‘Ko He Fakamoʼoni Ki Te ʼu Puleʼaga Kātoa’
“ ʼE koutou liliu anai ko haku kau fakamoʼoni . . . ʼo kaku ki te potu taupotu ʼo te kele.”—Gaue 1:8, MN.
1. Ko te temi fea, pea kofea ʼaē neʼe logo ai te kau tisipulo ki te fakakikite ʼaē ʼe tuʼu iā Mateo 24:14?
TOKOLAHI iā tatou kua tou ʼiloʼi lelei te ʼu palalau ʼa Sesu ʼaē iā Mateo 24:14. Pea ʼe ko he fakakikite taulekaleka ia! Koutou fakakaukauʼi age muʼa pe neʼe koteā ʼapē te manatu ʼa te ʼu tisipulo ʼi te temi ʼaē neʼe nātou logo ai ki te ʼu palalau ʼaia, ʼi te taʼu 33 ʼo totatou temi! Neʼe nonofo te kau tisipulo mo Sesu ia taʼu e tolu, pea ʼi te lakaga ʼaia neʼe nātou kaugā ʼolo mo ia ki Selusalemi. Nʼe nātou sisio ki tana ʼu milakulo pea mo logo ki tana ʼu faiakonaki. Logola tanatou leleiʼia te ʼu moʼoni maʼuhiga ʼaē neʼe ina akoʼi age kiā nātou, kae neʼe mahino kiā nātou ʼe mole ko te hahaʼi fuli ʼaē ka nātou leleiʼia anai ia te ʼu moʼoni ʼaia. Neʼe ʼi ai te ʼu fili mālohi ʼa Sesu.
2. Ko te ʼu tuʼutāmaki fea pea mo te ʼu fihifihia fea ʼaē ka tau anai mo te ʼu tisipulo?
2 ʼI te Moʼuga ʼo Oliveto, ko Sesu neʼe nofo ai mo tana ʼu tisipulo e toko fā, ʼo nātou fakalogo fakalelei ki tana tala age ʼaē ʼe tau anai mo nātou ia te ʼu tuʼutāmaki pea mo te ʼu fihifihia. Neʼe kua tala age e Sesu ʼe matehi anai ia ia. (Mateo 16:21) ʼI te lakaga ʼaia, neʼe ina fakamahino lelei age kiā nātou ʼe fakatagaʼi anai mo nātou. Neʼe ina ʼui fēnei: “ ʼE ʼave anai koutou ki te mamahi pea ʼe matehi anai koutou, pea ʼe fehiʼaʼinaʼi anai koutou e te ʼu puleʼaga kātoa ʼuhi ko toku huafa.” Pea ʼe mole gata ai, heʼe fakahalaʼi anai te tokolahi e te kau polofeta loi. Ko ʼihi ʼe nātou higa anai pea mo felavakiʼiʼaki pea mo fefehihiʼaʼaki. Ko “te tokolahi” ʼe mole kei nātou ʼoʼofa anai ki te ʼAtua pea mo tana Folafola.—Mateo 24:9-12, MN.
3. He koʼe ʼe mata faikehe te ʼu palalau ʼaē neʼe fai e Sesu iā Mateo 24:14?
3 Neʼe ʼuluaki talanoa ia Sesu ki te ʼu ʼaluʼaga ʼaia, pea neʼe ina fai leva te ʼu palalau neʼe lagi punamaʼuli ai tana ʼu tisipulo. Neʼe ina ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mateo 24:14, MN ) Ei, ko te gāue ʼaē neʼe kamata fai e Sesu ʼi Iselaele—te “fakamoʼoni ki te moʼoni”— ʼe mafola anai ʼo aʼu ki te ʼu potu taupotu ʼo te kele. (Soane 18:37, MN ) Neʼe ko he lea faka polofeta fakaofoofo! ʼE mole faigafua anai te hoko atu ʼo te gāue ʼaia ki “te ʼu puleʼaga kātoa,” pea ʼe ko he milakulo anai mo kapau ʼe lava hoko ia te faʼahi ʼaia logola tanatou felāveʼi anai mo te ‘fehiʼaʼinaʼi ʼa te ʼu puleʼaga kātoa.’ Ka hoko anai te toe gāue lahi ʼaia, pea ʼe mole ko te pule faʼitaliha pe anai ʼa Sehova pea mo tona mālohi ʼaē ka vikiʼi, kae ʼe toe vikiʼi anai mo tona ʼofa, tona manavaʼofa, pea mo tana faʼa kātaki. Tahi ʼaē meʼa, ʼe fakahā ai anai e tana ʼu kaugana ia tanatou tui pea mo tanatou fakalogo ʼaē kiā te ia.
