Ko Te Mālama ʼo ʼUhiga Mo Te ʼAfio ʼa Kilisito
“Ka aʼu anai te Foha ʼo te tagata ki tona kolōlia, (...) ʼe ina vaevae anai te hahaʼi.” — Mateo 25:31, 32.
1. ʼE faka ʼuhiga feafeaʼi e te kau takitaki ʼo te keletiate te ʼu palalau ʼaē ʼe tuʼu ia Mateo 24:3?
ʼI TE kei toe ʼaho e tolu ki te mate ʼa Sesu, ko te toko fā ʼi tana kau tisipulo neʼe nātou fakaōviōvi age pea neʼe nātou fehuʼi age: “Tala mai kia mātou: Pe ʼe hoko ʼafea te ʼu meʼa ʼaia, pea koteā anai te fakaʼiloga ʼo tau ʼafio [faka keleka parousia] mo te fakaʼosi ʼo te ʼu faʼahiga meʼa ʼo te tuʼu ʼaenī?” Talu mai te ʼu sēkulō, ko te kau takitaki ʼo te keletiate pea mo te hahaʼi faitohi e nātou faka ʼuhiga te ʼu palalau ʼaē ia Mateo 24:3 (Osty) ʼe toe liliu fakahāhā mai anai ʼi te kakano, pea ko te hahaʼi fuli e nātou sisio anai kia ia. Koia, ko nātou ʼaia e nātou akonaki ko te toe liliu mai ʼa Sesu ʼe logologo anai pea mo fakahāhā. Ko te meʼa ʼaia e nātou fakahigoaʼi ko te lua haʼu ʼa Kilisito. Kae ko te ʼu manatu ʼaia ʼe tonu koa?
2, 3. a) Koteā te fakakehekehe neʼe fai e te lua tohi ʼo te ʼu Études des Écritures ʼo ʼuhiga mo te kupu “haʼu” pea mo te kupu “ ʼafio”? b) Neʼe koteā te meʼa neʼe mahino ki ai te hahaʼi ʼa Sehova ki te faka ʼuhiga ʼo te parousia ʼo Kilisito?
2 Talu mai te 1889, ko te kau fakanofo ʼa Sehova, ko te kau toʼo mālama ʼo te 19 sēkulō, neʼe kua nātou ʼosi mahino ʼo ʼuhiga mo te toe liliu mai ʼa Kilisito. ʼI te lua tohi ʼo te ʼu Études des Écritures ʼi te pasina 167 pea mo te 169, ko Charles Russel, te ʼuluaki pelesitā ʼo te Sosiete Watch Tower neʼe ina tohi fēnei: “Ko te kupu parousia (...) ʼe faka ʼuhiga ki te ʼafio, kae mole faka ʼuhiga ki he haʼu, ohage ko tona tuʼu ʼi te ʼu Tohi-Tapu māhani. (...) Ko te tohi ‘Emphatic Diaglott’, ko he fakaliliu fakalelei ʼo te Tauhi Foʼou, ʼe ina fakaliliu te parousia ki te ʼafio (...), kae mole ko he haʼu, ohage ko he meʼa ʼe lolotoga fai, kae ko he ʼafio ʼi te ʼosi tau. Neʼe ʼui fēnei [e Sesu]: ‘Ohage ko te temi ʼo Noe, ʼe toe feiā pe anai te parousia [ʼafio] ʼo te Foha ʼo te tagata.’ Koutou fakatokagaʼi ko te fakatatau ʼe mole fai ki te haʼu ʼo Noe pea mo te haʼu ʼo totatou ʼAliki (...). Ko te kehekehe ʼe ko te vaha ʼi te temi ʼo te nofo ʼa Noe ʼi te lotolotoiga ʼo te hahaʼi ‘ ʼi muʼa ʼo te tulivio’, pea mo te temi ʼo te ʼafio ʼa Kilisito ʼi te malamanei, ki tona temi, ‘ ʼi muʼa ʼo te afi’ — ko te maveuveu lahi ʼo te ʼAho ʼo te ʼAliki [ko Sehova] ʼaia ʼe fakaʼosi ai te taʼiake ʼaia.” — Mateo 24:37.
