“Kuʼau Tuku Atu Kia Koutou He Faifaitakiʼaga”

“Nee kua tonu, i aeni temi, kua koutou hoko ko he kau faiʼako.”—Hepeleo 5:12.

1. He koʼe ʼe feala ke tuʼania he Kilisitiano ki te ʼu palalau ʼaē ʼe tuʼu ia Hepeleo 5:12?

KA KOUTOU lau te vaega faka Tohi-Tapu tāfito ʼo tatatou alatike, ʼe koutou kau koa ia nātou ʼaē ʼe talanoa ki ai? Kapau koia, pea ʼe mole ko koutou tokotahi pe. ʼI totatou ʼuhiga kau tisipulo ʼa Sesu, ʼe tou ʼiloʼi ʼe tonu ke tou liliu ko he hahaʼi faiako. (Mateo 28:19, 20) ʼUhi ko te ʼu temi ʼaē ʼe tou maʼuʼuli ai, ʼe mahino kia tatou ʼe maʼuhiga ke tou faiga ʼo akoʼi fakalelei te hahaʼi. Pea ʼe tou ʼiloʼi ko te ako ʼaē ʼe tou foaki, ʼe feala ke hāofaki ai peʼe mamate ai te hahaʼi ʼaē e tou akoʼi! (1 Timoteo 4:16) Koia ʼe feala ke tou fai te ʼu fehuʼi ʼaenī: ‘Kua ʼau liliu koa ko he tagata faiako ohage ko tona fakamaʼua mai? ʼE lava feafeaʼi haku hikihiki ia te faʼahi ʼaia?’

2, 3. (a) Neʼe fakamahino feafeaʼi e te tagata faiako te faʼahi tāfito ʼo he faiako lelei? (b) Koteā te faʼifaʼitaki neʼe tuku mai e Sesu ʼo ʼuhiga mo te faiako?

² ʼE mole tonu ke tou lotovaivai ʼuhi ko tatatou tuʼania ʼaia. Kapau ʼe tou manatu ko te akoʼi ʼo te hahaʼi ʼe fakamaʼua kiai he poto makehe, pea ʼe feala ke faigataʼa ai hatatou tuputupu. Kae ʼe mole ʼui ʼe lelei he ako ʼuhi ko tona faʼahiga fai, heʼe ʼi ai te meʼa ʼe maʼuhiga ʼaupito age. Koutou tokagaʼi te meʼa ʼaē neʼe tohi e te tagata faiako poto ʼo ʼuhiga mo te faʼahi ʼaia: “Ko te faiako ʼaē ʼe lelei ʼe mole fakalogo ki tona faʼahiga fai, peʼe ko tona ʼu fakatuʼutuʼu. . . . Ko te faiako ʼe fai ʼuluaki ʼaki te ʼofa.” ʼE moʼoni neʼe talanoa te tagata ʼaia ki te gāue faiako ʼi te mālama. Kae ʼe feala ke fakapipiki tana manatu ki te faiako ʼa te kau Kilisitiano. ʼO feafeaʼi?

³ Ko tatatou Faʼifaʼitaki ʼi te faiako, ʼe ko Sesu Kilisito ʼaē neʼe ina ʼui fēnei ki tana kau tisipulo: “Kuʼau tuku atu kia koutou he faʼifaʼitakiʼaga.” (Soane 13:15) Neʼe palalau ʼi henī ki tona faʼifaʼitaki ʼo te agavaivai, kae ko te faʼifaʼitaki ʼaē neʼe tuku mai e Sesu kia tatou, ʼe kau moʼoni kiai tana gāue maʼuhiga ʼaupito ʼaē neʼe ina fai ʼi te kele—te akoʼi ki te hahaʼi te logo lelei ʼo te Puleʼaga ʼo te ʼAtua. (Luka 4:43) Koia kapau ʼe tonu ke koutou fili he kupu e tahi ki te minisitelio ʼo Sesu, ʼe mole koutou fili anai koa te kupu “ofa”? (Kolose 1:15; 1 Soane 4:8) Neʼe lahi ʼaupito te ʼofa ʼa Sesu ki tana Tāmai ʼaē ʼi selo, ia Sehova. (Soane 14:31) Kae ʼi tona ʼuhiga tagata faiako, neʼe fakahā e Sesu te ʼofa ʼi te tahi ʼu ʼaluʼaga e lua. Neʼe ina leleiʼia te moʼoni ʼaē neʼe ina akoʼi ki te hahaʼi pea neʼe ʼofa ki te hahaʼi ʼaē neʼe ina akoʼi. Tou vakavakaʼi lelei te ʼu faʼahi ʼaia e lua ʼo te faʼifaʼitaki ʼaē neʼe ina tuku mai maʼa tatou.

