Tou Agatonu ʼo Lagolago Ki Te Folafola ʼAē ʼe Haʼu Mai Te ʼAtua

“Kua tou līaki te ʼu meʼa fakafūfū ʼaē ʼe tou ufiufi ai, ʼo mole tou haʼele fakakākā, ʼo mole tou kākāʼi te folafola ʼa te ʼAtua.”​—2 Kolonito 4:⁠2.

1. (a) Koteā te meʼa ʼaē neʼe tonu ke fai moʼo fakahoko te gāue ʼaē ʼe tuʼu ia Mateo 24⁠:14 pea mo te kapite 28⁠:​19, 20? (b) ʼI te kamata ʼo te ʼu ʼaho fakamuli, neʼe kua fakaliliu te Tohi-Tapu ia lea ʼe fia?

ʼI TANA lea faka polofeta lahi ʼo ʼuhiga mo te temi ʼo tana ʼafio faka hau pea mo te fakaʼosi ʼo te tuʼu ʼāfea ʼo te ʼu faʼahiga meʼa ʼaenī, neʼe fakakikite fēnei e Sesu Kilisito: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” Neʼe ina toe fakatotonu fēnei ki tana ʼu tisipulo: “Koutou ʼolo ʼo fai he ʼu tisipulo ʼi te ʼu puleʼaga, . . . ʼo koutou ako ia nātou ke nātou mulimuli ki te ʼu meʼa pe ʼaē neʼe ʼau fakatotonu atu kia koutou.” (Mateo 24:14; 28:​19, 20) Moʼo fakahoko te ʼu lea faka polofeta ʼaia, neʼe maʼua ke fai he gāue lahi ʼi te fakaliliu pea mo te tā ʼo te Tohi-Tapu, moʼo akoʼi ki te hahaʼi tona faka ʼuhiga, pea mo tokoni kia nātou ke nātou fakaʼaogaʼi ʼi tonatou maʼuli. ʼE ko he pilivilesio hatatou kau ki te gāue ʼaia! ʼI te taʼu 1914 neʼe kua ʼosi tā te Tohi-Tapu katoa, pe ko hona ʼu koga ia lea e 570. Kae talu mai te temi ʼaia, ko te tahi ʼu lea ʼe lauʼi teau pea mo te ʼu faʼahiga palalau ʼo te ʼu lea neʼe hilifaki kiai, pea ʼaki te ʼu tuʼuga lea ʼaia, kua maʼu he ʼu fakaliliu kehekehe ʼo te Tohi-Tapu.a

2. Koteā te ʼu meʼa kehekehe ʼaē neʼe nātou uga ai te gāue ʼa te kau fai fakaliliu pea mo te kau tā Tohi-Tapu?

² ʼE ko he meʼa faigataʼa te fakaliliu ʼo he tohi ki he tahi lea, ke mahino kiai ia nātou ʼaē ʼe lautohi pea mo logo ki he tahi lea. Ko ʼihi neʼe nātou fakaliliu te Tohi-Tapu ʼo nātou fai tanatou gāue ʼaki he tokaga lelei ʼaupito, ʼi tanatou ʼiloʼi ʼaē ʼe ko te Folafola ʼa te ʼAtua ʼaē neʼe nātou fakaliliu. Ko ʼihi neʼe nātou fai te faʼahi ʼaia heʼe nātou leleiʼia te faigataʼa ʼo te poto fakaliliu. Neʼe lagi nātou faka ʼuhiga te ʼu meʼa ʼaē ʼe tuʼu ʼi te Tohi-Tapu ohage ko he tofiʼa fakafenua maʼuhiga. Ki ʼihi, ko te lotu ʼe ko hanatou gāue ke nātou maʼu ai hanatou paʼaga pea ʼe toe feiā aipe mo tanatou tā ʼo tonatou higoa ki te ʼu tohi ʼi tonatou ʼuhiga hahaʼi fakaliliu peʼe tā tohi. ʼE mahino ia ko te ʼu meʼa ʼaē ʼe nātou uga te hahaʼi ʼaia ʼe lave ki tanatou fai ʼo tanatou gāue.