3 Koia ko te hahaʼi ʼa Sehova ʼo te 19 sēkulō neʼe nātou mahino lelei ko te parousia ʼa Kilisito ʼe fakapulipuli anai. Pea neʼe nātou toe mahino foki ko te fakaʼosi ʼo te Temi ʼo te kau Senitile ʼe hoko anai ʼi te temi momoko ʼo te taʼu 1914. ʼI te hikihiki ʼo te mālama fakalaumālie, ki muli age neʼe nātou mahino ko Sesu Kilisito neʼe fakanofo hau ʼi selo ʼi tona ʼuhiga Hau ʼo te Puleʼaga ʼi te taʼu pe ʼaia, ʼi te 1914. — Tāʼaga Lea 4:18; Taniela 7:13, 14; Luka 21:24; Fakahā 11:15.
“Te ʼafio ʼo totatou ʼAliki”
4. ʼE faka ʼuhiga kiteā “te ʼafio ʼo totatou ʼAliki ko Sesu Kilisito”?
4 ʼI totatou temi, koteā te faka ʼuhiga ʼo te kupu faka tohi-tapu ʼaē ko te “ ʼafio ʼo totatou ʼAliki ko Sesu Kilisito”? (1 Tesalonika 5:23.) ʼI te lau ʼa te tagata ʼe ina ʼiloʼi lelei te potu ʼaia, ko te kupu “ ʼafio”, parousia, “neʼe liliu ko te kupu tāfito ʼaia neʼe fakaʼaogaʼi ʼi he ʼaʼahi ʼa he tagata maʼu tuʼulaga, tāfito la pe ko he ʼu hau pea mo he ʼu tuʼi e nātou ʼaʼahi he faʼahi polovasia”. Koia ko te kupu ʼaia ʼe faka ʼuhiga ki te ʼafio faka hau ʼo te ʼAliki ko Sesu Kilisito ʼi tona ʼuhiga Hau, talu mai te 1914, pea hili mo te taʼu ʼaia, hili ki te temi ʼo tona fakanofo hau ʼi selo. ʼE ʼafio fakapulipuli nei ke ‘ ʼalu ʼo pule ʼi te lotolotoiga ʼo tona ʼu fili’, ʼo fakaʼiloga tona ʼafio pea mo fakahoko te fakatotonu faka polofeta ʼaia (Pesalemo 110:2). Lolotoga taʼu e 79, ko te hahaʼi neʼe nātou logoʼi te ʼafio faka hau pea mo fakapulipuli ʼa Kilisito.
5. Koteā te ʼu fakahāhā lolotoga te parousia ʼe talanoa anai kiai te ʼu alatike ako e tolu ʼo te nusipepa ʼaenī?
5 ʼI te ʼu alatike ʼaenī e tolu, ʼe tou toe sio anai ki te fakaʼiloga lelei ʼo te ʼu fakahoko e te Puleʼaga ʼa Kilisito lolotoga te temi ʼaenī. ʼI te ʼuluaki alatike, ʼe fakahā anai te ʼu tuʼuga lea faka polofeta neʼe nātou fakakikite te ʼu meʼa kua ʼosi hoko peʼe ʼe lolotoga hoko. ʼI te lua alatike, ʼe fakamatalatala anai te gāue lahi ʼe lolotoga fai e te tagata kaugana agatonu mo poto ʼaē ʼe fakaʼaogaʼi e Sesu ʼi te temi fuli pe ʼaenī ʼo tana ʼafio faka hau (Mateo 24:45-47). Ko te tolu alatike ʼe ina fakamatala mai anai te temi fakaʼosi, te temi ʼo te “toe mamahi lahi”. Ko te temi ʼaia ka haʼu ai ia Sesu ʼi tona ʼuhiga Lagiaki Lahi ʼo Sehova moʼo tauteaʼi te kau heʼe agatonu pea mo hāofaki te kau agatonu (Mateo 24:21, 29-31). Ko te temi ʼaia ʼo te faka ʼauha ʼe fakamatalatala fēnei e te ʼapositolo ko Paulo: “Kia koutou, ʼaē ʼe tau mo te tautea, ko te fakafimālie mo mātou, lolotoga te temi ʼo te fakahā ʼo te ʼAliki ko Sesu, mai selo, ʼaki ʼana ʼu ʼaselo mālohi, ʼi he afi kakaha, ʼi te temi ʼaē ka ina fakahoko ai te kami kia nātou ʼaē ʼe mole nātou ʼiloʼi te ʼAtua pea kia nātou ʼaē ʼe talagataʼa ki te logo lelei ʼo ʼuhiga mo totatou ʼAliki ko Sesu.” — 2 Tesalonika 1:7, 8.