4. Ko ai ʼaē neʼe fakatotonu ki ai te gāue ʼaē ko te fai fagonogono, pea koteā te fakaloto mālohi ʼaē neʼe foaki e Sesu kiā nātou?
4 Neʼe fakahā lelei e Sesu ki tana ʼu tisipulo ʼe ʼi ai te gāue maʼuhiga ʼe tonu ke nātou fai. ʼI muʼa ʼo tana hake ki selo, neʼe hā ia Sesu kiā nātou ʼo ʼui maʼana: “ ʼE koutou maʼu anai te mālohi mokā hifo atu anai te laumālie maʼoniʼoni kiā koutou pea ʼe koutou liliu anai ko haku kau fakamoʼoni ʼi Selusalemi pea mo Sutea kātoa pea mo Samalia ʼo kaku ki te potu taupotu ʼo te kele.” (Gaue 1:8, MN ) Ko ʼihi ʼe ʼōmai anai ʼo lagolago ki te fai ʼo te gāue. Kae neʼe mole kaugamālie ia te ʼu tisipulo. Koia neʼe nātou fiafia ʼi tanatou ʼiloʼi ʼaē ko te mālohi ʼo te laumālie maʼoniʼoni ʼo te ʼAtua ʼe tokoni anai kiā nātou ke nātou fakahoko te gāue fakaʼatua ʼaia!
5. Koteā ʼaē neʼe mole ʼiloʼi e te ʼu tisipulo ʼo ʼuhiga mo te gāue fai faka mafola?
5 Neʼe mahino ki te ʼu tisipulo neʼe tonu ke nātou faka mafola ia te logo lelei pea mo “fai ni ʼu tisipulo ʼi te ʼu hahaʼi ʼo te ʼu fenua fuli pe.” (Mateo 28:19, 20, MN ) Kae neʼe mole nātou ʼiloʼi peʼe hoko feafeaʼi anai te fai faka mafola, pea neʼe mole nātou ʼiloʼi peʼe ko ʼafea ʼaē ka hoko ai te fakaʼosi. ʼO toe feiā pe mo tatou. Ko te ʼu faʼahi ʼaia ʼe ko Sehova tokotahi pe ʼe ina ʼiloʼi. (Mateo 24:36) Kapau kua fakafuafua e Sehova kua feʼauga ia te faka mafola ʼo te logo lelei, ʼe ina fakaʼauha anai te ʼu faʼahiga meʼa ʼo te tuʼu agakovi ʼaenī. ʼE hoki mahino ai leva ki te kau Kilisitiano moʼoni ʼe kua feʼaugaʼia e Sehova ia te gāue fai faka mafola. Neʼe mole feala ki te ʼu ʼuluaki tisipulo ke nātou ʼiloʼi peʼe feafeaʼi anai te lahi ʼo te faka mafola ʼi te temi fakaʼosi.
Ko Te Fakamoʼoni ʼi Te ʼUluaki Sēkulō
6. Koteā ʼaē neʼe hoko ʼi te Penikosite ʼo te taʼu 33 ʼo totatou temi pea ki muli age?
6 ʼI te ʼuluaki sēkulō, neʼe fua lelei ia te faka mafola ʼo te Puleʼaga pea mo te fai ʼo te ʼu tisipulo. ʼI te ʼaho ʼo te Penikosite ʼo te taʼu 33 ʼo totatou temi, neʼe nonofo te toko 120 tisipulo ʼi te kogafale fata ʼi Selusalemi. Neʼe hifo ifo kiā nātou ia te laumālie maʼoniʼoni ʼo te ʼAtua, pea neʼe fai e te ʼapositolo ko Petelo ia te akonaki fakaloto mālohi, ʼo ina fakamahino age kiā nātou ia te ʼuhiga ʼo te milakulo ʼaia, pea neʼe ko te toko 3 000 neʼe nātou tui pea mo nātou papitema. Kae neʼe mole gata ai. Logola te ʼu faiga ʼa te kau takitaki lotu moʼo tāʼofi ia te faka mafola ʼo te logo lelei, kae ‘ ʼi te ʼaho fuli, neʼe hoko atu pe e Sehova tana hilifaki ki te ʼu tisipulo ia te hahaʼi ʼaē kua hāofaki.’ Mole tuai, “neʼe liliu tonatou kaugamālie ko te toko nima afe.” Ki muli age, “neʼe haga hilifaki aipe te hahaʼi ʼaē neʼe tui ki te ʼAliki, ko he ʼu tagata pea mo he ʼu fafine tokolahi.”—Gaue 2:1-4, 8, 14, 41, 47; 4:4; 5:14, MN.