Neʼe Ina Leleiʼia Talu Mai Fualoa Te ʼu Moʼoni ʼa Te ʼAtua

4. Neʼe liliu feafeaʼi Sesu ʼo leleiʼia te ʼu akonaki ʼa Sehova?

⁴ Ko te manatu ʼa he tagata faiako ʼo ʼuhiga mo te ʼu meʼa ʼaē ʼe ina akoʼi, ʼe malave ki tana faʼahiga faiako. Kapau ʼe mole maʼuhiga kia ia, pea ʼe mole maʼuhiga anai ki tana kau ako. Neʼe tokaga lelei ia Sesu ki te ʼu moʼoni maʼuhiga ʼaē neʼe ina akoʼi, ʼo ʼuhiga mo Sehova pea mo Tona Puleʼaga. Neʼe leleiʼia lahi e Sesu. Neʼe liliu ʼo leleiʼia te ʼu moʼoni ʼaia ʼi te temi ʼaē neʼe akoʼi age kia ia. ʼI te ʼu taʼu loaloaga ʼo tona maʼuli ʼi selo, neʼe lahi ʼaupito te fia ako ʼo te ʼAlo ʼulu tokotahi. ʼE ʼui lelei ia Isaia 50:4, 5: “Ko te Tuʼi ʼAliki ko Sehova neʼe ina foaki totonu mai te lea ʼo nātou neʼe akoʼi, koteʼuhi ke ʼau poto ʼi te tali ʼaki he palalau ki ʼaē ʼe gaʼegaʼe. ʼE ina fakaʼala ʼi te uhu fuli; ʼe ina fakaʼala toku taliga ke ʼau logo ohage ko nātou ʼaē neʼe akoʼi. Ko te Tuʼi ʼAliki ko Sehova totonu neʼe ina avahi toku taliga, pea ko ʼau neʼe mole ʼau talagataʼa. Neʼe mole ʼau ʼalu ʼi he tahi ala.”

5, 6. (a) Koteā ʼaē neʼe hoko kia Sesu ʼi tona papitema, pea neʼe malave feafeaʼi kia te ia? (b) Koteā te kehekehe ʼo Sesu pea mo Satana ʼi tanā fakaʼaogaʼi te Folafola ʼa te ʼAtua?

⁵ ʼI tana lahilahi ake ʼi te kele, neʼe leleiʼia tuʼumaʼu pe e Sesu te poto fakaʼatua. (Luka 2:52) Pea ʼi te temi ʼo tona papitema, neʼe hoko kia ia te meʼa makehe. ʼE ʼui fēnei ia Luka 3:21: “Nee ava . . . te lagi.” Neʼe lagi toe manatuʼi ai e Sesu tona maʼuli ʼaē ʼi selo. Ki muli age, neʼe nofo ʼaho e 40 ʼi te toafa pea neʼe mole kai. Neʼe lagi fiafia ʼaupito ʼi te metitasio ki te ʼu temi ʼaē neʼe akoʼi ai ia ia ʼi selo e Sehova. Kae mole tuai, pea neʼe ʼahiʼahiʼi tana leleiʼia te ʼu moʼoni ʼa te ʼAtua.