Te fakaʼiloga
6. Koteā te fakaʼiloga ʼaki ʼona ʼu koga kehekehe ʼe fakamatala ia Mateo kapite 24 pea mo te kapite 25?
6 Kua hili sēkulō e hogofulu-ma-hiva, ko te kau ʼave mālama ʼaē ko te kau tisipulo ʼa Sesu neʼe nātou faka ʼui age he fakaʼiloga, peʼe ko he fakamoʼoni, ʼo tana ʼafio ʼi te temi ka haʼu mokā ina maʼu anai te pule faka hau. Ko tana tali, ʼaē ʼe maʼu ʼi te ʼu kapite 24 pea mo te 25 ʼo Mateo, ʼe ko he fakaʼiloga mo ʼona koga kehekehe, pea ko tona ʼu koga kehekehe fuli ʼe lolotoga hoko nei ʼi te malamanei katoa. Ko te fakahoko ʼo te fakaʼiloga ʼaia ʼe ina fakahā te temi ʼo te mamahi pea mo te ʼahiʼahi lahi. Neʼe fēnei te fakatokaga ʼa Sesu: “Koutou tokakaga naʼa fakahēʼi he tahi ia koutou; koteʼuhi tokolahi e nātou ʼomai anai ʼo nātou fakaʼaogaʼi toku huafa, ʼo ʼui maʼa nātou: ‘Ko ʼau ia Kilisito’, pea e nātou fakahēʼi anai te tokolahi. ʼE koutou logo anai ki he ʼu talanoa tau pea mo te ʼu teuteu tau; ke ʼaua naʼa koutou matataku. Koteʼuhi ʼe tonu ke hoko te ʼu meʼa ʼaia, kae mole heʼeki hoko mai te fakaʼosi.” — Mateo 24:4-6.
7. Ko te ʼu koga fea ʼo te fakaʼiloga kua tou sio ki tona hoko talu mai te taʼu 1914?
7 Ki muli age, neʼe fakakikite e Sesu ʼe hoko anai te ʼu tau ʼe mole honatou tatau. ʼI te ʼu meʼa neʼe hoko, ko te ʼu tau e lua neʼe fakahigoaʼi ko te ʼu tau faka malamanei, ko te ʼuluaki neʼe hoko ʼi te taʼu 1914 ki te taʼu 1918 pea ko te lua tau neʼe kamata ʼi te taʼu 1939 ki te taʼu 1945. Neʼe ina toe ʼui foki ʼe ʼi ai anai mo te ʼu hoge pea mo te ʼu mafuike ʼi te tahi koga ki te tahi koga. ʼE kovi anai te fakatagaʼi ʼo te kau kilisitiano fakamalotoloto. ʼI te moʼoni ʼa te lea faka polofeta, ko te kau Fakamoʼoni ʼa Sehova, te kau ʼave mālama ʼo te temi nei, neʼe nātou tau mo te fakataga lolotoga te ʼu taʼu e valugofulu tupu kua hili ʼi tanatou faka mafola te logo lelei ʼo te Puleʼaga ʼo te ʼAtua “ ʼi te kele katoa, moʼo fakamoʼoni ki te ʼu puleʼaga katoa”. (Mateo 24:7-14.) Ko te Annuaire des Témoins de Jéhovah ʼo te taʼu fuli ʼe ina tuku te fakamoʼoni ko te ʼu koga kehekehe ʼo te fakaʼiloga ʼe lolotoga hoko.
8, 9. a) Koteā te meʼa ʼe fakapipiki ki te ʼafio faka hau ʼa Sesu? b) Koteā ʼe fakahā e te lea faka polofeta ʼa Sesu ki te ʼu polofeta loi ʼo ʼuhiga mo te koga meʼa feiā mo te ʼaluʼaga ʼo tana ʼafio?