3. Neʼe faka ʼuhiga feafeaʼi e te Komite Fakaliliu ʼo te Tohi-Tapu tana gāue?

³ ʼE lelei ke tou fakatokagaʼi te ʼu palalau ʼaenī ʼaē neʼe fai e te Komite Fakaliliu ʼo te Tohi-Tapu, Le monde nouveau: “Ko te fakaliliu ʼo te Tohi-Tapu ʼe ko te fakaliliu ki he tahi lea ʼo te ʼu manatu pea mo te ʼu palalau ʼaē neʼe fai e Sehova ʼAtua . . . ʼE ko he faʼahi ʼe tonu ke tou fakakaukauʼi. Ko nātou ʼaē neʼe nātou fakaliliu te tohi ʼaenī, ko he ʼu tagata ʼe nātou manavasiʼi pea mo ʼofa ki te Tupuʼaga ʼo te Tohi-Tapu, pea ʼe nātou logoʼi ʼe ʼi ai tonatou maʼua kia te Ia, ke nātou fakaliliu fakalelei tana ʼu manatu pea mo tana ʼu palalau. ʼE nātou toe logoʼi foki mo tonatou maʼua ʼaē ki te kau lautohi fakamalotoloto ʼaē ʼe nātou falala ki he fakaliliu ʼo te Folafola ʼa te ʼAtua Māfimāfi, ke feala ai hanatou maʼu tonatou maʼuli heʼegata. ʼI tanatou mahino ki tonatou ʼu maʼua ʼaia, ko te kau fakaliliu, ko te komite tagata fakamalotoloto, neʼe nātou fakaliliu, lolotoga ni ʼu taʼu, te Tohi-Tapu ʼaē ko te Les Saintes Écritures — Traduction du monde nouveau.” Neʼe fakatuʼutuʼu e te komite ke maʼu he fakaliliu ʼa te Tohi-Tapu ʼe mātala lelei pea mo mahino kiai te hahaʼi, pea ko he fakaliliu ʼe pipiki lelei ki te lea faka Hepeleo mo te lea faka Keleka, ke liliu ai ko he tafitoʼaga ʼo he ʼatamai mālama ʼe haga tuputupu.

Koteā ʼAē Kua Hoko Ki Te Huafa ʼo Te ʼAtua?

4. ʼE maʼuhiga feafeaʼi te huafa ʼo te ʼAtua ʼi te Tohi-Tapu?

⁴ ʼI te ʼu fakatuʼutuʼu tāfito ʼo te Tohi-Tapu, ʼe kau kiai te fakatuʼutuʼu ʼaē ke tokoni ki te hahaʼi ke nātou ʼiloʼi te ʼAtua moʼoni. (Ekesote 20:​2-7; 34:​1-7; Isaia 52:6) Neʼe akoʼi e Sesu Kilisito tana ʼu tisipulo ke nātou faikole “ke tāpuhā” te huafa ʼo tana Tāmai, ke nātou taupau tona ʼuhiga taputapu, pe ko tona ʼuhiga maʼoniʼoni. (Mateo 6:9) ʼE maʼu tuʼa 7 000 tupu te huafa ʼo te ʼAtua ʼi te Tohi-Tapu. ʼE loto e te ʼAtua ke ʼiloʼi e te hahaʼi te huafa ʼaia pea mo te ʼu kalitate ʼo Ia ʼaē ʼe ʼoʼona te huafa ʼaia.​—Malakia 1:​11.

5. Neʼe fakaliliu feafeaʼi e ʼihi ʼu hahaʼi fakaliliu te huafa ʼo te ʼAtua?

⁵ Neʼe lahi te kau fakaliliu Tohi-Tapu neʼe nātou fakaʼapaʼapa ʼaupito ki te huafa ʼo te ʼAtua pea neʼe nātou fakaʼaogaʼi tuʼumaʼu ʼi tanatou fai fakaliliu. Ko ʼihi hahaʼi fakaliliu neʼe nātou leleiʼia te huafa ʼaē ko Iave. Ko ʼihi neʼe nātou fili te faʼahiga puʼaki ʼo te huafa ʼo te ʼAtua ʼi tanatou lea totonu, ʼaē ʼe tatau mo te meʼa ʼaē ʼe tuʼu ʼi te tohi faka Hepeleo, lagi ko te fakaʼaoga ʼaia ʼaē kua ʼiloʼi lelei talu mai fualoa. ʼE fakaʼaogaʼi e te Tohi-Tapu Les Saintes Écritures — Traduction du monde nouveau te huafa ʼo Sehova ʼo tuʼa 7 210.