7. He koʼe neʼe ko he meʼa fakatalakitupua ia te tafoki ʼa Kolonelio?
7 Neʼe hoko te tahi meʼa fakatalakitupua ʼi te taʼu 36 ʼo totatou temi—ko te tafoki pea mo te papitema ʼa te tagata Senitile ko Kolonelio. Neʼe taki e Sehova ia te ʼapositolo ko Petelo ke ʼalu ki te tagata ʼaia neʼe manavasiʼi ki te ʼAtua, pea ʼi te temi ʼaia neʼe fakahā ai e Sehova ko te fakatotonu ʼa Sesu ʼaē ke “fai ni ʼu tisipulo ʼi te hahaʼi ʼo te ʼu fenua fuli pe” neʼe mole gata pe ki te kau Sutea. (Gaue 10:44, 45) Neʼe tali feafeaʼi e te ʼu tēhina takitaki ia te fakatuʼutuʼu foʼou ʼaia? ʼI te mahino ʼaē ʼa te kau ʼapositolo pea mo te ʼu tagata ʼāfea ʼi Sutea ko te logo lelei neʼe tonu ke tala ki te hahaʼi ʼaē neʼe mole ko he kau Sutea, ʼaē neʼe nonofo ʼi te ʼu puleʼaga, neʼe nātou faka kolōlia ki te ʼAtua. (Gaue 11:1, 18) Lolotoga te temi ʼaia, neʼe haga tuputupu aipe ia te fai faka mafola ʼi te lotolotoiga ʼo te kau Sutea. Ki muli age, lagi ʼi te taʼu 58 ʼo totatou temi, ʼo hilifaki ki te kau Senitile ʼaē neʼe tafoki ki te lotu faka Kilisitiano, neʼe tafoki mai mo ‘te ʼu lauʼi afe hahaʼi [Sutea].’—Gaue 21:20.
8. ʼE malave feafeaʼi te logo lelei ki te hahaʼi?
8 Logola neʼe fakatalakitupua ia te tuputupu ʼa te kau Kilisitiano ʼo te ʼuluaki sēkulō, kae ʼe mole tonu ke galo kiā tatou ia te hahaʼi ʼaia. Ko te logo faka Tohi-Tapu ʼaē neʼe nātou logo kiai neʼe mālohi. (Hepeleo 4:12) Neʼe ina fetogi kātoa tonatou maʼuli. Neʼe nātou fakamaʼa tonatou maʼuli, neʼe nātou kofuʼi te ʼulugaaga foʼou, pea neʼe nātou toe felogoi lelei mo te ʼAtua. (Efeso 4:22, 23) ʼE hoko feiā ʼi totatou temi. Ko te hahaʼi ʼaē ʼe nātou tali ia te logo lelei, ʼe nātou maʼu ia te ʼamanaki taulekaleka ʼo he maʼuli heʼegata.—Soane 3:16.
ʼE Nātou Kaugā Gāue Mo Te ʼAtua
9. Ko te pilivilesio pea mo te maʼua fea ʼaē neʼe mahino ki te kau ʼuluaki Kilisitiano ʼe tonu ke nātou fai?
9 Neʼe mole lau e te kau ʼuluaki Kilisitiano ko te tuputupu ʼo te gāue neʼe tupu ʼuhi ko nātou totonu. Neʼe nātou ʼiloʼi ko tanatou gāue faka minisi, neʼe fua lelei he neʼe lagolago kiā nātou ia te “mafimafi o te Laumalie-Maonioni.” (Loma 15:13, 19) Ko Sehova ʼaē neʼe ina fakatuputupu te gāue ʼi te faʼahi fakalaumālie. Neʼe mahino ki te kau Kilisitiano ʼaia, neʼe foaki age te pilivilesio pea mo te maʼua ke nātou “kauga gaue [mo] te Atua.” (1 Kolonito 3:6-9) Koia, ʼo mulimuli ki te tokoni ʼa Sesu, neʼe nātou gāue kinakina ʼi te gāue ʼaē neʼe fakatotonu age ke nātou fai.—Luka 13:24.