8 Koteʼuhi ko te tofiʼa ʼa Sesu ko te kele katoa, ko te tauhi moʼoni ʼe lolotoga mafola ʼi te ʼu fenua fuli. Ko tona ʼafio faka hau (parousia) ʼe ko he temi ʼo te ʼaʼahi ki te malamanei katoa (1 Petelo 2:12). Kae ʼe ʼi ai koa he taulaga, peʼe ko he koga meʼa tāfito, ʼe feala ke vakaʼi ai ia Sesu? Neʼe tali e Sesu ki te fehuʼi ʼaia ʼo ina fakakikite ʼe tutuʼu anai he ʼu kilisito loi. Neʼe fakatokagaʼi fēnei: “Kapau ʼe ʼui atu kia koutou: ‘Koutou sisio, koʼeni ia [Kilisito] ʼi te toafa!’, ʼaua naʼa koutou ʼolo ki ai; ‘Koutou sisio, koʼe ʼi te ʼu koga fale loto!’, ʼaua naʼa koutou tui ki ai. Koteʼuhi ohage ko te mū mai ʼo te hila mai te ʼu koga meʼa ʼo te potu hahake pea gigila ʼo aʼu ki te ʼu koga meʼa ʼo te potu hihifo, ʼe toe feiā aipe anai mo te ʼafio [parousia] ʼo te Foha ʼo te tagata.” — Mateo 24:24, 26, 27.
9 ʼI te ʼaluʼaga ʼo te mole ʼi ai hona tatau ʼi te kele, ko Sesu, “te Foha ʼo te tagata”, neʼe ina ʼiloʼi peʼe ko te potu fea ʼaē ka kamata ai tana ʼafio. ʼE mole tuʼu anai ia ʼi henī, peʼe ko he, peʼe ʼi he koga meʼa ʼo te kele. ʼE mole nofo anai ia ʼi he koga meʼa lāvaki, “ ʼi te toafa”, ke fealagia kia nātou ʼaē e nātou kumi ia Kilisito ke nātou ʼaʼahi ia ia kae mole fakatokagaʼi e te pule takitaki ʼo te fenua, ko he koga meʼa ʼe feala ai ki tana kau tisipulo ke nātou akoako ʼi tona fai pule, ʼo nātou teuteu ke nātou ʼohofi te puleʼaga ke feala ai hana liliu ko te Pule faka mesianike ʼo te malamanei. ʼO toe feiā aipe, ʼe mole nono anai ia ʼi he ʼu “koga fale loto”, gata pe anai ki te tokosiʼi e nātou ʼiloʼi, ke fealagia, ʼi he koga meʼa fakalilo, hana teuteu ke ina faʼao pea mo fakatuʼutuʼu he ʼu puleʼaki mo tana ʼu hahaʼi ke nātou fakahifo te ʼu puleʼaga faka malamanei pea mo fakanofo ia ia ko te Mesia ʼaē neʼe fakapapau. Kailoa ia!
10. Neʼe feafeaʼi te mafisi ʼo te ʼu mālama ʼo te moʼoni ʼi te malamanei katoa?
10 Neʼe mole he meʼa neʼe tonu ke fufū ʼo ʼuhiga mo te haʼu ʼa Sesu ʼi tona ʼuhiga Hau, ʼi te kamataʼaga ʼo tana ʼafio faka hau. Ohage ko tona fakakikite e Sesu, ʼi te malamanei katoa, ko te ʼu mālama ʼo te moʼoni faka tohi-tapu ʼe kei hoko tonatou mafisi ʼi te ʼu koga meʼa lalahi, mai te ʼu koga meʼa ʼo te potu hahake ʼo aʼu ki te ʼu koga meʼa ʼo te potu hihifo. ʼIo, ko te kau ʼave mālama ʼo te temi nei, ʼaē ko te kau Fakamoʼoni ʼa Sehova neʼe nātou fakahā tanatou ʼuhiga “mālama ʼo te ʼu puleʼaga, ke hā te hāofaki [ʼa Sehova] ʼo aʼu ki te potu taupotu ʼo te kele”. — Isaia 49:6.
Ko te gāue ʼa te kau ʼaselo
11. a) ʼE fakaʼaogaʼi feafeaʼi te ʼu foʼi tau fakaʼaselo ki te fakahā ʼo te mālama ʼo te Puleʼaga? b) Ko ʼanafea ʼaē neʼe fakatahiʼi ai te kūtuga ʼo te fulumeto pea neʼe fakatahi ki te kūtuga fea?