6. (a) ʼI te ʼu taʼu pe ʼaenī, koteā te meʼa ʼaē neʼe fai e te hahaʼi fakaliliu ʼo ʼuhiga mo te huafa ʼo te ʼAtua? (b) ʼE mafola feafeaʼi te faʼahiga fai ʼaia?

⁶ ʼI te ʼu taʼu pe ʼaenī kua hili, ʼe tuku e te ʼu hahaʼi fai fakaliliu ʼo te Tohi-Tapu te ʼu higoa ʼo te ʼu ʼatua pagani ohage ko Paale pea mo Moleke, kae kua tuputupu tanatou molehi te huafa totonu ʼo te ʼAtua moʼoni ʼi te ʼu fakaliliu ʼo tana Folafola. (Ekesote 3:​15; Selemia 32:35) ʼI te ʼu vaega ohage ko Mateo 6:9 pea mo Soane 17:​6, 26, ko te Tohi-Tapu faka Alepania ʼaē kua lahi tona tufa, ʼe ina fakaliliu te kupuʼi palalau faka Keleka “tou huafa” (ko tona faka ʼuhiga, te huafa ʼo te ʼAtua) ʼaki te kupu “ko koe,” ohage mai ia ʼe mole talanoa te ʼu vaega ʼaia ki he huafa. Ia Pesalemo 83:18, ko te ʼu Tohi-Tapu The New English Bible pea mo Today’s English Version neʼe nā pulihi te huafa ʼo te ʼAtua pea mo te ʼu manatu fuli ʼaē ʼe feala ke nātou fakahā ʼe ʼi ai te huafa ʼo te ʼAtua. Logope la ko te huafa ʼo te ʼAtua ʼe hā ʼi te ʼu fakaliliu ʼāfea ʼo te Tauhi ʼĀfea ʼi te ʼu lea ʼe lahi, ko te ʼu fakaliliu ʼo te temi ʼaenī ʼe nātou tautau molehi te huafa ʼo te ʼAtua peʼe nātou talanoa kiai ʼi te ʼu kiʼi nota pe. ʼE fai te faʼahi ʼaia ʼi te lea Fakapilitānia, pea mo te tahi ʼu lea ʼo te Eulopa, mo Afelika, mo te Potu Toga ʼo Amelika, mo Initia, pea mo te ʼu motu ʼo te Pasifika.

7. (a) Koteā ʼaē ʼe fai e ʼihi hahaʼi fai fakaliliu ʼo te ʼu Tohi-Tapu faka Afelika ʼo ʼuhiga mo te huafa ʼo te ʼAtua? (b) Koteā takotou manatu ʼo ʼuhiga mo te faʼahi ʼaia?