⁶ ʼI te gaʼegaʼe pea mo te fia kai ʼa Sesu, neʼe faigaʼi e Satana ke ina fakahalaʼi ia ia. ʼE kehekehe ʼaupito te ʼu foha ʼaia e lua ʼo te ʼAtua. Neʼe nā fakaʼaogaʼi te ʼu Koga Tohi-Tapu Faka Hepeleo—kae ʼaki he ʼu manatu ʼe kehekehe ʼaupito. Neʼe fakaʼaogaʼi kovi e Satana te Folafola ʼa te ʼAtua, neʼe mole fakaʼapaʼapa kiai he neʼe ina fakaʼaogaʼi moʼo fakahoko tana ʼu manatu ʼaʼana. ʼI tona ʼuhiga moʼoni, ko te ʼaselo agatuʼu ʼaia neʼe fehiʼa ki te ʼu moʼoni ʼa te ʼAtua. Kae ko Sesu neʼe ina fakaʼaogaʼi te Tohi-Tapu ʼaki te ʼofa, ʼo ina fakaʼaogaʼi lelei te Folafola ʼa te ʼAtua ʼi te ʼu tali fuli ʼaē neʼe ina fai. Neʼe kua fualoa te maʼuli ʼa Sesu ʼi te temi ʼaē neʼe kamata tohi ai te ʼu folafola ʼaia ʼa te ʼAtua, kae neʼe fakaʼapaʼapa aipe ki te ʼu folafola ʼaia. Neʼe ko te ʼu moʼoni maʼuhiga ʼaia mai tana Tāmai ʼaē ʼi selo! Neʼe ina ʼui age kia Satana ko te ʼu folafola ʼaia mai tana Tāmai neʼe maʼuhiga age ʼi te meʼa kai. (Mateo 4:1-11) Ei, neʼe leleiʼia e Sesu te ʼu moʼoni fuli pe ʼaē neʼe akoʼi age kia ia e Sehova. Kae neʼe ina fakahā feafeaʼi tana leleiʼia ʼaia ʼi tana faiako?

Neʼe Ina Leleiʼia Te ʼu Moʼoni ʼAē Neʼe Ina Akoʼi Ki Te Hahaʼi

7. He koʼe neʼe mole fia faʼu e Sesu hana ʼu manatu ʼaʼana?

⁷ Neʼe fakahā lelei tuʼumaʼu e Sesu tana leleiʼia te ʼu moʼoni ʼaē neʼe ina akoʼi ki te hahaʼi. Neʼe feala pe ke ina faʼu hana ʼu manatu ʼaʼana. Neʼe lahi ʼaupito tona poto pea mo te ʼu meʼa ʼaē neʼe ina ʼiloʼi. (Kolose 2:3) Kae neʼe ina fakamanatuʼi liuliuga ki te hahaʼi ʼaē neʼe fakalogo, ko meʼa fuli pe ʼaē neʼe ina akoʼi ʼe mole haʼu mai ia te ia, kae mai tana Tāmai ʼaē ʼi selo. (Soane 7:16; 8:28; 12:49; 14:10) Neʼe lahi tana leleiʼia te ʼu moʼoni ʼa te ʼAtua, ʼo mole ina fia fetogi ʼaki tana ʼu manatu.

8. ʼI te kamata ʼo tona minisitelio, koteā te faʼifaʼitaki ʼaē neʼe tuku e Sesu ʼo ʼuhiga mo te falala ki te Folafola ʼa te ʼAtua?

⁸ ʼI te kamata ʼa Sesu tona minisitelio, neʼe ina tuku mai ai te faʼifaʼitakiʼaga. Koutou tokagaʼi tana ʼuluaki tala ʼaē ki te hahaʼi ʼa te ʼAtua ko ia te Mesia ʼaē neʼe fakapapauʼi mai. Neʼe ʼasi pe koa ia muʼa ʼo te hahaʼi tokolahi, ʼo tala ko ia ko Kilisito, pea mo ina fai he ʼu tuʼuga milakulo moʼo fakamoʼoni kiai? Kailoa. Neʼe ʼalu ki te sinakoka, ʼaē neʼe lau māhani ai e te hahaʼi ʼa te ʼAtua te Tohi-Tapu. Neʼe ina lau leʼolahi ai te lea faka polofeta ʼo Isaia 61:1, 2 pea neʼe ina fakamahino ko te ʼu moʼoni faka polofeta ʼaia neʼe faka ʼuhiga kia te ia. (Luka 4:16-22) Ko te ʼu tuʼuga milakulo ʼaē neʼe ina fai neʼe fakamoʼoni ai neʼe tokoni ia Sehova kia te ia. Neʼe falala tuʼumaʼu ia Sesu ki te Folafola ʼa te ʼAtua ʼi tana faiako.

