esaia 40:11?

⁵ Neʼe ui fenei e te polofeta ko Esaia ʼo ʼuhiga mo Sehova: “Ohage ko he tauhi ovi, ʼe ina fafaga anai tana faga ovi. ʼAki tona nima, ʼe ina fakatahiʼi anai te ʼu akeno; ʼe ina fua anai natou ʼi tona fatafata. ʼE ina takitaki fakalelei anai te ʼu ovi ʼe kei fai fagai.” (Esa. 40:11, MN) ʼE fakamatalatala ʼi te vaega ʼaia pe tokaga feafeaʼi ia Sehova ki te ʼu meʼa ʼae ʼe ʼaoga kia natou ʼe vaivai peʼe ʼaoga ki ai he puipui. Ohage pe ko he tauhi ovi ʼe ina iloʼi te ʼu meʼa ʼae ʼe ʼaoga tafitō ki ʼana ovi takitahi, ʼe mahino ia Sehova ki te ʼu meʼa ʼae ʼe ʼaoga kia natou fuli ʼo te kokelekasio pea ʼe fiafia ʼi te tokoni kia natou. Pea ohage pe ko he tauhi ovi ʼe ina fua ʼi tona fatafata he kiʼi akeno, ʼe fakafimalieʼi anai tatou e Sehova mo tokaga lelei kia tatou ʼi te ʼu temi faigataʼa. ʼE ko “te Tamai [ia] o te manavaofa fuli.”—2 Ko. 1:3, 4.

6. ʼE lava faʼifaʼitakiʼi feafeaʼi e te kau tagata ʼafeā ia Sehova?

⁶ Ko he ako taulekaleka ia ʼe feala ke taʼofi e he tauhi ovi ʼi te kokelekasio ʼo ʼuhiga mo tatatou Tamai ʼe ʼi selo! Ohage ko Sehova, ʼe tonu ia ke tokaga ki te ʼu meʼa ʼae ʼe ʼaoga ki te ʼu ovi. Ka iloʼi e he tagata ʼafeā ʼanatou faigataʼaia, pea ʼe ina iloʼi anai pe ko te fakalotomalohi mo te tokoni fea ʼae ʼe ʼaoga kia natou. (Taag. 27:23) Ko tona fakaʼuhiga, ʼe tonu ki he tagata ʼafeā ke ina toʼo he temi ke faipalalau mo ʼona tehina mo tuagaʼane pea mo fagono kia natou. ʼE moʼoni ʼe fakaʼapaʼapa ki tonatou maʼuli fakaloto fale, kaʼe ʼe tokaga anai ki te ʼu meʼa ʼae ʼe sio mo logo ki ai ʼi te kokelekasio. Pea ʼaki he loto ʼofa, ʼe ina toʼo anai he temi moʼo tokoni kia “natou ʼae ʼe vaivai.”—Gaue 20:35, MN; 1 Tes. 4:11.

7. (1) Neʼe taupau leleiʼi koa te ʼu ovi ʼa te ʼAtua ʼi te temi ʼo Esekiele mo Selemia? (2) Kotea te ako ʼe feala ke taʼofi e te kau tagata ʼafeā ʼi te liakī e Sehova te ʼu tauhi ovi heʼe agatonu?

⁷ Tou fakakaukauʼi te aga ʼa te ʼu tauhi ovi ʼa te hahaʼi ʼa te ʼAtua ʼi te temi ʼo Esekiele pea mo Selemia. Neʼe liakī e Sehova te ʼu tauhi ovi ʼaia he neʼe tonu ke natou taupau ʼana ovi, kaʼe neʼe mole natou fai fakalelei te faʼahi ʼaia. Neʼe ui fenei e Sehova: “Kua natou liliu ko te meakai a te u manu fuli o te vao, koteuhi e mole kei mau he tagata tauhi ovi, pea e mole kei tokaga aku tagata tauhi manu ki aku ovi, koteuhi kua natou fagai pe natou totonu, kae mole natou fagai aku ovi.” Neʼe maʼuli mamahi te hahaʼi koteʼuhi neʼe manatu pe ʼanatou takitaki kia natou totonu pea mo manumanū. (Esk. 34:7-10; Sel. 23:1) Neʼe toe liakī e Sehova te kau takitaki lotu ʼae ʼe natou ui ʼe natou Kilisitiano ʼuhi ko te ʼu tupuʼaga ʼaia. Kotea te ako maʼuhiga ʼe feala ke taʼofi e te kau tagata ʼafeā ʼi te liakī e Sehova te ʼu tauhi ovi heʼe agatonu? ʼE tonu ke natou tokakaga lelei pea mo ʼofa ki te faga ovi ʼa Sehova.