10. Koteā te ʼu gāue neʼe fai e ʼihi ʼi te kau ʼuluaki Kilisitiano moʼo fagonogono ki te ʼu puleʼaga fuli?
10 ʼI tona ʼuhiga ‘ ʼapositolo ʼo te ʼu puleʼaga,’ neʼe folau ia Paulo iā kilometa e tolu ʼi te fenua pea mo te tai, ʼo fakatuʼu te ʼu tuʼuga kokelekasio ʼi te potu fenua Loma ʼo Asia pea mo Keleka. (Loma 11:13) Neʼe toe folau ki Loma pea mo lagi Sepania. ʼAki te temi, ko te ʼapositolo ko Petelo ʼaē neʼe fakatotonu age ke ina “fagonogono [ia] te [logo lelei] . . . ki te hahai [ʼaē neʼe] silikosisio,” neʼe folau ki Papiloni, ʼaē ʼi te temi ʼaia neʼe kaugamālie te kau Sutea ʼaē neʼe nonofo ai. (Kalate 2:7-9; 1 Petelo 5:13) ʼI te kaugamālie ʼaē neʼe kau ki te gāue ʼo te ʼAliki, neʼe ʼi ai te ʼu fafine ohage ko Tolufano mo Tufosa. Ko te tahi fafine, neʼe higoa ko Pelesita, neʼe ʼui neʼe “lahi tana gaue i te Aliki.”—Loma 16:12.
11. Neʼe tapuakina feafeaʼi e Sehova te ʼu faiga ʼa te ʼu tisipulo?
11 Neʼe tapuakina e Sehova te ʼu faiga ʼa nātou ʼaia pea mo ʼihi kau gāue faʼafai. Hili pe taʼu e 30 ki te fakakikite ʼaē e Sesu ʼe fai anai te fagonogono ki te ʼu puleʼaga fuli, neʼe tohi e Paulo ko te “logo lelei” neʼe “faka mafola ʼi te ʼu koga meʼa kātoa ʼaē neʼe fakatupu ʼi te lalo lagi.” (Kolose 1:23, MN ) Neʼe hoko mai koa te temi fakaʼosi? ʼE feala pe ke ʼui, ei. Neʼe hoko te temi fakaʼosi ki te kau Sutea ʼi te taʼu 70 ʼo totatou temi, ʼi te temi ʼaē neʼe fakaʼauha e te kautau Loma ia Selusalemi pea mo tona fale lotu. Kae neʼe fakatuʼutuʼu e Sehova ʼe fai anai te tahi fagonogono lahi ʼi muʼa ʼo tana fakaʼauha ia te ʼu faʼahiga meʼa ʼo te tuʼu ʼaenī ʼa Satana.
Ko Te Fagonogono ʼe Fai Iā ʼAho Nei
12. Neʼe mahino feafeaʼi te kau ʼuluaki Ako Tohi-Tapu ki te fakatotonu ʼo ʼuhiga mo te fai faka mafola?
12 Lolotoga te koga fakaʼosi ʼo te 19 sēkulō, hili kiai he temi loaloaga ʼaē neʼe mālohi ai ia te ʼapositasia, neʼe toe fakatuʼu ia te tauhi maʼa. Ko te kau Ako Tohi-Tapu, te higoa ʼo te kau Fakamoʼoni ʼa Sehova ʼi te temi ʼaia, neʼe nātou mahino lelei ki te fakatotonu ʼaē ke fai ni ʼu tisipulo ʼi te kele kātoa. (Mateo 28:19, 20) ʼI te taʼu 1914, neʼe ko te toko 5 100 neʼe kau mālohi ki te faka mafola ʼo te logo lelei, pea neʼe aʼu te logo ʼaia ki te ʼu fenua e 68. Kae ko te kau ʼuluaki Ako Tohi-Tapu ʼaia neʼe mole nātou mahino kātoa ki te ʼu palalau ʼaē iā Mateo 24:14. ʼI te fakaʼosi ʼo te 19 sēkulō, ko te Tohi-Tapu ʼaē neʼe talanoa ai ki te logo lelei peʼe ki te evaselio, neʼe fakaliliu pea mo tā e te ʼu sosiete faʼu Tohi-Tapu ʼi te ʼu lea kehekehe pea mo tufa ʼi te malamanei kātoa. Koia, lolotoga te ʼu taʼu, neʼe ʼui e te kau Ako Tohi-Tapu neʼe kua fai ia te fagonogono ki te ʼu puleʼaga.