9. ʼI tana felogoi mo te kau Faliseo, neʼe fakahā feafeaʼi e Sesu tana manako agatonu ki te Folafola ʼa te ʼAtua?

⁹ ʼI te fakafihiʼi ʼo Sesu e te kau takitaki lotu fakafeagai, neʼe mole ina kumi ke poto age ia nātou, logola neʼe feala pe ke ina fai te faʼahi ʼaia. Kae neʼe ina tuku te Folafola ʼa te ʼAtua ke ina fakatonutonuʼi ia nātou. Ohage la, koutou manatuʼi te temi ʼaē neʼe tukugakoviʼi ai e te kau Faliseo te ʼu tisipulo ʼa Sesu, ʼi tanatou maumauʼi te Sapato he neʼe nātou fusi te ʼu kauʼi fulumeto pea mo kai ʼi tanatou fakalaka ʼi te gāueʼaga. Neʼe tali fēnei e Sesu: “Pe nee heeki koutou lau te mea nee fai e Tavite i te temi nee halofia ai pea mo natou nee fakatahi mo ia?” (Mateo 12:1-5) ʼE moʼoni, ko te hahaʼi ʼaia neʼe nātou lau ʼe nātou faitotonu, pea neʼe kua lagi nātou lau te fakamatala faka Tohi-Tapu ʼaia ia 1 Samuele 21:1-6. Kapau koia, pea neʼe mole nātou tāʼofi te ako maʼuhiga ʼaē neʼe tonu ke nātou mahino kiai. Kae ko Sesu neʼe mole gata pe tana lau te fakamatala. Neʼe ina fakakaukauʼi pea mo ina tali te ako ʼaē neʼe ina tāʼofi mai ai. Neʼe ina leleiʼia te ʼu pelesepeto ʼaē neʼe akoʼi age e Sehova ʼi te ʼu vaega ʼaia. Koia neʼe ina fakaʼaogaʼi ai te fakamatala ʼaia, pea mo he faʼifaʼitaki mai te Lao ʼa Moisese, moʼo fakahā te fakapotopoto ʼo te Lao. ʼO toe feiā pe, ko te manako agatonu ʼa Sesu neʼe ina uga ia ia ke ina hāofaki te Folafola ʼa te ʼAtua mai te ʼu faiga ʼa te kau takitaki lotu ke nātou fakaʼaogaʼi kovi te Folafola ʼa te ʼAtua, peʼe nātou hilifaki kiai te ʼu tuʼuga talatisio.

10. Neʼe fakahoko feafeaʼi e Sesu te ʼu lea faka polofeta ʼo ʼuhiga mo tana akoʼi lelei te hahaʼi?

¹⁰ Neʼe ʼiloga te leleiʼia e Sesu te ʼu moʼoni ʼaē neʼe ina akoʼi ki te hahaʼi, koteʼuhi neʼe mole ina meʼa noaʼi peʼe fiu ai. Neʼe ʼui e te ʼu lea faka polofeta, ko te Mesia ʼe palalau anai ʼaki ‘te taulekaleka ʼi tona ʼu laugutu,’ ʼo ina fakaʼaogaʼi he ʼu “palalau mālie.” (Pesalemo 45:2; Senesi 49:21) Neʼe fakahoko e Sesu te ʼu lea faka polofeta ʼaia heʼe ko te logo ʼaē neʼe ina tala ki te hahaʼi, neʼe lelei tuʼumaʼu pea mo maʼuli, ʼo ina fakaʼaogaʼi “te ʼu lea mālie” moʼo akoʼi kia nātou te ʼu moʼoni ʼaē neʼe ina leleiʼia lahi. (Luka 4:22, MN ) ʼE mahino neʼe hā tana fiafia ʼi tona fofoga pea neʼe gigila tona ʼu mata ʼi tana leleiʼia te ʼu meʼa ʼaē neʼe ina akoʼi ki te hahaʼi. Neʼe fiafia te hahaʼi ʼi tanatou fakalogo kia te ia, pea ko he faʼifaʼitaki lelei ke tou muliʼi mokā tou palalau ki te hahaʼi ʼo ʼuhiga mo te ʼu meʼa ʼaē neʼe tou ako!