“KUA AU TUKU ATU KIA KOUTOU HE FAIFAITAKIAGA”

8. ʼE lava faʼifaʼitakiʼi feafeaʼi e te kau tagata ʼafeā ia Sesu moka natou tokoniʼi ʼonatou tehina?

⁸ ʼUhi ko totatou ʼuhiga heʼe haohaoa, koia ʼae ʼe lagi mole mahino lelei ai ʼihi ʼi te kokelekasio pe kotea ʼae ʼe fakamaʼua e Sehova kia natou. ʼE lagi natou fai ni tonu ʼe mole fakatafito ki te ʼu pelesepeto Fakatohi-tapu, peʼe ha ʼi tanatou aga ʼe mole heʼeki natou malolohi ʼi te moʼoni. Kotea anai ka fai e te kau tagata ʼafeā? ʼE tonu ke natou faʼifaʼitakiʼi ia te faʼa kataki ʼa Sesu ki ʼana tisipulo. Neʼe fihi tuʼa lahi te kau tisipulo ke natou iloʼi pe ko ai anai ia natou ka lahi ʼi te Puleʼaga, kaʼe neʼe mole he temi neʼe ita ai Sesu kia natou. ʼAki te ʼofa neʼe haga aipe Sesu ʼo akoʼi natou pea mo foaki age ni tokoni ʼo ʼuhiga mo te fakaha ʼo te agavaivai. (Luka 9:46-48; 22:24-27) Neʼe ina fufulu foki mo ʼonatou vaʼe ke natou iloʼi ia te fakaʼuhiga ʼo te agavaivai. Ia ʼaho nei, ʼe tonu ki te kau tagata ʼafeā ke natou toe agavaivai mo natou.—Lau ia Soane 13:12-15; 1 Pet. 2:21.

9. Ko te manatu fea ʼa te kau apositolo neʼe tonu ke fakatonutonuʼi e Sesu?

⁹ ʼI te manatu ʼa te ʼu apositolo ko Sakopo pea mo Soane, ko he tauhi ovi ʼe ina puleʼi ʼihi. Neʼe nā kole kia Sesu honā tuʼulaga maʼuhiga ʼi te Puleʼaga. Kaʼe neʼe fakatonutonuʼi naua e Sesu ke nā fetogi tanā manatu ʼaia. Neʼe ina ui fenei: “E koutou iloi ko te u pule o te u puleaga, e natou pulei fakamalohi natou, pea ko te kau lalahi e natou pulei fakakaugana natou. E mole tonu ke feia anai ia koutou. Kae ko ae ia koutou e loto ke lahi, ke liliu ia ia ko takotou faifekau.” (Mat. 20:25, 26) Neʼe ʼaoga ki te kau apositolo ke natou tekeʼi tanatou fia “pule” ki ʼonatou tehina, ko tona fakaʼuhiga, ke natou puleʼi tonatou maʼuli.

10. ʼE loto e Sesu ke tokaga feafeaʼi te kau tagata ʼafeā ki te faga ovi? Kotea te faʼifaʼitaki lelei neʼe tuku e Paulo?