13, 14. Koteā te fakamahino lelei ʼaē neʼe tā ʼi Te Tule Leʼo ʼo te taʼu 1928 ʼuhiga mo te finegalo pea mo te fakatuʼutuʼu ʼa te ʼAtua?
13 Neʼe foaki māmālie e Sehova ki tana ʼu kaugana he mahino lelei ʼo ʼuhiga mo tona finegalo pea mo tana fakatuʼutuʼu. (Tāʼaga Lea 4:18) Neʼe ʼui fēnei ʼi Te Tule Leʼo Fakapilitānia ʼo te ʼaho 1 ʼo Tesepeli 1928: “ ʼE feala koa ke tou ʼui ko te tufa ʼo te Tohi-Tapu kua ina fakahoko ia te fakakikite ʼo ʼuhiga mo te faka mafola ʼo te evaselio ʼo te puleʼaga? Kailoa! Logola te tufa ʼaia ʼo te Tohi-Tapu, kae ʼe kei ʼaoga pe ki te kiʼi kūtuga kau fakamoʼoni ʼa te ʼAtua ʼaē ʼi te kele, ke nātou tā he ʼu tohi moʼo fakamahino te [fakatuʼutuʼu] ʼa te ʼAtua pea mo nātou ʼolo ʼo ʼaʼahi te hahaʼi ʼaē neʼe nātou tuku ki ai te ʼu Tohi-Tapu. Kapau ʼe mole fai ia te potu ʼaia, ʼe mole feala anai ki te hahaʼi ke nātou ʼiloʼi kua ʼosi fakatuʼu ia te puleʼaga Faka Mesianike ʼi totatou temi.”
14 Neʼe toe ʼui ʼi te alatike ʼo Te Tule Leʼo: “ ʼI te taʼu 1920, . . . ko te kau Ako Tohi-Tapu neʼe kua nātou mahino lelei ki te fakakikite ʼa te ʼAliki ʼaē ʼe tuʼu iā Mateo 24:14. Koia neʼe mahino ai kiā nātou ko te ‘evaselio’ ʼaia ʼaē neʼe tonu ke faka mafola ʼi te malamanei kātoa moʼo fakamoʼoni ki te kau Senitile peʼe ko te ʼu puleʼaga fuli, neʼe mole ko he evaselio ʼo ʼuhiga mo he puleʼaga ʼe mole heʼeki fakatuʼu, kae neʼe ko he evaselio moʼo fakamoʼoni ʼe kua kamata ʼafio te Hau Mesianike ki te kele.”
15. Talu mai te taʼu 1920, neʼe feafeaʼi ia te mafola ʼo te gāue fai faka mafola?
15 Neʼe liliu ʼo kaugamālie ia te “kiʼi kūtuga kau fakamoʼoni” ʼaia ʼo te ʼu taʼu 1920. ʼI te ʼu taʼu ki muli age, neʼe nātou mahino ki “te toe hahaʼi tokolahi” ʼo te “tahi ʼu ōvi” pea neʼe nātou kamata tānaki nātou. (Apokalipesi 7:9, MN; Soane 10:16, MN ) Iā ʼaho nei, ko te toko 6 613 829 kau fai faka mafola ʼo te logo lelei ʼe nātou gāue ʼi te ʼu fenua e 235. ʼE ko he fakahoko taulekaleka ʼo te lea faka polofeta! Neʼe heʼeki hoko ki muʼa atu he faka mafola feiā ʼo “te logo lelei ʼaenī ʼo te puleʼaga.” Neʼe mole heʼeki he temi ʼi muʼa atu, neʼe tuputupu feiā ai ia te kaugamālie ʼa te ʼu kaugana agatonu ʼa Sehova ʼi te kele.—Mateo 24:14, MN.