⁷ ʼE ʼi ai te tahi meʼa neʼe fai e te hahaʼi fai fakaliliu ʼo te Tohi-Tapu ʼo te ʼu lea ʼo Afelika. Neʼe mole gata ʼaki pe tanatou fetogi te huafa ʼo te ʼAtua ʼaki he ʼu higoa faka tuʼulaga ʼo te Tohi-Tapu, ohage ko te ʼAtua peʼe ko te ʼAliki, kae neʼe nātou fakahū te ʼu higoa neʼe toʼo mai te ʼu akonaki faka lotu ʼo tonatou fenua. ʼI te Tohi-Tapu ʼo te The New Testament and Psalms in Zulu (ʼo te taʼu 1986), ko te higoa faka tuʼulaga ʼaē ko ʼAtua (uNkulunkulu) neʼe fakaʼaoga tahi mo te higoa (uMvelinqangi) ʼaē ʼe mahino kiai te kau Zoulous, ʼe faka ʼuhiga ki ‘te kui lahi ʼaē neʼe tauhi kiai te ʼu kui fuli.’ Ko te alatike ʼo te nusipepa The Bible Translator, ʼo ʼOketopeli 1992, neʼe ina ʼui ʼi te lolotoga teuteuʼi ʼo te Tohi-Tapu ʼi te lea faka Chichewa, ʼaē ʼe tonu ke fakahigoa ko te Buku Loyera, neʼe fakaʼaogaʼi e te hahaʼi fai fakaliliu te kupu Chauta ohage ko he huafa moʼo fetogi ʼo te huafa ko Sehova. Neʼe fakamahino e te alatike ko te higoa Chauta, ʼe ko “te ʼAtua ʼaē neʼe nātou ʼiloʼi pea mo tauhi kiai talu mai fualoa.” Tahi ʼaē meʼa, tokolahi ia nātou ʼe nātou toe tauhi foki ki te ʼu laumālie ʼo te kau mate. ʼE faikole te hahaʼi ki “te Māʼoluga,” tatau aipe pe koteā te higoa ʼaē ʼe nātou fakaʼaogaʼi ki “te Māʼoluga” ʼaia. ʼE moʼoni koa la te ʼui ʼaē, kapau ʼe faikole te hahaʼi ki “te Māʼoluga,” tatau aipe pe koteā te higoa ʼaē ʼe nātou fakaʼaogaʼi ki “te Māʼoluga” ʼaia, ʼe tatau ia mo te huafa ʼo Sehova, tatau aipe pe koteā te faʼahiga tauhi ʼaē ʼe nātou fai kia te ia? Kailoa ia! (Isaia 42:8; 1 Kolonito 10:20) Ko te fetogi ʼo te huafa ʼo te ʼAtua ʼaki he tahi meʼa, ke manatu ai te hahaʼi ʼe moʼoni te ʼu meʼa ʼaē kua fualoa tanatou tui kiai, ʼe mole tokoni anai kia nātou ke nātou fakaōvi ki te ʼAtua moʼoni.

8. He koʼe koa neʼe mole fakaiku noaʼi te fakatuʼutuʼu ʼa te ʼAtua ke ʼiloʼi tona huafa?

⁸ Neʼe mole fetogi peʼe fakaiku noaʼi e te ʼu meʼa fuli ʼaia te fakatuʼutuʼu ʼa Sehova ke ʼiloʼi tona huafa. ʼI te ʼu lea ʼo te Eulopa, mo Afelika, mo Amelika, ʼi te Potu Hahake, pea mo te ʼu motu ʼo te tai, ʼe kei fakaʼaogaʼi te ʼu tuʼuga Tohi-Tapu ʼe tuʼu ai te huafa ʼo te ʼAtua. ʼE toe ʼi ai foki mo te toko 5 400 000 kau Fakamoʼoni ʼa Sehova ia fenua pea mo telituale e 233, ʼaē neʼe nātou fakaʼaogaʼi fakatahi ia hola e tahi miliale tupu ʼi te taʼu, moʼo talanoa ki te hahaʼi ʼo ʼuhiga mo te huafa pea mo te fakatuʼutuʼu ʼa te ʼAtua moʼoni. ʼE nātou tā pea mo tufa te ʼu Tohi-Tapu​—ʼe tuʼu ai te huafa ʼo te ʼAtua—​ʼi te ʼu lea ʼe palalauʼi e te ʼu hahaʼi ʼe toko 3 600 000 000 tupu ʼi te kele, ʼo kau kiai te lea Fakapilitānia, faka Siaina, faka Lusia, faka Sepania, faka Potukalia, mo Fakafalani, pea mo faka Holani. Neʼe nātou toe tā mo te ʼu tohi ki te ako ʼo te Tohi-Tapu ʼi te ʼu lea ʼe palalauʼi e te tokolahi ʼo te hahaʼi ʼi te malamanei. ʼE mole kei tuai, pea fai anai e te ʼAtua he meʼa ʼe ina fakahoko katoa ai tana ʼui ʼaē ‘ ʼe ʼiloʼi anai e te ʼu puleʼaga ko ia ko Sehova.’​—Esekiele 38:23.