11 Ko ʼihi koga tohi ʼo ʼuhiga mo te ʼafio ʼa Sesu e nātou fakamatala ʼe ʼi ai te ʼu foʼi tau fakaʼaselo e nātou nonofo mo ia, peʼe ‘ina fekauʼi’ te ʼu foʼi tau ʼaia (Mateo 16:27; 24:31). ʼI tana lea fakatātā ʼo ʼuhiga mo te fulumeto pea mo te vao kovi, ko Sesu neʼe ina ʼui “ko te gāueʼaga, ko te malamanei” pea ko “te tānaki ʼo te taʼukai, ko te fakaʼosi ʼo te tuʼu ʼo he ʼu faʼahiga meʼa, pea ko te kau tānaki taʼukai, ko te kau ʼaselo”. Kae ko te meʼa ʼaia ʼe mole ina faka ʼuhiga leva ʼe gata pe anai tana fakaʼaogaʼi te kau faifekau fakaʼaselo moʼo fai te ʼu gāue ʼi te kele lolotoga tona temi ʼafio ʼi te Puleʼaga ʼi te mālohi pea mo te kolōlia. ʼI tona kamata ʼi te taʼu 1919, ko te kau ʼaselo ʼi te takitaki ʼa Sesu neʼe nātou tānaki te kūtuga ʼo te fulumeto, te kau fakanofo ʼaē neʼe tutupu ʼi te laumālie ʼaē kei ʼi te kele pea neʼe nātou tahi ʼalu ʼuhi ko te ʼu meʼa ʼo te ʼUluaki Tau faka malamanei, pea neʼe teuteuʼi nātou ki te tahi gāue ʼi te huafa ʼo te Hau (Mateo 13:38-43). ʼI te ʼu tau 20, ko ʼihi hahaʼi ʼe lauʼi afe neʼe kau ki te Puleʼaga ʼa te ʼAtua ʼaē neʼe kua fakatuʼu pea neʼe fakanofo nātou e te laumālie ʼa te ʼAtua. Ko nātou ʼaia neʼe fakanofo neʼe nātou kau kia nātou neʼe ʼuluaki fakanofo. Fakatahi ʼaia, ʼo aʼu ki te temi nei neʼe nātou gāue ʼi tonatou ʼuhiga kaugana agatonu mo poto.
12. Neʼe koteā te gāue fakamaʼa ʼaē neʼe kau ki ai te kau ʼaselo, pea koteā tona fua ki te kele?
12 Ko te tahi fakahāʼaga ʼo te gāue ʼa te kau ʼaselo lolotoga te ʼafio ʼa Sesu ʼi tona ʼosi fakanofo hau ʼi te 1914 ʼe fakamatala ia Fakahā 12:7-9: “Ko Mikaele [ia Sesu Kilisito] mo tana kau ʼaselo neʼe nātou tauʼi te talakone, pea neʼe tau te talakone mo tana kau ʼaselo, ka neʼe mole mālo ia, pea neʼe mole kei ʼi ai he nofoʼaga kia nātou ʼi te lagi. Neʼe lī foki ki lalo ia te talakone lahi, te gata olisinale, ia ia ʼaē ʼe ʼui ko Tevolo mo Satana, ia ia ʼaē ʼe ina kakaʼi te malamanei katoa; neʼe lī ia ki lalo ki te kele, pea mo tana kau ʼaselo neʼe lī mo ia ki lalo.” Koia, ko te lagi kua fakamaʼa, pea ʼe kei toe pe te tofiʼa fakakelekele ʼo te Puleʼaga ke fakamaʼa ke tāpuhā ai te huafa ʼa Sehova. ʼI te taʼu ʼaenī ʼo te 1993, ko te fakatokaga fakaʼatua ʼe kei hoko atu tona kalagaʼi: “Malaʼia ki te kele (...) koteʼuhi ko te Tevolo kua hifo atu kia koutou, mo tona toe ʼita lahi, ʼi tana ʼiloʼi kua nounou tona temi.” — Fakahā 12:12.
Ko te toe fakatuʼuake ki selo
13, 14. a) Koteā te meʼa ʼaē ʼe fakahā e te Tohi-Tapu neʼe hoko talu mai te taʼu 1918? b) Koteā te meʼa ʼaē ʼe fakahā e Paulo mo Soane ʼo ʼuhiga mo te toe ʼo te kau kilisitiano fakanofo ʼo te temi nei?