16. Koteā ʼaē neʼe fakahoko ʼi te taʼu gāue kua hili? (Vakaʼi ʼi te pasina 27 ki te 30.)
16 Ko te kau Fakamoʼoni tokolahi ʼaia neʼe nātou gāue fakatahi lolotoga te taʼu gāue 2005. Ko hola e lauʼi miliale neʼe maʼu ʼi te faka mafola ʼo te logo lelei ʼi te ʼu fenua e 235. Neʼe fai te ʼu ʼaʼahi pea mo te ʼu ako Tohi-Tapu e lauʼi miliona. Neʼe fakahoko te gāue ʼaia e te kau Fakamoʼoni ʼa Sehova, ʼaē ʼe nātou foaki kātoa ia tonatou temi pea mo tonatou ʼu koloā moʼo faka mafola ia te Folafola ʼa te ʼAtua ki te hahaʼi. (Mateo 10:8) ʼAki te tokoni mālohi ʼo tona laumālie maʼoniʼoni, ʼe haga fakamālohiʼi e Sehova tana ʼu kaugana ke nātou fakahoko tona finegalo.—Sakalia 4:6.
Tou Gāue Mālohi Moʼo Fai He Fagonogono
17. Neʼe mulimuli feafeaʼi te ʼu kaugana ʼa Sehova ki te ʼu palalau ʼa Sesu ʼo ʼuhiga mo te faka mafola ʼo te logo lelei?
17 Logola kua hili teitei taʼu e 2 000 talu mai te ʼaho ʼaē neʼe ʼui ai Sesu ko te logo lelei ʼe faka mafola anai, kae ʼe kei mālohi aipe te faʼafai ʼa te hahaʼi ʼa te ʼAtua ʼi tanatou gāue ʼaia. ʼE tou ʼiloʼi ʼaki tatatou faʼa kātaki ʼo fai te meʼa ʼaē ʼe lelei, ʼe tou faʼifaʼitakiʼi ia te ʼu kalitātē ʼo Sehova ʼaē ko te ʼofa, te manavaʼofa, pea mo te faʼa kātaki. Ohage ko ia, ʼe mole tou loto ke fakaʼauha he tahi kae ʼe tou loto ki te hahaʼi ke nātou fakahemala pea mo felogoi mo Sehova. (2 Kolonito 5:18-20; 2 Petelo 3:9) ʼAki te tokoni ʼa te laumālie maʼoniʼoni, ko te kau Fakamoʼoni ʼa Sehova ʼe nātou haga faʼafai ʼo tala ia te logo lelei ʼo aʼu ki te ʼu potu taupotu ʼo te kele. (Loma 12:11) Ko te hahaʼi ʼi te ʼu potu fuli ʼe nātou tali ia te moʼoni pea mo nātou mulimuli ki te takitaki ʼofa ʼa Sehova. Koʼeni te ʼu faʼifaʼitaki.
18, 19. Ko ai te ʼu faʼifaʼitaki ʼaē ʼe feala ke koutou fakamatala neʼe nātou tali lelei ia te logo lelei?
18 Ko Charles neʼe ko te tagata gāue kele ʼi te potu uesite ʼo Kenia. ʼI te taʼu 1998, neʼe ina fakatau ia kilo pata e 8 000 pea neʼe fakapale ia ia ʼaki te pepa neʼe fakahā ai ko ia Te Tagata Gāue Kele Lelei ʼo Te Pata. ʼI te temi ʼaia, neʼe ina kamata ako ia te Tohi-Tapu. Neʼe mahino ai leva kiā ia, ko he tahi ʼe ina tō te pata ʼe ina maumauʼi te fakatotonu ʼa Sesu ʼo ʼuhiga mo te ʼofa ʼaē ki tona tatau. (Mateo 22:39) Neʼe mahino kiā Charles ko te higoa ʼaē neʼe foaki age ko “te tagata gāue kele lelei ʼo te pata” ʼe ko tona ʼuhiga moʼoni ‘ ʼe ko te tagata fai fakapo,’ pea neʼe matehi leva e Charles tona ʼu fuʼu pata. Neʼe tuputupu ʼi tana ako Tohi-Tapu pea neʼe papitema, ʼi te temi nei kua liliu ko te pionie kātoa pea ko te tagata faifekau faka minisitelio.