11. He koʼe neʼe mole he temi neʼe liliu ai ia Sesu ʼo fialahi ʼi tana poto faiako?

¹¹ Ko te mahino lahi ʼa Sesu ki te ʼu moʼoni ʼa te ʼAtua pea mo te mālie ʼo tana ʼu palalau, neʼe tupu ai koa hana fialahi? Neʼe tau hoko te faʼahi ʼaia ki te kau faiako. Kae koutou manatuʼi, neʼe maʼu e Sesu te poto fakaʼatua. Ko te poto ʼaia ʼe mole maʼu e te hahaʼi fialahi, heʼe “ko te poto ʼe maʼu e nātou ʼaē ʼe fia mālalo.” (Tāʼaga Lea 11:2) Neʼe ʼi ai te tahi faʼahi neʼe tokoni kia Sesu ke mole fialahi.

Neʼe ʼOfa Sesu Ki Te Hahaʼi ʼAē Neʼe Ina Akoʼi

12. Neʼe fakahā feafeaʼi e Sesu tana mole loto ʼaē ke matataku tana ʼu tisipulo kia te ia?

¹² Neʼe hā tuʼumaʼu ʼi te ʼu akonaki ʼa Sesu tona ʼofa lahi ki te hahaʼi. Ka faiakonaki, neʼe mole hage ko te kau faiako fialalahi ʼaē neʼe nātou fakamālaloʼi te hahaʼi. (Tagata Tānaki 8:9) Ko Petelo ʼi tana sio ki te tahi milakulo neʼe fai e Sesu, neʼe punamaʼuli ʼaupito, pea neʼe tō ifo ki te ʼu vaʼe ʼo Sesu. Kae neʼe mole loto e Sesu ke mataku feiā tana ʼu tisipulo kia te ia. Neʼe agalelei ʼo ʼui maʼana kia Petelo, “Aua tau mataku” pea neʼe ina ʼui age ʼe kau anai ki te gāue fakafiafia ʼaē ko te fai ʼo he ʼu tisipulo. (Luka 5:8-10) Neʼe loto e Sesu ke leleiʼia e tana kau tisipulo te ʼu moʼoni maʼuhiga ʼo ʼuhiga mo te ʼAtua, kae ke mole nātou matataku ki tanatou tagata faiako.

13, 14. Neʼe fakahā feafeaʼi e Sesu tana lotomahino ki te hahaʼi?

¹³ Neʼe toe hā te ʼofa ʼo Sesu ki te hahaʼi ʼaē neʼe ina akoʼi he neʼe lotomahino. “I tana mamata ki te hahai, nee fonu ia i te ofa kia natou, koteuhi kua natou fakaofaofa pea mo ogosia o hage he u ovi e mole honatou tauhiovi.” (Mateo 9:36) Neʼe ʼofa kia nātou he neʼe nātou fakaʼofaʼofa pea neʼe fia tokoni kia nātou.

¹⁴ Koutou tokagaʼi te lotomahino ʼa Sesu ʼi te tahi lakaga. Ko te fafine neʼe maligi tona toto neʼe fakaōvi kia te ia ʼi te hahaʼi kaugamālie, pea neʼe ina fāfā ki tona tapaʼi kofu, pea neʼe lelei faka milakulo ai. Neʼe logoʼi e Sesu te mālohi neʼe mavae ia te ia, kae neʼe mole sio ia pe ko ai ʼaē neʼe mālōlō. Neʼe ina fia maʼu te fafine. Koteā tona tupuʼaga? Neʼe mole ina fia pupulaʼi te fafine ʼi tana maumauʼi te Lao peʼe ko te ʼu lekula ʼa te kau sekelipa pea mo te kau Faliseo, he neʼe feala ke tuʼania ai te fafine. Kailoa ia, kae neʼe ina ʼui age kia ia: “Fanau, kua fakamauli koe e tau tui, alu-la i te tokalelei, pea ke ke malolo mai tou mahaki.” (Maleko 5:25-34) Koutou tokagaʼi ʼi te ʼu palalau ʼaia, tana mahino ki te loto ʼo te fafine. Neʼe mole ina ʼui age pe, “ke ke malolo,” kae neʼe ina ʼui age fēnei: “Ke ke malolo mai tou mahaki.” ʼE fakaʼaogaʼi ʼi henī e Maleko te kupu ʼe faka ʼuhiga ki te “huipi” ʼaē ʼe tau fakaʼaogaʼi moʼo tā ʼo he tahi. Koia neʼe ʼiloʼi e Sesu neʼe mamahi ʼaupito te fafine ʼi tona mahaki, mo tona sino pea mo tona loto. Neʼe lotomahino kia ia.