13 Ko te tahi meʼa fakaofoofo ʼe hoko lolotoga te ʼafio ʼa Kilisito ʼe ko te kamata ʼo te toe fakatuʼuake ki selo. ʼE fakahā e te ʼapositolo ko Paulo ko te kau kilisitiano fakanofo ʼaē neʼe kua fualoa tanatou takokoto ʼi te faitoka ʼe ʼuluaki fakatuʼuake anai ia nātou pea mo nātou maʼuʼuli anai mo Sesu Kilisito ʼi selo. Lolotoga te ʼu taʼu, neʼe fakahā te ʼu fakamoʼoni ko te meʼa ʼaia neʼe kamata mai te taʼu 1918. ʼE toe ʼui fēnei e Paulo: “Ko te hahaʼi fuli ʼe toe fakaliliu anai ia nātou ki te maʼuli ia Kilisito. Kae ʼe takitahi pe ʼi tona lakaga: ko Kilisito te ʼu ʼuluaki fua pea hoko ai mo nātou ʼaē ʼa Kilisito lolotoga tona ʼafio [parousia].” (1 Kolonito 15:22, 23). Ko te toe fakatuʼuake ʼo te kau fakanofo lolotoga te ʼafio ʼo Kilisito ʼe fakamoʼoni ia 1 Tesalonika 4:15-17: “Heʼe koʼeni te meʼa ʼe mātou ʼui atu, ʼaki te folafola ʼa Sehova: ko mātou, ko te kau maʼuʼuli, ʼaē ka maʼuʼuli ʼo aʼu ki te temi ʼafio [parousia] ʼo te ʼAliki, ʼe mole tou muʼamuʼa anai leva tatou ia nātou ʼaē kua momoe ʼi te mate; (...) ko nātou ʼaē neʼe mamate tahi mo Kilisito ʼe ʼuluaki fakatuʼuake anai nātou ʼaia. Ki muli age leva, ko tatou ʼaē kei maʼuʼuli, fakatahiʼi mo nātou ʼaia, ʼe toʼo anai tatou ʼi te ʼu ʼao moʼo fetaulaki mo te ʼAliki ʼi te lagi.” Ko te toko 144 000 fakanofo e nātou kau kia Kilisito pea e nātou maʼu te fakapale fakatalakitupua. — Fakahā 14:1.
14 Ohage ko tona fakahā e te ʼapositolo ko Paulo, ko te toe ʼo te kau fakanofo ʼe kei nātou maʼuʼuli ʼe mole fua hu anai nātou ki te Puleʼaga ʼi te kau kilisitiano maletile ʼaia pea mo te kau tisipulo. Pea tahi, ʼe fēnei te fakamatalatala e te ʼapositolo ko Soane ʼo ʼuhiga mo te kau fakanofo ʼe mamate ʼi te temi nei: “Manuʼia te kau mate ʼaē ʼe mamate ʼo tahi mo te ʼAliki ʼo kamata atu ʼi te temi nei. ʼIo, ʼe ʼui e te laumālie, ke nātou mālōlō ʼi ʼanatou gāue, heʼe ko te ʼu meʼa ʼaē neʼe nātou fai ʼe ʼolo mo nātou”, ko tona faka ʼuhiga ki te maʼuli ʼo tonatou ʼuhiga kau fakatuʼuake (Fakahā 14:13). Pea ʼe toe ʼui fēnei e Paulo: “Koʼeni, ʼe ʼau fakamahino atu te meʼa fakalilolilo maʼoniʼoni: ʼe mole tou momoe fuli anai ʼi te mate, ʼaē ko tatou fuli ʼe fetogi anai tatou, ʼi te fakafokifā, ʼi te kemoʼi ʼo te mata, ʼi te lolotoga ʼo te pupuhi fakaʼosi ʼo te fakatagi. Heʼe pupuhi anai te fakatagi, pea fakatuʼuake te ʼu mate ʼo heʼepopo, pea ko tatou ʼaenī, ʼe tou fetogi anai.” (1 Kolonito 15:51, 52). ʼE ko he milakulo fakaofoofo!