19 ʼE tou ʼiloʼi papau ko Sehova ʼe ina luluʼi te ʼu puleʼaga ʼaki te faka mafola ʼaē ʼe fai, pea ko te ʼu hahaʼi ʼaē ʼe manakoʼia, ʼe nātou ʼōmai kiā te ia. (Asea 2:7) Ko Pedro ʼaē ʼe maʼuli ʼi Potukalia, ʼi tona taʼu 13 neʼe hū ki te seminalio. Neʼe fakatuʼutuʼu ke liliu ko he misionea pea ke ina akoʼi te Tohi-Tapu ki te hahaʼi. Kae ki muli age, neʼe mavae mai ai he neʼe tahitahiga tanatou fakaʼaogaʼi ia te Tohi-Tapu. Hili taʼu e ono, neʼe ina ako te psychologie ʼi te univelesitē ʼi Lisbonne. Neʼe nofo ʼi te ʼapi ʼo tona mahikitaga, ko te Fakamoʼoni ʼa Sehova, ʼaē neʼe ina fakaloto mālohiʼi ia ia ke ina ako te Tohi-Tapu. ʼI te temi ʼaia, neʼe lotolotolua ia Pedro ki te maʼuli moʼoni ʼa te ʼAtua, pea neʼe mole ina ʼiloʼi peʼe tonu ke ina ako te Tohi-Tapu peʼe kailoa. Neʼe ina fakahā te faʼahi ʼaia ki tona polofesea ʼo te psychologie. Neʼe ʼui age e tana polofesea, ʼe ʼui ʼi te psychologie ko te hahaʼi ʼaē ʼe mole feala ke nātou fai he ʼu tonu ʼe nātou maumauʼi tonatou sino ʼo nātou totonu. Koia neʼe fakatotonu ai leva e Pedro ke ina ako ia te Tohi-Tapu. Neʼe hoki papitema ʼi te ʼu taʼu pe ʼaenī pea ʼi te temi nei ʼe ina fai tana ʼu ako Tohi-Tapu.
20. He koʼe ʼe feala ke tou fakafiafia ki te fai fagonogono ʼaē kua kaku ki te ʼu potu fuli ʼo te kele?
20 ʼE mole tou ʼiloʼi peʼe feafeaʼi anai te aʼu ʼo te fai faka mafola ki te ʼu puleʼaga, pea ʼe mole tou ʼiloʼi te ʼaho pea mo te hola ʼaē ka hoko ai anai te fakaʼosi, kae ʼe tou ʼiloʼi papau kua vave hoko mai. ʼE tou fiafia heʼe ko te faka mafola ʼo te logo lelei ʼi te kele kātoa, ʼe kau ki te ʼu fakaʼiloga ʼaē ʼe tou ʼiloʼi ai kua ōvi mai te temi ʼaē ka fetogi anai te ʼu puleʼaga fakatagata e te Puleʼaga ʼo te ʼAtua. (Taniela 2:44) ʼI te taʼu fuli, ʼe maʼu te faigamālie ʼa te lauʼi miliona hahaʼi ke nātou tali te logo lelei, pea ʼe ko he faʼahi ʼe ina faka kolōliaʼi totatou ʼAtua ko Sehova. Tou haga faiga mālohi ke tou nonofo agatonu pea mo gāue mālohi mo totatou ʼu tēhina ʼi te malamanei kātoa, ʼi te gāue ʼaē ko te foaki ʼo he fakamoʼoni ki te ʼu puleʼaga kātoa. Kapau ʼe tou fai feiā, pea ʼe tou hāofaki anai ia tatou pea mo nātou ʼaē ʼe nātou fakalogo mai.—1 Timoteo 4:16.
ʼE Kei Koutou Manatuʼi Koa?
• He koʼe ʼe maʼuhiga te lea faka polofeta ʼo Mateo 24:14?
• Neʼe koteā te ʼu faiga ʼa te ʼu ʼuluaki Kilisitiano ʼi te fai faka mafola, pea neʼe koteā tona ʼu fua?
• Neʼe mahino feafeaʼi te kau Ako Tohi-Tapu neʼe tonu ke fai he fagonogono ki te ʼu puleʼaga kātoa?
• Koteā ʼaē neʼe koutou leleiʼia ʼi te ʼu gāue ʼa te ʼu kaugana ʼa Sehova ʼi te taʼu gāue kua hili?