Mokā Mulimuli Te Fakaliliu Ki Te ʼu Akonaki ʼAē ʼe Tui Kiai Te Kau Fai Fakaliliu

9. ʼE fakahā feafeaʼi e te Tohi-Tapu te maʼua mamafa ʼo te hahaʼi ʼaē ʼe nātou fakaʼaogaʼi te Folafola ʼa te ʼAtua?

⁹ ʼE ko he gāue lahi ʼaē ʼe tonu ke fai e nātou ʼaē ʼe nātou fakaliliu te Folafola ʼa te ʼAtua pea mo nātou ʼaē ʼe nātou akoʼi. Neʼe ʼui fēnei e te ʼapositolo ko Paulo ʼo ʼuhiga mo tona minisitelio pea mo te minisitelio ʼo tona ʼu kaugā gāue: “Kua tou līaki te ʼu meʼa fakafūfū ʼaē ʼe tou ufiufi ai, ʼo mole tou haʼele fakakākā, ʼo mole tou kākāʼi te folafola ʼa te ʼAtua, kae ʼaki tatatou fakahā te moʼoni, ʼo tou fakahā totatou lelei ki te leʼo ʼo loto ʼo te tagata fuli pe ia muʼa ʼo te ʼAtua.” (2 Kolonito 4:⁠2) Ko te faka ʼuhiga ʼo te kupu kākāʼi, ʼe ko te ʼulihi ʼo fakafio mo he meʼa kehe, peʼe ko he meʼa ʼe mālalo age. Ko te ʼapositolo ko Paulo neʼe mole hage ko te kau tagata tauhi ōvi heʼe faitotonu ʼo Iselaele ʼi te temi ʼo Selemia, ʼaē neʼe fakatonutonuʼi nātou e Sehova ʼuhi ko tanatou faka mafola tanatou ʼu manatu ʼa nātou totonu, kae mole ko te ʼu meʼa ʼaē neʼe ʼui e te ʼAtua. (Selemia 23:16, 22) Kae koteā te meʼa ʼaē neʼe hoko ʼi totatou temi?

10. (a) Neʼe lave feafeaʼi te tahi ʼu manatu ki te hahaʼi fai fakaliliu ʼo totatou temi, kae neʼe mole ko te agatonu ʼaē ki te ʼAtua? (b) Koteā te gāue ʼaē neʼe mole nātou fakahoko fakalelei?

¹⁰ Lolotoga te Lua Tau Faka Malamanei, neʼe gāue tahi te hahaʼi fai teolosia pea mo te kau pasitea mo te puleʼaga Nasi ʼi Siamani, moʼo tā te “Tauhi Foʼou” ʼaē neʼe nātou toe vakaʼi, pea ʼi te Tohi-Tapu ʼaia neʼe molehi ai te ʼu manatu lelei fuli ʼo ʼuhiga mo te kau Sutea, pea mo te ʼu fakamatala fuli ʼaē ʼe nātou ʼui ai ʼe hifo mai ia Sesu Kilisito mai te kau Sutea. Mole heʼeki fualoa, neʼe ko te hahaʼi fai fakaliliu ʼo te New Testament and Psalms: An Inclusive Version, neʼe kehe age tanatou fakaliliu, he neʼe nātou faiga ke nātou pulihi te ʼu manatu fuli ʼaē ʼe nātou fakahā ai neʼe ko te kau Sutea ʼaē neʼe nātou matehi ia Kilisito. Tahi ʼaē meʼa, neʼe manatu te hahaʼi fai fakaliliu ʼaia ʼe fiafia anai te hahaʼi fafine mo kapau ʼe ʼui ko te ʼAtua, ʼe mole ko te Tāmai, kae ko te Tāmai-Faʼe pea kapau ʼe ʼui ʼo ʼuhiga mo Sesu, ʼe mole ko te ʼAlo ʼo te ʼAtua kae ko tana Tamasiʼi. (Mateo 11:27) ʼI te faʼahi ʼaia, neʼe nātou fetogi ai te pelesepeto ʼaē ʼo te fakalogo ʼa te hahaʼi fafine ki tonatou ʼu ʼohoana, pea mo te fakalogo ʼaē ʼa te fānau ki te ʼu mātuʼa. (Kolose 3:​18, 20) ʼE hā lelei mai, ko nātou ʼaē neʼe nātou fai te ʼu fakaliliu ʼaia, neʼe mole nātou manatu tahi mo te ʼapositolo ko Paulo, ke mole ina ‘kākāʼi te folafola ʼa te ʼAtua.’ Kua galo kia nātou te gāue moʼoni ʼa ia ʼaē ʼe fakaliliu, heʼe nātou gāue ohage ko he ʼu hahaʼi ʼe ʼa nātou totonu te tohi ʼaia, ʼo nātou tā he ʼu tohi ʼo fakaʼaogaʼi te ʼiloa ʼo te Tohi-Tapu moʼo lagolago ki tanatou ʼu manatu.