¹⁰ ʼE loto e Sesu ke tokaga te kau tagata ʼafeā ki te faga ovi ohage pe ko tana tokaga ki ai. ʼE tonu ke natou tauhi ʼonatou tehina mo tuagaʼane ʼaki he lotolelei, kaʼe mole natou liliu ko honatou ʼu pule. Ohage ko Sesu, ko te apositolo ko Paulo neʼe ina tauhi ʼona tehina ʼaki he agavaivai. Neʼe ina ui fenei ki te kau tagata ʼafeā ʼi te kokelekasio ʼo Efeso: “E koutou iloi pe, talu mai te uluaki aho nee au hu mai ai ki Asia nei, pe nee feafeai taku nofo mo koutou i te temi katoa aia, mo taku kaugana ki te Aliki i te agavaivai katoa.” Neʼe loto e Paulo ke agavaivai te kau tagata ʼafeā pea ke natou gaue kinakina ki ʼonatou tehina. ʼAki tana faʼifaʼitaki, neʼe akoʼi e Paulo ki te kau tagata ʼafeā ke natou “tokoni kia natou ʼae ʼe vaivai.” (Gaue 20:18, 19, 35, MN) Neʼe ina ui ki te kau Kolinito neʼe mole ina puleʼi tanatou tui. Kaʼe neʼe ko he kaugana agavaivai ia ʼa te ʼAtua ohage pe ko natou, pea neʼe fia tokoni kia natou ke natou tauhi ki te ʼAtua ʼi te fiafia. (2 Ko. 1:24) Ko Paulo ʼe ko he faʼifaʼitaki lelei ki te kau tagata ʼafeā ia ʼaho nei ʼo ʼuhiga mo te agavaivai pea mo te gaue kinakina.

KOTOU FOAKI HE ʼU TOKONI ʼE FAKATAFITO KI “TE FOLAFOLA MOONI”

11, 12. ʼE lava tokoni feafeaʼi he tagata ʼafeā ki he tehina ke ina fai he tonu?

¹¹ Ko te ʼu tokoni ʼae ʼe foaki e he tagata ʼafeā ʼo he kokelekasio, ʼe maʼua ke fakatafito tuʼumaʼu ki “te folafola mooni,” ia te Tohi-Tapu. (Tito 1:9) Pea tahi, ʼe tonu ke ina foaki te ʼu tokoni mo “he agamalu.” (Kal. 6:1) ʼE mole fakakinauʼi anai e he tauhi ovi lelei ʼona tehina ke natou maʼu he faʼahiga aga, kaʼe ʼe ina faigaʼi anai ke tokoni kia natou ke fakatafito ʼanatou tonu ki tonatou ʼofa ʼae kia Sehova pea mo tana Folafola. Ohage la, ʼe feala ki he tagata ʼafeā ke tokoni ki he tehina ʼe faiga ke ina fai he tonu maʼuhiga. ʼE feala ke nā vakaʼi te ʼu pelesepeto Fakatohi-tapu peʼe ko he alatike ʼi ʼatatou tohi. ʼE toe feala ke ina fehuʼi ki te tehina pe malave feafeaʼi anai ki ʼana felogoʼi ʼae mo Sehova ia te ʼu tonu kehekehe ʼae ka ina fai. Pea ʼe feala leva ki te tagata ʼafeā ke ina fakamanatuʼi ki ai te maʼuhiga ʼae ʼo te kole ʼo te takitaki Fakaʼatua ʼi te faikole ʼi muʼa ʼo te fai ʼo he tonu. (Taag. 3:5, 6) Hili tanā faipalalau, ʼe tuku pe anai e te tagata ʼafeā ke fai e te tehina totonu ia te tonu.—Loma 14:1-4.

¹² Ko te takitaki ʼae ʼe maʼu e te kau tagata ʼafeā ʼe haʼu pe mai te Tohi-Tapu. Koia ʼae ʼe maʼuhiga ai ke natou fakaʼaogaʼi lelei te Tohi-Tapu pea mo fakatafito tuʼumaʼu ki ai te ʼu tokoni ʼae ʼe natou foaki. ʼAki te faʼahi ʼaia, ʼe mole fakaʼaoga koviʼi anai e te kau tagata ʼafeā ia tonatou ʼuhiga pule ʼae neʼe foaki age e te ʼAtua. Pea tahi, ko te ʼu ovi ʼe mole ʼa natou. ʼI tona fakahagatonu, ʼe tahi huʼi maʼua pe anai ia natou fuli ʼo te kokelekasio kia Sehova pea mo Sesu ʼo ʼuhiga mo te ʼu tonu ʼae ʼe natou fai.—Kal. 6:5, 7, 8.