15, 16. a) Koteā te lea fakatātā neʼe foaki e Sesu ia Luka 19:11-15, pea koteā te tupuʼaga ʼo tana fai te lea ʼaia? b) Neʼe hoko feafeaʼi te lea faka polofeta ʼaia?
15 ʼI te tahi lakaga ʼi tana fagonogono ki te kūtuga ʼo tana kau tisipulo, neʼe ina fakaʼaogaʼi te lea fakatātā moʼo tokoniʼi ʼo nātou ki te fakatonutonu ʼo tanatou ʼu manatu hāla. ʼE fakamatala mai fēnei: “Neʼe nātou manatu ko te puleʼaga ʼo te ʼAtua ʼe hā ʼi te temi pe ʼaia. Ko ia ʼaē neʼe ina ʼui ai: ‘Ko te tagata maʼu meʼa neʼe folau ki te fenua mamaʼo ke fakanofo hau pea toe liliu mai. Neʼe ina pāuiʼi tana ʼu tagata kaugana e hogofulu, pea ina foaki age te ʼu mina e hogofulu pea mo ina ʼui age, “Koutou gāueʼi ʼo aʼu ki taku liliu mai.” (...) Pea, ʼi tana toe liliu mai, ʼi tona kua ʼosi fakanofo hau, neʼe ina fakatotonu ke pāui mai tana ʼu tagata kaugana ʼaia ʼaē neʼe ina foaki age kia nātou te falā, ke ʼiloʼi te meʼa ʼaē neʼe nātou maʼu ʼi tanatou ʼu gāue.’ ” — Luka 19:11-15.
16 Neʼe ko Sesu te “tagata” ʼaia neʼe ʼalu ki selo, “te fenua mamaʼo” ʼaē neʼe tonu ai ke ina maʼu te puleʼaga. Ko te Puleʼaga neʼe ina maʼu ʼi te taʼu 1914. ʼOsi ʼaia, ko Kilisito ʼi tona ʼuhiga Hau neʼe ina tae te ʼu maʼua mai ia nātou ʼaē ʼe ʼui ko tana kau tisipulo moʼo vakaʼi peʼe neʼe feafeaʼi te ʼaluʼaga ʼo tanatou tokakaga ki te ʼu meʼa ʼo te Puleʼaga ʼaē neʼe tuku age kia nātou. Ko te kau agatonu tokosiʼi neʼe fili ke nātou maʼu te fakamālo mai te pule: “ ʼE lelei, tagata kaugana agalelei! ʼUhi neʼe ke agatonu ʼi te kiʼi gāue siʼisiʼi, maʼu e koe te fai pule ki te ʼu kolo e hogofulu.” (Luka 19:17). ʼI te temi ʼafio ʼo Kilisito ʼe hoko ai te gāue faka mafola lahi ʼo fai hoholo ʼo ʼuhiga mo te Puleʼaga, ʼe kau ai mo te kalagaʼi ʼo te ʼu fakamāu ʼo te kau agakovi e te ʼAtua, pea ko te faka ʼaluʼalu te gāue ʼaia ʼe tuku anai ki te fai pule ʼo te “tagata kaugana agalelei”.
Ko te gāue faka mafola ʼi te malamanei
17. Koteā te fiafia ʼe ina fakaʼiloga te parousia?
17 Koteā te tahi meʼa ʼe hoko anai ʼi te parousia ʼaia? ʼE ko he temi fakafiafia lahi anai ʼi te gāue faka mafola pea mo te tokoni ʼaē kia nātou ʼaē ʼe foʼofoʼou ke nātou teuteu ke hāofaki nātou ʼi te toe mamahi lahi ka hoko. Ko nātou ʼo te “toe hahaʼi tokolahi”, ʼaē e nātou tokoni ki te toe ʼo te kau kilisitiano fakanofo, e nātou liliu ko te “ ʼu tohi fakamoʼoni”. (Fakahā 7:9; 2 Kolonito 3:1-3.) ʼE talanoa ia Paulo ki te fiafia ʼo te gāue ʼo te tānaki taʼukai ʼaia ʼi tana ʼui ʼaē: “Koteā totatou ʼamanaki pea mo totatou fiafia, peʼe ko totatou kolona ʼo te fakafiafia — ʼio, ʼe mole koa la ko koutou? — ʼi muʼa ʼo totatou ʼAliki ko Sesu ʼi tana ʼafio [parousia]?” — 1 Tesalonika 2:19.