11. ʼE fakafeagai feafeaʼi te ʼu akonaki ʼo te Keletiate mo te meʼa ʼaē ʼe ʼui e te Tohi-Tapu ʼo ʼuhiga mo te nefesi pea mo te mate?

¹¹ ʼI te agamāhani, ʼe akoʼi e te ʼu ʼēkelesia ʼo te Keletiate ko te nefesi ʼe fakapulipuli, ʼe mavae ʼi te sino mokā mate, pea ʼe maʼuli tuputupua. Kae ko te ʼu fakaliliu ʼāfea ʼo te Tohi-Tapu ʼi te ʼu lea kehekehe, ʼe ʼui lelei ai ko te tagata mo te ʼu manu ʼe ko he ʼu nefesi, pea ko te nefesi ʼe mate. (Senesi 12:5; 36:6; Faka au 31:28; Sake 5:​20) ʼE ko he faigataʼa ʼaia ki te kau takitaki lotu.

12. Neʼe feafeaʼi te fakaliliu hala e te tahi ʼu Tohi-Tapu foʼou te ʼu moʼoni tāfito ʼo te Tohi-Tapu?

¹² ʼI te temi nei, ko ʼihi ʼu fakaliliu foʼou ʼe nātou fakaliliu hala te ʼu moʼoni ʼaia. ʼO feafeaʼi? ʼE mole nātou fakaliliu fakahagatonu te kupu faka Hepeleo neʹphesh (nefesi) ʼi ʼihi ʼu vaega. Ia Senesi 2:​7, neʼe nātou ʼui ko te ʼuluaki tagata “neʼe kamata maʼuli” (kae mole nātou ʼui “neʼe liliu ko he nefesi maʼuli”). Peʼe feala ke nātou ʼui ʼo ʼuhiga mo te manu ko he “meʼa maʼuli” kae mole ko he “nefesi.” (Senesi 1:​21) ʼI te ʼu vaega, ohage ko Esekiele 18:​4, 20, ʼe nātou ʼui ko “he tahi” (kae mole ko “te nefesi”) ʼaē ʼe mate. ʼE lagi feala ke fakamahino e te tagata fakaliliu tana ʼu fakaliliu ʼaia. Kae koteā te tokoni ʼaē ʼe nātou foaki kia nātou ʼaē ʼe nātou kumi fakamalotoloto te moʼoni, ʼaē kua nātou ʼiloʼi lelei te ʼu akonaki ʼo te Keletiate ʼaē mole fakatafito ki te Tohi-Tapu?b