15, 16. Koteā te ʼu meʼa neʼe hoko ʼi te minisitelio ʼo Sesu, ʼe hā ai neʼe ina kumi te meʼa ʼaē ʼe lelei ʼi te loto ʼo te hahaʼi?

¹⁵ Neʼe toe fakahā e Sesu tona ʼofa ki te hahaʼi ʼi tana kumi tonatou ʼu kalitate. Koutou tokagaʼi te meʼa ʼaē neʼe hoko ʼi tana felāveʼi mo Natanaele, ʼaē neʼe liliu ki muli age ko he ʼapositolo. “Neʼe sio ia Sesu kia Natanaele, ʼe ʼalu age kia te ia pea ʼui maʼana ʼo ʼuhiga mo ia: ‘Koʼeni ia te tagata Iselaele moʼoni, ʼaia ʼe mole ʼi ai he kākā.’ ” ʼI he ʼaluʼaga fakaofoofo, neʼe sio ia Sesu ki te loto ʼo Natanaele, pea neʼe lahi te ʼu meʼa neʼe ina ako ʼo ʼuhiga mo ia. ʼE mahino ia neʼe mole haohaoa ia Natanaele. Neʼe ʼi ai tona ʼu vaivaiʼaga, ohage pe ko tatou fuli. ʼI tona ʼuhiga moʼoni, ʼi tana logo ʼo ʼuhiga mo Sesu, neʼe palalau fakahagatonu fēnei: “ ʼE feala koa ke ʼasi he meʼa ʼe lelei mai Nasaleti?” (Soane 1:45-51, MN ) Kae ʼi te ʼu meʼa fuli ʼaē neʼe feala ke ʼui ʼo ʼuhiga mo Natanaele, neʼe loto e Sesu ke ina tokagaʼi te kalitate ʼo te tagata ʼaia, ʼaē ko tana mole aga fakakākā.

¹⁶ ʼO toe feiā pe, ʼi te temi ʼaē neʼe fakaōvi age ai kia Sesu te ofisie ʼo te foʼi solia—neʼe lagi ko he Senitile, he tagata Loma—pea mo ina kole age ke ina fakamālōlō te kaugana neʼe mahaki, neʼe ʼiloʼi e Sesu neʼe ʼi ai te ʼu hala ʼa te tagata solia. ʼI te temi ʼaia, ko he ofisie ʼo he foʼi solia, neʼe agamālohi ki muʼa atu, neʼe ina matehi te ʼu hahaʼi, pea mo kau ki te tauhi hala. Kae neʼe tokagaʼi tāfito e Sesu te meʼa ʼaē ʼe lelei ʼi te tagata ʼaia—ko tana tui mālohi. (Mateo 8:5-13) Ki muli age, ʼi te palalau ʼa Sesu ki te tagata agakovi ʼaē neʼe tautau ʼi te pou ʼi ʼona tafa, neʼe mole ina fakatonutonuʼi te tagata ʼuhi ko tana ʼu fai fakapō ki muʼa atu, kae neʼe ina fakaloto mālohiʼi ia ia ʼaki te ʼamanaki ki te ka haʼu. (Luka 23:43) Neʼe ʼiloʼi lelei e Sesu kapau neʼe mahalohalo kovi ʼo ʼuhiga mo te hahaʼi pea mo ina valokiʼi nātou, pea ʼe nātou lotovaivai anai. ʼE mahino ia ko tana ʼu faiga ʼaē ke ina maʼu te meʼa ʼaē ʼe lelei ʼi te hahaʼi, neʼe ina fakaloto mālohiʼi te tokolahi ke nātou fetogi.

Neʼe Lotolelei ʼo Tauhi Ki Te Hahaʼi

17, 18. ʼI tana tali tona fekauʼi ʼaē ke haʼu ki te kele, neʼe fakahā feafeaʼi e Sesu tona lotolelei ʼaē ke tauhi ki te hahaʼi?