“KO NI FAIFAITAKIAGA KI TE FAGA OVI”

13, 14. Ko te ʼu faʼahi fea ʼae ʼe maʼua ai ke tuku e he tagata ʼafeā ia he faʼifaʼitaki lelei ki te faga ovi?

¹³ ʼI te ʼosi ui ʼae e Petelo ki te kau tagata ʼafeā ke mole natou “pule” ki ʼonatou tehina, neʼe ina fakalotomalohiʼi natou ke natou liliu “ko ni faifaitakiaga ki te faga ovi.” (1 Pet. 5:3) ʼE lava liliu feafeaʼi he tagata ʼafeā ko he faʼifaʼitakiʼaga ki te faga ovi? Kotou fakakaukauʼi te ʼu kalitate ʼe lua ʼae ʼe tonu ke maʼu e he tehina ke liliu ai ko he tagata ʼafeā. ʼUluaki, ʼe ʼaoga ke “lelei tana fakakaukau.” Ko tona fakaʼuhiga, ʼe mahino lelei ki te ʼu pelesepeto Fakatohi-tapu pea mo tona fakaʼaoga lelei ʼi tona maʼuli. ʼE ina lolomi tona tuʼania ʼi te ʼu aluʼaga faigataʼa pea ʼe fakakaukau lelei ʼi muʼa ʼo tana fai he tonu. Lua, ʼe maʼua ke ina “takitaki fakalelei tona loto fale.” Ko tona fakaʼuhiga, kapau ʼe ʼi ai hona kiʼi famili, pea ʼe maʼua ke ina tuku he faʼifaʼitaki lelei ʼi tona ʼuhiga tagata ʼohoana mo tamai heʼe “kapau ʼe mole poto he tagata ʼi te takitaki ʼo tona loto fale totonu, ʼe feafeaʼi anai hana tokaga ki te kokelekasio ʼa te ʼAtua?” (1 Tim. 3:1, 2, 4, 5, MN) Moka tokagaʼi e te ʼu tehina mo tuagaʼane ʼi te kokelekasio te ʼu kalitate ʼaia ʼi te ʼu tagata ʼafeā, pea ʼe feala ke natou falala kia natou.

¹⁴ ʼE toe tuku e te kau tagata ʼafeā he faʼifaʼitaki lelei ʼaki tanatou takitaki te gaue faifakamafola, ohage ko Sesu. Ko te fakamafola ʼo te logo lelei ʼo te Puleʼaga, neʼe ko he faʼahi maʼuhiga ia ʼi te maʼuli ʼo Sesu, pea neʼe ina akoʼi ki ʼana tisipulo te faʼahiga fakahoko ʼo te gaue ʼaia. (Mko. 1:38; Luka 8:1) Ia ʼaho nei, ʼe fiafia te kau faifakamafola ʼi te gaue fakatahi mo te kau tagata ʼafeā ʼi te minisitelio. ʼE natou tokagaʼi te faʼafai ʼa te kau tagata ʼafeā ʼi te gaue maʼuhiga ʼaia pea mo lava ako mai tanatou faʼahiga faiako. Moka fakaʼaogaʼi tuʼumaʼu e te kau tagata ʼafeā tonatou temi mo tonatou malohi ki te fakamafola ʼo te logo lelei logo pe tonatou maʼumaʼua, pea ʼe uga ai te kokelekasio ke natou toe faʼafai feia mo natou. ʼE toe tuku e te kau tagata ʼafeā he faʼifaʼitaki lelei ki te ʼu tehina ʼaki tanatou teuteuʼi te ʼu fono, mo fai ni tali pea mo fakamaʼa mo taupau te ʼu Fale Fono.—Efe. 5:15, 16; lau ia Hepeleo 13:7.