Tou haga nofo maʼa pea mo haohaoa
18. a) Koteā te faikole ʼa Paulo ʼe faka ʼuhiga ki te parousia? b) Koteā te aga ʼe tonu ke maʼu e tatou fuli lolotoga te temi ʼaenī, pea ʼe feafeaʼi?
18 Ko Paulo neʼe faikole foki ki te tāpuhā ʼo nātou ʼe maʼuʼuli anai ʼi te temi ʼaia ʼo te ʼafio ʼa Kilisito: “Ke tāpuhā katoa ia koutou e te ʼAtua totonu ʼo te tokalelei! Pea ke maʼa ʼi te ʼu ʼaluʼaga fuli, te laumālie pea mo te nefesi pea mo te sino ʼaē ʼo koutou, ʼu tēhina, ke taupau ʼi he ʼaluʼaga haohaoa lolotoga te ʼafio [parousia] ʼo totatou ʼAliki ko Sesu Kilisito!” (1 Tesalonika 5:23). ʼIo, ʼi te temi nei, peʼe tou kau ʼi te toe ʼo te kau kilisitiano fakanofo peʼe ʼi te ʼu ōvi tokolahi, ko te kaugā gāue ʼe ina fakatahi tatou ʼi te ʼaluʼaga agatonu ke feala ai hatatou haʼele ʼi te maʼa pea mo te haohaoa ʼi te temi ʼaenī. ʼO toe feiā aipe, ʼe ʼaoga ke tou haga faʼa kātaki. Neʼe tohi fēnei e Sake: “Koutou faʼa kātaki foki, ʼu tēhina, ʼo aʼu ki te ʼafio [parousia] ʼo te ʼAliki. (...) Koutou tāʼofi maʼu tokotou loto, koteʼuhi kua ōvi mai te ʼafio [parousia] ʼo te ʼAliki.” — Sake 5:7, 8.
19. Koteā te fakatokaga neʼe foaki e Petelo ʼo ʼuhiga mo te parousia, pea ʼe tonu ke tou tali feafeaʼi?
19 Neʼe ʼi ai mo te meʼa neʼe ʼui e te ʼapositolo ko Petelo ʼo ʼuhiga mo tatou ʼe maʼuʼuli ʼi te temi ʼaenī. Neʼe ina fakatokagaʼi tatou ki te kau vāvā, ʼaē e nātou hahaʼi ʼi te potu fuli ʼo te kele. ʼE ʼui fēnei e Petelo: “Heʼe koutou ʼiloʼi muʼa te meʼa ʼaenī: ʼi te ʼu ʼaho fakaʼosi ʼe ʼomai anai te kau vāvā pea mo tanatou manuki, ʼo haʼele ʼo mulimuli pe ki te ʼu holi ʼo nātou pea mo ʼui maʼa nātou: ‘ ʼE ʼifea koa tana ʼafio [parousia] ʼaē neʼe lau? Heʼe talu mai te ʼaho ʼaē neʼe momoe ai tatatou ʼu tāmai ʼi te mate mo te feiā aipe ʼo te ʼu meʼa fuli ohage pe ko te kamataʼaga ʼo tonatou fakatupu.’ ” (2 Petelo 3:3, 4). Logope te maʼuli ʼo te kau vāvā ʼi te ʼafio ʼo Kilisito, ko te hahaʼi ʼa Sehova ʼe hoko atu tanatou gigila ʼi tonatou ʼuhiga mālama ʼo te malamanei, ko te faiga ki te hāofaki ʼo te tokolahi.
Ko te ʼu fehuʼi moʼo fakamanatu
◻ Neʼe feafeaʼi te fakamālamaʼi mamalie ʼo te hahaʼi ʼa Sehova ʼo ʼuhiga mo te parousia?
◻ Neʼe feafeaʼi te fakahoko ʼo Mateo 24:4-8?
◻ Neʼe feafeaʼi te kaugā gāue ʼa te kau ʼaselo ki te fakanofo hau ʼa Kilisito?
◻ Koteā te milakulo fakaofoofo ʼe hoko lolotoga te parousia?
◻ Koteā te fiafia ʼe maʼu ʼi temi nei, pea ko ai ʼaē ʼe ina maʼu?