¹⁷ Neʼe toe hā lelei te ʼofa ʼo Sesu ki te hahaʼi ʼaē neʼe ina akoʼi, he neʼe lotolelei ʼo tauhi kia nātou. ʼI tana maʼuli ʼi selo, neʼe ʼofa tuʼumaʼu te ʼAlo ʼo te ʼAtua ki te hahaʼi. (Tāʼaga Lea 8:30, 31) ʼI tona ʼuhiga “Folafola” ʼa Sehova, peʼe ko tana tagata ʼave folafola, neʼe lagi lahi he ʼu gāue neʼe ina fai moʼo felogoi mo te hahaʼi. (Soane 1:1, MN ) Kae ke feala hana akoʼi fakahagatonu te hahaʼi, “neʼe ina meʼa noaʼi ia ia totonu, pea mo liliu ai ko he kaugana,” ʼo ina tuku ai tona tuʼulaga māʼoluga ʼi selo. (Filipe 2:7, MN; 2 Kolonito 8:9) ʼI tana maʼuli ʼi te kele, neʼe mole loto e Sesu ke tauhi te hahaʼi kia te ia. Kae neʼe ʼui maʼana: “Ko te Foha ʼo te tagata, neʼe mole haʼu ke tauhi ia ia, kaʼe ke tauhi pea mo ina foaki tona nefesi ko he totogi moʼo fetogi ʼaki ʼo te tokolahi.” (Mateo 20:28, MN ) Neʼe fakahoko katoa e Sesu te ʼu palalau ʼaia.

¹⁸ Neʼe agavaivai Sesu ʼo ina foaki te ʼu meʼa ʼaē neʼe ʼaoga kia nātou ʼaē neʼe ina akoʼi, ʼo ina foaki ia ia totonu maʼa nātou. Neʼe ʼalu lalo ʼo fakalaka ʼi te Kele ʼo Te Fakapapau, ia kilometa e lauʼi teau ʼi tana ʼu fai faka mafola, moʼo faiga ke ina maʼu he hahaʼi tokolahi. ʼO mole hage ko te kau Faliseo pea mo te kau sekelipa fialahi, neʼe agavaivai ia Sesu pea neʼe faigafua te fakaōvi kia te ia. Ko te hahaʼi kehekehe fuli pe—te kau ʼaliki, te hahaʼi solia, te hahaʼi ʼo te lao, te kau fafine, mo te kau tamaliki, te kau māsisiva, te kau mahahaki, pea mo te hahaʼi ʼaē neʼe fehiʼaʼinaʼi—neʼe nātou fakaōvi kia te ia, pea neʼe mole nātou matataku. Logola tona ʼuhiga haohaoa, kae ko Sesu neʼe ko he tagata neʼe ina ʼiloʼi te gaʼegaʼe pea mo te fia kai. Logola tona gaʼegaʼe mo tana fia mālōlō pea mo fia maʼu he koga meʼa fakalogologo moʼo faikole ai, kae neʼe ina fakamuʼamuʼa tuʼumaʼu pe te ʼu meʼa ʼaē neʼe ʼaoga ki te hahaʼi.—Maleko 1:35-39.

19. Neʼe tuku feafeaʼi e Sesu te faʼifaʼitaki ʼo te agavaivai, mo te faʼa kātaki, pea mo te agalelei ki tana ʼu tisipulo?

¹⁹ Neʼe toe fia tauhi ia Sesu ki tana ʼu tisipulo. Neʼe ina fai te faʼahi ʼaia, ʼo ina akoʼi nātou ʼaki he agalelei pea mo he faʼa kātaki. Kapau neʼe mole nātou mahino vave ki ʼihi ako maʼuhiga, pea neʼe mole ina līaki nātou, peʼe ʼita, peʼe ina munaʼi nātou. Neʼe haga faiga ke ina fetogi tana faʼahiga faiako moʼo tokoni kia nātou ke nātou mahino. Ohage la, koutou fakakaukauʼi age muʼa te fihi ʼaē neʼe tau fai e te kau tisipulo moʼo ʼiloʼi peʼe ko ai ʼaē ʼe lahi age ia nātou. Tuʼa lahi, ʼo aʼu aipe ki te po ʼi muʼa ʼo tana mate, neʼe fakaʼaogaʼi e Sesu te ʼu faʼahiga faiakonaki foʼou moʼo akoʼi kia nātou ke nātou agavaivai. ʼO ʼuhiga mo te agavaivai, pea mo te tahi atu ʼu faʼahi, neʼe moʼoni te ʼui fēnei ʼa Sesu: “Kuʼau tuku atu kia koutou he faifaitakiʼaga.”—Soane 13:5-15; Mateo 20:25; Maleko 9:34-37.