“KOUTOU TOKONI KIA NATOU E VAIVAI”

15. Kotea ni faʼahi ʼe feala ke ʼaʼahi ai e te kau tagata ʼafeā ia te ʼu tehina mo tuagaʼane?

¹⁵ Ko he tauhi ovi lelei ʼe foimo tokoni ki te ovi ʼae ʼe lavea peʼe mahaki. ʼO toe feia pe, ʼe ʼaoga ki te kau tagata ʼafeā ke fenaʼinaʼi ʼi te tokoni kia natou ʼae ʼe lotomamahi peʼe ʼaoga ki ai he fakalotomalohi fakalaumalie. ʼE lagi ʼaoga kia natou kua matutuʼa mo mahahaki ia he tokoni ʼi te faʼahi fakasino, kaʼe tafitō ʼe ʼaoga ke fakalotomalohiʼi pea mo fakafimalieʼi natou ʼaki te Tohi-Tapu. (1 Tes. 5:14) Ko te kau tupulaga ʼo te kokelekasio ʼe lagi tonu ke natou tauʼi “te u holi fakavale o te temi tupulaga.” (2 Tim. 2:22) Pea ʼe tokoni te kau tagata ʼafeā ki te kokelekasio katoa ʼaki tanatou ʼaʼahi natou. Lolotoga ʼanatou ʼaʼahi ʼaia, ʼe natou faiga ke natou mahino ki te ʼu fihifihia ʼo te ʼu tehina pea mo foaki ni fakalotomalohi ʼaki te Tohi-Tapu. Kapau ʼe foimo tokoni te kau tagata ʼafeā ki te ʼu meʼa ʼae ʼe ʼaoga ki ʼonatou tehina mo tuagaʼane pea ʼe lahi anai te ʼu fihifihia ʼe feala ke natou hao ai.

16. Kotea ʼae ʼe lava fai e te kau tagata ʼafeā moka tau he tahi ʼi te kokelekasio mo he toe faigataʼaia?

¹⁶ Kaʼe ʼe feafeaʼi mo kapau ʼe tau ia he tehina mo he toe faigataʼaia pea mo tuʼutamakiʼia ʼana felogoʼi ʼae mo Sehova? Neʼe ui fenei e te tagata faitohi ko Sakopo: “Pe e mahaki he tahi ia koutou? Ke ina paui te kau matuatua o te [kokelekasio], pea ke faikole te kau matuatua kia ia, o vali ia ia aki he lolo i te huafa o [Sehova]; pea ko te faikole i te tui e ina fakamauli anai te mahaki, pea e fakatuu anai ia ia e [Sehova]; pea kapau nee ina fai ni agahala, e fakamolemole anai kia ia.” (Sakp. 5:14, 15) Tatau aipe pe mole pauʼi e te tehina ʼae ʼe “mahaki” ia te kau “matuatua,” kaʼe ʼe tonu ke natou foimo tokoni ki ai ʼi te temi pe ʼae ʼe natou iloʼi ai tona aluʼaga. ʼE feala ki te kau tagata ʼafeā ke natou faikole mo ʼonatou tehina mo hufakiʼi natou pea mo lagolago kia natou ʼi te ʼu temi faigataʼa. ʼE natou fakaha ai ko natou ko he ʼu tauhi ovi lelei ʼe natou fakalotomalohi ʼonatou tehina ke natou haga tauhi ki te ʼAtua ʼi te fiafia.—Lau ia Esaia 32:1, 2.

17. ʼE fua lelei feafeaʼi ki te kokelekasio ia te faʼifaʼitakiʼi e te kau tagata ʼafeā ia “te tagata tauhiovi lahi”?

¹⁷ Ko te kau tagata ʼafeā ʼe natou gaue kinakina ke natou faʼifaʼitakiʼi ia Sesu Kilisito, ia “te tagata tauhiovi lahi” ʼi te ʼu meʼa fuli ʼae ʼe natou fai ʼi te kautahi ʼa Sehova. ʼE tokoni te ʼu tehina takitaki ʼaia ki te faga ovi ke malohi aipe tanatou tui pea ke natou tauhi agatonu ki te ʼAtua. ʼE tou lotofakafetaʼi lahi ki ʼotatou tauhi ovi ʼofa pea mo totatou Tauhi Ovi lahi ʼae ko Sehova.