ʼI te ʼuluaki sekulo ʼo totatou temi, neʼe ʼui e Sesu ko tana ʼafio fakapulipuli ʼi tona ʼuhiga ʼaē ko te Hau ki te kele ʼe ʼiloga anai ʼaki te fakaʼiloga ʼe hā. Neʼe fehuʼi age foki kia te ia: “Koteā anai te fakaʼiloga ʼo tau ʼafio mo te fakaʼosi ʼo te ʼu faʼahiga meʼa ʼo te tuʼu ʼaenī?” Koʼeni tana tali: “ ʼE tuʼu anai he fenua ki he tahi fenua pea mo he puleʼaga ki he tahi puleʼaga, pea ʼe ʼi ai anai mo te ʼu hoge pea mo te ʼu mafuike ʼi he potu ki he tahi potu. Ko te ʼu meʼa fuli ʼaia ko te kamataʼaga ʼo te ʼu nunuʼa ʼo te tuʼania.” — Mateo 24:3, 7, 8.

ʼO felōgoʼi mo te lea faka polofeta ʼaia, neʼe hoko te tau ʼaia ʼi te 1914 pea muli atu ai te ʼu hoge fakamataku, heʼe ko te gaohi māhani ʼo te meʼa kai neʼe mole kei fai fakaleleiʼi ia lolotoga ʼi taʼu e fā. Kae, neʼe feafeaʼi koa te ʼu “mafuike ʼi he potu ki he tahi potu”? ʼI te ʼu taʼu ʼaē e hogofulu ki muli age ʼo te taʼu 1914, ko mafuike e hogofulu tupu neʼe fakalaka tona ʼu mate ʼi te toko 350 000 hahaʼi (vakaʼi ʼi te encadré). ʼIo, ko te taʼiake ʼo te 1914 neʼe mamata ia “ki te kamataʼaga ʼo te nunuʼa ʼo te tuʼania”. Pea talu mai ai, ko te ʼu nunuʼa ʼo te tuʼania ʼe hoko tuʼumaʼu pe ohage ko te ʼu mafuike, te ʼu afā, te ʼu hoge pea mo te ʼu tau ʼe lahi ʼaupito.

Kae, ko te fakatuʼu ʼaē ʼo te Puleʼaga ʼo te ʼAtua ʼi te taʼu 1914 neʼe ko he logo lelei, heʼe ko te Puleʼaga ʼaia ka ina hāofaki anai te kele mai te maumau. ʼO feafeaʼi koa? ʼE ina faka ʼauha anai te ʼu lotu hala fuli pea mo malualoi, te ʼu puleʼaga ʼe kākā pea mo te fakahala ʼa Satana (Taniela 2:44; Loma 16:20; Fakahā 11:18; 18:4-8, 24). Pea tahi, ʼe ina fakatuʼu anai he mālama foʼou ʼaia “ ʼe tonu ke nofo ai te faitotonu”. — 2 Petelo 3:13.

Ki muli age ʼo te ʼUluaki Tau faka malamanei, ko te kau Ako Tohi-Tapu, ko te higoa ʼaia ʼo te kau Fakamoʼoni ʼa Sehova ʼo te temi ʼaia, neʼe nātou kamata mahino ki te pilivilesio ʼaē ʼo nātou pea mo te tahi age faʼahi ʼo te fakaʼiloga ʼo te ʼafio ʼa Sesu ko te Hau. Neʼe fakakikite e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, moʼo fakamoʼoni ki te ʼu puleʼaga katoa; pea hoki hoko mai ai leva mo te fakaʼosi.” — Mateo 24:14.

Talu mai tanatou ʼu kiʼi kamakamata gāue ʼi te taʼu 1919, ʼe faka mafola mālohi aipe e te kau Fakamoʼoni ʼa Sehova “te logo lelei ʼaenī”. ʼAki te gāue ʼaia, e lauʼi miliona te hahaʼi mai te ʼu fenua e 200 ʼe lolotoga fakatahiʼi nei ke nātou kau ki te hahaʼi fakalogo ʼo te Puleʼaga ʼo te ʼAtua. ʼE ko he ʼu tapuakina lahi foki anai ka nātou maʼu! ʼE pulihi anai e te Puleʼaga te tau, te hoge, te fakapō pea mo te popūla. ʼE toe mālo anai ʼi te mahaki pea mo te mate! — Pesalemo 46:9; 72:7, 12-14, 16; Tāʼaga Lea 2:21, 22; Fakahā 21:3, 4.

Ia muʼa ʼo te fakalaka ʼo te taʼiake ʼo te taʼu 1914, ko te faka mafola ʼo te Puleʼaga ʼe tau anai ki tona ikuʼaga. Pea ʼe toe fakakikite e Sesu: “ ʼE ʼi ai anai te toe mamahi lahi, neʼe heʼeki hoko feiā talu mai te kamata ʼo te malamanei ʼo aʼu kia ʼaho nei, kailoa ia, pea ʼe mole toe hoko anai ia. ʼIo, ka na pau la ʼe mole fakanounou te ʼu ʼaho ʼaia, ʼe mole ʼi ai anai he kakano ʼe hāo; kae ʼuhi ko nātou ʼaē neʼe fili ko te ʼu ʼaho ʼaia ʼe fakanounou.” — Mateo 24:21, 22.

[Talanoa ʼo te pasina 7]

Te ʼu mafuike ʼi te ʼu taʼu e hogofulu ʼaē neʼe hoko atu ki te 1914

ʼAho: Koga meʼa: Te kau mamate:

ʼAho 13 ʼo sanualio 1915 Avezzano, (Italia) 32 600

ʼAho 21 ʼo sanualio 1917 Bali, (Ītonesia) 15 000

ʼAho 13 ʼo fepualio 1918 Koga fenua 10 000

ʼo Kwangtung, (Siaina)

ʼAho 11 ʼo ʼoketopeli 1918 Porto Rico (ʼi tona 116

potu hahake)

ʼAho 3 ʼo sanualio 1920 Veracruz, (Mekesike) 648

ʼAho 7 ʼo sepetepeli 1920 Koga fenua ʼo Calabre, 1 400

(Italia)

ʼAho 16 ʼo tesepeli 1920 Koga fenua ʼo Ningsia, 200 000

(Siaina)