20. Koteā te faʼahiga faiako ʼa Sesu neʼe kehe ai mo te kau Faliseo, pea he koʼe neʼe fua lelei te faʼahiga fai ʼaia?

²⁰ Koutou tokagaʼi neʼe mole ʼui pe e Sesu ki tana kau tisipulo pe koteā te faʼifaʼitaki, kae neʼe ina ‘tuku he faʼifaʼitakiʼaga.’ Neʼe ina akoʼi kia nātou ʼaki tana faʼifaʼitaki. Neʼe mole fialahi ʼi tana ʼu palalau mo nātou, ohage neʼe mole ʼaoga kia ia totonu te ʼu meʼa ʼaē neʼe ina ʼui age ke nātou fai. Kae neʼe ko te aga ʼaia ʼa te kau Faliseo. Neʼe ʼui fēnei e Sesu ʼo ʼuhiga mo nātou: “E natou tala atu kae e mole natou fai.” (Mateo 23:3) ʼAki he agavaivai, neʼe fakahā e Sesu ki tana kau ako te faka ʼuhiga tonu ʼo tana ʼu akonaki, he neʼe ina maʼuliʼi. Koia ʼi tana fakaloto mālohiʼi tana kau tisipulo ke mole nātou fakamuʼamuʼa te ʼu koloā, neʼe mole nātou feʼekeʼaki peʼe feafeaʼi te maʼuliʼi ʼo te ʼu palalau ʼaia. Neʼe nātou sio ki te moʼoni ʼo tana ʼui fēnei: “E mau luo te u lenato pea mo te u fatai o te u manulele o te lagi. Kae mole mau e te Foha o te tagata he faahi ke hili ki ai tona ulu.” (Mateo 8:20) Neʼe tauhi ia Sesu ki tana ʼu tisipulo ʼo ina tuku he faʼifaʼitaki agavaivai kia nātou.

21. Koteā ʼaē ka tou vakaʼi anai ʼi te alatike ka hoa mai?

²¹ ʼE mahino ia ko Sesu neʼe ko te Tagata Faiako lahi tokotahi ʼi te kele. Ko tana leleiʼia te ʼu meʼa ʼaē neʼe ina akoʼi pea mo tona ʼofa ki te hahaʼi ʼaē neʼe ina akoʼi, neʼe hā lelei ki te hahaʼi loto fakamalotoloto ʼaē neʼe nātou sio pea mo fagono kia te ia. Ko tatou ʼaenī ʼe tou ako tana faʼifaʼitaki, ʼe tou fakamoʼoni ki te ʼu faʼahi ʼaia. Kae ʼe tou lava mulimuli feafeaʼi ki te faʼifaʼitaki haohaoa ʼa Kilisito? ʼE talanoa anai te alatike ka hoa mai ki te faʼahi ʼaia?

ʼE Koutou Tali Feafeaʼi Anai?

• Koteā te faʼahi tāfito ʼo he faiako lelei, pea ko ai ʼaē neʼe ina tuku mai he faʼifaʼitaki ʼi te faʼahi ʼaia?

• Neʼe fakahā feafeaʼi e Sesu tana leleiʼia ia te ʼu moʼoni ʼaē neʼe ina akoʼi ki te hahaʼi?

• Neʼe fakahā feafeaʼi e Sesu tona ʼofa ki te hahaʼi ʼaē neʼe ina akoʼi?

• Koteā te ʼu faʼifaʼitaki ʼe fakahā ai te agavaivai ʼa Sesu ʼi tana lotolelei ʼo tauhi kia nātou ʼaē neʼe ina akoʼi?

[Paki ʼo te pasina 12]

Neʼe fakahā feafeaʼi e Sesu tana leleiʼia ia te ʼu pelesepeto ʼaē ʼe maʼu ʼi te Folafola ʼa te ʼAtua?