13. Neʼe fufū feafeaʼi e te tahi ʼu Tohi-Tapu te fakatuʼutuʼu ʼa te ʼAtua ʼo ʼuhiga mo te kele?

¹³ ʼI tanatou faiga ʼaē ke nātou lagolago ki tanatou akonaki ʼaē ʼe ʼolo te hahaʼi fuli ki te lagi, ʼe toe faigaʼi e te kau fai fakaliliu​—peʼe ko te kau teolosia ʼaē neʼe nātou toe vakaʼi te gāue ʼa te hahaʼi fakaliliu—​ke nātou fufū te meʼa ʼaē ʼe ʼui e te Tohi-Tapu ʼo ʼuhiga mo te fakatuʼutuʼu ʼa te ʼAtua ki te kele. Ia Pesalemo 37:​11, ʼe tou lau ʼi te tahi ʼu Tohi-Tapu ko te agavaivai ʼe ina maʼu anai “te fenua.” Ko te kupu “fenua” ʼe lagi ko te fakaliliu ʼo te kupu (ʼeʹrets) ʼaē ʼe fakaʼaogaʼi ʼi te vaega faka Hepeleo. Kae ʼe lahi age te ʼu fetogi ʼaē neʼe fai e te Tohi-Tapu Today’s English Version (ʼaē neʼe fakaʼaogaʼi moʼo fakaliliu ʼi te tahi ʼu lea). Logope la ko te Tohi-Tapu ʼaia ʼe ina fakaliliu tuʼa 17 ʼi te Evaselio ʼa Mateo, te kupu faka Keleka ge ʼaē ko te kupu “kele,” kae ia Mateo 5⁠:5 ʼe ina fetogi te kupu “kele” ʼo ina ʼui ko “te meʼa ʼaē neʼe fakapapauʼi mai e te ʼAtua.” ʼE manatu ai te hahaʼi ʼo te ʼēkelesia ki te lagi. ʼE mole fakahā fakalelei age kia nātou, ʼi te Faiakonaki ʼi te Moʼuga, neʼe ʼui e Sesu Kilisito ko te hahaʼi agamālū, mo agavaivai ʼaē ʼe nātou “maʼu [anai] te kele.”

14. Koteā te tahi ʼu manatu ʼaē neʼe nātou uga ai te tahi ʼu fai fakaliliu ʼo te Tohi-Tapu, ʼe hā ai tanatou manatu pe ʼaē kia nātou totonu?

¹⁴ ʼE mahino ia ʼe fai te tahi ʼu fakaliliu ʼo te Tohi-Tapu ʼaki te manatu ʼaē, ke tokoni ki te hahaʼi fai faka mafola ke nātou maʼu honatou totogi lahi. ʼE moʼoni ʼe ʼui fēnei e te Tohi-Tapu: “ ʼE tau mo feʼauga ke maʼu e te tagata gāue tona totogi.” (1 Timoteo 5:​18) Kae ia 1 Timoteo 5:​17, ʼaē ʼe ʼui ai ko te ʼu tagata ʼāfea ʼaē ʼe nātou takitaki lelei ʼe “tau mo he fakaʼapaʼapa lahi,” ko te fakaʼapaʼapa pe e tahi ʼaē ʼe nātou manatu ʼe tau ke talanoa kiai, ʼe ko te faʼahi ʼo te paʼaga. (Vakaʼi ia 1 Petelo 5:2.) Koia, ʼe ʼui ai ʼi te Tohi-Tapu The New English Bible ko te ʼu tagata ʼāfea ʼaia “ ʼe tonu ke ʼiloʼi ʼe tau mo feʼauga ke totogi tuʼa lua,” pea ʼe ʼui e te Tohi-Tapu Contemporary English Version ʼe “tau ke totogi ʼo tuʼa lua age.”

Tou Agatonu ʼo Lagolago Ki Te Folafola ʼa Te ʼAtua

15. ʼE lava feafeaʼi hatatou ʼiloʼi te Tohi-Tapu ʼaē ʼe tonu ke tou fakaʼaogaʼi?

¹⁵ Koteā te faka ʼuhiga ʼo te ʼu meʼa ʼaia kia ia ʼaē ʼe ina lau te Tohi-Tapu pea mo nātou ʼaē ʼe nātou fakaʼaogaʼi te Tohi-Tapu moʼo akoʼi ki te hahaʼi? ʼI te ʼu lea ʼaē ʼe lahi tona palalauʼi e te hahaʼi, ʼe lahi te ʼu fakaliliu ʼo te Tohi-Tapu, ʼe feala ke koutou filifili. Koutou maʼu he fakasiosio poto ʼi takotou fili te Tohi-Tapu ʼaē ka koutou fakaʼaogaʼi. (Tāʼaga Lea 19:8) Kapau ʼe mole fakahā lelei e he Tohi-Tapu te ʼuhiga totonu ʼo te ʼAtua​—ʼo ina molehi tona huafa ʼi tana Folafola—​neʼe lagi fakaliliu hala e te hahaʼi fakaliliu te tahi ʼu koga ʼo te Tohi-Tapu. Kapau ʼe koutou lotolotolua ʼo ʼuhiga mo te moʼoni ʼo te fakaliliu, koutou faiga ke koutou fakatatau mo he ʼu fakaliliu ʼe ʼāfea age. Kapau ʼe koutou akoʼi ki te hahaʼi te Folafola ʼa te ʼAtua, koutou fakaʼaogaʼi te ʼu Tohi-Tapu ʼaē ʼe pipiki lelei ki te ʼu ʼuluaki tohi faka Hepeleo pea mo faka Keleka.

16. ʼE lava feafeaʼi hatatou fakahā takitokotahi tatatou agatonu ʼi tatatou fakaʼaogaʼi te Folafola ʼaē ʼe haʼu mai te ʼAtua?

¹⁶ Ko tatou fuli ʼe tonu ke tou agatonu ki te Folafola ʼa te ʼAtua. ʼE tou fai te faʼahi ʼaia, ʼo tou tokakaga ʼo ʼuhiga mo te ʼu meʼa ʼaē ʼe tohi ʼi loto, ke feala ke tou fakaʼaogaʼi he temi ʼi te ʼaho fuli moʼo lau ʼo te Tohi-Tapu. (Pesalemo 1:​1-3) ʼE tou fai te faʼahi ʼaia ʼo tou fakaʼaogaʼi katoa ʼi totatou maʼuli te ʼu meʼa ʼaē ʼe ʼui ai, ʼo tou ako ke tou fakaʼaogaʼi tana ʼu pelesepeto pea mo tana ʼu faʼifaʼitaki, ko he tafitoʼaga ʼaia moʼo fai ʼo he ʼu puleʼaki lelei. (Loma 12:2; Hepeleo 5:​14) ʼE tou fakahā ʼe tou lagolago agatonu ki te Tohi-Tapu, ʼi tatatou faka mafola fakamalotoloto ki te hahaʼi. ʼE tou fai te faʼahi ʼaia ʼi totatou ʼuhiga faiako, ʼi tatatou fakaʼaogaʼi lelei te Tohi-Tapu, ʼo mole tou pikohi peʼe tou hilifaki he tahi ʼu manatu ki te meʼa ʼaē ʼe ina ʼui, ke ʼalutahi mo tatatou ʼu manatu. (2 Timoteo 2:​15) Ko te ʼu meʼa ʼaē neʼe fakakikite e te ʼAtua, ʼe hoko moʼoni anai. ʼE agatonu ʼi tana fakahoko tana Folafola. Tou fakaʼamu ke tou agatonu ʼo lagolago ki te Tohi-Tapu.

[Nota ʼi te lalo pasina]

ʼE Kei Koutou Manatuʼi Koa?

◻ Koteā te ʼu manatu ʼaē neʼe lave ki te gāue ʼo te fakaliliu ʼo te Tohi-Tapu ʼi totatou temi?

◻ He koʼe ʼe mole fakaiku noaʼi e te tahi ʼu Tohi-Tapu ʼo totatou temi te fakatuʼutuʼu ʼa te ʼAtua ʼo ʼuhiga mo tona huafa?

◻ Neʼe feafeaʼi te fakaliliu hala e te tahi ʼu Tohi-Tapu te ʼu moʼoni tāfito ʼo te tohi ʼaia, ʼo ʼuhiga mo te nefesi, mo te mate, pea mo te kele?

◻ ʼE feala ke tou fakahā feafeaʼi ʼe tou agatonu ʼo lagolago ki te Folafola ʼa te ʼAtua?

[Paki ʼo te pasina 16]

Ko te Tohi-Tapu fea ʼaē ʼe tonu ke koutou fakaʼaogaʼi?